|
|
 كراب الشتاء الراخى وحداشر بت
|
كراب الشتا الراخي وحداشر بت
ــــــــــــــــــــــــــــــــ
أطلع من الغنا
اطلع من الزيف مرات
بتطلع من اليوم السنة
وامنع من النيل المطر لو جاط مسيخ
وسعرت طيور القيف
علي كيف المنى
يا حاضرين هذا المجال
من وين
بنغرف للبنات عيونن والصبر ؟
وليونة الروح والعمر ؟
دا ما شأن العواطف
تستدير في حكري
أو من بدري للغير
ومن رحم طاير صغير
جات الحياة
أهي دي الحياة ......
محاصر بالهجير والشوق
مغطني البرابرية
سدادة الدار
خشب ريفي
الإتقرجو الطمبارة
مدسوس زي د رادم اب طافة
في الشقريب
لحاظ اب قدمو الناجين
يا مد الحراز الدم
سقايتك جافة
من نشر الخرت بايعين
سقام الروح ؟
نلم الفاقة في شوفتك
زمن لا غيرن حاجاتك الحاجات
ولا ارض الحجر حافة
زمن فضفض
ولا .... تغمد
ويملاك من جديد الفك
زمن قحة
ولا .... بيهمد
يقدك ريفك الصحة
ويجيك ... برة
زمن حرة
وزمن فتار
زمن لا دنقر الدفاي
ولا نضفن مراحيضك
زمن غياب
متين ما تكوس حضور دمك
يفور همك
يطق النابل الطياب
احوطك لا خرير .. لا جاي
كان ام حضة فيها جباية
وكان ترجامي متعورب
بجيبك بالطرماشي
ولا هماني سفاية
انا المنك ولا منك
من الفقرا البراهم بيك
نسوك عندي وبلا محاية
وزي ام بارح ...
مكملنا السهر دامرقا
ولادك ؟
مون ولاد الريح
رحم بنوتك التجريح
يلاقنك ...
سكاكرا
لا هدم لا صوت
وتبكي .....
يماسنك ... رهان بالعد
اذا غيبت لينا الشوف
وشبرت العدم بالطي
وكان الدنيا طيرة وزير
واتحركت ...
لي اخر صناعة الدم
وغمضتا ....
اتمليت بي ازمنة غيرك
وقفت لقيتى دي ما الدنيا
ولفة طويلة
لحدي ما تاني ويلاقنك حداشر بت
بت لبان
وبت طوفان
وبت نيلة
وبت قرايا للنجمات
وبت عاملا النسيم محبوب
وبت في عيونا بنشيلا
وبت من توب
وبت وضاية للزهرات
وبت في النوم
وبت عوامة
وبت مافي
حداشر بت
محاصر بالهجير كنا
وهسع ست
مكتفنا البكم ريحان
معاد بالسور
مجدع بالحبر لونين
قعاد البور
وطفاي المها السارح
يا جابدنا في لياسنا بالحيمور
شقينابك
افتل البير
سنج بعدك ؟
دي مي سنج البراح الحي
قيم في الناس ؟
دي مي قيم الحواس ام ري
ومبروكات عليك ....
ليحان نشاك اب لبف
بيتلاقن ....
اكان الدابرة مجروحة
بيتلاقن
وكان الامنية اتقسمت
بيتحابن عليك بنوت
دروبن تامة مطروحة
يا غيماتنا في الحمالة والمشرق
كبن ساي
وادفروني البلد بريك
تبرك بي اللفيخ .... مخنوق
وتبرك بي الطفيق .... ابرص
وتبرك بي الخرم .... مشنوق
وغصبا عنك
انت الناس
وانت الجاي ... ضد الناس
وانت المبهم المحروم
من الارث البغنوبو
وبقولو احساس
سعينابك سعية وضيم
قلينابك تمر لالوب مع القضيم
وانت تسوي في سواتك
وبيناتنا المسارق خوخ
وضل النيم
وكراب الشتا الراخي
وضيفين من تعب يلقوك
تسقي الريف المافي
بتسقي على امل واحد
وتبدا لميعك النعسان
لو عطش العمر في الغيم
يقدم للعيون رسام
واشوفك ....
بي البشوف حراسو في الضحلة
وزي قيد المسيرية ...
البقيد اللينة في الرملة
مكتف في الوطن حافي
يا بت عيسى في الازرق
تفري الطرحة للرحلة
ترب هدل السكينة يجف
وعريقا ... يغاير الريح
دخلنا علي القياس طفلة
لقينا الحب مع الريفية ..... سيافي
وفي ال########ة غير الحسنى
ما بتطيبي تتعافي
دحين اختو البكانات طب
بقينا اغراب
يا نحنا المشيناها
ويا دخلوا وقفلنا الباب
قفلنا العين علي الصباب
ترا الملاجة بي يعاينوا
محاصر بالهجير والشوق
مغطني البرابرية
سدادة الدار
خشب ريفي
الإتقرجو الطمبارة ....
|
|
 
|
|
|
|
بله محمد الفاضل
فيس بوك
تويتر
انستقرام
يوتيوب
بنتيريست