|
|
 الأستاذ هاشم صديق: دحين يا وليد هو ديل ما لهم و مال الدين
|
الشكر للأخ عبد الرحمن محمد الحسن ود. ياسر الشريف ونجدا المبارك.
وقد شاهدتُ الشاعر على قناة النيل الأزرق وهو يلقي القصيدة، والحضور في حالة حضور، منهم من بكى ومنهم من كان يضحك. وكلٌ مُحق فيما يفعل فقد ضحكتُ وبكيتُ.
القصيدة:
قريب يا وليد
صيامنا يتم
و يهل و يشرق
هلال العيد
نحس طعم الخبيز
و يتبدل هدمنا
جديد..
صالح عام
هديمك يا وليد
مقدود
وصابحنا الفقر
و الجوع
صبح جلد البطن
مشدود
شن بتسو
و اخيك
من شهر مرفود
قالو .. صالح عام
عشان قال
العُوج في العود
|
|
 
|
|
|
|
|
|
|
|
Re: الأستاذ هاشم صديق: دحين يا وليد هو ديل ما لهم و مال الدين (Re: عبد الحي علي موسى)
|
أمس زازيت
اكوس الدين
مشيت لسمية
بت مامون
لقيت جابولها
تلفزيون
سمح بالحيل
تشوف الصورة
بى كم لون
وكت في نشرة
ألأخبار
ظهر مك البلد
يضحك
جضومو كبار
مزرر الكرش
بزرار
لا مهموم
لا مغموم
لا زعلان
و شيهو
يراري بالألوان..
وقّد في حشايا
تباق نار
طريت رفد
الوليد و الجوع
و سال
دمع الغبينة الحار
اريتك يا ملك
فد يوم
يخلى الجوع
عينيك ما تنوم
أريتك يا ملك
فد يوم
تحس بي غصة المظلوم
| |
|
|
|
|
|
|
|
|
|
Re: الأستاذ هاشم صديق: دحين يا وليد هو ديل ما لهم و مال الدين (Re: يوسف السماني يوسف)
|
تحياتي يوسف السماني يوسف
لكن والله عند سماعي له، خُفت عليه من هؤلاء الهلافيت.
لكن باقي لي هم الآن في رقبتهم.
دحين يا وليد
هو ديل ما لهم
و مال الدين
وكت قولهم
كلام الله
و فعالهم
ما فعال صالحين
كتير فيهم
عديل حقار
و بالقرآن
كمان تجار
و كضابين
أكان بنزين
عدم .. أو جاز
وتعبوُ الناس
و ضاقو خلاص
صفوف واقفين
يقولولك
_ إرادة الله
وكان عدم الرخيص
و الغالى
في التموين
يقولولك
ده . غضب الله
و كان الموية
صبحت طين
يقولولك
ده من امريكا
والعملا
حمونا الشب
ولاد الـ كـ لـ ب
عشان الشعب
يحرن تب
يقبّل
من صراط الدين
| |
|
|
|
|
|
|
|
|
|
Re: الأستاذ هاشم صديق: دحين يا وليد هو ديل ما لهم و مال الدين (Re: عبد الحي علي موسى)
|
نزيف الجوف
دحين يا وليد
أ كان حسع
ده ديش مصعب
و أكان بيرق
علي الكرار
منو الكفار ؟!!!
منو القاصدينو
بالتكبير
و بالتهليل
و ضرب النار؟!
اخاف نحنا
و أكان نحنا
أخير نضحك
كتير سبب
الضحك بخته
شوف المغسة
يا وليدي
ديل ما حسه
ناس حُقار؟
ده ذى دق الطبول
للموت
وذي وقد البلد
بالنار
إلا نشوف
أ كان ساهرين
معاك يا جوع
و أ كان ضيقنا
إتحفر في ضلوع
و أ كان صابرين
علي الفجار
وحاة الله
و كتاب الله
وكت نغلي
و نكوس التار
لا سوراَ
بقيف في وش
و لا لهب الغبن
بترش
و لا صفاَ
يميل بالقش
كل ظالماَ
يقع و يندش
و سيل دمع البلد
ينقش
لا بحبس حلقنا
الخوف
و لا بترجع
ا كان لعلع
كلاشينكوف
هديمك يا وليد
مقدود
و صابحنا الفقر
و الجوع
صبح جلد البطن
مشدود
شن بتسو
و أخيك
من شهر مرفود
قالو صالح عام
عشان قال
العوج في العود
نان ما يقول
أريت يقول
عديل يا زول
هديك
البغلة في الابريق
ما هامينا
-صالح عام-
وديش مصعب
و لا الحجاج
و لا بكتل
قلبنا الجوع
و موت منقذنا
ولا الضاج
خلي الضيق
يزيد يا وليد
بكرة الضيق
يخلى الناس
تبقى عُصّار
علي الحقار
و تبقي حريق
قريب يا وليد
صيامنا يتم
و يهل و يشرق
هلال العيد
نحس طعم الخبيز
و يتبدل هدمنا جديد
| |
|
|
|
|
|
|
| |
عبد الحي علي موسى
يوسف السماني يوسف
فايزودالقاضي
أبو الحسين
فيس بوك
تويتر
انستقرام
يوتيوب
بنتيريست