نعى اليم ...... سودانيز اون لاين دوت كم تحتسب الزميل فتحي البحيري فى رحمه الله
وداعاً فتحي البحيري
|
Re: بعض طرائف ومفارقات أركان النقاش بجامعة الخرطوم http://www.sudaneseonline.com/db/attention/0 (Re: عمر عشاري)
|
( 1 )
المسرح
شارع المين
بالقرب من حديقة الآداب
ركن نقاش حاشد لتنظيمات التحالف
العام 2003
الجو السياسي في الجامعة ملئ بالحماس
وبات واضحا للعيان ان الإتحاد ستفوز به تنظيمات التحالف
المتحدث : محمد الفكي ...الحزب الإتحادي الديمقراطي
يستخدم كل مهاراته الخطابية من اجل الإرتفاع بحماس الطلاب
تصفيق وهتافات وإلتفاف جماهيري واسع
فرص النقاش تُفتح
الجميع يؤيد ويهتف
فرصة نقاش يطلبها عضو المنبر
عمار محمد آدم
محمد الفكي :-
عمار إتفضل .................
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudaneseonline.com/db/attention/0 (Re: عمر عشاري)
|
الواثق متحدث انصار السنة ضاق صدره من هذه التلميحات ، التي نجحت التنظيمات السياسية بتسويقها حتى إرتبطت الباسطة فعلا بجماعة انصار السنة المحمدية
وفي أحد الأركان إنبرى أحد متحدثي التنظيمات التي تقف على الضفة الأخرى وتنادي بوطن علماني
قائلا ...بصوت عال بحيث يسمعه الواثق في الركن المجاور
انصار السنة ديل بحبوا الباسطة حُب
فما كان من الواثق إلا ان رد بصوت عال أيضا
شوفو الزول ده عليكم الله ياطلاب ....هسة في زول مابحب الباسطة ؟؟
تلاقيهو هسة بحب التنباك ويقول ليك ماتحبوا الباسطة
الطريف في الأمر بالنسبة لي على الأقل
انني أعرف هذا الطالب فعلا معرفة وثيقة
وقد كان متيماً بالتنباك :)
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudaneseonline.com/db/attention/0 (Re: عمر عشاري)
|
علي أن أذكر أن هذا البوست لا يقصد بأي حال من الأحوال التقليل من شأن تنظيم سياسي أو شخص بعينه
ولا مرارات فيه
القصص المرة والإنتهاكات التي كانت تحدث والأكاذيب والوشايات والإعتقالات والإغتيالات
قد ياتي حينها
ولكني الآن عندما أذكر كل الناس أذكرهم ولا شئ في قلبي غير إحساس بالشجن
وأشواق لزمن جميل
وذاكرتي باسمة وهي تسترجع ذكريات الحياة السياسية في الجامعة
بكل تنظيماتها اليمينية واليسارية والتي في الوسط والقومية والتنظيمات الطالبية
الوحدويون والإنفصاليون
والأشخاص أذكرهم الآن
فتأتيني وجوههم ومواقفهم وطرق تناولهم للمواضيع
وأتساءل أين ذهبت بهم الحياة ؟؟
وأين هم من مواقفهم القديمة ؟؟؟
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudaneseonline.com/db/attention/0 (Re: عمر عشاري)
|
(3 )
ركن لأحد التنظيمات اليسارية
الكادر الخطابي يصول ويجول
ويتناول الأحداث السياسية بالنقد والتحليل
وفي أثناء ذلك اتى على ذكر أحد الأحاديث النبوية
وفي فرصة للنقاش
دخل أحد منسوبي أنصار السنة وكان( بدينا جدا )
دخل ذاكرا ان الحديث الذي أتى به الكادر الخطابي
حديث ضعيف وسند حديثه بالحجج والبراهين وأرقام الصفحات
المهم
جضم شغلوا وكان واضح أنو يتحدث عن دراية وفهم لضوابط نقل الأحاديث النبوية
وإقتنع الطلاب ان الحديث ضعيف
وعندما عاد صاحبنا ...الكادر الخطابي ...للتعقيب عرف إنو موضوعو في الحتة دي بايظ
فماكان منه إلا أن نظر مساااافة كدة لكادر أنصار السنة البدين
قائلاً :-
والله إنتو يا أنصار السنة ...تسمنو إنتو ...وتضعفو الأحاديث
_________________________________
ضحك الطلاب وصفقوا للمفارقة رغم إقتناعهم إنو صاحبنا مهزوم
ولكن سرعة بديهته شفعت له :)
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudaneseonline.com/db/attention/0 (Re: عمر عشاري)
|
( 6 )
بعض المتحدثين كانو لفاحين امثال
وينطقون بما لايعرفون
مثل ذلك المتحدث الذي صب الطلاب متحدثا عن قضايا مختلفة
وهو يضع على الكرسي امامه مجموعة من الكتب
وهي حركة إرتبطت بمجموعة من المتحدثين الذين يستعرضون بها على الطلاب مقدراتهم الثقافية
إلا ان صاحبنا ذلك والذي يبدو انه يحفظ من غير فهم مجموعة من العبارات
وبعد ان تحدث والطلاب من حوله في صمت شديد
مافسره المتحدث إعجابا بثقافته
فردد بفخر شديد
إنتو قايلين الكتب دي نحن شايلنها ساي
والله نحن
( كالحمار يحمل أسفارا )
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudaneseonline.com/db/attention/0 (Re: عمر عشاري)
|
بتعرف قريب الله بتاع الاتحاديين داك؟؟
في فترة كده كان ركن أنصار السنة بتاع يوم التلاتاء ليهو ضل كبير وحيّر التنظيمات وما عرفت تفشّلوا رغم تجريب تكتيكات كتيره ختمت بالعنف..
المهم واحدة من تكتيكاتهم كانت النقاش بكوادر كبيرة ومنهم قريب الله دا لأنو ما كان معانا في جامعة الخرطوم اتخيل كان في جامعة الجزيرة..
دخل الركن واستدل ليك بكم حديث كده وعجبو الشغل قام قال : والله الليلة أنا جاييكم بكلام من كتبكم يا أنصار السنة..الليلة جيتكم قاري قراية شديده..كالحمار يحمل أسفاراً..
اتخيل لي كانت أكبر ضحكة في شارع المين..وقريب الله ما عارف الناس ضحكت ليه : ))
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudaneseonline.com/db/attention/0 (Re: عمر عشاري)
|
( 8 )
اتى الكيزان في جامعة الخرطوم بتقليعة جديدة
وهي جلب زجاجات المياه الغازية إلى ركن النقاش بدلا عن الماء
فأصبح منظر الميرندا الصفراء وبجانبها البيبسى أو الفانتا تحت كرسي المتحدث مشهدا عادياً
جماعتنا بتاعين رفض كل شئ
ناقشوا هذه الظاهرة وتوصلوا أن هذه المشروبات الغازية تم شراؤها من مال الطلاب
وقرروا ان ينوبوا عنهم في إسترداد حقوقهم
وكان ذلك بالطريقة التالية والتي إبتدعها سامي طالب كلية الهندسة الكهربائية
وهي أن تطلب فرصة للنقاش
وتقول أي كلام فارغ ثم تتجرع زجاجة المياة الغازية
بقة ...بقة أو كما قال القذافي
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudaneseonline.com/db/attention/0 (Re: عمر عشاري)
|
( 9 )
طلاب المؤتمر الوطني
يُقيمون ركناً للنقاش يتحدثون فيه عن الحاكمية
ويردون فيه على مزاعم التنظيمات العلمانية
التي تنادي بفصل الدين عن الدولة
قائلين أن الحاكمية لله ولابديل عن حكم الشرع
ظل سامي يرمق زجاجة الميرندا بإهتمام
وهو لايكاد يتابع الحديث الدائر
وما ان فتح المتحدث النقاش
رفع يده سريعا
ولما دخل دائرة النقاش إتجه بخطىً ثابته تجاه زجاجة الميرندا الباااردة
ولم يقل أي شئ
بل رفعها من الأرض ( وقرطعها ) حتى آخر نقطة وسط ضحكات وصخب الطلاب وإندهاش المتحدث
ثم تترع قائلاً
أنا بتفق مع المتحدث
ما لله لله وما لقيصر لقيصر
ثم خرج من الإتجاه الآخر للركن لايلوى على شئ
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudaneseonline.com/db/attention/0 (Re: عمر عشاري)
|
Quote: بل رفعها من الأرض ( وقرطعها ) حتى آخر نقطة وسط ضحكات وصخب الطلاب وإندهاش المتحدث
ثم تترع قائلاً
أنا بتفق مع المتحدث
ما لله لله وما لقيصر لقيصر
ثم خرج من الإتجاه الآخر للركن لايلوى على شئ |
هههههههههههههههههههههههههههههههههههههههههههههههههههههههههههه يا عمر .. انا اول مرة احضر لي ركن كان في اجازتي الفاتت ... :) المهم الركن زاتو بتاع منو ..انا ما كنتا مركز شديد ..المهم حرقني ليك انو الزول عامل فيها بيتكلم عربي فصحى ... و العبدلله عجمي لا يشق له .. من عند ناس صحبك عماد عبدالله .... المهم يا سيدي .. الزول قال نحنا هسع لو اخدنا عينة عشوائية .... (الزول دا جر الياء ) ... أخوك طوالي وقف و بي صوت عالي .. اسمها عينة يا عينة (عينة الاخيرة دي الكلمة المصححة ) يعني هو نطقا كدا EEINA و انا صلحتها ليهو 3ayna :)
التوضيح الاخير لأنو اخوك من الذين يجهجهون سيبوي في قبره ..على حسب رواية صاحبنا خدر
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudaneseonline.com/db/attention/0 (Re: sari_alail)
|
ساري الليل سلامات كيف بالله ماليزيا ؟
الناس الشالوا إستقلالهم بعدنا وتاني ليوم القيامة مابنحصلهم
أسمع دي مع قصي
( 10 )
أحد كوادر جماعة أقم وهم مجموعة من الطلاب فهمهم للدين فيهو تبسيط مخل كده
شابك الناس
ياجماعة الدين دخل في كل تفاصيل حياتنا
ياجماعة حتى في الكورة
الناس بقت عارفة إنو حتى القون توفيق من رب العالمين
عشان كده لو شفتو في التلفزيون الزول أول مايجيب قون بسجد لربنا
محمد فاروق بعد إعطائه فرصة نقاش :-
يا أخينا بمنطقك القبيل ده لو المهاجم حيسجد لربنا لأنو جاب قون في لعبة
هل ممكن حارس المرمى يسب دين ؟
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudaneseonline.com/db/attention/0 (Re: عمر عشاري)
|
Quote: ياعمر عشاري داانتا طلعتو بيبي المهم وسعها بي الجامعات عشان اجيك لخطاب وائل خلف الله وعصمت الدسيس كانوا كارثة ـــــــ ومندسييين كاااك |
ياحيد يازين
ياصديقي العزيز
لايغرنك ذلك...أنا جيت الخرطوم دي بعد ماقريت سنتين في الجامعة الأهلية ...إمتحنت شهادة سودانية مرة تانية بفتش في درب القانون الهسة انا ماشغال بيهو ده ...
هو ياحيدر في قانون في البلد دي
فجأة جهاز الأمن بقى مظلوم ولامي في الناس شكاوي
الحاجة دي ذكرتني قضية في مجلة الأحكام القضائية قريناها في الجامعة
إنو في واحد هرب من معتقلات الأمن
ناس الأمن فتحوا فيهو بلاغ ...قالوا الزول ده هرب مننا
القاضي كان محترم وفاهم يعني شنو قضاء افرج عنو
وكتب في تعليقو على القضية هذه العبارة التي مازلت أذكرها رغم مرور سنوات طويلة على تصفحي لهذه القضية
( وحسناً فعل بإسترداد حريته )
قاليك الجماعة قنصوا ليهو بره المحكمة
وإعتقلوهوا
على قول النمر للقرد
( يازول طاقيتي وينها )
______________________
أحكي ياصديقي حكاياتك الجميلة
وماتشتغل بالعنوان كتير
ناس عصمت ديل ذاتهم إشتغلوا في جامعة الخرطوم كتير
وكان كوادر التنظيمات السياسية يتنقلون من جامعة إلى جامعة
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: أبو ساندرا)
|
( 12 )
مالك الحسن الكادر الخطابي لمؤتمر الطلاب المستقلين في ركن لأنصار السنة يتحدث فيه الواثق
أذكر أن أنصار السنة كانوا يقدرون مالك جدا برغم إختلاف الرؤى والأفكار
كان مهذبا جدا لايسئ ومنضبط بشكل يدعو للإحترام ...وكانوا يردون عليه بموضوعية شديدة وتلحظ في نبرتهم نوع من المودة متى ماناقشهم في قضية
في ذلك اليوم جاء ذكر لدعاء السفر أو نحو ذلك
مالك في فرصته للنقاش بطريقته الهادئة المحببة :-
يعني ماممكن دايرين تنوموا عندكم دعاء
تصحوا بدعاء ، داخلين الحمام بدعاء ، طالعين منو بدعاء
تاكلوا بدعاء وتشربوا بدعاء
دي تصرفات دنيوية عادية
ما أي حاجة في الدنيا نعملها ياتودينا الجنة ياتودينا النار
الواثق معقباً بإبتسامته الساخرة :-
شوف يامالك نحن أي تصرف بنعملوا عندنا ليهو دعاء مادام الحاجة دي وردت عن الرسول الكريم
بعدين كيف يامالك ما أي حاجة بتودينا الجنة ولا النار ؟
ثم بطريقته المسرحية الطريفة التي يعرفها طلاب الجامعة ويحبونها :-
يامالك ، يامالك إنت لاداير تودينا الجنة ولا داير تودينا النار
مودينا وين إنت يامالك ؟؟مودينا وين عليك الله ؟
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: عمر عشاري)
|
من بوست عزان
( 13 )
شيراز , الكادر الخطابى الشهيرة للجبهة الديمقراطية , كانت عاملها ركن فى طب . فى واحد من السلفيين- قصير القامة - كان متلحها, طلب فرصة للنقاش , ودخل وتحدث بعيدا عن موضوع الركن , عن أن الشيوعية إلحاد وكارل ماركس قال شنو . . إلخ ,و شيراز تنظر إليه مغتاظة . . عندما خرج جاءت شيراز : ( الزول ده مما جينا الجامعة دى بقول فى نفس الكلام ,أصلو ما إتطور - وأشارت إليه ورفعت يدها فى الهواء - طول ساى ما طال )!
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: عمر عشاري)
|
أحيانا الطرافة تكون في معلومة معروفة يظن صاحبها انه اول من إكتشفها
( 14 )
ركن نقاش لحزب الأمة في شمبات الجامعة
محمد فول يتحدث عن الحريات والديمقراطية والدولة المدنية
ما ان فتح النقاش
جاهو طالب نابل زي النبلة
أسكتو بس ، أسكت بس ماتقولي ديمقراطية ولا حرية
أسكت بس
ثم بصوت متهدج
ياطلاب ...ياطلاب ديل يتكلموا عن الديمقراطية ؟
ديل يتكلموا عن الحرية ؟؟
ثم بصوت فيه الكثير من الحماس وتوقع إلقاء قنبلة خبرية
إنتو عارفين الترابي معرس أخت الصادق المهدي ؟؟
فضج الطلاب بالضحك
وعقب محمد فول مبتسما
حنشوف الموضوع ده
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: عمر عشاري)
|
دالي مرة بيتكلم عن الإنسان مسير وليس مخير (على ما اعتقد) والنقاش احتد. قام جاء المرحوم محمد طه محمد أحمد وكان من المترغين لمنازلة دالي. محمد طه بسخرية المنتصر قال لدالي طيب ما دام الإنسان مسير إنت تعبان وبتدعو للفكرة الجمهورية ليه. الداير ربنا يهديهو للفكر الجمهوري بيهديهو. قام دالي وبابتسامة خبيثة قال ليهو
ما أنا ذاتي مسير عشان أدعو. وضج الركن بالضحك.
غايتو ركن الجمهوريين وبحكم أنهم أحسن من يديرون الحوار وبحكم أن ركنهم كان مقصلة للكيزان وأنصار السنة (واحد بس اسمو شلوبة) فقد كان إلا تحجز من بدري وبي سببوا واحد صاحبي اتخرج بعد 7 سنوات.
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: عمر عشاري)
|
الصديق العزيز/ عمر عشاري
سلام
يا سلام عليك يا رائع فقد تناولت موضوع كالعهد بك في غاية الروعة.... وما عايز أقول جوبا تاني..!! لاحظت البوست قبل لحظات لكني غرقت فيه حتى آخر مداخلة.. أركان النقاش في تقديري هي المعترك والميدان الحقيقي لخلق قادة المستقبل.. فيها تتفجر ابداعات الطلاب في الفكر والحوار.. وأهم جانب هو سرعة البديهة وكيفية المخارجة من المواقف الحرجة التي يواجهها المتحدث.. كانت فترتنا بمعهد الكليات التكنولوجية 82-1987م أيام نميري الاخيرة والديمقراطية.. كانت الاركان لها قوتها وتأثيرها.. في الزمان الجميل.. نتابع هذه التجليات وطرحك الجميل.. فواصل فينا ابداعا أخي..
تحياتي
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: عمر عشاري)
|
عمر و shammashi سلامات انا طبعا حكاياتي بالعنعنة.. اولا لاني ما قدركم.. وتانيا لاني ما زول الجامعة المعرّفة.. امتدادا لي كلام shammashi وفي ذات السياق :) ابوزيد كان بجي ركن دالي .. مرة أخد فرصة وقال: الجمهوريين ديل بقولوا الزول مسير.. طيب يا اخوانا الله خلق العرقي؟!!الله خلق البلح.. الزول براهو يمشي يعملوا عرقي.
دالي دنقر ليك عليهو وقال: طيب البنقو كيف
:)
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: قصي مجدي سليم)
|
عشاري ...
واصل الحكي عن طرائف أركان النقاش ...
الفترة بالأخص - كانت من أخصب فترات نضالات الحركة الطلابية عندما استطعنا إنتزاع الإتحاد عنوة وإقتداراً ...
مناهل بت الجبهة الديمقراطية وأعجاب الفتيات بها .
ود الفكي - الإتحادي والحماس المتدفق .
الواثق ومحمد زكريا - أنصار السنة وفواصل المحاكاة .
النيل كادر الإسلاميين الماعندو منطق بى تعريفة .
ين ماثيو الـ ANF وترجمة وثيقة نيفاشا والقشرة بالإنجليزي .
وائل طه - ومساجلاتو القانونية مع الإدارة .
ناس حق والبعثيين والمستقلين وباقي الشلة ...
واصل الحكي عن تلك السنين المترفة بالنضال .
أركان مجمع الوسط - قدام قاعة الإمتحانات - شارع المين - ستظل محفورة في جدار الذاكرة .
لن ننسى أياماً مضت - لن ننسى ذكراها
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: عبدالله شمس الدين مصطفى)
|
الطرفة الجايه مهدية لأختنا محسيّة : )
أحمد ضو البيت كادر المستقلين المعروف مرة من المرات قال ليهو كلام كده عن صحابي من الصحابة وحصل بسببو عنف في جامعة السودان تقريباً..
المهم جينا عملنا ركن في نجيلة آداب واتكلمنا عن ظاهرة سبّ الصحابة وإنها كلام فارغ وحرام شرعاً وسردنا ليك كل الأدلة..
بعد داك نتفنا ريش أحمد ضو البيت وقلنا طالما الزول دا واقع شتم في الصحابة نحنا ذاتنا حنشتمو..ومن الليلة حنسميهو (عم شنبو) ههههههه حيث كان لأحمد ضو البيت شنب عظيم
(طبعاً عم شنبو شخصية كرتونية مشهورة)
في زول من أصحابنا المستقلين ديل اسمو عبد الناصر،وهو زي صاحبنا مالك الحسن اللي ذكرو عمر قبل شويه،زول لذيذ وصديق على المستوى الشخصي وكل ركن لينا بجي يناقشنا ويحاورنا ويهظر معانا : )
المهم خشّ منفعل شديد وزعلان،وقال لي يا الواثق دا بني آدم ربنا كرمو كيف تشبهو بعم شنبو ال######؟؟؟
المهم قلت ليهو يا عبد الناصر ياخ الزول دا نبز ليهو صاحبي،نحنا زول كان قعد مؤدب كده زيّك ما بنسألو والله،لكن البشتّم الصحابة بنشتّمو طوالي..
والزول القال الكلام دا كان بقى مالك الحسن -كان صغير الحجم- كان سميناهو (بن بن) هههههههههه
وبن بن هو ال###### الصغير الذي كان مع عم شنبو في نفس المسلسل : )
طبعاً دي مهاترات يا جماعة : )
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: الواثق الصادق)
|
مرّة حصلت مشكلة في جامعة الجزيرة -النشيشيبة- بين أنصار السنة والجبهة الديمقراطية بسبب الحديث عن شيوع المرأة في ركن أنصار السنة والتساؤل عن تطبيقه عملياً..
المهم الشيوعيين ديل وفي حالة (كيزانية) فريدة حظروا نشاطنا وشرطوا ملصقاتنا وجرايدنا..
جانا الخبر في الخرطوم ركبنا طوالي مشينا مدني من بعد صلاة الصبح على الإعدادية،عاملين ركن ليهو ضل وحاشدين ناس من الجامعة وبرّه الجامعة..
دخلت الجامعة وأتذكر كان في غبار شديد والجو متوتر والشيوعيين حاشدين ونحنا حاشدين وخلاص الحكاية على وشك..
لما وصلت النشاط لقيت ليك محمد زكريا بتكلم عن الشيوعيين وبعد خلص خشيت برضو اتكلّمت وفجأة انتبهت لزول رافع يدّو..
الجماعة وسوسوا لي إنّو دا متحدث الشيوعيين الأساسي،طوالي قطعت الكلام وأديتو فرصة نقاش..كان لقبو (ميمي) على ما أذكر..
دخل قال : نحنا رفعنا الحظر عن نشاط أنصار السنة .. طبعاً الجماعة كلهم فكوا الضحكة كاااااااااااااااااااااااااااااااااك
بعد طلع قلت ليهو:دي حاجة متوقعة من تنظيم كادرو الأساسي اسمو (ميمي) هههههههههههه
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: الواثق الصادق)
|
Quote: سلام عليك يا رائع فقد تناولت موضوع كالعهد بك في غاية الروعة.... وما عايز أقول جوبا تاني..!! لاحظت البوست قبل لحظات لكني غرقت فيه حتى آخر مداخلة..
|
عبد العزيز ياصديقي
لا أدري إن كان مسموحاً بنقل البوست لربع آخر ...أعني بوست جوبا
أفكر ياصديقي أن أذهب مرة أخرى في التاسع من يوليو
لإكمال مابدأته في البوست
سأشهد هذا الإنفصال حتى لحظاته الأخيرة
سأتجرع هذا الألم حتى آخر قطرة كمن يستمتع بتعذيب نفسه ياعبد العزيز
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: عمر عشاري)
|
Quote: تحياتى يا عشارى. وما جاءت سيرة طرائف الأركان ونوادرها, إلآ وطاف بخاطرى المرحوم الشهير (عمر أومو) ونوادره العجيبة. المؤسف أن أكثرها لا يمكن إيراده فى هذا المكان, طبعاً هذا زمان بعيد بعض الشئ عن الحقبة التى تحكون عنها. له الرحمة. |
ياعبد الله
سلامات
لاتبخل علينا بالقصص
هذا توثيق ويجب ألا نخجل من إيراد ماحصل
هذا تاريخ يجب ان يُحكى كما جاء
وأظن ان هذا المكان من الأمكنة القليلة التي يمكنك فيها كتابة ماتشاء ، رغم ما أصاب بكري في الفترة الأخيرة من أعراض الدكتاتورية
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: عمر عشاري)
|
في هذا الإطار ياعبد الله سأحكي لك هذه القصة
قصة حدثت في جامعة الخرطوم طريفة ومُحرجة
ولكنها جزء من تاريخ النشاط الثقافي بالجامعة
وموجودة في مضابط إجتماعات عمادة الطلاب
وبسببها تم حل جمعية رؤى الثقافية
وتعرضنا لتحقيق لمدة ثلاث ساعات مع مدير النظام العام أو أيا كان إسمه في ذلك الوقت ، وعميد الطلاب ، وشخص آخر لا أذكره ، كان دوره باهتاً حد أنه سقط من الذاكرة ولا أذكر إلا فمه وهو يلهط في الفول المدمس أثناء التحقيق
كنت قد كتبت هذه القصة للصحف في وقتها فلم تجد حظها من النشر
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: عمر عشاري)
|
كنت قد فكرت في تاسيس هذه الجمعية بهدف تقديم نشاط ثقافي وإجتماعي ينطلق من كلية القانون
أوردت فكرتها في البورد
مخاطبا الطلاب بالإنضمام
وإنضم لها عدد كبير من طلاب الكلية
إجتمعنا وأسسنا وإنتخبنا المكاتب التنفيذية
وبعد اول نشاط لها تم حظرها بخطاب رسمي مختوم بختم الجامعة صادر من عمادة الطلاب
كنت رئيس الجمعية وكانت هاجر صديقتنا بكلية القانون السكرتير الثقافي
أها ياجماعة شوفوا الكلام الجاي ده عشان تعرفوا الجامعة دي إنتهت كيف
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: عمر عشاري)
|
الواثق ياعزيزي
بعض الزملاء من جماعة أنصار السنة كانوا أبطالاً لهذه القصة التي سأحكيها لذلك لاتذهب بعيداً ياصديقي
أسمعني
بعض ( الزملاء )دي ماجاية مع أنصار السنة صاح
_________________________
قصة بن بن دي بتذكرها وأذكر أنها كانت من أطرف الردود
ضحكنا فيها كثيرا وعرفنا على الأقل إنو أعضاء الجماعة متابعين مسلسلات الكرتون وكنانظنهم يقاطعون التلفزيون
لدي صديق أحبه جدا ياواثق وهو من السلف المتعصبين
ذهب لخطبة فتاة وهي أيضا متدينة لحد كبير
إنتظرناه في دكان الحلة
خرج متجهما جدا
سألته إن كانت الفتاة مناسبة
أخبرني ان الموضوع إنتهى
قلت ليهو كيف يازول الكلام ده ؟
قال لي سألتها إن كانت تحضر المسلسلات ؟
قلت ليهو أها ؟
ردت على بانها تحضر فقط المسلسلات الدينية
قلت ليهو وطيب دي زولة متدينة عديل داير شنو تاني
قال لي شوف ياعشاري ماتعمل لي حركات العلمانيين دي
يجب ألا ترى الرجال ولا أرى النساء
غايتو يايواثق شكيناكم لي الله بصعيبكم الشديد للدين ده
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: عمر عشاري)
|
الأخ العزيز عمر عشاري تحية طيبة سعيدون ومستمتعون بهذا البوست اللذيذ كعهدنا بكل بوستاتكـ ... في النصف الثاني من الثمانينات وأوائل التسعينات (87-91) شهدنا نحن في جامعة القاهرة فرع الخرطوم (الفرع) سجالات عنيفة في أركان النقاش ، انتهت بمقتل عدد من الطلاب أشهرها كان بلل والأقرع ... ورغم هذا العنف الكبير الذي اتسمت به هذه الفترة لكن كانت الأركان لاتخلو من طرائف ومن فكاهات ... وقد كانت الاحزاب ترمي بكامل ثقلها وتجلب امهر المتحدثين من خارج الجامعة في هذه الحرب الملتهبة ومن طرائف هذه الأركان أن الأتجاه الإسلامي حينئذ حشد لركن نقاش كبير وكان المتحدث الرسمي فيه هو (حسين خوجلي) ... أبتدر حسين خوجلي حديثه بحور دار بينه وبين والدته في المنزل قبيل خروجه للجامعة بالتالي:-
معليش يا جماعة أنا أتأخرت شوية لانو أمي أدارت معاي حديث حينماأستاذنتها في الخروج فقالت لي أنت ماشي الجامعة لشنو ؟؟؟
قلت ليها أنا ماشي الجامعة عشان أقول اهلكـ الأنصار نزلو في قائمة واحدة مع الشيوعين (في تلكـ الفترة كان هناكـ قائمتان لا ثالث لهما، قائمة للتحالف وقائمة للإتجاه الإسلامي ) ... أمي طبعا يا جماعة - والحديث لحسين خوجلي - حفيدة يونس ود الدكيم .. فردت علي امي متهكمة و قالت لي كضاب أهلي الأنصار ما بعملوا كدة !!!
أها يا جماعة انتو ناس مستنيرين وفاهمين وبقدر اقنعكم بأنو الأنصار نزلوا في قائمة واحدة مع الشيوعين ، لكن عاوز واحد منكم بعد الركن دا ينتهي يقنعي لي أمي بالكلام دا .... هههههههههه =-=-=- إغتاظ أحد الشيوعين من هذا الحديث وأضمره لحسين خوجلي وحينما فتح باب النقاش كان صاحبنا الشيوعي أول من رفع يده فأعطاه حسين خوجلي فرصة للنقاشً .. أشترط هذا الشيوعي لى حسين ان يعطيه فرصة للتعقيب بعد الرد على تساؤله ووافق حسين خوجلي فِأرتحات أسارير الشيوعي وشرع في سؤاله المحرج لحسين خوجلي بإختصار شديد يا حسين رائكـ شنو في عملية عثمان خالد مضوي ؟؟؟ (كان هذا الركن أيام حادث عثمان خالد مضوي الشهيرة) ..... فرد عليه حسين خوجلي .. بإختصار شديد يا أبني عمنا عثمان خالد مضوي طبق أغنية الحقيبة البتقول (يوم طلعت القمرأ .. الخير يا عشانا تودينا لأهلنا بسألوكـ مننا ...) فالحاج مضوي - والحديث لايزال لحسين خوجلي سوداني يعرف القيم فوجد المرأة ليلاً وحاول سترها
رجع صاحبنا الشيوعي ومسكـ المايكـ وقال لحسين خوجلي (فعلاً حاج مضوي طبق أغنية الحقيبة ) ولكن ما أغنيتكـ القلتها دي ، عثمان عثمان طبق أغنية الحقيبة البتقول يا السائق الفيات وماشي لشمبات وصلنا معاكـ بالشارع التحت .... وأشار بيده الى تحت في حركة عجيبة ، فضجت الجامعة بضحكـ الجمهور أشكركـ يا عشاري
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: عمر عشاري)
|
Quote: عبد العزيز ياصديقي
لا أدري إن كان مسموحاً بنقل البوست لربع آخر ...أعني بوست جوبا
أفكر ياصديقي أن أذهب مرة أخرى في التاسع من يوليو
لإكمال مابدأته في البوست
سأشهد هذا الإنفصال حتى لحظاته الأخيرة
سأتجرع هذا الألم حتى آخر قطرة كمن يستمتع بتعذيب نفسه ياعبد العزيز |
الصديق العزيز عشاري
بوست جوبا كان فريد ومتميز.. وحتى لو لم ينقل للربع القادم فتلك ليست مشكلة.. لأن كل من تداخل في البوست ربما يتذكر بقدر كبير سرد الجميل للاحداث وترتيبها.. من الاحسن فتح بوست جوبا 2.. وهذا سيكون في الربع الثالث ومعاصر لاحتفالية دولة الجنوب الوليدة وتكون قد ربطت لنا الاحداث في تسلسل جميل من الاستفتاء وحتى اعلان الانفصال الرسمي..
.........
اسئذن أخي الدفعة وزميل هذا المنبر الاخ العزيز د خالد كودي الذي كان المتحدث لركن الطلبة الناصريين بالكليات التكنولوجية.. في يوم مشهود تقاطر ناس الاتجاه الاسلامي من الاسلامية, الفرع والخرطوم والركن مسخن, طلع كادر منهم لا أذكر اسمه حاليا وبدأ يعدد في أفعال عبدالناصر ضد الاخوان المسلمين في حكي مرتب وأخونا كودي يتحفز وأول ما استلم الميك قال: انا افتكر الغلطة الوحيدة التي ارتكبها عبدالناصر, أنه خلى فيكم باقي!! فضج الركن بالتصفيق الشديد لكودي!!
تحياتي
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: محسية)
|
والله يا عمر زولك دا صعّبا شديد هههههههههه
يا محسية
المعلومة الأولى صاح..
لكن التانيه غلط..
ولدنا الكان بتكلم في الأركان وكان حارس كليتنا هو أمجد أحمد عبد الرحيم الله يطراهو بالخير
وعلى كل حال ذكرتيني طرفة خارج الأركان حصلت في جامعة الجزيرة لشيخنا عمر عبد القادر..
كان زول لعاب شديد في منتخب اقتصاد،،قام بقى أنصار سنة في الجامعة وبقى يعمل حلقات ومرات بتكلم في الأركان و فتح للكورة..
أها ناس كليتو يوم مزنوقين وعندهم مباراة مهمة شديدة قاموا حنّسوه يلعب ووافق بشرط يلعب بشورط طويل..
المباراة تعادل لحدي آخر دقيقة الكورة جات لعمر عبد القادر من السنتر شاتها جات قووووون..
الجماعة ما عارفين يباركوا ليهو كيف بعد بقى أنصار سنة..
شبكوهو ليك : سبحااااااااااااااان الله يا مولانا.. سبحاااااااااااان الله
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: محمد عبد الماجد الصايم)
|
الليلة حكوا لي واحدة جديدة يا عشاري.. كان في ركن دالي زول لاجاج.. قال لي دالي: انت من قبيل قلت انو ابونا ادم عرّس بتو لي اخوها.. وين الدليل على كده من القرآن او السنة؟ دالي قال ليهو دي حاجة بديهية واي زول مفروض ما ينكرها.. المهم الزول بعد ما انتهى الركن برضو بقى يلاجج في دالي .. في واحد من الأخوان اسمه عم مجذوب كبير في سنه الزول ما عارف عم مجذوب جمهوري.. قال ليه: بالله يا عمنا موش مفروض يجيب دليل من القران ولا السنة انو ابونا ادم عرس بتو لي ولدو عم مجذوب قال ليه: نان يا ولدي كان يعرسها لي ود عمها؟ :)
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: HAIDER ALZAIN)
|
..............................
فى اواخر السبعينات كان ركن النقاش( للجمهوريين )محتدما جوار كلية القانون حول شهادة المراة تعادل نصف شهادة الرجل
.. وجرت استدلالات بمختلف النصوص ..... ولان ركن النقاش كان بجوار كلية القانون ..... انبرى متحدث الجمهوريين الاشهر فى ذلك الوقت مصطفى دالى
وببرود يحسد عليه ..(( بالله عاوزين تقنعونا انه شهادة د(فلانة ) وكانت عميدة كلية القانون تعادل نصف شهادة عم (فلان ) وكان خفيرا بالكلية ....))
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: د.امام الصديق عبد المعطى)
|
هدير الزينة
سلامات ياخ __________________________
عندي كتاب مهم دايرة أرسلو ليك طالما مؤجز وقاعد _____________________________
مايبقى كلام ساي ياهدير
أرح رسليهو ناس دبي بكونوا جايين يعرسوا البنات شهر 8 الجاي ده
بمناسبة كتاب دي ياهدير
كان دايما في زرزرة بتاعت إنو واحد يجي يحشش ليك بالكلام كأنو ساهر الليالي لحدي ما ألفوا ومايشير للكاتب
ويستعمل عبارات على شاكلة
انا بعتقد ، وفي تصورنا في التنظيم الفلاني
ومابعيد ينط ليهو واحد يقول ليهو
ياخ ده ما كلام منصور خالد صفحة 43 في النخبة السودانية وإدمان الفشل
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: عمر عشاري)
|
Quote: قلت ليها أنا ماشي الجامعة عشان أقول اهلكـ الأنصار نزلو في قائمة واحدة مع الشيوعين (في تلكـ الفترة كان هناكـ قائمتان لا ثالث لهما، قائمة للتحالف وقائمة للإتجاه الإسلامي ) ... أمي طبعا يا جماعة - والحديث لحسين خوجلي - حفيدة يونس ود الدكيم .. فردت علي امي متهكمة و قالت لي كضاب أهلي الأنصار ما بعملوا كدة !!!
|
الأخ العزيز / صديق
سلامات
سعيد بمرورك بهذا المكان
في أيامنا كانت تصدر بيانات قريب الإنتخابات بطلعوها شيوخ أصحابنا ناس الواثق ديل
تلقى البيان حايم في نص المين
إعطاء صوتك للشيوعيين حرام
وفي بعض البيانات الأكل في في تلتلة يعني يقولوا ليك ماتاكل مع الناس ديل
انا كنت قايل دي سذاجه ومافي زول بشتغل بالكلام ده
لكن عرفت تأثير الحكاية دي
لما يوم نادتني برلومة شهادة عربية كنت بشرح ليها
وبتردد شدييد مدت لي ورقة وقالت لي معليش يا أستاذ
بس شايفاك قبيل تاكل ساااي مع ناس حافظ إنت ماقريت الورقة دي
____________________
حافظ : أحد كوادر الجبهة الديمقراطية بالكلية
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: عمر عشاري)
|
Quote: شكرا ليكم كلم ياخ! يمين فيكتو لينا الدبرسة عديل!!!
بعدين زولكم الجاب القون دا يا الواثق مفروض تقولو ليهو: هي لله هي لله |
ود الصايم ياصديقي
ياخ دبرسة شنو ضاربين الريالات دي ومعذبين جداد البك
أسمع دي يامحمد
( 16 )
طبعاً أخوك كان ماعندو خلفية تنظيمية ، والحاجة دي متعبة جدا للزول البناقشك
لأنو النقاش ماكان حول الأفكار في أغلب الأحيان
يعني يجي بعثي يناقش يشبكوهو ليك صدام حسين
شعبي ...الترابي وما أدراك
شيوعي ...لينين كافر
مستقل ...كلكم ممكن تركبوا في ركشة واحدة
المهم
أنا ماعندهم طريقة غير يناقشوني
يوم طالع من الكلية
لقيت ركن للجبهة المتحدة ...وديل الناس الكانو بدعو لإنفصال الجنوب من الشمال من زماااااان ( مرات بكون عندهم ملاحظات طريفة في إطار إثباتهم لتمسك النخب الحاكمة بالعروبة ، تلقى واحد منهم يقول ليك ليه السوق إسمو السوق العربي ؟؟ تفتح التلفزيون تلقى زيت العربي ...أي مؤتمر في البلد دي نهايتو كلمة العربي )
لكن دي ما القصة
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: عمر عشاري)
|
Quote: شكرا ليكم كلم ياخ! يمين فيكتو لينا الدبرسة عديل!!!
بعدين زولكم الجاب القون دا يا الواثق مفروض تقولو ليهو: هي لله هي لله |
ود الصايم ياصديقي
ياخ دبرسة شنو ضاربين الريالات دي ومعذبين جداد البك
أسمع دي يامحمد
( 16 )
طبعاً أخوك كان ماعندو خلفية تنظيمية ، والحاجة دي متعبة جدا للزول البناقشك
لأنو النقاش ماكان حول الأفكار في أغلب الأحيان
يعني يجي بعثي يناقش يشبكوهو ليك صدام حسين
شعبي ...الترابي وما أدراك
شيوعي ...لينين كافر
مستقل ...كلكم ممكن تركبوا في ركشة واحدة
المهم
أنا ماعندهم طريقة غير يناقشوني
يوم طالع من الكلية
لقيت ركن للجبهة المتحدة ...وديل الناس الكانو بدعو لإنفصال الجنوب من الشمال من زماااااان ( مرات بكون عندهم ملاحظات طريفة في إطار إثباتهم لتمسك النخب الحاكمة بالعروبة ، تلقى واحد منهم يقول ليك ليه السوق إسمو السوق العربي ؟؟ تفتح التلفزيون تلقى زيت العربي ...أي مؤتمر في البلد دي نهايتو كلمة العربي )
لكن دي ما القصة
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: عمر عشاري)
|
القصة
إنو ود الفكي ( الإتحادي الديمقراطي ) طلب فرصة نقاش وبدا يدافع عن فكرة الوحدة بإنفعال قائلاً :-
وأنا بطلب مناظرة مع الجبهة المتحدة يوم الخميس الجاي ده
لام أكوي الكادر الخطابي للجبهة المتحدة ردا عليهو :-
عليكم الله ياطلاب شوفوا الأحزاب الطائفية دي بتفكر كيف
هسة الزول ده لا عندو قنوات تنظيمية يرجع ليها ولا قيادة سياسية
برااااهو كده يقرر موضوع المناظرة ومواعيدها كمان
نفس طريقة الميرغني
المهم ضحك الطلاب وواصل لام اكوي في الحديث عن الوحدة والإنفصال
وبعد حوالي نصف الساعة وبإرتفاع وتيرة الخطاب قال لام :-
ونحن ياود الفكي موافقين على المناظرة يوم الخميس الجاي
بس أخوكم ماصدق جاني مدردق
دخلت دقيتو ليكم دق العيش
تناقض الخطاب
ولا فرق بينكم وبين الإتحاديين في عدم الرجوع لقنواتكم التنظيمية
وكيف إنت تقرر قبول مناظرة قد يرفضها تنظيمك في الجامعة أو يرفض مواعيدها
ولما شفتك بتتفلسف قبيل قايل فلسفتك فوق راي
المهم
لام إتوتر وإغتاظ ، ووشوش مع جماعتو شكلو سأل الزول ده تابع لشنو
أها شكلو قالوا ليهو الزول ده شايت براهو
إنتظرني لحدي ماتميت كلامي ورد قائلاً :-
ياجماعة ده خطاب طفيلي مبني على تناقض الخطابين
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: عمر عشاري)
|
اها يا عمر عشاري جيتك بس اعفيني من قصة معاوية لا معاوية و في قصة تانية حصلت في جامعة الجزيرة كان حكيته ليكم باجزولكم تب هاهاهاهاها برضو اعفيني منها لووووووووووووول
بمناسبة دي :-
Quote: بس شايفاك قبيل تاكل ساااي مع ناس حافظ إنت ماقريت الورقة دي
|
زمااااان كدا كنا بنمشي ديوم بحري لانو شباب مؤتمر الطلاب المستقلين كانو مأجرين وساكنين هناك زي فؤاد عبد الرحيم الخليفة وبكري الجاك عضو سودانيز- وجعفر بشير (أبو أمنة)- عضو في سودانيز- وقسم السيد الحاردلو -عضو سودانيز- و محسن طه (لاكو) عضو سودانيز - والصادق إسماعيل عضو سودانيز - و زاهر موسى عكاشه ومجموعة كبيرة جداً من الشباب المهم كنا بنمشى هناك وكان غالباً اليوم بينتهي بأننا انا ومحسن طه (لاكو وهو في الاصل شلكاوي ولاكو هو اسم الكنيسة ) بنمشي نتعشى عند الزلط الرئيسي لشارع المعونه عند واحد انصار سنة بتاع فول وكوارع الراجل ده ومن الغرايب انو كان عندو صحيفة اسبوعية بيصدره كجدارية ويختها جم كراسي العشا وانا و لاكو كنا مرضانين بنقراها كلها كل ما تصدر ونقعد نتناقش فيها المهم يوم كدا جاء صاحبنا ريتشرد ( وهو مسيحي قبطي وكادر خطابي لمؤتمر الطلاب المستقلين بكلية النصر التقنية) اها اليوم الجاء دا ونحنا في محل العشا الراجل انصار السنة سمعني بقول ليهو ريتشرد فقام براحه كدا ناداني وقال لي :- ليه بتقول للزول ده ريتشرد (ريتشرد كان اسمر اللون جداً) قلته ليهو :- لانو اسمو ريتشرد ... قال لي :- كيف !!! يعني الزول ده مامسلم!!!؟ قلته ليهو :- ايوة الراجل ده مسيحي قبطي ... فما كان منه إلا أن قال لي :- طيب ياخ أنت كل اسبوع بتقرأ الجريدة دي وفيها باب ثاااااابت بيقول الأكل مع الزي ديل حرااااام ليه بتاكل معاهو أنت ومحسن دا!!!!؟ قلت ليهو يا شيخنا أنت قايل محسن ده اسم الجد جد منو ؟ قال لي :- آآآآ محسن مالو كمان !!!؟ قلت ليهو شلكاوي واسمو لاكو .
يلا نرجع لموضوعنا الاساسي زي ما قال عمر امو.
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: د.امام الصديق عبد المعطى)
|
عمر شكرا لك على هذا الخيط والذي فيه نوادر ولطائف
أنا درست الجامعة بره السودان لكن كنت احضر احيانا اركان نقاش في كلية التربية بحكم لزيارتي لبعض أقاربي فعلا فيها إبداع وهناك طلاب على ثقافة عالية وبديهة حاضرة وقوة في الحجة واللجاج
مما حكي لي عن الشيخ محمد سيد حاج رحمة الله عليه وهو طالب في الجامعة وقتها وكان من كوادر أنصار السنة المعروفين بقوة الحجة وغزارة العلم كان يتكلم في ركن نقاش فقام احد الاخوة من الاتجاه الإسلامي وقال انصار السنة بتجيهم فلوس من السعودية وما فلوس من السعودية بعد ما انتهى رد الشيخ محمد السيد قائلا خلونا نحن البتجينا فلوس من السعودية ديل ترى السعودية فلوسها كتيرة لكن يا جماعة رايكم شنو في الناس البياكلوا زاد المجاهد ديل ؟؟!!!!!!!!! فضج الطلاب بالضحك
فالملاحظ أن الشيخ محمد سيد لم يدخل في جدال ونقاش مع الاخ وما قال له نحن ما بناخد فلوس من السعودية ودي فرية ومش عارف !!! لكن انتقل إلى ما ينهي المسالة لصالحة من إضحاك الناس على الرجل وإسكاته في نفس الوقت
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: كمال عكود)
|
Quote: بالمناسبة دي خليني أحكي نكتة الزول الكسلان جدا المشى الحلاق |
يا عمر بمناسبة الحلاق هاك دي: قريبي الرباطابي مشى لي حلاق و الظاهر الحلاق خبرتو تعبانة المهم بدا يحلق للرباطابي في الجزء اليمين من الراس و كل مرة يجرحو و يلصق ليهو قطنة لما انتهى من الجزء اليمين و عاوز يبدا الشمال الرباطابي قال ليهو: لا أقيف دا عاوز ازرعو فول (طبعا الجزء اليمين الحلاق زرعو قطن) تحياتي
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: عمر عشاري)
|
Quote: يلا نرجع لموضوعنا الاساسي زي ما قال عمر امو. |
ياسفيان بمناسبة موضوعنا الأساسي
نرجع لقصة جمعية رؤى
أها يا أخوي أكملنا الإستعدادات لإقامة منتدانا الأول
عن ختان الإناث بين العرف والتقاليد
فكرتنا نساهم في محاربة هذه الظاهرة المُخجلة
بدينا نفكر نجيب منو متحدث ؟؟
يوم انا راكب الحافلة جاي على الجامعة سامع لي زول بتكلم في الراديو عن الموضوع ده
عجبني كلامو
كان ذلك د . عبد الهادي إبراهيم إختصاصي النساء والولادة
طرحت الموضوع على المكتب التنفيذي للجمعية ووافقوا على الإتصال به طبعا أخوك راجل ديمقراطي
مازي لام وود الفكي
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: عمر عشاري)
|
مشينا ليهو في عيادتو وكانت بصحبتي زميلتنا هاجر الله يطراها بالخير وقد كانت السكرتير الثقافي للجمعية
قابلناه وهو رجل في منتهى اللطف ...ساخر وحاضر النكتة
حزنت جدا لدخوله في قضايا شائكة اودت به إلى السجن بعد ذلك بسنوات
كانت أحداث تتعلق بإجرائه لعمليات الإجهاض
وأذكر أنه كان يتعامل مع هذا الموضوع بأنه ضروري في بعض الأحيان وهذا موضوع آخر
المهم على قول تبارك
اخبرناه بجمعيتنا وفكرتنا ورحب جدا بالتحدث إلى الطلاب والطالبات
إتفقنا على اليوم
وبدأنا التجهيز لهذه الندوة
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: عمر عشاري)
|
Quote: وأظن ان هذا المكان من الأمكنة القليلة التي يمكنك فيها كتابة ماتشاء ، رغم ما أصاب بكري في الفترة الأخيرة من أعراض الدكتاتورية |
قبل أن نواصل في موضوع ندوة الختان ود . عبد الهادي إبراهيم
أسمحوا لي أن أشكر الباشمهندس بكري على رفعه للبوست
والله رفع البوستات ده فيهو حاجة مفرحة كده ياجماعة في البلد الكلو حاجة ماشة فيها لتحت دي
وكونو بكري يرفع البوست رغم التعريض أعلاه
الحاجة دي بتخليني أراجع الإتهامات بتاعتي
كمان يابكري لو رجعت لينا عُزاز والله تكون ديمقراطي عدييييييل
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: عمر عشاري)
|
Quote: يا عمر بمناسبة الحلاق هاك دي: قريبي الرباطابي مشى لي حلاق و الظاهر الحلاق خبرتو تعبانة المهم بدا يحلق للرباطابي في الجزء اليمين من الراس و كل مرة يجرحو و يلصق ليهو قطنة لما انتهى من الجزء اليمين و عاوز يبدا الشمال الرباطابي قال ليهو: لا أقيف دا عاوز ازرعو فول (طبعا الجزء اليمين الحلاق زرعو قطن) تحياتي |
وبرضو قبل مانخش في موضوع الندوة نرجع تحية أخونا الحاج الظريفة دي
قال ليك المسطول سأل كمساري الحافلة : - عليك الله الراكب بكم ياخ ؟
الكمساري :- ألف جنيه بس ياعمك
المسطول ماداً يده بألف جنيه :- عليك الله أديني البت الجمب الشباك ديييييك
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: عمر عشاري)
|
الاخ الغالى عمر عشاري
بعد التحايا لك ولكل المتداخلين
كنت قد ههمت الانضمام " لاسكول " بجامعة الخرطوم الا ان رضا الوالدة حال بين ذلك - يعنى لو فى زول كان بقنعها بالطرائف و المفارقات - و قبلت فى جامعة من شرط استمرار الدراسة فيها " لا للسياسة " لكن هذا لم يمنع ان اكون من مرتادى اركان النقاش ولكن ليست بصورة منتظمة ....
شكرا يا عمر و شكرا للمتداخلين
مودتى لكم
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: مازن عادل النور)
|
مرة مناظرة في الاعدادية بجامعة الجزيرة وائل خلف الله حلف ستين يمين محمد طه محمد احمد - ( ....) اها جاء كوز قال ليهو اثباتك وقال بلح الشمالية ليهو نكهة وماعندننا صيص - ومحمد طه تمرة رامية فروعها وائل دا جاب صيصة تمر من وين ما عارفو رفعها بالركن وقال ااااي الشمالية عندهم تمر نجيض وعندهم ( صيييص ) اها دي صيصة من الشمالية بتنضم بتنضم نجاضكم وين ___ الغريبة كانت انو صيص وائل مرسللا ليها من اهلو في الشمالية بنفس اليوم
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: مازن عادل النور)
|
كان دائماً التنظيمات بتعايرنا بموضوع السعودية ما السعودية..
وكان عندنا ردود مختلفة ومتنوعة على الموضوع..
منها رد على واحد كوز اتهمنا بإننا بناكل قروش السعودية دي وبننفذ الأوامر بتاعتا وما عارف شنو كده..
المهم قلنا ليهو : يا أبو الشباب نحنا علاقتنا بالسعودية ما ناكرنّها،،بنمشي السعودية وبنجيب قروش وبنبني بيها جوامع..
عشان كده السعودية دي بنت لينا جامع (فيصل)..
لكن إنت البنى ليك بنك (فيصل) منو؟؟؟
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: الواثق الصادق)
|
ياالواثق انت ناظرت احمد ضحية بالجزيرة سنة 1998 ولا مشبهك؟ ـــــــ لو مشبهك اخو انصار السنة الناظرو منوو؟ كانت حدث تاريخي بالمناسبة فكت حركة حق اخرها بنظرتها للدولة الدينية والعلمانية وما مرق ضحية من المعترك الا دخول وائل خلف الله واعترضو انصار السنة انو يتداخل مدافعاً لخلفيتو الدينية القوية ووقت دخل مسح ببتاع انصار السنة الواطة شاتكم باختصار وجاب باسمكم نكت سارت بركبان ضحكاتها الاركان؟ فهل انت؟؟؟
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: الواثق الصادق)
|
Quote: مما حكي لي عن الشيخ محمد سيد حاج رحمة الله عليه وهو طالب في الجامعة وقتها وكان من كوادر أنصار السنة المعروفين بقوة الحجة وغزارة العلم كان يتكلم في ركن نقاش فقام احد الاخوة من الاتجاه الإسلامي وقال انصار السنة بتجيهم فلوس من السعودية وما فلوس من السعودية بعد ما انتهى رد الشيخ محمد السيد قائلا خلونا نحن البتجينا فلوس من السعودية ديل ترى السعودية فلوسها كتيرة لكن يا جماعة رايكم شنو في الناس البياكلوا زاد المجاهد ديل ؟؟!!!!!!!!! فضج الطلاب بالضحك
|
كمال عكود ياعزيزي سلامات
وشكرا لمرورك اللطيف
الشيخ محمد سيد حاج عليه الرحمه رجل حاضر النكتة وقريب للشباب ذلك انه صغير العمر
كان يصلي بالناس في جامع بالصافية
ذهبت مرة مع أحد أصدقائي السلفيين وكان هنالك درس بعد الصلاة عن الصدق
أعجبني تناول مثل هذه الدروس التي كثيرا مايغفلها رجال الدين
وشكرته على ذلك ونظرت ليهو عن أهمية الدور العصري لرجل الدين وتناول القضايا المفيده التي يمكن أن تستفيد منها البشرية
وبخني صديقي بعد ذلك قال لي يازول ها
إنت قايل دي الجامعة ...ده زول عالم كيف تقول ليهو أنا بعتقد ومابعرفو شنو
حزنت جدا عندما سمعت خبر وفاته
وتذكرت إبتسامة متواضعة وهو يستمع إلي بصبر
طبعا لو كنت لقيت فيهو فرقة كان أثرت معاهو ما أثرته مع علاء الدين الذاكي أستاذ الثقافة الإسلامية عندما كنا طلابا بكلية القانون
فكاد أن يطردني من المحاضرة وتلك قصة أخرى
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: عمر عشاري)
|
Quote: كنت قد ههمت الانضمام " لاسكول " بجامعة الخرطوم |
مازن
كيفك ياصديق
بمناسبة إسكول دي ...كان في واحد صاحبنا من سناير إسكول عاجباهو بت من قانون ماشي وجاي بين قانون وإسكول
أها معانا ولد من أولاد الجزيرة ديل عندو فكرة بت الكلية ديك زي بت الحلة
يعني كونوا يلاحقها زول من قانون ماعندو مشكلة ، لكن جنو وجن الأولاد البجو من برة ديل
وهو مابعرف الزول ده ونفسوا يتثاقل عليهو وداك أصلو ماجايب خبروا
اها يوم الزول ده بتكلم معاي وصاحبي بتاع الجزيرة واقف
قال لي فلانة وين اليلة ...قلت ليهو والله شكلهم شغالين محاضرة
قال لي خلاص أنا برجع إسكول وبجيكم تاني
فجأة صاحبنا ده نط و قال ليهو ...والله مساسقتك الكتيرة دي بين هنا وهناك أنا خايف يوم تنيشك عربية
طبعا شارع الجامعة يفصل بين إسكول ومجمع الوسط
| |
|
|
|
|
|
|
Re: بعض طرائف ومفارقات أركان النقاش بجامعة الخرطوم http://www.sudanese (Re: عمر عشاري)
|
ههههههههههههههههههههههههه
زعل شنو يا حيدر ياخ؟؟
نحنا من 97 ولي فوق .. وتقريبا أنا لفيت كل الجامعات ما عدا الفاشر ونيالا والدلنج..
وحضرت فوز أنصار السنة (متحالفين) باتحاد البحر الأحمر واتحاد جامعة شندي
وشهدت العصر الذهبي لأنصار السنة في جامعة الخرطوم عندما كان أقوى تنظيم بلا منازع
الحمد لله الحمد لله ............................. مواصفاتك دي بتنطبق على لؤي عبد الله وبالمناسبة الزول دا من أفضل الكوادر على مرّ التاريخ
| |
|
|
|
|
|
|
|