هيا بنا الي الكراكير والجخانين يا خليل...!!!!!!

Quote: وهاكم دي من خشم صاحب سيدو: واحد مغترب مشى عَرّس ونزل في فندق صاحبو صاحب خالو.. وقضى وطره في حوالي شهر، مستعينا بـ[القدوقدو] و[القي قي] و[أقَـش] الدباغة والذي منو بجيبو من حلة [موبي]. وخلي ليك ريحه الفندق زي الكمبو. وكمان بحوم في الصالة بعراقي [شفيف] يِبْرِز من ثناياهو تضاريس خشنة آلي واتي (عالي واطي) شي فلايت... شي أم دلدوم... شي كُردمه. وكان عينو قوية.. أحيانا بطالب صاحب الفندق بالـ[فكاكا] من الصباح: [ما نـلـقـا إندكم أم فـتْـفِـتْ؟] دا بعد ما يكون شرب القهوة بنص السكرية!! وبالليل وهو حايم في ردهات الفندق تشوف دخان أبيض طالع من إضْنـيـنـو، ما يلبث أن يتحَول لأسَود كثيف يطلع من أي فتحه في جسمو!! المهم.. الفندق تحَول إلى [كركور] و[جخْنون] خاصة بعد إكتشاف أهل [مايرنو] وما جاورها بعد بلاغ من ناس [الدباغة] إنو ولدُمْ موجود في عرصات هذا الفندق. وعينك ما تشوف إلا النور... شي [أمجاد] وشي [بكاسي] وشي [سوزكيات حمرا]. والشهادة لله كانو بيجو بحقهم.. ملاح [مِرِسْ] [لوبا عفِن] [كَجيك] [مرا-رو] إلخ من المعفنات والمخمرات مِما يؤكل. ويجو ليك في الفندق قايلين ولدمْ المغترب، إشتراهو عديييييل كدا!! المهم... نزلاء الفندق إضايقو وأخلوا الفندق، للفنادق المجاورة.. ومما ذكروه إنهم بالليل بيسمعو [كركبا] شديدة وأصوات عجيييبة من غرفة المدعو إياه: [عواء مرفعين] همس [أبو العفين] صوت مكنه [كومر] فضلاً عن الدخان الأسود وبخْتما بجعير شديد تتخلله همْهمات وكلام غير مفهوم. كانت خسارة صاحب الفندق من الناحية الدعائية والإعلانية أكبر من خسارته المادية. إذ بعد إجلاء العريس –بالإستعانه بخالو- ظل ناس الخزان يترددون على الفندق لغاية اليوم: ويجو ليك في الفندق قايلين ولدمْ المغترب، إشتراهو عديييييل كدا!! [نِهْنا أهل آبْدو.. قُلنا نقَيِل مآآآكم!!]