|
|
|
 Re: خضر حسين واخرون ضد النظام العام (جلد 26 طالب نوبي بالجامعة الاهلية 99) (Re: hanouf56)
|
صيف 99 ..
اتحاد الراوبط النوبية بالجامعات والمعاهد العليا يستعد لقافلتة الاولي لمناطق حلفا السكوت المحس دنقلا ووادي حلفا ..
اجتماعات كل يوم الاربعاء او الثلاثاء ما متاكد بالنادي النوبي لكل الروابط النوبية بالجامعات ..
رابطة النوبة الاهلية يعلن حفل الاستقبال في اليوم المحدد والمعروف لكل الروابط بيوم الاجتماع العام بالنادي النوبي
قرار الرابطة يقابل بعدم رضاء من الاتحاد الذي كان في قيادته اكثر من طالب من الاهلية ومع ذلك يقرر الاتحاد مشاركة الرابطة حفلهم ..
الحفلة كانت في حدائق الشريف الهندي ببري
| |
 
|
|
|
|
|
|
|
|
Re: خضر حسين واخرون ضد النظام العام (جلد 26 طالب نوبي بالجامعة الاهلية 99) (Re: hanouf56)
|
مشينا الحفلة ..
كانت حفلة نوبية رائعة ..
اكثر من 500 طالب نوبي من مختلف الجامعات ..
كل شئي كان يسير طبيعيا حتي الساعة الرابعة مساء ..
حينا قررنا انا ومجموعة من الشباب التوجيه للنادي النوبي من اجل الاجتماع العام ...
عبد الدنقلاوي .. كان من المفروض يمشي معانا علي حسب اتفاقو معانا ..
وياريتو كان مشي :) ...
غادرنا مكان الحفلة وتوجهنا للنادي النوبي .. حوالي 10-15 طالب علي امل ان نلاقي بقية الطلاب القادمين من باقي الجامعات ..
| |
|
|
|
|
|
|
|
|
|
Re: خضر حسين واخرون ضد النظام العام (جلد 26 طالب نوبي بالجامعة الاهلية 99) (Re: hanouf56)
|
وصلنا النادي النوبي حوالي 4:30 مساء .. وبدأنا في الاجتماع ..
بدأ نبيل حافظون (رئيس الاتحاد وطالب بالاهلية وعضو لجنة تنفيذية بالاهلية)الاجتماع بتوجيه صوت لوم للجنة التنفيذية للرابطة الاهلية وبدأ النقاش حول اهمية مراعاة الروابط لهذا اليوم لفترة محدودة حتي انتهاء مشروع القافلة ..
وبدأ النقاش حول اهمية يوم الاجتماع ..
اقل من 10 دقائق من بداية الاجتماع ...
عبد الرحيم البرعي ومجموعة من طلاب الاهلية يصلون النادي وهم مفزوعون ويبلغون المجتمعين .. بان النظام العام اعتداء عليهم بالضرب والاهانة واعتقال اكتر من 26 طالب نوبي رغم وجود تصديق للحفلة (رحلة الاستقبال)
زهول عام ..
| |
|
|
|
|
|
|
|
|
|
Re: خضر حسين واخرون ضد النظام العام (جلد 26 طالب نوبي بالجامعة الاهلية 99) (Re: Tragie Mustafa)
|
Quote: يجب ان اشير الي ان اللجنة الافريقية لحقوق الانسان والشعوب قد
اصدرت حكمها في هذه القضية ضد حكومة السودان بحكم مسبب يتضمن
اوامر ولضحة لحكومة السودان ونظامها العدلي اضحي احد مواد التدريب
علي الميثاق الافريقي لحقوق الانسان والشعوب واعمال اللجنة الافريقية
لحقوق الانسان والشعوب...ساسعفكم به في حينه. خالص الود |
الاستاذ ... علي العجب
شكرا لمداخلتك المهمة ...
مرحلة استئناف الحكم الذي قادته المحامي القدير احمد رمرم مرحلة تستحق التوثيق ...
اصرار الاستاذ احمد و رابطة النوبة في المواصلة في القضية حتي نهائتها رغم الجلد والغرامة ...
كل الود
| |
|
|
|
|
|
|
|
|
|
Re: خضر حسين واخرون ضد النظام العام (جلد 26 طالب نوبي بالجامعة الاهلية 99) (Re: hanouf56)
|
كل المحاولات باخراج المعتقلين كانت تقابل بتعسف شديد ومطالب تعجيزية من ضباط النظام العام بالمقرن ...
حتي وصول المحامين حوالي 9 مساء المقرن ... تحديدا لست متاكد من اسماء المحامين بالضبط ..
استطاع المحامين اقناع وكيل النيابة بالامر بالافراج عن الطلاب علي شرط ان ياتي الجميع 10 صباحا في محكمة النظام العام بالخرطوم 2 ...
الغريب بقينا نفتش في زول عندو بطاقة شخصية ما لاقينا كلو كلو ... لحدي ما جاي واحد وقال انا عندي بطاقة شخصية وبضمنم كلهم ... كانت من المواقف الانسانية النادرة ان يبادر شخص لا يعرف اكثر من 90% من المعتقلين ويقوم بضمانهم جميعا.. لو واحد بس ماجي الزول دا كان حيجلد بدلو ... :)
حوالي الساعة 11 عشر مساء تم الافراج عن جميع الطلاب ...
اتفقنا جميعا ان نلتقي الساعة 8:00 صباحا في ملتقي النوبة بالنيلين للتحرك للمحكمة ...
تم تكليف لجنة من اتحاد الروابط النوبية باصدار بيان رسمي حول الاحداث وتوزيعه باسم الاتحاد في كل الجامعات واماكن تجمع النوبيين بشكل خاص ... احتوي البيان تفاصيل القصة وطلب من الطلاب التواجد بالمحكمة الساعة 10 صباحا من اجل المساندة والتعضيد للطلاب ...
| |
|
|
|
|
|
|
|
|
|
Re: خضر حسين واخرون ضد النظام العام (جلد 26 طالب نوبي بالجامعة الاهلية 99) (Re: hanouf56)
|
اتمني ان ياتي الاخوة .. الشفيع رمزي وخضر حسين من اجل وصف الذي حدث بارض المعارض بالتفاصيل لانهم كان جزء من الحدث ...
ومهزلة المحكم بشكل خاص وشكل الحوار بين القاضي والعساكر (المحترمين)
حقيقة في طرائف كتير كانت داخل غرفة المحاكمة ولكن احسن يقولوها اسيادا (الشفيع رئيس الرابطة ... وخدر المتهم الاول :) ) المتهم الاول دا ع########ي لله والرسول يا خدر
| |
|
|
|
|
|
|
|
|
|
Re: خضر حسين واخرون ضد النظام العام (جلد 26 طالب نوبي بالجامعة الاهلية 99) (Re: hanouf56)
|
والله ياهنوف بالغت
شابكني خضر المتهم الأول المتهم الأول
يازول السته وعشرين طالب وطالبة كلهم كانو متهم (أول)
المضحك طبعاً بعد ركوبنا لوري النظام العام كان في حوار
بيني وبين الشفيع رمزي ـ طبعاً منظرنا للأمانة كان عجيب
مجموعة من الشباب والشابات والعساكر بصفروا وكواريك
وتصفيق ولكأنهم راجعين من غزوة مباركة
أغرب مافي الموضوع وياريت استاذ علي عجب بتذكر
انو لما جوا المحامين وكان معاهم علي ما اذكر غازي سليمان
نا النظام العام زهجوا من كواريك غازي ودخلوهو معانا
لما يقارب نصف الساعة
بخصوص الجلد والضرب والاهانات الله لا يوريك يا هنوف
أهو اخدنا الفيهو النصيب قبل المحاكمة
وبعد المحاكمة برضو اخدناأكتر من النصيب
تحية واجلال من هنا لرابطة ابناء النوبة ولتجمع الروابط
الاقليمية والثقافية والاكاديمية بالجامعة الاهلية ولعمادة
شئون الطلاب وقتها وللبروف كدود وللقوي السياسية بالجامعة
ولاتحاد الروابط النوبية والجبهة الديمقراطية للمحامين
ولكل المحامين الشرفاء الذين وقفوا معنا في قضيتنا
يومها ولروح الاستاذة نازك السلام .
| |
|
|
|
|
|
|
|
|
|
Re: خضر حسين واخرون ضد النظام العام (جلد 26 طالب نوبي بالجامعة الاهلية 99) (Re: حمزاوي)
|
عم حمزواي ..
ازيك ياخي
الشوق بحر والله ..
خدوري دا انا لو كنت اتاخر اسبوع واحد بس في جدة من يوم 7-7-2007 كان خلاني اشرف معاه في السجن بجدة ... :)
برضو الشفيع كان في جدة معاهم .. لكن انا ما عارف الشفيع دا حكايتو شنو ... ناس النظام العام ركبوه مع 26 طالب في اللوري ومشينا القسم لقيناه برة والبقية جوة السجن ... وفي جدة نفس الحكاية ... خدوري جوة وهو برة ... !!!؟؟
| |
|
|
|
|
|
|
|
|
|
Re: خضر حسين واخرون ضد النظام العام (جلد 26 طالب نوبي بالجامعة الاهلية 99) (Re: hanouf56)
|
| Quote: وفي جدة نفس الحكاية ... خدوري جوة وهو برة |
للمعلومية يا محمد في جده الشفيع كان معايا جوه الجك
قعدنا ايام عجيبة متنقلين في سجون السعودية
شئ بريمان وشئ ما تعرف شنو وشئ المباحث الجنائية
غايتو كانت ايام نجسة لكن اهو نقول شنو دي قسمتنا ياصاحب
ـــــــ
بالمناسبة يامحمد
في مشكلتنا مع النظام العام كانت معانا قريبة فتحي خليل
اتقبضت معانا برضو
لكن يوم المحكمة والجلد الصحي صحي
غابت ولكأنها فص ملح وذاب
وثبتن بناتنا وانجلدن معانا دق العيش
| |
|
|
|
|
|
|
|
|
|
Re: خضر حسين واخرون ضد النظام العام (جلد 26 طالب نوبي بالجامعة الاهلية 99) (Re: خضر حسين خليل)
|
| Quote: شابكني خضر المتهم الأول المتهم الأول |
الحكومة قالت انت المتهم الاول با خضر ... حنقالط الحكومة (خدر حسين واخرون)
....
من اجمل التعليقات علي موقف الشفيع لامن العساكر بداو يضربو الناس في محل الرحلة في بري ... واحد قال هو الشفيع دا معانا واله معاهم ... (الشفيع علي حسب اكثر من شاهد للواقعة كان يمنع استخدام العنف المضاد ضد العساكر من قبل الطلاب .. حقيقة كان موقف حكيم باعتبارو رئيس الرابطة ومسؤل عن سلامة الجميع ويعلم تمام انو العنف المضاد سوف يتسبب في عنف اكثر ليس الا) ... علي حسب شهود ايضا الشفيع اكثر من تعرض للعنف من قبل العساكر لانه كان يقف مباشرة بين العساكر والطلبة ...
| |
|
|
|
|
|
|
|
|
|
Re: خضر حسين واخرون ضد النظام العام (جلد 26 طالب نوبي بالجامعة الاهلية 99) (Re: سفيان بشير نابرى)
|
محمد ادريس وضيوفه الكرام سلامات
نحمد الله اولا وأخيرا انو الواحد كان اتفكفك من البلد@ ذات تايم
وبحمده تعالي كان جاته فيزا وكان بعد اتخصص في الطاقة الشمسية سافر بفيزا عامل
وعليه سمعنا بالاحداث مثلنا مثل هيلاري كلينتون الاتضامنت معاكم
..
بالنسبة لنبيل عمل لي 8 مسكولات ورسالة من الاسكندرية،ابيت ارد عليه رقمه لانو رسالته ما عجبتني ورقمه0020149888748
وارجي التلفونات الحتجيك يا نبيل والكاتل الله عشان تاني ترسل لي رسائل مستفزة
| |
|
|
|
|
|
|
|
|
|
Re: خضر حسين واخرون ضد النظام العام (جلد 26 طالب نوبي بالجامعة الاهلية 99) (Re: hanouf56)
|
Quote: سفيان يا جميل ..
ياخي انت كنت شاهد في المحكمة ... ما تشهد هنا ..
منتظرين شهاتك .. ودا اعتذار رسمي ليك .. هههها |
ههههههه ما قلته أنا شاهد ماشفش حاجة
لووووووووول عشان تأمن ذاتو
Quote: ا سفيان ... سؤال مباشر ...
عشان خدوري داقي جرس في موضوع المتهم الاول !!؟؟
ليه خضر كان المتهم الاول (لاحقا تم تبرئته) ههها!!؟ |
عشان نجاوب علي سؤالك ده نرجع للقصة من اول
لووووووووووووووووول
في البداية الموضوع ده (رابطة أبناء النوبة بالجامعة الاهلية ) ما كان معفي او بعيد من
المتابعة الآمنية ولما اقول كده بقولوا وفي ذهني تفاصيل كتيرة جداً (غالبية العضوية
منظمة في تنظيمات وطنية ضد الكيزان - حراك الرابطة في تجمع الروابط والعمل
من اجل إعادة إتحاد الجامعة - عدد مقدر من أبناء وبنات الرابطة كوادر جماهيرية
فاعلة في النشاط السياسي في الجامعة ).
وكثير من التفاصيل التي لا اريد ذكرها هنا يا سادتي .
تفاصيل ما حدث ذاك اليوم :-
أتي الباص البيكاسو لداخل الجامعة في تمام الثامنة صباحاًووقف بقرب مقر الرابطة
شرق جامع الجامعة مباشرةً إلي الساعه التاسعه والربع ركب كافة الطلاب الباص
وتحركنا بالتجاه لبري مزرعة الشريف زين العابدين (رحمه الله) وبالفعل وصلنا
هناك ووجدنا بعض طلاب النوبة من جامعات أخرى وجدنا الساوند سيستم وبابور
للكهرباء تحسباً بأنه قد لا توجد كهرباء بالمزرعة وبطبيعة الحال كان المكتب التنفيذي
للرابطة حريص علي أن يكون التصديق مستخرج .
نزلنا وشرعنا مباشرة في الاعداد للطعام وتجهزيه من قبل بعض الطلاب وشرع البعض
الاخر في تجهيز البرنامج الاحتفالي وبدأت الفعالية وبداء الطلاب في التفاعل .
كنا نحن ثلاث افراد ضيوف علي احتفال الرابطة ونحن طلاب لا نمت للرابطة بصلة
غير الصداقة والخوة والزمالة والضيوف هم (طارق عبد المجيد - عثمان عجبين وشخصي
الضعيف ).
بداء البرنامج وبعد بدايته بساعة إلا قليل خرجنا انا وعثمان عجبين وخضر حسين (المتهم
ده ذاتو هههههههه) والأخت العزيزة شاهيناز خرجنا إلي النهر وجلسنا هناك نتجاذب
اطراف الحديث والحكايات والمزاح نضحك ملء صدورنا وبعد ما يقارب ساعة ايضاً
سمعنا اصوات ضجيج وصريخ (اظن اننا سمعنا صوت طلق ناري في الهواء ايضاً ولو
انا غلطان خضر يصححني) المهم حينها انا وخضر كنا تقريباً داخل النيل وجزمنا بالخارج
حين سمعنا هذه الاصوات قلت لخضر مباشرةً :- قطع شك ديل بوليس النظام العام وخرجنا
نجري تجاه المزرعة وكلمنا شاهيناز وعثمان ان ياتو بجزمنا معهم ووصلنا الي مكان المجموعة
ووجدنا أن الشرطة تطوق المكان وهناك اشتباك كامل بين الطلاب والشرطة لان افراد الشرطة
تعدوا علي البنات بالضرب والاساءات مباشرة حتي قبل أن يسألوا عن التصديق كان المنظر
اشبه بفلم هندي كبير تمثل فيهو كل الهند في ذات اللحظة دخل خضر حسين مباشرة داخل المعمة
حينها الوحيد الذي كان يحاول أن يوقف هذا الاشتباك هو الصديق الشفيع رمزي وكان يقف
في الوسط تماماً بين الشرطة والطلاب ويتلقي كثيراً من الضرب قررت أن ادعم موقف الشفيع
رمزي وتحركت معه مباشرة وصرت احاول معه وقف العنف لكن كنا اثنين وسط ميات الايادي
وسط هذا الاشتباك شاهدت أن قائد الحملة (اظنه برتبة نقيب) يتعثر ويقع في الشوك بكامل جسمه
بعدها طلب مدد اضافي من الشرطة وبالفعل أتي عساكر اخرون وبعدها تم رفع اكثر من 26 طالب
وطالبة في لوري الشرطة .
تحرك الوري تجاه المقرن وتحرك بعض الطلاب لدار الرابطة من اجل المحامين وتحركنا نحن تجاه
المقرن خلف اللوري .
هناك تم ادخال الطلبة لحراسات النظام العام حينها اخبرت الشفيع رمزي بانه يا الشفيع اخوي كلم الشباب
لو جابو محامين ما يجيبوا غازي سليمان لانو غازي ده حيودي القضية لشو ذاتي وحيعوق القضية اكتر
من يفيدها وبالفعل اخبر الشفيع الجهة المسؤلة من جلب المحامين وهو الصديق العريس نبيل حافظون الذي
خرج من المزرعة قبل هذه الفوضي وهذه المداهمة .
أتي بعض المحامين من رابطة محامي أبناء النوبة وبداءت التفاوض والحديث مع الضابط المسؤل ونسبة
لتاخر الوقت قرر الضابط خروج الطلاب علي أن ياتو غداً باكراً للمحكمة وقبل اجراء الخروج النهائي والذي
كان الضابط المسؤل يكتب فيه أتي السيد غازي سليمان المحامي (وكانت كارثة عظيمة هههههه) كنت حينها
أنا وصديقي عثمان عجبين نجلس أمام بوابة شرطة النظام العام بالمقرن نجلس داخل بوكس احد اعضاء
رابطة الطلاب (جوه البوكس في الخلف انا ظهري للبوابة مباشرةً وعثمان نظره تجاه البوابة) عر
حينها لم اشعر إلا بعثمان عجبين يستلقي علي ارضية البوكس ويجرني معها لارضية البوكس متخذين
الوضعية العسكرية التي تسمى (قيام راقد) وهو يصيح في اذني (اممممممك غازي سليمان جاء والله نحنا
البرا ديل يدخلونا جوه ويتربسونا زي الما حاصل حاجه) هههههههه كان الموقف مضحك حقاً رغم كل شي
وبالفعل دخل غازي سليمان لداخل القسم ووجد الضابط يحرر في ورقة اخلاء السبيل والقدوم غداً ودون أن
يرمش صاح فيه :- إن المرآة حقوقها وواجباتها وووووو وما كان علي الضابط إلا أن نظر له وقال :-
المرة !!! مرة شنو شنو يازول هووووي اها كنت عايز افكهم بس طالما جيت انت ما بفكهم ونادي مباشرةً
يا عسكري دخلو الزول ده جوه هناااك .
بعدها دخل المحامون في حديث من جديد مع الضابط انتهي الحديث بأن تم اطلاق الطلاب علي أن ياتو غداً
للمحكمة .
اها اواصل والا اقيف يا هوف ؟!
| |
|
|
|
|
|
|
|
|
|
Re: خضر حسين واخرون ضد النظام العام (جلد 26 طالب نوبي بالجامعة الاهلية 99) (Re: سفيان بشير نابرى)
|
Quote: وبالفعل دخل غازي سليمان لداخل القسم ووجد الضابط يحرر في ورقة اخلاء السبيل والقدوم غداً ودون أن
يرمش صاح فيه :- إن المرآة حقوقها وواجباتها وووووو وما كان علي الضابط إلا أن نظر له وقال :-
المرة !!! مرة شنو شنو يازول هووووي اها كنت عايز افكهم بس طالما جيت انت ما بفكهم ونادي مباشرةً
يا عسكري دخلو الزول ده جوه هناااك .
|
ههههههههها
الغريبة غازي استخدم نفس اسلوب مع الضابط مع القاضي ايضا ...
مهزلة المحاكمة يستحق ان يتحدث عنها المتهم الاول (خدر بتفاصيل) ... يلا يا خدر ..
تقيف شنو يا سفيان انت لسع قت حاجة !!!؟؟
واصل يا عمك ...
من الحوارات الجميلة ... كانت في بت نوبية من تبع الطلاب المسجونات ... تحمل وجهه طفولي (براة مبالغة فيه) ... اه النقيب بحقق مع الجماعة قام سأل البت (اه وانتي جايبنك لي شنو هنايا بت ) قامت بكل برأة قالت ليه (انا عارفة ياخي) هههها(تحياتي من هنا لك وللصديق ه) ... رغم الالم والاحساس بالزل من الضرب والمهانة من العساكر بدا الجميع في الضحك ..
| |
|
|
|
|
|
|
|
|
|
Re: خضر حسين واخرون ضد النظام العام (جلد 26 طالب نوبي بالجامعة الاهلية 99) (Re: hanouf56)
|
Quote: الزميل بأمن علي كلام سفيان كلو
|
طيب تمام اها كنا واقفين وين واقفين وين وا ... ايوووووووه
قالوا لينا نجي بكرة المحكمة اها بكرة من الدُغش كبسنا ليك
المحكمة بتاعة النظام العام وهي كانت في الخرطوم 2 علي
ما اذكر المهم وصلنا كلنا بدري جداً اولاد علي بنات وبدأت
الجرجرة بتاعة البوليس والتحرشات بتاعتهم معانا لانو
عددنا كان كبير جداً جداً وبداء اليوم من الصباح انو السيد
القاضي اتاخر وكانت المحكمة مليانه قبلينا بي بعض السيدات
الواتي يسترزقن بصناعة الخمور ############ية كمية كبيرة جداً
منهن علي ما اذكر ايضاً ، المكان مكتظ جداً والعساكر
يتحرشون بالطلاب ويلقون علي مسامعنا كلمات قذرة
اظنها من جنس تربيتهم الاسرية (إن كانت لهم اسرة
تربيهم) اذكر جيداً أن هنالك عسكري ملكي (لونه احمر
ويقال له في الثقافة السودانية الشعبية حلبي) ومعه اخر
قصير بدرجة ملحوظة (اذكره جيداً اسمه محمد المقبول
وهو من أبناء الثورة الحارة 33 وسابقاً كانت تسمى
القليعة - اذكره لانه درس مع الابتدائية بمدرسة الثورة
الحارة 20-) بداء هذين الشخصين التحرش الواضح
مع خضر حسين خليل وسمعتهم بأذني يقولون لخضر
حتي لو حاكموكم وجلدوكم تااااااني بنجيبكم راجعين !
تهيج خضر حسين وحاول الاشتباك معهم لكن منعناه
ذلك بالقوة فاصبح المنظر كالاتي :- هذين الشخصين
ينظرون بسخف واستحقار لخضر حسين ويشيرون
تجاهه باستفزاز متوعدين ونحن (مجموعة من الشباب)
نصر علي خضر بالهدوء (طبعنا نالنا من لسان خضر
ده نبذ اسكتو ساااااي ههههههه) تحدثت مع خضر حسين
حينها وابلغته اني اعرف هذا الشخص القصير معرفة
جيدة واعرف اسمه جيداً فرح خضر بهذا الخبر هههههه
وقال لي كده تماااااام يعني الواحد بيقدر يلقاهو لوووووول
المهم استمرت اللحظات بهذا السخف إلي أن حضر السيد
القاضي وتم استدعاء مجموعتنا للمحاكمة قبل إي ناس
اخرين ينتظرون .
كان العساكر في يوم المزرعة وبعد المواجهة القوية التي
تعرضوا لها من الطلاب وبعد رفع الطلاب داخل للوري
الشرطة يشعرون بالانتصار لذلك حاول بعضهم ضرب
الطلاب داخل اللوري حينها هب خضر حسين ودخل معهم
في معركة حامية تلقي فيها ضرب مبرح ومؤلم لكنه لم
يستسلم وظل يحاول النيل منهم (وهذا ما جلب له العداوة
في هذا البلاغ المفبرك وجلب له أن يتم فيه فتح بلاغ بأنه
في حالة سُكر) ولم يهداء العساكر ولم يستسلم خضر حتي
الوصول في اليوم الاول قبل المحكمة لقسم المقرن .
هكذا اظن اصبح الأمر واضح هناك حفل مصدق اقتحمه
رجال النظام العام وقامو بضرب الطلاب واقتيادهم للحراسات
وفتح بلاغ كاذب تجاه طالب محدد .
ولأني كنت مرافق لخضر بشكل خاص وكنت في الرحلة بشكل
عام تقدمت بأن اشهد بأن خضر حسين لم يكن في حالة سُكر
واخبرت خضر بأني ساشهد بذلك أمام القاضي واخبرنا المحاميين
الذين حضروا ذاك اليوم وبالفعل تم منأداتي للشهادة وتقدمت للدخول
علي القاضي (كُنت اظن انها محكمة كتلك التي اشاهدها في التلفزيون
لكني وجدت مكتب يجلس خلفه رجل واحد - القاضي- وحوليه بعض العساكر
وفي ذات غرفة المكتب يوجد اكثر من آمراة من جنوب السودان نساء في
غاية رقة الحال -الفقر والبؤس- وفي ارضية المكتب ولدهشتي وجدت كمية
كبيرة من جركانات واكياس الخمور البلدية - بالظبط يشبه مكتب مدير المدارس
الثانوية فقط أن مكتب مدير المدرسة انظف ولا خمور به-) ... المهم دخلت
مكتب القاضي وأنا في الباب سالني بصوت كريه:- أنت أبو سفيان بشير النابرى؟
قلت :- نعم ... قال :- تعال هنا (وأشار إلي امام درج مكتبه مباشرةً .. دخلت و أنا
اتقافز بين اكياس وجركانات الخمر واكتم ضحكة بداخلي تكأد تنفجر وفي ذات اللحظة
انظر تجاه خضر حسين وكل الشباب والشابات الذين يواجهون هذه الكوميديا السوداء
وصلت أمام القاضي فقال لي :- خت يدك في المصحف ده واحلف أنك تقول الحق
قلته له :- لكن الوضع بتاع مصحف في نص الخمور دي ده وضع صاح ؟ قال لي :-
خت يدك واحلف بطل كلام ! وقد كان ... وشهدت بأن خضر لم يكن في حالة سُكر
بعدها طلب من القاضي الخروج وخرجت .
بعدها حكم القاضي علي الجميع بالجلد والغرامة والسداد .
وخرج الطلاب والطالبات واخذوا نصيبهم من الجلدات بثبات وجلد مرفوعي الرؤوس
وبنهاية الجلد وقبل خروجنا من حوش المحكمة تحرش ذات ذاك الشخص الأحمر اللون
بخضر حسين ورغم أني شاهدته يتحرش بخضر حسين لكني كنت بعيداً ولم يكن احد
اخر منتبه لهذا فتهيج خضر حسين وقفز سريعاً محتضن ذاك الشخص ضارباً به الارض
في سرعة شديده ملحقاً به ضربات ولكمات متفاوته وهب جميع الناس لفض الاشتباك
وذهل العساكر لدرجة ان البعض منهم اخذوا زميلهم وسحبوه بعيداً لان الطلاب تشنجوا
من جديد واصبح الامر واضح لنا أن هذه المعركة لن تنتهي ابداً حينها قال خضر بصوت
عآلي :- هسي انجلدته وما عندي مانع اتجلد تاني بس انت وانت (يشير للشخصين) ما بخليكم!
اغرب مافي الامر بعد هذه المعركة الصغيرة سكت البوليس ولم يحرك ساكن وخرجنا من المحكمة
وأستاجرنا بص عائدين للجامعة كنا نغني داخل البص ونحاول تضميد جراح بعضنا البعض
وحينما وصلنا صينية المرور انتبهنا بأن هنالك موترين يطاردون الباص ويقومون بحركات رعناء
بايخة الشي الذي جعل احدنا (لا اذكر من هو الان) يخرج رأسه بالقزاز ويسال احد اصحاب المواتر :-
مالكم في شنو ؟ فما كان من صاحب الموتر الأ ان تقدم تجاه السواق وامره بتوقيف الموتر (حينها وبسرعة
جداً طلبنا من الأخ والصديق طارق عبد المجيد النزول من الباص والذهاب برجليه لاننا تيقنا بأننا عائدون
لا محالة للحراسة من جديد ونزل طارق واشرنا عليه بأن ياخذ الطريق علي يمينه ويتجه صوب النيل و من
هناك يركب اي حاجة ويتخارج) توقف البص وحاول صاحب الموتر تلفيق كذبه بقوله :- في واحد بصق علي
بالشباك حينها وقفنا جميعاً واخبرناه بانه كاذب ومفتري ، حاول صاحب الموتر بأن ياخذ الشخص الذي تحدث
معه بالشباك باعتبار انه هو من بصق عليه فرفضنا ذلك وقلنا :- نمشي كلنا مع بعض حينها أتي صاحب الموتر
الثاني وقال :- ياخ انساهم ديل هسي جايين من النظام العام .
المهم انتهي هذا الفلم هكذا .
وهو اقبح كوميديا ممكن ان تصادف انسان في حياته .
يا خضر حسين اعذرني ياخ ذاكرتي ما زي زمان يا مان ولو في حاجة اخوك نساها ما تقصر .
ويا هنوف اهو محاولة لتسجيل بعض التوثيق عله يفيد .
| |
|
|
|
|
|
|
|
|
|
Re: خضر حسين واخرون ضد النظام العام (جلد 26 طالب نوبي بالجامعة الاهلية 99) (Re: سفيان بشير نابرى)
|
سفيان وهنوف
برضو بتذكر حاجة
انو القاضي حكم علي بخمسين جلدة المهم لما مرقنا عشان ناخد الفيهم النصيب
وقفت في الصف ولما دروي في الجلد جاء مشيت وقفت ماسك العمود
المهم العسكري الله يطراه بالخير بدأ الجلد
وأنا أحسب ساي
المهم وصل الخمسين ومواصل قلت يمكن الزول ده حاسب غلط
المهم لما وصل الخمسة وخمسين
عاينت ليهو وقلت ليهو بالمناسبة :
مولانا ده حكم لي بي خمسين صوت وشايفك وصلتهم خمسة وخمسين
المهم العسكري عاين لي كده وقال لي لا
انت عندك خمسة وستين صوت
ضحكت وقلت ليهو اها يعني باقي لي كم ؟
قال لي خمستاشر تاني 
ــــــ
أنا المحيرني سكر ما كنت سكران مادة شنو دي البجلدوا فيها الزول خمسة وستين صوت ؟
| |
|
|
|
|
|
|
|
|
|
Re: خضر حسين واخرون ضد النظام العام (جلد 26 طالب نوبي بالجامعة الاهلية 99) (Re: هشام كمال)
|
Quote: بالمناسبة يامحمد
في مشكلتنا مع النظام العام كانت معانا قريبة فتحي خليل
اتقبضت معانا برضو
لكن يوم المحكمة والجلد الصحي صحي
غابت ولكأنها فص ملح وذاب
|
يا خدر ... البت الانتا قاصدا دي بالجد ما جات يوم المحاكمة ... لكن جات اليوم التاني والقاضي قال ليها ادفعي وشتتي ... لا جلد لا يحزنون ...
اعتقد انو المحامي المشي معاه هو الاستاذ احمد رمرم ... يعني علاقتا بفتحي خليل ما اعتقد انو كان مؤثر في موضوع الحكم ...
| |
|
|
|
|
|
|
|
|
|
Re: خضر حسين واخرون ضد النظام العام (جلد 26 طالب نوبي بالجامعة الاهلية 99) (Re: hanouf56)
|
صهيب المحسي ..
بتاعت شرق النيلين لو متزكرو ... الهوا رسل لي التعليق الفوق دا ..
دا كان اجمل تهمة في العالم ليه ..
قال البوليس جاي وقال فلان الهو صهيب وعلانة (الا صهيب ما بعرفا اصلا) وقال ديل كانو واقفين تحت الشجرة واي واحد ماسك ليه فتيلة ريحة في يدو وبرش التاني بالريحة ...
الغريب انو صهيب كان لابس بنطلون وقميص وما شايل اي شنطة .. بكون كان شايل فتيلة الريحة دي وين ؟؟ هههههها
.....................ز
انا والجنرال (الخطيب محمد سالم - سكرتير اتحاد الروابط النوبية) ... كانو بعيدين شوية من مكان الجلد لانو الشفيع ضرب وقال لينا جهزو قروش وكنا بنجري في اتصالات من مركز اتصالات قريب من الحديقة القدام المحكمة .. وفجاة سمعنا اصوات زغاريد و تصفيق قوي جدا من الحديقة .. جرينا علي الحديقة لقينا الناس بزفو فيكم كالابطال (حقيقة كنتو ابطال ) والشارع كلو وقف وبتسال ديل من البزغردو وبصفقو ليهم في محكمة النظام العام سئي السمعة ... !!؟؟
كان يوم اثبت صلابة وجاش بنات النوبة قبل اولادها وهم يتلقون الجلد بكل ثبات وعزيمة ..
التحية والتجلة من هنا لكل الشبابات الاتي وقفن شامخات الرأس امام جبروت النظام...
| |
|
|
|
|
|
|
|
|
|
Re: خضر حسين واخرون ضد النظام العام (جلد 26 طالب نوبي بالجامعة الاهلية 99) (Re: hanouf56)
|
Quote: أذكر جيداً وقفة الجميع معنا ـ بالجد كانت مهزلة من مهازل النظام
أكثر ما يؤلمني صورة شابة نوبية كانت قادمة مباشرة من البلد
لدرجة انها كانت لاتدري ما يقوله شهود الاتهام
المهم أنها كانت تقاطع القاضي كل شويتين وتصرخ وبيووووا
بعالي الصوت ـ جلدوها هي الاخري معنا . |
الزولة دي هي القالو كانت شايلة فتيلة ريحة وبترش في صهيب ..
بعد الاحداث دي .. لامن مشينا قافلة اتحاد الروابط النوبية استقبلتنا في بيتم وقعدنا في بيتم اكثر من 10 يوم (كنا اناوسمير بدين(الاسلامية) ونسرين (السودان) و وواحد من بدين كان رئيس رابطة شرق النيل بس للاسف اسمو طار حسع)
لامن تحكي انا المحكمة تضحك بس ... لانها كانت برلمة جديدة (في الخرطوم والجامعة) وفجاة لقيت نفسها في لوري النظام العام .. كانت صدمة حقيقة ليها .. بس وقفة الجميع بصلابة مع 26 نفر اكيد خفف علي الجميع ظلم وجور اهل الحكم في بلادي ...
| |
|
|
|
|
|
|
|
|
|
Re: خضر حسين واخرون ضد النظام العام (جلد 26 طالب نوبي بالجامعة الاهلية 99) (Re: hanouf56)
|
Quote:
كان يوم اثبت صلابة وجاش بنات النوبة قبل اولادها وهم يتلقون الجلد بكل ثبات وعزيمة ..
التحية والتجلة من هنا لكل الشبابات الاتي وقفن شامخات الرأس امام جبروت النظام.. |
كان يوما فارقا ،،، لم يخبر احد هولاء الشباب قبلا ولم يمروا بمثل هذا الموقف في حياتهم ،،، لكنهم علمونا الكثير بهذه التجربة،،، كيف ان مقاومة ايدلوجيا الموت والقبح التي تتبناها السلطة تكون بحب الحياة والغناء والرقص،،، كيف انهم ظنوا باعتقالهم لهؤلاء الشباب سيفقدونهم كرامتهم واعتدادهم بالنفس،،، فهزموهم بالزغاريد والهتاف والغناء وخرجوا مرفوعي الرؤؤس
كنت من الذين تداعوا من الجامعة الاهلية لحضور المحاكمة المهزلة ،،، وايضا حضرت كيف طلاب الجامعة الاهلية احتضنونهم وزفوهم حين وصول موكبهم الي ساحات الاهلية ،،، وكيف طاف كرنفال الكرامة في ساحات الجامعة تكسوه المهابة والكبرياء
حادثة رحلة رابطة النوبة بالاهلية تظل فضيحة لايدولجيا الهوس الديني والتسلط ،،،، وعلامة في تاريخ مقاومة ابناء وبنات الشعب لعسف القوانين القمعية
| |
|
|
|
|
|
|
| |
hanouf56
معاوية الزبير
Tragie Mustafa
خضر حسين خليل
خالد عبد الله محمود
سفيان بشير نابرى
GamarBoBa
ناصر المحسى
Mannan
هشام كمال
فيس بوك
تويتر
انستقرام
يوتيوب
بنتيريست