|
|
 رحبو معى بزوجى .... مجتبى محسى
|
تفأجات اليوم بكتابة مجتبى فى المنبر
ولشدة ما سرنى هذا
شهور بل سنوات وانا احاول اقناعة بالكتابة وفشلت
كم مرة قرأت الناس يشكرو فى زوجاتم هنا
وكنت بتكيف شديد اقول ياربى كدى ان ننهز الراجل ده
يمكن يبدأ يكتب فى البورد وشوية شوية اجيب رجلو
امكن يرفع راسى بكلمة تانى اقول هووووى القصة دى ما مضمونه
يعنى مجتبى اليوم كلو شايل همى وهم اولادى
وجارى فى البلد الصعب ده جرى الجن زيو و زىباقى خلق الله
لا مرتاح بره لا مرتاج جوة
من يجى داخل يا بابا انا عاوز داك (ده كما لحقو اول باول بالتلفون)
يا حسام يا ولدى اول سلم على بعدين قول عاوز شنو
دى نصيبة شنو دى يا اخوانا
يا بابا ما شفت الليله محمد خبطتنى
لا هو اول عضانى
والغلاط يبدأ
واعجبكم انا اجى من هناك ناتلة بالله شوف ولدك ده اتكلم
معاهو انا خلاس فترت ..ما ممكن الواحد يجى من الشغل القى مليون شكلة
التقول هو جاى من الجيم والا من جلسة مساج
يا بت خليك معقوله
(وبعدين انتى يشكرو ليك شنو....لوووول)
اها زى كل الازواج قدر ما قزازتنا تتلولح يجتهد عشان يحصلها
ما تجى داقة الواطه وكان قالت كده زاغت يلحقها بيدينو كرعينو
كم احتمل (يا جماعةمن هسه "كما احتملت"...لوووول) عصبيتى وامراضى الكتيرة
والعجب العجاب بعد مصيبتنا الكبيييرة فى غدويتنا
يا سهام قوى ايمانك يا سهام اصبرى
يا مجتبى انا حلمانة انا حاسة انو ده حلم وانا ح اصحى منو
والقى بتى تانى فى حضنى
ياسهام قول بسم الله واستعيذى من الشيطان غادة ماتت ماتت ماتت
اوعك تقعى فى الاوهام
نحن زاتنا ح نموت ونحصلها اتذكرى محمد وحسام
بتذكر فى ايام البكا جاء نادانى لبعض من زملائنا
فجاءة لقيت انا وهو واقفين جنب بعض والناس بترفع الفاتحة معانا
وبيمدو ايديهم بالدور يسلمو ويقولو لينا البركه فيكم
الموقف كان اكبر من صبرى
لقيت نفسى بترمى عليهو واقول ليهو الحى وووب الخاص بينا
وارسلته همسا فى اذنه مجتبى معقول دى وقفتنا لغادة
انا كنت قايلة ح نقيف كده فى مدخل صالة افراح
انا كنت بحلم بوقفتنا دى وقاعدة اخطط ليها واحلم ليها
مسكنى شديد وقال لى برضو همسا نعمل شنو يا سهام
الله اراد لينا كده استغفرى وارجعى
لحظتها اندهشت داخلى وقلت مجتبى ده ما طبيعى
فانا اعلم من هى ديدى بالنسبة له
وكيف هى عندو
خفت عليهو شديد وبقيت شايله همو
واوصى الناس القراب يا جماعة خلو مجتبى ده يبكى
بكوه بالقوة انشالله
غدوية ستو وست دلعو
ياسهام ياخ غادة دى متضايقه انك حميتيها تمشى الحتة الفلانية
ياخ البت دى عندها امتحانات
وما قاعده تذاكر كويس (ما كنت عارفه انها مفارقة)
ياخ عليك الله خليها تمشى ياااخ عاين ليها خاطرها مكسور كيف
صحباتها كلهن ماشات
ايوه ما انت لازم تكسر كلامى ح تخرب البت دى بالدلع
يا ماما ياخ كلها بت وااااااحده (بيجرها فعلا طويله كده)
غدوية تعالى كالعادة ابوك سمح ليك تمشى وانا كلامى لحستو
ااااااااى شكرا يا بابا
وانتى زاتك ياماما
تقع فينا بوس واحضان
اقول ليها امشى يا مستهبلة
والله انا ما مستهبلة ياماما
اوعدك لما اجى اقرأ
قدر ما كنت بزعل منو حينها
قدر ما انا سعيدة الان انو كان بعمل كده
والا لما تكون دايرة حاجة
نقوم نقول ليها حسب ظروفنا والله هسه مافى سكة
خليها اخر الشهر
تقوم مرات تنقنق لكن انا محتاجة ليها هسه
بعد شويه ممكن تسترجع تجى تقول لينا
ok I understand
يقوم هو بعد شوية يلف عمتو يقول ليها قومى يلا
نجيب الانتى عاوزاهو
تقول ليهو لا والله يا بابا ما مشكله
ما مهم يقوم يهيج انا البقرر مشكله والاما مشكله
يلا
اجى من هناك اقول ليهو طبعا الغالى يرخص فى سبيل دلوعتك
هسه لزومو شنو البت واقتنعت طبعا انا بتقدر عاد ما ستك وستنا كلنا
يقوم يتلفت على ويقول لى يا سهام دى بت وااااااحدة
ما نكسر خاطرها
والبت عينها بتتملى من بيت ابوها
لااذيع سرا و لا انوى فتح عزاء اخر فى البوست ده
لكنى اقول لولا صبره وشده من ازرى لما صبرت انا
من وفاة غادة بقى عندى ايام مخصصه لشى محدد محصور
فى ايام الزهج الشديد والشكل ..ايام البكا الجد... ايام السكات..ايام الكلام الكتير
اليوم كلو ادور كلام عن غادة
مع مصيبتو كمان قادر يفهم ده و يطول حبال الصبر
والله وانا بكتب هسه
حسيت بانى كترتو شديد
هو ايضا موجوع ...
مجتبى محسى كثير من بينكم يعرفونه ويعرفهم
ولكن هو يعرفكم بوقفتكم معنا
يعرفكم بعزاءكم الحار
يعرف بانو فى البورد ده غادة ابواتها كترو
حتى صارو يزاحمونه
اساسى .. احمد التجانى .. عبدالرازق ..ابوبكر سيداحمد...كيكى..تمبس..الفاتح ميرغنى...
...سامر...الفحل...رضا...كوستاوى....عمر بوب...قيقراوى..ابوجهينة....ناجى الملك..بكرى ابوبكر
يا جماعة هوى انا اتورطت فى الاسماء
كثيرين و كثيرين اتصلو به معزيين
والله نحن ما بنعرفك يا مجتبى لكن غادة المتنا شديد
البركه فيكم
جانى مرة قال لى يا سهام ياخ ناس سودانيزاون لاين ديل
بيتصلو كتير وانا زعلان شديد انو ناس كتار منهم ما بعرفهم
وما قدرت احفظ اسمائهم
وزعلان اكتر انو انا هسه نفسى اشكر كل زول فيهم واحد واحد
لكن الظروف الكانو بضربو فيهو كانت صعبة شديد
قلت ليهو ياخ ما تشيل هم
الناس ديل ضاربين يتفشو لى رقبتهم.. وبعدين يعزونا..غادويتنا دخلت عليهم شديد
وهم اسياد من بفهم اسباب سقوط الاسماء من الذاكرة
ولا اعتقد انو اى واحد فيهم كايس ليهو شكر
اقبلو عذرو وعذرى حقيقى الظرف لا كان فى الخاطر ولا فى البال
(فكرت امسح الاسماء لكن قلت يا بت يمكن الذاكرة تجى و نقدر نوفى كلو زول حقو)
عارفاكم ما بتدورو ليكم شكر لكن اهو حتى يرضى مجتبى
المهم وقفتكم دى و وقفة بكرى من الجائزة
شجعوه ان يأتى ليكون بينكم
فرحبو به معى
اول مداخلات لمجتبى تجدوها هنا
إلى غادة مجتبي المحسي فى فردوسها ....."جائزة غادة للكتا...المتميزين من الشباب"
___________________________________
بلاهى فطو مداخلتو الاولى فى الصفحة
لانو دى كنت انا .......اااااى بدينا كان عجبكم:)
_________________________________________
مجتبى مرحب بيك
كنت اتمنى ان تكون بدايتك هنا غير ما اتت عليه
ولكن لنا الصبر الجميل وانت خير من صبر
|
|
  
|
|
|
|
|
|
|
|
Re: رحبو معى بزوجى .... مجتبى محسى (Re: Siham Elmugammar)
|
الله يا سهام ما احلاكم معا.
ويا مجتبى وسهام نحن فراحانين بيكم معا.
ولكن نكثر من ذكرى غاده هنا....فقد اسرفت سهام
وبكيت كعادي كلما اقرا حروفها.
مجتبى خير فعلت بقدومك لهنا
وصدقني هذه اول بركات غاده
فقد اعادتك فاعلا بين بني وطنك بغيابها.
اعمل ان حزن رحيلها كبير.....
ولكن وجودك هنا سيطلعك على احزان خرافيه
ربما صارت هي العلاج لكما معا لهذا الفقد الفاجه و الرحيل المبكر.
مرجبا مجتبى محسي
منور المنبر
قامة سودانيه اصليه.
ربنا يحفظكم لبعض ولصغاركم.
| |
|
|
|
|
|
|
|
|
|
Re: رحبو معى بزوجى .... مجتبى محسى (Re: عبدالكريم الامين احمد)
|
مراحب كتيرة بالاخ مجتبى محسى
تعزينا الحارة له فى فقدكم الكبير، و الحمد لله الذى الزمه الصبر على هذا المصاب الاليم. و تعازى لكى عزيزتى سهام، اتمنى ان تحولى حزنك على وحيدتك الى طاقة اٍيجابية مفيدة لكى و للمجتمع من حولك. جائزة الكتابة الابداعية باسم غادة خطوة جميله فى هذا الاتجاه و اكيد اكيد ذكراها و محبتها سوف تلهمكم المزيد من الافكار.
* لكى فى عنقى زيارة فى البيت و سلام حنين، سوف انجز ذلك متى وطئت قدمى ارض البلاد.
سلام ومراحب مرة تانية بالاخ مجتبى محسى.
| |
|
|
|
|
|
|
|
|
|
Re: رحبو معى بزوجى .... مجتبى محسى (Re: Siham Elmugammar)
|
اخـتـي الـحـبيـبة سـهام،
اخــي الـحــبـوب، مجتبى،
***- تحياتي ومودتي،
***- ناس تراجي والصائـم والعوض سبقوني بالكلام الحلو والترحاب الجـميل، وماعندي شيئ اقوله الا :
" هلت الانوار..وظهر الاستبشار علي علي وجوه القراء والاعضاء والزوار...وحللت سـهلآ في وطن لـمن لاوطن له، وصوت لـمن لاصوت له...وربنا يوفقك ويسـدد خطاك.
***- لكما مودتي.
| |
|
|
|
|
|
|
|
|
|
Re: رحبو معى بزوجى .... مجتبى محسى (Re: بكري الصايغ)
|
مرحبا بالاخ مجتبى
وسعيدين بوجودك وسهام...
والكتابه يا مجتبى بتغسل الروح
وتهب الصبر ولا اقول نسيان
ولكن هى زاد تترعنا لنكون بمعية من نحب
حتى وان غيبه الثرى
يظل حضوراً مشرقا
وستظل روح غاده مشرقه
وحاضره
.
.
.
| |
|
|
|
|
|
|
|
|
|
Re: رحبو معى بزوجى .... مجتبى محسى (Re: خالد المحرب)
|
العزيزه سهام مرحب بيك و مرحب بي مجتبى
كلنا فجعنا في غاده ... لانه ميتة الشباب حاره شديد
الم الفراق صعب .... لكنه طريق لي الصبر
الصبر صعب لكنه عباده و صلة بينك وبين رب العالمين
فراقك لي غاده امتحان ... و ربنا بيمتحن عباده اللي بيحبهم
يبقى محبة ربنا لينا تستاهل نقابلها بي الحمد
قولي الحمد لله يا سهام .... و ربنا يخلي ليك القدامك
انا ما بعرف غاده لكن الحزن اللي عم الانترنيت عرفني بي غاده
اكتبي و خلي مجتبى يكتب ... نفسوا عن نفسكم ... و ربنا يديكم الصبر
انا عن نفسي كنت بكتب في عز الامي و مرضي ... تصدقي يا سهام بكون سبعه يوم راقده في السرير
لا بقدر اكل و لا طايقة روحي بعد جلسة الكيماوي ... كل البعمله افتح النت اقرا و اكتب
و لما اتوفت بت خالتي و انا كنت وحيده في كندا و كتبت عنها و الله يا سهام الناس الكتبت
و عزتني في ماجدولين الله يرحمها ... قسموا معاي الحزن و خففوا عني كتير
البورد بقى لينا و طن و سكن
اكتبوا قدر ما الله اداكم ... و يا سهام امر المؤمن كله خير ... و ان شاء الله حتة منك سبقتك لي الجنة
| |
|
|
|
|
|
|
|
|
|
Re: رحبو معى بزوجى .... مجتبى محسى (Re: محمد فضل الله المكى)
|
الف مرحب يا مجتبى...
ان شاء الله البركة فيكم.....
مرحب بيك فى البورد ..نتمنى الناس يرحبو بيك هنا زى ما رحبت بى
فى بيتكم العامر فى ديسمبر 1990 ..انت ومجدى محسى و مصطفى مبارك ...
ايام لن انساها ابدا ....
تقبل تحيات سهير والاولاد
الاخت سهام
ربنا يصبركم ويجبر كسركم ان شاء الله
| |
|
|
|
|
|
|
|
|
|
Re: رحبو معى بزوجى .... مجتبى محسى (Re: Farahat Sayed)
|
مجتبى حبابك الف ومنور..
شكرا لاختنا سهام الدلتك على هنا
لكن كعادة النسوان طبعا ما ممكن يعملن حاجه سمحة كلها..
لابد من بلوة فى نصها...لووووول
دحين كدى النوريك نقم سودانيز اونلاين ده نعمه انت عارفه..
وحاتك ادمان البكان ده اخير منو الهيروين قول واحد
التانيه الله يشهد فتحتك للبوست ومساككتو
شفت الزول الشايل ليه فضية قزاز فى المولد ده بكون حالك..
مش بتكون خايف ده يضربها بى جايه والا داك يكسرها بى هنا
فى نص الزحمةالتى لاترحم بالظبط..
كان انشغلت ساكت تعال شوف ناس ياخى عافص لينا مالك؟؟
ويلقاك فى البوست المجاور يحدر ليك..
والما بتتداخل معاه فى بوست لاى سبب خصوصا اذا كان غامت ليك حق لبن
والا مواجبك فى بوست قبل ده يلاحقك بالماسنجر..
شايفنك ما اديتنا طله..
غايتو يازول ادعو وقول اللهم لانسالك رد الباسويرد ولكن نسالك اللطف فيه..
مجتبى حبابك وعليك عديله وبيضاء والله يعينك
شكرا للكان السبب ...
سهام ما تحمرى لى !!! مابخلى اخونا مجتبى يدخل على عماهـ ساكت../B]
| |
|
|
|
|
|
|
|
|
|
Re: رحبو معى بزوجى .... مجتبى محسى (Re: ABUHUSSEIN)
|
Quote: المهم وقفتكم دى و وقفة بكرى من الجائزة
شجعوه ان يأتى ليكون بينكم
فرحبو به معى |
شكرا سهام
مرة أخرى تبكينى كلماتك ... فعلا بذلت جهدا كبيرا لاكتب ..
وانا بدورى أحول هذا الطلب لجميع كاتباتنا وكتابنا الشباب ليجعلوا من ذكرى مولد فقيدتنا غاده القادم (14 نوفمبر 2010) مولدا للكثيرات من الغادات والكثيرين من الغادين (كما قالت الخاله العزيزه / عائشه موسى السعيد) فى مخاطباتها للطالبات بمدارس أسماء عبد الرحيم ومدارس القبي ..
لك الود والشكر
| |
|
|
|
|
|
|
|
|
|
Re: رحبو معى بزوجى .... مجتبى محسى (Re: Mujtaba Mahasi)
|
الشكر لكل من :
محمد عبد الماجد / العوض / محمد عبد الرحمن/ أبوبكر صالح / بكرى الصائغ / صلاح عبد الله / خالد المحرب / فيصل عثمان / جمال الباقر / خليل / عبدالعزيز عيسى / خالد العبيد / محمد المكى / عاطف عمر / أبو حسين / أمانى الامين / حيدر
لكم جميعا الشكر الجزيل على ترحيبكم الحار .. ولاقلامكم الرائعة وتضامنكم انحنى تقديرا واجلالا ,,
ولا أراكم الله مكروها فى عزيز لديكم ...
| |
|
|
|
|
|
|
|
|
|
Re: رحبو معى بزوجى .... مجتبى محسى (Re: Mujtaba Mahasi)
|
Quote: الله يا سهام ما احلاكم معا.
ويا مجتبى وسهام نحن فراحانين بيكم معا.
ولكن نكثر من ذكرى غاده هنا....فقد اسرفت سهام
وبكيت كعادي كلما اقرا حروفها.
مجتبى خير فعلت بقدومك لهنا
وصدقني هذه اول بركات غاده
فقد اعادتك فاعلا بين بني وطنك بغيابها.
اعمل ان حزن رحيلها كبير.....
ولكن وجودك هنا سيطلعك على احزان خرافيه
ربما صارت هي العلاج لكما معا لهذا الفقد الفاجه و الرحيل المبكر.
|
شكرا كتير تراجى .. الله يديم فرحك ويقدرنا على تحمل كلمات سهام وقلمها النافذ دون أن ننتحب
| |
|
|
|
|
|
|
|
|
|
Re: رحبو معى بزوجى .... مجتبى محسى (Re: Mujtaba Mahasi)
|
Quote: وحباب المهندس مجتبي محسي وحباب الدفعة
والف مرحب بيك يا مجتبي ومرحب بالزمن الجميل |
كيكى .. كيفك يادفعه .. قرأت لك الكثير واسعد بهذا التداخل الاسفيرى حبلا جديدا لتواصل بيننا .. لا يسعنى وصف شعورى بوقفتكم معنا .. ما اجملكم .. فعلا بتصبرونا وبيكم ومعاكم بنمشى لقدام ...
| |
|
|
|
|
|
|
|
|
|
Re: رحبو معى بزوجى .... مجتبى محسى (Re: Mujtaba Mahasi)
|
Quote: والكتابه يا مجتبى بتغسل الروح
وتهب الصبر ولا اقول نسيان
ولكن هى زاد تترعنا لنكون بمعية من نحب
حتى وان غيبه الثرى
يظل حضوراً مشرقا
وستظل روح غاده مشرقه
وحاضره
|
ناهد .. صدقتى القول .. نسيان ده مافى لكنها زاد ورد فعل أيجابى يبين مدى حبنا للاخرين وحبهم لنا وثقتنا فيهم ليشاركونا ويبادلونا صدق المشاعر والافكار النيرة ويظللون نهاراتنا من لهب الحزن الجارف ويبردوا جوفنا وحشانا المحروق ..
ليكون حضور غادتنا مشرقا وطيفها حاضرا وروحها الطاهرة ترفرف فرحة بما نكتب عن حسن سيرتها وطيبتها وحلاوة روحها وعفة لسانها .. لها الرحمة .. ولك الشكر
| |
|
|
|
|
|
|
|
|
|
Re: رحبو معى بزوجى .... مجتبى محسى (Re: Mujtaba Mahasi)
|
Quote: ككل الامال ان يجد فيه السلوي وذي ماخفف احزانك يخفف احزانو
ويلقي فيهو الاخوات والاخوان وينسي الاحزان |
فرحات .. شكرا ليك ولزيارتك الجميله لنا مؤخرا .. أتمنى تكون بليت شوقك وتكون اتوفقت فى نشر الفكرة ببلاد العم سام
تحياتى لكل من معك
| |
|
|
|
|
|
|
|
|
|
Re: رحبو معى بزوجى .... مجتبى محسى (Re: Mujtaba Mahasi)
|
Quote: مرحب بيك فى البورد ..نتمنى الناس يرحبو بيك هنا زى ما رحبت بى
فى بيتكم العامر فى ديسمبر 1990 ..انت ومجدى محسى و مصطفى مبارك ...
ايام لن انساها ابدا .... |
العزيز النصرى .. تلك أيام لا تنسى
شكرا على الترحيب
سلام لسهير والشباب
| |
|
|
|
|
|
|
|
|
|
Re: رحبو معى بزوجى .... مجتبى محسى (Re: Mujtaba Mahasi)
|
Quote: ويلقاك فى البوست المجاور يحدر ليك..
والما بتتداخل معاه فى بوست لاى سبب خصوصا اذا كان غامت ليك حق لبن
والا مواجبك فى بوست قبل ده يلاحقك بالماسنجر.. |
شكرا يا سناير
شكرا صديق على التنوير المخيف والتعريف بتقاليد أعضاء المنبر فيما يخص المواجبه وهم أهل واجب ..
زى ما شايف أخدت بنصيحتك وبالله ما دايرين أى حمير ولا حدير
| |
|
|
|
|
|
|
|
|
|
Re: رحبو معى بزوجى .... مجتبى محسى (Re: Siham Elmugammar)
|
آلاف المراحب
بالزول الصنديد
اصعب وأمر شى الصبر
وما أى زول بقدر عليو
كل الترحاب بالأخ مجتبى
اختنا سهام
قبل كم يوم "آمنة" بتى اصرت انها لازم تشارك فى مسابقة غادة
وما ارتاحت والله الا بعد مشت ودت المشاركة
وفى أعالى الجنان أكيد غادة
مع الناس البحبهم ربنا
| |
|
|
|
|
|
|
|
|
|
Re: رحبو معى بزوجى .... مجتبى محسى (Re: أبوذر بابكر)
|
مرحبين حبابك اخى العزيز مجتبى ود محسى
نورت دارك
ويا زول البيت بيتك اخذ راحتك تب الناس الهنا كلهم بتعرفم و بعرفوك
.....اخى مجتبى اخزننا كثيرا رحيل غادة........... لكن نقول شنو كلنا لها ما عليكم الا بالصبر و الدعاء لها....
يلا لى قدام تحياتى ليك و للعزيزة سهام
| |
|
|
|
|
|
|
|
|
|
Re: رحبو معى بزوجى .... مجتبى محسى (Re: بكرى ابوبكر)
|
سهام يا حبيبة ...
دئما تجي منك الارواح الطيبة ..
مجتبى يا اخوي .. المكان ده مكانك وفيهو حبايبك واخوانك واخواتك ..
يفرحو لى فرحك ويحزنو لى حزنك .. فليكن القادم مفرح وطريقنا اخضر ..
مرحب بك مره اخري .. وسعيدين لوجودك هنا .. لنغسل احزاننا سويا ..
لكم من الود اضعاف ..
ربنا يحفظ العندك ويغطيهم يارب ..
ويعوض غادتنا بجنة عرضها السموات والارض وتنعم بكل ما فيها ..
| |
|
|
|
|
|
|
|
|
|
Re: رحبو معى بزوجى .... مجتبى محسى (Re: عبدالله احيمر)
|
أها ده شنو ده اسي
سهام تجي تلقى البوست جايط كده
وناس مركبين ليها دربات من فقدان السوائل
و ناس تحدر و تحمر
ونصه عزابه و كده
وده كله كوم و راجلها البقى سنقل ده كوم تاني .............ههههههههههههههههه
تاني يا مجتبى سهام بتخت الكنش جمب الكمبيوتر
تخريمة:
تمبس بكري بيكتب ليه هكر بس هكر طيب
| |
|
|
|
|
|
|
|
|
 Re: رحبو معى بزوجى .... مجتبى محسى (Re: BitAlhana)
|
Quote: تخريمة:
تمبس بكري بيكتب ليه هكر بس هكر طيب |
...  غايتو يا بت الهنا بكري شكلو اجتهد شديد .. دي ما كتابة هكــر دي كتابة بكري لما يجتهد
غايتو بركة ما جا فتح ليه بوست كتب فيهو
اكتب كلمة في حق مجتبي المحسي وشــتت .. كما كتبها لنا من قبل ..
| |
|
|
|
|
|
|
|
|
|
Re: رحبو معى بزوجى .... مجتبى محسى (Re: عبدالله احيمر)
|
أها ده شنو ده اسي
سهام تجي تلقى البوست جايط كده
وناس مركبين ليها دربات من فقدان السوائل
و ناس تحدر و تحمر
ونصه عزابه و كده
وده كله كوم و راجلها البقى سنقل ده كوم تاني .............ههههههههههههههههه
تاني يا مجتبى سهام بتخت الكنش جمب الكمبيوتر
تخريمة:
تمبس بكري بيكتب ليه هكر بس هكر طيب
| |
|
|
|
|
|
|
|
|
|
Re: رحبو معى بزوجى .... مجتبى محسى (Re: عفاف الصادق بابكر)
|
يا جماعة سلامات الزول اصلو ما يفشل ثقتو فيكم والا شنو
يعنى بس نقول ليكم رحبو تقومو ترحبو قدر ده
و كمان طوالى دايرين تدخلو الزول ده فى الغرق وتدوهو الاريحية
عشان يفك النضم
ومنكم من نصب نفسو هادى للسبيل (ااااى انت يا ود الموج)
هسه انا من ختيت راسى افتش للنوم وقمت لسه بفتش ليهو
وانا عشمانه اجى القى الناس تقول لى يا وريفة و لطيفة
القى الكلام نصو تحذيرات و كمان تحميش نيران (ااااى انت يا ابراهيم محمد الحسن)
يعدين انت دفعتك كان عاجبك قدر كدى ما تديهو فرصه يسرح شويه
اها نستفيد من البرلوم مجتبى
Quote: محمد عبد الماجد / العوض / محمد عبد الرحمن/ أبوبكر صالح / بكرى الصائغ / صلاح عبد الله / خالد المحرب / فيصل عثمان / جمال الباقر / خليل / عبدالعزيز عيسى / خالد العبيد / محمد المكى / عاطف عمر / أبو حسين / أمانى الامين / حيدر
|
ابراهيم محمد الحسن... دوما... احمد طراوة..عفاف بابكر...هارون دياب..بكرى ابوبكر (ود الصايم ده وقفو بشوفو رفع الكلفة معاك شديد و لاتنسى هارون دياب فى معيته (عجبتنى والله معيته دى))
جد جد شاكرة ليكم الاستجابة ومجتبى
يستحق الترحيب مش راجلى لوووووول
انشالله انتو بالعافية جميعا
اباذر اتمنى لامنه و لوارف خالد العبيد التوفيق
___________________________________________
يا تراجى انا ما حصل بديت اكتب بتخطيط
ببدأ وبلقى روحى اسرفت :)
دمعك غالى لسه صوتك بتنتحبى معاى ما فارقنى
ولا صوت الفاتح ميرغنى..بنات العباسى ضربن لى لما حنيت عليهن انشألله ربنا يوالى امهن بالعافية...حليمة عبدالرحمن..جنى يضرب ويوصى حتى خفت عليه
عاطف عمر يضرب و يطمئن..تمبس..كيكى..دوما..ندى مصطفى ..اشراقة مصطفى..سناء خالد ضربت لما فترت وما لمت فينى
ولسه ح اتذكر بأذن الله
اما الجونى بالسكة ديل خليهم ساكت
يا اخوانى واخواتى انا اقبل بيكم وين
والله ما بتكلم ساى بالجد انا جادة
انشألله ربنا يطرح فيكم/ن وفى وليداتكم البركه
وما تشوفو فيهم/ن شر
اقول ليكم حاجة انا قررت ابطل اسراف لوووووول
اها سكت
دقيقة قبل ما اسكت
حكت لى صديقة عموم ال طه المجمر هند مساعد
انو فى واحد قريبهم كان عيان شديد
الملاريا ضارباهو ضربه صاح
اها الزول ده اصلو ما سكت من القنتى
اه اه يا راسى اه اه اااااخ من وجع راسى
انا راسى دايره اتكسر اتكسسسر
الحمى هرستنى شديييييد
ياالله يالله
المهم اخوهو حارسو فى لحظه زهج منو شديد
قام قال ليهو ياخ انت ما تريح خشمك ده
انت كان سكت راسك ده بسكت
اها صاحبنا العيان
اخد ليهو قنده كده
ووراها طوالى خلاس انا سكت
والله سكت سكت
انا يا جماعه سكت
يالله انا سكت
ندمو ليك
| |
|
|
|
|
|
|
|
|
|
Re: رحبو معى بزوجى .... مجتبى محسى (Re: Siham Elmugammar)
|
Quote: مجتبى مرحب بيك
كنت اتمنى ان تكون بدايتك هنا غير ما اتت عليه
ولكن لنا الصبر الجميل وانت خير من صبر |
وانتى الصبر ياسهام
الطاقة التى نثرها فيك مجتبى
والطاقة الايجابية التى نثرتيها هنا
وعلمتينا كيف يتحول الحزن الى فعل ايجابى ومثمر
فعل يقول ويؤكد ان غاده بيننا
غاده لكل البنات والاولاد
لابداعهم ونجاحاتهن
شكرا للدروس والعبر يا سهام
ومرحب بيك يا مجتبى
| |
|
|
|
|
|
|
|
|
 Re: رحبو معى بزوجى .... مجتبى محسى (Re: طارق ميرغني)
|
سهام ،،
| Quote: القى الكلام نصو تحذيرات و كمان تحميش نيران (ااااى انت يا ابراهيم محمد الحسن) |
الناس دائما فاهمني غلط ،،
خيرا تعمل ،،
| Quote: يعدين انت دفعتك كان عاجبك قدر كدى ما تديهو فرصه يسرح شويه |
شكلك مبيتة النية ،،
وكنتِ عاوزة تقصي ليه بالتقيلة ،،
عشان كده قلنا ننبهو من البداية ،،،
بعدين ،،
مجتبى ما دفعتي ،،
أنا صغير وجاهل ،،
( أسألي هالة حسن ،،،)
| |
|
|
|
|
|
|
|
|
 Re: رحبو معى بزوجى .... مجتبى محسى (Re: ابو جهينة)
|
الأخت سهام المجمَّر ...
حبابو ألف أخونا الباشمهندس مجتبى المحسي ...
وتعازي الحارة ليكم في فقدكم .. وفقدنا جميعاً .. غادة ..
وإن شاء الله تلقوها قدامكم ... وربنا يلزمكم الصبر ويعوضكم ...
ويخلي ليكم أولادكم ...
أبقى داخل يا مجتبى ... واضح أنك كتَّاب بالحيل ...
في إنتظار مساهماتك ...
| |
|
|
|
|
|
|
|
|
|
Re: رحبو معى بزوجى .... مجتبى محسى (Re: esam gabralla)
|
في العام 1988 كان سطوح منزل العم محسي هو المكان الذي اوانا ونحن علي اعتاب التخرج من الجامعه بعد ان شردنا حاج ماجد سوار من داخلياتها
في الليالي المقمره والهمبريب النضيف انداح رهط من الشباب في ذلك السطوح باسرار لو قيلت الان لبيعت صلوات وهدمت صوامع
مرحبا بمجتبي زوج خالتو سهام
في انتظار مجتبي صاحبنا او كما قال عصام جبر الله
| |
|
|
|
|
|
|
|
|
|
Re: رحبو معى بزوجى .... مجتبى محسى (Re: Hadeer Alzain)
|
Quote: كم مرة قرأت الناس يشكرو فى زوجاتم هنا
وكنت بتكيف شديد اقول ياربى كدى ان ننهز الراجل ده
يمكن يبدأ يكتب فى البورد وشوية شوية اجيب رجلو |
احذر و أوعك تبلع الطعم دا يا مجتبى فالجميع هنا يميز كتابات المجاملة و أداء الواجب 
____
أشرقت الأنوار.
| |
|
|
|
|
|
|
|
|
|
Re: رحبو معى بزوجى .... مجتبى محسى (Re: Hussein Mallasi)
|
العزيز مجتبي
باقات من الود ترحيباً بقدومك لهذا
العَك الاسفيري الممتِع و الجميل بوجود شخص مِثلك
مرحب بقلمك اضافة للاقلام الجادة و المسئولة في هذا العالم المُخيف
لنتحدث عن ايام الدراسة ... حيث اختلط العلم و التحصيل بهموم البلد
و انجب مسرحاً ابدع خلاله مجتبي و سهام و باقة من الاصدقاء اعمالاً تستحق التوثيق.
لنتحدث عن مصر بين الدراسة و السياحة و اسمح لي صديقي بسرد هذه القصة اسفيرياً
(( ذهبت لمصر مع مجتبي زمان و في الاسكندرية تمكنا من الحصول علي سُكَر (التشكيل مُهِم هنا منعَاً لسؤ الفهم)
بعد مُعاناه و عندما حضرنا للشقة عملنا شاي بي مزاج و كعادتي في ذلك الوقت تناولت ثلاث ملاعق
سُكَر و وضعتها في كباية الشاي التي تَخُصني و قلت لي مجتبي ببراءة كم معلقة؟
رد مجتبي بصرامة معلقة واحدة و انت لو سمحت معلقة واحدة برضو ... ما بنقدر علي التلتلة و الوقوف
في صفوف الجمعية نحن ما جينا هناعشان نقيف في الصفوف كفاية هناك. وافقت علي مضض و عندما عملت العشاء
عملت بَصَل كثير في الفول و انا عارف مجتبي ما بحب البصل و قال لي ده شنو يا حامد قلت ليهو معلقة سكر
واحدة في الشاي مافي اعتراض و بصل في الفول مافي اعتراض برضو. و من ديك و حتي الان انا بتناول
معلقة واحدة في الشاي و حتي الان و مجتبي ما عنده مانع بي البصل في الفول )).
لنتحدث عن بيت المال و زيكو (زكي) و الهلال و المريخ و الكوتشينة ابي روف الهجرة حي العمدة
نتحدث عن داركم العامرة و الجيتار و انغام شرحبيل و صديقنا الجميل ع م. عن رحلة القطينة
و توقوف البص لعطل طاريء في الطريق و رحلة الكمبو
فالذكريات صادقة و جميلة
اطلق لقلمك العِنان قدر استطاعتك و ليس اكثر
كثير من العلاقات الجميلة تنزف لا لسؤ بنا و لكن لسؤ بالزمن و الاخطبوط ... و لا عليك
سوف نلتقي قريباً صديقي ... و نحكي و نحكي
شكراً سهام و عبرك تحياتي للجميع
| |
|
|
|
|
|
|
|
|
|
Re: رحبو معى بزوجى .... مجتبى محسى (Re: Hadeer Alzain)
|
الف مرحب بالاستاذ مجتبى ..
شرفت كتير ... ونورت البورد
ربنا يجبر كسركم ان شاء الله
ويعظم اجركم في فقدكم الجلل انت والاخت سهام
الاخت الحبيبة سهام
سعيدة جدا بكلامك الجميل عن رفيق دربك
وسعادتي اكثر لانضمامه لكوكبة سودانيز اون لاين
ربنا كريم ملاه يقين وصبر رغم الوجع المر
لكي يكون لك نعم السند والضهر في فقدكم العزيز
ربي يعوض صبركم حسنات ويملأ قلوبكم يقين بركة رب العالمين
| |
|
|
|
|
|
|
|
|
|
Re: رحبو معى بزوجى .... مجتبى محسى (Re: محمد عكاشة)
|
أهلاً وسهلاً وألف مليون مرحب بالأخ مجتبى وسعداء بمقدمكم الكريم وإنضمامكم لهذا البورد
ربنا يرحم فقيدتكم الغالية ويجعلها في عليين مع الصديقين والشهداء والصالحين
ويحفظ حسام وأحمد ويجعلهم لكما زخرا في الدنيا والآخرة
مع خالص الود
| |
|
|
|
|
|
|
|
|
|
Re: رحبو معى بزوجى .... مجتبى محسى (Re: خضر حسين خليل)
|
مرحب بمجتبى محسي
أرجو أن يطيب لك المقام هنا
وأن تكون إضافة راسخة لمعسكر الوعي
تدخل هنا بعد تجربة قاسية
واجهتها بالصبر الجميل وحسن الإحتساب
وأرجو أن تكون تعازي الناس هنا قد منحتك قبول
وأعادت لك التماسك
الذي رأيته في كتابات سهام وفي لقائها في التلفزيزن
حيث نجحت في تحويل حزنها الداخلي من كونه إنكفائة على الذات والألم
ليكون حزنآ منتجآ
أنتج فكرة
| |
|
|
|
|
|
|
|
|
|
Re: رحبو معى بزوجى .... مجتبى محسى (Re: محاسن أحمد محمد)
|
الف مرحب بالمهندس العزيز مجتبى محسى
مرحب بك فى هذا المنتدى العامر ومن المؤكد أنك سوف تكون اضافة نوعية لهذا المنبر الواسع الانتشار الذى اصبح اخيرا منبرا تتقاذفه الاهواء والاتربة .
مع تحياتى للاستاذة سهام وللجميع
| |
|
|
|
|
|
|
|
|
|
Re: رحبو معى بزوجى .... مجتبى محسى (Re: محمد عكاشة)
|
تمبس سلامات مالك يا خوى
انشالله ما فاقد سوائل
اساسى تحية ليك ولاسرتك ربنا يديكم العافية
عبدالله احيمر يرحبو بيك احبابك
يا بت الهنا يديك العافية ويعوض صبرك خير
وانشألله ربنا يرحم ماجدولين ويغفر ليها
من ترك سيرة عطرة كماجدولين
انشألله وبقدرته فهو يعلم السر والنجوى
لا خوف عليها و لاتحزن باذن الواحد الاحد
قلتى كنش ياخ انتى طيبة خلاس (وش شرير شديد)
يا بت الهنا نحن الكنش بنسنو :)
اشراقة سلامات اتمنى ان تكونى قد اطمئنيت على الاهل
تحياتى لك ولهم
طارق ميرغنى
Quote: رغم انو كلامك الفوق ده عمل لينا غصه من الصباح
|
طيب انا اقول شنو ياخ :) هييييييع
رايكم شنو فى قلب الكلام ده
ابراهيم محمد الحسن الصغير وجاهل
برضو ما بحلك
الاخ بشير دفع الله تحياتى و كتر خيرك
اخونا عادل عثمان ياخ نحن ما بتقدر نشكرك على ما تقدمه من دعم لنا
شغل التوثيق بتاعك كان خير عون لنا والله
اهتمامك بالجائزة و رفعك لبوست الجائزة و دعمك ليهو بزمنك و جهدك
انت ما داير عليهو شكر لكن هنا عاوز اقول ليك حقيقى نحن مستفيدين من
مجهوداتك واصل معانا يازول انت زيادة لينا فى الخير
بالنسبة لشغل الثقافة الصحية نحن بدينا فيهو برعاية د.اسماء السنى
وهى طرحت علينا الفكرة باكرا و نفذت مباشرة و ضرب ضربة البداية
بإصدار مطبق خاص بمرض الازمة والتنوير بيهو وختت فيهو صورة غادة
وانشألله ح نواصل على حسب ماهو متفق عليه
شفت يا عادل الناس دى واقفه كيف معانا
لغادة الرحمة ولنا الصبر بأذن الله الحق المبين
عصام جبرالله مداخلتك دى عاملة زى برقيات قف
وليد المبارك و حبابك الفين لكن مافى شكرا يا سهام ليه
غايتو جنس طناش
الريس ابوجهينه ومرحب بيك انت كمان
اخونا عبدالله كسلا تقبل الله دعائكم لنا
وشكر للترحيب
والله انا بقول معاك انو كتااااب
بس الله يجيب الوقت
والله يا عمر بوب جاياك بمهله
هدير الزين تحياتى وسلاماتى الكتارات
انا متذكرة مرة كتبتى لى كلام اثر فينى شديد
الله يديك العافية وتقبل الله دعائك لنا
اهاااااااااااااااااااااااا
شوف حسين ملاسى لقى ليهو عضه
| Quote: احذر و أوعك تبلع الطعم دا يا مجتبى فالجميع هنا يميز كتابات المجاملة و أداء الواجب |
انت الحسادى العليك شنى؟؟؟؟
انا اداء الواجب والمجاملة دى زاااااتى كايسه ليها
عالم اصلو ما تحب لى زول انو ينبسط ويرفع راسو
وسط الناس البيشكروهم/ن
مزمل خيرى شكرا ليك
وانا زاتى بتمنى ليهو اقامة طيبة
بس بعد ما يعدل ملفو :)
يا جماعه معليش اخدتكم بالجمله كدى
صراحة النت بيزهج كلو مرة عشان يجيب ليك صفحة
والله لقد اثلجتم صدرى رغم كيد البعض هنا
| |
|
|
|
|
|
|
|
|
|
Re: رحبو معى بزوجى .... مجتبى محسى (Re: Elmosley)
|
الف مرحب بمجتبى يا سهام وألف مرحب بكما معا دائماًً
وانتما تحيلان حزنكما النبيل إلى إحتفاء رائع بغادتكما الحبيبة،
والشكر لبكري أبوبكر الرائع الذي جعل مشاركتنا جميعا لكم ممكنة
في سودانيزأونلاين التي تجمعنا كل يوم كأسرة واحدة وبيبت واحد
سوداني أصيل نتشارك فيه جميعنا الأفراح والأحزان.
مرحب بيك يا مجتبى في سودانيزأونلاين، لم أجد أجمل من كلمات غادة
وصورة غادة، وضحكتها من القلب أهديكما وزوار بوستكما الكرام.
شكراً لكوستاوي لإخراج كلمات غادة الحكيمة في هذا الثوب الجمالي البديع،
ألف رحمة ونور تغشاك ياغادة في الخالدين.
| |
|
|
|
|
|
|
|
|
|
Re: رحبو معى بزوجى .... مجتبى محسى (Re: غادة مكى محمد)
|
بنرحب بمجتبى يا سهام المجمر
أنا شخصيا برحب بكل شى من جيهتك:
بالنسمة البتهب من جيهة بحرك
بالومضة البتشع من جيهة وهجك
وكل حنين بنبض من جيهة روحك
برحب بيه ...
لمن مجتبى كمان؟؟
ليه ما نرحب؟؟
أيوه نرحب!!
÷ههههه+
| |
|
|
|
|
|
|
|
|
|
Re: رحبو معى بزوجى .... مجتبى محسى (Re: غادة مكى محمد)
|
ألف مرحب مجتبى .... نوّرت الدار.
ربنا يعوض صبركم .....
______
يا سهام ..... بعد كده الدخول لي سودانيز حيكون شكلو مختلف ...
يعني لو الجهاز واحد في البيت (لاب توب والا ديسك توب) الحكاية حتكون بالحجز. وحتى لو كانوا أكتر من جهاز، بعد كده نلقى مداخلة في بوست .... وبعد ما الشمطة تقوم ... تجي تقولي: (والله دي ما كنت أنا ..... مجتبى كتب المداخلة .. وانا ما كنت عاملة "ساين آوت"). أسألوا نادوس وأبنوسة.
ويا مجتبى، حكاية برلوم ومنتظر نصايح السناير دي ما بتمشي علينا ..... يعني السينير المعاك دي أكيد ما حتكون قصّرت.
مرحب تاني.
| |
|
|
|
|
|
|
|
|
|
Re: رحبو معى بزوجى .... مجتبى محسى (Re: بكري عباس علي)
|
لما سافرت السودان في صيف 2008
وصاني عصام جبر الله شديد واكتر من مرة قال لي " لو لقيتي اي طريقة قابل مجتبى وسهام "
قابلت سهام واتوطدت علاقتي بيها
للاسف ما نجحت في مقابلة مجتبى
اهي فرصة نتقابل في الاسافير دي
ويا سهام جيداًجا مجتبى
اتمنى انه يلقى سلوى في انضمامه للمنبر
| |
|
|
|
|
|
|
|
|
|
Re: رحبو معى بزوجى .... مجتبى محسى (Re: الجندرية)
|
Quote: بكرى ابوبكر
Quote: تاريخ التسجيل: 04-02-2002
مجموع المشاركات: 12226
تغير كلمة السر
مكتبة الفساد
Re: رحبو معى بزوجى .... مجتبى محسى (Re: أبوذر بابكر)
مرحبين حبابك اخى العزيز مجتبى ود محسى
نورت دارك
ويا زول البيت بيتك اخذ راحتك تب الناس الهنا كلهم بتعرفم و بعرفوك
.....اخى مجتبى اخزننا كثيرا رحيل غادة........... لكن نقول شنو كلنا لها ما عليكم الا بالصبر و الدعاء لها.... |
يلا لى قدام تحياتى ليك و للعزيزة سهام |
امممممممممممممممممك بكرى كتب ده كلو؟؟
يظهرالرئيس عامل اوكازيون،،،
| |
|
|
|
|
|
|
| |
Siham Elmugammar
محمد عبد الماجد الصايم
Tragie Mustafa
Elawad
محمد عبدالرحمن
عبدالكريم الامين احمد
abubakr salih
ناهد حسن بشير
جمال الباقر
khaleel
Abdlaziz Eisa
Farahat Sayed
خالد العبيد
محمد فضل الله المكى
Mohamed Bannaga
صديق الموج
mohmmed said ahmed
أحمد طراوه
صالح عبده
عاطف عمر
ABUHUSSEIN
حيدر حسن ميرغني
الفاتح سليمان
ابراهيم محمد الحسن
doma
haroon diyab
أبوذر بابكر
بكرى ابوبكر
عفاف الصادق بابكر
tmbis
Ishraga Mustafa
البشير دفع الله
Adil Osman
وليد محمد المبارك
ابو جهينة
عبد الله كسلا
Omar Bob
Hadeer Alzain
Hussein Mallasi
مزمل خيرى
Hamid Elsawi
اسماء الجنيد
محمد عكاشة
جمال محمود
عبد القادر شادول
خضر حسين خليل
أبو ساندرا
الفاتح ميرغني
محاسن أحمد محمد
wadalzain
معتصم مصطفي الجبلابي
Elmosley
Souad Taj-Elsir
abubakr
غادة مكى محمد
Tumadir
محمد أبوالعزائم أبوالريش
فيصل محمد خليل
آدم جمال أحمد
بكري عباس علي
الجندرية
فيس بوك
تويتر
انستقرام
يوتيوب
بنتيريست