|
|
 استراحة السبت
|
كيف اصبحتوا اهلنا الطيبين انشاء الله الفة و محبة و النفوس مطايبة و الثقة فى الله قوية .
انشاء الله ربنا يصلح الحال و يشفى المريض و يرد الغائب و يجنب بلدنا شر الفتن ما ظهر منها و ما بطن.
اهلى و احبابى فى واحد غنيان لقى ليهو و احد فقران قال ليهو هاك العشرة جنيه دى امشى ورى الوادى دا
شوف سعدى كيف . صاحبنا اخذ العشرة جنيه زمن الجنيه جنيه و قام مشى نمن جاءخلف الوادى
لقى ارض خضراء حارسها واحد قال ليهو دا سعد منو قال ليهو سعد فلان الفلانى .
اها صاحبنا قال امشى لقدام عشان يشوف سعدو هو كبف نمن مشى لقدام لقى ارض جدباء حارسها واحد متسود
بعرة قام سآلو انت سعد منو قال ليهو سعدك انت قال ليهو سعدى انا ؟ قال اى قال ليهو و الله تكتر
كلامك اشيلها و ارقد على البلاطة . عليكم الله شوفوا الفقر بنحاش .
كمان قالوا فى واحدين ابوهم غنيان لكن بخيل بخل شديد قروشو دى ما بلعب فيها اها الرجل دا توفى .
اولادو قالوا مابندفن ابونا الا نلقى و احد يندفن معاه عشان يجى يورينا حال ابونا كيف فى القبر .
فى و احد قال ليهم فى حطاب كان اديتوه عشرة جنيه بندفن معى ابوكم . اها فى كلامهم داك الحطاب جاء
سايق حميرو مليان حطب اها حكوا ليهو القصة طوالى قال ليهم موافق .
قالوا ليهو خلاص نحنا بندفنك مع ابونا و الصباح بدرى نجى شلع القبر قال ليهم موافق .
اها نمن دفنوا صاحبنا مع ابوهم جوا ملكين يسآلوا الميت فوجدوا و احد زايد بعد دا الملائكة خلوا
سؤال الميت بدآوا يسآلوا فى الحى . اهايا زول انت من وين قال ليهم انا من ناس الدنيا اها
انت الجابك هنا شنو قام حكى ليهم القصة . قالوا ليهو طيب انت شغال شنو قال ليهم حطاب اها
الحطب بتقطعوا بشنو قال ليهم بفاس . اها الفاس دى جبتها من و ين ؟ قال ليهم اشتريتها بقرش و نصف .
اها القرش و نصف جبتهم من وين ؟ القرش عرف الجهة الجابو منها بس التعريفة ما عرف جابها من وين .
قالوا ليهو ما عرفت جبتها من و ين بركوا ليهو ام دمس خفسوهو الاراضى السبعة .
تحت لقى ملكين قالوا ليهو التعريفة جبتها من وين برضو ما عرف المكان الجابها منها ضربوهو لقيت ما
طلع الى اعلى فى النهاية جوا اولاد الميت كشفوا القبر صاحبنا طالع ناطى و جارى .
اولاد الميت يكوركوا فى الراجل يا فلان اقيف و رينا حال ابونا كيف اتلفت عليهم و قال ليهم
ابوكم فوق سابع السموات و انتوا بفوق ليهو انا من ليلا اسود فوق تعريفة .
|
|
 
|
|
|
|
|
| |
صديق مهدى على
ABUHUSSEIN
osman righeem
محمد عبدالرحمن محمد
فيس بوك
تويتر
انستقرام
يوتيوب
بنتيريست