الحمد لله فرجت - مطرة جد جد غطت السودان كله

(عدل بواسطة الطيب شيقوق on 08-02-2011, 08:36 PM)

Quote: وكقول الحاردلو.. الخبر الاكيد قالوا البطانه اترشت وساريتن تبقبق للنهار ما اتفشت وبت ام ساق علي طرف الفريق اتعشت

Quote: والله أنا غاية السعادة والفرح بهذه الأخبار المتواترة من البلد اليوم وأمس بالليل ، جماعتنا فيهم ناس (رمضو) التيراب ومنتظرين موية مشروع (ودبدر) وناس جاتهم موية ( سراق) وقاموا على المضخات والبوابير الصينية واللستر وحاتك ثلاث أيام ما تسقي فدان ... أها رحمة الله نزلت ... والشق (أنكسر) والخيران نزلن (الرفاعي) وعليك أمان مطرة تانية (تطبق) ليهم الأولى ... جالون الجاز يبقى ب فرد جنيه ... وزي ما قلت أول ما قام (البروس) من (تمليكة) وملخوية و (تبر) ( وأضان فار) وخلافو (والسعية) تشبع تاني اللبن الرطل ب (50) قرش زول دايرو مافي ، وحرم زولا يقدر يشتري ليهو (عتود ) مافي إلا يساعدوه العول ... أبدا لن يصيبنا القنوط من رحمة الله ... نساءل الله أن يجعله موسم خير ورحمة وغيث نافع للبشرية والسعية ...

Quote: حمد لله الواهب الرحيم أنا شخصيا كنت خايف من الجفاف (زمان ،سنة 1984، شفت بأم عيني ما فعله الجفاف وإنقطاع المطر) دا خبر بمليون دولار التهنئة لك ولكل مزارعي المطري في السودان وإن شاء الله وبإذنه نحن موعودون بموسم زراعي ناجح

Quote: اتصلت بالجماعة هسع - قالوا لي ما سامعين حاجة من هدير الخيران ولعلعة السباليق هيييييييع كع

Quote: الحمد لله علي نعمته وعلي الأمطار التي نسأل الله أن يجعلها أمطار خير وبركه ويوديها للناس العايزنها نحن في الخرطوم عاوزين هواها بس

Quote: الخبر الأكيد المطرة لاح قبليها وانبهلت سمانا، والقبلي يشلع فيها يا رب العباد، يا عالمن بالخلوق والفيها تكفينا المحل، والمحنة دي تعديها

Quote: تعرف ناسك ديل شيتا تقرقف كدوبهم غير مطر الله مافي وبعد ما حشا الواطة اتحرق ما يبلو غير ماء السماء خلي الخاوي يسيل براك تشوف الخير ينشر فوقها زي السماد

Quote: لنترك الليل لنتسلل على جنحه إلى المؤثر الثالث والأخير من مؤثرات الدوبيت السوداني مما اخترنا لهذا المقال وهو (المطر) فللمطر أنشودة في قوافي الدوبيت شأنه شأن عناصر الطبيعة الأخرى التي طالما تغنى بها ولها الشعراء عندما تركت فيهم آثارها، وها هو الشاعر الضخم (محمد شريف العباسي) يخلط عشقه بالمطر ويقول: القَفْ الظِليطُو مَقَرَّنْ جَـنّــُوا الــليــله مِتـْبَارْيَاتْ تُعُولاً خَرَّنْ الــوَدَعْــنَا بـىْ العَـبـْرَه امْ عُيـُوناً دَرَّنْ طَلَقْ في جَوفِي وَجَاجْ السَمَايمْ الحَرَّنْ ومن نماذج إحتفاء الشعراء بالمطر وما يخلفه وينتجه قول الشاعر (طه ود الشلهمة) وهو يرسم لوحة لطبيعة أرض البطانة عندما أضاء برقها وأرزم رعدها وجاد مزنها بالغيث العميم فاستحالت حرارتها المحرقة إلى نسائمَ عليلة وبدت الأرض وقد غزتها الخصوبة تختال في ثياب من الخضرة الزاهية والمتنوعة الألوان: إسَّمَحْـتِ مِـنْ صَيفـَةْ خَـلا وقَـهَبـُونَه واتْـفَشّـَتْ سَحَابـْتِكْ فَوقِكْ المَشْحُونَه أصْبَحَتْ المَوَاطِي والضُهُورْ مَطْيُونَه واتْـكَـسَيـتي بَـىْ تـِيـابـاً مـَنـَوَّعْ لونَه وهاهو (ود آمنة) الذي جرى ذكره قبل قليل والذي يعد أحد أهم شعراء البطانة يصف مطرها ويقول: العـَجَـمِيــة مِــنْ بَــحْــر الــمُحِــيطْ إنْــجَرَّتْ ودَورَيــنْ السِيــولْ مَانْــعَه النِـعَمْ مَـا فـَرَّتْ بُطَانة أبْ سِنْ طَوَتْ تَوب الحُزُنْ وانْسَرَّتْ والـبِـلْ حَـاشَـنْ الـكِـتـْرَه وعُـجـُوفِـنْ دَرَّتْ ومن أشهر وأجمل ما قيل في وصف مطر البطانة وما يخلفه من خير هو ما جادت به قريحة عبقري الدوبيت السوداني ورائده الحاردلو في مربعه الشهير القائل: الـخَـبــَرْ الـلكـِيـدْ قَـالـُو الـبـُطانَه انـْرَشَّتْ سَــارِيــةً تـَبـَقْـبـِقْ لا الـصَباحْ مَا انْفَشَّتْ هَـاجْ فـَحَـلْ أُمْ صـِرَيصِرْ والمَنَايِحْ بَشَّتْ وبِتْ أُمْ سَاقْ عَليْ حَدَبْ الفَرِيقْ إتْعَشَّتْ مع المطر تنشط الدورة الإقتصادية في الريف والبوادي ويحلو النشوق والرعي وتثمر الزراعة وترتدي الأرض ثوباً أخضر وتنتعش النفوس ببارد النسائم وعطر الأعواد وشذا الورود وهي صور دائماً ما تعتمل في في نفوس شعراء الدوبيت ويعبرون عنها في قوافيهم وهاهو الشاعر المجيد (ود سند) يقول: إنـْـفَجَــرَتْ تـُعُـولِــكْ وقَــاسِـكْ الـوَبّـَالْ رَعَـدِكْ مِغْـرِبَـاوِي وَهَجْعَةْ بِرَيقِكْ شَالْ عَرَبِـكْ شَالـُوا فَـوقْ زُمُلاً مُضِي وفََيَّالْ مَعَ الحَمَرَيبْ دُعَاشِكْ جَابْلُو رِيحَةْ نَالْ ويستمر شاعرنا (ود سند) بمفردته الموغلة في البدوية وبروحه الفرحة بالمطر في أرض البطانة أرض الشعر والجمال ويقول: خَـرَفـْتِـي وطَـلايـْعِـكْ لـلمَرَاتِـعْ لَـفَّنْ ضَـعَايـْنِـكْ شَيَّلَنْ مِـنْ المَدَامِرْ وقَفَّنْ وِدْيَـانـِكْ مَشَنْ لَيْهِنْ سِبُوعْ مَا جَفَّنْ وقِبْلِيكْ تَوَّرْ الرَكَمِي السَحَابُو مَدَفَنْ وينهض الشاعر (عبد الله ود عبد الرحيم) بقافيته البدوية ذات الذائقة الخاصة والنكهة البديعة ليقول عن مطر البطانة الذي ما يفتأ ينهمر ظهراً وضحىً: ضُهْـرِيكْ صَـابِـقْ السَـارْيْـه وصَبِـيـبُو اتْحَتَّ قِـبْلـِيـكْ سَــرَّبْ أُمْ بـــَرْد البــِرَمِـي صـَـقَـطَا وضَحَوِيكْ دَودَا فَوقْ حَقَّاصْ ضُهُورِكْ خَتَّ وجـَبَـالِـكْ جَـبـَدْ كَـجَـرْ التـُعُــولْ واتْــغَــتَّـى ونختم للمطر بنموذج من شعر إحدى خسناوات البطانة وهي (التاية بت اللمين ود خير) والتاية شاعرة مجيدة وأخت لشعراء مجيدين ولشاعرات مجيدات تقول في نهج لطيف: قُولْ لَيْ مَدِينَه والتَـايَه وبخيته وعَمِيْ مَطَرْ العِينَه صُحْ فَوقْ الصِّفَيَّه مِرَمِيْ مَمْطُورَا وهَـوَاهَا لـَزِيـزْ ورَوَّقْ دَمـِيْ إيـدْ الكَـرْوَه والرَويَّـانْ عُقـُبْ مِتْحَمِيْ

Quote: اللهم لك الحمد والشكر,,,, ربنا يديم عليكم نعمته ,,, أها العنكوليب والطلح بروس برضو.

Quote: ربنا يرحم العباد و البلاد وترى الروقه و النعمه كان فى خلانا ولا البنادر سببها المطر و ربنا يفرجها على اهل السودان من اوسع الابواب

Quote: إسَّمَحْـتِ مِـنْ صَيفـَةْ خَـلا وقَـهَبـُونَه واتْـفَشّـَتْ سَحَابـْتِكْ فَوقِكْ المَشْحُونَه أصْبَحَتْ المَوَاطِي والضُهُورْ مَطْيُونَه واتْـكَـسَيـتي بَـىْ تـِيـابـاً مـَنـَوَّعْ لونَه

(عدل بواسطة عماد حسين on 08-03-2011, 03:11 PM)
(عدل بواسطة عماد حسين on 08-03-2011, 04:40 PM)

Quote: عماد اسمع كلام عمك ادريس ود على في البطانة نحن الود لبونا بشيل حمول النائب تصرم عندنا القحية البصيبها الصائب نحن اولاد شكير جور نالنا كلو نقائب ديمة نلولي في المحن الكبار وغرايب وقال ود عبشبيش يخاطب البطانة: بندق فيك نحاساً من قديم راجينا فيه خيولنا عارضات كيه للمابينا كان ما تجرتقك دماً علوجه سمينة لا تجيبي لنا حنتوت يا ام هواياً زينة

(عدل بواسطة عماد حسين on 08-03-2011, 04:41 PM)

Quote: وعقبال مطرة الحرية تغطس حجر كل متجبر وتواسي بالواطة نخرة كل متكبر وتخضر ضراع كل مسكينا متصبر

Quote: بصراحة بوستاتك (همبريب) المنبر