|
|
 المهم إنني قلت ... والباقي لا يهم
|
باسمك اللهم نبدأ
القصيدة التمساحية
( شي لله في الوطن أب جلابية )
صرخة بقلم : ابن تشرين الآذاريساني
مقدمة الكاتب للقصيدة التمساحية
أبى أهل الإنقاذ إلا أن يتحفونا عند كل مناسبة بزيادة في الأسعار، ونحن الصامتون الغافلون ولا عزاء، يفرح جميع أهل الدنيا حينما يتدفق عندهم البترول، إلا في السودان بلد الثلاثين مليون فقير.
قديماً حبس تمساح مصالح أهلنا في ديار الشايقية ، فقتل أولادهم، واستباح جروفهم وأنعامهم، فتفجرت دواخل الشيخ الفنان المادح حاج الماحي بن محمد بن الشيخ بذلك الدعاء الصوفي المنظوم، الذي حرض فيه كل المشايخ وساكني الضرايح والقبب لأذيته، فكانت قصيدته المعلقة في أفئدة الجميع:
يا رحمن أرحم بي جودك ودلي الغيث ينزل في بلودك
أما حديثاً، فلقد حبس تمساحاً من نوع آخر مصالح جملة أهالي السودان، إلا من كان له علاقة قربى، أو من كانت له ميزة تمساحية لتساهم في تمكين التمساح الأكبر وعونه في تجريف جروف الآخرين، وتشريد العيال، ومن ثم رفع راية كل شي لله المفترى عليها، فهنا حاول العبد الفقير لله وللشعب السوداني ابن تشرين الآذاريساني، أن يجاري شيخنا حاج الماحي في تحريضه الصوفي، فكانت:
يا سودان انهض بي جنودك وخلي الثورة تهز في بلودك
ونرجو أن نلفت أنظار القراء الأعزاء بأن ( شي لله ) التي سترد عليهم مكررة في هذه الصرخة المنظومة، هي فقط كناية عن ظاهرة التسول، التي وكأن الدولة قد أقرتها بمرسوم إنقاذي انبثق عن البيان الأول في الثلاثين من يونيو المشئوم، وأقول هذه الملاحظة الآن حتى لا يغضب علينا أهلنا الصوفية الأكارم وخاصة مريدي الطريقة الختمية.
ولنذكر هنا بأن التيار الصوفي كثيراً ما كان أداة إعلامية تقدمية حين يستشري الفساد وظلم العباد في تاريخنا القديم والحديث، ومثالاً لذلك كما أشار أستاذنا الجليل عمر الحسين في جمعه وتحقيقه لديوان حاج الماحي، إلى أن:
(( المداح كانوا رسل ثقافة و أداة تسرية وتبصير للناس في كل المجالات، الدينية والاجتماعية والسياسية، فصار المستعمر التركي في ذلك الزمان ينظر إليهم بكثير من الريبة والحذر بل تعدى ذلك إلى مرحلة القمع والتحرش، خاصة حينما يرى حاج الماحي مثلاً يشن حملة مكشوفة على الترك الذين وفدوا حكاماً على بلاده، فهانوا أهلها وساموا الناس الرهق من مضاعفة الضرائب، وإساءة المعاملة.
فمثلاً قال حاج الماحي في قصيدته (القبة التلوح أنوارا):
أن كان أخشى أخلي الطارة عقبان اسم أبويا خسارة
كاسوا وعدموا فينا بصارة وراحوا يحرشوا النظارة
العادانا فعلوا عوارة باقيلو المغص عوارة
ثم قال في قصيدة أخرى ( بالفور والدلك ):
ياربي بالفور والدلك تنجينا من جور السلك
حتى أتى إلى:
تصويرتو عن واحداً زمك مجلوط لباسو على الورك
مامورو بالسر يتمسك خداموا بالريح تتعرك
حاكمنا في الجور منهمك يديك كلاماً ويتفرك
الصح لوازمو بقت ضحك إن جيت تقيمو يقولوا أتك ))
وليس بعيداً عن ذاكرتنا شهيد الفكر، المقتول غدراً، المناضل الأستاذ الباشمهندس محمود محمد طه، الذي اغتالته آلة القهر والظلم المايوية، ولقد كان رحمه الله نتاجاً قيماً لمدرسة الصوفية، والذي اختار النضال المدني وحرية الفكر والحوار، للإسهام في نهضة السودان، ولكن وكما قال الأستاذ محمد أحمد المحجوب عندما أعدم النميري، الشهيد عبد الخالق محجوب لقد انتهى عهد التسامح في السودان.. !! فماذا نحن منتظرون ؟؟
ونحن نقول بأن الصوفية كانوا وما زالوا باستطاعتهم أن يكونوا أداة إعلامية ثقافية تقدمية
لشعبنا المقهور، فما الفرق بين الترك ياشيخنا حاج الماحي، رحمك الله، وبين هؤلاء الذين تسلطوا علينا ومارسوا قهر الرجال الذي تعوذ منه كل الأنبياء ؟؟؟
ونحن نتساءل؛ أي سحر أسود أو تمائم سفلية، تستعملها دولة الإنقاذ لنصل لهذا الصمت وتلك الغفلة واللامبالاة الرهيبة !!؟؟.
وأخيراً دام عزكم، فكاتب هذه الصرخة هو المتصوف في حضرة الشعب السوداني، المحرض ، المستاء من غفلتنا نحن المثقفاتية والنخب الناخبة، الغضبان جداً:
(ابن تشرين الآذاريساني رحمه الله)
في ليلة 27/أبريل/2004م الموافقة ليلة الثامن من ربيع أول/1425هـ
بمناسبة زيادة أسعار البنزين للمرة الثانية في الربع الأول للسنة المالية
والمناسبات كثر، ولا حياة لمن يذل
باسمك اللهم نبدأ
القصيدة التمساحية
( شي لله في الوطن أب جلابية)
بقلم: ابن تشرين الآذاريساني ( أبو فواز )
يا سودان انهض بي جنودك وخلي الثورة تهز في بلودك
سم يا قلمي اذكر تاريخك وقوم يامناضل وري وجودك
يا مبدع ابدع بي حضورك ونحن نغني على مريودك
يا سودان انهض بي برك يا ثابت في بحرك وبرك
ياريت ياريت يا كاشف الغمة تجنب ها الدابي تصبحو رمة
تسلط شعباً هيجتو مدمة يعجل فوتو قبيح القمة
يا الرواد الحالكم مرضية يا أهل النادي العقدوا النية
التمساح سكن الظابطية خلوا يروح نسياً منسية
يا الازهري وين نيشانك فوق امدر عامر ديوانك
حلم يا ريس كل حيرانك عشان في التمساح يندق برهانك
يا ود محجوب شيخنا القانوني يا صاحب الفتح المعماري
يا ابنو الولي ويا الميرغاني ارموا سهامكم يا فرساني
شي لله كترت يا ناسنا ما ترخولنا لقمة العيش الغالي
يا جمهورنا البي الشارع متولي التصريف هيلك عجلي
يا عبد الخالق يا كوموني يا اب سيرةً عالي وماك منداري
التمساح تمساحاً خازي دايرين الهوجة أدينا الإجازي
يا البتصلي وشيخو الواعي أرعى عيالك واصبح واعي
التربالي وصاحبو الراعي ارموا سهامكم يا شجاعي
شي لله يا أهلنا دايرة خلوا اسراركم في الكون سايرة
دايرين العكة في أرضنا غايرة نخلي الدار التصبح نايرة
وينكم وينكم لي يا طلبة سهرانين نحسب في نجومنا
التمساح حجر لي حقوقنا إن ماهبيتوا عليكم لومنا
وينكم وينكم يا ديلة يا اهل الوردية الليلة الليلة
اجتمعوا وخلوا البهديلة التمساح احموهو الشيلة
وينكم لي وينكم يا عمال يا ثوار فيكم بتأمل
يا جامعاتنا ويا تلامزية عرض أبواتكم روح يتهمل
وينكم لي وينكم يا كسر يا جيشنا الفيكم بدثر
التمساح بلحيل إتجسر وأمرو عليكم ما بتعسر
شي لله يا ساكن القصر وينو حديث الانقاذ القسري
يا معارضين أببين سراً يسري في الخرتوم الناس متحشري
شي لله مازيانا أزية يا جنيات شيخ الختمية
يا أنصار ويا شيوعية التمساح شوفولو أذية
شي لله يا إذاعة البقعة يا أهل الطبلة البعد الهجعة
يا تلفذيونا الهام أب لسعة أنسوا الدابي بقالكم بدعة
شي لله يا ضرايب وسوطها العاير وعلاج العامة أب سراً سادر
يا تجمع قوملي مبادر فشانا خلاص قول جيتكم حاضر
شي لله صارت افندية حليل جمهورنا الكان ما بكسل
يا مناضل بالله اتوكل قول للدود من بلدي اتفضل
يا أهل ابريل الفات بي ليلو ما فيكم واحداً شاد حيلو ؟
فلان وفلان وفلان ما تشيلو والفجعان فوق راسو ادولو
يا حكيمباشية ويا محامية يا أهل الهبة الباقية فريدة
إنتو إن ما اتباطيطو أكيدة ما بتغلبكم هادى الصيدة
يا رجال اكتوبر اتلموا خلوا الغفلة جميعكم هموا
مارس قام بي ابريلو ولطم الدود بلحيل فوق فمو
يا بلدي اب نايباً شوكة صاحب خبرة وإيدك مبروكة
يا صاحب النفضة ألحقنا بشوكة هم يا شيخ الناس ضموكة
يا مراكبية الجيش والحرس الصالح ردولنا حلايب في بحرنا المالح
ود اللمين والوردي القارح وينهم جنيات صديق وشريف أسياد الشعر الطامح
يا شماشة وأولاد السكة أماني عليكم ليش ها السكتة
اسمع يا مواطن القول ليك إنت جرت الحين في بلادك نكتة
يا ناس محمد ود حاج نقد يا المخفيين وخايفين الدوسة
البلد الكانت محروسة اتحجر العيش والناس محبوسة
يا ساطع ود الحاج ليك بنادي قوم بي اخوانك أوع تبالي
يا اولاد جون وأولاد غازي أخدوا الشكرة العادي .. العادي
يا ناس تيسير بي اهليكم سووا النفرة وأكربوا سريكم
نادوا ابوخالد عبده يجيكم قتل الدود مو قاسي عليكم
يا حاج وراق بي حق حوباتك في التمساح بين آياتك
خلو يصوب من بلداتك لا يتمسخر في زوراتك
شي لله يا رجالتنا الفي الشجرة وفي قيادتنا
وفي مظلاتنا اسمعوا كلمتنا احبسوا الدود لا يطل صفحتنا
يا وطني بجاهك ثبتنا احفظنا وأستر غربتنا
اكوي أعدانا وكيد شامتنا وبين النيلين أكتب راحتنا
الأحزاب يا جملة صحابي الغوث بالوحدة يا الاقطاب
الميرغني والمهدي النشابي أرخوا السر في هادا الدابي
بر َّ الشارع واهتف يوت لا برَّ عدد مخلوق جميع لي الذرة
نظملوا الثاير قصيدة وجرَّ ننجي أهلنا من هادي الحرَّة
لا يغشوكم ناس القصر والتانين الراحوا المنشية
هتافاً جابو ابوفواز المكوي محبة يعم الشارع والآل والصحبة
|
|
 
|
|
|
|
|
|
|
 Re: المهم إنني قلت ... والباقي لا يهم (Re: صديق عبد الجبار)
|
مســــــــــــــــــدار للغايبـــــة
شوفيني شايلك من متين ...!
عاينيني خاتي هواكي وين...!
بعزف مسافات الأمل الدفين..
وبغتي لي رجعة الزمن الحنين..
وأهلي الزمان قالو الحنين..
رافيه ما بيجي بالأنين..
***
مهموم كتير لي طلتك..
من تربة الشوق والكدر..
لكني مستني الصباح..
يالازمة يا ترتيلة أنغام العمر..
يا غايبة مادي معاكي حبل الريدة ديك..
ومعايا..آهــــــــــات الصبر..
ومتوسد الدرب الطويل..
زي..زي حفيان بيجري علي الجمر..
***
سيبي الغياب...
وأديني إيدك يا صبية...
وبردي الشيب والكبر...
دايرك تجي...
وتتباهي جد...
وما تخلي عتره...
تفوتك ضل العصر...
صديق أبو فواز- الخرطوم بحري
بمناسبة إحتفالات ذكرى إنتفاضة مارس/أبريل 2003
| |
|
|
|
|
|
|
|
|
|
Re: المهم إنني قلت ... والباقي لا يهم (Re: صديق عبد الجبار)
|
فريضة الحج إلي الوطن
الخرطوم بحري 11/12/2004م
لبيك يا وطني لك لبيك ..
لبيك لا عشق لي غيرك لبيك ..
إن المنعة والسؤدد لك ولديك ..
لا بديل لك لبيك ..
****
معلق قلبي علي أستارك ..
مهرول أنا إلي محرابك ..
الرب آخذ بيدي إلي أمجادك ..
مائدة التوحد منسوج بخيطها بساطك ..
فالسماء أصدرت بيانها المبارك ..
بأن تتحد الأضداد في أمجادك ..
فليس لات حين مناص .. لبيك
****
السيد المسيح و ابن عبد الله كلهم لديك
النور ..
والإصحاح ..
والمزمار ..
والتلمود ..
والكوجور كلها تقدس الإله بين خافقيك
****
فباسمك اللهم نبدبيك
والمجد والتنزيه للإله في الأعالي
وأنت تحضن الجميع بين يديك
****
مناسك المثول في حضرتك
واضحة المعالم والأركان والفرائض
لو تشبث الفرقاء بدفتيك !!
وليفعل الجميع ما تفعله المياه في نيليك
****
فبذي الجنينة يحرم القادمون من غربيك
وحلفة القديمة الجديدة ميقات تلكم إليك
وأسوار نمولي مشرعة لزنجك الذين يعشقون المبيت في جانبيك
ومثلهم أهل شرقك الذين يرملون ويلقطون الجمر من سهليك
فسواكن ساكنة مادمت طيباً
وإن دعا الداعي .. فلبيك هادرة وسعديك
****
فسحقاً لبتك آذان النعم
ولتكن ذبائح مخضرة الدم
تلين اليبوسة ..
تفجر الزيوت ..
وتزين الصحاري بإستبرق ولؤلؤ بساحليك
ولتنشد العلياء تحت أخشبيك
بقلم:
( أبو فواز )
صديق عبد الجبار مجمد طه
جوال: 0912355113
[email protected]
[email protected]
الخرطوم بحري في 11/ديسمبر /2004م
| |
|
|
|
|
|
|
|
|
|
Re: المهم إنني قلت ... والباقي لا يهم (Re: صديق عبد الجبار)
|
بسم الله الرحمن الرحيم
وين الملايين .... ؟
مجاراة سودانية لقصيدة الشاعر الليبي علي الكيلاني (الشعب العربي وين؟)
بقلم: أبو قرفان المستاء
وين الملايين ... ؟؟
وين الكادحين ...؟؟ وين المنتفضين ...؟؟
الشعب السوداني فين ..؟؟
الغضب السوداني فين ..؟؟
الدم السوداني فين ..؟؟
الشرف السوداني فين .. ؟؟
وين ..؟ وين ..؟ وين ؟
ترتاحوا إنتوا أولاد الجبهة ونشقى أنحنا المقهورين
في صدري فايرص تي بي ..بس الروشتة فين ؟
مرتاحين بتنوموا أولاد العز ونحن مشردين
كذبة كبير بالشاشة ونحن إكتوينا بالتمثيل
الثورة نيشان .. وما بتتباع بالمال
ثورة شعب بيده عصاية وريشة إتحدى الملاعين
ضحوا بكبارها وبصغارها وأهانوا المفصولين
اللي بوسط الضلوع إتدمر من الجوع
الله معنا أقوى وأكبر من ما تخططون
تسجنوا .. تقتلوا .. تشنقوا .. تدفنوا .. حقنا مابيروح
الدم الأحمر راوي أرضنا من قهر الدقون
نار الثورة تقوى تسعر ونحنا المنتصرين
وين .. وين ... ؟؟
أقوى من الجبال .. أكثر من رمال
جوه بيوت الاشباح نغنى وشهدانا حيين
برة الشارع بنقاتل لا بنركع ولا بنلين
اللي بوسط الضلوع أقوى منو الجوع
في صدرى أمراض كثيرة وتقول للساسة فين !!
وين .. وين !!
وين الملايين ؟؟
ناديتهم ما جوني ولا من مية مليون
سهرانين بالتخمة طرش .. وهمن لا يبصرون
الشرف إنداس وبيوتنا خالية وهمن مال وبنون
مايدرون بحالنا ونحن بٍنلحس في الصحون
نحن بتاعين السدود .. نحن بتاعين دارفور
نادينا الاحزاب إترجينا أبين دقون
إستحلفنا الجيوش ... صوتي ما سمعوش
خيرنا وإخترنا أننا نغرق .والثمن عارفين
واجهنا المدفع والرشاش بالطوة والسكين
وين ..وين
اللى بوسط الضلوع..
في غياب الوحدة الوطنية بتسيل الجروح
مهانة الام الوفية والعجوز ينوح
مقتولة الطفلة المغتصبة والوليد يتوهـ
كل نازح بى خيمة مطوية يسأل وين يروح
وين...وين
لميتوا القروش ... وعبيتو البنوك ..
ونسبتوا دارفور والبلد المنهوك
لمتين بس تقوم الوحدة ونبني سد
غير السد ... سد منيع
عدل عظيم وديمقراطية تعز المظلومين
ويجن كيفن ديل ... ؟؟ عدالات الميل
ناسنا خلاصين ... ونحن فككاكين الدين
وين..وين !!
وين الملاين ... ؟؟
نحن الحق ونحن الثورة وهم الغلطانين
جيل الحق وجيل الثورة ومعاهم أحفادهم مجتهدين
لازم نرميهم بهتافنا العالي ونفضح التمكين
لانركع لا نسمع قولهم .. حتى ونحن تعبانين
وين ..وين .. !!
اللي بوسط الضلوع إتبلل بالدموع
لو نفنى عن بكرة أبينا ... اكتب يازمان ...
ابداً ما بتهون يا سودانا .. والثورة عنوان
وين ..وين
الثورة ايمان.. الثورة عنوان
ثورة شعب بإيده عصاية ..
أو حتة حصاية بيرجم بيها تجار الدين
وين ..وين .. !!
اكتب يا سودان ...
الثورة ايمان ...
والثورة عنوان ...
الخرطوم بحري – في 3 يناير 2009م
مع تحيات أبوقرفان المســتاء
| |
|
|
|
|
|
|
|
|
|
Re: المهم إنني قلت ... والباقي لا يهم (Re: صديق عبد الجبار)
|
(قصيدة الربيع المترب)
الخرطوم بحري – فجر الثلاثاء 8 أبريل 2008م
* الباب الأول نون الاستفهام ....
ما أقسى التوهان .. !
بين رمال الموت .. ومواويل عطشى
تتآمر فوق بقايا إنسان
هل يأتي نيسان غريباً .. ؟
وهو العالق في الأذهان..!
أم هل يضحى كربيعُُّ مترب بالأحزان ؟
وهل كان لقيطاً يوماً ؟
لأن أباه تشرين يهان
ماذا حل بنا عبر الأزمان ؟
أين الضوء الأخضر
عبر النفق المظلم بالأكفان !!
أين مزامير العيد ؟
وطبول العز وفلسفة الزمكان !!
أين الشارع ؟
أين الظل ؟
وأكاليل الورد تداس الآن
يا جيل الأبناء الحائر
في بحر التوهان ...
إليك بريد يتمايل بؤساً !
فأين الموقع .. بل أين العنوان ؟!
هل إنا أعطيناك الكوثر ... ؟
أم هل جف مداد البحر
وغار كعمل آثم في بطن القيعان ؟!!
* الباب الثاني ميم التأنيث ...
يا أخت الماضي سلام ...
ما كانت أمك ترضى بالبيت حطام !
ولا كان أبوك يساق ..
بصمت مخزي للإعدام ..!
ولا كان القيظ الآذاري ...
يمر بطيئاً في حي للأقزام ..!
حي تغتال وتسجن فيه رؤوس
ويعلو فيه الفجرة والأقدام
ما بال الظهر يمانع ثمراً..!!
أم ما عادت تنجبه الأرحام ..؟
إني أقسم أنك حبلى بالفجر
ولكن حماة المهد.. بالخدر نيام ..!
فلتنطلق زغاريد الصبح الآتي
يا أختاه ..ويا أماه .. فالصمت حرام
وللربيع المترب بقية
أبو فواز
| |
|
|
|
|
|
|
|
|
|
Re: المهم إنني قلت ... والباقي لا يهم (Re: محمد الكامل عبد الحليم)
|
Quote: تحية.... الصباحات البهية تاتي مع صهيل الحروف حاملة معاني البشارات...تاتي مع سهد الليل والوجع المتصل عن حال عازة...(عازة في الفؤاد دواء يشفي الوبال)
واصل الحروف النازفة والراعفة والمضيئة....ادلق في باحات الرجاء سمنا وعسلا...
دوزن علي ايقاعات الخليل واتحفنا بما يمنح الامل بشموس جديدة ...
ونحن نستقبلك مفكرا وشاعرا وناثرا صادحا بالحق والاغاني والاماني.... |
التحية لك أخي محمد الكامل على هذا الكلام الجميل .. والذي أوسع مني قليلاً ...
إنها محاولات مني متواضعة في حضرة هذا الوطن النازف وهذا الشعب الصابر ..
ربنا يقدرنا على مواصلة العطاء وإن قل ... فنحن لا نسطيع أن نرقى مهما فعلنا أو تكلمنا لشموخ هذا البلد ..
ألف تحية وشكر وتقدير ومودة
| |
|
|
|
|
|
|
|
|
|
Re: المهم إنني قلت ... والباقي لا يهم (Re: صديق عبد الجبار)
|
إلى أعز عزيز
ميلاد ثورة
18/09/1979
من وسط الزحمة وقلب الأزمة
حتظهري إنتي
وتصبحي أنتي لكل مناضل إنتي الراية
من ديك كنداكة
وهاك يا صف
واضرب كف من فوق لي كف
حتنبتي إنتي .. وتزهري إنتي
وكل الما عزاك ينتف
ومن حلقات الريف وشتات البندر
وفيهم داك الديماً سارح
فيكي ومنك وليكي معاكي
حتكبري إنتي وتنضجي إنتي
يرن دوبايك ويفرح نايك ويلمع قوسك
ومنو السهم الماش للعنتر
إنتي حديثك ما اسطورة
إنتي بعانخي أبوك لزم
وديك مهيرة رضعتي لباها
وداك المهدي السالي السيف
معاه وليد الماظ العابدو لطيف
فرحوا بعيدك يوم اكتوبر
تاني حتبقي جديدة ونايرة
وبينا أنحنا تتم الصورة
إنتي الثورة حترجعي لينا
وانتي لباب في الجنة حتفتحي لينا
حترفعي صوتنا ..
ونرفع رايتك كل ما مشينا
رايتك ديك الطولها زمن
وعرضها دمعة يصونها شهيد
حتبقى مظلة وتصبح بيت
تغطي وليدها وتمسح عبرة
وتبقى زمن من فوقنا منيرة
ونمرح داك اليوم في عيدنا
مع تحيات
أبوفواز
| |
|
|
|
|
|
|
|
|
|
Re: المهم إنني قلت ... والباقي لا يهم (Re: صديق عبد الجبار)
|
Quote: بمناسبة غفلة الوحدويين والعلمانيين مع أن الآخرين شمروا وربطوا الأحزمة من زماااااااااان ......!!!!!!!!
(2)
الواضح المستور
ملعون أبو التمكين لو كان على حساب الوطن والدين
ملعون أبو التأصيل لو ما كان العقل بيكيل
ملعونة إنتي بلد لو ما ساقوك أهلك البجد
***
جنيات المحس والفور .. والشايقية والبيبور
والدينكا ورجال عتمور .. والجعلية وشباب أونور
والأقباط وتبع الكوجور
ورباطابنا الفي دارهم الكسر مجبور
وناس شلك ونوير وباقي الدور
ونوبة وبديرية ومسيرية
إلى آخر .. إلى آخر .. إلى آخر
وكل خلاف يكون واضح وبس مستور
أبوفواز الوحدوي
|
| |
|
|
|
|
|
|
|
|
|
Re: المهم إنني قلت ... والباقي لا يهم (Re: صديق عبد الجبار)
|
الفجر الحالم
العرس نداء يتجلى
وبكائك يا أملي في صدر نائم
وعواء الذئب عليك
وتلك الأيام الحبلى بنظفة ظالم
تاجك قبلة نيلان
وللنهر دموع بعانخي على الفجر الحالم
يا خيبة أملك ياجدي
فالوالد تاريخ مطموس معالم
مولود في عز اكتوبر
محتضر في ذاك الشهر الغاشم
أختي الحمراء أرافقها
نرعى عرش أبانا النائم
ونشد العزم على هدف
تموت علية وتفنى مظالم
وتعلو أكف ضراعات للحق
ومعه عدل دائم
وباذن شفاعات الرب
يموت الموت ويبقى العيش الباسم
فلينطلق الصوت المكتوم سنيناً
ليطير التاج ويبقى الجذر الناعم
فلتتحد أيادينا يا أختاه
"نهد قلاع الظلم الغاشم"
وليحيا الحب وتحيا الثورة
عزيزان بصدر حالم
10/ديسمبر/1978م
___أبوفواز________
| |
|
|
|
|
|
|
| |
صديق عبد الجبار
talha alsayed
سيف الدولة كامل
عمار عبدالله عبدالرحمن
Nasr
أحمد ابن عوف
محمد الكامل عبد الحليم
فيس بوك
تويتر
انستقرام
يوتيوب
بنتيريست