|
|
 هيثم سلمان لا يستحق التكريم يا الجزولي ووليد !!
|
طالعت في إحدى البوستات وفي جريدة الخرطوم موضوعات بخصوص تكريم الكابتن هيثم سلمان وهو حق مشروع لأصدقاء وأصحاب الكابتن هيثم لرد الجميل أو لترحيب بعودة الكابتن هيثم او إحتفاء به من باب الصداقة ولكن إستوقفتني بعض العبارات التي وردت في صحيفة الخرطوم تحديداً وفي البوست المقتوح بسودانيز والتي تتحدث عن هيثم سلمان مدرب المتخب القومي وهيثم سلمان مدرب نادي أبوعنجة ..
كنت بصدد فتح بوست قبل فترة بخصوص نادي أبو عنجة وما يحدث لهذا النادي العظيم وكنت بصدد النداء لإنقاذ هذا النادي العريق ..نداء يخص فقط أصحاب الوجعة لما اّل إليه هذا النادي الذي خرج الأفذاذ في كرة القدم السودانية ولازال يقدم وإن كنت أشك في لازال هذه بعد الذي حدث..
قررت عدم الكتابة لأنني حقيقة غير ملم بكل التفاصيل والأحداث الدائرة هناك بسبب الغربة وأيضاً لخوفي من شخصنة الموضوع وعدم سماعي من كل الاطراف فحينها أكون حكمت على طرف واحد دون سماع الطرف الاخر ..
رجعت وتشجعت في الكتابة أولاً لأن الطرف الذي سمعت منه كان هو جمهور نادي ابو عنجة وليس فرداً ولاسبب الثاني ما كتب هنا وفي جريدة الخرطوم والسبب الثالث والأهم أن الحديث الذي ورد وبغض النظر عن الذي حدث بين نادي ابو عنجة وهيثم سلمان إلا أن ما بدر من الكابتن هيثم سلمان لا يدل على أنه مدرب محترف أو مؤهل لهذه المناصب الحساسة في كرة القدم ..فما بدر من الكابتن هيثم مقبول فقط في فرق(الحلة) والروابط والدافوري ..
كنت في السودان في إجازة ..وكما جرت العادة فكل إجازتي أقضيها بين إستاد الهلال ودار الرياضة أمدرمان متابعاً لنفريق أبو عنجة وشاءت الأقدار أن يكون اول دخول لي لدار الرياضة مباراة أبو عنجة والعباسية في دوري الدرجة الثانية وحينها كانت كل الفرق تقريباً مهددة بالهبوط وكل الفرق أيضاً مؤهلة لصدارة الدوري ولعب السنترليق للأولى (حالة نادرة في دوريات السودان المتصدر كان ب 31 نقطة والمتزيل ب 24 نقطة تقريبا وتبقت 5 مباريات) ..
أبو عنجة كانت من فرق المؤخرة برصيد 25 أو 26 نقطة تقريباً ولها مباريات صعبة ..قبل وصولي للملعب وتحديداً في سوق الموردة سمعت الحديث التالي بين شخصين :
- ماشي وين يا الحبيب ؟
-- ماشي الدار..
-أهاااا كورة ابوعنجة ؟
-- أيوة ..
- ما سمعت الخبر لكن ؟
-- لأ خبر شنو يا زول..
- صاحبك ..صاحبك قالوا أبا يديهم الفنايل..
-- أوووو..اي والله سامع ..قالوا مسك الفنايل وقال ليهم مش إشتريتا انا ؟ ما بديكم تلعبوا بيها ..أمشو شوفوا ليكم شعار تاني العبو بيهو !!
- لكن والله هيثم سلمان بالغ !!!
زننننننن الإسم دق في راسي والله لمممن إتخلعت فانا على علم تااام كم تحب هذه الاسرة نادي ابو عنجة وكم اختلفت وهاجت وماجت من أجل نادي ابوعنجة لكن أن يصل الأمر لهذا الحد !!! ومن من ؟؟؟ من شخص من المفترض هو مدرب الفريق؟؟
مدرب يسمك الفنايل ويقول ليهم ما بديكم ليها ؟؟؟
وهنا وقفت مع تقرير الجزولي الذي ذكر فيه في جيدة الخرطوم كيف أن هيثم ترعرع في نادي ابو عنجة ولعب له وصار مدرباً بل وصار النادي لهم مثل البيت وصار البيت مثل النادي ..فهاهي النتيجة يا عزيزي الجزولي !!!! ما بديكم الفنايل مش جبتها انا ؟؟
تماماً كما كان يحدث في الحلة عندما يأتي (ولد المغتربين) أو (الحنفولي) ولما ما يعزلوهو يقول ليهم أدووني كورتي ..هكذا وبكل بساطة فيفشل تمرين انتظره اولاد الحلة اسبوعا كاملاً..
السبب الثاني هو تكريم مدرب حقق مع المنتخب القومي نتائج مخجلة بل فاضحة والمنتخب ينهزم داخل وخارج الأرض ودون تقديم مستوى ودون حتى تقديم لاعب موهوب واحد يمكن ان يعاد إكتشافه ليكون مستقبل السودان ..
لست على علم بتفاصيل مؤهلات الكابتن هيثم التدريبية ولكن أعتقد أن لديه شهادات تدريب أولية لا تؤهله لتدريب فرق دوري ممتاز ناهيك عن منتخبات قومية وهنا يكمن التساؤل لماذا تم إختيار مدربين أقل تأهيل وخبرة في وجود عمالقة أمثال الفاتح النقر وسيد محمد صالح؟
نعم لعبت بو عنجة يومها بشعار تم توفير مبلغه في نفس يوم المباراة وبتجميع القروش من الحادبين على أمر النادي..
لعبت ابو عنجة بشعار وكانها فريق روابط ..
ابو عنجة التي باعت اكرم الهادي بي 200 مليون جنيه ليس لديها شعار.؟؟؟
ابو عنجة فريق الدرجة الولى ملابسه في مفتاح دولاب فرد ؟؟
هيثم سلمان لاعب فز وقوي وزول قلبو حار ما فيها كلام ..
لكن تفاجأت بهذا التصرف من شخص روحه وحياته كانت في هذا النادي..
لذا فهيثم سلمان لا يستحق التكريم كمدرب يا عزيزي وليد وعزيزي الجزولي..
|
|
  
|
|
|
|
|
|
|
|
Re: هيثم سلمان لا يستحق التكريم يا الجزولي ووليد !! (Re: عمر الفاروق)
|
الاخ عمر الفاروق
طبعا لا ينكر فضل هيثم لفريق البوعنجه وطبعا يعتبر واجب علية وهو لايريد شكره على دلك
والان حاولت الاتصال علية لكي استفسر عن بعض الاشياء جوالة مغلق
هيثم كان يجي هنا زمان وقبل مايمشي امدرمان ويستقر كان يجمع مبالغ من اجل فريق ابوعنجة
لكي يسد بعض النواقص التي يجتاجها النادي وكان يدفع من حر ماله ايضا لدلك
واكيد ادا لم يكن لها النادي كل الحب والتقدير اكيد لم يفعل ما يفعله
وهنا الـ CV
Quote:
مسيرته :
2007 م - اول موسم للمدرب هيثم سلمان في السودان صعد بفريق ابوعنجة للدرجة الاولى
2008م - احتل المركز الثالث مع فريق ابوعنجة لدوري الدرجة الاولى
وفي كاس السودان احرز المركز الاول وبموجبة تم مشاركة فريق ابوعنجة ضمن ابطال الولايات
2008م - تم اختيارة من فريق ابوعنجة المدرب العام لمنتخب الناشئين تحت 17 سنه
وحقق المركز الرابع مع بطولة سيكافا
2010م - تم اختيارة المدرب العام لمنتخب الشباب مع المدير الفني للمنتخب المدرب رضاء عبد الحميد
يعتبر المدرب هيثم سلمان من اوائل الدفعة التي تحصلت الرخصة ( C ) التي تعادل دبلومه من الاتحاد الافريقي |
عمر الفاروق
تصرف يمسك الفنايل اكيد في شيء لم تعرف انت ولا انا وبجيك بالمفيد بعدين
نقوم نتكلم في التدريب
وانت بتقول لم يقدم لاعبي يكونوا نواه للفريق القومي
1- هاني السعودي
2- سعيد السعودي
3- ماجد ( منتخب قطر )
4- ايمن محجوب هلال كادقلي
وغيرهم كثير وهدا قبل مايمشي السودان
هيثم مدرب له شخصية لم تجدها عند اي مدرب
بعدين ياخي انت حقو تشوف الراجل بدايته كانت من تاريخ كم عشان تحكم عليه
يعني كلام الونسه بتاعك بين شخصين دا اكيد ظلمت الراجل ووصفته انه غير مؤهل
ما اهو عندك مازدا من تعادل مع غانا الان السودان عمل له عقد تدريبي للفريق القومي
الفاتح النقر عمره كم في التدريب والان يقود فريق الخرطوم كيف نتائجة
سيد محمد صالح الان مع فريق المورده كيف نتائجة
ياعمر الفاروق لاعب المراحل السنية ومنتخبات الناشئين عايزين مدربين بمواصفات معينة
وكلها تتمثل في المدرب هثم سلمان .
عمر الفاروق ... والله تزعلني انا تاني ما افتح خشمي معاك في كرة القدم يازول خلي عندك معايير تقيم بيها المواضيع وانت زول افتكر بتفهم كويس
| Quote: لست على علم بتفاصيل مؤهلات الكابتن هيثم التدريبية ولكن أعتقد أن لديه شهادات تدريب أولية لا تؤهله لتدريب فرق دوري ممتاز ناهيك عن منتخبات قومية وهنا يكمن التساؤل لماذا تم إختيار مدربين أقل تأهيل وخبرة في وجود عمالقة أمثال الفاتح النقر وسيد محمد صالح؟ |
ادا مثلا قلنا ما عندك تفاصيل عن مؤلات المدرب هيثم سلمان
لم تتابع دوري الثانية وكيف صعد الى دوري الدرجة الاولى
وفي الموسم الدي يليه احتل المركز الثالث في دوري الدرجة الاولى
واحتل المركز الاول في دوري السودان وبموجبة شاركة في دوري الولايات
بالله عليك شوف كم مدرب في كل الفرق التي واجهها المدرب هيثم وتفوق عليهم
هل كل هدا كان بالسحر ولا بمجهوده وعمله ومثابرته مع الفريق
معناها انا من كلامك دا ادا واحد مثل هيثم سلمان وانت تقول عليه غير مؤهل وفعل كل هدا
معناها نحن عندنا مدربين بمواصفات عاليه
وكلامي ليك دا كلو من باب التوضيح ليس إلا وليس مجاملا له
اما شخصي الضعيف له نظره وحسابات ومعاييراخرى لكل
هدا لاننا اصلا ينقصنا الكثير في مجال التدريب بالسودان .
| |
|
|
|
|
|
|
|
|
|
Re: هيثم سلمان لا يستحق التكريم يا الجزولي ووليد !! (Re: وليد عبد اللطيف)
|
الأخ وليد ..
صباحات الله بي خيرا ..
ح ابدا ليك من اخر كلام :
| Quote: طبعا كنت في حديث امس مع مدرب منتخب الشباب هيثم مصطفى |
كدي اول شي قول بسم الله عشان نقدر نتفاهم ..هيثم مصطفى لسة في تونس ولسة بيلعب 
| Quote: وجدت انه موضوع شخصي بينه وبين النادي |
انا فوق كلمتك قلت ليك خليني من الامور الشخصية وصدقني ومهما كان الموضوع ومهما وصل لي أقصى درجات الفجور في الخصومة ماف حاجة إسمها شخصي بينه وبين النادي !!النادي مرررة واحدة ؟؟
شوفت كلمة نادي دي نسفت أي حاجة شخصية لكن لو قلت مشكلة بينه وبين فلان رئيس النادي او فلان سكرتير النادي او علان غفير النادي بتفرق ..
انا كمان ما عايز اعرف الشي الشخصي ده لكن صدقني مهما ومهما حصل اصلو ما ممكن زول قدوة ومفترض إنو مدرب يمسك الفنايل من النادي حتى لو كان مشتريها هو !!!
بالمناسبة تربطني علاقة شخصية بي أشقاء هيثم وتحديدا الصديق الزول الحلو أسعد سلمان واللي عتبت عليهو لانو يوم الكورة دي زي وقف مع أخوهو ولقيتو ما جا الكورة فعرفت إنو حردان مع اخوهو وده عيب العلاقات الشخصية الإنت فوق نكرتو يا حبيب ..
| Quote: مايهمني تقييمه كمدرب في الاداء والانجازات وهل هو مؤهل ام غير مؤهل . |
في دي برضو حصانك خاسر فلا المؤهلات ولا الإنجازات ولا الاداء في صالح هيثم ..
ولو انت بتتكلم عن نادي ابو عنجة فانا اتكلم عن المنتخب القومي ولو بتتكلم عن التأهيل فياريت تديني سيرة ذاتية لتأهيل هيثم التدريبي والكورسات والشهادات العليا اللي بيتملكها ..
هيثم مدرب صاحب شخصية قوية دي حقيقة لأنو زول راجل وقلبو حار ففيهو نفس من مدربين زمان بتاعين حرارة القلب وكورة الرجالة ..
لكن صدقني هيثم لا يملك فكر تدريبي عالي وده ما بينفع بعد ما انت بي نفسك بتقول الكورة بقت علم ..
عشان كده هيثم فعلاً يصلح لتدريب فرق الحواري والدرجات الصغرى ابو عنجة حي الضباط ودنوباوي الاحرار فرق زي دي بتستمد قوتها من الدوافع حقت الحلة والمنطقة وحرارة القلب حقت دار الرياضة ..
Quote: والله تزعلني انا تاني ما افتح خشمي معاك في كرة القدم يازول خلي عندك معايير تقيم بيها المواضيع وانت زول افتكر بتفهم كويس
|
اها إنت زعلتني عديييل مش ح تزعلني !!!
زعلتني لأنك ما اتكلمت بي أي معايير ومكنكش في فرمالة هيثم وابو عنجة وصعدها للأولى من التانية مع إنك بتتكلم عن مؤهلات لكن ما عارف ما هي علاقة المؤهلات بي النتائج ؟؟
المؤهل حسب علمي تحصيل اكاديمي فني تدريبي وده انا شخصيا ما متأكد منو لكن حسب عرفتي هيثم لا يمتلك شهادات عليا في التدريب ..إمكن كورسات أولية وشهادات تدريبية أولية ..
Quote: الفاتح النقر عمره كم في التدريب والان يقود فريق الخرطوم كيف نتائجة
سيد محمد صالح الان مع فريق المورده كيف نتائجة |
بي حساباتك الانت اعتمدت فيها على تقييم هيثم فالفاتح النقر حقق إمتياز ..فالنقر ظل يحقق المركز التالت بإستمرار في الدوري الممتاز (يعني لا التانية ولا الأولى) الممتاااز .. ودي بي حسابات بسيطة ولو تم استثناء الهلال والمريخ لأنهم قاعدة شاذة فالخرطوم تلاتة هي افضل فريق في السودان لأنه يحقق المركز الأول بإستمرار ..
مش ده معيارك ؟
لكن تعال شوف إضافة لي معيارك ده النقر مؤهل وعندو كورسات عليا وشهادات تدريبية ورغما عن كده ما نال حظه في التدريب للمنتخبات ..
هيثم سلمان جاء في عصر شداد وهو محظوظ لأنه كان شدادي الهوى (انا كمان شدادي الهوى) بالمناسبة ..
Quote: - هاني السعودي
2- سعيد السعودي
3- ماجد ( منتخب قطر )
4- ايمن محجوب هلال كادقلي |
خليك مني انا يا وليد الما بعرف كورة ده ..كدي جيب أي زول في المنبر اسألو من جماعتك اللي في اللستة ديل وشوفو لو سامع بيهم (بورداب قطر ما معانا عشان بيكونو فرحانين بي بتاع قطر ده )..
إنت جادي يا وليد؟؟؟؟
دي لستة شنو الهزيلة دي؟؟
ياخ والله ديل تلقاك انت ما بتعرفهم خليني انا ؟؟
والله هيثم زاااتو تلقاهو ما بيعرفهم !!!
| Quote: يعتبر المدرب هيثم سلمان من اوائل الدفعة التي تحصلت الرخصة ( C ) التي تعادل دبلومه من الاتحاد الافريقي |
دي ما فهمتها غايتو ..
| Quote: وكلامي ليك دا كلو من باب التوضيح ليس إلا وليس مجاملا له |
لا يا وليد والله مجاااملاً له لمن بهناك ..
هيثم ما عندو البيخليهو يقوم بي نمرة خمسة من ابو عنجة لي منتخب قومي والعافية درجات مش؟
وهيثم ما ليهو حق مهما حصل يشيل فنايل ويقول ما بديكم ليها لي فريق في حجم ابو عنجة مهما حصل مش؟
| |
|
|
|
|
|
|
|
|
|
Re: هيثم سلمان لا يستحق التكريم يا الجزولي ووليد !! (Re: عمر الفاروق)
|
عمر الفاروق ... سلامات
Quote: كدي اول شي قول بسم الله عشان نقدر نتفاهم ..هيثم مصطفى لسة في تونس ولسة بيلعب
|
بسم الله عدلنا ليك الاسم وقلت ليك كلاهما مبدع في مجاله
Quote:
انا فوق كلمتك قلت ليك خليني من الامور الشخصية وصدقني ومهما كان الموضوع ومهما وصل لي أقصى درجات الفجور في الخصومة ماف حاجة إسمها شخصي بينه وبين النادي !!النادي مرررة واحدة ؟؟
|
يابوي دا كلام عواطف وشعارات ماقلت ليك كرة القدم وكل الرياضة علم وكنا نجهله .ما عايز اقول ليك اصبحت علم
في السودان عندنا مشكلة اعداء النجاح ودا عشان نحن بنعمل من غير منهجية ممكن تكون بتتعب
وتدفع دم قلبك في سبيل الفريق ويجيك واحد ينظر ليك وفي النهاية يطلعك اي
كلام ويهدم كا ماتعمله .
يفترض الناس تتعامل مع اللاعب والاداري بمؤسسية ومنهجية وادا المدرب هيثم سلمان رفض تسليم الفنايل لنادي ابوعنجة
في يوم نحن ومن معي انزلنا فريق الى درجة سفلى رغم تدخل الوزير نايل ايدام
وهدا كله للكلام الفارغ الدي يحدث في الاندية والشللية والمرتزقة التي تندس بين ادارات الاندية
Quote: بالمناسبة تربطني علاقة شخصية بي أشقاء هيثم وتحديدا الصديق الزول الحلو أسعد سلمان واللي عتبت عليهو لانو يوم الكورة دي زي وقف مع أخوهو ولقيتو ما جا الكورة فعرفت إنو حردان مع اخوهو وده عيب العلاقات الشخصية الإنت فوق نكرتو يا حبيب ..
|
اكيد عشان اخوهو وادا كان اخوك برضو كنت وقفت معه
Quote:
اها إنت زعلتني عديييل مش ح تزعلني !!!
زعلتني لأنك ما اتكلمت بي أي معايير ومكنكش في فرمالة هيثم وابو عنجة وصعدها للأولى من التانية مع إنك بتتكلم عن مؤهلات لكن ما عارف ما هي علاقة المؤهلات بي النتائج ؟؟
المؤهل حسب علمي تحصيل اكاديمي فني تدريبي وده انا شخصيا ما متأكد منو لكن حسب عرفتي هيثم لا يمتلك شهادات عليا في التدريب ..إمكن كورسات أولية وشهادات تدريبية أولية ..
|
عمر الفاروق انت بتتكلم في كرة قدم وللا حاجة تانية يظهر انت ماقادر تستوعب كلامي
او فاهم وبتكاجر بس
يازول امس في قناة الجزيرة المزيع قال الهلال هزم الجُمعية 17 / صفر
ابوعنجة فريق اخرج عمالة كرة القدم ليس مقياس عندك
Quote: هيثم مدرب صاحب شخصية قوية دي حقيقة لأنو زول راجل وقلبو حار ففيهو نفس من مدربين زمان بتاعين حرارة القلب وكورة الرجالة ..
لكن صدقني هيثم لا يملك فكر تدريبي عالي وده ما بينفع بعد ما انت بي نفسك بتقول الكورة بقت علم ..
|
ما قلت ليك انت بتتكلم بمبدا العواطف ممكن تقول النجاح الاول صدفة والثاني صدفة اما الثالث لازم تقول به نوع من العلمية والمنهجية
ودي حسابات كرة القدم ويستحيل اقول ليك كرة القدم علم لانها اصلا هي علم وكنا نجهله
لان هناك فرق بين بقت وبين جهلنا لها
Quote: خليك مني انا يا وليد الما بعرف كورة ده ..كدي جيب أي زول في المنبر اسألو من جماعتك اللي في اللستة ديل وشوفو لو سامع بيهم (بورداب قطر ما معانا عشان بيكونو فرحانين بي بتاع قطر ده )..
إنت جادي يا وليد؟؟؟؟
دي لستة شنو الهزيلة دي؟؟
ياخ والله ديل تلقاك انت ما بتعرفهم خليني انا ؟؟
والله هيثم زاااتو تلقاهو ما بيعرفهم !!!
|
اخيرا اتضح لي كلامك مكاجرة بس وإدا عندك شيء مع المدرب هيثم او لاتحبه لله في الله دا شيء تاني
لان هجومك له يفتقر للمنطق
Quote: يعتبر المدرب هيثم سلمان من اوائل الدفعة التي تحصلت الرخصة ( C ) التي تعادل دبلومه من الاتحاد الافريقي
دي ما فهمتها غايتو ..
ياخي معقول افتكرت زول متابع لما بتقول المدرب هيثم غير مؤهل
Quote: وهيثم ما ليهو حق مهما حصل يشيل فنايل ويقول ما بديكم ليها لي فريق في حجم ابو عنجة مهما حصل مش؟
|
الحصل دا عادي وضربت ليك مثل بصلاح ادريس انت وقت سمعت الونسه دي ما كان تتحرى عنها وعن مسبباتها بالنسبة لي لاتعني شيء لاني اتكلم عن فكره التدريبي فقط ليس إلا
| Quote: لا يا وليد والله مجاااملاً له لمن بهناك .. |
ياريت كنت زيك لو يُجدي التمني حبيبي يكون معايا
في الاشجار نقيل ... و بالاغصان نميل
| |
|
|
|
|
|
|
|
|
|
Re: هيثم سلمان لا يستحق التكريم يا الجزولي ووليد !! (Re: وليد عبد اللطيف)
|
عمر الفاروق .... سلامات
اونسك في الرياضة في بلدنا شوية لاني كنت لصيق ولصيق جدا
في هذا المجال اذا مع الادارة او وسط اللعيبة والاعلام
تعرف شغلنا بيتم بعفوية جدا من غير دراسة وصديقي وصديقك
لذلك تجد الاداره كل فرد يغرد في سرب لحالة وهذا كله يصب في حال مسيرة الاندية
وعندما لم تكن هناك ادارة حكيمة وحاكمة وقوية وتفقد للعلمية تصبح كما تنظر اليوم و والدليل على ذلك عندما تنظر حولك
اذا مسكت الفرق والمستويات كل ما تتقدم السنين تجد المهارات تقل وحتى معرفة الادارة والعلم بمقوماتها
لانه دخل وسطها سرطان مدمر اسمه الاعلام ويعتبر اكبر آفة على كرة القدم
وهو السبب الاساسي والرئيسي في ما وصل اليه مستوى بلدنا في مجال الرياضة يعني بقروشك وعلاقات ممكن يعملوا ليك منالفسيخ شربات
تدار الفرق وقراراتها تطلع من المزارع وبيوت السهرات والحفلات وامكن تجد بعض اللعيبة يشاركون في صنع القرار
وديل الناس الزينا الواحد يكون لاعب وفي نفس الوقت يرشح مدرب ويمشي مع رئيس النادي لكي يحضرة
وهذا ما فعلته انا سابقا كلاعب عندما رشحت المدرب الشيخ ادريس وعندما اعتذر رشحت برهان تية وهذا غلط وانا اعترف به
وهذا هو حال الكره في السودان ياعزيزي ولاتحزن
وممكن عادي واحد ماعندو علاقة في بكرة القدم يكون تاجر او عندو قروش ويجي يقيم اللاعب والمدرب
وكما قال اخونا الرشيد استرليني (لاعب الهلال السابق ) انا سجلوني بتاعين الاورنيش وشطبوني بتاعين الاورنيش
يعني مافي مدرب سجلة ولا قيمه .
وكما قالها المدرب سليمان فارس عندما سأله احد الصحفيين ما هي اسباب تدهور الكرة في السودان
وبذكاء وفهم من سليمان فارس حول السؤال للصحفي
وقال له : هل انت عندك علاقة بكرة القدم
الصحفي : لا
قال له : طيب اكتب واحد دي من اسباب تدهور كرة القدم
كلامي دا كلو ليك عايز اوصلك الى شيء فيه نوع من العلم اسمه (الاتجاه السلوكي ) وينقسم الى اثنان
اتجاه سلوكي في نفس الاتجاه : مثال تسمع ناس ما بتحب هيثم سلمان وتؤثر بك وتقوم تردد وراهم من غير ماترجع للعلمية او التجربه
اتجاه سلوكي مضاد : مثال تسمع ناس ماتحب هيثم سلمان ولم تتاثر بهم وتثبت لنفسك من خلال التجربة والتقييم
عشان كدا كلامي فوق كنت بقول ليك ابعد عن العواطف عند تقييم الامور .
.
.
تعرف انسان في عُمر المدرب هيثم ووضعة الحالي كان تلاقي اسمه مكتوب في كل جريده صباحية اذا تعامل كما يتعامل الاخرين
يصرح هنا ولقاء هنا وانت تعلم ذلك جيدا ولكن حسب احتكاكي به انه لايحب مثل هذه الامور .
واهم سبب عدم وضع الادارات السابقة نظام وارضية ثابته للاجيال المتعاقبه تعمل عليها
ولكن الناس اصيبت او تمسكت بعلاتها والفاسد بها وورثته للاجيال القادمة .
.
.
وكن بخير يابطل
| |
|
|
|
|
|
|
|
|
|
Re: هيثم سلمان لا يستحق التكريم يا الجزولي ووليد !! (Re: وليد عبد اللطيف)
|
وليد يا عبد اللطيف..
يا زول مساك بي الخير..
عارف يا حبوب انت سرحت أو خلينا نقول فجأة لفيتني لي حتة والله ما كانت في خاطري لا من قريب ولا من بعيد الا وهي شخصنة المواضيع ..
صدقني انا ما بعرف هيثم نهااائي بسبب إني لما كنت هناك هو كان مغترب ولما رجع أهو نحن برالمة الغربة ديل جينا هنا..
الحاجة التانية انا ما من سكان ابو عنجة انا من سكان العباسية ورغماً عن كده كل اصدقائي هم اولاد البواسل اللي لاحقاً كلهم بيبقوا ولاد ابو عنجة وكنت محظوظ إني إتمرنت تمرينين تحت قيادة نادر كتكوت لما كان مدرب لي ابو عنجة (تمارين ساي جري دم يعني ما تسجيل:) )
أحببت نادي ابو عنجة وكنت بمشي بالليل العب فيهو البينغ بونغ ونجمجر ونضحك في فلان وعلان ..عايشت بعض من صراعات النادي من بعيد سماااع وطشاااش يشاكلو عتيق الله يرحمو يحرد يجي عمك عصام فتح الله ويحرد والناس تقول اولاد فتح الله غطسو حجر النادي وبررضو تلقاهم ما فارقو النادي..يقولوا ليك عتيق باااع عتييق قبض ..كنت بشوف صلاح ليبيا بي كرسيهو في ميدان ابو عنجة كنت بشرب من مزيرة المواتر الفي الجهة الجنوبية وكنت بصلي في زاوية اولاد اب كفة ..
ما عندي اي شخصنة مع اي زول والله حبيت ابو عنجة لله في لله وحرقتني قصة إني أسمع زول ود النادي يعمل كده خصوصاً وإنو زول مدرب قومي زي ما بتقول..
عارف لو كنت بشخصن كان رخيت أضاني وقلت ليهم أها أحكو لي الحصل منو شنو وأكيد أي زول حانق عليهو كان حا يحكي لي بي صورة سلبية عن هيثم مش؟
لما دخلت الدار لقيت الخبر عااامي المقصورة الغربية والناس كلها عارفة ابو عنجة لابسة سيت اشتروهو الليلة ومش كده بس الولاية دعمتهم بي سيت وطلع صغير وبدلوهو و و و و قصص قصص يا حبوب..
يا وليد انت لحدي اسة ما وريتني مؤهلات هيثم التدريبية جبت لي سطر واحد لي شهادة وقعدت ..
وتميت لي الباقي ابو عنجة ..
الفريق القومي اتجاوزت لي سقطات هيثم وكنكشت لي في الترتيب الرابع في بطولة اقيمت في السودان ودي سقطة ما انجاز مش؟
امثال هيثم في السودان كتااار انا وانت وغيرنا كلنا مدربين مش؟ السودان كلو بيفهم كورة بس وين المؤهل ..
Quote: من اليمين: هيثم سلمان ووليد عبد اللطيف و عمر دكتور نادي الاتحاد السعودي
ياربي هيثم يكون جايب الدكتور ده قاشر بيهو |
انا عندي صور مع الدعيع حارس الهلال جاني في المستشفى تفتكر جاني عشان شنو ؟؟؟
يا وليد والله بالغت في توصيل فكرتك ياخ ..!!
بجيك لي الموضوع الأهم اللي طرحتو عن الادارة ..
| |
|
|
|
|
|
|
|
|
|
Re: هيثم سلمان لا يستحق التكريم يا الجزولي ووليد !! (Re: خالد حامد الجزولي)
|
وليد يا حبوب:
والله كلامك ما فيهو أي بلاغة واضح وصريح وانا فهمتو ..طبعا ما اظنك بتكون افتكرتني بقول ليك هيثم قاشر بي دكتور نادي الاتحاد مش؟
بس حا اديك فرصة تلفها وتلفها لحدي ما تقدر تربط لي بي المنهجية ووجود طبيب الاتحاد في تكريم هيثم !!!
مع إنو عادي والله ما فيها حاجة كتيرين بيكونو جو التكريم ده وهم من أصحاب المعرفة والدراية في كل المجالات فما تحاول تضغط نفسك شديد عشان تفسر وجود طبيب الاتحاد..
بالمناسبة يا وليد ما عكلتة مني لكن لسة ما عارفك ليي بتلف من الموضوع الاساسي وتجيب لي شهادات المدرب هيثم وتأهيله الأكاديمي الكروي والكورسات التي تلقاها والدرجات التي ارتقى لها في شهادات التدريب العليا ؟؟
وبرضو توريني رأيك في تصرف هيثم اللي فياولهلة الأولى استنكرته ولكن بعد مكالمة تلفونية إقتنعت بي وجهة نظره بعد ما يبدو إنك عرفت إنها مشكلة بين هيثم الادارة فهل يشفع مثل هكذا سبب في إنو الزول يقفل ملابس فريق في دولابو ؟؟
ياخ هو أصلا هدوم زي دي بتكون مع المدرب ليي ؟؟هو مش مفروض تكون في النادي؟؟ ومفتاح النادي ده مش ما بيكون عند المدرب؟؟ أها عليك الله إتخيل زي الكلام ده حصل في البلاد اللي انت قلت صحافتها كانت حا تكتب عن مدرب فعل الفعايل ونقل فريق من وإلى تتخيل مدرب اتصرف كده ممكن كان يكتبو فيهو شنو ؟
بالمناسبة يا وليد وعشان ما تخمني ساي ..سمعت بي فريق إسمو النسور؟؟؟ ااااي اللي هو كان الهاشماب زماان درجة تالتة ..عارف الفريق ده أسة وصل وين ؟؟ بيعلب في التأهيلي حق الممتاز عديييل يعني من التالتة للمتاز !!
بالمناسبة شهادة حق ابو عنجة ضربت النسور ده تلاتة في دوري الأولى لكن لو بي فهمك ده فمعناها مدرب النسور أولى بي تدريب المنتخبات من هيثم سلمان مش؟
في إنتظار مؤهلات وشهادات هيثم سلمان العليا التي قادته لتدريب المنتخب الوطني !!
| |
|
|
|
|
|
|
|
|
|
Re: هيثم سلمان لا يستحق التكريم يا الجزولي ووليد !! (Re: وليد عبد اللطيف)
|
وليد يا حبوب:
| Quote: عمر انا بعد كدا برقم ليك تعليقك لو عندك اي تعليق رد عشان ننتقل الى نقطه اخرى |
بس كده ريحتني في كنكوجي..
خلينا نبدا بي رقم واحد ..
عايز مؤهلات هيثم سلمان الاكاديمية في مجال التدريب اللي أهلتو وبقى مدرب منتخب قومي ..
بس..
صعبة دي يا مرسي؟
لأنو بي جرجرتك دي شكلك بتماطل لحدي ما هيثم يمتحن الكورسات دي عشان تجي تردمني بيها هنا مش؟
Quote: عشان تطور نفسك لابد من البحث في المجال او المنشط الذي تزاوله اين ماكان
وكما تعلم الاندية السعودية والتي تأثر بها المدرب هيثم سلمان مازال لصيق بهم من اجل
المعرفة والتطور وكان في هذا الحقل بعض من المدربين واكيد اذا اردت شيء
او معلومة اضافية ممكن يكون عن طريق توطيد العلاقة بمن هم افضل منك معرفة
ومازال المدرب هيثم متواصل مع نادي الاهل ونادي الاتحاد
لكي ينهل من هذه المدرسة التي سبقتنا
ودا واحد من رسالتي لك بصورة هيثم مع دكتور فريق الاتحاد
وانت فسرتها شيء اخر لشيء في نفسك |
وليد إنت جادي؟؟؟
إنت بتغش فيني ولا بتغش في نفسك ؟
هيثم ده انت قايلو إختاروهو مدلك ..؟؟
سبب واحد يخليهو يبدا بي الدكتور ماف.. اللهم إلا اذا ماشي يفتح ليهو عيادة بتاعت طب رياضي ..
لكن لو عايز تقنعني بي منهجية هيثم كان يعزم مانويل جوزيه طالما القصة تدريب..
هيثم والله مع كامل إحترامي ليك لكن كمية السطور اللي جيت تبرر بيها قصة الصورة حقتك دي حتى لو انا صدقتها والله انت ما مصدقا ..
منهجية ؟؟؟؟تطور؟؟ انت بتلقى الكلام الدراب ده وين ؟
Quote: بصراحة اتعبتني وارهقتني وكل مره بترجعني
ابدا من الصفر ... |
كلامك صاح ..لأنو الصفر اإنت قاصدو هو شهادات الكابتن هيثم التدريبية وانا معاك من هنا لحدي ما تجيب لي المؤهل التدريبي العالي اللي أهل هيثم سلمان يبقا مدرب منتخب قومي !! أسة عليييك الله طلبي ده صعب ؟ والله يا وليد قصدي المعرفة بالجد والله ..عشان اعرف الناس دي بيختاروها كيف ..ولو جبت لي شهادتو يا دار ما دخلك شر وتحية كبيييرة لي الكوتش هيثم وبس..
اسة دي عايزة لياقة ولا نص كم ؟
وهييي هييي جووة نادو لي ناس برة ..
والبرة يدخل جوة والجوة يطلع برررة ..
| |
|
|
|
|
|
|
|
|
|
Re: هيثم سلمان لا يستحق التكريم يا الجزولي ووليد !! (Re: عمر الفاروق)
|
عمر الفاروق ... سلامات
Quote: بس كده ريحتني في كنكوجي..
خلينا نبدا بي رقم واحد ..
عايز مؤهلات هيثم سلمان الاكاديمية في مجال التدريب اللي أهلتو وبقى مدرب منتخب قومي ..
بس..
صعبة دي يا مرسي؟
لأنو بي جرجرتك دي شكلك بتماطل لحدي ما هيثم يمتحن الكورسات دي عشان تجي تردمني بيها هنا مش؟ |
الله يريحك دنيا واخره
جرجرة شنو يازول الجري والجرجرة دي ماحقي
| Quote: يعتبر المدرب هيثم سلمان من اوائل الدفعة التي تحصلت الرخصة ( C ) التي تعادل دبلومه من الاتحاد الافريقي |
احكي ليك شويه (على عثمان ) الكوارتي صاحبي الايام دي قالوا
قلع الجلابية ولبس ترانج وقاعد يدرب فريق الرابطة
ويملطش ليك في الفرق واي فريق واي مدرب يرشهم ليك في الملعب
شفت كيف الحته دي يارب تكون استوعبتها .
لان بعد ذلك الاتحاد الافريقي بصدد عمل رخص للمدربين
واذا لم تحمل هذه الرخصة غير مصرح ليك بقيادة اي فريق
شفت كيف ياحبيب
وهيثم من اوائل الدفعة التي حصلت على الرخصة ( C ) المقدمة من الاتحاد الافريقي
ودي غير الكورسات الاولية التي يحملها
يعني كم مره اكرر ليك موضوع الرخصة ( C ) دي
بالبلدي كدا انت لو ماعندك رخصة بتقدر تسوق عربية في الخرطوم
كان تقول لي ياوليد اشرح لي موضوع الرخصة التي تمنح من الاتحاد الافريقي عشان اشرحها
ليك او يجيك واحد تاني ويشرحها
تقعد تجرجر تجرجر تجرجر
وكما تقول الراقصة المصرية
ياحبيبي ركز وانجز
Quote: وليد إنت جادي؟؟؟
إنت بتغش فيني ولا بتغش في نفسك ؟
هيثم ده انت قايلو إختاروهو مدلك ..؟؟
سبب واحد يخليهو يبدا بي الدكتور ماف.. اللهم إلا اذا ماشي يفتح ليهو عيادة بتاعت طب رياضي ..
لكن لو عايز تقنعني بي منهجية هيثم كان يعزم مانويل جوزيه طالما القصة تدريب.. |
انا لله وانا اليه راجعون
تعرف اديتني احاس بأن كلامي زي غناء الحقيبه زمان لازم تفك شفراته
قلبي انشغل بهواك والحكمة عيني لاجه ومجافية النوم يا اربعيني
هناك محبوبي راجيني == انا السهران وكمل نومي
صغير لاجاب ولا ودا == جمال التين مع الوردة
حلاة في خديك الفصدة == حبيبي السكنو العرضة
Quote: كلامك صاح ..لأنو الصفر اإنت قاصدو هو شهادات الكابتن هيثم التدريبية وانا معاك من هنا لحدي ما تجيب لي المؤهل التدريبي العالي اللي أهل هيثم سلمان يبقا مدرب منتخب قومي
|
النبي فوقك وخصمتك بالنبي تاني كان تعيد كلام مؤهلات هيثم دا
لان من البداية قلته ليك بس انت تشيل وتعيدو وتكرروا وتجرجروا
لانك ماعايز تركز معاي وشايف نفسك مامكن تسأل لانك عارف كل شيء
تعرف زمان ياعمر الفاروق
لما ندخل دار الرياضة كان ليها قانون انك تحترم الناس البتتفرج دي لان بها جميع الطبقات
و هل تصدق زمان كان معروف مكان كل مجموعة ودي حتة منو وبقعد فيها منو
اها جماعتك ديل مرات الفريقين اللعبين ضد بعض ديل منو ماعارفين
وتسمع كفشات ونكات وضحكات امتع من مشاهدة كرة القدم
وناس تدخل الدار عشان هذه الاشياء فقط وليس لفرجة كرة القدم
اها احيانا ناس تقوم تنقل ونسهتم دي للصحف والمجلات
وتكون مغلوطة ومجرد ونسه بس فقط ولا تخدم الرياضة لا من بعيد ولا من قريب
يعني زي قصتك الجبتها لينا هنا وهي انك سمعت ونسة نفرين قالوا المدرب هيثم شايل الفنايل وقفلها في الدولاب
وانت ود الحلة وود النادي ودي اشياء عفى عنها الزمن الناس اصبحت تتعامل مع الرياضة باحترافية
ود حلة شنو ود النادي شنو وكلام فاضي شنو .
Quote:
وهييي هييي جووة نادو لي ناس برة ..
والبرة يدخل جوة والجوة يطلع برررة .. |
اما هنا جبت كلام خطير وذكرتني ليالي بحري سر الهوى ومجتمعاتها الرياضية
وكيف كانوا يتغنون عندما يذهبون لاداء المباريات الخارجية
جيب الحبوب يامجدي شفى للقلوب يامجدي
شفي للقلوب يامجدي الدناقله جنوب يامجدي
وهييي هييي بره جيبو لي ناس جوه
اسرع تعال يامجدي عندي ليك سؤال
عندي ليك سؤال يامجدي في الدناقله شمال
===
والليله وين انت ماشيء ماتنتظر وداعي
كبري بحري الاشاره اشكرك بحرارة
| Quote: والله يا وليد قصدي المعرفة بالجد والله ..عشان اعرف الناس دي بيختاروها كيف |
طبعا الناس ديل جابو هيثم ما عشان هو افضل من النقر او سيد محمد صالح كما تقول
بل لكي يضاف الى الاجهزة الفنية ويستفيد استفادة مستقبلية وهذا لصغر سنه
والان تم ترشيحة ماعارف رئيس مال شنو كدا وفاز وسط مرشحين من الخرطوم وبحري
ووجد الدعم الكبير والمساندة من ناس امدرمان
ياخي انتو المدرب هيثم دا لو ماعاجبكم رسلوه لينا بحري .
------------------------------
نشوف بعد كدا نقطة غير مؤهلات المدرب هيثم سلمان عشان صرفنا فيها عربي كتير ممكن ( رقم 2 )
| |
|
|
|
|
|
|
| |
عمر الفاروق
وليد عبد اللطيف
خالد حامد الجزولي
فيس بوك
تويتر
انستقرام
يوتيوب
بنتيريست