رأفت ميلاد ...

Quote: كلما اتذكر أشرف أو رأفت ، أرجع السودان طوالي ،، ليه ما عارف. رغم إنو رأفت ما لاقيتو في السودان أيام السودان سودان وأشرف بحكم انو اتربينا في حلة واحدة فحاجاتنا المشتركة كتيرة، وهناك ذكريات وذكريات .. من أول أمبارح وأنا بالي (مساسق ) بين الديم ونادي الخرطوم.. وقتها كنا دون السن القانونية ، لذا فقد كنت أطلب من خالي أبو السيد وأستأذنه في أن يدبر لي أربعة كراسي في نادي الخرطوم ، حيث تعود هو أن يقضى حفل الكريسماس هناك .. كانت الكراسي بالارقام ولا مجال ( للضهب ) !! ليلى المغربي هي عريف ومقدم فقرات الحفل الفنانين كانوا ناس ترباس ، وعبدالعزيز المبارك وشرحبيل ، ومحمد ميرغني وود الأمين وغيرهم كثر الحفل ينظمه ( عبده زمان ) أشهر منظّم حفلات في الخرطوم ( زمانئذٍ).. العشاء مشترك بين حمدي القوصي ، ومحمد سيد (الله يرحمه) شقيق عبده زمان ، أخطر من يظبوا عشاء رسمي وحلويات.. البينظم حركة المرور بره ، رتبتو ما بتقل عن عقيد شرطة ومرة شوف عيني كان بينظم الحركة اللواء محمد عبدالجبار مدير الشرطة الخرطوم وقتها .. نبتهج ، ونرقص ، ونضحك ، ونتونس، ونغني ، و قلوبنا كما اللبن الحليب، ونفوسنا أصفى من الماء الزلال ناس عايشين بدون أي منغصات ، علي كيفنا.. كنا نبرمج للكريسماس زي ما بنبرمج لرأس السنة أو عيد الفطر ، أو شم النسيم ، أو عيد الأضحي أو حتى حولية السيد علي بمحطة الغالي !! ونتبادل التهاني مع الجميع ، مسيحي واللا مسلم واللا لو كنت شنو زاتو هي أعيادنا البنعرفها من ما قمنا، لقينا أهلنا بتحتفل وتفرح بيها وتتبادل فيها التهاني .. ده السودان البنعرفوا ، وما عايزين نعرف غيرو سودانهم ده نحن منه براء ، لا بيشبهنا ولا بنشبهوا ح نكون كده لافين بره ، لغاية ما يرجع لينا سوداننا ، أو نرجع ليهو في صناديق.. رأفت ، أشرف ،كل سنة وانتو طيبين ، وربنا يحقق الأمنيات ..