|
|
 ملوكية
|
صحيت الصباح , وانا مبسوطة انو انا داكة الدوام الليلة , بمزاج جبت حبيبة قلبى كباية الشاى ومعاها شابورة الرشاقة –فى رحلة رشاقة أن شاءالله ح تنتهى فى القبر ولاعزاء لأى أى زول أوفر ويت- خلال الحدث البهيج بتاع شراب الشاى دة , رصيت لى زى تلتمية مهمة منها ترتيب دولابى الـ كل ماافتح ابوابو تقع هدومى فى الارض وتتوسل , أشيل الريموت دة مرة فى حياتى براااى " بابا مابديك أىىىىىىىىىى فرصة معاهو لما يرجع وعليك التأقلم مع الـ بى بى سى -الشروق-الجزيرة-السودان وبالعكس ولو غيّر بجيب ليك الجزيرة الرياضية , فى غياب بابا , نشاهد براعم ونرقص مع زيد والعلوم زى العجب , وتتبسم مع أحمد وهيا ولا على مزاجك.
إذا ربنا رحمك, من بابا والشباب ديل , تجيك ماما تفتح ليك ساهور ولو بااااالغت النيل الأزرق, قلت بس خلاص الليلة يوم ندى "على وزن الليلة يوم الرجال"
وبعد ماانتهى من الإستمتاع بالريموت , أقوم اعمل لى برنامج تجميلى , لكن تأتى الرياح بسفن الخُدرة على صمة خشمك
سمعت صوت أمى وهى بتنادى : ياندى لو مشيتى جبتى لينا "خُدرة" فركناها والله يكون كويس , طوالى حسيت أنو أحلامى الفوق دى ح تنهار على الرغم من بساطتها .
فكرت بسرعة فى حلول, أتذكرت أنو الأخت الكبرى برة بيتها , أتصلت عليا بسرعة وبمنتهى التملق وكل لطف الدنيا على غير العادة " بالله يارشا مرى جيبى لينا معاك خُدرة " طوالى ردت : أيوا والله أحمد ذاتو قال عايز "خُدرة" وأحمد دة ياكرام يبلغ من العمر 4 سنوات وشوية مولود فى البلد دى , شاف السودان وهو عمرو سنتين , لكن يعشق اللغاويس بكل اشكالها (خُدرة مفروكة, بامية مفروكة, ملاح تقلية وقراصة" ومُصر أنو يشيل معاهو ملاح تقلية وقراصة المدرسة , فتأملوا (بتاعت ملاسى ديك)
بعد زمن سمعت تلفونى يرن , لقيت الأخت الكبرى على الطرف التانى :ة ياندى مافى خُدرة فى كارفور ودة ماموسمها "طبعا دى حسب إفادات المغربى مسئول الخُضار فى كارفور – طبعاً رشا وقفت حوالى العشرة دقايق عشان تفهم بقول ليا فى شنو و فى نهاية الأمر وصلت لأنو مافى ودة ماموسمها " دة طبعا بعد تخريجات من رشا لكلام المغربى (وكل واحد فيهم مُصر أنو بتكلم عربى أحسن من التانى!).
أمشى اى مكان تانى ! أمشى وين ياجماعة وكارفور دة لبن الطير فيو-
بدأت إقتراحات ماما, أمشى المدينة , لو مالقيتى أمشى جاينت , ولا أقول ليك أمشى التخفيضات راسك عديييييل , أجيب الراس العديل من وين بس؟!
أتوكلت وبديت رحلة البحث عن العزيزة , دخلت حوالى 4 سوبرماركتات "والله ماعرفت أجمعا ليكم كيف" وكنت أرجع خاسئة حسيرة , كل الموظفين والكاشيرات يردوا على بالنفى , والظريف فيهم يقول لى دة ما موسم "ملووكية" لكن ياشباب البقنع الأم منو؟! ونحن جايين من بلد "الملوكية" دى ممكن اى زول يزرعا فى بيتو, ممكن تجيبا من أى جزُر فى طرف الحِلة .
دخلت سوبر ماركت , مشيت جهة الخُضار , شفتا ليك ربطة خُدرة وحيييدة , والله فرحت فرح كأنى شفت الملاك, أشتريتها وجرى على الكاشير كأنو ح يجى زول يقلعا منى , لما دخلت البيت , وبفرح مديتا لأمى , قالت لى : هيا ياندى لكن دى صحن مابتسوويهو؟! أها ياأخوانا؟ الحل؟ قالت لى : من الأول قلت ليك أمشى التخفيضات, آآآخ , فكرت فى زحمة الشارع لكن مابيدى شىء, صليت العصر ومرقت , حاولت فى الطريق أطلع من موود "الخُدرة" دة شغلت مايكل بلوتون وسمعت miss you now –ضحت براااى وقلت مايكل دة برضو بتكون امو رسلتو ومالقى المرسال – دخلت التخفيضات , مكان الخُدرة خاااااااااالى, جمبها خُضار يشبهها شديد, ناديت الهندى : رفيق هادا ملوكية؟ لالا ماما هادا مافى ملوكية, ملوكية مافى؟ فى فى ماما, وقال لى تعالى معاى, ساقنى ليك مستودع الخضار , مجموعة من الهنود يقطعو ويرصو ويعبو , من تحت تربيزة كبيييرة مرق شوال , طلع لى منو ربطة كبيرة خُدرة , جرى على الكاشير عشان أصل البيت بسرعة , وانا جمب الكاشير لاقتنى زولة صاحبتنا ممكن عادى نسميها أم الكلام, سالتنى وحكيت ليا انا جيت لى شنو, وبرضو لاهماها شىء حكت لى عن كل شىء الجو, الأسعار, السودان, الدوامات وانا أتململ وأعاين لربطة الخدرة , فكتنى بعد ما قرربت أبكى .
وصلت البيت قريب العشا, وفرحانة أنى ح اضرب خُدرة بكسرة زى العجب, ماما أحبطتنى أيما إحباط , حسة مافى سكة فرك ياندى الدنيا ليلت , بكرة أن شاءالله.
|
|
 
|
|
|
|
|
| العنوان |
الكاتب |
Date |
| ملوكية | ندى عثمان حسن | 01-18-11, 08:52 AM |
 Re: ملوكية | omer osman | 01-18-11, 09:09 AM |
 Re: ملوكية | داليا الكباشى | 01-18-11, 09:46 AM |
 Re: ملوكية | ندى عثمان حسن | 01-18-11, 10:29 AM |
| Re: ملوكية | ندى عثمان حسن | 01-18-11, 09:48 AM |
| Re: ملوكية | هواري نمر | 01-18-11, 10:35 AM |
| Re: ملوكية | ندى عثمان حسن | 01-18-11, 11:39 AM |
| Re: ملوكية | محمد عبد الماجد الصايم | 01-18-11, 11:48 AM |
| Re: ملوكية | ندى عثمان حسن | 01-18-11, 12:07 PM |
| Re: ملوكية | إدريس محمد إبراهيم | 01-18-11, 12:30 PM |
| Re: ملوكية | ندى عثمان حسن | 01-19-11, 07:53 AM |
| Re: ملوكية | داليا الكباشى | 01-18-11, 12:38 PM |
| Re: ملوكية | محمد عبد الماجد الصايم | 01-18-11, 12:50 PM |
| Re: ملوكية | داليا الكباشى | 01-18-11, 12:51 PM |
| Re: ملوكية | داليا الكباشى | 01-18-11, 12:55 PM |
| Re: ملوكية | tmbis | 01-18-11, 12:56 PM |
| Re: ملوكية | فايزودالقاضي | 01-18-11, 01:14 PM |
| Re: ملوكية | ندى عثمان حسن | 01-19-11, 07:59 AM |
| Re: ملوكية | داليا الكباشى | 01-18-11, 01:19 PM |
| Re: ملوكية | محمد عبد الماجد الصايم | 01-18-11, 01:26 PM |
| Re: ملوكية | ABUHUSSEIN | 01-18-11, 01:45 PM |
| Re: ملوكية | محمد إبراهيم علي | 01-18-11, 01:31 PM |
| Re: ملوكية | داليا الكباشى | 01-18-11, 02:19 PM |
| Re: ملوكية | ABUHUSSEIN | 01-18-11, 03:42 PM |
| Re: ملوكية | محمد المرتضى حامد | 01-18-11, 05:56 PM |
| Re: ملوكية | Yassir Tayfour | 01-18-11, 06:17 PM |
| Re: ملوكية | الفاتح ميرغني | 01-18-11, 06:47 PM |
| Re: ملوكية | ندى عثمان حسن | 01-19-11, 08:23 AM |
| Re: ملوكية | محمد المرتضى حامد | 01-18-11, 06:50 PM |
| Re: ملوكية | ندى عثمان حسن | 01-19-11, 08:18 AM |
| Re: ملوكية | ندى عثمان حسن | 01-19-11, 08:04 AM |
| Re: ملوكية | ندى عثمان حسن | 01-19-11, 08:06 AM |
| Re: ملوكية | ندى عثمان حسن | 01-19-11, 08:10 AM |
| Re: ملوكية | ندى عثمان حسن | 01-19-11, 08:12 AM |
| Re: ملوكية | ندى عثمان حسن | 01-19-11, 08:15 AM |
|
| |
ندى عثمان حسن
فيس بوك
تويتر
انستقرام
يوتيوب
بنتيريست