|
|
 طرائف من داخل المعتقلات....
|
الذي دعاني لكتابة هذا البوست هو ضعف مكتباتنا اللكترونية من مثل هذه الكتابات من داخل المعتقلات سوى من القليل الذي كتب عن بيوت الأشباح من وقت لآخر.
وبتوفر الظروف الموضوعية التي تجعل من مثل هذه الكتابات متاحة لأكبر قدرمن الناس بفضل ثورة المعلومات التي انقضت في القرن الماضي وهلت علينا ثورةالأفكار فأنا هنا ومن هذا المنبر الجامع اعمل للتوثيق لبعض التجارب الطريفة و المفارقات التي تحدث داخل المعتقلات جنبا الى جنب مع التجارب القاسية واللا انسانية والتي سبقني الكثيرون في الحديث عنها في مختلف وسائل الأعلام وأتوقع ان يشاركني الكثيرون ممن ذاقوا مرها وحولوا فسيخها الى شربات , من أعضاء المنبر ومن غير الأعضاء عبر بريدي الألكتروني المسجل في البروفايل.
سبب آخر دعاني للكتابة هو محاولة لم الشمل لمجموعة متميزة عشنا معاها اميز ايام الشباب وتقطعت بنا السبل في الشتات او داخل السودان حيث تعاهدنا حينها ان نعمل بكل ما اوتينا من قوة ان نجعل الأخوة "جاذبة" خارج المعتقلات وهاهي الفرصة الأتصالية تواتينا لنستعيد الذكريات الحلومرة.
وسوف اتأسف شديدا جدا ان فاتتني بعض الذكريات او بعض الأسماء لطول المدة واذحام الذاكرة بما كثر وقصر
وتحياتي الرمضانية للجميع.
|
|
  
|
|
|
|
|
|
|
|
Re: طرائف من داخل المعتقلات.... (Re: MOHAMMED ELSHEIKH)
|
البداية كانت في معتقل الأمن الداخلي الذي وصلناه الثانية ظهرا من يوم 4-12-90 برفقة الزملاء عربي حسن بشير
وخيري عبد الرحمن حيث تم اخذنا من محطة بحري الحرارية لهناك بحجة محاولة لتفجيرها ونحن في باب الدخول و مقتادون للداخل اجد نفسي وجها لوجه مع قريبي ابن عمي محمد خالد عثمان(ود كرار) المساعد في جهاز الأمن الداخلي والذي كان خارجا ليرمقني بنظرتين قويتين دون تنبت شفتاه باي كلمة وسار في طريقه وسرنا للداخل.
في تفسيري الخاص للنظرتين القويتين من ودكرار:
- النظرة الأولي شنو يا ود الشيخ بالله انت اتاريك شيوعي ونحن ماعارفين؟ لأن الحملة كانت تلك الأيام في نظرالعامة تخص الشيوعيين وحدهم.
- النظرة التانية: خش جوة لا كأني بعرفك ولا كانك بتعرفني انا بعمل الواجب وبخارجك.
وفعلا بعد 3 ساعات من دخولي تم استدعائي للتحقيق حيث عمل الضابط بتاع التحقيق انو تفتيحة وقام سرد ليك تاريخي كاملا والسيرة الذاتية بتاعتي وليوهمني بأن جهازهم يعرف كل صغيرة وكبيرة عني تقول انا نقد ولا الصادق المهدي(وانا يعصرني الضحك لأني عارف ودكرار ).
المهم بدأو في تحذيري من الشيوعيين لانو عارفني انا زول من اسرة متدينة وناس ائيمة جوامع وكدي وتم توقيعي على تعهد واتخارجت.
| |
|
|
|
|
|
|
|
|
|
Re: طرائف من داخل المعتقلات.... (Re: cantona_1)
|
[B]شكرا حبيبنا كانتو
و نواصلطبعا لم تدم الفرحة لأكثر من 15 ساعة حيث تم اعادتي مع الزميل عثمان ضو البيت اليوم الثاني هذه المرة لمعتقلات الأمن الخارجي في داخل القيادة العامة وكنا محظوظين و مرقنا من بيوت الأشباح حيث ادخلنا لصالون به ما لا يقل عن خمسين من المعتقلين وهناك غرفة صغيرة وحمام للخمسين نفر ديل يبدأ صف الدخول من الثالثة ص حتى يأتيك دورك ممكن الساعة 5 ص او 6 وجدت مجموعة من الزملاء السابقين ومن السياسين الكبار(يا ساتر) وأذكر محمد محمد خير ونهم امام جامع من المهندسين وهو موظف كبير سابق من السكة حديد و فوق السبعين وعمدة عمد القبائل الجنوبية بالخرطوم اليوم الرجل خفيف الدم "دينق ماشام" الذي عطر المعتقلات بقصصه ونوادره حيث وصل بعدنا من بيوت الأشبا؛ ووصلت بعدنامجموعة من سكر كنانة من الأداريين والمهندسين.
| |
|
|
|
|
|
|
|
|
|
Re: طرائف من داخل المعتقلات.... (Re: MOHAMMED ELSHEIKH)
|
وصل دينق مشام ومعه مجموعة اذكر منهم المهندس الأنصاري ابوسالف من السلكية واللاسلكية حيث كانوا من نزلاء الأشباح داخل زنازين الأمن وتم تحويلهم للصالون العجيب وبدأت الحكاوي.
اول نوادر دينق انه ولأكثر من اسبوعين يتم تعذيبهم داخل الزنازين من قبل شخص عرفو طبعا شكله جيدا وقبل الأفراج عنهم للصالون تم استدعائهم واحدا واحدا للتحقيق في مكتب الضابط وتم استدعاء دينق ماشام حيث دبر مع زملائه حكاية طريفة.
وقبل بدْء التحقيق معاه بادر الضابط بزعل شديد:
" يا سيادتك انا عندي كلام داير اقولوا ليك قبل ما تسألني ودا حقيقة ناس كلو شهود عليهو"
- الضابط : ايوة قول الحاصل شنو؟
- والله في واحد من جماعتكم ديل كان بيجي يونس معانا كل يوم في غرفة وكان بقول ليناما توروا ناس بتاع تحقيق ديل بيوتكم لأنو بروحو ويشيلوا من هناك حاجات زي فلوس في دواليب ودهب وحاجات دا.
- بتعرف شكل الزول دا
-ايوة كل الناس تعرفوا
تم استدعاء مجموعة من جنود الأمن وطلب من دينق تعيين الشخص الذي حدثهم
و بسرعة بادر ماشام بالأشارة للشخص اللي كان مضايقهم:
_ زول ياهو دا ,
ومباشرة وقبل السؤال قام الضابط بصفقه كف زي السم(صفق العسكري) و طلب من الجماعة أخذه للداخل!!!!!
يقال انو بعد شهرين اهلو اتو للبحث عنه في المعتقلات!!!!!
| |
|
|
|
|
|
|
|
|
|
Re: طرائف من داخل المعتقلات.... (Re: MOHAMMED ELSHEIKH)
|
يحكي ماشام عن صاحبو المهندس ابوسالف الذي كان يستخدم طقم اسنان انه وخلال وجودهم بالغرفة اتي احد "الأمنجية" وطالب ابو سالف بفتح
خشمه وبعد ان نفذ الأوامر سأله: سنونك راحن وين؟؟؟
والله يا سيادتك مكسرة من زمان
فقال له بتاع الأمن:" مكسرة والله تلغف وتبلع ساااااكت لمن بلعت سنونك"
| |
|
|
|
|
|
|
|
|
|
Re: طرائف من داخل المعتقلات.... (Re: MOHAMMED ELSHEIKH)
|
كانت هناك غرفة صغيرة ملحقة بالصالون يسكن فيها كبار السن وتتم فيها الصلاة الجماعية وكان الأمام هو العم السبعيني موظف السكة حديد الذي نسيت اسمه.
بعد كل صلاة كان الدعاء يتم بحرية كاملة:
اللهم اخرجنا من هنا سالمين غانمين
اللهم شتت شملهم
اللهم فرق جمعهم
اللهم ............
..................
يازول دعاء تقيل علي ناس الأنقاذ والكيزان.
بعد حوالي اسبوعين من البقاء داخل الصالون والغرفة سمحو لنا في يوم الجمعة بالصلاة في الخارج(على النجيلة).
وكانوا ناس الأمن جالسين حوالي 3 انفار مسلحين حولنا في حوض النجيلة.
بعد انتهاء الصلاة التفت علينا الأمام يلا يا جماعة واحد فيكم يشيل الفاتحة.
فأجابة د. عبد اللطيف العبادي مدير خدمات كنانة الصحية:
" انت يا مولانا ما كل يوم قاعد تدعو . الليلة مالك؟"
فرمقه بنظرة قوية:" الليلة ابيييييت"
وبعد الدخول للصالون سألناه افو ياحاج تزوق من الفاتحة؟
فرد: " انتو يا ناس مجانين زول جوة البير دايرين كمان ترموا فيهو فيل"
| |
|
|
|
|
|
|
|
|
|
Re: طرائف من داخل المعتقلات.... (Re: MOHAMMED ELSHEIKH)
|
نواصل حيث الآن في طريقنا بالحافلات(آي والله حافلات جديييييدة وسمحة) لجهة ما بعد أن فاض الصالون باكثر من 80 نسمة
النسمة تحك النسمة وفي الطريق لتلك الجهة الما, همس في اذني الدكتور عبد الله حسن الشاطر المدير الأداري لمستشفى الخرطوم انذاك:
" يا ود الشيخ الحكاية دي اوع تكون اعدام؟"
نواصل من تلك الجهة الما
| |
|
|
|
|
|
|
|
|
|
Re: طرائف من داخل المعتقلات.... (Re: MOHAMMED ELSHEIKH)
|
الجهة طلعت دار نقابة المحامين قريبا من سونا.
يا زول البطاطين ما بطاطين والتلفزيون ماتلفزيون
و السندوتشات ماتديك الدرب
بس الشي الزعلني اشوف لي يوم واحد زميلي في الكلية يقتاد معتقل للتسليم.
يكورك لي بدر التوم صاحبي:
"الحق ياود الشيخ تعال شوف دا ...الحق....."
الزول اول ما لمحنا ذاق ديك الذوقة لي هسع.
نواصل........
| |
|
|
|
|
|
|
|
|
|
Re: طرائف من داخل المعتقلات.... (Re: MOHAMMED ELSHEIKH)
|
في احدي الأمسيات تم استدعاء حوالي عشرة من عتاة مترددي المعتقلات من زمن نميري وعلى رأسهم د. حسان محمد الأمين -رحمه-الله والمحامي ابوجديري و.....و.......
الطريف في الأمر ان يتم استدعائي انا ورفيقي عثمان ضو البيت!!!!
الله.... ياربي نحن في انتظار الأفراج والعودة لشغلنا يجو يختونا مع الشيوعيين الغلاااد ديل.
غايتو طبعا بدأ الخوف يدب في القلوب و البطبطة لكن بدأ الزملاء الآخرون في تطميننا وانو كوبر دا اسمو هلتون ودا فندق خمس نجوم دا... ودا... و الكلام ما هو خاشي في الرأس . هسي يخلو الشيوعيين الكبار ديل ويمكن حايفكوهم بكرة ونحن نمشي كمان كوبر ذاتو؟
وطبعا الجماعة عاوزين يطمنونا لانهم تأكدوا انهم افراج! مش خلاص المجرمين الطغاه أخذوهم للسجن؟
المفارقة الكبيرة
بعد حوالي ثلاث اشهر جماعتي ذاتهم ناس محمد محمد خير وناس د. نصري مرقص وناس بروف قاسم حمد الله و... و....
يجيبوهم ليكم كوبر قادمين من بيوت الأشباح!!!!!!!!!!!
| |
|
|
|
|
|
|
|
|
|
Re: طرائف من داخل المعتقلات.... (Re: MOHAMMED ELSHEIKH)
|
يا محمد الشيخ ..سلامات .. سردك حلو ..
لكن ما قلت لينا إنتو قبضوكم مالكم؟ أوع تكونوا داوستوا الحيكومة؟ الحيكومة ما بتداوس يا زول تكونوا غلتانين لو عملتوا كدا! (ترى النملة ولا خاتي خاتي بنى لي في بيتو).
كبـّـاشي الصـّـافي
| |
|
|
|
|
|
|
|
|
|
Re: طرائف من داخل المعتقلات.... (Re: cantona_1)
|
| Quote: لكن ما قلت لينا إنتو قبضوكم مالكم؟ |
يا كانتونا اخوي ناس الأنقاذ داك الزمن في زول بقول ليهم عينكم في راسكم.
امي المرحومة الحاجة زليخة عندها الخبر الأكيد بتاع سبب القبض وبجيك ليهو
| |
|
|
|
|
|
|
|
|
|
Re: طرائف من داخل المعتقلات.... (Re: MOHAMMED ELSHEIKH)
|
الدخول لكوبر لأول مرة مع ناس عركتهم الكوبرات(جمع كوبر) شيء مخيف حقا خاصة وانت تلج البوابة الرئيسية
لتجد السيد ادريس البنا زاتو يتوضأ في ماسورة بالشرقيات وتصبح من الصباح لتجد نفسك وجها لوجه مع المرحوم د.خالد الكد!!!!.
اول صباح عرفنا ان هناك جلسة قهوة بقيادة الكد تسمي "النادي" في ضل الضحى وعلى بنشات كأنها مخصصة.
وجدنا معانا جماعة بتاعين دولار ريال شيك سياحي تم احضارهم قبل يوم واحد من دبك ويظنون أن كل الناس الموجودين ديل تبعهم.
في اثناء الجلسة في النادي بدأ المرحوم الكد بتعريف نفسه لنا.
"عمكم خالد حسين الكد"
وهنا صاح فيه احد جماعات الدولار ريال:
" انت خالد الكد المعروف؟"
" ايوة نعم "
زول الأنقلابات داك ذاتوو"؟؟
" ايوة ياني ذاتووو"
" ونحن حسع خاتننا معاك في محل واحد كدى؟"
" ما في مشكلة ياخي"
فصاح عمنا مستغيثا :
" يا جماعة هووووي امرقونا من الحتة دي نحن ناس عملة ساااااكت"
| |
|
|
|
|
|
|
|
|
|
Re: طرائف من داخل المعتقلات.... (Re: MOHAMMED ELSHEIKH)
|
من أجمل اشراقات المعتقل -ان كانت هناك- مصطفي السمين!
هكذا اسمه ولقبه وكل حركاته و حكاويه ونوادره تعتمد على بسطة الجسم-ما شاء الله وتدور في فلك السمن-
وهو شاب ظريف من شباب الموردة الذين اذكر منهم الصديق العزيز انور وصديقي الآخر (يعمل ممرضا) -الشيخوخة دخلت-
مصطفي اتت شقيقاته لزيارته وبعد ان عاد لنا ذكر انو اخواتو مما شفاه قعدوا يبكو قالوا ليه ضعفت!!!!
| |
|
|
|
|
|
|
|
|
|
Re: طرائف من داخل المعتقلات.... (Re: MOHAMMED ELSHEIKH)
|
بعد الأستقرار في كوبر بدأت خطابات الأحالة لمايسمي بالصالح العام تصل و بدون فرز.
ولكن لم يصل اي خطاب لمصطفى السمين الموظف ببنك الخرطوم وكان يضحك ويتندر علينا .وبمناسبة بنك الخرطوم سألناه عن طريقة ربط الكرفتة مع الرقبة المافي دي , فأجاب انو بيربطها في الزرارة التالتة(يعني الأولي فاتحة والتانية فاتحة.)
على العموم في اثناء تندره وبحضور المهندس الساخر عماد فخري من ناس كنانة ذكر مصطفى السمين : " الحمد لله انا ليييييييي هسع ما شالوني"
فرد عليه عماد: " يا خي يكونو ما لاقين كرين يشيلوك بيهو"
اتمنى كل من يمر من هذا البوست ان يرفع يديه داعيا المولي لحبيبنا ا لمهندس عماد فخري بأن يرد له بصره الذي علمت انه قد فقده قبل عدة سنوات....... آآآآآآآآمين يارب
| |
|
|
|
|
|
|
|
|
|
Re: طرائف من داخل المعتقلات.... (Re: MOHAMMED ELSHEIKH)
|
المساجين وما أدراك المساجين
قصص وحكاوي و ظلم واقع عليهم - بحسب آراءهم- حيث علمت ان كل من قابلته منهم هو بريء براءة الذئب من دم ابن يعقوب!!!
يتم توزيعهم على المعتقلين للمساعدة في الطبخ الغسيل ,المكوى....... الخ. وتعتبر نقلة نوعية داخل السجن لمن يتم اختياره حيث الوجبات المدنكلة والتدخين والتمباك و كمان الونسات حيث يحدثونك عن كل شئ في عالمهم داخل " السراية" بدأ من سوقها المتوفر فيه كل شيء من السعوط وحتى البنقو وعن علاقاتهم داخل السجن وعن الزيجات التي تتم داخل هذه السراية العجيبة!!!!!!.
من طرائف ونساتنا معهم كنا نجلس واصحابي : مصطفي السمين وانور والمهندس محمد على (من الأسكان) ونتجاذب اطراف الحديث عن انواع التهم
والمتهمين.
سألنا احدهم - وكل واحد يحفظ مادته من القانون الجنائي عن ظهر قلب- سألناه عن جريمته, فأجاب انهاالمادة 251 القتل العمد.
ولكن قاطعه صاحبه :
- "يازول ماتكضب انت ما 251"
- " طيب كم يا ابو العريف؟"
-" يازول انت ...انت...انت....انت...." وبدأ في عمل تضريبات بعد ان مسح التراب باصبعه.
- " انت المادة حقتك 502"
واستفسرنا عن سر هذه المادة فأجاب:
" ياح دا كاتل اتنين مش واحد" الراجل ضرب 251 2X
فعلق صاحبنا انور: " يعني لو الزول دا كاتل 10 تكون المادة بتاعتو 1510؟"
- " بالظبط كدى"
| |
|
|
|
|
|
|
|
|
|
Re: طرائف من داخل المعتقلات.... (Re: MOHAMMED ELSHEIKH)
|
يا سلام يامحمد
رمضان كريم
اريت أقدر احكي معك تلك الايام
وحزنت جداً للمهندس عماد فخري رد الله بصره
يحضرني الان ميسرة ابراهيم جلدون
ويحضرني الزعيم عوض ابوعجل
واحمد حسن الترزي
وعمك عرابي وصاخبه محمود
وعمنا محمد عثمان محجوب ( ابو الهول )
وعكليت وفضل الله
ود مختار فضل
وجميل كرار
وايوب مصطفى
والبينو أكول
وطون جواج
وامانويل
سأعود واحكي معك
| |
|
|
|
|
|
|
|
|
|
Re: طرائف من داخل المعتقلات.... (Re: Adil Ali)
|
طبعا يا امين محمود
البينو اكول اكول
وهو قائد الكتيبة 110
اويل
طبعا فترة دراستى هناك
اكان فى ازمة معلمين
البينو ده درسنى جغرافيا
اتخيل الكلام ده ؟
والقاضى المقيم فى تلك
الفترة اتاك اتاك رياضيات
و د يعقوب اخصائى
التخدير بمستشفى اويل
علوم ؟ وهو من ابناء
كادقلى
يعنى الناس ديل رغم
شغلهم الاساسى ده
كانت مساعدة منهم
لهم الود والحب و الانحناء
ولنا لعنة الهروب الجماعى
مودة
معاوية اوليفر ؟
| |
|
|
|
|
|
|
|
|
|
Re: طرائف من داخل المعتقلات.... (Re: Nasr)
|
طرفة رواها الاستاذ الفنان ابراهيم الصلحي امد الله في ايامه
قال كان معتقل في كوبر ايام نميري والعمال الشغالين في المطبخ كانوا بيجيبوا ليهم الخضار عشان ينظفوه وفي احدى المرات اجتمع المساجين وقرروا ان يخاطبوا مدير السجن في المرور ويوروه الحاصل واتفقوا انو لما المدير يجي الصلحي يبدأ الكلام ويقول يا سيادة المدير نحن .....وبقية المساجين يكملوا معاه الباقي لانو لو في واحد اتكلم براه العساكر بيقصدوه وتبقى مشكلتو مشكلة وفعلا جاء المدير وزى ما اتفقوا ابتدأ الكلام الصلحي وقال يا سعادة المدير نحن ولكن الجميع صمتوا ولم يتكلموا فكرر الكلام مرة تانية يا سعادة المدير نحن وكرر للمرة التالته وقام المدير زهج وقال ليه ما تقول في شنو يا الصلحي قام الصلحي قال ليه سعادتك انت عارف نحن هنا في المعتقل ما عندنا حاجة نعملها والله لو وصيت ناس المطبخ يجيبوا لينا البصل نقطعوا ليهم يكون احسن !! فاعجب المدير بالفكرة واصدر اوامره لادارة المطبخ يذلك.
| |
|
|
|
|
|
|
|
|
|
Re: طرائف من داخل المعتقلات.... (Re: Nasr)
|
عندما تسمع صوت الكورال القوي يملأ أجواء المعتقل ويهز أركان المستشفى (القسم الغربي): والبزدريك يا ويله من غضبك عليهو ومن مشيك.... يا ويله من أجله الوشيك.... تشعر بالطمأنينة وتدرك مدى الذعر الذي كان يشعر به نظام الجبهة الإنقلابي الذي زج بكل هؤلاء في كوبر وبيوت الأشباح، وتحضرك على الفور أبيات مجحوب شريف: تغنّي ونحن في أسرك... وترجف وأنت في قصرك.
التحايا لكل من عطر فضاء الغربيات بـ:غنى يا خرطوم وغني... وعما قريب الهمبريب يفتح شبابيك الحبيب...التحايا لهم أينما كانوا: مصطفى نصر، شهاب أحمد جعفر، عبد المنعم الجلال، خيري عبد الرحمن، حذيفة الشيخ سلامة، صلاح العالم، أمير شمّت.
تحياتي لك مرة أخرى يا ود الشيخ.
| |
|
|
|
|
|
|
|
|
|
Re: طرائف من داخل المعتقلات.... (Re: Adil Ali)
|
الأحباء
عادل علي
معاوية الصائم
نصر
يوسف سعيد
و الشفيع
لكم تعظيم سلام لمشاركتنا التداعيات
بالمناسبة ياعادل شهاب انا بتذكرو كويس بس ماهو الزول الأنا قاصدو والرجل كان رفيقا لصديقنا حذيفة الشيخ سلامة شقيق الزميلة بالبورد سلمى الشيخ.
| |
|
|
|
|
|
|
|
|
|
Re: طرائف من داخل المعتقلات.... (Re: MOHAMMED ELSHEIKH)
|
و على ذكر طون اليكم هذه الطرفة.
كان في جلسة ونسة ليلية في حوش العنبر الداخلي حوالي الساعة 11 ليلا. كنا انا والأخوان مهندس ايمانويل دوكو , الأعلاميين اروب بقت, اروب مادوت, الفريد تعبان , والمهندس محمد على (بتاع الجكس حق التلفزيون)والنقاش دائر.
طون كان نائما بجوارنا نومة عميقة. فجأة تظهر في سماء كوبر طائرة بوينج 707 وما ادراك ما 707 الزمن داك. اهتزت اركان السجن لأزيزها فيقوم طون حلمان ومنزعج وينط من السرير ويتحشر تحتو(السرير).
وبعد ثوان هدأت الأحوال فأنحنى ايمانويل مخاطبا طون:
" خلاص فاتت تعال"
| |
|
|
|
|
|
|
|
|
|
Re: طرائف من داخل المعتقلات.... (Re: طه كروم)
|
Quote: الحبيب ود الشيخ
تحياتنا ورمضـــان كريم
ولكل زملاء المنبر من الزملاء الود والتحايا
واصل .. نحن معك |
مرحب د. طه طبيبي الخاص حينذاك
والسؤال عن د. مجدي محمداني .... غيابو طال.
تذكر الملاريا والزنقة حقتي ديك وكنت رافض الأكل .أذكر احضر لي انور ودينق ماشام وجبة لأجباري على الاكل وانا كنت رافض .
فخاطبني دينق:
" يا ود الشيخ انت تموت وتروح لناس آخرة جاعان يقولوا ناس دنيا ديل ما عندهم اكل"
| |
|
|
|
|
|
|
|
|
|
Re: طرائف من داخل المعتقلات.... (Re: MOHAMMED ELSHEIKH)
|
عندما يتم اطلاق سراح اي فرد او مجموعة ياتي الشرطي بالقائمة وبصوت جهوري يقوم ينادي عليهم:
"فلان الفلاني....
علان العلاني.....
بكامل عفشهم"
وفي دقايق يجهز المطلق سراحهم و يستعد البقيةلأداء اناشيد الوداع:
"مليون سلام"
"السجن ليس لنا"
"غني ياخرطوم"
"الخ ....الخ..."
في ذلك اليوم 5 فبراير90 اتي البوليس هذه المرة بلستة أو (ليييس) على قول دينق ماشام بها خمس وعشرين نفر!! مرة واحدة
وبدأت الأهازيج وبدات مع زملائي التحضير للخروج بلملمة الأغراض وتوزيع ما تبقى من سجاير ومعجون وصابون على الجماعة.
انتهت الأهازيج وودعنا الجماعة ونحن نردد:
" ياخي نحن طالعين من السجن الصغير دا للسجن الكبير -السودان-"
"ان شاء الله تستمر العلاقة ونجى نزوركم في اقرب فرصة"
وقس على ذلك
ولكن!!
عند الخروج للبوابة وفي الخارج وجدنا لوري بانتظارنا للترحيل لسجن دبك!
| |
|
|
|
|
|
|
|
|
|
Re: طرائف من داخل المعتقلات.... (Re: MOHAMMED ELSHEIKH)
|
في انتظارك يا أبو الشيخ...
| Quote: مرحب د. طه طبيبي الخاص حينذاك |
التحايا للدكتور طه الحاج كروم، أمين مكتبة المعتقلين الذي كان واحداً من الذين بذلوا كل جهد ممكن لجعل حياة الحبس محتملة بقدر الإمكان.
لكما التحايا،
| |
|
|
|
|
|
|
|
|
|
Re: طرائف من داخل المعتقلات.... (Re: MOHAMMED ELSHEIKH)
|
ويطيب المقام في دبك وسط مجموعة نذكر منها د. عبد الله الشاطر د. عبد اللطيف العبادي, م.فوزي البشير م. عربي حسن بشير,م. عماد فخري و 22 فردا آخرين.
ما دعاني لتذكر الأسماء اعلاه(الآخرين سوف يأتي ذكرهم) اننا كنا نشاهد التلفزيون من جهاز 14 بوصة ملون تابع للأخ عربي .
في يوم 22 فبراير 90 تم اطلاق سراح عربي و طبعا تم اطلاق سراح الباناسونيك معه.
وبقينا في حيرة شديدة لانو ناس العبادي بيموتو في المسلسلات المصرية.
الدكتور عبد الله الشاطر اقترح ان يوصى الجماعة البيمشو يوميا المستشفى السلاح الطبي ان يمرو على منزله بالخرطوم لا حضار تلفزيون من بيتو.
ولكن كان التلفزيون على حد قوله : ابيض واسود!
العبادي قال ليهو:
ياخي خليهم يجيبوه ويجيبو معاه علبة الوان!!!
| |
|
|
|
|
|
|
|
|
|
Re: طرائف من داخل المعتقلات.... (Re: نيازي مصطفى)
|
الأخ نيازي
شكري الجزيل لتعازيكم ودمتم.
(الرفيق) الشفيع انا في انتظارك. توقعني في الرياض الأثنين القادم-لنا لقاء_
ود العبيد
تتصور امس كنت مع خيري في الذكريات بمبنى المغتربين وان شاء الله ساوافيك بطريقة الأتصال به.
ياخي لازم تلمني في مصطفى السمين قبل ان اغادر السودان
وهاتفي في السودان:
00249905796344
ضروووووري
مع تحياتي
| |
|
|
|
|
|
|
|
|
|
Re: طرائف من داخل المعتقلات.... (Re: MOHAMMED ELSHEIKH)
|
سوءالظروف البيئية في دبك وانتشار الملاريا الخبيثة ادي لشبه اغلاق للمعتقل حيث رحل الناس اما مرضى للسلاح الطبي او اعيدولكوبر.
تبقي في كوبر الرجل النبيل المهندس عماد فخري -شفاه الله-و معه شخص آخر نسيته الآن.
انا حظي نقلني للسلاح الطبي بملاريا خبيثة واتقدم بترحمي على الدكتورمحمد عثمان الفاضلابي طيب الله ثراه الذي وجدني مرميا في الطواري لمدة 4 أيام وامر بتجهيز غرفة لي وكان نصيبي سرير مع الراحل المرحوم الدكتور مدني احمد عيسى مدير سابق مستشفي مدني حيث قضيت معه 40 يوما حسوما تعرفت فيه اسرتي على اسرته حيث كانت الزيارة متاحة في كل وقت وكانت فترة جميلة تمنينا لو تطول (لآخر مدى).
نواصل
| |
|
|
|
|
|
|
| |
MOHAMMED ELSHEIKH
cantona_1
Amin Mahmoud Zorba
Adil Ali
Nasr
yousif saeed ali
الشفيع وراق عبد الرحمن
خالد العبيد
نيازي مصطفى
فيس بوك
تويتر
انستقرام
يوتيوب
بنتيريست