الجيل الجديد ..مشكلة ضياع الهوية .. داخل الوطن أو خارجه... جميع الطبقات
أعــــــــزائي أنا هنا ما عاوز أكون شاهد علي أبناء و بنات جيلي .. لكن عاوز أشهد ضد العصر اللي خلاهم في حالة سيئه زي دي من عادتي اني بتعامل مع جميع الشرائح و عندي صداقات من جميع الشرائح .. و اللي ممكن نلخصها في ثلاث شرائح : 1- شريحة برجوازية و تشمل : الارستقراطيين و محدثي النعمة و الطفيليين 2-شريحة سفلي و تشمل : جميع الموظفين في المصالح الحكومية و العمال 3- شريحة المغتربين أما بالنسبة للشريحة الوسطي فقد اختفت تماما من السودان و لم يعد لها أي وجود فعلي .. لهذا لم أذكرها أنا ما حأحاول أعرض فكرة ضياع الهوية بالنسبة لي أبناء جيلي كدراسة .. لكن حأعرض بعض المواقف اللي عايشتها من أصدقاء أو معارف أو حتي شفتها في الشارع من هذه الطبقات الثلاثة ..و بالتحديد من أبناء جيلي .. و انتم حكموا و أدوني نسبة مئوية لمعدل الضياع الحادث 1 - نبدأ بالشريحة البرجوازية التي تشمل : الارستقراطيين و محدثي النعمة و الطفيليين - يعيش أبناء هذه الشريحة في حالة غربة داخل أوطانهم بشكل غير واضح .. لاحظت انقطاعهم التام عن قضايا الوطن فهم برغم وجودهم في مركز النار أي داخل الوطن لا يمسهم منها حتي الشرر حأعرض هنا موقف : سألت صديقة لي من هذه الشريحة عن رأيها في النظام العام .. و طبعا سجلت كلامها بعد فترة بسيطة عشان أتذكرو لكن طبعا ما بالنص كتبتو .. يعني الحوار الحقيقي بيختلف عن ده شوية .. في اللفظ لكن ما بيختلف في المعني ( ملاحظة دار هذا الحوار في حفلة ) - رأيك شنو في النظام العام ؟ - فكره كويسة - رديت و أنا مصدوم من ردها : كويسة من أي ناحية - بيحفظوا النظام و مافي بت بتقدر تقل أدبها - لكن هل هم ناس محترمين عشان يكونوا أوصياء علي بنات و أبناء الناس و يدوا نفسهم الحق في انهم يأدبوهم ؟ - البنات هم اللي خلوا الحكومة تضطر لي انها تعمل كده .. يعني عاين للبنات اللي في الحفلة دي شوفهم لابسات كيف ؟ .. البنات هم اللي خلوا وجود النظام العام ضروري - عاينت ليها هي .. قلت ليها لكن انتي لابسة زي ما عاوزة - دي حفلة يا مودك .. و كلها ناس أهلنا - نفس الفكرة بالنسبة لي باقي البنات ديل .. دي حفلة و ديل ناس أهلهم .. بعدين بالمناسبة .. المجتمع السوداني مجتمع فاضل بالفطرة .. و أي انحراف حصل ده بسبب الجبهة الاسلامية و ضغوط النظام العام و غيرها .. و هو بيعتبر شكل من أشكال التمرد علي الظلم و ما ممكن يكونوا البنات اسوأ بي أي حال من الأحوال من الجبهة الاسلامية - مودك انت تاني رجعت لي فلسفتك الفارغة دي - عارفة انتي مع فكره النظام العام عشان المسألة ما بتمسك شخصيا .. انتي بتسوقي عربيتك المظللة من البيت للجامعة يعني ما بيقابلوك ذاتو ! .. شفتيهم قبل كده بيمسكوا في زول ؟ - لأ - أنا شفتهم و بتمني لو اني ما شفتهم لأني لمدة سنة كاملة بعدها بتذكر الموقف و بحاول أتوازن - مودك غير الموضوع - طيب .. و سرحت في الحفلة و غير الحوار ده خضت حوارات كتيرة عشان أعرضها بكري مسكين حيدفع كتير لأني حأكون مليت السيرفر * طبعا زي ما انتوا شايفين انو الشريحة دي ابنائها و بناتها عايشين مغتربين داخل وطنهم .. و ده نوع من فقدان الهوية .. لأنهم ساكنين بيوت مختلفة عن الآخرين .. و بيتواصلو بي طرق مواصلات مختلفة عن الآخرين ... و عايشين في جو مختلف عن باقي المجتمع خلينا منهم .. مساكين و نمشي لي الشريحة البعدها 2- الشريحة السفلي .. طبقة الموظفين الحكوميين و العمال : غبت سنة و نص و رجعت السودان .. لقيت الأشياء اللي كانت بتتحرك بي بطء نحو الجحيم وصلت الجحيم .. لكن أنا ما كنت هناك لما الأمور وصلت الجحيم ... عشان كده أنا مجرد شاهد في الفترة اللي أنا غبت فيها .. و رجعت .. لقيت أصدقائي و زملائي القدامي كلهم أدوا الخدمة الالزامية .. و خرجوا منها أناس آخرين بعضهم كانت ظروفهم صعبة من زمان .. بعضهم ما قدروا يستحملوا رجعت السودان و لقيت أصحابي و زملائي الزمان كلهم أحد الخيارات التالية : 1- سطلجية أقصد بيسطلوا 2- سكرجية أقصد سكيرين 3- سواقين ركشات و ده الغالب طيب الناس ديل بقوا متين كده ؟؟؟ أنا تركتهم طلاب مدارس .. أقصي تمرد ليهم انهم ينطوا سور المدرسة و يغشوا في امتحان .. الحصل شنو ؟؟ الموقف ده حيوريكم الحصل شنو لأبناء الطبقة دي : في يوم ممطر .. في الصيف الفات شهر 7 بالتحديد .. طلعت من البيت حوالي الساعة 8 مساء و مشيت انترنت كافيه في امدرمان .. من حسن حظي كانت الكهرباء ما قاطعه رغم المطر .. لقيت النت و قعدت بالساعات .. و بتاع المحل صاحبي بيفتح عشاني عادي .. يعني ما بيقفل لو أنا ما طلعت براي من المحل .. المهم أنا سرحت و ما انتبهت للوكت لحدي ما فات الوكت وكت حظر التجول .. و دوريات التفتيش .. المهم انتبهت و حسيت بي اني شريت الزول بتاع المحل كتير .. المهم اتوكلت دفعت ليهو و اعتذرت ليهو عن التأخير و طلعت .. أظن ناس البيت كانوا قلقوا علي فقاموا رسلو لي زول من ناس البيت .. ركب ركشة و جاني .. أنا طبعا كان حظي كويس لأني كنت شايل هم المواصلات في الليل داك .. أول ما طلعت من الانترنت كافيه لقيت الركشة دي جاية .. المهم ركبت .. أول شيئ لاحظتو انو سواق الركشة فاتح محمود عبد العزيز بي أعلي صوت ... مع المطر و الهواء و صوت محمود عبد العزيز حسيت بي انو سواق الركشة ده عندو نوع من الرفض للحالة اللي هو فيها .. فجأة بادرني هو بالسؤال : محمد قسم الباري كيف حالك ؟ طبعا اتفاجأت بالسؤال .. خاصة انو هو ذكر اسمي .. قلت ليهو تمام .. عاينت في المراية و لقيتو زول صاحبي جدا جدا .. كان في الابتدائي بييجي يقيّل معاي كل يوم أقصد بيقعد معاي من بعد المدرسة لحدي بالمغرب .. و أخوهو صاحبي و قرا معاي لغاية الاعدادي و لا قيتو في مصر بعداك و كان آخر زول من الشلة ألاقيهو - سألتو .. قلت ليهو انت ليه سايق الركشة دي ؟؟ - و ليه ما أسوقها ؟ - و ليه تسوقها ؟ - لكن أنا أعمل شنو ؟ - طبعا ما عرفت أجاوب .. حسيت بي صوت محمود عبد العزيز متضامن معاهو هو فاضطريت أسكت - سألتو عن عدد كبير جدا من الاشخاص الزمان .. و كل ماأسألو عن زول منهم بيكون جوابو أحد الآتي : - بقه قاعد يطشم اليوم كلو ما بيعمل في أي شيئ - اتعلم البانجو و بتلاقيهو قاعد عند فلان 24 ساعة - سايق ركشة زيي و لما اسألو عن السبب عارفين السبب بيكون شنو ؟؟؟ اللي بيكونوا اشتغلوا سواقين ركشان بيكونوا امتحنوا الثانوي و ما قدروا يدخلوا الجامعة عشان ما أدوهم شهاداتهم اللي بيتعلموا الشراب .. بيكونوا اتعلموهوا براهم كنوع من التمرد حسبما فسرتها أنا أما اللي بيكونوا اتعملوا البانجو عارفين بيكونوا اتعلموهو وين ؟ في المعسكــــــــــــــــــر و انتوا ما قريتوا الكلمة غلط ... في معسكرات الخدمة الالزامية بيتعلم ابناء الناس البنجو عشان يتماسكو ..و بعد ما يطلعوا بيكونوا ناس hopeless لما وصلت البيت ما عرفت أنزل و لا اخليهو يوصلني المطار و لا أنا نفسي أطير و أحلق بعيد من الوطن .. دي حالة الطبقة السفلي و مبروك للسودان شباب الغد ... ألف ألف مبروك 3- شريحة المغتربين : طبعا دي أكتر شريحة بيحلوا لي الكلام عنها ... لأنو ما بتحتاج معاي تذكر شديد .. كل يوم بشوف مواقف و بسمع و بعايش ببساطة لأني حاليا بنتمي للشريحة دي .. و ان كنت بعيش حالة غربة عن الشريحة دي اللي هي أصلا في غربة طبعا أهم صفاتهم انهم مساكين بل و مساكين جدا منقطعين من مجتمعهم .. فقدوا جميع صفاتهم السودانية و بيحاولوا يكونوا شخصية جديدة لي نفسهم .. لكن منو المثال اللي ممكن يكون قدامهم ؟ طبعا الاجابة الفاجعة انو المثال اللي ممكن يكونوا منو شخصياتهم هم الجنسيات الأخري بالتالي هم - ما عندهم شخصية سودانية و لا ارتباط بالوطن - بيحاولوا يبحثوا عن شخصية بديلة ينتهجوها في حياتهم و بيبحثوا في المكان الخاطئ طيب أحكي ليكم موقف بيحصل لي كل يوم أكون قاعد .. و معاي شلة أشباه اصحابي و صحباتي .. كلهم بيعرفوا تماما يتكلمواسوداني .. لكن الكلام بي أي لغة ؟ : الانجليزي الأمريكي و الونسة كلها عن انو 2pac الزول الاسمو مات ولا دي اشاعة ؟ و عن ماريا كاري .. و ليوناردو دي كابريو .. و ويل سميز .. و نيكولاس كايدج .. و آخر فيلم نزل في السينما .. و الليلة المول عملوا فيهو زينة .. و موبايل النوكيا الجديد .. و طبعا الشي اللي لا بد منو هو القطيعة في بعض - فلانة بتحب فلان - فلان مكسر في فلانة -الليلة فلانة ضربت لي طبعا أنا أول أيام حاولت أنخرط في المجتمع ده .. لكن حسيت بي نوع من السطحية ما قدرت احتملها .. عشان كده فضلت أسجن نفسي في البيت و ما أطلع .. يمكن منفذي الوحيد للبشر النت .. و بس عارفين ديل - أقصد أبناء و بنات الشريحة دي - أكتر ناس مظلومين لأنو ده ما ذنبهم .. ما هم اللي اختاروا الغربة .. لكن أنا أبصم ليكم بأصابعي العشرة انهم ما ممكن في يوم من الأيام يرجعوا و ينخرطوا في المجتمع السوداني من جديد .. عارفين مرة سألت واحدة من بنات المجتمع ده .. قلت ليها رأيك شنو في السودان ؟ عارفين ردت قالت شنو ؟ قلت : يييييع يعني قرفت من اسمو بس قلت ليها ما عاوزة ترجعي .. أو حتي تشوفيهو ؟ قالت لي : لأ لكن عارفين اللي هنا في دول الخليج أحسن حالا لأنهم علي الأقل بيتكلموا سوداني .. و الله أنا شفت ناس سودانيين ما بيعرفوا ولا كلمة .. بل و ما بيعرفوا انو السودان في أي قارة و لا عاصمتها شنو .. و لا هي هي أصلا شنو ؟ و الأسوأ من ده : انهم ما عارفين انو آبائهم قدموا الكثير للسودان أو كانو مناضلين و انو السودان بيعني لي آبائهم الكثير ... لكن دي كلمة مني لي كل أبو مناضل زي ده : انت قدمت للوطن الكثير لكن قدمت لي أولادك أو بناتك شنو ؟ أرميهم في التجارب الصعبة .. عسي و لعل يوم يحبوا الوطن الصعب .. و ما تظلموهم تصدقوا أنا لاقيت أبناء شعراء و كتاب و مناضلين ما عارفين أنو آبائهم شعراء أو كتاب أو مناضلين ؟ كده غطيت جزء من المشاكل اللي بيتعرض ليها جيلي الحالي .. رغم اني ما غطيتها كلها لكن حسبما قسمت المجتمع .. عشان تتغطي بالكامل و أحكي ليكم جميع المواقف .. محتاج منكم حوالي اسبوع من الكلام بلا انقطاع .. و انا هسعدي تعبت و يدي تقلت في الكي بورد .. لدرجة اني حأنشر الموضوع و أمشي أنوم طوالي .. لكن علي الأقل حسيت بي راحة نفسية .. اني نقلت ليكم صورة حقيقية في وكت أصبحت فيهو الحقيقة أندر من شاب صالح في المجتمع السوداني لكم كل حبي .. بانتظار تعقيباتكم علي الموضوع الطويل ده لكن ده مش شيئ يدعو للبؤس ؟ جميع الشرائح عايشة حالة غربة تامة .. غريبة حتي عن نفسها و جذورها .. منو اللي حينقذهم ؟ منو اللي حيبني السودان من جديد ؟؟ منو اللي حيستمتع بالديموقراطية لما تجي ؟ أصلا أبناء جيلي المساكين ما حيحسوا بيها لو جات .. لأنهم مسجونين في ذاتهم .. غريبين عن وطنهم .. أنقذوهم... مساكين محمد قسم الباري (عدل بواسطة Modic on 01-11-2003, 12:03 PM) (عدل بواسطة Modic on 01-11-2003, 12:04 PM) (عدل بواسطة Modic on 01-11-2003, 02:08 PM) (عدل بواسطة Modic on 01-12-2003, 10:01 AM) (عدل بواسطة Modic on 01-12-2003, 10:39 AM)

[رد على الموضوع] صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]