|
Re: يـتـلـفّـت زي الـطـيـرة ... تـشـبـيـهآت فـي شـكـل سـحـرآت !!!... (Re: معاوية المدير)
|
من التشبيهات الفي شكل سحرآت في مجال السياسة زاااتها، يقولوا ليك: فلآن دا ثعلب زي الترابي للزول الوييرد. مع إنو هنا في تشبيه ضمني للترابي بالثعلب. وفي روآية، ثعلب زي علي عثمان. فلآن ثقيل زي امين حسن عمر. فلآن نضام زي الصادق المهدي. في واحدين يقولولك الصادق المهدي نضام تقول بالع رآدي. فلآن زواغ زي نُقُد. مقلّع عيونك زي الجزولي دفع الله. فلآن رقاص زي عمر البشير.
| |
|
|
|
|
|
|
Re: يـتـلـفّـت زي الـطـيـرة ... تـشـبـيـهآت فـي شـكـل سـحـرآت !!!... (Re: معاوية المدير)
|
Quote: الجزولي دفع الله قال لنميري الرئيس المخلوع نميري قال ليهو عليك الله المخلوع فينا منو انا والا انتا
|
سلآمات يا فيصل. تعرف، كنت شغال في المخازن والمهمات في قسم التموين والمشتريات. القسم فيهو طابقين، المشتريات تحت والتموين فوق. أها، انا كنت في التموين، وكان معاي وآحد من أولآد الخرتوم إسمو وليد. كانت معانا وآحدة إسمها مُنى شغالة في المشتريات (نسأل الله لها الرحمة والمغفرة). مُنى دي يوم عندها شغل مع قسمنا، فكانت كل مرّة تجينا طالعة فوق، مرّة تمشي لوليد في مكتبو مرّة تجيني انا. اها، جاتني طالعة قمت قلت ليها: الليلة مالك يا مُنى طالعة ونازلة زي الدلو؟ قالت لي: تبالغ يا معاوية!!! انا هسّع مشيت لوليد في مكتبو قال لي، يا مُنى الليلة مالك طالعة ونازلة زي الدولآر؟ يا اخي إنت تقول لي زي الدلو!!! غايتو يا ولآد القري تشبيهاتكم عينة!!!
| |
|
|
|
|
|
|
Re: يـتـلـفّـت زي الـطـيـرة ... تـشـبـيـهآت فـي شـكـل سـحـرآت !!!... (Re: Hayat Hussien)
|
Quote: المدير فعلا تفك الرتابة شوية ، عمك عندنا وصاف زي الوصفات دي فكان مسووي قطية داير يرفعها في الشعب ونادى الناس للمساعدة وفي واحد واقف في الشارع ينتظر بصات الخرطوم وبتجي في وقت معين واذا راحت خلاص تاني الا بكرة الزمن داك ، اها الزول عندو رغبة في المساعدة في رفع القطية يتقدم عليهم يسمع رزة البص من بعيد يرجع لما يرجع الشارع والبص ما يظهر يمشي على جماعة القطية تاني يسمع الرزة يرجع اتكررت الحكاية دي كم مرة اها الزول الداير يرفع القطية وصاف شديد قال ياجماعة ارح الزول الزي العود الشايلاه الشيمة دا ما بقضى لكم غرض وما بجي
شرح المفردات لناس البندر والناس الما عندهم ثقافة الريف خاصة الشمالي منه |
مشتاقين اخونا كمال عكود، ليك الف سلآم. صدق يا عكود، ناس البندر الواجب الزول يشرحلهن ويميزُن، نعمنهن الفايتُن كتير بالحيل.
عارف، مرّة انا واخوياً لي وصآف زي زولكم دا رآكبين مع نسيباً لينا عندو عربية هكرة بالحيل. أها العربية دي وكت يعصرا، اررررررر، تتركض. يرفع منها تمشي عدددديل. تاني يعصرا، ارررررررر، تتنفض. يرخي تمشي عددددديل. وهكذا. قام اخوي قالو: والله الليلة عربيتك زي النعجة المستحمية فوق البحر...
تحياتي وأشواقي يا عكود...
| |
|
|
|
|
|
|
Re: يـتـلـفّـت زي الـطـيـرة ... تـشـبـيـهآت فـي شـكـل سـحـرآت !!!... (Re: معاوية المدير)
|
Quote: سلامات ود المدير والله أنت دايما بتاع تقاليع عجيبة خلاس..... طيب وكت جبت سيرة الامثلة في مثلين بسمعهم كتير وما عارف ليهم تفسير لو ممكن تشرحم لي ينوبك ثواب.. الاول بيقول ليك الزول ده عامل زي سراق الحمير,,,, والتاني بيقول ليك الزول ده عامل زي الدبيب أب راسن مقطوع. تقبل تحياتي,,, |
سلآم وتحايا يا ابوبكر. يا ابو بكر، سرآق الحمير دي بيقولوها للزول البيجي يدبى بالراااااحة. يعني مشيتو فيها نوع من التِلِصص، وايضاً يقال عليه كما ذكرنا في مدآخلة سابقة يتلبّد زي كتال القبور. اما الزي الدبيب اب راسن مقطوع ده، ماني خابرلوا جيهة. إلا يبقى زولاً ما كِلوا معيوقة و بطنو لاوياهو.
المعيوقة دي كان جا عكود بجاي بيجيها ليك تب.
تحياتي...
| |
|
|
|
|
|
|
Re: يـتـلـفّـت زي الـطـيـرة ... تـشـبـيـهآت فـي شـكـل سـحـرآت !!!... (Re: معاوية المدير)
|
الاخ معاوية سلام
بوستيك ظريف شكرا ليك ..
في احدي قري الشمالية زول وصاف و عينو حاااارة
مره زوجتو وضعت ولدين تيمان , جاء داخل يشوفهم و يحمد ليها السلامة لقاها راقده والاولاد كل واحد ملفوف و خاتنهم عند رجليها... فقال ليها :
ها.. والله عاملة زي البطارية الطلعو حجارها ... الولدين واحد مات و التاني اتخبل..
اظنو نفس الشخص عندو بنتين طهروهن فجاء يشوفن .. لقاهن راقدات و كل واحده في جهه من السرير و مغطيات بي " فركه " طبعا الروسين كاشفات فقال ليهن ..
والله عاملات زي بنت الكوتشينة
تحياتي
| |
|
|
|
|
|
|
Re: يـتـلـفّـت زي الـطـيـرة ... تـشـبـيـهآت فـي شـكـل سـحـرآت !!!... (Re: فيصل محمد خليل)
|
Quote: الاخ معاوية المدير ....سلام
وبيقولو فلان زي طير السقد ما بنوم |
سلآم، ومرحبتين اختنا حياة.
قالوا، الله يكافينا شر قلنا وقالوا: إنو السقدة دي السبب في عدم نوما إنها لمان مات الرسول عليه افضل الصلآة واتمّ التسليم، الطيور كلللللهن كانن حزنانات وبيبكن، ما عدا السقدة كانت فرحانة ومشت إتكحلت وجات ترقص. أها، قامن لها شوكتين في جنحيها، اوآت تدور تنوم الشوكات ديل بيطعننها في عويناتا وتقوم تسرخ.
الرباطاب قالوا عندهم الولد لآمن عمرو يبقى تسعة سنين بيودوهو الخلاء عشان يتعلم السحر. أها، واحد من الرباطاب ولدو تمّ التسعة. لبسوهو جليليبية، وابوهو ساقو ومشو. وكت بقو في نص الدرب لقولُن ابو القدح مغتس رقبتو وكرعينو في طرف الخلاء، الولد قال لي ابوهو: يا با، ده شنو البلآ الكوريك الناصل؟ ابوهو رجعو البيت طوالي...
| |
|
|
|
|
|
|
Re: يـتـلـفّـت زي الـطـيـرة ... تـشـبـيـهآت فـي شـكـل سـحـرآت !!!... (Re: HAIDER ALZAIN)
|
Quote: اعتقد إنو حكاية الوصف دي ما ليها علآقة بالعين والسحر، وهي سرعة بديهة وصفاء ذهن تأتي عفو الخاطر. |
فعلا كلامك في محله يا مدير الحكاية سرعة بديهة أما العين فهي تصدر من كل إنسان يعجب بشي ولا يذكر الله ولذلك احيانا ممكن تصيب نفسك وعيالك بالعين وانت لا تقصد
هاك دي يا مدير ،، مرة أنا ومعاي الوالد الله يرحمه في شارع النص الثورة دخل قدامنا سيد ركشة وبطلت منه وانا منتظر لما يدور ويفتح لي الطريق أها بقى يدور فيها طبعا بيدوروها بالبتاعة البجنبة ديك فيرفع فيها وينزل يرفع وينزل الوالد قال لي اسع الزي الزول البحك في صفحتو دا داير يزح لنا متين
| |
|
|
|
|
|
|
Re: يـتـلـفّـت زي الـطـيـرة ... تـشـبـيـهآت فـي شـكـل سـحـرآت !!!... (Re: HAIDER ALZAIN)
|
هههههههههههههههههههههه، والله يا كونت عمّك ود الزومة بالغ في بتاعت الجداد. تعرف، عندنا وآحد النوع اللمان يسكر بيقلد اقرب زول جنبو ويقعد يجعّر. أها، مرّة عندنا عرس في حِلتنا وجايين ضيفان من الخرتوم. الجماعة قاعدين يسكرو، بس صاحبنا ده طشم، واقرب ضيف جنبو راح مكلّت فيهو وقعد يتنخج. يا زول ياااااااا الله حتي الجماعة خارجو الضيف من تحت قبضتو. أها، انا بقرّق علي الضيف. قتلو: الزول نعال ما غمتك غمته قويّة. قال لي: بلآ ياخدو، قريبك تقول شارب زرديّة!!!؟؟؟
| |
|
|
|
|
|
|
Re: يـتـلـفّـت زي الـطـيـرة ... تـشـبـيـهآت فـي شـكـل سـحـرآت !!!... (Re: معاوية المدير)
|
Quote: الجزولي دفع الله قال لنميري الرئيس المخلوع نميري قال ليهو عليك الله المخلوع فينا منو انا والا انتا
|
لوووووووولز يا فيصلوه ياخ بالغت عديل فيها دي ود عمي المدير كيفنك يابا مشتاقين يعلم الله فاقدنك والله صحي
عندنا عمة لينا بتمشي محو الأمية معاها جارتها اها ادوهم سورة للحفظ جات البيت جارتها نست اسم السورة ناغمت ليها بي فوق الحيطة ، يا فلانة النبي السورة الأدنها لينا البنيات قبيل عارفة اسمها شنو ؟ بدور البنيات يحفظني ليها وعمتنا تحمد سيدها اصلها ما بتتلفت اي كلمة تجيها في لسانها بتقولا قالت ليها آآآي بالحيييل عارفة اسمها ردت الجارة الله يفتح عليك اها اسمها شنو ؟ قالت ليها اسمها اللولي والمرجان .. لووولز نط راجلها قاعد برة وسامع مرتو وتجلياتها قال ليها يا فلانة اللولي والمرجان دي حجوة حجتك ليها امك زمااااان السورة دي قطع شك التين والزيتون ردت ليه باااااااااااس ياها زاتها لووووووووولز استغفر الله العظيم يا ود المدير دحين حبوباتنا الزمان ديل واهلنا الكبار بتحاسبوا في جنس كلامهم ده
| |
|
|
|
|
|
|
Re: يـتـلـفّـت زي الـطـيـرة ... تـشـبـيـهآت فـي شـكـل سـحـرآت !!!... (Re: اسماء الجنيد)
|
Quote: مره زوجتو وضعت ولدين تيمان , جاء داخل يشوفهم و يحمد ليها السلامة لقاها راقده والاولاد كل واحد ملفوف و خاتنهم عند رجليها... فقال ليها :
ها.. والله عاملة زي البطارية الطلعو حجارها ... الولدين واحد مات و التاني اتخبل.. |
مباااااااالغة يا عمر منجي، والله صحي.
تعرف، مرّة في دار الرياضة بنحضر في كورة. بعدين رجل الخط عندو صلعة مدورة في نُص راسو فوقا شعر خفييييييف. أها، رجل الخط ده في كورة آوت، قام اشّر كورنر. واحد من المشجعين قال ليهو: هسع عليك الله دي كورنر؟ دي كورنر دي!!! عامل صلعتك زي محل دق النوبة...
| |
|
|
|
|
|
|
Re: يـتـلـفّـت زي الـطـيـرة ... تـشـبـيـهآت فـي شـكـل سـحـرآت !!!... (Re: معاوية المدير)
|
النصري يا صاحب، حيّاك الغمام.
تعرف، مرّة في جامعة الفرع وآقفين في شباك التسجيل، والشباك فوقو زحمة شديدة. قام وآحد كورك للمسجل: يا ابن العم، أنا ما دآير مِنّك ايّ حاجة. بس عندي سؤال ممكن؟ المسجل قال ليهو: سؤالك شنو؟ اسأل. قال ليهو: عندنا وآحد سجّل في الجامعة سنة 83 اوراقو بتكون موجودة؟؟؟ المسجل قال ليهو: زولك ده بيكون مدتو إنتهت. قال ليهو: إنتهت!!! ليه اصلوا علبة صلصة ؟؟؟
| |
|
|
|
|
|
|
Re: يـتـلـفّـت زي الـطـيـرة ... تـشـبـيـهآت فـي شـكـل سـحـرآت !!!... (Re: معاوية المدير)
|
حكايتي مع سوآق الحافلة الكوستر...
موقف مواصلات بحري ، العام ، 1986... بحري طراوة والزول حلاوة... أحببت مدينة بحري ، وسكنت بها قرابة الـ 8 سنوات في حلفاية الملوك. كانت محطة المواصلات بالنسبة لنا في الحلفاية كيلو 8 وفي بحري موقف مواصلات الكدرو. ربطتني علاقة حميمة ببحري وناسها حيث أنني عملت في مصلحة المخازن والمهمات وكنت دوماً أقضي أُمسياتي متنقلاً بين حي الدناقلة، وحلة حمد، وحلة خوجلي، والشعبية، والأملاك، وأرجع مساءً لحلفاية الملوك...
في تلك السنين المواصلات كانت صعبة شديد، وكنت أعاني أشدَّ المعاناة لأصل الحلفاية. مرات أمشي نُص المسافة كداري وأركب مِلِح. أكتر من مرّة مشيت كلَّ المسافة كُدُر، أحياناً أكون محظوظ أحظى بمقعد في حافلة أو برينسة متجهة شمالاً لشمبات أو الحلفاية، أو أبوحليمة، أو الكدرو، أو الدروشاب ، المهم أيّ حديدة متجهةلجهة الحلفايا إن شاء الله ماشة أتبرا بتخارج معاي. كنت دوماً عندما آتي إلى موقف بحري مساءً أجد الناس متحفزين للإنقضاض على أيّ وسيلة مواصلات سواء كانت دفار، حفار، جرار، ترتار،....الخ، في الوكت دآك أيّ حاجة مدردقة كانت بتخارج، لذلك عندما تظهر وسيلة من هذه الوسائل في لحظة تجد الناس كأنهم حُمرٌ مستنفرة فرّت من قسورة. مهاجمينا في كرة القدم لو كانوا بنفس التحفز وسرعة الإنقضاض، على اليمين ما كان في فريق يقدر يقيف قدامنا. لكن يا قول حبوبتي: المخيّر الله في مُلكو العظيم...
بعد أن قضينا أُمسية جميلة في بحري أنا وإبن خالتي عليه رحمة الله، توجهنا نحو موقف الكدرو. الظلام أرخى سدوله والناس في حالة تحفز وترصد للإنقضاض على أيّ وسيلة مواصلات تتجرأ للإقتراب من المكان، يكثرون التلفت في كلّ الإتجاهات. الجو خانق وحآر ورائحة (البيلآن) تفوح من ناحية حيطة مستشفى بحري. وقفنا ونحن لانقل إستعداداً من بقية الجماعة. فجاةً ظهرت حافلة (كوستر). لا أدري إن كان هذا النوع من الحافلات موجود في السودان أم إنقرض؟ علماً بأنَّ العربات في وطننا الحبيب تتخطى عمرها الإفتراضي بقرون من الزمان حتى يعلقوا في مقدمتها قرون التيوس والعِتان لكف العين!. وعندما تنقرض إسبيراتها من السوق تعال شوف فقه (التوليفة) شي يلتقوها بحبل، وشي بكوز صلصة، ومرات كيزان من نوع تاني، دِرِبات، جِلب؛ خراطيش، وهلُمَّ جرا، آي جاجة تخطر على بالك ممكن تمشي الحال. المهم، الملاحظ في هذا النوع من الحافلات إنو مقعد السواق مسند الضهر بتاعو بيكون طويل جداً بحيث إنو السواق لايستطيع أن ينظر للشخص الراكب خلفه مباشرةً. أها، المحلةالغايسة دي أنا كنت متحكر فيها هي، يعني عمنا السواق ده لو رقبتو بقت رقبة نعامة ما يقدر ينقشني.
تحركت الحافلة، وعلى ما أعتقد كانت متوجهة إلى أبو حليمة كنقطة نهائية وهي تحمل في جوفها ناس شمبات ظلط، وشمبات الحِلة، والحلفاية، والدروشاب، وإنت ماشي. المهم، من بداية الصافية كده بقينا نسمع ليك الجماعة: قرصة قبلك، يا أبن العم. ومرات تسمع طرقعة الأصابع، طق، طق، طق،: قبلك يا زول. عمنا كل مرّة يجازف ليك الحافلة ينزلها من الظلط. الظلط سنين وعالي، والحافلة هكرة شديد، قزار الشبابيك يرقص ويلعب سااااكت، وعمنا كلما ينزلها تسمع، كششششش، كشششاش من الناحية اليمين، ولمان يطلعها تسمع كشششش من الناحية الشمال وهكذا. رغم إنو عمنا كان حريص جداً ينزلها على مهل وتؤودة كأنما هي فلذة كبده. وعمنا النوع الجادي المابيتكلم داك، مركّز في الشارع للطيش، وشآدي ضهرو مع الكُرسي تحلف تقول بالع سيخة. أها واحد من الرُكاب كورك: قبلك يا أبن العم، قرصة. عمنا طوالي راح مسايس ليك الحافلة نزلها. أوّل ما نزلت من الظلط نسمع ليك، كششششا كششش. أنا طوالي لى شقاوتي، قلت ليهو: ده أشنو يآ عمنا! إنت سايق حافلة، والا سايق فضيّة؟؟؟ أريتني ما قلت الكلمة دي، وعمنا فتح فيني. عمو: الله يقطعك، ويقطع يومك. داير توقفها! الله يوقف حالك، دي نحن بنعول منها أُسر، في ستين خشُم راجياتنها خشمك بالتكسرو ليك. طبعاً أنا قنصت قنصة شديدة جداً والكرسي عامل لى ساتر من عمنا ما قادر يشوف حتى طرف قميصي.
أها يسكت ويكون سايق في أمان الله، فجاة تسمع: قرصة يا أبن العم. أبن العم يجازف الحافلة ينزلها وبمجرّد ما الكشكشة تحصل يروح فاتح فيني. عمو: والله قال فضيّة قال! الله يقطع اليوم اللمانا فيك زاتو. طالعين نشوف رزقنا يتعارض لنا عارض نفر ده!. ده يوم نحس اللمانا فيك يا شوووووم. الجماعة في الحافلة طبعاً لقولهن موضوع، وتعال شوف الضحك والقرقراب. جنبنا في إتنين كده عملوها مسخرة، اوآت ما يكون في زول نازل يقولوا: اوووووب هسسسع عمّك يفتح. وهو ما قصّر تب، أوّل ما يسمع كشششششاش يقوم: قال فضية قال! الفضية التتكسر لك فوق راسك ده صحن صحن، وكُباية كُباية يا نحس. أنا طبعاً من هو فتح خشمو قفلت خشمي. بعدين في جماعة كده الواحد لمان يجي نازل يقولوا: يا عمو خلاس عليك الله أنسى الموضوع. وهو يهيج: لكن عليك الله دي طريقة دي! أنا واللهِ أكان عارف بيلاقيني الفقُر ده، من بيتي ما كان مرقته.
إقتربنا من محطة كيلو 8 في الحلفاية. المحطة كانت عامرة ودايماً بينزلوا فيها ناس كُتار. أها، عمنا بالرااااحة نزّل الحافلة وقال: والله ده يوم عجيب خلاس! وأنا نازل، بمجرد ما وصلت باب الحافلة، وهو طبعاً ما عارفني، قلت ليهو: يا عمنا معليش أمسحها لي في وشي والله ما قاصد حاجة. فجاة قال لي: هو ده إنت يا الشوم؟ طييير الله لا عادك يا وش النحس...
| |
|
|
|
|
|
|
Re: يـتـلـفّـت زي الـطـيـرة ... تـشـبـيـهآت فـي شـكـل سـحـرآت !!!... (Re: معاوية المدير)
|
Quote: سلام يا مدير... والله عندنا تشبيهات سمحة و يتخيل لي دي من الحاجات البنتفرد بيها لحد كبير. هاك ديل: بوزع بسماته زي راس الخروف. داخل و مارق زي أم العروس. عامل زي ديك العدة. يبلع في الطعمية (أو غيرها من الأطعمة) زي الأسبرو. خلى السمك زي صورة الأشعة. |
سلآم يا العوض، يأخي مشتاقين.
وبرضو: يلهط في الصواني زي القرنتية. ينبح في الشوارع زي الـكـلـب. الجدادة خلوها تقول ضاربا لغم. خلآهو ليك لآفي زي القرقور. منطط عيونو زي القعوية العافصا الزير. يختف زي الحدية...
| |
|
|
|
|
|
|
Re: يـتـلـفّـت زي الـطـيـرة ... تـشـبـيـهآت فـي شـكـل سـحـرآت !!!... (Re: معاوية المدير)
|
Quote: والتقيل جاييك وراء |
نادر النور سلآمات، ومشتاقين. جيب العندك. تعرف، في الحلفايا في وآحد عندو بقر كُنا بنمشي نجيب مِنو اللبن. أها، مرّة مشينا انا، واخوي، ونسيبنا بعدين نسيبنا ده زول بيوصف. يا زول لقينا البقرة بيحلبو فيها نفرين، بس نسيبنا ده طوالي قال لي اخوي: الليلة بقرة العوض زي نشرة الأخبار قاعدلها اتنين. اخوي قال ليهو: اعمل حسابك العربي ده كان سمعك تاني ما بيبيع لينا لبن...
| |
|
|
|
|
|
|
Re: يـتـلـفّـت زي الـطـيـرة ... تـشـبـيـهآت فـي شـكـل سـحـرآت !!!... (Re: HAIDER ALZAIN)
|
Quote: مرة لاعبين مع فريق السيالة اها قمنا شبكناهم ليك .. تمر دفيق تمر دفيق ردو علينا..: الكنارة عشرة في سجارة وتلاتة في حمـــارة :) |
تمر دفيق : أوائل التمر عندما يكون أخضر ، ويسمي دفيق لأنه يقع من النخل و الله أعلم (يعايرونهم ببيع البلح الذي يقع من النخل و هو ما زال أخضر) السيالة : قرية تقع علي النيل غرب عطبرة. كنور : قرية تقع علي النيل شمال عطبرة. *بين القريتين صلات قرابة و نسب
الله يجازيكم يا ود المدير و ود الزين، كتلتونا بالضحك
| |
|
|
|
|
|
|
Re: يـتـلـفّـت زي الـطـيـرة ... تـشـبـيـهآت فـي شـكـل سـحـرآت !!!... (Re: aydaroos)
|
Quote: يا قريبي ود المدير .. ـ امشي كدة بتشبيهاتك دي عامل زي ضحى الجمعة |
قريبي ود الزين سلآم، نعلك والوليدات طيبين؟
صقرك ده، زي المرا البتردح.
عارف، الماحي ود جعفر الله يرحمو، يقولك اسحرك؟ تقولوا: اسحرني. يقولك: عامل كدي مِتل الكديسة البتتوضى فوق البحر.
في وآحد سحرو، قالوا: يا الماحي، الخطوط البصفحات عيونك ديل، مِتِل سلوك الطمبور. قدُر ما امشي السودان يجيني في البيت ويحكي لي السحرة دي.
أسأل الله له الرحمة والمغفرة. لا نذكي علي الله احد، لكن الماحي زول جنّة ساااااكت...
| |
|
|
|
|
|
|
Re: يـتـلـفّـت زي الـطـيـرة ... تـشـبـيـهآت فـي شـكـل سـحـرآت !!!... (Re: معاوية المدير)
|
Quote: ود عمي المدير كيفنك يابا مشتاقين يعلم الله فاقدنك والله صحي
|
إخيتي بت الجنيد، بالأكتر. والله صحي.
عارفة، عندنا صاحبنا عندو حبوبتو قصيرووونة، وعندها توب زراق لفحاهو، وديييييمة حايمة في الحِلّة. مرّة النهار الوآطة حاااارة جايين من البحر، كان نشوفلك الحبوبة حايمة في الشارع!!! وآحد قال لود بنتها: عليك الله حبوبتك المِتل الرقشة دي امش دخِلآ البيت من السموم...
| |
|
|
|
|
|
|
Re: يـتـلـفّـت زي الـطـيـرة ... تـشـبـيـهآت فـي شـكـل سـحـرآت !!!... (Re: معاوية المدير)
|
Quote: up ـــ متعةوالله يا قريبنا مرة لاعبين مع فريق السيالة اها قمنا شبكناهم ليك .. تمر دفيق تمر دفيق ردو علينا..: الكنارة عشرة في سجارة وتلاتة في حمـــارة :) |
السجارة عرفناها الـ.......
عارف يا ود الزين مرّة قريباً ليك طاعن في السن دآير يبنيلو مزيرة. أها، مشى جاب البنا. البنا قالو: تجيب لي طُلبة. قال للبنا: انا ببقالك طُلبة. البنا قال ليهو: الشغلة دي ما بتقدر عليها يا حاج. هو اصرّ، لأنو ما داير يدفع للطُلبة. جلدنة منو يعني. أها يا زول البنا موجوع منو وجع شديد. قريبك رآح مادي الطوبة للبنا ويدو ترجف رجفيبة شديدة، والبنا محاول يمسك الطوبة، والطوبة شغالة رجفة مع اليد. قام بنهرة قال للبنا: يا زول ما تمسك مِني الطوبة دي. البنا بزهج شديد قالو: امسكا كيف، وإنت ما ديها لي زي السمكة؟؟؟
| |
|
|
|
|
|
|
Re: يـتـلـفّـت زي الـطـيـرة ... تـشـبـيـهآت فـي شـكـل سـحـرآت !!!... (Re: محمد أبوالعزائم أبوالريش)
|
Quote: تمر دفيق : أوائل التمر عندما يكون أخضر ، ويسمي دفيق لأنه يقع من النخل و الله أعلم (يعايرونهم ببيع البلح الذي يقع من النخل و هو ما زال أخضر) السيالة : قرية تقع علي النيل غرب عطبرة. كنور : قرية تقع علي النيل شمال عطبرة. *بين القريتين صلات قرابة و نسب |
عيدروس يا قريبي، سلآمات وتحايا. الطِليح، الدآخلة، السيالة، كنور، هي الأصل. عطبرة دي ظهرت سنة 1906 بعد إختيار المنطقة رئاسة للسكة حديد. لقريب دا، أهلنا ناس الباوقة بيقولوا ما ماشين الدآخلة.
الدفيق زآتو مصدر تشبيه. الغناي قال: الدِفيفيق الدابو ني البِسيمتو بتكويني كي. وفي تشبيه آخر قال: التِميرة الفي صبيطتا الصفار سابغ خُدرتا. التمرة لمان تكون قالبة من الأخدر للأصفر، هي ايضاً دفيقة. طبعاً المُشبه هو المحبوبة، والمشبه به الدفيق.
ابراهيم سيكا طبعاً خشمو أحمر وسنونو مكسرات، وزي ما عارف هو مريخابي شديد. أها، مرّة بغالت في وآحد هلالآبي. الهلالآبي لآمن الغُلآت حرّ عليهو قال لسيكا: امشي عامل خشمك زي الجوآفة الماكلآ الطير...
| |
|
|
|
|
|
|
Re: يـتـلـفّـت زي الـطـيـرة ... تـشـبـيـهآت فـي شـكـل سـحـرآت !!!... (Re: معاوية المدير)
|
عندنا عما لينا يا مدير مرة لاقاني جائي من الزراعة وعنده حمار شايل فيه برسيم عدل "بكسر العين وفتح الدال" وهو أن وضع البرسيم جزء على صفحة الحمار اليمني وجزء على صفحته اليسرى وواقف يتكلم معاي والحمار ينزل راسه على جيهة صفحته ليتناول من البرسيم وهو يجره من حبله وتاني الحمار يعمل نفس الحركة فزهج عمنا من الحمار وقال لي هسع دا الزي الزول البعاين في جيب السديري دا يسووا لو شنو ؟؟؟؟؟
| |
|
|
|
|
|
|
Re: يـتـلـفّـت زي الـطـيـرة ... تـشـبـيـهآت فـي شـكـل سـحـرآت !!!... (Re: فيصل محمد خليل)
|
Quote: أها، المحلةالغايسة دي أنا كنت متحكر فيها هي، يعني عمنا السواق ده لو رقبتو بقت رقبة نعامة ما يقدر ينقشني.
تحركت الحافلة، وعلى ما أعتقد كانت متوجهة إلى أبو حليمة كنقطة نهائية وهي تحمل في جوفها ناس شمبات ظلط، وشمبات الحِلة، والحلفاية، والدروشاب، وإنت ماشي. المهم، من بداية الصافية كده بقينا نسمع ليك الجماعة: قرصة قبلك، يا أبن العم. ومرات تسمع طرقعة الأصابع، طق، طق، طق،: قبلك يا زول. عمنا كل مرّة يجازف ليك الحافلة ينزلها من الظلط. الظلط سنين وعالي، والحافلة هكرة شديد، قزار الشبابيك يرقص ويلعب سااااكت، وعمنا كلما ينزلها تسمع، كششششش، كشششاش من الناحية اليمين، ولمان يطلعها تسمع كشششش من الناحية الشمال وهكذا. رغم إنو عمنا كان حريص جداً ينزلها على مهل وتؤودة كأنما هي فلذة كبده. وعمنا النوع الجادي المابيتكلم داك، مركّز في الشارع للطيش، وشآدي ضهرو مع الكُرسي تحلف تقول بالع سيخة. أها واحد من الرُكاب كورك: قبلك يا أبن العم، قرصة. عمنا طوالي راح مسايس ليك الحافلة نزلها. أوّل ما نزلت من الظلط نسمع ليك، كششششا كششش. أنا طوالي لى شقاوتي، قلت ليهو: ده أشنو يآ عمنا! إنت سايق حافلة، والا سايق فضيّة؟؟؟ أريتني ما قلت الكلمة دي، وعمنا فتح فيني. عمو: الله يقطعك، ويقطع يومك. داير توقفها! الله يوقف حالك، دي نحن بنعول منها أُسر، في ستين خشُم راجياتنها خشمك بالتكسرو ليك. طبعاً أنا قنصت قنصة شديدة جداً والكرسي عامل لى ساتر من عمنا ما قادر يشوف حتى طرف قميصي.
أها يسكت ويكون سايق في أمان الله، فجاة تسمع: قرصة يا أبن العم. أبن العم يجازف الحافلة ينزلها وبمجرّد ما الكشكشة تحصل يروح فاتح فيني. عمو: والله قال فضيّة قال! الله يقطع اليوم اللمانا فيك زاتو. طالعين نشوف رزقنا يتعارض لنا عارض نفر ده!. ده يوم نحس اللمانا فيك يا شوووووم. الجماعة في الحافلة طبعاً لقولهن موضوع، وتعال شوف الضحك والقرقراب. جنبنا في إتنين كده عملوها مسخرة، اوآت ما يكون في زول نازل يقولوا: اوووووب هسسسع عمّك يفتح. وهو ما قصّر تب، أوّل ما يسمع كشششششاش يقوم: قال فضية قال! الفضية التتكسر لك فوق راسك ده صحن صحن، وكُباية كُباية يا نحس. أنا طبعاً من هو فتح خشمو قفلت خشمي. بعدين في جماعة كده الواحد لمان يجي نازل يقولوا: يا عمو خلاس عليك الله أنسى الموضوع. وهو يهيج: لكن عليك الله دي طريقة دي! أنا واللهِ أكان عارف بيلاقيني الفقُر ده، من بيتي ما كان مرقته.
إقتربنا من محطة كيلو 8 في الحلفاية. المحطة كانت عامرة ودايماً بينزلوا فيها ناس كُتار. أها، عمنا بالرااااحة نزّل الحافلة وقال: والله ده يوم عجيب خلاس! وأنا نازل، بمجرد ما وصلت باب الحافلة، وهو طبعاً ما عارفني، قلت ليهو: يا عمنا معليش أمسحها لي في وشي والله ما قاصد حاجة. فجاة قال لي: هو ده إنت يا الشوم؟ طييير الله لا عادك يا وش النحس...
[ICQ] |
سلام أستاذ معاوية... أضحك الله سنك ياخي سكرتنا بالضحك... ... . بالله وواصلت الرحلة لي نهايتا.. بالغت والله! .. عجبتني ذنقتك ورا الكرسي ياها زنقة زنقة لما وصلنا.
| |
|
|
|
|
|
|
Re: يـتـلـفّـت زي الـطـيـرة ... تـشـبـيـهآت فـي شـكـل سـحـرآت !!!... (Re: الشفيع محمد صادق)
|
Quote: عندنا عما لينا يا مدير مرة لاقاني جائي من الزراعة وعنده حمار شايل فيه برسيم عدل "بكسر العين وفتح الدال" وهو أن وضع البرسيم جزء على صفحة الحمار اليمني وجزء على صفحته اليسرى وواقف يتكلم معاي والحمار ينزل راسه على جيهة صفحته ليتناول من البرسيم وهو يجره من حبله وتاني الحمار يعمل نفس الحركة فزهج عمنا من الحمار وقال لي هسع دا الزي الزول البعاين في جيب السديري دا يسووا لو شنو ؟؟؟؟؟ |
هههههههههههههههههههههههههههههه، اوسكار يا عكود. والله صحي.
تعرف كان عندنا عريس في البلد لآبس بدلة بُنيّة وبنطلون بُنّي وقميص ابيض، ومزرّر زرارتين البدلة التحت. وآحد قال: عامل زي القرآع الفاتق...
دي صورة القرآع وفيها وآحد فاتق، لزوم معانا أهل البنادر وكده...
| |
|
|
|
|
|
|
Re: يـتـلـفّـت زي الـطـيـرة ... تـشـبـيـهآت فـي شـكـل سـحـرآت !!!... (Re: معاوية المدير)
|
Quote: تعرف كان عندنا عريس في البلد لآبس بدلة بُنيّة وبنطلون بُنّي وقميص ابيض، ومزرّر زرارتين البدلة التحت. وآحد قال: عامل زي القرآع الفاتق... |
هههههههههههههههههههههههههه
والله دي بالغ فيها زولك دا
انت عارف عندنا زولا لينا برضو وصاف وصف شديد ومستهبل مرة معاه واحد قريبه لما يضحك بتنخج ويتهز هزة شديدة وفي نضمو وضحكو وهززانو دا قال لي قريبو دا ادني موية عليك الله أها دا مشى على الموية وقالو "أها ما تبطلها" اي شبهه باالعربية وهي مدورة وراح يجيب الموية عشان يملاها
| |
|
|
|
|
|
|
Re: يـتـلـفّـت زي الـطـيـرة ... تـشـبـيـهآت فـي شـكـل سـحـرآت !!!... (Re: كمال عكود)
|
Quote: سلام أستاذ معاوية... أضحك الله سنك ياخي سكرتنا بالضحك... ... . بالله وواصلت الرحلة لي نهايتا.. بالغت والله! .. عجبتني ذنقتك ورا الكرسي ياها زنقة زنقة لما وصلنا. |
سلآمات يا الشفيع، إن شاء الله دِيّمة مبسوط، وضاحك. يا زول زنقة عدوك الما زنقة العقيد. والله واصلت الرحلة. عليك الله ما تقالة دم مني؟ لكن عمّك شماني شمّة!!!
تحياتي...
| |
|
|
|
|
|
|
Re: يـتـلـفّـت زي الـطـيـرة ... تـشـبـيـهآت فـي شـكـل سـحـرآت !!!... (Re: معاوية المدير)
|
Quote: كنا بنقعد في العتبا الخضراء نبيع البرسيم أها ميرغني كومو كان بياااع وزول وجيه جاهو واحد اشتري ربطة برسيم بخمسمية واداهو عشرة كومو قال ليهو ماعندي فكة ـــــــ العجايز وراهو قالوا ليهو عندك الفكة وبعت لفلان وعلان بكدة واستلمت كدة وفي جيبك من ورق ابوعشرة كدة لمن قلع هدومو وفتش جيبو عرفهم صآح ...جدع باقي الهدوم وجرى
|
ههههههههههههههه، تعرف يا ود الزين زمان لمان نمشي السوق اب جنزير تلقاهو وآقف مع ولآد السودنة والسكة حديد وينكّت سااااكت، اوآت نجي نحن يقول: خلآس جيتو يا الكنارة و ولآد السيالة!!! من قبييييييل ما كُنآ كويسيييين!!!
| |
|
|
|
|
|
|
Re: يـتـلـفّـت زي الـطـيـرة ... تـشـبـيـهآت فـي شـكـل سـحـرآت !!!... (Re: معاوية المدير)
|
Quote: اعتقد إنو حكاية الوصف دي ما ليها علآقة بالعين والسحر، وهي سرعة بديهة وصفاء ذهن تأتي عفو الخاطر. اما السحر والعين فهي إستحسان لشئ جميل من الشخص دون ان يقول ما شاء الله، وقد يكون هذا الإستحسان في السر، لكن درجت العادة عندنا إنو الزول الوصاف سحار. الله أعلم... |
معاوية..بوست ظريف كما ذكرت التشبيه يدل على الذكاء و سرعة البديهة ، و أهلي الرباطاب يتميزوا..تحياتي.
| |
|
|
|
|
|
|
Re: يـتـلـفّـت زي الـطـيـرة ... تـشـبـيـهآت فـي شـكـل سـحـرآت !!!... (Re: ابو جهينة)
|
Quote: معاوية..بوست ظريف كما ذكرت التشبيه يدل على الذكاء و سرعة البديهة ، و أهلي الرباطاب يتميزوا..تحياتي. |
سلآم وتحايا أخي الحاج حمد الحاج. إسمك زي القلم المبري بالجنبتين.
التشبيه أخي الحاج موجود حتي في الشعر والقرآن، ونجده في ايات كثيرة. مثلاً: طلعها كأنه رؤوس الشياطين. كأنهُنّ بيض مكنون. كأنهم حُمرٌ مستنفرة فرّت من قسورة.
وفي الشعر مثلاً: وبيـضة خـدر لا يـرام خـباؤهـا. تمـتعـت من لـهو بها غير معجل. شبه إمرؤ القيس المرأة بالبيضة، وكذلك ورد تشبيهها في القرآن. كأن مثار النقع فوق رؤوسنا واسيافنا ليل تهاوى كواكبه. درير كخذروف الوليد أمره تتابع كفيه بخيط موصل...
أنا برآي فيني لحمة رُباطاب، يعني سِراً ليك. مشكور كتير علي المرور...
| |
|
|
|
|
|
|
Re: يـتـلـفّـت زي الـطـيـرة ... تـشـبـيـهآت فـي شـكـل سـحـرآت !!!... (Re: معاوية المدير)
|
Quote: معاوية سلام كبير بوست بنكهة زحمة محطة حاج الريح أيام مجدها الذهبي
لي عودة |
الريس ابو جهينة، ســـلآم كتير. دائماً تأتي لتنثر عبير مدينتنا القاطرة في فجاج البوستات فيعبق في جدرانها. محطة حاج الريّح، تقاطع إسمه مسرح الأرآم، فكم متعت عينيا وسبحت في الأحلآم عند ذلك التقاطع حيث الملآئكة سافرة والظباء نافرة وصوت بابكر الذكآر يغنينا بصوته الفنان الذي يسافر في نواحي المدينة، قطار الشوق متين ترحل تودينا؟؟؟
بتتذكر العرب الكانوا ساكنين وراء السكة؟ نحن بنقول وراء السكة لأننا غرب السكة حديد وهم شرقها. وضع احدهم رجل علي التانية، وإتكى علي عكازه، ثمّ انشد متغزلاً في حبيبته بأبيات من وحي بيئته قائلاً: يا الشلآخِك مِتِل قضيب الدآخلة.
شبه شلوخها بقضبان السكة حديد.
تحياتي، وفي إنتظارك...
| |
|
|
|
|
|
|
Re: يـتـلـفّـت زي الـطـيـرة ... تـشـبـيـهآت فـي شـكـل سـحـرآت !!!... (Re: احمد الأمين على إدريس)
|
Quote: سلا يا ود المدراء يابلديات بوست لطيف ودمو خفيف دايرلو زولا نضام التقول بالع راديو جنس النضم دا والامثال والتشبيهات التى يعج بها مجتمعنا السودانى ماتديك الدرب ..
فواصل اتحفنا ياحبيب |
أُمحد اللمين، كيف حالك يا قريبي؟ صدقت المجتمع السوداني دا فيهو هوايل وقِلل ما تديك الدرِب.
الرباطابي ولدو بيتعلم في القُعاد. أها، أُمو تقعدو يقع علي صفحتو اليمين. ترفعو وتقعدو تاني يقع علي صفحتو الشمال، وهكذا. زولنا الرباطابي يعاين، قام قال لمرتو: ولدك ده زي القزازة الفي قعرا طين...
| |
|
|
|
|
|
|
|