|
|
|
 Re: غايتو ضيعنا زمنا في القراية زمان.. هل الشهادة الجامعية معيار للنجا (Re: الامين موسى البشاري)
|
(1)
اليوم داك المغسة دايرة تشقني يا جماعة
مكالمة تلفونية هي سبب شقائي وتعاستي وهي سبب كتابتي لهذا البوست
وهي كذلك سبب التســاؤلات الفوق دي... هل الشهادة الجامعية معيار للنجاح؟
وجعلتني انــدم على الكثير الذي لم أفعله أيام طفولتي وصباي المبكرتين
بل ندمت على الوقت الذي كنت اقضيه بين صفحات الكتب والمذاكرة
بينما اقراني يتمتعون بلعب اللكرة والذهاب للسينما والحفلات.. الخ الخ
فمن يعوضني عن تلك السنين ومن يعيدني للوراء لكي استمتع بها
رن جرس موبايلي ذو النغمة الما بتغباني
نظرت الى الرقم الظاهر في شــاشة الموبايل فإذا بالمكالمة آتية من السودان
توكلت على الله ورديت
انا: الو
هو: امين ازيك
انا: أهلا وسهلا
هو: ما عرفتني صاح
انا: لا والله
هو: معاك عباس الطيب
انا: أوووووووو عباس ازيك ياااخ ولعلك طيب
عباس هو احد ابناء جيراننا القدماء في اللاماب بحر أبيض
تزاملنا في المرحلة الابتدائية لعدة سنوات ثم فرقت بيننا السبل
كنا نلتقي بعد فترات متقطعة ومتباعدة لم يغب عباس عن ذاكرتي
عباس هو الابن الاكبر بين افراد اسرته وهو ابن عمنا الصول الطيب
استرسلنا في الكلام وتجاذبنا اطــراف الحديث واجتررنا ذكريات الماضي
..
..
يتبع
| |
  
|
|
|
|
|
|
|
|
Re: غايتو ضيعنا زمنا في القراية زمان.. هل الشهادة الجامعية معيار للنجا (Re: الامين موسى البشاري)
|
(2)
عباس كان زول (شــفت) بكل ما تعنيه الكلمة من معنى
إذ لا يخلو جســد عباس ذو البنية المتوسطة من آثار فلقه أو مطوه
بسبب كثرة المشاكل والمعارك التي يخوضها في المدرسة وخارجها
بحكم الجيرة كنا نخرج كل صباح مع بعض للذهاب الى المدرسه
كان الجميع يخشى عباس لأنه لا يرعــوي في أذية أي أحد يضايقه
أو حتى بدون ان يضايقه لو جاهو مزاج ساي ممكن يعمل معاك مشكلة ويدقك
عباس ما كان زول دراسة ولا يتمتع بالذكاء او النبوغ فمستواه كان دون الوسط
كانت التحذيرات تأتيني من والدي دائما بعدم مباراة عباس لأنه السير خلفه
ســيوردني موارد الهلاك والصعلقه والتيــه والضياع
وبسبب مباراتي لعباس اكلت الكثير من الجلدات (العلقات الساخنة) جدا من والدي
بسبب متابعتي لعباس والذهاب الى شاطئ النيــل والسباحة فيه
كان عباس دائما ما يزين لي ذلك ويجمله في عقلي فاتمرد وانحرف ونذهب للسباحة
ويلا جلد جلد غرامة غرامة المهم كنا نقضي الكثير من الوقت في السباحة
وبعد السباحة كنا نتكتح بالتراب حتى نخفي آثار السباحة من اجسادنا
ولكن ما لم يجد له عباس حلا هو حمرة عيوننا من كثرة الســباحة
احيانا كانت لنا سياحة ممتعة في كوشة الجبل ويا لها من كوشه
كانت لي ولعباس مصالح مشتركة تربطنا ببعض ،مصلحتي كانت هي الاستقواء بعباس
فأنا صاحب عباس ولا يجرؤ أحد على أذيتي لأن عباس سيتصدى له
اما مصلحة عباس فهي أنه يستعير دفاتري واحيانا اشرح له
وكثيرا ما كان يجلس بجواري ليغش مني في ايام الامتحانات
رغم التناقض الكبير في شخصيتينا إلا ان علاقتنا كانت محل استغراب اساتذتي
وناس البيت والحلة فعباس شخص سئ السمعة ولكنه جاري وصديقي
في المدرسه كنت لا أفارق المركز الأول وكان مستواي مرتفعاً وسمعتي طيبة
لم يعكر صفوها ويدنس صحائف سيرتي إلا صحوبيتي لعباس
رغم ذلك كانت لي حدودي التي وضعتها بنفسي لعلاقتي مع عباس
وكنت أطمئن أبي دائما بأنني سوف لن أتأثر باخلاقيات عباس مهما حدث
..
..
يتبع
| |
|
|
|
|
|
|
|
|
|
Re: غايتو ضيعنا زمنا في القراية زمان.. هل الشهادة الجامعية معيار للنجا (Re: الامين موسى البشاري)
|
(3)
عمل أبي بالتدريس لفترة من الزمن بعد انتهائه من المرحلة الثانوية
ولأن ابي كان يتيم الأب لم يتمكن من مواصلة دراسته مباشرة لضيق ذات اليد
فعمل بالتدريس لفترة من الزمن ثم تزوج والدتي وكانت حياته تسير بهذا الاتجاه
لكن كان طموح ابي حاضراً ولم يفارقه للحظة واحدة وعندما حانت اللحظة المناسبة
التحق بمعهد الكليات التكنولوجية ودرس في كلية الفنون الجميلة
كنت حينها أنا الابن الوحيد له وتخيلوا إنني قد حضرت حفلة تخرج والدي
بل لا زالت تلك الليلة عالقة بذهني فقد كانت بعبد العزيز المبارك وابو عركي ومجذوب أونسه
حينها لم تكن وسائل التوثيق حاضره مثل ما هي اليوم والا لكنت وثقت لذلك
ابي راجل فنان ونحات ممتاز بعد تخرجه عمل في الكلية في قسم النحت
ثم ارتحلنا لمعهد التربية بخت الرضا قسم المناهج والتأليف
وفي الدويم وبخت الرضا قضيت احلى سنين عمري فقد كانت بخت الرضا
منارة التعليم والثقافة والادب في ذلك الزمن الجميل
وعندما بني قصر الشباب والاطفال انتقل والدي من وزراة التربية الى وزارة الشباب والرياضة
ليعمل في قسم الفنون الجميلة قسم النحت واذكر من زملاء ابي في ذلك الزمان
الاستاذ ابراهيم العوام والموسيقار عجاج قبل ان يصبح ملحنا للدفاع الشعبي
بما يشبه المسخ فقد شوه كل جميل احفظه له في ذاكرتي
الشاهد من سيرة والدي أنه كان مربياً ومعلماً والدراسه عنده خط أحمر لا تهاون فيها
وهنا يوجد بعض الزملاء يعرفون والدي جيدا ومدى صرامته وعدم تهاونه في التعليم
وعلاقتي بعباس تمثل تهديداً لهذه المسيرة التي كان والدي يريدني ان اسير فيها
عباس هو ابن الصول الطيب الرجل الطيب المداوم على صلاته المتفقد لجيرانه
فقد كان يحمل طيبة أهل البلد البسطاء لم تتاح له فرصة التعليم فالتحق بالجيش
وتدرج فيه حتى وصل الى رتبة صول وكان يعمل في سلاح المدرعات بالشجرة
بكينا كثيرا عند غزوة المترزقه لأنه عند سماعنا لأول طلقه لبس عمي الطيب
الكاكي وذهب للســلاح يا له من شخص مخلص فقد كانت العسكرية عنده عقيده
لم نكن نظن أنه سيعود لأن صوت الرصاص اصبح يعلو ويلعلع ولكنه عاد
عمي الطيب رحل من دنيانا الفانية هذه له الرحمة والمغفرة
..
..
يتبع
| |
|
|
|
|
|
|
|
|
|
Re: غايتو ضيعنا زمنا في القراية زمان.. هل الشهادة الجامعية معيار للنجا (Re: الامين موسى البشاري)
|
تصدق انا زعلان زعل على ما مضي ..
ولو رجع بي الزمن حاتشرشح جنس شرشحة .. والله صحي
ابوي كان ضافرنا ضفر شــديد..انا اكبر اخــواني ونحن ستة ابناء
ليس بيننا أخوات وكثيراً ما تمنيت أن تكون لي أخت
اقلها كانت بتغسل لي هدومي  وتساعد الوالدة شوية
أها الوالدة دي موضوعها براهو
مرات لما تزعل تقول لينا والله لو بيدي كان ابدلكم ببت واحدة بس
لووووووووووب ما يقومن يجونا ناس الجندر وكده
اللهم اجعل كلامنا خفيف عليهن
المهم دا صف اخواني وحصاد ضفر الوالد لينا :
- بعدي اخي كمال طبيب اخصائي وهو مقيم بالبحرين الان
- الاصغر منو اخي أنس مهندس مدني مقيم في السعودية
- الاصغر منو تاج الدين نائب اخصائي في السودان
- الاصغر منو احمد طبيب بيطري مقيم في السودان
- الاصغر منو عاطف مهندس مدني مقيم في السعودية
كثيراً ما ردد ابي أمامنا وأمام الآخرين بفخر ونشوة : أنا اقل من مهندس وطبيب ما عندي
لكن عصرنا لما جبنا الزيت .. وقلنا الروب زاتو
اها دكتور ومهندس ومشتتين في بلاد الله دي
والكفلاء يمغسوا فينا .. والبلد حاله ما بسر ولا بنصف زول
..
..
يتبع
| |
|
|
|
|
|
|
|
|
|
Re: غايتو ضيعنا زمنا في القراية زمان.. هل الشهادة الجامعية معيار للنجا (Re: الامين موسى البشاري)
|
(4)
ارجع ليكم لعباس الذي لم يتمكن من الحصول على شهادة ثانوية
تمكنه من الالتحاق باحدى الجامعات الســودانية فذهب ودرس في الهند
اقتصاد بكالريوس ابو 3 سنوات وقفل راجعاً للسودان
عباس اليوم من اكبر الكيزان واتباع المؤتمر الوطني فتأمل؟
سبب مكالمة عباس هو انه يسألني فهو يريد ان يشتري سيارة كامري من السعودية
وكذلك يريد لابتوب آخـــر صيحة أو (Last cry ) كما قال لي
عباس تعين مســؤولاً عن صندوق دعم الطلاب وجرت القروش في يده
بنى بيتاً لو جلست انا هنا عشرة سنوات قادمات لما استطعت أن ابني مثله
يركب سيارة حديثة دبل كابينه تزوج وعايش في بحبوحة من العيش
اما أنا فقد ضيعت 5 سنوات في جامعة الخرطوم للدراسه هي مدة الدراسة
وزادت سنة أخرى بفعل الاضطرابات المصاحبة لتلك الفترة
اليوم أدركت كم ضيعت من سنين عمري التي لم اتمتع بها بفعل التضيق
من والدي وحرصه على الدراسه فماذا جنيت من كل ذلك
كنا زملاء دراسه في بيت أحدهم فظللنا نتكلم وننفخ البلد والكيزان والحرامية
وداك قرأ في الهند وداك قرأ في جامعة القرآن الكريم وداك كان بليد
وداك والله بشهادة سودانية مقدودة بقى عضو مجلس تشريعي .. و... و .. الخ
المهم نفخة شــديدة في الفاضي فإذا بواحدة من زوجات زملائي
تكسر حاجز الصمت بســؤال نزل علينا كالصاعقة: انتوا يا ناس جامعة الخرطوم
عملتوا شنو اسي اصحابكم ديل كل واحد مرتوا لابسه دهب بالشئ الفلاني
وهو راكب عربية آخــر موديل ...الخ الخ
انتوا علمتوا شــنو بل بعضنا لا يمتلك بيت أو قطعة أرض في السوادن
اها مش باللاي دي مغسة تشق!!
..
..
يتبع
| |
|
|
|
|
|
|
|
|
|
Re: غايتو ضيعنا زمنا في القراية زمان.. هل الشهادة الجامعية معيار للنجا (Re: الامين موسى البشاري)
|
(5)
نجي لموضوعنا الاســاسي ودعــوني أطرح هذا الأسئلة:
- هل الدراسة هي المعيار لنجاح الشخص في حياته العامه؟
- هل اي واحد فيكم ممكن يعمل زي ابوي ويحرم أولاده احلى سنين عمرهم؟
- هل تفرق لو درست في الخرطوم او اكسفورد او اي جامعة اقليمية زي حقات ابراهيم أحمد عمر بتاعات ثورة التعليم العالي ديل؟
- في ناس يجبرون ابناءهم على ضرورة دخول كليات معينة فهل هذا صحيح؟
جد يا جماعة قناعاتي تزعزعت بما أراه اليوم وعند مقارنة حالي باحوال بعض زملائي
ودي مشكلة شائعة وممتدة ومتكرره في كل بيت وكل اســـرة.
عندي صاحبي بتو عمرها 8 سنوات قال ليها قدامي: يا بت انا أقل من جامعة الخرطوم وطب ما بقبل منك اية حاجة تانية.. محل ابوك قرأ وتخرج!!
غرس فيها الحاجة دي وبقت ماشه معاها ... طيب لو ما دخلت الخرطوم العمل شنو؟
ما تنســـوا عند زيارة والدتي والدي في رمضان الماضي قلت له يا ابوي زمان حرمتنا اللعب والدراسة والدراسة أهو درسنا شوف ناس عباس وصلوا وين ونحن وين؟
ابوي قال: يا ولدي دي حالة استثنائية وفي النهاية لا يصح إلا الصحيح
الانقاذ دي لو مشت الامور بتستقيم؟
اها انا اســي انتظر عشان الانقاذ تنقلع (الله يقلعها) عشان الامور تستقيم مش؟
ولو استقامت يكون فقدنا الكتير من عمرنا انتظاراً لهذه اللحظة التاريخية
ناس عباس الهبروا ليهم ملايين ديل تعيشهم لي اولاد أولادهم ممكن نتميز عليهم في يوم من الايام؟
يا دكتور يا دكتور...يا باشمهندس يا باشمهندس .. الهندسة تطير عيشتها قال ليك!!
يعني لو كان ركزنا في الكورة كان أحسن لينا وكان ممكن الزول يكون حاجة
الله يقطع الهندسة والدكترة الفقر دي
يلا تعالوا قولوا لي رأيكم شـــنو؟
ولا أقول ليكم انتم رايكم شنو في البحصل دا ...
وما تقولوا الزول دا رايحة ليهو شرشحة سااااي
| |
|
|
|
|
|
|
|
|
|
Re: غايتو ضيعنا زمنا في القراية زمان.. هل الشهادة الجامعية معيار للنجا (Re: الامين موسى البشاري)
|
عشان ماف زول يبحت استخدمت اسم عباس رمزا لشخصية حقيقية
وهو اللي كان صاحبي .. عشان نخرج من الحرج وكدا
أها قصص زي دي كتيرة ومالية الدنيا
ولكنها لم تشغل الناس ولا بالهم
وهنا اتذكر بوست اخونا طلحة السيد
درهم كوزنه ولا قنطار شطارة ..
القضية وعشان نخرج من التعميم بتاع كيزان وما أدراك ما كيزان
في ناس كتار فاشلين دراسياً وناجحين عملياً
مما يعني ان النجاح في الحياة العامة مختلف تماماً عن النجاح الدراسي
نعم الحكاية في النهاية أرزاق يوزعها رب العالمين
ولكن بالمقاييس والمعايير العادية مفروض يكون وضع الناس القاريين أفضل
زمان كانت الوظيفة تمثل نوع من الأمان للشخص المتعلم
اما اليوم فلا تمثل الا يافته كبيرة للفقر والعوز والحاجة وما قضية الاطباء
إلا خير مثال لذلك فهمل تغيرت المفاهيم أم ماذا حدث ؟
لم تصبح الدكاترة ولادة الرضا .. ناس الكورة فاتوهم وكذلك اهل الفن
واصحاب المهن الحرة برضو فاتوهم .. يعني القصة أرزاق
غايتو الله هونيني
| |
|
|
|
|
|
|
|
|
|
Re: غايتو ضيعنا زمنا في القراية زمان.. هل الشهادة الجامعية معيار للنجا (Re: حمزة سيف الشريف)
|
الاخ الفاضل حمزة سيف الشريف
جمعتك مباركه يا اخوي..
أول حاجة اعتذر لك في تأخري في الرد عليك..
ليس لشئ ولكن المشغوليات ثم حسبت انني قد رددت عليك
فلك العتبى يا حبيب حتى ترضى ... حقيقي اكرر اسفي
Quote: موضوع في غاية الأهمية ولكنها مسألة أرزاق ليس المقياس شهادات ولا ميول سياسية فقط وتجد مثلاً
في السعودية تجد من ليس له شهادات ولكنه يعمل في بعض الاعمال الخاصة وبتوفيق من الله تجده في سعة من الرزق
نسأل الله سعة الرزق والتوفيق |
نرجع للموضوع ... المقاربه هنا عسيرة وبالتأكيد لا نتحدث عن غير المتعلمين
وقد اشرت لذلك في متن البوست ود الجبل والشيخ مصطفى الامين وغيرهم
انا قصدي هل تفاوت المستويات مسألة حاسمة في النجاح في الحياة
دم بخير
| |
|
|
|
|
|
|
|
|
|
Re: غايتو ضيعنا زمنا في القراية زمان.. هل الشهادة الجامعية معيار للنجا (Re: عبد الله كسلا)
|
Quote: انتوا يا ناس جامعة الخرطوم
عملتوا شنو اسي اصحابكم ديل كل واحد مرتوا لابسه دهب بالشئ الفلاني
وهو راكب عربية آخــر موديل ...الخ الخ
انتوا علمتوا شــنو بل بعضنا لا يمتلك بيت أو قطعة أرض في السوادن
اها مش باللاي دي مغسة تشق!!
|
هذا بالضبط لسان حالي اخي امين
لكن انغرست فينا مباديء ليست بالسهولة الحياد عنها
من امانة وزهد عن حق الاخرين
وحاشانا الفساد كان مالي او سياسي لكن شوف اصحابنا
وانا اشاهد اليوم زملائنا بالامس ونحن بجامعة الخرطوم في منتصف السبعينيات
وكيف كان حالهم والجوع الذي كانوا يرفلون فيه حيث كانت جامعة الخرطوم هي
ملاذهم سكنا وماكلا
فهاهم اول مافعلوا حرموا طلابها السكن والماكل
| |
|
|
|
|
|
|
|
|
|
Re: غايتو ضيعنا زمنا في القراية زمان.. هل الشهادة الجامعية معيار للنجا (Re: الامين موسى البشاري)
|
الاخ الامين تحية عطرة وصباح الخير
اراك في ايرادك لمثال جاركم هذا قد جنبت على نفسك فالفرق بينك وبينه كبير وبصراحة لا يمكن ان نعده ناجحا لانه وببساطة ( ركب الموجة ) والتي من الممكن ان يركبها اي شخص اخر وبقدرات اوضع من قدرات جاركم (بس كدي شوف جماعة الحكومة اللافين هنا ديل ورغم انو ما كلهم لكن معظمه قدراتهم متواضعة جدا ) .
والدي رحمه الله ( وبالمناسبة عندما توفي لم يكن كبيرا ولكنه ألم قلة الحيلة والحسرة ) عمل فترة ليست بالقصيرة في الاراضي سكرتير لمدير الاراضي ( تقريبا في السبعينات) واذكر انني في واحدة من زهجاتي عندما احسست باننا ليس لنا منزل باسم والدي قلت له :- انت اشتغلت في الاراضي وما عندك بيت يعني في زول ممكن يتدقّس اكتر من كدة ؟ فما كان منه الا ان قال :- شوف يا ولد لا اخلاقي ولا مبادئي بتخليني اتجرأ و ااكل اولادي او اعيشم بالحرام انا عمك لمن قدم للاراضي سحبت اورنيكو لانو كتب معلومات خطأ دايرني كمان اسرق في نفسي ؟
وبصراحة اخ الامين بعد تلك المحاضرة القصيرة عرفت اين طريقي عرفت ما هو الصحيح والذي جعل والدي رحمه الله يتمسك بمبداءه حتى وفاته وبصراحة كانت تلك الايام التي اعلنت فيها (تمردي ) ايام صعبة جدا - بداية التسعينات - فقد كنا في حالة اقتصادية سيئة جدا وكنت طالب وقتها واخوتي صغار واقتصر طعامنا على وجبة واحدة في اليوم نسبة لشح الموارد المالية ولان المرتب الذي كان يتقاضاه والدي رحمه الله حينها ( كان يعمل في جامعة الخرطوم وترقي حتى اصبح مدير شئون الافراد ) كان المرتب لا يكقي كل الاحتياجات لذلك كان والدي يركز به على اشقائي الصغار .
كل ما يجمعه المرء بطرق ملتوية يتجمع في اخر اليوم ويصير ريق ناشف بطعم الحنظل يشق على المرء انزاله فيجلس غصة على الحلق لا تنزل ابدا .
الاحساس الذي تحسه بعد النجاح يختلف ولكنه لن يكون فرحا لمن يسلك الطرق الملتوية . وبعدين القراية دي ابدا ما بتضيع زمنك وما ضروري تقرا عشان تصبح غني او ناجح في حياتك ودي حاجة مهمة جدا الناس ناسياها ولا متناسياها ما عارف.
انا لحدي اسي بقرأ تقول لي ضيعنا وقتنا في القراية ... هي القراية دي بتكمل ؟
وشكرا لهذا الموضوع
اسامة
| |
|
|
|
|
|
|
|
|
|
Re: غايتو ضيعنا زمنا في القراية زمان.. هل الشهادة الجامعية معيار للنجا (Re: Osama Mohammed)
|
Quote: سلام.. شن فايده القراية لو بقت غير مقدرة
وما بتديك وضعك الاجتماعي والمهني والوظيفي |
الأمين أخوي
طيب التحايا
في البال لي أنك ملخبط الكيمان لخبطة شديدة فحدِّد عشان نعرف ناخد وندي معاك وتكون للحكاية فايدة .
التقدير من منو ؟ والمعيار شنو ؟ فايدة القراية ليك والا لينا نحن عامة الشعب حسب الاجابة على السؤالين السابقين فلا تنسى دورنا الأساسي والجذري في تحملنا فلوس تعليمك وتغذيتك ورفاهيتك في البوفيه المفتوح في داخلية الرازي والمسرح والرياضة والنشاط ومنتدى الفلاسفة بالجامعة ؟ كما لا تنسى وأنت تجيب أن نافع وغازي وقطبي وأحمد الطاهر درسوا في جامعة الخرطوم وقد فعلنا لهم مثل ما فعلنا لك وهم آخر ترطيبة ولن تجد شخصاً فاته قطار التعليم قد حصل أو سيحصل على مكانتهم سا بقاً أو لاحقاً وإلا ستكشفون حاله كما تفعلون الآن مع صاحبك عباس ! وضعك الاجتماعي القال عليهو منصور خالد إنو شهادات جامعة الخرطوم هي شهادات ميلاد طبقي وليست شهادات في المعرفة أم ماذا ؟ المهني ده بتقصد بيهو إتاحة الفرصة للإبداع في التخصص بالقدرة على الخلق أو أن تكون أفنديّاً من الطراز الأول أم ماذا ؟ الوظيفي ده بتقصد بيهو الفرص المتكافئة في التعيين ثم الترقي في جهاز الخدمة المدنية والعلاوات والبدلات ، أم ماذا ؟
تذكرة : ( رجال الأعمال الخريجين قبل الإنقاذ كانوا يعدون على رؤوس الأصابع فمن علمهم طرق النجاح؟ المقدرة على الإستذكار والمقدرة على التكيف كلاهما معطى ولا فضل لأصحابها فيها وده الرزق!)
معليش أنا مستعجل وما مركز وعندي مائة واحد واقفين لي في راسي أتمنى أن أعود .
أبو حمــــــــــــــــــــــد
| |
|
|
|
|
|
|
|
|
|
Re: غايتو ضيعنا زمنا في القراية زمان.. هل الشهادة الجامعية معيار للنجا (Re: عثمان عبدالقادر)
|
Quote: الاحساس الذي تحسه بعد النجاح يختلف ولكنه لن يكون فرحا لمن يسلك الطرق الملتوية . وبعدين القراية دي ابدا ما بتضيع زمنك وما ضروري تقرا عشان تصبح غني او ناجح في حياتك ودي حاجة مهمة جدا الناس ناسياها ولا متناسياها ما عارف.
انا لحدي اسي بقرأ تقول لي ضيعنا وقتنا في القراية ... هي القراية دي بتكمل ؟ |
أخي أسامة .. لا يخدعنك البشاري بهذا الندم الذي أبداه في هذا الخيط.. ويقيني بأنه في قرارة نفسه سعيد بهذا الاختيار المدقع .. ويتملق نفسه كثيراً على هذا الزمن الذي أهدره في القراية!! ويحمد ربه صباحاً ومساء على أنه لم يجعله من أولئك الأثرياء بلا نعمة.. لأنه ببساطة لا يملك اختياراً آخر خلاف أن يكون نفسه.. رفعت الأقلام وجفت الصحف ..
أعرف واحد بلدياتنا كان يعمل في وظيفة قيادية بأحد البنوك الحكومية الكبيرة ..وهبه الله علماً وخبرة لا تكفي لشغل وظيفته فحسب بل لإدارة بلد بحاله .. قدم عصارة علمه وخبرته تلك في وظيفته بكل تجرد ونكران ذات .. وفجأة بتره سيف الصالح العام البتار .. لأنه لا يعرف مصطلح اسمه (البزنس).. فخرج من تلك الوظيفة لا يملك من الدنيا شروى نقير .. والأعجب من هذا كله أن جهة عمله التي طردته كانت كثيراً من تلجأ إليه عندما تتشابك عليها بعض الأمور طلباً للعون .. فيقوم بذلك بطيب خاطر.. فتأمل!!
| |
|
|
|
|
|
|
|
|
|
Re: غايتو ضيعنا زمنا في القراية زمان.. هل الشهادة الجامعية معيار للنجا (Re: نصر الدين عثمان)
|
| Quote: لأنه ببساطة لا يملك اختياراً آخر خلاف أن يكون نفسه.. رفعت الأقلام وجفت الصحف .. |
نصر الدين عثمان
جمعتك مباركه يا حبيب وحاشاني التملق والزهو بنفسي
يمكن كان هذا الكلام ايام الجامعة وكنا نظن ان الدنيا ستفتح لنا ضراعاتها
وتحتضننا بما كسبنا من علم وان التقدير سيكون موجودا مجتمعيا ومادياً
فأنت تعلم ان العلم لم يعد من أجل العلم فقط..
في النهاية أقول الحمد لله فانا لا استطيع الا أن اكون أنا
| |
|
|
|
|
|
|
|
|
|
Re: غايتو ضيعنا زمنا في القراية زمان.. هل الشهادة الجامعية معيار للنجا (Re: الامين موسى البشاري)
|
عزيزي الأمين .. جمعتك مباركة ..
أؤكد لك أنني لم أقصد هذا المعنى مطلقاً ..بل نقيضه تماماً ..
فقد اردت أن أقول بأنك راضياً عن نفسك لاختيارها هذا الطريق .. إلى درجة كبيرة ..
وظني بأن استخدام عبارة (تملق النفس) في هذه السياق هو استخدام استعاري للمبالغة في الرضا عن أمر ما..
تملق (الآخرين) هو أمر في منتهى الوضاعة .. ولكن تملق (النفس) أمر في منتهى السمو ..
وإلا كيف يتملق الإنسان نفسه وهي المطلعة على كل خباياه والعارفة بأدق شؤونه إلا في أمر حقيقي ..
خلاصة أقول بأن هذا المعنى (السامي) هو الذي قصده .. ولك العتبى حتى ترضى ودمت
| |
|
|
|
|
|
|
|
|
|
Re: غايتو ضيعنا زمنا في القراية زمان.. هل الشهادة الجامعية معيار للنجا (Re: نصر الدين عثمان)
|
Quote: وإلا كيف يتملق الإنسان نفسه وهي المطلعة على كل خباياه والعارفة بأدق شؤونه إلا في أمر حقيقي ..
خلاصة أقول بأن هذا المعنى (السامي) هو الذي قصده .. ولك العتبى حتى ترضى ودمت |
نصر الدين عثمان
يا حبيب رش رشك سااااي
والله لم يخطر ببالي ايا مما ذهبت اليه
بالتأكيد انا راضي عن نفسي ولو رجعت سأختار نفس الطريق
فشنهو بطل حساسية وشيل التكليف عادي وخلينا اصحاب
بالعكس سعيد بكتاباتك وطرحك واضافتك للبوست دا
تحياتي
وقلته شنو في عرض الصحوبية دا
| |
|
|
|
|
|
|
|
|
 Re: غايتو ضيعنا زمنا في القراية زمان.. هل الشهادة الجامعية معيار للنجا (Re: الامين موسى البشاري)
|
| Quote: وقلته شنو في عرض الصحوبية دا |
صديقي العزيز الأمين (يعني خلاص مافي طريقة للرجوع عن هذا العرض) ..
يشهد الله أنني منذ التقتيك من خلال مداخلات الأسبوعين العصيبين الفائتين .. كنت أحدث نفسي عن كيفية إيجاد طريقة للتواصل معك ..
فإن ما بين القلب والقلب رسول كما يقال ..
سعيد أنا بالتعرف عليك وسعيد أكثر بكسبك كصديق..
آمل أن أكون على قدر تلك الصحوبية ومتعك الله بالصحة والعافية وحفظ .. ودمت
| |
|
|
|
|
|
|
|
|
|
Re: غايتو ضيعنا زمنا في القراية زمان.. هل الشهادة الجامعية معيار للنجا (Re: عثمان عبدالقادر)
|
الأخ عثمان عبد القادر
تحية وتقدير واحترام..
Quote: طيب التحايا
في البال لي أنك ملخبط الكيمان لخبطة شديدة فحدِّد عشان نعرف ناخد وندي معاك وتكون للحكاية فايدة .
التقدير من منو ؟ والمعيار شنو ؟ |
ماف لخبطة كيمان ولا حاجة يا حبيب
التقدير من المجتمع والمحيط الذي تعيش فيه بأنك متعلم
والتقدير من الدولة ومنحك ما يناسب قدراتك وفقاً لعلمك
المعيار لم يصبح العلم يا اخي بل المعايير اختلفت كثيرا فصارت للولاء والبراء
وللقبلية والجهوية ... الخ
القراية مفروض ان يجني صاحبها أولا ثمراتها ولو تعلم الفرد تعليما
ممتازا ونال الدرجات العلا فهذا سينعكس ضمنيا على المجتمع ومحيط الشخص
لأن الفرد هو اللبنة الأولى في تكوين المجتمع اليس كذلك؟
يبقى فايدة الشخص المتعلم ان تعود عليه أولا ومن ثم على مجتمعه
Quote: نافع وغازي وقطبي وأحمد الطاهر درسوا في جامعة الخرطوم وقد فعلنا لهم مثل ما فعلنا لك
وهم آخر ترطيبة ولن تجد شخصاً فاته قطار التعليم قد حصل أو سيحصل على مكانتهم سا بقاً أو لاحقاً |
آراك حصلت الأمثلة في النفعية فقط من اعضاء الحزب الحاكم
موضوع البوست اصلا هو هل القراية والتأهيل اصبح يعطي المتعلم
المخرجات التي كان يريدها ؟
قارن هؤلاء بدفعتهم أين الآوائل منهم وفي دفعتهم؟
هم وصلوا للمجد لا بعلمهم ولكن باشياء أخرى نعلمها جميعنا
وإن كنت تقصد الصيت والشهرة فقد وصل اليها الشيخ مصطفى الامين
وبابكر ود الجبل وادم يعقوب ... الخ من غير المتعلمين
نظرتي أن العلم والشهادة الجامعية لم تعد هي المعيار والاساس الذي يوفر
للمتعلم حياة كريمة لا فقير ولا غني ولكن عوان بين هذا وذاك
اختلاف هذه المعايير هو الذي دعاني لكتابة هذا البوست
ضابط الشرطة وضابط الجيش لا يركب المواصلات العامة
بينما نائب الاخصائي واستاذ الجامعة المفترض أنهم من علماء الامة
يركبون المواصلات العامة ويضربون ويشردون
| Quote: وضعك الاجتماعي القال عليهو منصور خالد إنو شهادات جامعة الخرطوم هي شهادات ميلاد طبقي وليست شهادات في المعرفة أم ماذا ؟ |
ودي برضو صارت مزحة كبيرة صارت لا طبقي ولا فلكي
لأن العلم لم يعد المعيار لكل هذا
Quote: المهني ده بتقصد بيهو إتاحة الفرصة للإبداع في التخصص بالقدرة على الخلق أو أن تكون أفنديّاً من الطراز الأول أم ماذا ؟
الوظيفي ده بتقصد بيهو الفرص المتكافئة في التعيين ثم الترقي في جهاز الخدمة المدنية والعلاوات والبدلات ، أم ماذا ؟ |
كل ما ذكرت اعلاه
واكيد لي عودة لك مرة اخرى
تحاياي
| |
|
|
|
|
|
|
|
|
|
Re: غايتو ضيعنا زمنا في القراية زمان.. هل الشهادة الجامعية معيار للنجا (Re: Osama Mohammed)
|
محمد عثمان
وعليكم السلام..
Quote: اراك في ايرادك لمثال جاركم هذا قد جنبت على نفسك فالفرق بينك وبينه كبير وبصراحة لا يمكن ان نعده ناجحا لانه وببساطة
( ركب الموجة ) والتي من الممكن ان يركبها اي شخص اخر وبقدرات اوضع من قدرات جاركم
(بس كدي شوف جماعة الحكومة اللافين هنا ديل ورغم انو ما كلهم لكن معظمه قدراتهم متواضعة جدا ) . |
انا لم اجني على نفسي يا صاحب ولكن اتحسر لحال بلد
لا تقدر المؤهلين وتفضل عليهم معايير أخرى الولاء والقبلية ... الخ
ودي كانت تساؤلاتي التي أردت طرحها هنا
Quote: - هل الدراسة هي المعيار لنجاح الشخص في حياته العامه؟
- هل اي واحد فيكم ممكن يعمل زي ابوي ويحرم أولاده احلى سنين عمرهم؟
- هل تفرق لو درست في الخرطوم او اكسفورد او اي جامعة اقليمية زي حقات ابراهيم أحمد عمر بتاعات ثورة التعليم العالي ديل؟
- في ناس يجبرون ابناءهم على ضرورة دخول كليات معينة فهل هذا صحيح؟ |
انا مقتنع بالعلم الذي يكسب صاحبه ادبا واخلاقاً تزينه وتنير له الدرب
فالعلم الحق يهذب صاحبه ويجب ان يعلى شأن المتعلم في محيطه ومجتمعه
التحية لوالدك ولكل صاحب مبادئ لا زال ممسكا بها
تحاياي
| |
|
|
|
|
|
|
|
|
|
Re: غايتو ضيعنا زمنا في القراية زمان.. هل الشهادة الجامعية معيار للنجا (Re: الامين موسى البشاري)
|
ســلام يا الأمين البشارى
من زمن ما حصل لى مثل هذا التعايش مع بوسط من البوسطات و ذلك مرده للنقاط الكثيره المطروقه و طلاوة السرد و بعض التشابه مع حالتنا الخاصة..
أها بخصوص الناس الهبروا و الناس الصبروا.. حبوبتى بتقول ( الدنيا دار و الأخرة دار) و كلو زول يعمل البريحوا..
الشهادة و التعليم و الشطارة بتححق حاجات للذات ، المال ما بحققها. و دى لينا و لى أهلنا برضو.. جامعة الخرطوم و الهندسة و الطب و خلافو لاقية هوى فى نفوسنا و نفوس أهلنا..
لحدى هسة، لما أضرب تلفون للوالد من الغربة، أقول ليهو سلام يا حاج، يقول لى أهلاً يا باشمهندس، رغم أنو الرجال صاحبى خالص، لكن باشمهندس دى عاجباهو أكتر من ماهى عا########ى...
تحياتى لى والدك و هو طبعاً الشفت الحقيقى هنا، و خصوصاً لانوا خلى ليك الباب متاكا مع صاحبك، و إلا كان كسروك فى المدرسة، الجماعة كانوا بدقوا الأول و الطيش على السوا...
و شرشحة كلية الهندسة البعرفا دى كفاك، و قول الحمد لله...
| |
|
|
|
|
|
|
|
|
|
Re: غايتو ضيعنا زمنا في القراية زمان.. هل الشهادة الجامعية معيار للنجا (Re: Abuzar Omer)
|
Quote: من زمن ما حصل لى مثل هذا التعايش مع بوسط من البوسطات و ذلك مرده للنقاط الكثيره المطروقه و طلاوة السرد و بعض التشابه مع حالتنا الخاصة..
|
ابو ذر عمر
وعليكم السلام .. وسعيد اني اسمع الكلام دا منك
عارف ليه جاك الاحساس دا
لان كل كلمة كتبتها هنا كانت صادقة وهو بوست يعبر عن الكثيرين
Quote: الشهادة و التعليم و الشطارة بتححق حاجات للذات ، المال ما بحققها. و دى لينا و لى أهلنا برضو.. جامعة الخرطوم و الهندسة و الطب و خلافو لاقية هوى فى نفوسنا و نفوس أهلنا..
|
ودي واحدة من المصائب يا اخوي
عارف عندي اخوي المهندس عاطف كنت تلك الفترة في السعودية
ولما جيت السودان اجازة كان ممتحن للشهادة السودانية وهو شخص رقيق جدا
وناس البيت كانوا ضاغطين عليهو حتى يلتحق بركب الاطباء
مشكلته كان لا يستطيع أن يحاجج والدتي التي كانت تصر عليه وكذلك ابي
المهم لما قعدته معاهو حكى لي وقال : الناس ديل دخلوني كورس صيفي في بشير محمد سعيد
والكورس مركز على الاحياء بما يؤهله للدخول لاحدى الكليات الطبية
هو ما كان عنده رغبه في الطب ومجالاته .. وفي النهاية قال ليهم:
انا بجيب لكم شهادة الطب ولكن والله ما بشتغل دكتور
تدخلت طبعا ومنحته فرصة اسبوع ليعطيني رأيه النهائي
وقلت ليهو ما تشيل هم الكورس ولا القروش وبعد اسبوع بالظبط كان قراره
أن يتحول الى علمي رياضيات وقد كان ...
| Quote: لحدى هسة، لما أضرب تلفون للوالد من الغربة، أقول ليهو سلام يا حاج، يقول لى أهلاً يا باشمهندس |
ربنا يحفظه ويديه الصحة والعافية...
| Quote: و شرشحة كلية الهندسة البعرفا دى كفاك، و قول الحمد لله... |
الحمد لله يا زول على كل حال..
ياااخ متطلباتنا بسيطه والله وما كتيرة ولا قاسية
لا دايرين نبقى وزراء ولا رؤساء .. وكل ما اخشاه
هو أن تتغير هذه القناعات وهذه القيم بأن الدراسة لا تحقق للشخص المكانة المرجوة
اقرا اية حاجة وتم الباقي موية كضب ونفاق وسرقة ونهب ... الخ
شكرا للاضافة يا حبيب ورفد البوست
| |
|
|
|
|
|
|
|
|
|
Re: غايتو ضيعنا زمنا في القراية زمان.. هل الشهادة الجامعية معيار للنجا (Re: الفاتح شلبي)
|
ود اليشاري ازيك
عنوان البوست بدي فكرة مختلفة عن الطرح الجواه
من العنوان الحديث عن الدراسة بصفة عامة وهل هي طريق النجاح - أو معيار - زي ما كتبت
لكن في البوست تحدثت عن حالة مختلفة صديقك عباس و نجاحه في حياته العملية ربطته بانضمامه للكيزان
وقارنت بين زملاءك خريجي جامعة الخرطوم تحديدا و قارنتهم مع خريجي جامعات اخرى
لاحظ انو عباس درس في الهند وحاصل على شهادة جامعية
يعني اذا كان المعيار الدراسة فقط فعباس اجتازه اذا كان المعيار شهادة جامعة الخرطوم فشواهد كثيرة اخرى تحكي عن خرجي الخرطوم وكيزان في نفس الوقت
اما اذا كان المعيار فقط الانضمام للمؤتمر الوطني فدي اسكت كَب
فبداية حدد معيارك شنو للنجاح أو مفهومك ليه عشان تقايس عليه الحالات المختلفة
هل معيار النجاح ه امتلاك بيت وسيارة ورصيد و ملئ ذراعي الزوجـة(ـات) بالذهب؟
ام انك تكمل طريقك الاخترته لنفسك وتحقق اهدافك الوضعتها - غض النظر عن ماهية الاهداف دي؟
وفي الحالتين في معيار آخر مهم هو وسائلك لبلوغ هذا النجاح ومدى رضاءك عنها واتساقها مع مبادءك و اخلاقك
| |
|
|
|
|
|
|
|
|
|
Re: غايتو ضيعنا زمنا في القراية زمان.. هل الشهادة الجامعية معيار للنجا (Re: محمد البشرى الخضر)
|
ود البشرى
كيفك وجمعتك مباركه يا اخوي
Quote: ود اليشاري ازيك
عنوان البوست بدي فكرة مختلفة عن الطرح الجواه
من العنوان الحديث عن الدراسة بصفة عامة وهل هي طريق النجاح - أو معيار |
الفكرة واحدة يا عمكـ بس أنت شوف ليها كويس
يا ود البشرى عباس ما كان بقرأ ولا مهتم للدراسة كتير ومع ذلك نجح في الحياة
بمعايير الزمن دا المادية يعني بذل القليل من أجل الدراسه ونال الكثير
ابوي قال دا وضع استثنائي يا ود البشرى وسوف يختلف
مفروض المعيار يكون الكفاءة وليس الانتماء أو الجهوية أو العنصرية
وخلينا ما نشخصن المسألة كتير .. الهدف النهائي للدراسة في الزمن هو
الحصول على موقع اجتماعي ومادي يعينك على السير في الحياة ولا ما كدا
قارن بيني وبين عباس اجتماعيا وماديا وشوف الفرق
| Quote: فبداية حدد معيارك شنو للنجاح أو مفهومك ليه عشان تقايس عليه الحالات المختلفة |
ود البشرى عايزين نحدد هل الكفاءة والتفوق في الدراسة هي البتحقق للزول النجاح
ولا حاجات تانية يا حبيب
لو قريت البوست كويس ذكرت أمثلة لناس ما قروا اصلا وحققوا النجاحات
مسائل المال والغنى دي ارزاق من رب العالمين
لكن الزول المؤهل مفروض اكون اقل حاجة في المنطقة الوسطى
بين الغنى والفقر ...........
Quote: هل معيار النجاح ه امتلاك بيت وسيارة ورصيد و ملئ ذراعي الزوجـة(ـات) بالذهب؟
ام انك تكمل طريقك الاخترته لنفسك وتحقق اهدافك الوضعتها - غض النظر عن ماهية الاهداف دي؟ |
الحاجات دي ظاهريا وفي مجتمع اليوم تعتبر مظاهر للنجاح
بشرط تكون مربوطة بالقيم والاخلاق والمبادئ
ود البشرى الناس زمان وحاليا بتحرص انو اولادها يقروا
ويتعلموا كويس في ارقى الجامعات
لكن سؤالي هل دا كفيل بضمان النجاح لهم في الحياة العامة
تحاياي
| |
|
|
|
|
|
|
| |
الامين موسى البشاري
ناصر احمد الامين
أمجد الزين
نصر الدين عثمان
Hisham Osman
Magdi Ahmed Elsheikh
عبد الله كسلا
Osama Mohammed
عثمان عبدالقادر
Abuzar Omer
خالد المحرب
الفاتح شلبي
محمد البشرى الخضر
فيس بوك
تويتر
انستقرام
يوتيوب
بنتيريست