|
|
 السياسة دي مُباصرة.. باصرونا ووحات الله مُباصرتنا هينة وساهلة....
|
الباب البجيب الريح
د.عادل الصادق المكي
الحَلَة بصَل.. و..السياسة مُباصرة
موضة رفع الأسعار..... من بتاع الأورنيش لحدي البنزين والسكر.. مروراً بالرغيف والبسكويت والزبادي والبستي كولا وضرتها الكوكا كولا... لحدي المشروبات التانية.... السكر دا ممكن الناس يباصروهو يعني البيشرب معلقتين يخليهن معلقة ونص وبعدين السكر الأبيض زاتو كعب ومضر...أما الحاجات البي يعلبوها دي.... يباصروها الناس البيصنعوها براااهم..... يعني الزبادي أبو جنيه.. يخلوهو في جنيهو دا...... لكن ينقصو العبوة...ينقص حجم الكويسات البيسوهن فيهو... طبعاً دا بعد ما يستأذنو من ناس المواصفات ويحدسوهم.... يفهموهم انو الشغلة دي حرصاً على نفسية المواطن السوداني القاعد يريد الزبادي...برضو ناس البستي والكوكا( بنات كولا)..وكل المشروبات.. بدل ما يزيدوها خمسين في المية قروش الينقصوها خمسين في المية موية أنا كمستهلك مطرطش أخير لي اشتري الشي ناقصة بنفس السعر من ادفع قروش زيادة.. ح انقنق وأقول( متين نقصتوها) ودي أخف علي من أقول ( لا حولاااااااا زيدتو سعرها دي كمان؟ يا أخوانا البلد دي ماشة لي وين؟) واقعد انقنق واطنطن فوق الحكومة وانضم في السياسة نضم اشتر ودُراب...ويدخل الحيكومة في ضفورا....وانتو عارفين يا ناس قزاز الحاجة الباردة ح تبيعو نفس الكمية الكنتو بتبيعوها قبال ما تزيدو السعر..كدي اسمعو نضمي وجربوهو..لكن إن سويتوهو من غير شورتي راسي عديل علي المحكمة.. ..وما يجيني زول يقول لي المواصفات دي عالمية....لانو نحن في الشرق والعالم بي حالو في الغرب...... الدولار ينقص في كل الدنيا علا عندنا نحن يطلع ويطلع ويطلع ويقول لنا بيت العجوز وين؟ ونحن نقول ليهو قدام..لحدي ما الضحك يشرطنا(بيت العجوز لعبة ذات كلكلة من الموروث وأطالب بتأصيلها) ... .. أيضاً كذلك إلى ما بعدو الضهب... ماشي وماشي وماشي......برضو ناس السجائر السجارة يقصروها شوية ويخلوها في سعرها... منها الناس البيتمبكو السجائر بيكونو مرتاحين نفسياً أنهم ما دفعو زيادة... وبعدين بكونو ساعدو في مكافحة التدخين تدريجياً.... لحدي ما تصل السجارة نفس واحد بس...( انتو قايلين شنو؟ وليّع السجارة وطفية السجارة نفسياً دا انطباع بداية ونهاية وبالتالي توهم الكيف فيما بينهما... لكن شرطن يطفيها و تكون السجارة في قعرا)...برضو البسكويت .. البسكويتاية الواحدة نقصو مساحتها ما تنقصو عدد البسكويت وهو مقصطر... وبنفس السعر.... لكن اوعكم تغشونا زي ناس الرغيف..... ديل نقصو عدد الرغيف ونقصو الوزن وزادو السعر....وبعدين البنزين يا ناس الحكومة رايكم شنو ؟سيبكم من لتر وجالون والنضم البي يخلع دا.. بيعوهو بالجُغمة وقولو قررنا أن تكون جُغمة البنزين بقرشين تاني يوم تلقو الخلق دي كلها مبسوطة وتضحك سنيّن سنيّن ويشكرو في الحيكومة وربنا يطوّل عمرها.. أو بالكوز.....أو بالكباية..... استفيدو من ناس المحروقات التانية(العرقي).....افو ديل يطلعو تفتيحة اكتر من الحيكومة؟. وبعدين الكرهبا ما تزيدوها نقصوها بدل 220 فولت كفانا عشرين فولت بس! وحات شيخي العشرين فولت دي تدور اجعص زول فينا ..أما الهدوم برانا قاعيدن ننقص فيها بنياتنا بقن أغلد واحدة فيهن نص متر يكسيها....يا ناس السياسية انتو قايلين شنو؟، عاينو جاي... السياسة دي مُباصرة.. باصرونا ووحات الله مُباصرتنا هينة وساهلة..... قفل الباب:-( ألاَ فَامْلَ لِي كَاسَاتِ خَمْـرٍ وَغَنِّنِـي- بِذِكْـرِ سُلَيْمَـى وَالرَّبَـابِ وَتَنَعُّـمِ- وَإيَّـاكَ ذِكْـرَ العَـامِـرِيَّـةِ إِنَّنِـي- أَغَـارُ عَلَيْـهَا مِـنْ فَـمِ المُتَكَلِّـمِ- أَغَـارُ عَلَـى أَعْطَافِهَـا مِنْ ثِيَابِهَـا- إذَا لَبَسَتْـهَا فَـوقَ جِسْـمٍ مَنَعَّـمِ- وَأَحْسُـدُ كَاسَـاتٍ تُقَبِّـلُ ثَغْرَهَـا- إِذَا وَضَعَتْهَا مَوْضِعَ اللَّثْـمِ فِي الفَـم- غايتو جنس كضب!!
http://www.altayarnews.net/showcoltxt.aspx?no=4218
|
|
  
|
|
|
|
|
|
|
|
Re: السياسة دي مُباصرة.. باصرونا ووحات الله مُباصرتنا هينة وساهلة.... (Re: سيف اليزل برعي البدوي)
|
Gbra
ساخر سبيل
(جغمسة وأخواتها)
بحلقة : هى النظر فى بلاهة وغباء وإندهاش كمن ينظر إلى بطاقات أسعار السلع فى ذلك المول الشهير.
برطمة : البرطمة هى التفوه بكلام غير مفهوم كذلك الذى يتفوه به الموظف عند إنتهاء مرتبه يوم خمسة فى الشهر.
بستفة : بستف فلان علاناً أى أفحمه وما خلى ليهو جهة يرقد عليها
بصبصة : البصبصة هى النظر إلى الشئ فى خفاء وهى عادة يمارسها الرجال المتزوجون.
بطبطة : هى حالة تصاحب عدم المقدرة بالوفاء بالإلتزام فى وقته وهى أقرب إلى الجقلبة سوى أن الأخيرة يصاحبها حراك وصراخ فى أغلب الأحوال.
بعزقة: تطلق حصرياً على المال دون سواه خاصة إذا كان مالاً عاماً، والبعزقة لغة هى إخراج المال وصرفه فى غير موضعه وفى أكثر من جهة
بلبصة : (أنظر دهنسة).
بشتنة : أنظر إلى النفايات فى الاسواق والشوارع وإنتا تعرف على طول.
تركشة : هى المواربة وتستخدم للباب دون سواه، يقال تركش معاك الباب أى اجعله موارباً، والتركشة تعنى أيضاً ذهاب العقل و(الجنترة) يقال إن فلاناً زول متركش أى مرشح لإحتلال إحدى الصوانى البقت مافى دى.
جرجرة : هى أن يفضى بك إجراء إلى إجراء آخر حتى تطلع روحك وهى عادة تستخدم عند متابعتك لإحدى المعاملات الحكومية.
جقلبة : أنظر بطبطة
حمبكة : هى فعل يستخدم عند عدم الرضاء بالنتائج على الرغم من صحتها يعنى (خرخرة) ساااكت.. !
حندكة : هى الفعل الذى يصاحب إظهار شئ (لذيذ) لحمة ضانى مثلاً - لشخص لا يستطيع إمتلاك مثله كناية على (تعذيبه) ..
خرمجة : هو الما مخرمج شنو؟ دى بالذات ما عايزة ليها شرح.
دبرسة : هى فعل يتناسب طردياً مع (الفلس) وخلو الجيوب من (الضحاكات) أى الدنانير
دربكة : يمكنك مشاهدة هذا الفعل (بدون ما نشرحو) عندما يصل مهاجمو فرقنا الكروية إلى منطقة جزاء الفريق الخصم.
دردرة : يمكنك معايشة هذا الفعل تماماً بالنظر إلى حال المغتربين بالخارج
سركنة : هى بذل المال بسخاء، وللموظفين حاسة سادسة فى معرفة الزول المتسركن من الزول (الجلدة).
دهنسة : أنظر بلبصة.
سلبطة : هى ادعاء الشخص إمتلاك شئ لا يخصه سلبطة ساااكت يعنى.
سلوحة : هى النحافة الشديدة يقال إن فلاناً مسلوح أى أنه يعانى نقصاً حاداً فى البروتين الحيوانى (ح يجيبو من وين يعنى؟) !
شحتفة : شحتفة الروح حالة كانت تصيب النساء دون الرجال (هسه ما عارف كيف؟) ويمكن أن تطلق على الشئ القليل الصغير كقول إحداهن: ده عشاء شنو المشحتف ده؟ العريس ده اصلو كان مغترب فى الشكينيبة؟
شربكة : تداخل الأشياء بعضها ببعض حتى تصعب إعادتها إلى حالها الأول (زى حالتنا دى).
شركنة: حالة يحس فيها القلب بالشك وعدم الإرتياح وتصور قدوم الأسوأ كالحالة التى أصابت المواطن بعد إعلان وزير المالية بأن (آخر الكي) لسه ما وصلنا ليهو !
شرمتة : شرمت الشئ أى قطع من أطرافه وأخذ منها وخريطة مشرمتة أى كالتى سوف تؤول إلينا بعد الإنفصال.
شفتنة: أنظر همبتة
شمشرة: التلصص لمعرفة اسرار وأخبار الآخرين وفاعلها يقال له (شمشار).
ضكرنة : يا حليلا .. (أمبارح مشيت الحلاق أحلق لقيت شاب طول فى عرض بشيلو ليهو فى حواجبينو !)
طربقة : الكلام الفاضي على أن يكون متواصلاً وبدون انقطاع ..
طرطشة: التهور وفقدان البوصلة وزول مطرطش أى زول غبيان ساااكت.
كما أن الطرطشة نوع من الطلاء الاسمنتى تطلى به جدران المنازل الخارجية لتبدو وجيهة أيام العمارات فى البلد كانت بالعدد .
عجرفة : تكبر وإستعلاء.
عصعصة : أنظر سلوحة.
عكلتة : الإلتصاق بالشئ على الرغم من عدم إستيفائك لشروط ذلك على الرغم من المحاولات المتعددة عشان يفكوهو منك (شوفوا عندنا كم زول عكليت) !
غطرسة : عجرفة لكن زائدة حبتين.
قرطعة : هى شرب الماء بسرعة (طبعن خوفاً من رؤية الطحالب) !
فرفشة : مرح وحبور كالذى شاهدناه يصيب النواب لحظة إجازة زيادة الأسعار.
فهلوة : شطاره إنتهازية والفهلوى هو ذلك الشخص الذى يستطيع بناء عمارتين على الرغم من إنو لسه ما إتثبت فى وظيفتو !
كبكبة : شوف حال المدير والموظفين عن مرفق معين عند زيارة السيد الوزير وإنتا تفهم إيه يعنى كبكبة !
كرمشة : تجعدات تصيب الجلد بفعل التقدم فى السن لا تظهر على رؤساء الأحزاب السياسية لدينا (تظهر كيف مع الراحات دى؟).
كشكرة : هى دعوة الشخص لآخرين لمشاركته شيئاً يخصه بينما يتمنى فى داخله ألا يحدث ذلك
كشكشة : لها عدة معانٍ كقولهم : بالله كشكش لينا الزول ده كان نطلع لينا منو بى قرش قرشين (أى حاولو لينا) ، كما تستخدم دلالة على ذهاب العقل فيقولون فلان (مكشكش) أى (أسلاكو ضاربة) كما أن الكشكشة هى وضع ترديف قماش (الفستان) فى شكل طبقات عند الخصر (لمن كان فى فساتين
كنكشة: هى التشبث الشديد بالشئ لفترة طويلة (أنا قلتا حاجة؟)
مزمزة: أكل (الأطايب) فى تأنٍ وهدوء وتلذذ.. (فى فول بيمزمزوهو؟)
همبتة: هى قطع الطريق ولكن بدون (إيصالات).
هترشة: انظر طربقة.
هنضبة: تحوير وتحويل لسانى للجملة الإنجليزيةHands-Up والتى ترجمتها (إيدينكم فوق) وكان إستخدامها يقتصر على أفلام الكاوبوى إذ كان البطل يهنضب (الخيانة) كما تهنضب الأسعار الآن المواطن !
كسرة :
معقولة؟ تصوروا نسيت أشرح كلمة جغمسة !
http://www.rayaam.info/Raay_view.aspx?pid=856&id=68798
| |
|
|
|
|
|
|
|
|
|
Re: السياسة دي مُباصرة.. باصرونا ووحات الله مُباصرتنا هينة وساهلة.... (Re: سيف اليزل برعي البدوي)
|
Quote: زول ما بيفكر في انو ثورة المعلومات والإنترنت الجاطت العالم حسي ما بتأثر في السياسة وخصوصاً سياسة الدول العاملة فيها لابدة مافي زول جايب خبرها ..أي زول زي دا يبقى زول غبيان وما عارف شي..الإنترنت بلاء وربنا طلقو فوق الناس.. قدر مافي شي مدسوسة مرقها علي السهلة وبقو الناس يشوفو فيها....حسي عاينو لي بن علي دا واهلو... يبرطعو سااااكت في تونس زي ما دايرين ..لما فيهم ويكيليكس.. ومرق النضم الداسنو وخايفين عليهو مرقو السهلة حتى أنا دا الما عندي شغلة بالسياسة عرفتو .. وعرفت هم كانو صايطين تونس كيفن ؟..ويكيليكس جاب الفضائح وأكل القروش وافتراء عائلة بن علي و نسابة بن علي...ويكيليكس..موقع اتبرع صاحبو بان قدر مافي فضيحة لحاكم أو نظام في العالم يمرقو على السهلة.. حتى أمريكا وفرنسا وإسرائيل وبريطانيا ..كل الدول الغاشانا دي وعاملة فيها ديمقراطية ودولة قانون طلع فيها بلاوي..لحدي ما قعدو يساككو في سيد الموقع من بلد لي بلد.... ناس كانو مبسوطين في أمان الله.. ينططو ويبرطعو زي ما دايرين ونحن نقعد نعاين لهم ومبسوطين منهم واتاريهم هم مسوين بلاوي وممسكننا ماسورة كبييييييرة.... بن علي مسيكين ضيعوهو الناس الجنبو.. والحوليهو..########و الموقع الفتاّن القوّال دا ( ويكيليكس).... قالو( الله يكفينا شر قالو و قلنا)...قالو مرت بن علي .... لافحة طرحتا فوق راسا وحايمة... البيت اليعجبها تقول علا تشتريهو لازمن يبيعوهو ليها وإلا الله قال بي قول سيدو.. الواطة اللت الحكومة تكضب على الحكومة وتقول دايرة تسويها مدرسة.... تشيلها وتمشي تبيعها تاني.... أخوانا شغالاين زي قراصنة الصومال ... رابطين في البحر ويقلعو في مراكب ويخوت الناس ..وآخر يخت قلعوهو يخت حق رجل أعمال فرنسي..... ويدخلو البنوك ويخومو في القروض... ويقول ليهم لو شوفتو القروش تشوفو قعر اضناكم... اها برضو سهى عرفات مرت ياسر عرفات... اتكتلن هي ومرت بن علي ليلى.. والسبب مدرسة خاصة للأغنياء... قومي يا سهى اشتكي للقذافي وقوم يا القذافي (منعامنو قومابي )ارفع تلفونك ونهزر ولوم بن علي .. المرا ضيفة عندكم وراجلا ميت وبتربي في بنية يتيمة... مرتك تسوي معاها كدي... بن علي كية للقذافي شيل الجنسية من سهى واقلع باقي قريشاتا ( اتنين ونص مليون يورو)... وفكاها عكس الهواء هي وبنيتها زهوة.... لكن سهى دي جابت القروش الهانقدُر ديل من وين؟......تكون يا ربي فاتحة محل اتصالات واسكراتشات في تونس؟.. غايتو الدنيا دي فيها نسوان شديدات جنس شدة..بري منهن...!.... غايتو موقع ويكيليكس دا الله يقهرو مننا... حولينا وما علينا....!!!! قفل الباب:-( إذا حججتَ بمالٍ أصلهُ دنس- فما حججتَ ولكنْ حَجَّتِ العِيرُ- لا يقبلُ الله إلاّ كلَّ طَيِّبَة ٍ- ما كلُّ مَنْ حَجَّ بيتَ الله مَبْرُورُ)
|
http://www.altayarnews.net/showcoltxt.aspx?no=4231
| |
|
|
|
|
|
|
| |
سيف اليزل برعي البدوي
سجيمان
فيس بوك
تويتر
انستقرام
يوتيوب
بنتيريست