الثنائي/ د.( محمد جعفر +الصادق حسن).. بجمهورية مصر في الثمانينيات...تجربة ثرة يجب أن لا ننساها

Quote: الجا من الجريف ..الجا من الجبل الربط الدايرنوا ناس محمد سيداحمد وبت الكارب ..يعني امبارح مع الليله دا حنقوم نجيهوا باستعراضنا لتجارب ونماذج لاولاد وبنات نزلوا مصر التمانينات عشان في حاجات قاعده تحير وبتحير ناس كتار لحدي حسع ونشوف البرنامج الانحازو ليهو دامقاسو بيلبس اي زوول مهما كان عمرو ولا لونو ولا بياض سنونو.............. ( طاهره وياسر الطويل): شاب وشابه كل واحد جاي براه وكل عندو حتتو الجا منها وزمنو الجا فيهو بتفقوا الاتنين في حاجتين واحده انهم الاتنين لقوا نفسهم في اسيوط محل ما الترعه الابراهيميه بتبدأ والتانيه حتجي سيرتا بعدين .... ياسر العتي ود امدرمان واي حاجه في امدرمان بتعجب زي مابقولوا اهلا ..الاكل وفي الاكل دا ... السكن ليهو مع زوول من امدرمان بعرف انهم مابحبوا اللغاويس .. امدر بلد الكوره .الكوره في واحد زميل كان بقول اتو الكوره ملهاة الجماهير عن قضاياها الاساسيه انا ما عارف لحدي حسع كلامو دا صاح ولا غلط وهو ذاتو جابو من وين وحبيبنا دا اصلو من عبدة النصوص ...الغنايين في امدر ناس ابراهيم عوض وعاصم البنا ..والمدورين سياسه كان جد ولاهظار ود المهدى .. ابو الزهور الخرق الدستور وفاطمه اخت البدور ..وناس الديش في امدرمان مميزين ودالعطا ..ودالنور...ودالكد وكان رضينا ولا أبينا النميري وسوارالدهب ....وسماحة بنات امدرمان كان متعلمات ولا اميات واولادا المفتحين ...وسط زي دا قام فيهو الفارع ياسر لو رقد في سريرو بالليل بيسمع الغنايين في بحر ابوروف ومرات بيكون معاهم وممكن يمشي بسفنجتو يحضر ندوه في ميدان الاهليه...ماأصلوا ما حايعاينو ليهو في كرعيهو وكان عاينوا ليهو مافارقه معاهو لا معاهم ....اها دا زول مليان حيا لامن مدفق جا المركز بتاع الصعيد الجواني باللهي شوف شن جاب لي جاب ........يازملا في زوله صغيرونه وخضيره ولابسه ليها توب لو ختت الرحمن في قلبه " الاصلو مرحمن " يلبس معاها اتنين تاني التوب الفتقه الواحدي ماكان استحدثوه ما دا مربوط (بفقه) قدر ظروفك البدأ في 89 .. والبوصف دا زول كايسلو تكليف بتاع متابعه .. يازميل انت عاوز تقول شنو ..واللهي يازملا البت دي.. يازميل انضبط انت في اجتماع بت شنو ....قول الطالبه .. الزميله .."اصلو احنا كان عندنا تجانيات كتار"..شوفو يازملا الزوله دي من ما بدا الاسبوع السياسي ل ج د ساكنه وحفظت المعرض كلوا وحافظه الاغاني بتاعت شريط الحمله الانتخابيه للحزب .. اها يازميل ناقشتها ..يازميل اناقش شنو دا انا ماقادر افهم كلاما ..يعني شنو مابتتكلم عربي ؟ يازميل بتتكلم شايقي ..كيف يعني الشايقي دا ما عربي ..يازميل اسمها منو ؟ اسمها (طاهره) وجايه برلومه من السودان حته جنب حته اسمها نوري في الشماليه وبعدين الزوله دي الندوات كلها حاضراها ولاحظت انها بتعاين للزول شديد لمن تقول ياربي في شنو؟ ......ودي طاهره الجات من ريفي نوري ال نوري ذاتا عندها مركز ..جات جاهزه ... دي كيف ماعارف يعني تكون قدت هناك كيف ؟ المهم الجماعه قالو ينتظرو توصيلته ..يازملا توصيلتا لمن تجينا الزميله تكون اتخرجت خلوها تشتغل بعدين الزميله تكابس للشغل ماتحبطوها .. دا كلو نقوم نربطو بالمدور من الاستقلال لحدي الليله ...يعني زول زي عمك نقد كم وستين سنه بيعافر مرات تحت الارض مره فوقه يحفر ويردم مطلق الدنيا معقول يكون مافي بصيره ..ماممكن الناس ديل ربنا مايجازيهم على صبرهم وجلدهم وتحملهم وتضحياتهم نحن متأكدين انو حيجازيهم في الدنيا قبل الاخره وذلك بانو برنامج ( ثود) سوف يسود ودا البرنامج البشر بيهو عبد الخالق وايزادور عيسى وطاهره وياسر ولمن يسود بنشيل نخمج فيهو لحدي نطلع السبكه اللهيا ...وسنعود لنحكي كيف سيسود برنامج ( ثود) وعشان ايه ؟

(عدل بواسطة Atif Makkawi on 01-24-2008, 02:27 AM)