|
هيا بنا لخصخصة السودان !!!!!!!!!!!!!
|
شايف بعض الناس متضايقين من خصخصة شركات ومؤسسات القطاع العام
أنا في رأيي حقو نخصخص السودان ذاتو
نبيعو عديل كدا لمؤسسات مالية عالمية بمبلغ جامد بحيث ييكون نصيب الفرد السوداني (عاينوا فرد دي كيف يعني لوالبيت فيهو خمسة أب وأم وثلاثة عيال يبقوا خمسة أفراد) واحد مليون دولارأضربوا المليون دولار في عدد السكان مع وضع زيادة مقدارها 2% إحتياطي للمواليد الجدد والذين يمكن أن يولدوا قبل إتمام الصفقة طبعاً الذين سيتوفون قبل التوقيع على إتفاقية الصفقة خارج الحساب شوفوا المبلغ يطلع كم مليار دولار وخلونا نبدأ نفتش في زبون شراي
أها شن قولكم ؟؟ وكدا نكون حلينا مشكلة الكيكة وتقسيمها وتاني لا يكون في ناس هامش لا ناس مركز أي زول يشيل مليون دولارو ويطلب الله ولو عاوز يكون من المقيمين في السودان ما في مشكلة بس ما عندو أي دخل بإتخاذ قرارات سياسية ولا حزبية ولا عندو أي فرصة لأي معارضة أو اي حاجة من دي إلا بعد أن يقوم المشتري بسن القوانين، وأكيد من شروط البيع أن يقوم المشتري سواء كان بنك أو مؤسسة مالية أو أياً كان من كيان أن يطبق قوانين ديمقراطية تكفل الحريات وتؤسس دولة مدنية وعلى كيفوا إنشاء الله يجيب حكام من أي حتة وطبعاً الحكام حيكونوا بمثابة مدراء لشركة وطبعاً حيجيب إداريين من مختلف الجنسيات وبالتالي نضمن إحترام التباين الثقافي والعرقي وكل الأغاني الوطنية والشعارات العرقية ديك تكبوهافي الذبالة ما نسمع لينا واحد تاني يقول نحناأولاد جعل ولا واحد يقول أنا حبوبتي مهيرة أو جدي المهدي دا كله حيكون ورق وإندفق
غايتو أنا أمبارح كنت حلمان لي بموضوع بيشبه الفكرة دي بس ما قدرت إتذكر أسماء واشكال الإداريين الذين سيديرون شركة السودان للإستثمار الصناعي والتجاري والزراعي والتي شعارها أو رسالتها "تأمين الغذاء للعالم أجمع"
وتصبحوا على خير
عاصم فقيري
|
|
|
|
|
|