لماذا لم يخرج الناس لاسقاط النظام في السودان ؟!!

Quote: امين نوتة يا زول يا مريح --- ياخي انت عارف غايتو في نظري انت و دينا خالد ديل اكيد عشتوا طفولة غير مشوهة !! ----- كالعادة بوستاتك بتريح الزول – و بخصوص البوست الاخير بتاع لماذا يخرج السودان – هو كلام جميل – لكن مأخذي عليهو انك بديت من البداية بصيغة (الاستيتمت ) و في شكل نتيجة حتمية – و انا احبطت شوية – طبعا ما عشان دا رأيك – العكس دا رأيي تماما – لكن نتيجة زي دي و هي نتيجة انطباعية (حتي لو نتيجة تفكير )ما ممكن تتخت كأستيتمت --- لكن في مشاركة اخيرة وضحت انك بتفتكر انو السبب كدة و كدة – و دي اكيد بتفرق و بتوضح بأثر رجعي انو النتيجة الحتمية الاولي ليست الا رأي --- و لسوء الحظ مافي بحث سوداني مثلا اخدوا عينة بتاعت الف شخص و شاف نتائجهم و حللها مرة تانية - عشان الزول يقول و الله الشعب السوداني ما طلع لانو كدة و كدة --- و بغض النظر عن امكانية عمل البحث في السودان لكن انا بتكلم عن كيفية صياغة اسيتمت بالثقة دي و و ربما في زيارتك الاخيرة قد تكون لاقيت ناس و سألتهم عشوائيا و وصلت لقناعة زي دي --- و الحاجة التانية و انا شايفها مهمة غير اصلاح المعارضة و اخلاقها و هي تصحيح التشويه البتعمل عن طريقة اعلام الجبهة و غيرها من البسطاء لفترة الديمقراطية و فكرتها عند الناس – نعم فترة الصادق من ناحية سلطة كانت مشوة و سيئة –لكن هل الصادق كان بقدر يشن حرب علي دارفور عشان يقتل مئات الالاف ؟ و هل الصادق كان بقدر يغرق و يفني النوبة زي ما حسع الحكومة دايرة تعمل –و هل ممكن كان يشيلوا عشرات الالاف للصالح العام ؟ و هل و هل ؟؟؟؟- طبعا الحاجات دي الصادق او حكومة اي ديمقراطية ما بتقدر تعمل – ما لانو الصادق زول كويس ! لكن لانو دي السياسة كدة – يعني لو ضرب ناس دارفور ما حيدوهو اصوات و ما ح ينجح في الانتخابات الجاية ! و ما بقدر يغرق النوبة حتي لو داير – ببساطة لانو في الديمقراطية في فرصة للمظاهرة و النوبة ح يتظاهروا في الخرظوم و في اي حتة – عشان كدة في تقديري ما ممكن يغرق النوبة و لانو ممكن يخسر اصوات – و هكذا في كل الحالات --- عموما اضافة لاصلاح المعارضة انا شايف انو تصحيح ماذا كان يمكن للديمقراطية و ما لا يمكنها ان تفعل و تصحيح التشويه – دي حاجات مهمة – و طبعا ما قصدي الكلام المكرر بتاع الديمقراطية تحتاج لمزيد من الديمقراطية –لكن حتي الديمقراطية الكانت موجودة ما كانت ممكن تسبب الدمار البتسوي فيهو حكومة ديكتاتورية – ,,,,,,,,,,,,,,,, الحاجة التالتة : نحن -و اعني انت و انا و غيرنا الما شغالين بالسياسة كمهنة بنطالب السياسة بالاخلاق و دي في نظري صعبة – و شكلو نحن منطلقنا انساني ! و كلامي انا بقولو لانو اصلا حكاية الديمقراطية و الاخلاق ديل عندهم خصومة حتي في ارقي الديمقراطيات -! يعني الحكومة الامريكية ممكن تغش الشعب زي ما عملوا في حرب العراق --- و طبعا من حقنا نطالب السياسين بالاخلاق من منطلق انساني ! لكن برضو حقو نعرف ما هي طبيعة الاخلاق الممكن تْمارس بيها السياسة – و نادرا ما تلتزم السياسية او حتي الديمقراطية بالاخلاق – لكن البوزن المعادلة في تقديري هي المحاسبة و الخوف من الفشل في انتخابات قادمة ! و اعني اليات الديمقراطية هي البتحمي السياسة من الممارسة الغير اخلاقية و ليست الاخلاق نفسها --- تحياتي ---- و الله الزول كان داير يجي يهاتر معاكم (باعتبارو الزول عندو درجة استاذية) في حوش بكري لكن الله غالب شكلو بكري مزحوم بكثرة الطلبات ! ,,,,,,, بالمناسبة لو شايف الكلام دا ممكن يكون في بوستك بالجنبة ممكن تنزلوا بتصرف -- !!