|
بوتيك ( نادية إستايل) بالخرطوم / الرياض/ دعوة لنساء ورجال وأطفال المنبر .. يوجد( تخفيض وبيع) !!
|
إزيكم شديد كدا
الفكرة إنو بصفي في البوتيك لعدة أسباب أولها أثبتت التجربة عدم مقدرتي على التوفيق
بين ظروف العمل الإعلامي والتجاري !!
ثانياً .. سفري المتكرر بين الخرطوم والقاهرة لوجود إبنتي في مصر خصماً على البوتيك !
ثالثاً.. إيمان بدت ( تنق) وعاوزة تجي تمسك موضوع البوتيك وأنا رافضة لأنو قرايتها أهم !!
يلا فكرت أبيع البضاعة والبوتيك وأتفرغ لـلـ( جن ) البعرفو والله يقدرني عليهو يارب !!
ويلا عاملة تخفيضات كبيرة لعضوات المنبر والقراء لأنهم أولى وهم من شاركوني في إفتتاح المشروع
وشجعوني ووقفوا معاي وربنا يقدرني على جزاكم في الأول والآخر يارب !!
العنوان / الرياض / شارع النص / الشارع الفيهو مستشفى مكة للعيون ، بالقرب من صيدلية المك نمر
للتخفيض الرجاء إحضار نسخة من البوست ده ( وجه بهظر طبعا) !!
لكن بالجد القراء والأعضاء ليهم تخفيضات هائلة جدا !
الشيء الأهم المحل بقع ناصية ومحلو ممتاز ومجهز بالكامل كـ( بوتيك) ! وينفع مطعم أوأي مشروع ليهو علاقة بطلبة الجامعة لأنو جنبي الجامعة الكندية وجامعة السودان !
يعني الراغب في الإيجار يكلمني في الماسنجر سمح؟
وبالمناسبة الإعلان ده مدفوع الأجر .. وباقي الفكة خليتها لبكري كمان ! ( وش أخدر بيضحك) !
يلا منتظراكم في البوتيك من الساعة الرابعة وحتى العاشرة مساء وتسلموا شدددددديد !!
الإمضاء ( نادية إستايل) !!
على فكرة اسم البوتيك إختارو لي أخوي والله !
|
|
|
|
|
|
|
|
Re: بوتيك ( نادية إستايل) بالخرطوم / الرياض/ دعوة لنساء ورجال وأطفال المنبر .. يوجد( تخفيض وبيع (Re: صديق الموج)
|
صديق الموج أخوي وصديقي العزيز
سلامات أبو إخلاص عساك وكل الأحباب بألف خير يارب
Quote: كل المبررات التى وردت هنا غير كافيه ان تكون سبب لبيع البوتيك،الرجاء الاتصال عبر الخاص لمزيد من الشرح،،، |
يا موج إنت اكتر زول عارفاك حاتزعل بموضوع البيع ده !
إنت الزول الدائما بتديني نصائحك الذهبية في فنون التسويق والبيع
لكن والله غلبني التوفيق بين الشغل والتجارة والبنية والترحال ! ورغم كل الأصدقاء رافضين فكرة التخلي عن مشروع البوتيك إلا أنو الإستمرار صعب !
عموما برسل ليك رسالة في الخاص هسة ونكمل كلامنا سمح؟
| |
|
|
|
|
|
|
Re: بوتيك ( نادية إستايل) بالخرطوم / الرياض/ دعوة لنساء ورجال وأطفال المنبر .. يوجد( تخفيض وبيع (Re: نادية عثمان)
|
أتألم حقاً عندما أجدني شاهداً على تلاشي آمال عريضة كنا شهوداً على فرحة البدايات وهنا نحن نودع بألم التجربة رغم أن نادية حاولت ( بلطف أصيل في طبعها ) أن تضفي الطابع الفرائحي على المناسبة كنا نتمنى نجاح هذه التجربة فعلى المستوى الشخصي أختنا العزيزة نادية ست عظيمة مكافحة تستاهل كل خير وعلى مستوى عام نجاح تجربة أحد ( السودانيين الوافدين ) تعطي مؤشراً إيجابياً لكثيرين يتأرجحون بين مد وجذر أياً كانت أسبابك أختي العزيزة نادية ما أعلنت وما احتفظت به لنفسك ( فالصلاة فيها السر وفيها الجهر ) أتمنى لك الخير كله في أى قبلة تختارين ، وفي أى مجال تمتهنين فأنت حقاً مكسب لما تختارين
_____________________
لكن برضو حقنا ما بنخليهو
طالبنك كم إسكيرت وكم بلوزة وكم ( هتش كريمات ) للمدام والبنات
| |
|
|
|
|
|
|
Re: بوتيك ( نادية إستايل) بالخرطوم / الرياض/ دعوة لنساء ورجال وأطفال المنبر .. يوجد( تخفيض وبيع (Re: امير طمبل)
|
أمير طميل أخوي
حبابك مليون ونص
Quote: أخوك صاحب تجربة سابقة .. نصيحتي لو ما متفرغة للبوتيك طوالي اعملي تصفية نهائية |
أنا ذاتي قلت كدا والله بيني وبينك التجارة مابتتلم مع أي شغلة تانية زي الفريك ماتحب الشريك وأنا بحب الإعلام وغلبتني التجارة غايتو ! دعواتك والله كريم
Quote: غايتو بناتي ..بالكتير يومين بطرفك الخصم يكون مجيه .. |
تلاتة وعشرين بت جوني المحل سمحات وحلات الدنيا عليهم وكل ما أسأل واحدة فيهن أبوك أمير كيف تقول لي بابا ما أسمه أمير !! بناتك ديل بيكونوا ( طشن) من المحل ولا شنو يا أمير ؟( وش محنبك)
| |
|
|
|
|
|
|
Re: بوتيك ( نادية إستايل) بالخرطوم / الرياض/ دعوة لنساء ورجال وأطفال المنبر .. يوجد( تخفيض وبيع (Re: عاطف عمر)
|
الأخ والصديق العزيز عاطف
تحية بحجم إنسانيتك الباذخة وسلامة نيتك البيضااااااء
Quote: أتألم حقاً عندما أجدني شاهداً على تلاشي آمال عريضة كنا شهوداً على فرحة البدايات وهنا نحن نودع بألم التجربة رغم أن نادية حاولت ( بلطف أصيل في طبعها ) أن تضفي الطابع الفرائحي على المناسبة كنا نتمنى نجاح هذه التجربة |
عارف؟ جميل إنو تكون عندك ستة الآف أخ وأخت تشركهم معاك في أفراحك وأحزانك ونجاحك وإخفاقك ! أنا عارفة بياض نيتك الطيبة وكنت بتمنى أقدر أنجح في التوفيق بين عمل الإعلام البحبو جدا ومشروع البوتيك التجاري لتحسين الدخل لكن غلبني وحسيت بالتعب ، خاصة مع هم السفر والجية لبتي !
Quote: فعلى المستوى الشخصي أختنا العزيزة نادية ست عظيمة مكافحة تستاهل كل خير |
تسلم أخوي وما أعدمك يارب .. وياها الحياة محتاجة المجابدة والجري !
Quote: وعلى مستوى عام نجاح تجربة أحد ( السودانيين الوافدين ) تعطي مؤشراً إيجابياً لكثيرين يتأرجحون بين مد وجذر |
والله النجاح ممكن بس تركيز الجهود مهم وصاحب بالين بتعب في البلد دي !
Quote: أياً كانت أسبابك أختي العزيزة نادية ما أعلنت وما احتفظت به لنفسك ( فالصلاة فيها السر وفيها الجهر ) أتمنى لك الخير كله في أى قبلة تختارين ، وفي أى مجال تمتهنين فأنت حقاً مكسب لما تختارين |
تسلم يا غالي وربنا بحبني عشان خلاني أكسبك وكل الجميلين في المنبر ..ما أعدمك يااااارب ياعاطف
| |
|
|
|
|
|
|
Re: بوتيك ( نادية إستايل) بالخرطوم / الرياض/ دعوة لنساء ورجال وأطفال المنبر .. يوجد( تخفيض وبيع (Re: نوفل عبد الرحيم حسن)
|
نووووووووووفل
Quote: والله يا ناديه انا بيني وبينكم شارع بس .. انا بين شارع الجزار وشارع المشتل لكن لما نرفع راسنا من الشغل 10 ونص ذاتها بتكون جات لكن اكيد بنصل كان الله سرع السلحفاه ومد في الآجال |
الخوف لحدي ماتصل وأنت راكب السلحفاة بتاعتك دي يكون البوتيك اتباع زماااان هههههه
ياخ تعال الحق ليك حبة حاجات للشفع والمدام العيد الكبير قرررررب يااااخ
Quote: تخريمة خاصه لود شيقوق العريريب ديل اصلو ما بتطورا ليوم الليله ما بعرفوا الفرق بين البوتيك والكوفير ههههه |
غايتو ود شقيقوق برة الشبكة نهائي ههههههه ومنتظرين المدام ياود شيقوق مشاط مشاط بس هي تنورنا بالحضور الباهي سمح؟
| |
|
|
|
|
|
|
Re: بوتيك ( نادية إستايل) بالخرطوم / الرياض/ دعوة لنساء ورجال وأطفال المنبر .. يوجد( تخفيض وبيع (Re: ابوحراز)
|
أخوي أبو حراز المبدع وجميل الروح والكلمة
حبابك تلاتة مليون ونص
Quote: أول شيء كدي نبارك ليك البوتيك قبل البيع !!! |
الله يبارك فيك ويسلمك يارب
Quote: تاني شيء كم تحسرت كثيراً لأنني لم اشتري منك 00 عارفة ليه ؟؟ لأنني أتيت الى هذا المكان أكثر من 50 مرة وشفتو ولكن مامفتكر انو يخص عضوة وزميلة من زميلات البورد كنت بأتي للبروف الهادي عبد الصمد في الكلية الكندية ومرات بوقف سيارتي قريب من الصيدلية دي يعني خسارة كان ممكن نشتري وبالمرة نجد لينا خصم طالما أن المحل لسودانيز اون لاين |
خسااااااااارة والله !! لكن عاين هسي مافات شيء ممكن ترسل المدام والبنات وبنعمل ليهم التخفيض وزيادة ! أقول ليك شيء ؟ كلم لي البروف بتاع الكندية يكلم الطالبات يشتروا ( إجباري ) كدا هههههه
Quote: وطبعاً من واقع الممارسة فإن اي محل الواحد مايتفرغ ليهو بفشل كان عندي محل كمبيوتر يوم اكون متواجد الدخل الصافي 100 الف بالقديم يوم امشي يكون الدخل 16 الف الغريبة الجماعة الشغالين فيهو كلما اأتي يقولوا لي ياخي انت خير وبركة مما تجينا ونشوف وشك الأبيض المنور المحل يشتغل طوالي قال وش أبيض ومنور قال !!! طوالي بعت المحل لا ابيض منور ولايحزنون |
والله أنا ذاتي قلت كدا ! أكون قاعدة المحل بشتغل ، أسافر المحل يخسر عاد أبقى لي جنس ده ؟
Quote: هسي بدرس في مشروع حمامات !!! شغلانية مربحة جداً لكن انا ان شاء الله ما حا أمشي بالناحية التقليدية حا يكون لدي نظريات تسويق جاذبة للعملاء والزباين يعني ابسط شيء { مرتين عليك ومرة علينا } يعني المرة التالتة مجاناً !!! |
حمامات الواحدة دي بتاعة ( الحُما) والنظافة من الإيمان ؟ ولا حمامات من الحمام أخو الجداد البياكلوه ؟! ( وش محتار) !
| |
|
|
|
|
|
|
Re: بوتيك ( نادية إستايل) بالخرطوم / الرياض/ دعوة لنساء ورجال وأطفال المنبر .. يوجد( تخفيض وبيع (Re: خلف الله عبود)
|
غاليتنا نادية عثمان تحياتي يا غالية
يا ندوية عندي صاحبي شدييييييييييد وما أفضلو عليك والله وعندو شكوى منك فقد قابلني في الفيس بوك وهو يعلم بأنني عضو في سودانيز أون لاين ونقل لي شكوى عنك، فقد قدم إلى بوتيكك بالرياض وهو من سكان نفس الحى قدم هو وزوجته للشراء وقد قال بأنهم ألقوا عليك السلام وإنت كنت منشغلة باللاب توب ولم تردي عليهم السلام، ودخلوا البوتيك ولم يجدوا أحداً بالداخل لتبية طلبات الزبائن فخرجوا من البوتيك وإنت لم تشتغلي بهم وهذه هي فحوى رسالته وما على الرسول إلا البلاغ.
تقبل فائق تقديري الذي تعرفينه
| |
|
|
|
|
|
|
Re: بوتيك ( نادية إستايل) بالخرطوم / الرياض/ دعوة لنساء ورجال وأطفال المنبر .. يوجد( تخفيض وبيع (Re: مزمل خيرى)
|
مزمل خيري
أخوي الخلوق الكريم
حبابك أو جوان .. حبابك ملااااااين
Quote: نادية .. سلامات فعلاً العمل الحر داير زول متفرغ نهائى ودايرة صبر شديد .. كنت من ضمن الحضور فى الأفتتاح الأنيق وحاولت اجى المرة دى برغم مكتبنا على بعد أمتار من المحل .. بس ربنا ما أراد .. فى افتتاح نادية استايل ... الكواكب احتفلوا بالقمر ..توجد روعة و أكيد صــور |
والله صدقت التفرغ مهم ومن غيرو شغل التجارة مااااااااببقى !!
عاين
جاتني ولاء العسل إشترت مني حبة حاجات للشيلة بتاعتها لكن وييين أم العسل ماجات ؟
عارف؟ أول زول إشترى مني يوم الإفتتاح منو ؟ بتكون متذذذذذذذكر صاح ؟
بتك العسل كانت أول زول إشترى من ( نادية استايل) مع الفخر والإعزاز !
سلم عليهم كتييييير
أها بتجونا متين ؟
| |
|
|
|
|
|
|
Re: بوتيك ( نادية إستايل) بالخرطوم / الرياض/ دعوة لنساء ورجال وأطفال المنبر .. يوجد( تخفيض وبيع (Re: النذير حجازي)
|
النذير حجازي اخوي وصديقي العزيز
قول لصحبك نادية قالت ليك ظلمتها ظلم الحسن والحسين ياخ ( وجه حزيييين)
ثم هو صديقك عرف كيف الشايل لابتوب دي أنا وكيف المحل مافيهو زول وأنا قاعدة ؟!
عاين
المحل اصلا ماسكو زول كويس جدا أسمو أيهاب وهو البلاقي الناس وأنا لمن أكون موجودة
في المحل ببايعهم براي .. فماعارفة ليه يعني مثلا صحبك ده انا اجهلو هو وحرمه من دون سبب؟ يا النذير انت بتعرفني كويس من خلال المنبر ده .. هل أنا من النوع البتكبر على الناس ويجهلهم ؟!
ثم زول جاي يشتري مني أجهلو ليه ؟ يا النذير صحبك ده مشى بوتيك تاني وقابل نادية تانية وليس نادية عثمان مختار التي تعرف !!
سمح ؟
| |
|
|
|
|
|
|
Re: بوتيك ( نادية إستايل) بالخرطوم / الرياض/ دعوة لنساء ورجال وأطفال المنبر .. يوجد( تخفيض وبيع (Re: ناصر احمد الامين)
|
نااااااصر
Quote: نــــادية اووووعك تبيعي بلا صحافة بلا لمة !!
البزنس دا ضمان و صك غفران عديل كدا
انا زمان كان عندي صالون حلاقة في شارع المعرض جنب الفيش قمت اتهابلت و قفلتو .... و الله لحدي اسه زعلان و ندمان !!
انا عندي فكي كاااارب .. تخصص جيب زباين بكره دي بكلمو يمشي بي غادي و يعمل شغلو (الوصف واضح) لكين الفكي دا نظرو ضعيف .. الخوف يمشي علي البقالة الجنبك
المهم ... لو ادارتو غلبتك أجريهو ! |
الصحافة دي مااااااابقدر أخليها والمحل هو أصلا إيجار ما تمليك !
كدي تعال بالدرب بحكي ليك الحاصل كلووووو سمح ؟
راجياك
| |
|
|
|
|
|
|
Re: بوتيك ( نادية إستايل) بالخرطوم / الرياض/ دعوة لنساء ورجال وأطفال المنبر .. يوجد( تخفيض وبيع (Re: عبد اللطيف السيدح)
|
السيدح أخوي
حبابك ملايين والله
Quote: من طريقة حديثك احسست بأن فتح المحل لم تسبقه دراسة جدوي مكتملة بل العواطف هي التي سيطرت علي
افكارك. |
مافهمت بصراحة ( عواطف) كيف في التجارة ؟
عملت دراسة جدوى وكل شيء والبوتيك كان قعدت ليهو بروحي بمشي كويس لكن أنا مابقدر أتفرغ بس !
وعملي وسفري للبنية لخبط أموري ما أكتر .. وفي النهاية أهي تجربة وأستفدت منها الكتير بحمد الله
Quote: ولو وصلت لاتفاق مع احدي سيدات الاعمال تتم بموجبه عملية تقبيل مرضية احسن من التصفية علي طريقة الحراج |
الحراج ده بتاع القطن لكن مافهمت كلامك ولا عرفت ( تقبيل) دي شنو يا السيدح أخوي !!
المحل إيجار وليس تمليك !
| |
|
|
|
|
|
|
|