|
Re: سيد البلد الاسباني (الريال) يقرش البرشا ويحرز كأس الملك ,,,, مليون مبروك (Re: جمال السنوسي)
|
امس ساهرت للصباح قلت عشان احضر مباراة البرشا والريال مع انو لا ناقة لى ولا جمل في تشجيع أي منهما ... البشيل الكاس يشيل ... مافارقة
انا بشجع المريخ ... وبس والفرق السودانية او الفريق القومي السوداني ... في المنافسات الخارجية .. وكل الفرق الأفريقية في جميع المنافسات العالمية ...
يعني مامكن تعقد 120 دقيقية تشوف قون واحد بس ... ومباراة ناعمة بشكل ... بالله دكتور واحد يدخل الملعب مافي ... اللعيبة براهم بساعدو في بعض ... ويرفعوهم من الارض ... اقصد البساط والغريبة ... عربية إسعاف واحده ما عندهم .. والملعب نظيف ... والجمهور بشجع بصوت واحد ... التقول موسيقي لخلفية لفلم ... والباصلات يملسوها مليس ... من لاعب لى لاعب ..
ديل ماشافو دورينا ... او مباراة في البطولات الافريقية .. اول حاجة عربية الاسعاف دي لازم نغيير ليها العجلات كل مباراة .. من كثرة الدخول والجري في الملعب .. وكمان جزمه جديدة لكل الطاقم الطبي ... أول كل مباراة ولازم يجرو اكتر من اللعيبة ... بنعمل ليهم تمارين لياقة خاصة ... وبنختارهم حسب اللياقة البدنية وليس المؤهلات الطبية .. لانو المطلوب فقط ... التدلتك بالتلج ... وتفريغ علبة مخدر ... وأهم شرط لضيافة المباريات توفير لوري تلج .. وبوكس مخدر .. تستهلك في اللعيبة ... والباقي للجمهور عشان يفلقو بيهو بعض ...
والعجب الباصات بين اللعيبة ... لازم صوت الباص " لب " تسمعو في التلفزيون .. انت قايل ملاعبهم في اوروبا حلوة وجميلة كده ليه .. عشان الباص بتاعم بملسوهو مليس .. نحنا باصنا ... اللاعب لازم يشيل معاهو مترين نجيلة ... وأربعة "كواريك" رملة ... وإلا ... لا يعتبر باص ...
والعجيبة منطقة المرمي ... دي لازم تكون "بادوبه " و "دلجة" عشان الحارس والمهاجمين بعد المباراة ... ياخدو اجازة شهرين ...
وده كلو كوم والجملة التالية التي تظهر لك في الشاشة كل خمس دقايق كومين : نعتذر للمشاهدين عن انقطاع الصورة من المصدر .... التقول المصدر ده ماليهو علاقة بقناة البث .... أو مسؤوليتهم ...
توبه ... تاني ما مساهر واحضر دوري أوروبي ولا سجم .. خلوني في الدوري البقوم النفس ويرفع الضغط ده ....
ودمتم ياشباب ....
|
|
|
|
|
|
|
العنوان |
الكاتب |
Date |
سيد البلد الاسباني (الريال) يقرش البرشا ويحرز كأس الملك ,,,, مليون مبروك | جمال السنوسي | 04-21-11, 00:52 AM |
Re: سيد البلد الاسباني (الريال) يقرش البرشا ويحرز كأس الملك ,,,, مليون مبروك | ياسر نجيلة | 04-21-11, 05:35 AM |
Re: سيد البلد الاسباني (الريال) يقرش البرشا ويحرز كأس الملك ,,,, مليون مبروك | جمال السنوسي | 04-21-11, 10:46 AM |
|
|
|