|
|
|
 Re: عن تجربه : كان تمشو بكرعينكم ما تركبو Sun Air !! (Re: أمين محمد سليمان)
|
و لما كنت لا أدري كم من الزمن سيستغرقني ما جئت من أجله لقاهرة حمور المستلب و لاسباب أخري : فضلت أن اشتري تذكرة القاهره الخرطوم منفصله من القاهره :
و لما كنت (غشيما) استمعت لنصيحة حمور بالحجز علي خطوط طيران سودانيه - لم أسمع بها من قبل - اسمها Sun Air :
- طياراتهم جديده و بسافرو في مواعيدهم و رخيصه !!
كانت كلمة (رخيصه ) هي كل ما شد انتباهي من جملة حمور الوهميه أعلاه و إن تظاهرت بغير ذلك :
- السعر ما مشكله بس يكونو بقومو في مواعيدهم !!
كان هذا ردي لحمور المستلب و أنا مركب مكنة أمين النفيدي !!!
| |
  
|
|
|
|
|
|
|
|
Re: عن تجربه : كان تمشو بكرعينكم ما تركبو Sun Air !! (Re: أمين محمد سليمان)
|
أول مشوار الصباح لتاني يوم من وصولي لقاهرة حمور المستلب أي يوم الثلاثاء ٢٣/١١/٢٠١٠ : مشينا مكتب Sun Air في وسط البلد و هو مكتب انيق و جميل و العاملين فيهو في منتهي الأدب و حسن التعامل : دفعت مبلغ ١٥٨٠ جنيه مصري مقابل تذكره ذهاب و عوده رقم ٤٢٠٠٠٥٦٢٥٢ المتجهه للخرطوم الساعه الرابعه و النصف من مساء الثلاثاء ٣٠/١١/٢٠١٠ :
دفعت المبلغ مقابل التذكره و مقابل ( طياراتهم الجديده و البسافرو فيها في مواعيدها و الرخيصه ) أو كما قال حمور !!!
---------
يا جادات ياخي في أي إحتمال إنو حمور يكون غواصه ل Sun Air ؟!!
| |
|
|
|
|
|
|
|
|
|
Re: عن تجربه : كان تمشو بكرعينكم ما تركبو Sun Air !! (Re: أمين محمد سليمان)
|
يوم السفر : توجهنا للمطار و حقيقي ما عارف منو فينا الكان مبسوط أكتر أنا ولا حمور ؟
المهم الاتنيين كنا مبسوطين من إنو أنا متخارج !!
دخلنا المطار و عاينت في الشاشه : الطياره في مواعيدها و في كاونتر G1 لو لم تخني الذاكره ، و لما كان الوقت مبكرا جدا - قبل القيام بثلاثه ساعات - لم اهتم بعدم وجود أحد من السودان الشقيق باعتبار إننا بنجي علي راحتنا !!
********
الساعه اتنين و الطياره باقي ليها ساعتين و نص و الميزان ما فتح و الأشقاء السودانيين ما وصلو و أنا بتونس مع حمور !!
********
الساعه اتنين و نص و الطياره باقي ليها ساعتين و الميزان ما فتح و الأشقاء السودانيين ما وصلو و أنا لسه بتونس مع حمور !!
********
الساعه تلاته إلا ربع :
مشيت لعسكري واقف في مدخل الميزان :
- سلام عليكم
- عليكم السلام
- لو سمحت بسال من مواعيد فتح الميزان لصن أير الماشه الخرطوم
- لسه ما فتحتش
- ياخي كيف (لسه ما فتحتش ) و الطياره باقي ليها أقل من ساعتين ؟
- .............
رجعت قعدت مع حمور و بي من القلق الكثير
| |
|
|
|
|
|
|
|
|
|
Re: عن تجربه : كان تمشو بكرعينكم ما تركبو Sun Air !! (Re: أمين محمد سليمان)
|
قبل ما أقلق زياده : شاب سوداني شايل ليه شنطه هاند باك :
- سلام عليكم
- عليكم السلام
- انتو قايمين ب صن اير ؟
- أيوه
- والله شايف كاتبين السفريه cancelled في الشاشه !!
- cancelled كيف يعني ؟
- والله ما عارف لكن ده المكتوب في الشاشه
توجهت للشاشه القريبه و فعلا كان مكتوب إنو السفريه cancelled !!!
| |
|
|
|
|
|
|
|
|
|
Re: عن تجربه : كان تمشو بكرعينكم ما تركبو Sun Air !! (Re: أمين محمد سليمان)
|
مشيت لنفس العسكري السالتو سابقا و بدون سلام :
- صن أير الماشه الخرطوم مكتوب عليها cancelled !!
اكتفي العسكري بنظره مكتوب فيها : So What
- cancelled يعني شنو ؟
- يعني السفريه مكنسله
- مكنسله دي يعني الطياره متاخره ولا ما قايمه كلو كلو ؟
- لا : معناتها مافيش طيران النهارده ، بس ممكن تستفسر منهم ..
العسكري وصف لي مكتبهم أو ما ظن إنو مكتبهم :
مشيت الطابق الأول و هو عباره عن ممر خشبي صغير أشبه بممرات القطارات ، مكاتب صغيره بيافطات كبيره عليها أسماء كل شركات الطيران عدا هذه ال Sun Air !!
اضطريت الرجوع و المشي في هذا الممر متمهلا ، لعل (البل ) حجب بصري عن مكتبهم و لكن خاب ظني !!
الممر ينتهي بمكتب يتبع شرطة المطار ، سالت العسكري الواقف علي الباب :
- لو سمحت بسال عن مكتب شركة صن أير : بدون أن يرد دخل العسكري المكتب و جاءني بوصف لمكان أخر في الطابق الرابع من الجهه الأخري للصاله و معها نصيحه : لو معرفتش اسال من مكتب التصاريح : هم جمبوه علي طول !!!
لم احتاج أن أسال فالوصف كان دقيقا : و مره أخري كميه من المكاتب لشركات الطيران ليس من بينها صن أير !!
| |
|
|
|
|
|
|
|
|
|
Re: عن تجربه : كان تمشو بكرعينكم ما تركبو Sun Air !! (Re: أمين محمد سليمان)
|
حمور إقترح الأتصال برقم تلفونهم الموجود بظرف التذكره : اتصلت بالرقم و دار الحوار التالي :
- أنا إسمي أمين محمد سليمان و عندي تذكره رقم ٤٢٠٠٠٥٦٢٥٢ والمتجهه اليوم للخرطوم ، جيت المطار و فوجئت إنو السفريه ملغيه .
-نحن ما عندناش سفريه النهارده
- كيف ما عندكم سفريه ؟ أهو دي تذكرتي في يدي و الحجز مؤكد
- اديني رقم التذكره لو سمحت
مليتها رقم التذكره
- دئيئه لو سمحت
-..............
- إسم حضرتك إيه لو سمحت ؟
- أمين محمد سليمان
- التذكره دي باسم أحمد طارئ !!!
- أحمد طارق شنو ياخي ؟ التذكره دي باسمي أنا و أهو دي قاعده في يدي !!
- في رقم مكتوب عليه Locator number ، كام الرقم ده ؟
- 005b84
غابت شويه و جات راجعه :
- اه لقيت حضرتك : بس نحن اتصلنا بالمسافرين و كلمناهم إنو السفريه ملغيه
- أنا مافي أي زول إتصل بي و تلفوني فاتح كل الوقت ، بعدين مافي حاجه اسمها السفريه إتلغت : لو في أي مشكله في الطياره مفروض تجيبو واحده تانيه : دي مسؤليتكم انتو !!!
ولاني أعلم إنها موظفه مسكينه لا حا تحل و لا تربط : شكرتها و قفلت السماعه .
سمعت حمور عدد لا بس به من الكلمات الفارغه .
ركبنا تاكسي لوسط البلد عشان أشوف حل للبل ده لانو لازم أكون في السودان يوم ١٢/١/٢٠١٠ !!
| |
|
|
|
|
|
|
|
|
|
Re: عن تجربه : كان تمشو بكرعينكم ما تركبو Sun Air !! (Re: smart_ana2001)
|
| Quote: ركبنا تاكسي لوسط البلد عشان أشوف حل للبل ده لانو لازم أكون في السودان يوم ١٢/١/٢٠١٠ !! |
يوم 12 شهر واحد سنة 2010 .؟؟؟يا دكتور انت محتاج جهاز سفر عبر الزمن .
____________________________________
بطل حركات الامركان و اكتب اليوم بعدين الشهر....
معليش يا دكتور ...زهجتك زياده على زهجتك من سن اير...اوعدك ما افتح خشمى فى بوستك ده لحدى ما تخلص...
| |
|
|
|
|
|
|
|
|
|
Re: عن تجربه : كان تمشو بكرعينكم ما تركبو Sun Air !! (Re: smart_ana2001)
|
عيب لي الإثيوبية !
بها ما يذهب الحزن، ويساعد مفكر كبير زيك علي التفكير . .
لعلك بعد ركوبها تدعم سعينا الحثيث لوحدة إندماجية مع الأحباش بعد إنفصال الجنوب . .
__________________________________
ياخ إنت معانا في أمريكا، ما تجدع تلفونك في المسنجر نتعرف عليك . .
وبالمرة نناقش القضايا ذات الإهتمام المشترك وسبل دعمها وتطويرها . .
*عزان سعيد - دفعة أمجد حمور في طب الخرطوم- أرجو أن تكون خاله هو الآخر، الراجل يستاهل
| |
|
|
|
|
|
|
|
|
|
Re: عن تجربه : كان تمشو بكرعينكم ما تركبو Sun Air !! (Re: smart_ana2001)
|
مشينا مكتب الشركه و طلبت مقابلة المدير و كان معاهو ناس من البوليس لانو فاتحين فيهو بلاغ  :
نزلت تحت لاسترداد القروش عشان أشوف لي تذكره من شركه محترمه توصلني أهلي !! و الحقيقه الموظفين كانو في منتهي الأدب و التفهم : المشكله إنو ( منتهي الأدب و التفهم ) ما بوصلوني أهلي ....
الساعه بقت اربعه ونص و الوقت اتاخر و كان لا بد من الذهاب لشراء تذكره تانيه علي أمل السفر في نفس اليوم :
مشينا الخطوط المصريه و لقيت تذكره علي سفريه في ساعات الصباح الأولي لكن بسعر خرافي لانها بعد ساعات ، و لقيت حجز في سفريه أخري الساعه تمانيه و تلت صباحا تاني يوم بسعر أقل خرافيه : نزلت مكنة أمين النفيدي الكنت مركبها و حجزت في سفرية تاني يوم و اللي البل حقها داير ليه بوست براه لكنه قطعا قطعا ما قريب لبل Sun Air
رجعت البيت و كتبت شكوي مدعمه بما يثبت و فيها كمية الخساير الماديه و المعنويه من جراء عدم مسؤلية هذه الشركه و مفروض حمور يكون سلمها ليهم امبارح !
| |
|
|
|
|
|
|
|
|
|
Re: عن تجربه : كان تمشو بكرعينكم ما تركبو Sun Air !! (Re: أمين محمد سليمان)
|
أنا متاكد تماما إنو في ناس حصلت ليهم حصايل مع شركات الطيران المختلفه لكن زول بسال من حقو مافي : ثقافة إقتلاع حقك المستلب ظلما و بهتانا دي ما عندنا و لو كل زول وقف لحقوقو الف أحمر ما في زول بقلع حقنا و المشاكل دي ما بتتكرر .
أنا في إنتظار نتيجة شكوتي و إسترجاع حقوقي الضايعه علي داير مليم و إلا اللجؤ للقانون ، و already عملت مواعيد في القنصليه الأمريكيه في القاهره بعد اسبوعين عشان أشوف نوعية المساعده الممكن يقدموها لي شنو : و لو أخسر عشره أضعاف ما خسرته جراء عدم مسؤلية Sun Air ما عندي مانع : لكن حقي ما بخليه للناس دي !!!
| |
|
|
|
|
|
|
|
|
|
Re: عن تجربه : كان تمشو بكرعينكم ما تركبو Sun Air !! (Re: أمين محمد سليمان)
|
شركات الطيران السودانية المحظورة أوروبيا لأسباب تتعلق بالسلامة:
SUDAN AIRWAYS
SUN AIR COMPANY
MARSLAND COMPANY
ATTICO AIRLINES
FOURTY EIGHT AVIATION
SUDANESE STATES AVIATION COMPANY
ALMAJARA AVIATION
BADER AIRLINES
ALFA AIRLINES
AZZA TRANSPORT COMPANY
GREEN FLAG AVIATION
ALMAJAL AVIATION SERVICE
NOVA AIRLINES
TARCO AIRLINES
| |
|
|
|
|
|
|
|
|
|
Re: عن تجربه : كان تمشو بكرعينكم ما تركبو Sun Air !! (Re: Nazar Faisal)
|
قبل يومين فكرت افتح بوست عن ناس الحج و صن اير.
عندنا جماعة حجوا من نيالا مباشرة الى جدة على طائرة صن اير.
بعد الحج (19/11) ذهبوا الى المدينة حسب البرنامج الموضوع على ان يسافروا مباشرة
من المدينة الى نيالا.
السفر قرر يوم 24/11
طبعا الطيارة لم تصل. ولم تصل حتى اللحظة.
الفندق طلب منهم مغادرة الغرف لان الايجار انتهى. من هنا و من هناك استطاعت البعثة بعد جهد
تجديد الاقامة.
يوميا يقال للحجاج السفر المساء وعندما يقترب المساء يعدل الموعد الى اليوم التالي.
صن اير اختفت تماما. و الناس دافعة تذاكر العودة. والحجاج مصاريفهم انتهت و بدأ البعض
يبيع الهدايا عشان ياكل و يشرب.
المؤسف ان الكثير من الحجاج افادوا اهاليهم في نيالا بمواعيد وصولهم. الناس اشترت الخرفان
و جرت المطار .... اصبحت الخراف عبء اضافي في البيت. خليك من مساككة الطيارة لان معظم الحجاج
ليس لديهم ثمن شريحة او قيمة اتصالات. الكثير من المعارف بتصلوا بالمقيمين ليعرفوا الحاصل. و الماعندو
قريب في السعودية كل يوم يجري المطار و يرجع بالونسة.
المهم بعد اتصالات و اجتهادات فردية من اخوة افاضل بالخليج تم الاتفاق مع الوالي ان يدبر امرهم.
تم نقل مجموعة اولى منهم من المدينة بالبص الى جدة ومنهاالى الخرطوم يوم الثلاثاء 30 نوفمبر
ومنذ يوم الثلاثاء لا زال ركاب صن اير بالخرطوم (صباح اليوم سمعت انه ربما يسافروا غدا السبت)
حقا:
عن تجربه : كان تمشو بكرعينكم ما تركبو Sun Air !!
تحياتي
| |
|
|
|
|
|
|
|
|
|
Re: عن تجربه : كان تمشو بكرعينكم ما تركبو Sun Air !! (Re: Zoal Wahid)
|
الدكتور الأديب الأريب الما بعرف إختار شركة الطيران المناسبة لسفره رغم أنه متأمرك
أولا البوديك لقاهرة حمور المستلب شنو ؟
لكنها الريدة ... إنت حقو تدفع لصن أير لأنها وفرت لك المزيد من الوقت للاستماع لدرر حمور
ثانيا بخصوص صن إير
قبل فترة كان عندي ابن عمي توفي والده وعايز يسافر السودان
بحثنا عن تذكرة في سودانير أو الخطوط السعودية ولم نجدها
أخيرا وجدنا تذكرة في صن إير دي (وكنت أسمع بها لأول مرة )
ودفعنا في التذكرة 3 أضعاف قيمة التذكرة العادية لأنها كانت الأقرب ودرجة أولى
وعند السابعة صباحا فتح الميزان وأدخلنا ابن عمنا وودعناه وعدنا للمنزل
تصور الطيارة لم تقلع إلا في السادسة مساء من ذلك اليوم .
بالله أعمل توكيل لحمور باستلام التعويض بعد كسبك للقضية ضد صن إير
فهو يستحق ذلك التعويض لأنه صاحب الفكرة .
| |
|
|
|
|
|
|
|
|
|
Re: عن تجربه : كان تمشو بكرعينكم ما تركبو Sun Air !! (Re: جعفر محي الدين)
|
أمين ....
| Quote: أنا متاكد تماما إنو في ناس حصلت ليهم حصايل مع شركات الطيران المختلفه لكن زول بسال من حقو مافي |
مين قالك ؟!
الناس ديل اتسببو لي في أضرار مالية جسيمة بسبب تأخيري تلاتاة أيام من السفر للقاهرة من الخرطوم ..
سلمتهم إنذار قانوني بطلب التعويض مدعم بما يثبت ..
وأنا في إنتظار ردهم من مستشارم القانوني ..
لو أي زول رصع الشركات الزي دي بي قضية كانوا بيستعدلوا كويس ..
| |
|
|
|
|
|
|
|
|
 Re: عن تجربه : كان تمشو بكرعينكم ما تركبو Sun Air !! (Re: أمين محمد سليمان)
|
Quote: كانت كلمة (رخيصه ) هي كل ما شد انتباهي من جملة حمور الوهميه أعلاه و إن تظاهرت بغير ذلك :
- السعر ما مشكله بس يكونو بقومو في مواعيدهم !!
كان هذا ردي لحمور المستلب و أنا مركب مكنة أمين النفيدي !!!
|
| Quote: نزلت مكنة أمين النفيدي الكنت مركبها |
أحراك كت قايلا تايوانيي؟!!!
__
مشتاقين يا دوك..
| |
|
|
|
|
|
|
|
|
|
Re: عن تجربه : كان تمشو بكرعينكم ما تركبو Sun Air !! (Re: أمين محمد سليمان)
|
عزان يا حبيبنا ، سلام Quote: عيب لي الإثيوبية !
بها ما يذهب الحزن، ويساعد مفكر كبير زيك علي التفكير . .
لعلك بعد ركوبها تدعم سعينا الحثيث لوحدة إندماجية مع الأحباش بعد إنفصال الجنوب . .
__________________________________
ياخ إنت معانا في أمريكا، ما تجدع تلفونك في المسنجر نتعرف عليك . .
وبالمرة نناقش القضايا ذات الإهتمام المشترك وسبل دعمها وتطويرها . .
|
نحن الحزن الفينا ده كان سربنا أثيوبيا بمسامتنا ما بمرق !!
كسودانيين : موعودين بالبل حيث ما كنا و أين ما كنا و زي ما قال الشاعر :
و من كتبت عليه (بلة ) إتبلاها !!
برسل ليك تلفوني لمن أرجع أمريكا الشقيقه إن شاء الله .
| Quote: *عزان سعيد - دفعة أمجد حمور في طب الخرطوم- أرجو أن تكون خاله هو الآخر، الراجل يستاهل |
أمجد ده يكون ود عم المستلب حمور :
أنا بكل أسف خال اسوا ما أنتج ال حمور من بشر !!!
| |
|
|
|
|
|
|
|
|
|
Re: عن تجربه : كان تمشو بكرعينكم ما تركبو Sun Air !! (Re: أمين محمد سليمان)
|
سلام يا نزارQuote: شركات الطيران السودانية المحظورة أوروبيا لأسباب تتعلق بالسلامة:
SUDAN AIRWAYS
SUN AIR COMPANY
MARSLAND COMPANY
ATTICO AIRLINES
FOURTY EIGHT AVIATION
SUDANESE STATES AVIATION COMPANY
ALMAJARA AVIATION
BADER AIRLINES
ALFA AIRLINES
AZZA TRANSPORT COMPANY
GREEN FLAG AVIATION
ALMAJAL AVIATION SERVICE
NOVA AIRLINES
TARCO AIRLINES |
طيب ياخي إذا كانت دي شركات الطيران المحظوره : الما محظور منو ؟!
يا أخوانا في زول عندو أي فكره Sun Air دي حقت منو ؟!!
| |
|
|
|
|
|
|
|
|
|
Re: عن تجربه : كان تمشو بكرعينكم ما تركبو Sun Air !! (Re: أمين محمد سليمان)
|
يا سعادتك Quote: أيامي في أبوظبي ..... سودانير وفي وقفة عيد .....
قامت قبل مواعيده بي ساعتين أقل حاجة .....
الدنيا موسم وعاوزين يقلبوا سريع ... النتيجة ناس كتااار فاتتهم الطيارة والعيد في السودان |
ياخي والله جنس ده يطرشنا بيه !!!
حسي لو كنتو إشتكيتو و وقفتو لحقكم ما كان أنا إتبليت بعد سنين عددا !!!
استخفاف شركات الطيران في بلادنا نابع من هواننا عليهم !!
| |
|
|
|
|
|
|
|
|
|
Re: عن تجربه : كان تمشو بكرعينكم ما تركبو Sun Air !! (Re: أمين محمد سليمان)
|
زول واحد يا حبيبنا ، سلام Quote: عندنا جماعة حجوا من نيالا مباشرة الى جدة على طائرة صن اير.
بعد الحج (19/11) ذهبوا الى المدينة حسب البرنامج الموضوع على ان يسافروا مباشرة
من المدينة الى نيالا.
السفر قرر يوم 24/11
طبعا الطيارة لم تصل. ولم تصل حتى اللحظة.
|
أقول ليك بصراحه والله : الناس ديل لو خليتوهم بتكونو مشاركين في جرمهم ده !!
الشركات دي ما بتعمل إعتبار للناس دي لانهم عارفنهم ما حا يعملو حاجه في النهايه و انهم بياخدو المواضيع الزي دي كجزء من كوتة البل البتتبلاها البني أدم كسوداني !!
لازم الناس دي لمن تجي راجعه يسعو لاخذ تعويض عن ما لحق بهم من اضرار ، عدم إحترام ادميتنا كبشر من Sun Air و باقي شركات الطيران ده لازم ينتهي !!
| |
|
|
|
|
|
|
|
|
|
Re: عن تجربه : كان تمشو بكرعينكم ما تركبو Sun Air !! (Re: أمين محمد سليمان)
|
يا خال حمور العزيز
أنا قبالك بيومين و بالمصرية ..
وصلت المطار قبال الإقلاع بـ 3 ساعات و نص ..
قاعد في أمانة الله مستني الإقلاع ..
قوموا يا ناس المطار أذيعوا بوضوح عن تأخير السفرية لمدة ساعة ..
كرروها بالعربي و الإنجليزي .. ذكروا رقم الرحلة و الجهة و ميعاد القيام القديم
يعني مافي شك كلوا كلوا ..
المهم قبال نص ساعه من موعد الإقلاع الأصلي (ساعه و نص من موعد الإقلاع الجديد) ..
ساي كده قلت أخلي الكافتريا اللي أنا فيها و أمشي الـ Gate ..
من ماوصلت و أولاد بمبة يستعجلوا فيني ..
أتاريها الطياره قايمة في ميعادها !!!
و عاملين رايحين من موضوع التأخير المذاع
غايتو أول ما قعدت كده الطيارة قامت
| |
|
|
|
|
|
|
|
|
|
Re: عن تجربه : كان تمشو بكرعينكم ما تركبو Sun Air !! (Re: ياسر احمد محمود)
|
Quote: بسببكم يا ناس Sun Air فضل أمين في رقبتي 24 ساعة اضافية .. ده غير انو اضطريت امرق في شبورة الصباح البارده ديك و مسكني التهاب.
حسابكم طويل و عسير معاي. |
أول حاجه هي سويعات ما اربعه و عشرين ساعه : أنا رجعت نمت و أنت طلعت لاصحابك المصريين مواصلا إستلابك :
إنت بتكون واجعاك ٨٠ جنيهك الدفعتهم لبتاع التكسي لمن رجعنا المطار !!
| |
|
|
|
|
|
|
|
|
|
Re: عن تجربه : كان تمشو بكرعينكم ما تركبو Sun Air !! (Re: أمين محمد سليمان)
|
Quote:
SUDAN AIRWAYS
SUN AIR COMPANY
MARSLAND COMPANY
ATTICO AIRLINES
FOURTY EIGHT AVIATION
SUDANESE STATES AVIATION COMPANY
ALMAJARA AVIATION
BADER AIRLINES
ALFA AIRLINES
AZZA TRANSPORT COMPANY
GREEN FLAG AVIATION
ALMAJAL AVIATION SERVICE
NOVA AIRLINES
TARCO AIRLINES |
بالله يا أخوان هو في شركات طيران بالعدد دا كله في السودان ؟؟؟؟؟
يعني دي شركات بدون طيارات ولا شنو ؟
أحمد الشايقي
| |
|
|
|
|
|
|
|
|
|
Re: عن تجربه : كان تمشو بكرعينكم ما تركبو Sun Air !! (Re: ابراهيم عدلان)
|
تجربة مشابهة حصلت لي في مطار شيبول أمستردام في إنتظار طائرة ال KLM المتجهة لأوسلو
جاتنا موظفةمن الشركه إعتذرت لينا بأن وشرحت لينا بأنه لأسباب خارجة عن إرادتهم إضطروا لدمج رحلتين وفي مجموعة من الركاب حيسافروا بعد 6 ساعات وكنت من ضمن المتأخرين
المهم بعد الإعتذار سلمت كل زول ظرف غليد في إيدو
لقيت في الظرف 1)كرت لدخول صالة رجال الأعمال والتمتع بكل الخدمات من مأكل ومشرب وإنترنيت ومقاعد وثيرة. 2) كرت تلفون للإتصال خارج هولنده 3)بوردنغ كارد علي الدرجة الأولي
4)خصم 40% علي تذكرة سفر قادمة علي KLM
| |
|
|
|
|
|
|
|
|
|
Re: عن تجربه : كان تمشو بكرعينكم ما تركبو Sun Air !! (Re: حبيب نورة)
|
رفض (156) من حجاج جنوب دارفور الهبوط من طائرة بوينج (737) التابعة لشركة صن إير بمطار الخرطوم أمس،
وأُبلغ الحجاج من مطار المدينة المنورة أن وجهتهم ستكون مدينة نيالا، ونقلت إليهم المضيفة بعد ثلاث ساعات
من الطيران بربط الأحزمة استعداداً للهبوط بمطار نيالا ليتبيّن لهم بعدها أنهم وصلوا مطار الخرطوم.
وقضى الحجاج، وبينهم مرضى ومصابون قرابة الخمس ساعات داخل الطائرة بدأت في الرابعة من
صباح أمس مصرين على استئناف الرحلة إلى نيالا؛ وسط دعوات من طاقم الطائرة بالنزول على أن تقلهم
طائرة أخرى، في وقت لم تتدخل فيه سلطات مطار الخرطوم، وفى مطار نيالا ثارت احتجاجات حادة بين حجاج
رحلات مختلفة نفذتها (صن إير) من الأراضي المقدسة ومطاري بورتسودان والخرطوم بسبب عدم التزام الشركة
بتعهداتها بشأن تسليم أمتعة الحجاج في المطار، في وقت تخلفت فيه معظم الأمتعة دون توضيحات من الشركة.
ولا يزال مئات الحجاج عالقين بالمدينة المنورة جراء فشل الشركة في نقلهم فيما تطالبهم الفنادق بالإخلاء
الفوري وسط تهرّب مسؤولي بعثة الحج السودانية، واشتكى مسؤولو الطيران المدني السعودي من متاعب كثيرة
ناشئة عن عدم التزام الشركة بجداول رحلاتها ملوّحين بحرمان الشركة من ارتياد سائر مطارات المملكة.
المصدر
http://www.ajrasalhurriya.net/ar/news_view_15094.html
| |
|
|
|
|
|
|
|
|
|
Re: عن تجربه : كان تمشو بكرعينكم ما تركبو Sun Air !! (Re: Zoal Wahid)
|
حمد الله على السلامة يا امين
صن اير سمعت بها اول مرة فى رمضان الماضى ... جاء بها شقيقى الاكبر محمد للعمرة
وارهقته الشركة حد الارهاق ببدعة تأكيد الحجز (بالحضور شخصيا) قبل السفر بيوم وقبل الساعة 12 تحديدا
الى هنا يمكن ان تحتمل او تبتلع الامر ولكن حينما لا تخبرك الشركة اين يوجد هذا المكتب تحديدا فى جدة المدينة الكبيرة
يبدأ الناس فى سلسلة من المحاولات التلفونية غير المجدية والتى تنتهى بربما فى مركز النخيل او ربما فى مكتب سودانير او ربما فى المطار
هذا لمن يعرف جدة اما لم لا يعرفها فكان الله فى عونه ....
على اية حال وبعد محاولات دءوبة وبحث واتصالات شملت الاهل المعارف والاصدقاء تمكن اخى من معرفة موقع الكنز المخفى
ويقع هذا المكتب الصغير فى حى بعيد عن وسط المدينة ويتطلب الوصول اليه وصف دقيق لمنطقته بجوار دوار الجواد الابيض على ما اظن
وهناك فقط وبعد كل هذا العناء تم اعطاء اخى بوستر عليه عنوان المكتب والوصف الدقيق وارقام التلفونات التى يمكن تاكيد الحجز بالاتصال عليها !!!!
| |
|
|
|
|
|
|
|
|
|
Re: عن تجربه : كان تمشو بكرعينكم ما تركبو Sun Air !! (Re: Abobakr Shadad)
|
| Quote: في وقت لم تتدخل فيه سلطات مطار الخرطوم، |
عندما كنا على بوابات المغادرة تبين لنا أن الطائرة بها عطل .. وثار الجميع وكادوا يحطموا المطار . عندها جاء مدير صالة مطار الخرطوم وخطب في الناس المرهقين لمدة ثلاثة ايام متواصلة وقدم اعذارا غريبة .. حينها قلت له أنني صحفي وأريد تفاصيل .. فأخذ يشرح ويبرر .. بعدها أخرجت الكاميرا وبدأت في تصوير التجمهر الغاضب واخذ إفاداتهم بالفيدو لأتفاجأ بعدها بدخول أفراد من أمن المطار للصالة يتقدمهم مدير الصالة الذي أشار ناحيتي .. فطلبوا مني الذهاب معهم وأدخلوني في غرفة الأمن وهي غرفة زجاجية وقبل أن يتحدث أحد معي تجمهر الجمع الغاضب أمام الغرفة وطالبوا بإخراجي وإلا سيحطمون المطار عندها تراجع أفراد الامن وطلبوا مني أن أخرج فرفضت الخروج في أول الأمر ولكني تحت إلحاح الجمع الغاضب خرجت ..
بعدها تم تكوين لجنة من اربعة أشخاص للتحدث إلى المسئولين كنت انا أحد أعضاء هذه اللجنة .. أما أغرب شي يحدث هو أن مدير الطيران المدني أخذنا في سيارته ودخل بنا حتى وصلنا للطائرة الرابضة على ارض المطار وهناك قابلنا صاحب الشركة كابتن سيف مرزوق وأخذ يسوق لنا المبررات ويشرح لنا ما اصاب طائرته من عطب ..
بعدها أخبرته أنني لن أسافر على هذه الطائرة وأنني سأتقدم بشكوى ضده لأنني تضررت أشد الضرر ثم إلتفت ناحية مدير الطيران أو أيا كانت وظيفته وأخبرته انني سأقاضي الطيران المدني أيضا بتهمة التواطؤ مع صن أير بعدم إجبارهم حتى على ترحيل المسافرين لفندق أو ما شابه وبسبب أنهم سمحوا بفتح الميزان وإدخال المسافرين للبوابات دون أن يتأكدوا من سلامة الطائرة للملاحة ..
الان أنا في إنتظار رد الانذار القانوني الذي أرسلته لصن اير وبدأت مع المحامي في إجراءات أخذ إذن من النائب العام لقاضاة الطيران المدني ..
| |
|
|
|
|
|
|
|
|
|
Re: عن تجربه : كان تمشو بكرعينكم ما تركبو Sun Air !! (Re: ناذر محمد الخليفة)
|
سيد البوست وضيوفه سلامات ....
عندما قرات العنوان ... جئت مهرولاً مدافعاً عن طيراني المفضل صن آير ... فقد كنت وحتي دقائق مضت من اكثر المعجبين بهذه الشركة وانصح كل ما يريد ان يسافر الا يسافر الا بها ... فقد سافرت بها حوالي الست مرات قبل عام الي مدينة جوبا ... فكانت علي ما يرام من حيث الطائرات والمواعيد والخدمات .... ثم تواصلت رحلتي معها لجدة اواخر رمضان المنصرم .... بعد قراءة كلام امين وناذر وبقية الاخوة عرفت ان كل شئ في هذا البلد لا يمكن ان يستمر علي حال .... شركة الطيران مثل الكافتريات والمطاعم تبدا في جذب الزبائن بالخدمات والاسعار المناسبة ثم .... عينك ما تشوف الا النور .... حليلك يا صن اير الواحد كان قافل عليك .. الله في يدينا شركة جديدة نجك معاها جكتنا لغاية ما تلحق امات طه ... وبعدين نشوف البعدها ....
قال رخيصة وطياراتها جديدة ... ومواعيدها سمحة .... نفس الكلام البقول للناس بالحرف ... يعني في كم زول كده ركبتهم ماسورة ... غايتو يعفوا لي ساي ...
| |
|
|
|
|
|
|
|
|
|
Re: عن تجربه : كان تمشو بكرعينكم ما تركبو Sun Air !! (Re: زهير الزناتي)
|
تجربة الاخ زهير مع هذه الشركة هي ما سمعته من أكثر من شخص لذلك وقرت لها سمعه حسنة في نفسي حتى جاء حادث امين هذا.
فان تسافر في مواعيدك ليس انجازا بل هو الطبيعي .. لكن المحك هو كيف تتعامل مع مشاكلك.
فان تلغي فجأة سفرية يوم الثلاثاء و لا يكون بعدها سفرية الا يوم الجمعة هذه كارثة. فمن المفهوم ان يصيب الطائرة عطل مامفاجئ .. لكن من الواجب ان توفر الشركة فورا طائرة اخرى تحمل الركاب الذين دفعوا لها نقوداو رتبوا مواعيدهم عليها.
من الواجب ان تخطرك الشركة بوجود خلل في المواعيد و انت تختار ان تنتظر او تفر منهم.
من اللائق ان تقدم الشركة اعتذار عن التأخير او الارباك الذي يحدث لتغيير سفرك من طائرة الى اخرى.
اما اسلوب بص ود الفضل هذا فهو مهين و مسئ.
شخصيا سأحذر و اخوف كل من يحاول ان يركب صن اير من القاهرة بعد ان عرفت كيف يتعاملون.
| |
|
|
|
|
|
|
|
|
 Re: عن تجربه : كان تمشو بكرعينكم ما تركبو Sun Air !! (Re: ناذر محمد الخليفة)
|
** المسوؤليه القانونيه لشركات الطيران تجاه زبونها المسافر:-
** تنتهى علاقة المسافر بالمحطة المُغادر منها بمجرد حصوله على إذن السفر من كاونتر الشركه الناقله فى حالة حدوث إى تأخير لإى سبب من الإسباب تكون الشركه الناقله مسوؤله مسوؤلية مُباشره عن توفير سكنه ووجباته طوال فترة التأخير..
******************************************************************************
** أما الذى يحصل للراكب السودانى بتركه فى المطارات أو الطلب منه الذهاب لمنزله ومتابعة أمر رحلته بالتلفون فهذا لايحدث إلا من شركة ناقله سودانيه أو شركه تتعامل مع السودانيين بإعتبار أنهم لايعرفون حقوقهم ..
## نتيجة لعدم الإلتزام بالمواعيد تواجه مثل هذه الشركات مشاكل إداريه وغرامات من المطارات الخارجيه نتيجةً لذلك..
** يجب على المُسافر السودانى عدم ترك حقوقه ومطالبات الشركات الناقله بالتعويض الجابر للضرر حتى تلتزم هذه الشركات بمواعيدها وإحترامها لزمن الراكب ..
| |
|
|
|
|
|
|
|
|
|
Re: عن تجربه : كان تمشو بكرعينكم ما تركبو Sun Air !! (Re: عبدالكريم أحمد الامين)
|
استاذ أمين
تحمد ربك انو الطيارة ما وقعت بيكم ... شركة صن اير دي هي نفسها شركة ايرويست... وايرويست دي بلغ بيها الاهمال وعدم الأمانة انو شحنوا طائرة اليوشن 76 باكثر من حمولتها القانونية وضعوا حمولات زائدة في محل الوزن المخصص للوقود للحالات الطارئة والرحلة لاقرب مطار بديل .. النتيجة انو الطيارة قطعت جاز ... اكرر قطعت جاز ووقعت في منطقة الحاج يوسف او الشقلة لا اذكر بالضبط
اما عن محاباة الطيران المدني يكفي انو تعرف انو الطيران المدني منح ذات الشركة رخصة لانشاء مركز كبير بمطار الخرطوم لصيانة الطائرات .. يعني منحهم صلاحية ان يقولوا الطائرة دي صالحة او ما صالحة للطيران .. تخيل شركة تتلاعب بالوقود الضروري كيف تؤتمن على شهادة سلامة الطائرات وصلاحيتها للطيران
فتأمل او تألم
| |
|
|
|
|
|
|
|
|
|
Re: عن تجربه : كان تمشو بكرعينكم ما تركبو Sun Air !! (Re: عبدالكريم أحمد الامين)
|
يا حمور سلامات ... عرفت ان هذه الشركة تستاجر طائرات تركية بطاقمها ... وهي طائرات جديدة وحديثة ... كل المرات التي سافرت فيها لم تتاخر الطائرة دقيقة في الاقلاع او الهبوط .... تذكرتها لجوبا مساوية للشركات الاخري اما لجدة فقد كانت علي ما اذكر في حدود الاربعمائة وخمسين جنيه .... والخطوط الاخري لا تقل عن الستمائة وخمسين يعني بحوالي 70% من سعر اقل الخطوط الاخري عدا سيئة الذكر السودانية التي لم اسال عنها من الاساس .... حسب متابعتي عرفت ان الشركة قد فتحت خط للقاهرة اضافة للخطوط الداخلية وترحيل الحجاج وهو موسم دون الاستعداد جيداً مما ادي للاعطال والتاجيلات المستمرة وهي يبدو مشكلة ادارية في المقام الاول ثم مشكلة فنية في التشغيل والمتابعة ... من المؤسف ان تدار شركات الطيران بعقلية اصحاب اللواري ... للاسف كانت صن آير اشراقة سرعان ما خبا بريقها .... وما حدث لسمعة الشركة من اضرار في الفترة السابقة .... لن ينصلح الا بعد فترة طويلة اذا ما عادت لسيرتها الاولي او يكون مصيرها لمزبلة الطيران السوداني وما اكبرها ....
| |
|
|
|
|
|
|
|
|
|
Re: عن تجربه : كان تمشو بكرعينكم ما تركبو Sun Air !! (Re: زهير الزناتي)
|
الأخوان :
جعفر محي الدين
ناذر
طرطشه
محمد قرشي الشرس
ياسر محمود
بكري علوم
أحمد الشايقي
ابو محمد فؤاد الماكيكى
ياسر العوض
إبراهيم عدلان
اسامه البلال
ياسين حبيب نوره
زول واحد
دكتور شداد
زهير الزناتي
حمور المستلب
علي ميرغني
شكرا للجميع علي إثراء البوست بالنقاش و بتجاربهم المختلفه مع هذه ال Sun Air
| |
|
|
|
|
|
|
|
|
|
Re: عن تجربه : كان تمشو بكرعينكم ما تركبو Sun Air !! (Re: ناذر محمد الخليفة)
|
Quote: ** تنتهى علاقة المسافر بالمحطة المُغادر منها بمجرد حصوله على إذن السفر من كاونتر الشركه الناقله فى حالة حدوث إى تأخير لإى سبب من الإسباب تكون الشركه الناقله مسوؤله مسوؤلية مُباشره عن توفير سكنه ووجباته طوال فترة التأخير..
**** |
استاذنا عبدالكريم سلامات..
"اظن" ان الحالة الوحيدة التي لا تتحمل فيها الخطوط تبعات التاخير هي الحالات المرتبطة بالطقس من امطار عواصف.. الخ "على الاقل عندنا هنا في امريكا" لانها خارجة عن سيطرة الخطوط..
_______
هذه الخطوط ساهمت في مرمطة كثير من الحجاج والمعتمرين هذا العام وكنت محتار من صمت المسؤولين وعجزهم عن اتخاذ قرارات حتى ولو كانت قرارات صورية
لكن من سرد صاحبي ناذر اتضح ان حتى المسؤولين متواطئين وهم طرف في هذا الظلم الذي حاق بكثير من الحجاج..فبدلا من مناصرة الركاب المنصوب عليهم او حتى الوقوف
على الحياد تراهم يركضون في كل الاتجاهات لاخفاء الحقائق واسكات الركاب وتثبيت الظلم عليهم..
التحية لك يا ناذر وانت تسعي لانتذاع حقك وهي سنة حميدة من غيرها سيواصل اللصوص في اكل حقوق الناس بالباطل ..
_________
دكتور امين سلامات..
انا نفسي اعرف انت الدكتوراة بتاعتك دي في شنو لانو بعد مرات عندك دقسات كدا بتخلي الزول يشك انك دخلت مدارس من الاساس::))
ترجع بالسلامة..
| |
|
|
|
|
|
|
|
|
|
Re: عن تجربه : كان تمشو بكرعينكم ما تركبو Sun Air !! (Re: أمين محمد سليمان)
|
اسئله ما لاقي ليها اجابه : شنو السبب البخلي سفريه معلنه و الناس حاجزه فيها تتاجل ؟ و ليه ما يجيبو طياره تانيه يسفرو بيها الوهم القاطعين تذاكرهم و حاجزين معاهم ديل ؟ و ليه ي س ت و س خ و ن ي و ما يضربو لي لحدي ما أمشي المطار ؟
---------
شكرا يا ناذر لرفع البوست : و أنا راجع الأسبوع الجاي إن شاء الله : بالله غير برنامجك عشان نلاقيك
| |
|
|
|
|
|
|
|
|
|
Re: عن تجربه : كان تمشو بكرعينكم ما تركبو Sun Air !! (Re: الصادق اسماعيل)
|
سلام نوباتيا ..
Quote: لكن من سرد صاحبي ناذر اتضح ان حتى المسؤولين متواطئين وهم طرف في هذا الظلم الذي حاق بكثير من الحجاج..فبدلا من مناصرة الركاب المنصوب عليهم او حتى الوقوف
على الحياد تراهم يركضون في كل الاتجاهات لاخفاء الحقائق واسكات الركاب وتثبيت الظلم عليهم..
|
مدير صالة مطار الخرطوم قال لنا عندما أجتمعنا به أن أنهم قاموا من قبل بفرض غرامة على صن أير قدرها 15 ألف جنيه سوداني وأنهم سيقومون بفرض غرامة أخرى بذات المبلغ عليها عقابا لها على تأخيرنا ..
والغريبة في أثناء حديثنا جاء من بعيد شخصان يضحكان مع بعض (أو يضحكان علينا مع بعض) !! أخبرنا مدير الصالة أن الشخصان أحدهما مدير محطة صن أير والأخر هو مدير الطيران المدني ..!!
نا قشناهما سويا كطرف واحد لأنه من الواضح جليا أنهما متفقان في كل ما يقولانه .. طلبت من مدير محطة صن أير أخذنا لفندق فوافق .. ولكه أخذ يماطلنا لأكثر من سبعة ساعات متواصلة ..!!
كل هذا يحدث أمام نظر وبصر (وضحك) مدير الطيران المدني دون أن يحرك ساكنا ..!!
بالمناسبة أنا أتحدث عن الرحلة رقم 403 المتجهة من الخرطوم للقاهرة ولكني لا أذكر تاريخها ..
أوردت هذا لأن البعض سألني عن رقم السفرية للأستوثاق والتاكد من أقوالي هنا والتي أنا مسئول عنها تماما ..!
| |
|
|
|
|
|
|
|
|
|
Re: عن تجربه : كان تمشو بكرعينكم ما تركبو Sun Air !! (Re: ناذر محمد الخليفة)
|
رساله في الايميل من السيد قرشي إسماعيل Quote: سلامات الاح اميين
لقد لفت انباهى بوستك المعنون ب sun Air الحقىقة تعرضت لموقف غريب جدا من مدير المحطة المدعو احمد المرضى فقد قرر ارجاعى من الطايرة المتوجهة الى ابوظبى فى سبتمبر الماضى بحجة انى لا احمل تاشىرة دخول مع العلم انني احمل الجواز الكندى وتعامل معى بمنهى السوء حاولت ان اشرح له ان الفيزاء upon arrival قال لي طىراتى دي ما بتركبا ..اضطررت الى العودة وقمت باسترداد قيمة التذكر بعد تلاتة ايام وقطعت علي خطوط اخرى وقال لى في الاخر (جوازك العاجبك دة طيارتى ما بتعتبها) تحياتي
قرشي
|
يعني Sun Air الله يديها العافيه ما خلت زول ما بلتو !!!
| |
|
|
|
|
|
|
|
|
|
Re: عن تجربه : كان تمشو بكرعينكم ما تركبو Sun Air !! (Re: ناذر محمد الخليفة)
|
والله يا أمين مشكلتك مشكلة
ومشكلة صن اير مشكلتين تلاتة
أخوك هسع متابع موضوع قانوني ضد صن إير وحنوديهم المحكمة باذن الله
إيميلي بالبروفايل لو عندك رغبة إسترداد حقك من الشركة
الموظفة القالت تذكرتك حقت أحمد طارئ رسل لي رقمها
نشوف خبر طارئ ده
موقف حمور زيادة القانوني برسله ليك في المسنجر
أو في الإيميل لأنه جايز يكون صاحب بكري أبوبكر
زمان كان ساكنين جنب بعض
وجايز يحذره يقوم يمشي أقرب سفارة غربية
| |
|
|
|
|
|
|
| |
أمين محمد سليمان
smart_ana2001
عزان سعيد
Nazar Faisal
omer osman
حمور زيادة
جعفر محي الدين
ناذر محمد الخليفة
محمد عبدالرحمن محمد
محمد قرشي عباس
ياسر احمد محمود
abubakr salih
أحمد الشايقي
عبدالكريم أحمد الامين
Elawad
ابراهيم عدلان
أسامة البلال
حبيب نورة
Abobakr Shadad
زهير الزناتي
Rihab Khalifa
حسين نوباتيا
الصادق اسماعيل
Ahmed musa
فيس بوك
تويتر
انستقرام
يوتيوب
بنتيريست