|
Re: عمرها 17 سنة...بوردابية أصيلة..يوجد فيديو ..وشجن وأشياء أخرى (Re: امير عبدالدائم)
|
Quote: اخونا محمود الله يرضى عليك ادينا الاغنية دى بصيغة mp3 |
الأخ أمير عبد الدائم..
ياخي أول حاجة أشكرك شكر خاص جداً .. كونك أول المرحبين ..فمرحباً بك
وتاني حاجة..والله لو لقيت طريقة كنت رفعتها ملف صوتي بصيغة إم بي 3.. لكن عدم العرفة مصيبة..
Quote: احلى من كدة مافى شوف انا زول ما فنان زى اخونا الموصلى لكن كان ما قال ليك 100% حا تكون 200 % |
والله شكلك زول فنان... وشهادتك تاج على رؤوسنا جميعاً...
وإن شاء الله الجاب شهادتك يجيب لينا شهادة الموصلي..حتى لو أدانا 20 في المية بس..
شكراً لك شدييييييد ... يا جميل
| |
|
|
|
|
|
|
Re: عمرها 17 سنة...بوردابية أصيلة..يوجد فيديو ..وشجن وأشياء أخرى (Re: Mahmoud Mustafa Mahmoud)
|
هذه هي الجمعة الأولى التي تقضيهابينكم هذه المحبوسة فينا لسبعة عشر عاماً أو يزيد..
نشكر لكم احتفاءكم وحسن وفادتكم لها..
أخونا الشاعر الرقيق عصام عيسى رجب ..(سيد الشي زاااتها)..
خاطبها للفنان الجميل الهادي حامد ود الجبل..
كلفني في إجازتي القصيرة أن أتواصل مع أخونا الفنان الهادي حامد..
وفعلاً.. اتصلت عليه..ولم أتمكن من لقائه لظروف كتيرة وبايخة..
==== أها شِن قولكم؟؟؟ =======
لو في زول قريب من الهادي ... يقرا ليهو البوست دا..
علماً بإنه تم إرسال نسخة صوتية عن طريق الإيميل للمخرج الإذاعي / حسب الرسول كمال الدين
والذي بدوره سيقوم بتسليمها للمخرج الإذاعي / حاتم مصطفى .. والذي بدوره سيقوم بمقابلة الأستاذ الهادي حامد..
قلبي يحدثني.. يقول لي: إت يا محمود..مطر إيديك دي موش مولودة سنة 93؟؟ طيب هسي ما بقت عروس عديل..
يمكن عرسها يكون في السنة دي.. أمانة يا الهادي حامد ماك فنان..وملحن لا يشق لك غبار...
وأقول ختاماً:
(يا الهادي..."مطر إيديك"...بين إيديك)..
احتراماتي..
| |
|
|
|
|
|
|
Re: عمرها 17 سنة...بوردابية أصيلة..يوجد فيديو ..وشجن وأشياء أخرى (Re: ابو جهينة)
|
العمدة أبو جهينة..الجلالين..
جلال داؤود الإسم .. وجلال وهيبة الحضور ونداوة الحرف..
Quote: أسعدتني بهذه بدون أي مجاملة |
وأنا أكثر سعادة والله يا استاذ جلال
Quote: الكلمات قمة في الروعة لصديقنا عصام اللحن متوافق مع النص و الصوت يعانق النص و اللحن بحميمية دافئة و العود مدندنا ينادي بقية الأوركسترا و كأنه يقول : يمكنني العمل وحدي أيضا |
أخجلتم تواضعنا يا حبيب.. وكلماتك تاج وشهادة نفاخر بها الثريا والنجوم..
لكن باقي ليك دي حالة زول ممكن يواصل؟؟ مطر إيديك مسجونة 17 سنة..
غايتو ..أبشرك.. في الطريق أخواتها..والجميل في الأمر ..كلهن بنات حبيبنا عصام عيسى رجب..
صادق الود والتقدير..
| |
|
|
|
|
|
|
Re: عمرها 17 سنة...بوردابية أصيلة..يوجد فيديو ..وشجن وأشياء أخرى (Re: ترهاقا)
|
ترهاقا أيها العظيم..
Quote: شغل جميل وشكلك متمكن وعارف اللعبة
بس يا ريت تعيد التسجيل وصوت العود يكون ما طاغي مع تقليل سرعة الاغنية
2- اللحن جميل ومتوافق مع الكلام لكن ياريتك تختصر المقدمة الموسيقية يعني أنا في رأئي تخش توش في الغنا
مجرد راي ولك الود |
والله رأيك محل تقدير واحترام..شكلك إنت المتمكن وعارف اللعبة..
وشكلك كمان زول مفيد خالص في الحاجات دي..
لا عدمناك إن شاء الله..
وعيدك سعيد
| |
|
|
|
|
|
|
Re: عمرها 17 سنة...بوردابية أصيلة..يوجد فيديو ..وشجن وأشياء أخرى (Re: Elmosley)
|
لا أصدق..
مطر إيديك نجحت يا عصام..
Quote: ياسلاااااااااااااااااام ياخ جميييييييييييييييييييييل اوعه عمر بانقا يتسلبط فوقها باقي هو سلباط والله انا علقت بي هناك وقايلو صوت كارق ابو عبيده ماشار الله اهنْئك من القلب وعصام نصو سهل وممتنع |
هكذا قال أستاذنا يوسف الموصلي...
سعادتي لا توصف بهذا الحضور.. وهذه الشهادة يا أستاذ.. ما لاقي لي برواز أضعها فيه..
يبدو أن القلب هو أفضل برواز..
إن شاء الله يوم شكرك ما يجي يا موصلي..
| |
|
|
|
|
|
|
Re: عمرها 17 سنة...بوردابية أصيلة..يوجد فيديو ..وشجن وأشياء أخرى (Re: إبراهيم عبد الحليم)
|
الفنان الرقيق إبراهيم عبد الحليم
Quote: الاغنية جد شديدة
انا مش دايرة بس بل قالعها عديل كدى ههه
اللحن طعم ابوعركى
الاداء مزيج من شاويش و الهادى الجبل و الفنان الصومالى احمد ربشة كأنى بيك لحنتها لود الجبل صاح - وجه حزين لكن برضو مكنكش فيها
شوفتى تحليلى ده كيفنو
اااححححح اموت بمطر ايديك |
ياخي دا كلام كبير خالص علينا نحن..
وتحليلك والله يعقد عدييييييييييييل...
معقول قدر دا؟؟
شهادة فنان تحرج تواضعنا فقط..
وتظل عزيزة على القلب ومفخرة لا شك فيها..
تسلم يا هيما يا فنان..
| |
|
|
|
|
|
|
Re: عمرها 17 سنة...بوردابية أصيلة..يوجد فيديو ..وشجن وأشياء أخرى (Re: Mahmoud Mustafa Mahmoud)
|
كان الوكِتْ إنتِ والجو .. مطر إيديكْ
والدنيا كم شباك فاتحين على عينيكْ
زرتك براي في السر جاهرني بيك الريد
دنقرْتَ من صوتك خايف عليك لو جُوك
القلبِ هوَّ القلبْ راكزْ وشادي الحيلْ
لكن...ضاع الكلام في الليلْ..
==========================
الاخ - محمود - العيد مبارك عليك وانت تفاجيء عيد الغربة بلحن يقد صدر طول العيد الحزين ويشى بفنان قادم على صهوة الكلام المقطر واللحن العذب
بالامس مساء كنا جلوسا بمنزل عصام عيسى رجب
الدكتور بشرى الفاضل/نصار الحاج/عبدالفتاح/سعد/عصام/ محمد مدني/محمد جميل/وشخصي وبدأت الجلسة بهذه الكلمات بصوتك من مسجل إنيق بعد أن وزع عصام وريقة حوت الكلمات .. كنا نقرأ ونسمع اللحن وكانت [B]"كان الوكت إتِ"[/B] هي البداية والنهاية لجلسة طوفنا بها بأركان أوجاع الوطن الأربعة .. وتم تناول القصيدة كلمات وغناء وعصام على صفيح المحكمة الأدبية، شفع لك الغياب وإستعادة مصطفى سيد أحمد بكلمات جديدة مدهشة .. ماذا قيل في تلك الجلسة؟!
| |
|
|
|
|
|
|
Re: عمرها 17 سنة...بوردابية أصيلة..يوجد فيديو ..وشجن وأشياء أخرى (Re: Mohamed Abdelgaleel)
|
الأخ الحبيب الأديب محمد عبد الجليل..
تشرفت بسماع صوتك وحديثك العذب..وسعدت بمعايدتك أيما سعادة..
عيدك سعيد أنت ومن تحب..
Quote: بالامس مساء كنا جلوسا بمنزل عصام عيسى رجب
الدكتور بشرى الفاضل/نصار الحاج/عبدالفتاح/سعد/عصام/ محمد مدني/محمد جميل/وشخصي وبدأت الجلسة بهذه الكلمات بصوتك من مسجل إنيق بعد أن وزع عصام وريقة حوت الكلمات .. كنا نقرأ ونسمع اللحن وكانت "كان الوكت إتِ" هي البداية والنهاية لجلسة طوفنا بها بأركان أوجاع الوطن الأربعة .. وتم تناول القصيدة كلمات وغناء وعصام على صفيح المحكمة الأدبية، شفع لك الغياب وإستعادة مصطفى سيد أحمد بكلمات جديدة مدهشة .. ماذا قيل في تلك الجلسة؟! |
أي قلادة تلك الأنيقة التي طوقتم بها "مطر إيديك"؟؟
محظوظة هذه (المحاولة) اللحنية لبكاء عصام ونشيده المموسق..
محظوظة (بكم) في حضرة أبيها المرهف عصام ود حاجة مريم جودات..
حضور يضم د. بشرى الفاضل ونصار الحاج وعبد الفتاح وسعد ومحمد مدني
ومحمد جميل ومحمد عبد الجليل و"مطر إيديك" تلك المحتشمة (في خدرها) !!!!!..
والله دي حاجة تفرح جد جد..
Quote: ماذا قيل في تلك الجلسة؟؟ |
منتظرين والله..عليك الله ما تتأخر..
الناس ديل كلامهم ماااااااا بيقع واطة..
صادق امتناني وشكري يا محمد ياخ
| |
|
|
|
|
|
|
Re: عمرها 17 سنة...بوردابية أصيلة..يوجد فيديو ..وشجن وأشياء أخرى (Re: عفاف علي ميرغني)
|
الأستاذة عفاف ميرغني..بت كسلا الوريفة الشاربة من الطيبة ديمة..
Quote: شكرا محمود مصطفى محمود لهذه الدعوة التفاؤلية 000 |
شكراً ليك إنت والله على جيتك لينا دي..
Quote: عزف عود 00 ولحن وكلمات ويلتحم بها اداء
يمنح الغنا بعد جمالي 0000 اكيد تواطؤ للفرح مع الاشياء الجميلة 00 |
قطعاً ليس أجمل من أن يجد جهد المُقِلْ قبولاً عند أصحاب الذائقة المرهفة أمثالك..
يا له من قبول ويا له من حظ..
Quote: لي 3 يوم بس بسمع مطر ايديك 000 |
يعني (معلِّقة) معاك ؟؟ بالضبط زي ما حاصل معاي أنا وعصام..
إذن ..مرحب بيك كجزء من هذا العمل..وجزء أصيل كمان..
Quote: والله على الدنيا لما تفتح شبابيكها على قصائد عصام عيسى 000 |
كمان في حتات كدا عند عصام الدنيا مطلة عليها من شرفات وبلكونات رهيبة مرة واحدة..
حقو بكري يرجع الباسوورد سريييييع لعصام عشان يجي يرد على الناس المثقفين شديد زي عفاف دي والله..
شاكر تواصلك ..وكلماتك تظل هدايا مترفة أرجو أن نكون عند حسن ظنك دائماً..
محمود
| |
|
|
|
|
|
|
Re: عمرها 17 سنة...بوردابية أصيلة..يوجد فيديو ..وشجن وأشياء أخرى (Re: فاروق أبوحوه)
|
الأخ الشاعر المرهف فاروق أبو حوة
سعيد أنا بحضورك
Quote: - هوي آناس هاااا مو قناة الحب ؟ - أيوا أتفضل مشكلتك أيه ؟
مشكلتي كبيره لسه ما سمعت الغنيه - طيب ليه ؟ - عشان في المكتب - حظ ما عندك ؟ أسرع أسرع و لمن ترجع لازم تسمع - لازم أسمع ؟ - لازم تسمع شان تستمتع |
بديع ياخ الكلام دا.. فكرة مدهشة..
Quote: محمود أخوي من كلام الناس الفوق ديل أقولك: ماتتلفت وراك تب و البنيه من أسبوع بتتعرس. |
هسي "مطر إيديك" زاتها تكون خايفة من نوع عمها فاروق البيعرسو طوالي ديل...
كان عندك ليك إخية لمطر إيديك دي..رسلها لينا وعريسها جاهز..
والله نفسي أغني ليك حاجة من زمان..
ربك يقوي النصيب...
والهادي حامد أظنو استلم "العروسة" والله أعلم..
| |
|
|
|
|
|
|
Re: عمرها 17 سنة...بوردابية أصيلة..يوجد فيديو ..وشجن وأشياء أخرى (Re: Mahmoud Mustafa Mahmoud)
|
Quote: هسي "مطر إيديك" زاتها تكون خايفة من نوع عمها فاروق البيعرسو طوالي ديل...
كان عندك ليك إخية لمطر إيديك دي..رسلها لينا وعريسها جاهز..
والله نفسي أغني ليك حاجة من زمان..
ربك يقوي النصيب...
والهادي حامد أظنو استلم "العروسة" والله أعلم.. |
الحبيب محمود مصطفي محمود:
خير البر عاجله والله مو كدي؟ الحمد لله إنو العروس وصلت بسلام ياخي الهادي دا زول فيه كميه من الشجن الجميل!!! أنا كمان أديتو نص بعنوان (بتجاوزِك) إن شاء الله الهادي ينغمو وينعمو.
ياخي يشرفني جداً أن تخطب ليك واحده في (بيت) قصيدنا إنت سمي البتدوره ولوم البقولك أبيت .
المهم كدي شوف دي وإن شاء الله العريس يكون عركي زاتو ولو ما عجبتك ما تخاف البيت ملاااان بنيات: __________________________________
منافي الذات
لأنك في ( القِبَل) مُشرع أمانو يطمن الواردات.. صبابات الهوي المًترع ضفاف النيل غنا الجايات (سبايط) من جدايل الموج.. يونِّّس وحشة (الباقات).. يبِّـل عطش السنين المُر. يفيض و يعم منافي الذات
نسيمك يا صباح مطّر ملا الساحات نِدا التُمتُم سماح بالنعمه بتبطّر يفت عزم الظروف الصُم .. بنتلاقي.. ونتقاسم فطور نمي.. ونبق همك.. نخُب ضاحكين.. علي الإحصاء.. وتوافيق الحِساب الشين.. سماح نتقالد الإتنين.. صباح ممدود كما نيلين.. علي شهقة قفا الخرطوم.. يفيق (فاق) الرحيل مشدوه علي كذبة نسيم إبريل.. علي الوجع الرجع مهزوم
| |
|
|
|
|
|
|
Re: عمرها 17 سنة...بوردابية أصيلة..يوجد فيديو ..وشجن وأشياء أخرى (Re: جمال السنوسي)
|
الإخوة رواد هذه الدوحة كل عام وأنتم بخير
محمود مصطفى محمود صوت مشحون بالشجن والتطريب تفتحت عيناه ونشأت ذائقته الفنية ما بين مدح المصطفى عليه الصلاة والسلام وروائع الحقيبة في حلة بادي وعمداً أقول (حلة بادي محمد الطيب) وهي حلة عباس وما أدراك ما حلة عباس؟ حيث جمال الإنسان والطبيعة ونداوة الأصوات هناك في حلة عباس،،، بادي محمد الطيب ، دفع الله محمد الطيب، مصطفى محمود و رحمة عبدالقادر جاء إلى العاصمة وجاور عازف الأوتار الراحل التاج مصطفى رغم صغر سنه فقد كانت موهبته طاغية ونحن في جامعة السودان أو معهد الكليات حينها فهو قاص ويقرض الشعر ويجيد العزف على العود أما صوته فالحكم لكم ولذلك لفت نظر الراحل التاج مصطفى فتبناه فنياً وأهداه عوده حباً وكرامة وشهادة بنبوغ هذا الفتى المسمى محمود مصطفى وأصطحبه معه لداخل صالة علم الدين حامد (صالة العرض) التي جلس فيها وعبر من خلالها كل كبار نجوم الغناء فقط لأن علم الدين حامد لم يقدم من خلالها إلا كبار الفنانين أو من تنبئ بداياته بأنه يستحق أن يكن من رواد الصالة ومحمود أحد أولئك محمود كتلة من المشاعر الرقيقة والبسيطة فحين يحدثك بكلام أهلنا في الجزيرة فلاتحس أو تشعر بأنه قد أمسك بقلم أو قرا حرفاً ناهيك أن يكون عازف ماااااااااااااااااهر على العود وفنان مترع بالشجن والصوت الحلو وياليت ماكتب أعلاه يكون فيه دافع لمحمود من أجل المزيد لأننا على ثقة بأنه لن يأتي إلا بالمفيد. أما عصام عيسى فإن له في قلوب كل أبناء معهد الكليات حب وبراح كبير فقد كان لساننا في كل المحافل ومازال....
| |
|
|
|
|
|
|
Re: عمرها 17 سنة...بوردابية أصيلة..يوجد فيديو ..وشجن وأشياء أخرى (Re: أبوعبيدة محمد الأمين)
|
أبو عبيدة الحبيب القريب..
ياخ والله مداخلتك الغليدة دي الواحد قدر ما يقراها.. تجيهو فكرة جديدة للرد..
مرات أقول أبو عبيدة حلجها وقعد..
ومرات أقول والله كتر خيرك..
كفيت ووفيت..
وزدت الورطة ورطة..
يعني هسي كلامك دا يشوفوهو جماعتنا ناس العباسية (بيت الكروان بادي محمد الطيب)..يقولوا علينا شنو؟
أغفلنا عمداً تلك الصومعة الرهيبة..أي زول من طرف ممكن يعمل حفلة الفاصل الواحد ممكن يكون فيهو 12 أغنية
كان بيت عجيب ياخ.. فيهو محامين..وصيادلة..وقضاة..وموظفين أفندية..وممرضين..وطلاب جامعات كتاااااااار...
يعني ممكن تلقى زول قاعد يغسل في الصحون ويدندن بأغنية لما ينتهي منها ممكن الجيران يصيحوا بصوت مسموع:
يا الله عليك.. بالله أرفع صوتك حبة ياخ..أو يجيهو بادي عليه الرحمة هاشاً باشاً: دي سمعتها وين آآآآ رماد؟؟
تقول لي محمود السجم دا؟؟
ثم تأتي مرحلة تانية... تتخرج من الجامعة ودا معناهو إنك اتخرجت في نفس الوقت من مؤسسة تربوية موازية وهي (بيت بادي)..
نحن بعد أن تخرجنا من هنا وهناك.. كنا محظوظين جداً في الانتقال إلى امبدة جوار الراحل العاقب محمد حسن.. الذي
كان مجرد السلام عليه يعتبر نوع من الإحساس بالثقافة رغم تواضعه وأدبه الجم.. يا حليل العاقب..يا أبو عبيدة
وكان أولاد الرابعة ناس جمال ابن أخت الراحل الأستاذ التاج مصطفى ونسيبو طارق
وصديقهما الأستاذ المحامي/ محمد التاج مصطفى والأستاذ المحامي علاء الدين
والأستاذ الإعلامي والقانوني/ طارق كبلو..كوكبة فنانة خلاص من الناس الطيبين الجميلين ..
فتحوا لنا قلوبهم قبل بيوتهم..
لن أنسى تلك اللحظة التي تجاسرت فيها على أداء "إنصاف" رائعة أستاذنا التاج مصطفى..يا روحي أنصفني..
قدام منو؟؟ قدام محمد التاج مصطفى..ومحمد لسانو طويل.. يعني ممكن يعقدك بتعليق يخليك تمشي التيجاني الماحي
فترة نقاهة 40 سنة كدا.. المهم اتوكلت على الله ..وغنيت..
لم يشفع لي غير عزفي المتواضع للعود..أذكر تماماً تعليق محمد التاج على طريقة عزفي للعود..
العرب ديل غنايين خلاص..لكن عربي عزاف دي شوية جديدة..
المهم الامور بعد داك بقت زيارات منزلية عديييييل لشيخنا الراحل التاج مصطفى..
وغناء امتد حتى صالة العرض..
ورحلنا من امبدة..إلى الثورة..
ورحل أستاذ العاقب محمد حسن من الفانية إلى جوار كريم رحيم..
ورحل شيخنا التاج مصطفى من الزايلة دي..تاركاً لنا إحساس باليتم الذي لا ينتهي..له الرحمة ولأبنائه وبناته ومحبيه صادق العزاء..
ثم غادرنا السودان زاتو إلى جدة.. حيث أنا الآن..
يا أبوعبيدة..
هسي دا شنو دا؟؟
رد مثلاً على مداخلتك؟؟
والله أكان رد ما عارف.. دي قصة حياة عديل.. فترة جميلة خالص وسيرة ذاتية لزول ساي..
ياخوي مالك علينا هسي؟؟
أتمنى لك كل السعادة
| |
|
|
|
|
|
|
Re: عمرها 17 سنة...بوردابية أصيلة..يوجد فيديو ..وشجن وأشياء أخرى (Re: هشام كمال)
|
الأستاذ الفنان هشام كمال..
مجرد مرورك واستماعك لنا يعتبر مفخرة وشرف كبير والله..
أما كلامك السمح دا:
Quote: كلك حلو
اللحن الغنا العزف جميل جداً
اتمنى اعادة التسجيل فصوت العود عالى جداً اصدق الامانى |
فشهادة وكرم منك يا فنان يا أصيل..
ونصيحتك قطعاً نصيحة متخصص لا يهملها إلا جاهل أو جاحد..
مرةً أخرى... نفرح بك دائماً ونشكرك ونطمع في مزيد عطائك..
محبتي يا هشام ياخي... شيلها كلها..
| |
|
|
|
|
|
|
Re: عمرها 17 سنة...بوردابية أصيلة..يوجد فيديو ..وشجن وأشياء أخرى (Re: Mahmoud Mustafa Mahmoud)
|
الأحباب الجميلين والجميلات: أبو جهينة ومنال محمّد والموصلي وترهاقا ومجدي عبد الرحيم وهارون دِياب وعبد الدائم سيد أحمد
ليكم الحُب والغُنا الرايق المِزاج
حتذكر ليكم "مطَر إيديك" إنكم من أول إطناشر جميل وجميلة مرُّوا مروراً جميييلا مِن هُنا
شايفين الخجل الجميل كسا ملامحها كيف بعد ما زادها حبّكم جمالاً وبهاءً وألَقاً خضرةً دُقاقا .....
فتحتوا شهيّتنا، محمود وأنا على الآخر، إننا نطلِّع أخواتها الجايات: 1- ماليني الحنين 2- ما هو خاطرِك 3- تأشيرةْ مطَر
وللأغاني والغناء بقية لا شك .....
| |
|
|
|
|
|
|
Re: عمرها 17 سنة...بوردابية أصيلة..يوجد فيديو ..وشجن وأشياء أخرى (Re: عصام عيسى رجب)
|
Quote: فتحتوا شهيّتنا، محمود وأنا على الآخر، إننا نطلِّع أخواتها الجايات: 1- ماليني الحنين 2- ما هو خاطرِك 3- تأشيرةْ مطَر
وللأغاني والغناء بقية لا شك ..... |
عصام .. أيها الحبيب..
جايي الغنا..
الله كريم..
فاقدك والله..
ورطان في الورشة مع منافي فاروق الجنكيز دا..
عندو ليهو بنية حتها دربها مرق تب..
عاد تعال بارك لينا بي غادي..
حبابك..
| |
|
|
|
|
|
|
Re: عمرها 17 سنة...بوردابية أصيلة..يوجد فيديو ..وشجن وأشياء أخرى (Re: Mahmoud Mustafa Mahmoud)
|
الاخ - محمود - تحياتي، قبل يومين عملت مداخلة طويلة عريضة هنا سجلت فيها كل ما أختزنته ذاكرتي عن الجلسة إياها لحدي كلام محمد مدني عندما قال أن هذه القصيدة رأسها ذروة (وكان الوكت إت) لحدي ما قال إيه الـ جاب: والوكت كان ليل .. ما أصلو الوكت هي .. والوكت واحد.. غايتو عشان أتذكر تاني إلا أرقد بخيرتها يومين متتابعين أصلو الذاكرة فقدت النص الكتير الحلو.. وعلى قول صلاح أحمد إبراهيم:
وحالي كما تعلمين إغتماما همومي كثر ومالي قليل وجسمي عليل فلا تهزئي بي .. حذارك
| |
|
|
|
|
|
|
Re: عمرها 17 سنة...بوردابية أصيلة..يوجد فيديو ..وشجن وأشياء أخرى (Re: Mohamed Abdelgaleel)
|
إبراهيم عبد الحليم: ما في مشكلة يا فنان، خشيت موقعك ولقيت غُناك ولي قدام .... ولو ما جاتك (مطر إيديك) نديك غيرها، باقي في بنيتين تلاتة وكدا .... وكلامك صح: الهادي حامد عريس أول إذا عجبتو البنيّة
محمد عبد الجليل: جلسة الليلة ديك في حضرة بشرى الفاضل وبقية العقد الجميل خلّت مطر إيديك منشدهة ومندهشة لي هسه .... ولي عودة لتلك الليلة البهيّة .....
عفاف علي: 3 يوم سماع دي تخلي أي غُنية تنبسِط و"تضحك في سرها" بمزااج ومزاجين وتلاتة كمان .... وليكِ الغنا ....
فاروق أبو حوة: يديك عافية الغُنا، وأهو جاك أول الغيث مِن زِريابنا: محمود، وعقبال المزيد والمزيد كمان
جمال السنوسي: صوتنا مع صوتك عشان محمود يمرق على الغُنا ويمسِك دربو الجمييييل
أبو عبيدة: حليل زمن الصِبا والغُنا، وبارك الله فيك كشفت لينا السّر الجميل: سِر غناء محمود في حضرة التاج مصطفى وإهدائه عوده ... أفتكر ما في احتفاء أجمل مِنْ كدا
| |
|
|
|
|
|
|
Re: عمرها 17 سنة...بوردابية أصيلة..يوجد فيديو ..وشجن وأشياء أخرى (Re: Mahmoud Mustafa Mahmoud)
|
صديق ضرار وسعد الدين وهشام كمال: شكراً على المرور الجميل، ما قبل الأرشفة، ومعليش متأخرين وكدا
طارق أبو عبيدة: يا سلام عليك إنت دا، وسلام سلامين وتلاته كمان لما أسمعك تغنّي غُناي وغُناك
"بنغنِّي غُنانا العاجبِكْ داك صفقتنا سماك وصوتنا يسوِّي سُواةْ النَّيل وقتين يرمي الشَّبَّال ما بين نهرينو قمر ضحَّاك ..."
ويا محاسن: حزن الكلام ما في "مطر إيديك"، دا مدكِّنو محمود في "ماليني الحنين":
"هاكِ الحروف غمَّستها فـ بحر الحُزُن ومرقتها شوفيها كان تَقْنَعْ طيورِك بالرحيل مِنْ جفوَتِك ... لمتين يلاويكِ التَّعَب ويكتِّفْ الضي في عيونِك خوفْ وخوف ....."
| |
|
|
|
|
|
|
Re: عمرها 17 سنة...بوردابية أصيلة..يوجد فيديو ..وشجن وأشياء أخرى (Re: Baha Elhadi)
|
الأخ بهاء الهادي..
Quote: من أجمل ما سمعت مؤخرا |
والله نعجز عن التعبير عن الشكر... ودا من ذوقك والله
Quote: ومن جلس مستمعا لشيخي العارف بمكامن النغم النضيد حتما يخرج منه هدا المترع لحنا وكلمات واداء |
يا حليلنا منها يا بهاء ياخي.. ما لحقنا نتتلمذ وناخد الطريق.. لشيوخنا الرحمة..والخلود لفنهم وعطائهم الباذخ..
شكراً كتير يا حبيب..
| |
|
|
|
|
|
|
|