|
أوقفوا مظاهر (الخلاعة) بهذه الجامعة!
|
أوقفوا مظاهر (الخلاعة) بهذه الجامعة!
خالد الاعيسر*
[email protected]
لو أنكم تعلمون ما يجري في حفلات استقبال الطلاب بإحدى الجامعات، لفكرتم ألف مرة قبل أن تسمحوا لأبنائكم وبناتكم بالمشاركة فيها لأنها لا تشبه السودان ولا تناسب طباع أهله والبيئة التعليمية المثالية التي تنشدونها.
زحام، اختناق مروري وشباب من المراهقين الذين لا تربطهم بالمناسبة سوى رغبات غريزية، وفي المقابل فتيات ببناطلين وتي شيرتات.. إلخ؟!. تلك هي سمات وملامح المشهد في الشارع المقابل للمدخل الرئيس للجامعة. وأنا في الطريق الي المنزل استوقفني بطء حركة السيارات أمامي، فسألت الشباب المحتشدين على الرصيف عن المناسبة فتباينت اجاباتهم، دي جي بارتي، كورال وآخرين أجابوا تلنت شو DJ Party (Disc Jockeys Party), Choral and Talent Show لا أحد يعلم، فتلك جميعها مسميات دخيلة ولكن المهم أنها حفلة وخلاص؟.
بربكم نحن في السودان، أم أننا وسط (بيكاديلي سيركيس) بلندن أم (داون تاون) نيويورك سيتي أم (تايمز سكوير) بامستردام.. صوت موسيقى الهيب هوب والأر آند بي (Hip-Hop, R&B) يعلو السماء، ولغة الخطاب انجليزية والأدهى أن المشاركين لا يعيرون ادنى انتباه لآداب الرسول (ص) ووصاياه عن الجار..
تداعت للذاكرة سيرة أبناء الجاليات السودانية المهاجرة في أوروبا وأمريكا، وكم أنهم مظلمون حيال ما يبذلونه من جهد من أجل تنشئة ابنائهم وبناتهم تنشئة قوامها الاصالة السودانية.
خلال مسيرتي لما يقارب العقدين من الزمان في بلاد المهجر رأيت شباباً وشابات سودانيين على خلق ودين، علم وثقافة، وتمسك بالهوية والعادات والتقاليد السودانية لم أره أمام تلك الجامعة.
الغريب أن حديث الناس هذه الأيام ينصب في فكرة السودان الجديد والمفاضلة بينه والخط المحافظ وانعكاسات هذا التناقض على قضية الوحدة.
سؤال نوجهه للقائمين علي امر الدولة، إذا كان الحال كما هو عليه، ثمة أمل في أن تفيدونا بإجابات عن دواعي الشعارات التي قد تكلف ذهاب أهلنا في الجنوب بعيداً؟.
دهشت واغتظت أيما غيظ قبل أن ابرح المكان بعد أن ابلغتني إحداهن أن المناسبة تهدف مكافحة التدخين بالحرم الجامعي، هل يا ترى تناست ادارة الجامعة ان المظهر (الخليع) يحتاج هو الأخر الى مكافحة قبل التدخين!.
* صحافي سوداني مقيم ببريطانيا
صحيفة الأحداث (العدد 1091) الجمعة 5 نوفمبر 2010 الموافق 27 ذو القعدة 1431 هـ
|
|
|
|
|
|
|
|
Re: أوقفوا مظاهر (الخلاعة) بهذه الجامعة! (Re: ASHRAF MUSTAFA)
|
سلامات
الفضائيات نقلت هؤلاء الشباب الى حياة متخيلة فاصروا يقلدون التقليد لصديقتي نظرية ان التلفزيون او المفسيدون هذا مدسوس لنا خصيصا ليدمر الشبابا واخلاقياتهم
وينقل لهم حياة لاهية غير حقيقية فيقلدونها ويحسنو التقليد..
فكيف بالله واحد ما مرق من السودان في حياتو يعرف الدي جي والديسك جوكي ويعمل بارتي بيها كمان؟ الاستلاب والهجمة التغربيبة التغريبية هي سبب هذه الخلاعة والانحرافات ولا يلام الاباء والامهات لان هذه الهجمة اكبر منهم. حيث ان الابناء صاروا لا يعكسون الاباء مربين بروس ساي
| |
|
|
|
|
|
|
Re: أوقفوا مظاهر (الخلاعة) بهذه الجامعة! (Re: محمد سنى دفع الله)
|
لو أنكم تعلمون ما يجري في حفلات استقبال الطلاب بإحدى الجامعات، لفكرتم ألف مرة قبل أن تسمحوا لأبنائكم وبناتكم بالمشاركة فيها لأنها لا تشبه السودان ولا تناسب طباع أهله والبيئة التعليمية المثالية التي تنشدونها.
كل الناس اولادها في الجامعة دي ؟؟ هل تفتكر السودان ده بقى مزبلة لدرجة انو اي حفل تخرج او حفل خاص بقضية معينة يمكن ان تتم فيهو ممارسات فيها رزيلة ولبس البنطلون والموضة بقى جريمة السودانيين متابعين الموضة منذ 8 الف سنة ونفس الناس البتتكلم عنها لهم طباع اهل السودان وعاشوا في بيئته المثالية وان تأثروا بالقنوات الفضائية يالجاي من لندن
| |
|
|
|
|
|
|
Re: أوقفوا مظاهر (الخلاعة) بهذه الجامعة! (Re: محمد سنى دفع الله)
|
غايتو الدسكوهات البنعرفها في الخرطوم كانت كتيرة ومعروفه القولدن قيت في المريديان، African Music Hall في الفندق الكبير، ودسكو شدياك وغالبا ما بعمل حفلاته في الاندية القبطية ويوم ما سمعنا انو الدسكوهات في السودان كانت بؤرة فساد كلنا كنا نرتدادها بدعوة او عزومه، وبالنسبة لي كخرطومي الموضوع عادي
لكن في الجامعات دي جديدة
حفل استقبال الطلاب ووداع الخريجين في الجامعات تقليد معروف وغالبا ما بكون بفنان معروف او احد الشباب وفيه لحظات جميلة الناس تتعرف على بعض في جو مريح وتشيل شوية الرهبة من البرالمة والناس بتكون محترمه وضابطه تصرفاتها لان للمكان حرمه.
الكيزان الملاعين هم من اوقفوا الحفلات العامة في الجامعات، وتحديدا في جامعة الخرطوم، وقلنا ليهم يا رمم، لمن توقفوا الانشطة دي في الجامعات الطلبة لن يتوقفوا عن اقامتها خارج اسوار الجامعة، وبالخارج حين تفقد احترام وقدسية اسوار الجامعة سينفلت عيار الشباب شوية ولن تستطيع ان تضبط الى اي مدى سيقودهم هذا التحرر.
بلاش بكاء، ما يحدث في السودان هو نتيجة طبيعية للصبر على هؤلاء الملاعين لكي يحكموننا.
في 92 وكنت بالخارج وجاء واحد ضهبان من السودان كان في اجازة، وقال البلد بقت تمام التمام، وضرب مثال انو حديقة القرشي يا زول قفلوها ليك على الصعاليك وبقت للعوائل فقط، ايوه، مش زي زمان، اي واحد جايب ليهو صعلوكة من الشارع ويقعد معاها في الحديقة. يا زول نطيت ليك في حلقو، قلت ليهو ياخي دي اكبر مصيبة تعلمها الحكومة، لانو هذا الصعلوك و الصعلوكة، اقصى ما يمكن ان يعملوه شنو في حديقة القرشي؟؟؟ مسكة يد، .....، .....، النقط لعدم خدش الحياء العام، المهم لكن لو منعتهم من الحديقة وكل الحدائق، تاني يوم بسوقها بيت صحبو فاضي، وللا مزرعة مطرفه ا و ا و وحينها لن تضمن ان الموضوع سيكون مسكة يد فقط. ودونكم المايقوما
| |
|
|
|
|
|
|
Re: أوقفوا مظاهر (الخلاعة) بهذه الجامعة! (Re: Osama Siddig)
|
Quote: دهشت واغتظت أيما غيظ قبل أن ابرح المكان بعد أن ابلغتني إحداهن أن المناسبة تهدف مكافحة التدخين بالحرم الجامعي، هل يا ترى تناست ادارة الجامعة ان المظهر (الخليع) يحتاج هو الأخر الى مكافحة قبل التدخين!.
|
أناماعارف الناس بتحب تلف وتدورليها
أي زول في البلد دي عارف إن جامعه العلوم الطبيه ( مأمون حميده ) كان عندها إسبوع لمكافحه التدخين
وعندهم إذاعه على الإفإم الموجه 99.3 إسمها الطبيه
كانت عامله ترويج للإسبوع ده
أها اللف والدوران شنو ؟؟ ولا خايفين من المسأله القانونيه
مادام الزول كان عنده شجاعه وكتب الإتهام ده
المفروض يكون على قدره كلامه
ولا كيف يا جماعه؟؟
| |
|
|
|
|
|
|
Re: أوقفوا مظاهر (الخلاعة) بهذه الجامعة! (Re: Saifelyazal Elmaki)
|
سلامات يا جماعة
وشكرا صاحب البوست للموضوع الجيد للنقاش زي ما ظاهر من مشاركة اساتذة كبار هنا
لكن خلاعة عديل .....؟؟؟
دا بوست حبيب نورة 2 ولا شنو IMG]http://www.sudaneseonline.com/db/attention/010_Smile.gif[/IMG]
بعدين يا ناس البنات ديل والناس دي بتغير لبسها في بوابة الجامعة ؟
الشباب في السودان وفي الجامعات اليوم فيهم غالبية وعدد كبير من المحترمين في كل شي ,,,,,,
الناس قبلي ما ترمي بنات الناس بتعميم ساكت حقو تراجع نفسها حبة
وتقول بسم الله وتخت الرحمن في قلبها وموضوع اللبس والاخلاق ما بتعالج بالجوطة ساكت داير رواقة والناس تمشي تشوف الناس ديل مالهم وقبل ما تطلق
احكام امشوا اقعدو معاهم واتونسوا معاهم وافهموا هم فهمهم شنو في اي حاجة نحن شايفنها كعبة او كويسة وكدا بنقدر نطلع
بنتيجة افضل ونكون قربنا منهم .
في كتير من التجاوزات الاخلاقية ما عندها اي علاقة باللبس بل اغلب الاساتذة والناس القريبة من الطلاب ديل عندهم معلومات عنها والحوادث الحصلت والخلاعة الجد جد ما كان عندها كبير غرض باللبس
وبالتاكيد ما معناها انو الناس تمشي ساي ,,,,
لكن هس دي مشكلة الشباب الوحيدة ولا هي نتيجة لمشاكل اذا كان ت فعلا في مشكلة في حتة اللبس لدرجة كبيرة ؟؟؟؟
كم في المئة الناسالبنكلم عيلهم ديل
يا خي السودان دا فيه ناس بتمشي نصهم برة ودي عاداتهم وتقاليدهم وفيهم ناس بقفلوا كل جسمهم وبلبسوا البرقع لكن كلهم عندهم مشاكل مشتركة اكبر من اللبس
كشباب
دايرين تعليم كويس وتدريب كويس وتاهيل كويس وفرص لحياة معقولة بس
وانهم يكونوا امنين علي روحهم من العوارض والكشات والحروب والمرض والفقر وتشريد اهلهم وفصلهم
ويكونوا امنين علي روحهم من مدعي النظام العام العام البجرجرهم ظلما لمتاهات الانحراف الجد جد
ياخي عشرات الاطفال ديل او الشباب ديل تعرضوا لاقبح انواع التشريد في فترات سابقة في معسكرات وهمية من تدريب وغيروا
انتهي بعضهم بانحراف ومخدرات بسسب البيئة الرموهم فيها مع ناس رقم قلتهم هم سبب انحرافهم الجد والخلاعة الحقيقية.....
غايتو مشكلتهم كبيرة الشباب
لا زول يساندهم في مشاكلهم
واقلام الناس تسلخ فيهم ساكت
كويس انهم يحاربوا التدخين بفهم وروح عصرهم وعلينا او علي المربين الكبار توجيهم بطريقة كويسة وتشجيعهم للكويس
بالمناسبة ثقافة الدي جي عندنا ما مقبولة وفي زول الطمبور دي شايفوا ما مقبول نجي كسر رقبة كدا نقول ليهم دقوا النحاس لمحاربة السجائر مثلا ولا الصعود
شكرا
| |
|
|
|
|
|
|
Re: أوقفوا مظاهر (الخلاعة) بهذه الجامعة! (Re: م. سيد احمد قدورة)
|
شكرآ لجميع المتداخلين
وحقيقة ليس لدي ردود أو إجابات شافية للإخوة المحبطين من المقال
فأنا ناقل للكفر...أقصل المقال
إذ أن الصديق والزميل الصحفي : خالد الإعيسر
أرسل لي المقال بالإيميل وطلب مني فتح بوست به
لذلك أحول كل الإستفسارات بما فيها من يطلبون بإدخال أبنائهم إلي تلك الجامعة
للأخ الإعيسر (المتواجد حاليآ بالخرطوم) للرد أو عدمه علي تلك الإستفسارات..
خالص الود للجميع
| |
|
|
|
|
|
|
Re: أوقفوا مظاهر (الخلاعة) بهذه الجامعة! (Re: ASHRAF MUSTAFA)
|
Quote: لذلك أحول كل الإستفسارات بما فيها من يطلبون بإدخال أبنائهم إلي تلك الجامعة للأخ الإعيسر (المتواجد حاليآ بالخرطوم) للرد أو عدمه علي تلك الإستفسارات.. |
أسألوني أنا .. إن كانت الجامعة المقصودة هي جامعة العلوم الطبية و التكنولوجيا (مأمون حميدة) فادخلوا أولادكم و بناتكم بها و انتم مغمضي الأعين .. و دعكم من مثل الترهات أعلاه ..
_____ إن خيرت لأولادي و بناتي فسوف لن أجد أفضل من (مأمون حميدة) و الأحفاد.
| |
|
|
|
|
|
|
Re: أوقفوا مظاهر (الخلاعة) بهذه الجامعة! (Re: Hussein Mallasi)
|
لماذا لا يطبق مامون حميدة ماكان يفعله فى جامعة الخرطوم..من اسلمة وتربيط وتظبيط..؟ ام ان لأستثمارات الاسلاميين الخاصة وجه آخر؟ ___________________________________________ عموما الشباب من الجنسين فى السودان اصبحوا قريبين جدا من احدث خطوط الموضة البعض يراها خشلعة وكلام فاضى..واخرون ينظرون الى الامر بتسامح كبير. اهو فى زمنهم كانوا بعلمو عمايل برضو..والواحد لما يعاين لى صورهم القديمة بموت من الخجل. نهايتو... المكافحة كانت لى ياتو نوع من السجائر؟
| |
|
|
|
|
|
|
|