نعى اليم ...... سودانيز اون لاين دوت كم تحتسب الزميل فتحي البحيري فى رحمه الله
وداعاً فتحي البحيري
|
|
 **** الـزواج وفـى الحـلـق غصـة ****
|
دايما بتصادفنا مشاكل قبل و بعد و اثناء الزواج ...
مشاكل ما قبل الزواج دي مرات كتيرة بتكون ليها اثر كبير في الحياة الزوجية ..
بتكتشف اوتكتشفي انو الطرف التاني بخيل مثلا .. اوغيور .. او عنيد لدرجة مخيفة ..
او متشدد ومعقد وانت على العكس او العكس صحيح يكون متساهل شديد و الطرف التاني ملتزم ..
ممكن كلها تتعدا .. و في النفس حسرة .. لكن لو كانت المشكلة مشكلة الاهل نفسهم ..
يعني اهل العريس او اهل العروس رافضين العرس .. أي نعم بتبدا الواسطات و يدخلوا الاجاويد ويتم الزواج ...
العايزه اعرفو هل ممكن القصة دي تتنسي فعلا والا بتكون عالقة بالذهن و النفس وهل ممكن تأثر على علاقة الاسرة الصغيرة بالاسرة الكبيرة؟؟
غايتو بس العايزنى ازعل يقول لى غسلى الباميه ,,,,
|
|
 
|
|
|
|
|
|
|
|
Re: **** الـزواج وفـى الحـلـق غصـة **** (Re: طارق جبريل)
|
هلا منال
وكل سنة وانت طيبة
برضو عندك عقدة البامية
كل الخضار عندي معه مشكلة
المهم شوفي العرس لما يكون فيه كل الاطراف موافقة بتحصل فيه مشاكل
البيكون فيها اجاويد وفي الحلق غصة دي حيكون كيف
بس ارجع اقول ليك بتوقف على شخصية الشخص المرفوض نفسه
هو بقدر يخلي الناس تحبه او تكره و تقول ان كلامهم كان صح
ولفيت تثبت العكس اكيد حتكون في معارك كلامية قوية واخري
مع ودي
أماني الروح
(عدل بواسطة اماني محمد صالح on 09-11-2011, 01:16 PM)
| |
|
|
|
|
|
|
|
|
|
Re: **** الـزواج وفـى الحـلـق غصـة **** (Re: اماني محمد صالح)
|
Quote: هلا منال
وكل سنة وانت طيبة
برضو عندك عقدة البامية
كل الخضار عندي معه مشكلة
المهم شوفي العرس لما يكون فيه كل الاطراف موافقة بتحصل فيه مشاكل
البيكون فيها اجاويد وفي الحلق غصة دي حيكون كيف
بس ارجع اقول ليك بتوقف على شخصية الشخص المرفوض نفسه
هو بقدر يخلي الناس تحبه او تكره و تقول ان كلامهم كان صح
ولفيت تثبت العكس اكيد حتكون في معارك كلامية قوية واخري
مع ودي
أماني الروح |
ولحدى ما يحصل العكس يا امانى يكون الزواج فقد متعته ومرو بظروف صعبه
لكن زى ما قلتى حيكون فى معارك ويقدرو يتغلبو عليها بالحكمه والتفاهم
سلمتى يا امانى وما تحرمينى رايك ,,,
| |
|
|
|
|
|
|
|
|
|
Re: **** الـزواج وفـى الحـلـق غصـة **** (Re: منال)
|
أنا نفسي برضوأعرف حتت الأهل دي كيف بتعاملوا معاها وبتجاوزوها ولو اني اشك انها ممكن تتجاوز ..
ياريت لو في ناس عندهم تجربة مماثلة يفيدونا بكل أمانة.. وبعيد من التنظير والمثالية..
______________
تخيلي الواحد اشتاق ليكي ... و لي ضحكتك اللذيـــــذة ديك
| |
|
|
|
|
|
|
|
|
|
Re: **** الـزواج وفـى الحـلـق غصـة **** (Re: فايزودالقاضي)
|
Quote: منال ..ازيك ...
الامه عايشة مايتزوج ...وفيها فليجاهد .. |
هلا فايز
* يترهب يعني ؟ عاد لكن لمتين؟ ياخوي العرس دا سيك سيك معلق فيك كان دورنا نطنشو مابنقدر لانو دي سنتنا النبوية
*تعرس و تجاهد في امك الاتنين جهاد برضو,,,,
| |
|
|
|
|
|
|
|
|
|
Re: **** الـزواج وفـى الحـلـق غصـة **** (Re: رشا احمد)
|
هل أتاكم حديث الدهب .. الايام دي ؟
الشيله وفطور العريس وقولة خير وشنو ما عارف ؟
دي مشاكل الزواج .. الباقي كلو هين طالما للناس عقول وقلوب
......
بعدين مرا ما بتقوم نص الليل تطبخ الخروف الضبحوهو للضيوف وتعمل الكمونيه بكره في الفطور تقعد في بيت ابوها احسن
| |
|
|
|
|
|
|
|
|
|
Re: **** الـزواج وفـى الحـلـق غصـة **** (Re: الفاتح شلبي)
|
Quote: غايتو تفاصيل قريبة لكلامك دهـ حصلت لواحد أخونا ... كان مكرضم من اهلها حتى بعد الزواج ..
بعد مرور شهر العسل جا يضحك ويقول الجماعة صارحوني وقالوا ليه نحن ما كان عندنا رأي فوقك بس كنا شفقانين على بتنا .
وواضح انه لم يبالي بتحفظات أهلها قبل الزواج ... إذن المسألة حتعود بينا للكلام الكلاسيكي ... إذا فى حب بين الطرفين ...
الطرفين ديل ممكن يبيعوا الأهل كمان (أي كلام غير كدة بعتبرهـ تنظير أو دبلوماسية) |
يبيعو الاهل كيف لكن
يا الفاتح مرات تلقى المشاكل بتجر لمن تصل للاولاد
ومرات الاولاد يكونو منقسمين جزء ناحية اهل الاب وجزء ناحية اهل الام
وفى كل الحالات اغلبية المشاكل من اهل الزوج مش الاغلبيه كمان نقول 99 فى الميه من المشاكل سببها اهل الزوج
| |
|
|
|
|
|
|
|
|
|
Re: **** الـزواج وفـى الحـلـق غصـة **** (Re: Gaafar Ismail)
|
| Quote: هذه الظاهرة يجب محاربتها بكل الوسائل ....هي من أسباب عدم قدرة بعض الشباب على الزواج هذه الأيام . |
تحياتي أخ جعفر ...
زي ما قلت انو دي واحدة من الاسباب لكن الاسباب الاكثر شيوعه الزمن دا هي الانفلات الاخلاقي و اللي خلى الشباب يتساهل في موضوع العرس او يسيء الظن به و بـ الشريك المرتقب ...... والله اعلم
| |
|
|
|
|
|
|
|
|
|
Re: **** الـزواج وفـى الحـلـق غصـة **** (Re: نوفل عبد الرحيم حسن)
|
Quote: هل أتاكم حديث الدهب .. الايام دي ؟
الشيله وفطور العريس وقولة خير وشنو ما عارف ؟
دي مشاكل الزواج .. الباقي كلو هين طالما للناس عقول وقلوب |
بالمناسبه حكايه فطور العريس ده تقليعه جديده زمان ما فى كلام زى ده بزخ وترف زياده عن اللزوم
وده البخلى الشباب يهاجرو من البلد ويشتتو بى بلاد الله الواسعه هربا من العادات السيئه دى
يعنى الواحد عندو قروش يعمل لى بدعه زى دى تبقى فرض على اى اهل عروس لازم اعملو زيو
ودى من الاشياء البتخلى الشباب يعزفو من الزواج
| |
|
|
|
|
|
|
|
|
|
Re: **** الـزواج وفـى الحـلـق غصـة **** (Re: رشا احمد)
|
منال تحياتي ليك ولضيوفك ...
نحن طبعاً مشكلتنا ... وأحياناً ميزتنا... إنو أهل العروس والعريس بكونوا
عناصر أساسية في نجاح أو عدم نجاح أي زواج ... في مجتمعات أخرى المسألة
شأن خاص جداً بأصحابو فقط ..
العاوز أقولو ليك إنو الطرفين لو أتحلوا ببعض الحكمة والصبر والإصرار على
المواقف ممكن يغيروا في تقبل الأهل ...
والنماذج العندي كتيرة جداً ...
عندي قريبتي قالت لولدها لو عرست فلانة دي (ح أقطع شطري) وده تهديد بتقولو
الأم في كتير من المواقف ... المهم الأم دي دلوقت بتحلف بمرة ولدا عديل كده
لأنها صبرت عليها واجتهدت إنها تكسبها وفعلت ... والله صحي ...
نموذج تاني واحد صاحبنا كان عايز زميلتو القبطية ... أهلها وأهلو رفضوا
وبشدة ... تزوجها زواج مدني وسافر بها لمكان عمله في الخليج ...
وبعد التهديدات من هنا وهناك ... نجح الإصرار والأولاد المشتركين في إقناع الأهل
وعشان أكون واضح والصورة تكتمل ... العكس بيحصل كمان ... يكونوا الأهل موافقين
ومبسوطين ... بعدين سلوك واحد من الزوجين تجاه أهل الآخر يغير في تقبلهم وتتحول
المحبة لعداوة ...
النجيضة ...
صبر وحكمة وإصرار الطرفين على مواقفهم بلين الحديد ...
والله يعين الجميع ...
| |
|
|
|
|
|
|
|
|
|
Re: **** الـزواج وفـى الحـلـق غصـة **** (Re: عبد الباقي الجيلي)
|
يا منال طبعا الكلام ده كان زمان لمن البنت تكون حابة ليها واحد من وراء ظهرهم ويقوم فجأة يتقدم
واحد ،، تقوم البنت ترفض بدون أبداء أى أسباب منطقية وتتحاشى الخوض فى التفاصيل خوفا من أنكشاف
علاقتها بذاك الشخص المتخفى حتى الآن . وإن تجرأت وقالت أنا بحب فلان وحيتزوجنى يقوم الأب يقول ليها:
الآن يجى يتقدم والله غصبا عنك حتزوجى الزول ده ،، فى هذه الطريقة إذا تزوجت من تقدم لها حيقوم زوجها
ده يذكرها ليل ونهار بموقفها السلبى إبان خطبته لها ،، وإذا تجاسر حبيبها وتزوجها برضو مشاكل لقدام
لأنه سيذكرها ليلا ونهارا بأنه لم يكن مستعدا للزواج وأجبر عليه ،، ففى الأتجاهين ووووووبين .
أها يا زولة حسع الحب عدييييييييييييييل كده قدام الأهل وتحت بصرهم ،، والخطيب يخرج ويدخل زى ما
هو عاوز وكأنه من ناس البيت والبنت كذلك فى بيت أهل خطيبها ،، لذا عندما يتزوجون تكون العلاقة
بينهما سمن على عسل وكذلك علاقتهما مع أهلهم .
وتنتفى طبعا كل هذه المشاكل بعد السنة الخامسة وعشرون أو الثلاثون من الزواج حيث يصير الزوجان
إخوان أكثر منه زوجان هههههههههههه.
مع التحية ،، والأمنيات للجميع بحياة زوجية هانئة .
ماهر
| |
|
|
|
|
|
|
|
|
|
Re: **** الـزواج وفـى الحـلـق غصـة **** (Re: Mahir Mohammed Salih)
|
| Quote: هذه الظاهرة يجب محاربتها بكل الوسائل ....هي من أسباب عدم قدرة بعض الشباب على الزواج هذه الأيام |
اعتقد ان هذه هي مشكلة الزواج الحقيقه - العادات التقاليد والبوبار
سألت صديق وزميل بالمنبر وهو خبير في الذهب عن اقل تكلفة للذهب المصاحب للشيله . افادني بانه يكلف بين 6 الي 7 مليون جنيه .. فتأمل
هذا عدا الريحه والشيله وتكاليف الزواج الاخري .. ويسألونك عن اسباب العنوسه وعزوف الشباب عن الزواج
اما عن موضوع البوست الذي اشارت له منال
اظن ان تلك اشياء عارضه وطبيعيه تعتمد علي الاختيار اولا وروح التفاهم بين الزوجين ثانيا وما الي ذلك ويمكن حلها وحسمها
تحضرني قصة زوجين عاشوا في الزمن السابق ولم يسمع عنهم اختلاف لمدة ثلاثين عاما
فسأل الناس الزوج عن سر هدؤ عش زوجيتهم ؟ فقال لهم تزوجت هذه الزوجه وهي غريبة عني وانا غريب عنها
في ليلة الدخله قمت للصلاه فصلت خلفي وقبل ان امسها قالت لي تمهل . انت من قوم فيهم نساء احق بك مني
وانا من قوم فيهم رجال أحق بي منك .. ولكن قدر الله وما شاء الله فعل وانها القسمه والنصيب ولكن
قل منذ الان ما يرضيك وماذا يغضبك ومن من الناس تسمح لهم بدخول منزلك في غيابك ومن من الناس غير مسموح لهم بدخول منزلك في غيابك ؟
وما الي هذه الاشياء .. فقال اخبرتها بكل شي واخبرتني بكل شي عنها
ومنذ ذلك الوقت هي تفعل ما احب وتتجنب ما لا احب .. لذلك لم نختلف قط الا في اشياء يسيره نحلها بالعقل والموده
انتهي .
| |
|
|
|
|
|
|
|
|
|
Re: **** الـزواج وفـى الحـلـق غصـة **** (Re: رشا احمد)
|
Quote: أنا نفسي برضوأعرف حتت الأهل دي كيف بتعاملوا معاها وبتجاوزوها ولو اني اشك انها ممكن تتجاوز ..
ياريت لو في ناس عندهم تجربة مماثلة يفيدونا بكل أمانة.. وبعيد من التنظير والمثالية.. |
خلاص تعالي استلمي معاي البوست عشان نعرف سوا
والله يا رشرش انا بعرف ناس عايشين فى سعادة ووئام واولادهم على ابواب الجامعات
لكن اهله ما متقبلين الزوج لحدى الان وبطالبوها بالانفصال
اها زى دى تعمل شنو ؟؟
حاوبى يختى ,,,
| Quote: تخيلي الواحد اشتاق ليكي ... و لي ضحكتك اللذيـــــذة ديك |
والله بالاكتر يا رشرش نحنا زاتنا مشتاقين ليك زى هلال العيد 
امرقى بعد ده كفاك وما تنسينى من صالح الدعوات ,,,
| |
|
|
|
|
|
|
|
|
|
Re: **** الـزواج وفـى الحـلـق غصـة **** (Re: منال)
|
سلامات الاخت منال
انا شايفة انو المشاكل اللي بيكون الاهل طرف فيها بعدم قبولهم للطرف التاني بتعتمد علي الطرف اللي بيقع عليه عدم القبول في انه بامكانه انو يغير نظرة الاهل ليه , ولكن المشكلة الحقيقية يا منال هي انو الطرفين انفسهم ما يقدروا يتجاوزو المشاكل بينهم ان وجدت , لا اعتقد انو المشاكل بسبب عدم قبول الاهل ممكن تاثر علي الاسرة الصغيرة بقدر ما تؤثر المشاكل بين الطرفين انفسهم .
والله لا جاب مشاكل لاي أسرة .
| |
|
|
|
|
|
|
|
|
|
Re: **** الـزواج وفـى الحـلـق غصـة **** (Re: Rasha Swaraldahab)
|
نحن زمن كنّا مجتمع قبلي وعشائري ... كانت المسائل واضحة ...
هسى بعد فقدنا هويتنا الأصلية وغلبنا نستبدلا بى بديل نافع ..
بقينا مجوبكين ... وعاداتنا وتقاليدنا لا تتجاوز المظاهر السطحية ...
فقدنا النظرة العميقة ... بعد داك انتي وحظك (وفي رواية انتي وشفتنتك!) ...
انا شخصياً التزمت بالباميا حلاً للخلاف ... (ولو انو ما فاهم مشكلتكن مع الباميا شنو؟)
... المهم ....
| |
|
|
|
|
|
|
|
|
Re: **** الـزواج وفـى الحـلـق غصـة **** (Re: تبارك شيخ الدين جبريل)
|
Quote:
العايزه اعرفو هل ممكن القصة دي تتنسي فعلا |
إلا دي
لا بتتنسي
ولا بتتحكي
ولا بتنبلع
ولا بتنقلع
( حتى ولو كان الحلق واسع كذا سقالة البنطون )
وأنتو كان روقتو بوصف الشوفتو
ولا أقولك
الروقة طايرة
العرس ده
موية وإنكشحت
والماشي فوقها كان زولا عديل( تأكلي وتقشي فوقو) بقول:-
- الديوان الديمة مرشوش ريحتو مايقوما بلا رتوش يا حلاة الزارعنو في الحوش
أها وإن بقى زولك كعب بالحيل ( ونشفان الدم في عروقو ) بقول:-
- الرشاني بالموية برشو بالدم أخلي عصباتو حزم حزم
وعقمانتية أكان بقى زولا مطرطش ( ما بتحسي بدخولو ومروقو ) بقول:-
- مطر الرشاش الرش أنا عقلي طار وطش لحق البنات في العشة
اها زولك منو فيهم ؟؟؟
| |
|
|
|
|
|
|
|
|
|
Re: **** الـزواج وفـى الحـلـق غصـة **** (Re: المسافر)
|
غسيل الـــ Leadys Finger دا جديد
كنا بنعرف فركها بقت غسيل
في كل المجتمعات توجد تلك المشاكل وعبر العصور فى السودان المشاكل بين الطرفين موجودة
وقلما تجد كل الاطراف موافقه 100% علي اي زواج
لكن الحكمة تقتضي النظر للعادات الدخيلة
خلاص فاض بينا ،،،، قربنا نكوووووووووووووووورك كلما نقول انتهينا جهزنا حالنا يقولوا لينا هات وجيب
| |
|
|
|
|
|
|
|
|
|
Re: **** الـزواج وفـى الحـلـق غصـة **** (Re: الزنجي)
|
العايزه اعرفو هل ممكن القصة دي تتنسي فعلا والا بتكون عالقة بالذهن و النفس وهل ممكن تأثر على علاقة الاسرة الصغيرة بالاسرة الكبيرة؟؟
>
>
>
ازيك يا منال وكل سنة وانتي طيبة..
عايزة رأيي:
دي بتبقي قنابل موقوتة، بتنفجر مع أول مشكلة، ولو ما ليها علاقة بسبب المشكلة اللحظية...
| |
|
|
|
|
|
|
| |
رشا احمد
فدياس نجم الدين
طارق جبريل
بله محمد الفاضل
فايزودالقاضي
نوفل عبد الرحيم حسن
الفاتح شلبي
Gaafar Ismail
عبد الباقي الجيلي
Rasha Swaraldahab
تبارك شيخ الدين جبريل
المسافر
الزنجي
علاء الدين محمد بابكر
محمد الكامل عبد الحليم
فيس بوك
تويتر
انستقرام
يوتيوب
بنتيريست