رضينا للصُلح ما لقينا البصالحنا !!
رضينا للصُلح...........ما لقينا البصالحنا !! هاشم الإمام لَيْ زمن بكوس للجنا الديّا مي الّلويخة دا ، برضو ليهو وحشة ، داير أقولو مالك فاكي فينا الزول العكليتة دا شابكني بشتكيك بشتكيك القانون الفدرالي الحكومة الفدراليّة الجيش الأمريكي وعيييييييييك كلامن كبار كبار ما ليهو حد وكمان معاهو حليفة ، والله أنا زمان قايل مافي ألتخ من الديامي دا لاكين الجنا العكليتة دا فات الكبار و القدرو ، الزول دا مكري وللا شنو ، اللكاكة دي ما ساكت أكيد ، عشرة في المية ، وراها سر ! بصِّح آجنا مشيت الجنوب ! بسوِّ شنو آلمايل ، كايسلك وظيفة عند ابطربوش ، عشم إبليس في الجنة ، والله برضك ما تيأس أخوانك الجمهوريين قالو إبليس ذاتو بدخل الجنة . قالو محتفلين بدولتكم الجديدة ( مبروك ) وهاجين وهايجين ، ومزيقتكم ضاربة ، ومريستكم ريحته تجيب الضهبان ، والجماعة سكرانين طلطميسة يتكلوهم تِتِكِل، نان مالك آسجمان ما سُقتَ معاك أصحابك ديل يهيّصو معاكم ، من هسع سليت ضنبك ، والله قريشات البترول ديل نصها تجقموها بوقنية ساكت ، والباقي نشيلو منَّكم ضرائب . هسع خلو كلامي دا واسمع للكلام الكايسلك ليهو وكلمبو جماعتك ناس حِمبِّرَّة والغنَّامة ، باقي مطارق دار جعل جايين عليكم بدورو الصُلُح خايفين علي وليدُن العندكم دا ما يقوم العكليتة حقكم دا يودّيهو الظابطيّة ، هسع دي صوبنو هدّامن وظهّروهن ، العراريق طوال ، والسراويل خمج والتكك مكنتلة ، والتياب يجرجرن ، والعمم مزيّقة ، والمراكيب قطع الجنينة ، والعكاكيز مضببة والسكاكين في الضرعات، هيع أولاد جعل عافي منكن . لاكين الراجل سيد الحوش أبصلعة دا قبال ما يلمو فيهو الهكاكرة يهكروهو سدّد عليهم البيبان وحلف بالتحتحت شعيراتو الباقيات ديل شعرة شعرة ما يخليهن يدخلو بعكاكيزن وسكاكينن ، وهن كمان حلفو بالطلاق ما يخلو سلاحن وراهن وقالو دا بطال ، والطمبج الحكاية جايبين ليهن ضبائح قالو كرامة بعد يتم الصُلُح عاد لا فيهن عورة ولا عرجا ولا هزيلة ، سمان ومدوعلات مطوّلات ليهن زمن في الجزيرة أم طريفي يرعن سِعدة خدِّرة وعلوقن فتريتة ما دخل بطنن أُمباز ولا مُشُك تبّ عِز وللا مو عِز ! وعارف كمان جايي معاهن ( البِشيرة ) بدلوكتو وشتمو وحالف إلا يهبك الدلوكة ويغني " الحسن صاقعة النجم " و " الختم عثمان " تحت تمثال الحريّة وفي حدائق البيت الأبيض ، والداير البُطان يرجانا هناك، هيع كدي فوق أهلي الجعليين ، آها البرنامج دا كلو بكري أبصلعة طرشقو لينا شِن نسوِّي . قلنا نشوف لينا زول عندو مفتاح لحوش بكري دا لقينا ود أخوي نزار حسين والجنا غير إنو ودأخوي جدو حسين ود الخضر من أعيان الحعليين راجلاً طويل وبدين وحافظ القرآن ومزواج عندو نسوان كتار وأولاد كتار ما شاء الله وقوي قوة خرافية وكلّام وزول مجالس يجوهو للجوديّة من بلاد بعيدة ، آها أكيد نزار فيهو جينات من جدو ، وأبوهو ذاتو مو راجلن هيّن متعلم وفنجري وعندو جنسية خليجية ، لاكين مشكلت نزار إنو جدو مارس التعدد ومكتّر من النسوان ، و عمو أحمد ( الدبوس ) باقي ريّس على جماعة بصبّحو النسوان بدقّة وبمسّوهن بواحدة ويقولولك : المرة الله يكرم السامعين ، و المرة بدون مؤاخذة ، آها الله اعلم اِمكِن جراهو عمو عليهو ، آها زي دا النسوان البعِرفِن ديل والجنوي البتبلبصولِن ديل ماظنو بقبلو جوديتون . قلنا نشوف أسامة خلف الله نوسطو برضو الراجل ودّعمّي وحقاني وما بعجبو أنسجن في قضية رأي لاكين هو عاد ما متنتح في الديمقراطية دي حلف ما يدخل لجنة ما منتخبة قلنا ليهو بنسوّيلك انتخابات ، كمان الانتخابات عندنا قاسية ، وبنعمليك مفوضية ونشوف لينا أي واحد خُردة ( إن شا الله كوستاوي ) ونعملو رئيس ليها ، أها أبى و قال هووووووووووي يا ناس المؤتمر الوطني أختوني دايرين تريسوني وتّيسوني ، وتلحِّسوني وتفكوني عكس الهوا ، ألعبو غيرها ، هسع الجاب المؤتمر الوطني شنو اكّان مك خاتي ، آها زي الجِكنة دا يسولو شنو ، خليناهو . قالو وكت أسامة ما رضا شوفو فكي المعارضة ، قلنا ياتو اِنَّعلو الفقيّر ، ترلة التجمع ، المديدة حرقتني ، قالو ياهو ذاتو كتلتو ، قلنا الفقيِّر دا ما بقدر على الشغلة دي ، دا فكي يصلح يكتب الرجال الطافشين من نسوانن ، وللا ينادوهو لصدقة ، قالو لي إنت طاشي شبكة وللا شنو ، الراجل دا من قعد يباري في منظمة المرأة والأخوان الجمهوريين بقى فكي مودرن حيرانو شكسي ومحايتو ببسي . لا لا مو لازمنا مو لازمن ، شوفو ليكم واحدن كُتُر . كيف صاحبك دكتور تاج ؟ لا لا ، نصحني مليون مرّة أبعد من السفها وما سمعت كلامو أقوم هسع أوسطو يقول والله الجعلي دا جابلو رخوة . ومالو صلاح الزين ما قُت ود أختك ، يا جماعة الخير قالو ودالأخت مُصْماص سِعِن لا بنشرب ولا بترضى تدفقو و إنتو عارفين صلاح الزين دا هسع يقوم يخلي الصلح ويتكلّم في فلسفة الصلح ، ويقول ليهم القراءة ما بتنتج معرفة ، ، وما قبل الحداثة وجنس الشغاليت دي ، وزولي أصلو معقّد يقوم يقول ليهو الحكومة الفدراليّة ، وكلامك الغامض دا استفزاز لمواطن أمريكي ، والقانون الفدرالي وبشكيك والله عِلا اشكيك ، والشمطة تقوم والصلح يطرشق ، ونبقى في صُلثح جديد ! قالو كيف قريبك راعي الليموزين ! قلنا دا مشكلتو إنو عندو عداوة مع مادة ص ل ح ومشتقاتها وتقليباتها ،قال أكّان التحالف الديمقراطي حكم ، الله يكضب الشينة ، بلغيها من المعجم ، تصدق عربيتو أكّان خسرت ما بصلحه ، وكراهتو في الدنيا صلاح بن البادية وصلاح أحمد إبراهيم والطيب صالح وصلاح السعدني ، وصلاح عبد الصبور وعندو قطعة أرض في صالحة باعه عشان ما يضطر ينطق الكلمة دي ، والحكاية دي عاملا ليهو مشكلة مع جدو ومع صلاح الزين وصلاح شعيب مو عارف يكرهم وللا يخليهم . والمثقفاتيّة الموهومين بتاعين واشنطن ديل مالُن ، قلنا حاولناهم لاكين هم قالو الحكومة بتعتبر الناس البكتبو في سودانيزون لاين شماشة ساكت ، وخايفين إذا دخلو في الموضوع دا الحكومة تعتبرن شماشة وطبعاً باقي السبيرتو المغشوش قــــــــــــــــــــــاعد ! والنسوان أكّان بنفعن واسطة ما تشوف البنية الحميرة الدكتورة ، كمان قول برضها نطيحة ومتردية . لا لا حاشَ ماقتّ ، لاكين هي قالت أنا قُتّ النسوان ناقصات عقل ودين ، والله البنية بهتتني ، أنا صححت الرواية الشعبية الشائعة وجبت شرح الرسول صلى الله عليه وسلّم لمعنى نقصان العقل وهو النسيان وقلت النسيان ما عندو علاقة بالقدرات العقلية ، البنية مصنقعة وعاجباها روحه والكلام الفي راسه ما بتغيرو عشان كدي واسطتها مجروحة . وطيّب بريمة مالو ! أريتكم بالملة هسع ماقتو حواري وأنا شيخو كيفن رضيتو بيهو وسيط ، وكمان صاحب الدعوى حذّرو وقالو أبعد بعيد ، البجيبو شنو . آها ما تجرست وقلت الروب البحلني من الجنا المعسّم دا شنو . غايتو مافي طريقة غير نعزم الجنا الجكنة دا في واشنطن يحضر معانا الليليّة ( مولد الختم محمد عثمان ) - ما يسمعونا أنصار السنة ، يوم الخميس ، و نبهل ليهو الشاي بالقرفة واللقيمات الكبار يمكن يتذكر جدو الخليفة ويتنازل من القضية ويجعل ثواب التنازل ليهو ،كمان أنا إمعاناً في إظهار حسن النية بتنازل ليهو من لوحي ( وأما نسبه صلى الله عليه وسلّم …..) وبخليهو يقرا دعاء الختمة ( ثم ارفعوا أيديكم يا معشر الحاضرين إلى التي هي قبلة الدعوات ) قصّرت معاهو يا جماعة الخير ، كمان يوم الجمعة بنسوّيلو جلسة مديح ونجيبلو الخليفة محجوب ود خال العيال قُتّ شنو آزول ما رضيت ! قالو امكِن الزول دا فيهو نفس جمهوري أرفعو عنو الصلاة ذات الحركات وشوفو لو طريقة لرمضان الجايين في الحر دا ، قلنا : لا حرّم إلّا دي ، يمشي المحكمة عديييييييييل! وخلو الرهيفة تنقد .

[رد على الموضوع] صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]