|
|
 Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: وما خابت عليك مسرتنا
نترجاك
بي الدلوكا نترجاكي
بالسلوكا نتراكي
بالدوباي |
وسوف نسر بالك ونرضي أملك يا أيتها الأرض المعطاء ( الجزيرة )
وابداً ما حا نخيب أملك فينا نحن بنوك هذا ( حديث وكلام حمدان يخاطب الأم الرؤوم الجزيرة أم دوح )
وسوف ننتظرك يا ارضنا
بالدلوكا والغنا والنم شعرا
ونترجاك بالسلوكة نعمر اراضيك الزراعية تربتنا الناضرة
نترجاك بالدوباي شعرا ونما
Quote: وبالدوباي
تقوم يا بيتنا بيت الطين
حنة يوم
لتيبة يوم
شراية يوم
ولبانيتاً تخدر في مسورنا الجاي
ولبنايتاً تخدر في مسورنا الجاي |
وبالنم والدوباي والعمل سوف نبنيك يا بيتنا من تاني
وتقوم يا بيتنا بيت زينة من طين
درجة درجة كما مراحل نمو الذرة
لتيبة
شراية
ثم لبنة
تخدر في سريتنا في السنة القادمة
حبة ذرة عندما نسقفك بسقف يليق بك
| |
 
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
كـــلام الرتينة بت سالم ولد عِتمان
في حنة علي الشاشوق
بنية بنية ...
لي سالم ولد عِتمان
وسموها الرتنـــة
أمها بت علي الخمجان
خريف الرازة ..
عِزيـــنة ...
كُبار الحِلة أباتا
وبُكار الحِلة أماتا
وبتبرق زيـــنة
تمرق زينــة
تمشي تهاتي وزينة
بلا الربعة التحجّل
شاكية من شبكة كِتافا
وفوق الجِيد
علي ضهر البواد تغني
ما خاتية الزرافة
كلاما حنين
بِسيمة الودعة ..
إلا تزيد لطافا
ملامها رصين
مقدم زُوكها قُبال الحصافة
سلاما ضنين
سلاما يطمن الهمباتي
والمجلوبة متعارض كِتافا
وقارية وكاتبا
تحمد سيدها
ماخدا علي البنيات الشرافة
كذا البريبة تبردعيني
لا تغشاها
لا أحضر نشافا
وكان في الحلة
يوم حنة علي الشاشوق
مشينا نقدم البنوت
علي ضو الرتاين
عيونهن هارجا
تنبح في الفجر والليل قريب
واقف يعاين
خِدودهن واجا
زي جهر الكهارب الفي المداين
وكان الليل
كان الليل من الحفلة
إلا صداها...
كان زُغرودة
كان غناي ..
رقيص الشامة بت حمدين
وعرضة حامد العولاق
وخت الحِنة لي يات
من حضور ضُفرين
ونمات العديل والزين
وشنق ودسعد طاقيتو
شان في الحلة ساو كِنتين
شكلة عامر المسكين
وعيط ود مجمر زين
شان الزينة رقصت زين
وفي الشعقيبة كان
بازمالو شبالين
سهرة وين
بهرة وين
وسكرة وين
أقول ...
آبنية ليش ماتهمي
ليش ماتهمي
فوق زولاً مشلهت فوق دريبك
لا النفس مجبود
ولا لِحق الغزالة
وقفت ...
وإنبهط رماشّا
جدعت بي البسم رشاشّا
يا المهجوم ..
يا المهجوم إهجمك الله
كان داير تسيلّي الخُلعة
قالت ...
والعيون ضحاكّا
في ضو الرتين بشاشّا
عاد من حيني جاتني الحالة
قتلها ..
لا .. لا
وحات النِعمة آبنية
البريد ...
في الريدا ما بخبر فسالّا
حدرت باسمة ...
قتلّا ...
عايني تسلم عينك
إلا حقيقة مو ساهل كُتالّا
حلفت ناضرا
حالفابو الصباح الباش
بلون في المشارق
والنسايم الجايّا
من تالانا تالّا
بريد ريدك سماح أهلي
وريد ريدك كِفاح أهلي
وأريد مهواك
اريد إنسانك الجواك
أريدك والله
زي أخر الحِتالة
قُتلا أقيفي ..
داير أرميلّي مرباعين
وتبقى حمالتي عند سيد الحمالة
وقفت وإنبهط رماشّا
يا الممسوخ
يا المسخوت حِدانا العين
بعدما تسدر الضحوية
خُت الفأس علي كتفك
بوّبح غادي بوّبح غادي
نم فوق البعجبك
زيــــن...
قُتلّا زين
وداك الحين
بشوفك يا الرتينة
مع الشمش بتلالي
مِناك لي السحاب
الكَابي فوق حِلتنا
كان سابل ضُلالة
وأشوفك في عُوينات الصَبيّن
العُشق لصف ضياهم
والنهار وصف خُطاهم
والصبر زارعينو
فوق ضهر البيادر
فوق كتافين السّقالة
وبريدك
وريديدك كفاحي أهلي
وبريد ريدك سماح أهلي
واريد مهواك
اريد إنسانك الجواك
وأريدك والله
زي أخر الحتالة
وأدوبيلك
وأدوبيلك
وأشيلك غنوة للسمحات
وأنمك في تراتيلي
وكُل ما العتمة تنزل سابلة
أنسى عناي
إتاوق لي قناديلك
وأشد حيلي
وأدوبيلك
إذا مغناي
يبرد في الحشا صبرك
ويرجع لي تهاليلك
بدوبيلك ..
وبدوبيلك
ولو الشوق عرف بكاكي
أطري غُناي
عليكي العزة آ المريودة
دوبيلّي
عليكي العزة آ المريودة
دوبيلّي
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: كـــلام الرتينة بت سالم ولد عِتمان
في حنة علي الشاشوق |
وكما قلنا سابقاً أن هناك اشياء كثيرة تميز القدال عن غيره من الشعراء
العمق في موروث المفردة
وحتى المفردة متنوعة ( مفردة الوسط .. والشمال .. والبادية .. ومفردة الغرب )
الحس العالي في اختيار المواضيع ليطرحها شعرا منظوم
الأسهاب مع الأتقان لتسلسل الموضوع الذي يتحدث فيه
التنوع
المبادئ التي لا تتغير مهما جار الزمان والثبات على تلك المبادئ ( من يوم قام وشبَّ درفون )
الإنسانية العالية شخصاً وموضوعا
اختيار الشخوص واسمائهم ذات الاجراس التي تطرب أذن المستمع
و
فلو مثلاً نظرنا لعنوان قصيدته هذه نجد العجب العجاب من أسماء ذات جرس يطرب الأذن الصاغية
الرتينة أسم البنت التي نظمت فوقها القصيدة
بت سالم ولد عِتمان ( عثمان )
في حنة
علي الشاشوق
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
والقصيدة تعبير عن الحب العفيف الصادق في تلك المناطق
كلام الرتينة بت سالم ولد عِتمان
يوم حنة علي الشاشوق
ومن الحبيب
ود مجمر
وكانت الرتينة زينة الحفل يومها
ورقصت زين
ولا ادري اتدرج هذه القصيدة من ضمن الشعر القصصي
لكنها قصة جميلة عن حب عفيف طاهر بين بنت وولد صورها لنا القدال في براعة وجمال وضمن ذلك كيف الحياة
العفة عند الناس في كل شئ وأولها الحب
الحب شئ عظيم وجميل لكن للأسف معظمنا لايدري معناه والكل يعتبر الحب ان يكون غاية لزواج
ومالو ان ينتهي بالزواج لكن الغلط أن نبحث عن الحبيب من أجل الزواج وهنا يكون الفشل
مالو لو حبينا وسمحنا لقولونا ان تختار الحبيب وبعدها ان يكون الامر ( الزواج ) والله هنا تكون السعادة
وحديث الرتينة مع ود مجمر
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
بنية بنية ...
لي سالم ولد عِتمان
وسموها الرتنـــة
وكانت البداية
يعرفنا القدال من هي الرتينة
انها بنت سالم ولد عِتمان
واختير لها يوم ميلادها اسم الرتينة وقدر الله أنها صارت رتينة
الرتينة هي لمبة تستخدم للإضاءة وتعمل بالسبيرتو والجاز
لها شاشة عندما تضئ يكون ضوءها قويواقوى من ضوء الفانوس ( بتاع الجاز )
وكانت تستخدم في القرى قبل دخول الكهرباء في الملمات فراح أو أتراح كانت
وجرت العادة أن يستخدم الناس في بيوتهم لمبة الجاز الصغيرة ( الفانوس ) لانها اقتصادية ولا تصرف
ويا سلاااام علي تلك الأيام نحن شفنا الرتينة في المقابر قبل ظهور الكشافات وقبل ان تصل الكهرباء إلى المقابر
وفي حالة موت شخص في الليل كان عثمان ابراهيم عليه رحمة الله بجيب الرتاين ( في شندي )
نلاحظ أن الكثير من النساء
لا اقول كلهم لكن الغالب من من صادفت تجد الاسم ( لو كان للأسم معنى ) ينطبق على الشكل
الرتينة وكما اختار لها القدال الاسم كانت بنت جميلة في ضيها كضي الرتينة
والرتينة كانت قديماً يستخدم اللفظ عن بيان جمال المراة
قال شاعر
حبيبي ضي اللمبة
خلوني مِصنقر جنبا
والله فوق ضُل البرندا
تحضرني قصة .. كان في مرتين اخوات ( القصة حقيقة ) واحدة منهن أسمعها العافية
العافية هذه ربنا لم يحبيها شئ من الجمال
المهم يوم اختها ماشا شافت في سيارة مكتوب عليها
( سمحة العافية )
ردت بصوت وسمعها من كانوا معها يومها
والله يا اخوي ما شفتها ساكت
( سمحة
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: بنية بنية ...
لي سالم ولد عِتمان
وسموها الرتنـــة
أمها بت علي الخمجان
خريف الرازة ..
عِزيـــنة ...
كُبار الحِلة أباتا
وبُكار الحِلة أماتا |
بنية سالم وليد عِتمان واسمها الرتينة ( تضوي )
وكيف لا تكون للجمال حايزة .. دي امها بت علي الخمجان
ذات جمال وحسب ونسب
علي الخمجان كان يطلق هذا الأسم على من هو في كرمه خمجان اي يسوي الكرم بزيادة
فأمها بت علي الخمجان
خريف الرازة : الرازة هي الرعود
اي الخريف ذو الرعود ويعني خريف زين
عزينة : اي بنت عز وبيت عز
وفوق هذا وذاكَ فكبار الحلة أباتا
وهنا يعني كبار اي له مكانة اجتماعية فوق ( كبيرة )
وبكار الحلة اماتا ( ويعني اباتا اخوالها واعمامها واجدادها )
اماتا ( خالاتها وعماتها وحبوباتها ) هنَّ بكار الحلة
ومن هذا ذاك اراد الشاعر ان يعرفنا من هي الرتينة حسب ونسب ومكانة اجتماعية وجمال
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: وبتبرق زيـــنة
تمرق زينــة
تمشي تهاتي وزينة
بلا الربعة التحجّل
شاكية من شبكة كِتافا |
وهنا يصف لنا جمال الرتينة بت سالم ولد عِتمان
كانت عندما تخرج من بيتها كأنها الحُلي يبرق ويتلاصف لمعاناً وزينة ( سمحة سماحة الشدة )
تمرق زينة
وفي مشيتها كأنها الوزينة عوماً وعوم الوز مهاتا اي قميز
الربعة هي البعير عمر اربعة سنوات عندما تكون مكتوفة الكتاف اي الحبل الذي ربطت به ارجلها كأنه الحجول (والحجل معروف يلبس في الارجل )
والبت جمال وحشمة وزينة اي سمحة ومشيتها تزيد الجمال جمال
Quote: وفوق الجِيد
علي ضهر البوادي تغني
ما خاتية الزرافة |
وفوق الجيد علي ضهر البوادي
يعني ان جيدها فارع وقوامها فارع كأنها الزرافة طولا وليس الجيدكجيد الزرافة شبهها فقط بالزرافة في الطول
Quote: كلاما حنين
بِسيمة الودعة ..
إلا تزيد لطافا
ملامها رصين
مقدم زُوكها قُبال الحصافة |
في حديثها غُنة وحنين
وبسمها اي فمها صغير كأنه الودعة وبل اجمل ويزيد لطافة وجمال من الودعة
وعندما تلوم ..حتى طريقة ملامها فيه الرصانة والرزانة والحكمة
ودائما تجد في حديثها جمال الذوق وحصيفة ويأتيك جمال ذوقها قبل ان الحكمة في حديثها
Quote: سلاما ضنين
سلاما يطمن الهمباتي
والمجلوبة متعارض كِتافا
وقارية وكاتبا
تحمد سيدها
ماخدا علي البنيات الشرافة |
سلامها حلو طعمه وكلام يعطيك الامان والسلام وحتى وأن ألقته على همبتاتي ( مهاجري ) إطمئن قلبه لها وهذا ضرب المستحيل
اي حتى الهمباتي يطمئن لحديثها وسلامها ومن السلام سلام
ومع كل هذا الجمال فهي متعلمة وقارية وكاتبة
وكانت البرنجية بربعها من البنات وماخدا الشرافة والتقدم عليهنَّ وتحمد الله سيدها على كل هذا المنح الربانية التي حباها بها المولى
جمال .. علم .. حسب ونسب .. حكمة .. وذوق هذا الكمال والكمال لله
Quote: كذا البريبة تبردعيني
لا تغشاها
لا أحضر نشافا |
البريبة زهرة نبات جميلة اي تشبه البرويبة في حسنها وتبرد عيني لا يغشها شر ولا هم ولا احضر نشافا اي زبولها
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: وكان في الحلة
يوم حنة علي الشاشوق
مشينا نقدم البنوت
علي ضو الرتاين |
وفي يوم كان في الحلة تلك الحفل ( عُرس )
يوم حنة علي الشاشوق
وفي عادة أهل القرى .. من صباحاً بدري يوم العرس بكون الضبايح ( وعادة ثيران عجول .. ومع بعض الخراف .. وبعدها يتلمن نساء الحلة من جم لخدمة طعام العشاء كان .. وفي اليوم داك بتكون كل الحلة معسكرة من الصباح في بيت العرس فطور .. غداء .. والعزومة أصلاً عشاء .. وشي شائ وشي قهوة وفي المساء بتكون العزومة الاصلية وبجو الضيوف من الأحياء الكجاورة للحلة تلبية الدعوة عشاء وبعد العشاء بجهز ولاد الحي مكان الحفل
ويم حنة علي الشاشوق
مشينا نقدم البنوت ... قبل بدء الحفل يكون هناك شوية خجل وحياء من البنات وعادة ينبري بعض من الأولاد بتقديم لمكان الحفل الذي عادة يكون في أكبر ساحة جنب بيت العرس
مشينا نقدم البنوت علي ضو الرتاين .. وهو الضوء والإضاءة التي تستخدم في القرى للحفلات
وتكون الرتاين موضوعة في وسط الدارة التي مجهزة اساساً لرقص البنات وعرضة الأولاد
الرجال في ناحية والبنوت في ناحية أوعك من إختلاط وطاولات الصالات أم عشا ممحوق دي الناس بتكون شبعانة تب ضلع وكل واحد وواحدة واقف تمبلة كان هبشتو في بطنو يرجع التحلية لانها بتكون فوق اخر شئ دخلها
[Quote: B]عيونهن هارجا
تنبح في الفجر والليل قريب
واقف يعاين
خِدودهن واجا
زي جهر الكهارب الفي المداين |
وكانت عيون البنات هارجا
الهرج هو الحكي بصوت عالي
وهنا أستخدم المفردة القدال يعني بها
ان عيون الصبية ( البنات ) كانت تنبح لتزيح ظلام ذاك الليل وكأنها الفجر يطرد الليل ليحل مكانه
تشبيه فيهمن الضمنية عمق كبير العيون كالفجر تريد تطرد ظلام الليل
والليل واقف ينظر تلك العيون تطرد ظلامه ولا يحرك ساكن مع ذاك الجمال للعيون
خدودهن واجا
واجا اي مبهرجة تضئ في تلك الضلمة كأنها كهارب المدينة في الليل تراها من بعد
Quote: وكان الليل
كان الليل من الحفلة
إلا صداها... |
وكان في تلك الليلة مافي شئ في الحلة ذو أهمية تذكر غير العرس وذاك الحفل وصداها يخناق أجواء الحي
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: كان زُغرودة
كان غناي ..
رقيص الشامة بت حمدين
وعرضة حامد العولاق
وخت الحِنة لي يات
من حضور ضُفرين
ونمات العديل والزين
وشنق ودسعد طاقيتو
شان في الحلة ساو كِنتين
شكلة عامر المسكين
وعيط ود مجمر زين
شان الزينة رقصت زين
وفي الشعقيبة كان
بازمالو شبالين |
وهنا يصف لنا الحفل وبعض الحضور في حفل حنة علي الشاشوق
كان صوت الزغاريد تشق عنان السماء بهجة وفال للعريس المحصن بعضم الحوت وعقد جلاد أحمر
وهلال زي هلال رمضان يزين رأسه تعلوه الضريرة ( عادة ) والحريرة في الإيد اليمين يهز ويبشر هاش باشي مبسوط ( ما ساير لي بت القبائل )
صوت الزغاريد يعانق صوت المطرب ( الغناي ) وهوشة الشباب في الحفل مع صورة الحسان يرقصنَّ يودن الطوق جاي وجاي الكتفين تلاحم الكفل يحاكينَّ رقص الحمامة زهو وحركة
ويومها رقصة الشامة بت حمدين ..واكيد الشامة بت حمدين هي مرأة في وسط العمر متزوجة ولها من البنين والبنات حظا .. وكانت جميلة أكيد تلك الشامة بت حمدين وتجيد الرقص لذا بدأت الحفل رقيص تبعث به الجرءة في نفوس البنات
وعرضة حامد العولاق في كل مكان وفي كل حي يكون هناك شخصية كما شخصية حامد العولاق ( زول برفع الكلفة ولا يستحي وفوق هذا وذاك يكون في شئ من تخلف عقلي )
وحنة كل الحضور لو ما كل اليد أو اليدين يحنن ضفر اي أصبع او أصبعين مجاملة للعريس
ونمات العديل والزين
العديل والزين
أنا منايا لي
فالاً حسن
علي الشاشوق
مرق وشدو لي
العديل والزين تقال وتنشد وقت الحنة ( للعريس )
وشنق ود سعد طاقيتو
شان في الحلة ساوو كِنتين
وهذا دلالة علي الفنجرية وسيد الدكان في القرى له وضع أجتماعي مرموق ( وما بكون مدين من زول ههههههههه )
ود سعد قاعد في الحفل مشنق طاقيتو وقاعد في الصف الامامي وفوق عديلو عندو دكان قدر الضربة في الحلة
ويومها حصلت شكلة بين عامر المسكين لكن اظنو كان خاتيلو شي في راسو ( خمر )
وشكلة عامر المسكين
وعيط ود مجمر زين
وبكى ود مجمر وكان سبب بكائه ( وعيط زين اي بكى كثير )
لانو الزينة رقصت زين ( اي رقصت بطريقة زينة وحلوة )
وزين هناك جناس تام
تشابه الحروف والاختلاف في المعنى
الأولى معناها : زين : كثير
والثانية : زين :حلو وسمح
وفي الشعقيبة اي في دائرة الحفل ( الساحة وسط الحفل )
كان نصيبه شبال مرتين من الزينة ( الرتينة )
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: سهرة وين
بهرة وين
وجهرة وين |
وسهرة وين ( كانت جنس سهرة لا شبيه لها )
وبهرة وين البهرة هي هي بهارج الزينة في الحفل
Quote: أقول ...
آبنية ليش ماتهمي
ليش ماتهمي
فوق زولاً مشلهت فوق دريبك
لا النفس مجبود
ولا لِحق الغزالة |
وهنا القول على لسان ود مجمر العاشق للرتينة
آبنية
ليش ما بتهمي وتشتاقي لي زول مشلهت
مشلهت اي مشحتفا روحو وراك وبحبك وبحن إليك وبشتاق إليك
لاقادر يصل لك ولا قادر يموت بشوقك
وشبه حاله بشخص ساكي غزالة في القنيص
لا لحق الغزالة
ولا قادر يجبد نفسو من التعب ( يلهث )
وهذا إستجداء للحبيبة عليها تحن ويرهف قلبها لحبيب ميت بشوقها
وهي بين اترابها تايها في تيها وجمالها
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: وقفت ...
وإنبهط رماشّا
جدعت بي البسم رشاشّا
يا المهجوم ..
يا المهجوم إهجمك الله
كان داير تسيلّي الخُلعة
قالت ...
والعيون ضحاكّا
في ضو الرتين بشاشّا |
ونتابع الحوار الذي دار بين الحبيب الرتينة
بعدما قال ليها :
آبنية ليش ماتهمي
فوق زولاً مشلهت فوق دريبك
لا النفس مجبود ولا لحق الغزالة
قال القدال يصور لنا ذلك الحوار الحنين بين الحبيبين
وقال :
وقفت ...
وهذا دلالة على أنها تريد أن تقول شئ مهم
وإنبهط رماشّا
اي أسدلت من رموشها تحوي إليك انها تريد ان تقول ذاك القول المهم
وجدعت بي البسم رشاشا
ورشاشا هنا سها أعينها الجميلة
يا المهجوم يهجمك الله
كان سويت لي خُلعة بقولك هذا
كيف أنا لأا أهم ليك كيف لا أحن إليك
وقالت كل كلامها هذا وعيونه تعلوها البشاشة
وكانت العيون تضحك وتضاحك من ينظر إليها من خلال ضوء الرتاين
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: عاد من حيني جاتني الحالة
قتلها ..
لا .. لا
وحات النِعمة آبنية
البريد ...
في الريدا ما بخبر فسالّا |
وبعد أن قالت قولها السابق ( الرتينة )
وكان ساعة قولها يعيونها ضاكحة في ضو الرتاين بي بشاشة وجمال
جاتني الحالة حالة الشوق والحنين لها وبشتاق ليها وهي معايا
قتلها
لا لا والف لا
البريد في الريدة
ما بخبر فسالا
الفسالة هي البخل
البريد ابدا ما بكون بخيل يجود ولو بالنفس من أجل الحبيب
ةهذا لو كان الحب صادق نبيل
لكن خلي من يدعي الحب ولم يعرف الحُب لقلبه سبيلا
من أول تجربة تجده وهنت قواه وإنفنس متراجع ولا يقدم للتضحية أبدا
والبريد في الريدة ما بخبر فسالا
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: حدرت باسمة ...
قتلّا ...
عايني تسلم عينك
إلا حقيقة مو ساهل كُتالّا |
وبعدها جاء رد الرتينة للمحبوب
والمرة دي حدرت باسمة
الحدرة هي صرة الوشي
لكن يا حلات صرة وشيها
صرة وجه مع بسمة تعلو الشفاه
وكان رد المحبوب
عايني تسلم عينك
إلا حقيقة
مو ساهل كُتالا
ياعيني واحدري يسلمو عيونك يا ست روحي
لكن حقيقة الحق يقال تصرعني عيونك عندما ترميني بنظر
( بسمة ونظرة هم غيرو حال )
حقيقة لا يسهل القتال والصمود مع أسهم عيونك الرشاشة
Quote: حلفت ناضرا
حالفابو الصباح الباش
بلون في المشارق
والنسايم الجايّا
من تالانا تالّا
أبقى حِداك آ المريود
وأقول لي أهلنا ناس قِدام
وفي ها الحالة مو شينة القوالا
وسائل القمرة في شأنك
واقولها هيلا يا القمرة
وتاني وهيلا يا القمرة
دحين ساكن رويشات القليب
في الحلة مو شرا المقالا |
حلفت ناضرا
النضر هي كلمة ( نذر ) النذر يكون لله ان تنذر لو إنقضى لك أمر كذا أن تتصدق بكذا لوجه الله
وحلفت ناذرا
وأقسمت بالمشارق والصباح الباش
باش اي ضاحك ومستبشر يلون المشارق اي مشرق الأرض .. والنسايم تهب من ناحيتنا ( من تالانا تالا )
ومن اجل هذا كان نذرها
أبقى حِداك آ المريود
اي أصمد واكافح من اجل حبي وحبك ( ومن أجل حبي لك )
وابقى حِداك اي ابقى جنبك دوام
واقول لي أهلنا ناس قِدام
وفي ها الحالة مو شينة
القوالا
اي احدث عن حبي وحبك ولا أستحي وانا بشوف اني ما بقول وانشر كلام يشين شخصي وحبي لك عفيف ( رايداك يا المريود )
وسائل القمرة في شأنك
وكل ليلة مقمرة استلقي في لحافي أناشد واناجي القمر الأبيض لبناً هتف
واقول
يا القمرة
أقلبي السنسنة الحمرا
وشوفي الحبيب وين ما جا
وتاني وهيلا
يا القمرة
أقلبي السنسنة الحمرا
وشوفي الحبيب
وين ؟ ما جا
ويا القمرة دحين المريود الساكن في رويشات قليبي ما رشاشا المقال
اي ما جا ويطلبني من أهل بيتي
ما رشا المقال اي نشر الخبر أنو يريدني على سنة الله ورسوله
وما أجمل هذا التعبير
ساكن رويشات القليب وغائر ومتعمق في ريش القلب متخذ مسكنا
وهذا الفن الأبداع كما قلت من قبل لا تجده إلا عند القدال في شعره
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: وقفت وإنبهط رماشّا
يا الممسوخ
يا المسخوت حِدانا العين
بعدما تسدر الضحوية
خُت الفأس علي كتفك
بوّبح غادي بوّبح غادي
نم فوق البعجبك
زيــــن... |
وهنا جاء رد الرتينة على قول المريود
أنه هاش باش ويريد ان ينم بمرباعين من الدوبيت والشعر
ونلاحظ هنا أن القدال يبدأ حديث الرتينة بحركة ( حضور مسرحي في طريقة حديثها )
وهو الذي قال لنا ( القدال منذ بداية القصيد يصف لنا الرتينة )
انها قارية وكاتبة
تحمد سيدها
ماخدا علي البِنيات الشرافة
قال وقفت وإنبهط رماشا
وقالت
آالممسوخ .. حِدانا العين
الممسوخ هنا لاتعني بها المعنى لكن جرت العادة في الحديث أن تصف حلو اللسان وتقول له يا ممسوخ
وهي كلمة رقيقة في التعامل
حِدانا العين
أكفينا شر العين والحسد ( في علاقتنا هذه )
لو قلت شعر فيَّ سوف يشمع به الناس واحتمال نصاب في علاقتنا العفيفة هذه بالعين والحسد وكل جميل وجيد وجميل معيون
وأنا ما معيون
وما هنا ليست نافية بل تأكدية في عاميتنا السودانية
يقال انا ما حلو اي انا حلو وهذه اكيد
بكرة بعدما تسدر الخلا في الضحوية
خُت الفأس علي كتفك
ونم وقول البعجبك فوقي
زين
وزين هنا تعني : كويس
وقالها زين وحاضر يا عيوني ونورها
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: قُتلّا زين
وداك الحين
بشوفك يا الرتينة
مع الشمش بتلالي
مِناك لي السحاب
الكَابي فوق حِلتنا
كان سابل ضُلالة |
قُتلا زين
اي سمح وكما قلتي سوف انم واغني فيك بكرة لما أسدر الضحوية
وفي تلك اللحظات بشوفك بخيالي يا الرتينة وانت تلالّي مع ضوء الشمس في تنافس مع الشم وكلاكما يبدي جمال يبهر الأخر
جمالك وحسنك يصل للسحاب الذي دنى فوق سما حلتنا كابي متدلي وعامل ظلال وغيم عمَّ الحي
Quote: وأشوفك في عُوينات الصَبيّن
العُشق لصف ضياهم
والنهار وصف خُطاهم
والصبر زارعينو
فوق ضهر البيادر
فوق كتافين السّقالة |
وبشوفك في عيون الصبية
وهم يحملون عشق عفيف لمحبوبة وباين عشقهم في ضياء وجوههم
والنهار يصف لنا كل خطواتهم يهاتو جيئة وذهابا علَّ العين تقع على لمحة من المحبوبة
والصبر زراعنو في البيادر وهذا ايام الحب الحب عفيف الواحد يكتفي بالحب فقط أن يشير للمحبوبة انه مغرم بها
ايحاء القلوب العيون لها لغة مفهومة بين الطرفين وبعدها يلوك الصبر لحدي ما يهون الله في امره ويتزوج من أحب
لله درك يا قدال على كل هذا الجمال الشعري الذي تنثره علينا ينزل على المشاعر ماءً رطب يرطب ما بنا من أشواق وحنين
[Quote: B]وبريدك
وريديدك كفاحي أهلي
وبريد ريدك سماح أهلي
واريد مهواك
اريد إنسانك الجواك
وأريدك والله
زي أخر الحتالة |
أنا اصلي بريدك يا الرتينة
وريدك ريدي لي أهلي وكفاحهم في الحياة
وبريد ريدك الزي سماحة وفضل أهلي
اريد مهواك : اريد هواك ومهماكان به من شوق وحنين يسهد منامي
واريد كل الإنسانية والحنان الذي تحمليه داخل قلبك الحنون
وبريدك والله زي ريد الابوين لاخر العنقود من الأبناء ( الحتالة ) وهو عادة مريود في كل اسرة وأدوبيلك
Quote: وأدوبيلك
وأشيلك غنوة للسمحات
وأنمك في تراتيلي
وكُل ما العتمة تنزل سابلة
أنسى عناي
إتاوق لي قناديلك
وأشد حيلي
وأدوبيلك |
وأغني لك من الرباعيات دوبيت ,, واسمر بك أغنية حلوة حنية تردد في لسان الحسان من البنات
وانك وأتغنى بك في تراتيلي
وهنا لايعني ان يرتلها بل يلحنها اغنيته بصوت جميل كما فعل المرتل لكتاب الله
ولك ما يصادفني عناء من تعب الحياة وينزل سابل اي متدلي على مشاعري حزن تانسى كل ذلك التعب واشد حيلي اي تقوّى وادوبي لك يا الرتينة
Quote: إذا مغناي
يبرد في الحشا صبرك
ويرجع لي تهاليلك
بدوبيلك ..
وبدوبيلك
ولو الشوق عرف بكاكي
أطري غُناي
عليكي العزة آ المريودة
دوبيلّي
عليكي العزة آ المريودة
دوبيلّي |
ولو غناي
يبرد حشاء مشاعرك وترجعي متهللة تلالي بغني لك عمري كله
لو مرة اصابك الحزن بس اطري غناي فيك وحبي ليك يا المريودة
وغني لي عليك عزة فيك غني لي يا المريودة
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
القدال
الطمبار والغناي
نحن أهل الفرحة جِينا
لا المدامع وقفتنا
ولا الحِكايات الحزينة
ولما كان الرايحا راحّت
مافرحنا ...
إلا بي الصِح
ما بِكينا...
لما درب الرايخا جابنا
جابنا في هادي المدينة
يــا ولدي الدروب
شقاقا بحر التيه ...
وليكا دروب
ولا دربين ...
مساك الدروب ضهاب
وليكا قلوب
ولا بالّين ..
وسواي القلوب كضاب
وليكا ضهور
ولا سرجين ...
وركاب السروج وقّاع
شُق يا ولدي بحر التيه
وتتودّر ...
ولآمن يوم علي تاينا
يوم ترسّى ...
نرشك بي القبيل داخرنو ليك
الشوق بحر ..
بحر يا ولدي بحراً تيه
قُتليك العليك أدرابّو ما تنغش
ما ترضابّو ما تنغش
عليكَّ الدور ...
وتصريف الليالي بِدور
تشيل ما شلنا من الهم
لآمن دمعة ترمي الدمعة
فوق دربك ...
روّح يابا
وأبقى قفاكا لا تعاين
ولا تعاين علي موطاك
ولا تندم علي خطواً
تملي مشيتو لي قِدام
وأبقى العاتي
زي سنطتنا ..
وزي صبراً نلوك فوقو مر
وزي الزان...
لا شيتن نزل في الجوف
ولا برجع ولا بنزاد
وأركز لي البجبها الريح
تقيف إتا ويشيلها الريح
وأبقى العاتي
والدرب الوراك مسدود
وشيل شيلتك
بقيت لي النص ...
لا حُلماً يجيب البر
ولا حدّود ...
إن بليتّا اختا الرملا
ماتقع البكان الهش
الممطورة ما بتبالي من الرش
النعمة بتعرف عاطيها
والجمرة بتحرق واطيها
بي الكيلا عَطانا وما لقينا
وفوق جمرة خُطانا
ما لقينا ...
ويوم الوعد
يا حليوة الدنيا
ما كانت فيك شِروق
إلا الأرض مِتكشفّا ومتبلّما
نعمنو من خير الخريف
لفحالها شال ....
من طرحا خَضرا
وفرحة دوب تتشابّى لعين الشمش
من بت حِليوة
النفس بيضا كذا الحليب
والروح مشحتفا في البلود
الفيها رِيحتك ...
ولي البعود من فزعة الغُربة
البساسق فوكها
مو راجع ....
ولُو بي الحيل قريب
الروح مشحتفا في الحبيب
القلب بكر
الدنيا ما شافت جديدو
ولالا الحُزن دقالّو باب
حليوة صاحية ...
حليوة ضاحية كذا النسيم
وحليوة ...
جد
جد يا ولد
قول لي البلد
قايل غناوي الحُزن ليش
شايل مساديرك
مجامر دمع ليش ..
ليش يل بلد
والناس تريد
والدنيا لما تريد نزيد
تملّى الإيدين تفرح تهيش
لو صحي
غنينا بي الدمعة الهميمة
لو دموع الفرحة
ما لاقت غُنانا
بكرة نرجع تاني
لي الكِلمة الرحيمة
شان هنانّا
وشان مُنانّا
وشان عيون أطفالنا
من ضوق الهزيمة
شان عيون أطفالنا
ما ضوق الهزيمة
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: القدال
الطمبار والغناي |
في هذه القصيدة يتناول القدال موضوع مهم شديد
الحالة التي طفرت على السطح ... الكل ملل ضباب البكرة المخبئ في المستقبل لحال البلد
حالة تشفق العدو قبل الصديق على هذا البلد الماعندو وجيع
وجع قديم مستديم .. ومنعكس
وجع الحروب .. وجع الشعوب .. وجع القلوب ..
وجع الشمال .. وجع الجنوب
وجع الوجع .. كِضب الكِضِب
وما في مفيد .. ونحن عارفين المستفيد ( الكتيابي )
ضباب في كل مكان .. وما كان إلا يهج الشباب من بلد طاردة ( سياسة ساستها .. عسكر وحرامية )
نخروا من خير البلد ولم تشبع بطونهم .. وعادة الحرامي خائف وهم نزعوا الخوف من قلوبهم ينهب وأحمص ارجله تدوس فوق رؤوسنا
ونحن منطرحين في كبرياء لا حيلة لنا
وتبقى الهجرة من بلد ظالم حاكمها حق ... هي الملجأ وكانت النجعة
وكانت الوصية العظيمة من القدال لنا ولكل من هاجر ان تكون هجرته كبرياء ورأس مرفوع
يرسم الطريق لهولاء ( ونحن بينهم )
ونحن أهل فرحة وأهل فضل ( أهل السودان )
وسوف نعود وندوس على ذاك المشروع الحضاري الذي نسف كل جميل في الديار ( البلد )
وحتى الفضيلة .., الشرف .. النخوة .. والكرم وكيف تكون كريم وبيتك أصبح معدم من حجر الملح
رافعين ايادينا نتظر رحمة من السماء من الذي لا يغفل
يارب يا رب
يا رب يا رب
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
| Quote: نحن أهل الفرحة جِينا |
وهذا هو حال أهل السودان الطيبين وأعني هنا حال أهل السودان قبل أن تطمس هويتهم الداخلية
التي حوت كل الفضائل والخير ( قبل المشروع الحضاري الذي بدأ بحلول عام 1989 ) مجئ ثورة الطمس الغزر
اهل السودان أهل فرحة يفرحهم الحال الزين .. الوضع الزين .. الحياة الزينة .. وكل زين وزين
Quote:
لا المدامع وقفتنا
ولا الحِكايات الحزينة
ولما كان الرايحا راحّت |
ومعروف عن أهلي الطيبين في السودان من أجل العيشة الكريمة يبذلون النفوس رخيصة وفداها تروح ارواحهم
عيشة كريمة تفرح وأموت يريح ( قبل المشروع والطمس او قول الطمث إن شئت لان كلهما قذارة وتوجب الغسل )
المدافع لم تقف عائق لننال ما قصدنا (عيشة كريمة )
ولا الحكايات التي نسمع بها وتغم في القلب والنفس حزنا
ولما كان الرايحة راحت
الرايحةهي هويتنا معيشتنا الكريمة حريتنا حقوقنا وكل شئ جميل كان لنا منه نصيب كبير وسلب السلب السرقة ( رايحة ) وإن أختلف الأسلوب
خفية أو علن وبالقوة والجبروت
وقد استخدم في الاخير اساليب شتى
إحالة للصالح العام
زج في سجون الأمن ( وامن الدول هو أمن المواطن لكن عندنا تلويع وتخويف المواطن ) ولا أدري لما مصرين على الأسم
لماذا لم يسموه أمن الكراسي وحكم قرقوش
او : الأمن .. البقول أخ يتلخ
وراحت هويتنا ونفوسنا الطيبة من يوم مجئهذه الشرزمة التي رفعت الدين شعار لكسب دنيوي
واين تذهبون من الخالق في السماه عند السؤال
نحن هينين ( نسجن ونعذب ونضطهد بقوة أمنكم الذي باع النفس دنئة لكسب مادي )
لكن الله كبير وقادرولكم يوم حساب
Quote: مافرحنا ...
إلا بي الصِح
ما بِكينا...
لما درب الرايخا جابنا
جابنا في هادي المدينة |
لما ضاعت ( الرايحة نفوسنا الطيبة ) مافرحنا لكن برضو ما نبكي عليها حسرة وحزن ( طمست نفوسنا وان بقى فيها الخير كامن )
لكن لم نتركها فزعنا وراء الرايحة نبحث عن نفوسنا التي ضاعت
ودرب البحث ساقنا لهذه المدينة التي وجدنا فيها شيخ طيب نصحنا وحملنا الامانة وصية حتى نعيد ما كنا عليه نفس طيبة
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: يــا ولدي الدروب
شقاقا بحر التيه ... |
وكما قلنا القصيدة حسب فهمي لها وصية للوصول للهدف المنشود وفي معمعة هذا الوضع الراهن
حكم العسكر
وما بتشكر
كلو درادر وبهدلة وإنحطاط لدرك اسفل الأسفل
يا ولدي الدروب
شقاقة بحر التيه
دروب الوصول
الدرب واحد والطريق واحد لكن كيف تعرف هذا الدرب الصحيح هذه هي المعضلة
والبشق الدروب ز الشاقي التيه
وقال بحر التيه ( هو السراب ) الذي يترائ لك أنه بحر وتجري ورى ولم تجده شئ
فالدروب غشاشة وعشان تمشي في الدرب البوصل لابد من أن تسمع وصيتي
Quote: وليكا دروب
ولا دربين ...
مساك الدروب ضهاب |
ودربك واحد ما دربين
ومساك الدروب اي الزول الذي يتخبط يمسك هذا الدرب ويتركه ليمسك درباً اخر أكيد بضيع
ضهيب ... اي دوام رايح البمسك دروب واحسن الدرب الواحد يا غرق يا جيت حازما
وهنا نجد القدال يمتهن فنه الذي يهوى في الشعر
فن التضمين
ولابد ان اعترف هذا الشئ في الشعر كنت لا اعرفه واعتبره اقتباس لكن صحح لي هذه المعلومة العلامةالشاعر عبدالقادر الكتيابي
وضمن هذا المثل المعروف
مساك الدروب ضهاب
وقال
ليكَّ درب ولا دربين
اي دربك واحد
وبعدها ضمن البيت المثل وقلب في حروف في كلمة ضهاب
الألف قلبها ياء فصارت ( ضهيب )
وبهذه الطريقة ( ضهيب ) مستخدمة برضو في العامية السودانية
وقد يكون في مناطق الشاعر تستخدم بهذه الطريقة
وفعلاً مساك الدروب ( اي الذي يتشبح هنا وهناك بضيع وما بصل للهدف المنشود
Quote: وليكا قلوب
ولا بالّين ..
وسواي القلوب كضاب |
أهلنا بقولوا ( قلبك بحدثك ) وهذا الشئ لم يأتي من فراغ
كان القدماء امرهم كله شرعي
إذا اقدم لاي شئ او هم بفعل اي شئ استخار في ذاك الامر وكانت الإستخارة هي التي تنظم حياتهم وما ارده الله كان يقع
وهذا ما جعلهم موفقين في كل أمورهم وما خاب من استخار في امره الله عز وجل
لذا يقولون القلب بحدث ( وهو شعور بالراحة أو عدمها بعد الاستخارة ) لذا اقدم بعد استخارته لفعل الشئ الذي استخار فيه لو شعر بالراحة له
واقلع عنه لو ما رتاح له قلبه
وليك قلب ولا بالين
وسواي القلوب كضاب
القلب واحد وحديثه واحد
والذي يتبع الامر الذي مخالف ما حدثه به قلبه ( كضاب )
وكأنه اخترع قلب وصقه اي سوى لي قلب وشعور من عنده لان القلب الأصلي ماقال ما فعله (زي الصنع لي قلب وهنا يجي الكضب )
Quote: وليكا ضهور
ولا سرجين ...
وركاب السروج وقّاع |
وقدامك سروج على ضهور كثيرة
اختار ما السرج على الظهر البوصل للهدف
ليكا ضهور
ولا سرجين
البركب فوق سرجين بقع
ونلاحظ شئ مهم جداً ان الشاعر القدال دائما لا يعطي اللقمة جاهزة عطية للمستمع
إنسان ذكي ويحب ان يكون الكل أذكياء يتسمون بالفطنة
وذكائه مكتسب من البئة التي عاش فيها وهو فعلاً لو تعاملت او تحدثت إليه تجد هذه الفطنة حتى في حديثه العادي
فطنة اهل البادية والريف
يقول ليكا ضهور
ولا سرجين
اي امام ظهور كثير
ولم يقل
ولا سروج ( جمع كما جاء في الظهور جمع ظهر )
بل قال سرجين
حتى يضمن المثل الثاني بما جاء فيه
والمثل :
ركاب السروج وقاع
وركاب سرجين وقاع
وقد اشتهر المثل بالطريقة الثانية ( ركاب سرجين وقاع )
بهذا ضمن المثل بالطرقتين
وانا نفسي سمعت هذا المثل بالطريقتين
ركاب السروج وقيع
وركاب سرجين وقال ركاب السروج وقاع
وكل المقصد يريد ان يقول له اختر طريقك بطريقة صحيحة لتصل
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: ولآمن يوم علي تاينا
يوم ترسّى ...
نرشك بي القبيل داخرنو ليك |
التاية : هي مكان يكون قرب حوش الرجال وفيها يستقبل الضيوف
وعند اهل الغرب تسمى الضَرّى
وفي بعض المناطق تسمى الخلوة
وقد ذكرها الشاعر الحاردلو في قصيدته
تقولي منو وتقولي شنو ؟
نحن التاية والأنداية
الأنداية هي مكان الخمور البلدية بمناسبة الانداية والكمبو هي ثقافة يجب ان يؤرخ لها
وبادره القول بعد ان قال شق دربك واختر الدرب الصاح
وهنا كان المتوقع عودته في يوم
فقال له
لامن يوم علي تايتنا
يوم ترسى
نرشك بالقبيل داخرنو ليك
الدخري بكون ليوم الحاجة فعلاً
Quote: [green]الشوق بحر ..
بحر يا ولدي بحراً تيه
قُتليك العليك أدرابّو ما تنغش
ما ترضابّو ما تنغش
عليكَّ الدور ... |
الشوق بحر
وهذا هو شوقنا ليك بحر ويا ولدي
الدروب بحر التيه
ما تنغش في الدروب
دايما سوي النجيضة ما تنغش
وماترضى بالقليلة ما تنغش
الدور بجي عليك وقد تمتحن في حياتك فأصمد على المبدئ والمقصد
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
[Quote: B]عليكَّ الدور ...
وتصريف الليالي بِدور |
يا ولد جاء عليك الدور وتصريف اليالي بدور ولابد من يوم لك يا ولد
وتصاريف الأيام تشقي وتسعد
وحكم العسكر ما بتشكر
وانتم جئتم في عهد العسكر يا ولدي
| Quote: تشيل ما شلنا من الهم |
قبلكم حملنا هذا الهم
لكن الصمود على المبدئ
وتمسك في الدرب العديل هو يكون هدفك يا ولدي
Quote: لآمن دمعة ترمي الدمعة
فوق دربك ... |
وسوف تتثاقل على كتفك الهموم والمشاكل والمحن
وسوف يدمع فؤادك دم من الغبينة في هذا البلد المغلوب على امره ( وهو في يد ساسة لا يرحموا الرضيع )
ديل يختفوا اللقمة
إن حفّت
من جنحين الملك
إن رفّت
وسيدا يموت بي الفاق
ديل القرش ان فاتهم
لي البستاهلو
يندمو ليه ما جاهم
Quote: روّح يابا
وأبقى قفاكا لا تعاين
ولا تعاين علي موطاك
ولا تندم علي خطواً
تملي مشيتو لي قِدام |
روَّح يابا
وتقال كلمة يابا للأبن
تعال يابا
روح يابا
وخاصة من الام الجدة
الاب والجد العم والخال والعمة والخالة
ومهما كثرت عليك الهموم والغبينة والحزن يا ولدي
روّح في طريقك اي سير في طريقك الذي رسمته لحياتك
وابقى قفاك لا تعاين
اي سر ولا تتراجع
وما تعاين في الماضي الذي احزنك ولا تعاين في حاضرك المر
ولا تندم في طريق رسمته لحياتك وامضي وواصل في نفس الطريق وابقى عشرة علي مبدئك مدام في لايخالف شرعك وعرفك
وسر ودرب الوصول بيد الله
وابقى قفاك لا تعاين ( ماضيك )
ولا تعاين علي موطاك
وموطاك هو حاضرك
والمستقبل بيد الله يا ولدي
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: وأبقى العاتي
زي سنطتنا .. |
وأبقى العاتي ... العاتي هو الضخم الصامد
قد شبه الجمل بالعاتي لكبر سعة صبره على العطش والصبر في السير دون جهد ومعناة
وابقى العاتي الضخم الصامد زي سنطتنا
السنطة هي نوع من الأشجار ( شجر السنط ) ومعروفة بقوة تحملها لكل ظروف المناخوالطبيعة
صامد على طول الزمن نستظل بظلها تأكل البهائم من ثمرها ينتفع بعودها ( مرق السنط ) من أقوى انواع الخشب يستخدم في
البيوت الجالوص ويستخدم في عمل الرواكيب ( جمع راكوبة ) وغيرها
Quote: وزي صبراً نلوك فوقو مر
وزي الزان...
لا شيتن نزل في الجوف
ولا برجع ولا بنزاد |
وأبقى قوي زي الصبر .. صبرنا نحن أهلك بني السودان صبرنا كتير على الألآم وطوينا الحزن المر من ثورة قاهرة لحكم مدني فاسد
ومن هنا إلى هناك ونحن المكويين بنار ساسة البلد وفسادهم
ابقى يا ولدي قوي زي صبرنا المر نلوكه
وابقى كذلك في قوة خشب الزان ( الزان نوع من الأخشاب مر طعمه )
شبه الصبر المر بطعم لوح الزان
نلوك لكن ما بنزل في الجوفن شدة المرارة ... ولا برجع ( نتفله ) ولا نستطيع اننزيدمنه لكي نأكله ( مزيد )
Quote: وأركز لي البجبها الريح
تقيف إتا ويشيلها الريح |
اركز : اي أثبت للبلاء والمحن
اركز لبجبها الريح .. اي اركز وأثبت لكل محن الحياة التي تحملها لك الأيام
وقال الريح كأن الريح تجيب المحن والمصائب لكنه اراد القدر المقدر .. وحمله لواحدة من خلق الله تعالى الكبرى وهي الرياح
أثبت لي البجبها الريح
ومادام ثبت على المبدئ تأكد انك انت البتقيف وكل المحن التي حملت تذهب مع الريح وانت ثابت صامد
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: Muna Khugali)
|
Quote: القدال يا خالد فعلا من وادي عبقر..
ليتك كنت معنا ذلك المساء المزين بقصائده وكيف كانت تتفاعل وتتجاوب معه الجماهير العريضة..
حب حقيقي وعظيم ..
ربنا يطول في عمره ويحفظه مع رفاقه للوطن.. |
يـــا منى خوجلي
الشئ العجيب وبديع فوق هذا هو إنسان إنسان لدرجة
إلتقيته مع العزيزة اسيا ربيع وأهداني ديوان حليوة ثم مع ابوبكر سيد أحمد عندما جاءا لتأبين محمد الحسن
حميد لقيت في كل مرة ألتقيه احبه أكثر كنمت معتوه بشعره منذ نعومة أظافري يا كلام الرتينة بت سالم وليد عِتمام في حنة علي الشاشوق
وخمسين سنة التي نظمها في سنة 1976 ( السيول والأمطار ) وحليوة وعتيد الرماد ثم طفر في الثمانيات بمسدار ابوالسرة لليناكي
اتصلت به عندما هممت بفتح هذا البوست
قلت له يا استاذ انا تهجمت على شعرك بالشرح وانا متأكد سوف اخفق في الكثير
باغتني وقطع حديثي وقال : يا خالد اي كتبت
فهي عمل مقدر وبالذات مني
لا تلتفت نحن نقول وكل يؤول حسب مايفهم من القصيدة
ةهذا عمل مقدر ولك كل التقدير مني
هذا ما شجعني في السير في المشوار والله الموفق
لك الشكر اختي العزيزة منى على المرور الجميل
ليتني حضرت معكم
تحياتي ومودتي
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: وأبقى العاتي
والدرب الوراك مسدود |
وابقى العاتي الصامد في طريقه
ولا مفر فالدرب الوراك مسدود بعد السير فسر للإمام يا ولدي
ولاتخشى في سيرك انت اخترت واثبت وابقى العاتي زي سنطتنا
وزي صبرا مر نلوكوا زي الزان
Quote: وشيل شيلتك
بقيت لي النص ...
لا حُلماً يجيب البر
ولا حدّود ... |
وشيل شيلتك .. اي احزم امرك انت فعلت وانت اخترت فلا تخاف من العاقبة والنتيجة
وشيل شيلتك بقيت لي النص
شبهه بشحص حاول عبور بحر ( نهر ) وكانت الفكرة الأولى عبور النهر
فعندما يصل النص تبقى تكملة المسيرة ( للعبور ) لا مفر منها المسافة بقت واحدة الوصول اي العودة متساويان
ولذا اصبح ضرب مثل يقال لمن يعزم لفعل امر ويبدأ
يقال له بقيت في النص واحسن تواصل
والعودة للبر الاول الذي بدأت منه أصبحت حُلم
ولا حدود
حدود اي العمق للنهر لا يقاس بوقفك فيه فالماء أعمق من طول اطول الرجال
وابقى ساير للامام وما خاب من عزم وسار في طريقه للأمام
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: إن بليتّا اختا الرملا
ماتقع البكان الهش
الممطورة ما بتبالي من الرش |
وعادة لم تكتر علي الزول الهموم المشاكل بِطمبجا وبعد داك الله كريم
والمثل السوداني بقول
لو كترت عليك الهموم إدمدم ونوم
اها القدال قال وأن بليتا اي طمبجتها أختا الرملة
أختا الرملة : اي ابتعد عن الرمل
البكان الهش : اي المكان هش اي هربة وبنزل لو مشيت في
هش : اي سهل الكسر غير قوي وصلب
الممطورة : اي الارض التي سقت من المطر
ما بتعاني من الرش
اي المكان والتربة التي نزل عليها المطر وارتوت مهما نزل عليها المزيد من مطر لا ينزل في داخلها بل يبقى في السطح
فهي لا تبالي من اي زيادة
وهنا كل كلامه يعني به مهما حصل عليك فأثبت
البتبلبل بعوم
المطورة ما بتعاني من الرش
وما تقع البكان الهش
والبصلو طرف السوط ما بهمو ان يقع باقي
Quote: النعمة بتعرف عاطيها
والجمرة بتحرق واطيها
بي الكيلا عَطانا وما لقينا
وفوق جمرة خُطانا
ما لقينا ... |
اصلو يا ولدي في المثل قالوا
النعمة بتعرف عاطيها
والنعمة هي كل شئ انعم به الله علينا
وعاطيها اي الذي يمدها
والجمرة وهي الفحمة المتقدة نارا
ما بتحرق زول غير الذي يطأها
يا ولدي لا تهم لما يقال
انت الحارقاك الجمرة وانت الذي تعطي ولا ترجى مقابل
فلا تهم ولا تلتفت لما يقال
ونحن كدا دائما اهل السودان
نعطي ولا نلقى مقابل نعطي كل شئ حتى حر حريتنا ما لقينا
وما شين في جمر يشوي وما لقينا
وهذا حالنا يا ولدي
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: ويوم الوعد
يا حليوة الدنيا
ما كانت فيك شِروق |
حليوة هي قرية الشاعر القدال التي ولد فيها وتربى وترعرع فيها وتقع في الجزيرة وتميل لناحية البطانة او داخل البطانة انا غير متأكد من ذلك
دائما نجده ما يستشهد بحلوة ويعني الوطن الكبير ( السودان )
وكان يوم الوعد يا حليوة وكانت الغيمة تظل سماك ولا يشهد الشروق للشمش كما عهدنا
Quote: إلا الأرض مِتكشفّا ومتبلّما
نعمنو من خير الخريف
لفحالها شال ....
من طرحا خَضرا |
وكانت الغيوم تظلك يا حليوة
والأرض متكشفا ومتبلما
وهذا البيت يذكرني بيت الشاعر احمد شوقي يصف ربوة الوادي
وربوة الوادي في جُلباب راقصة
الساق كاسية والنحر عريانُ
وهنا وصف القدال ارض حليوة وموسم الخريف يكسوها خضرة
كأنها حسنا متعري اسفل جسدها ( باطن الارض ) لكنها متبلمة
ومتبلمة اي منتقبة نقاب يغطي وجهها
وتلفح شال من طرحا خضراء حول عنقها وكتفيها
منظر جميل للارض وهي عارية من خضرة في باطنها قرب السطح لكن يكسو سطحها تلك الخضرة
( نقاب وطرحة خضراء )
وهنا تكون الفتنة وكل مدسوس مرغوب ويشقف النظر إليه
وهذه حقيقة النفس فينا
ما يدارى عنا نرغب بشدة للنظر إليه
ومتا يمنع عنا نجتهد في الحصول السعي إليه
وهذه طبيعة النفس البشرية
والأرض متكشفة ومتبلما
نعمنو من خير الخريف
لفحالا شال من طرحة خضرا
وقد يكون يقصد أن ارض حليوة في موسم الخريف تكون متعرية في بعض الأماكن ومخضرة في بعضها
كأنها حسناء عارية متكشفة في اسفل جسدها ومنتقبة بنقاب في وجهها وعلى الكتف وحول العنق
لفحالا شال لون اخضر ( وهذا المعنى هو الاقرب للذهن )
كثيراً ما تحتار ماذا يقصد الشاعر القدال في بعض من قوله
فهو شاعر واحساسه فوق أحساس البشر العاديين درجات ونحن نجتهد والمقصد والمعنى ملك له
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
| Quote: وفرحة دوب تتشابّى لعين الشمش |
وكان يوم الوعد .... تلك الفرحة التي طفت في صدر بت حليوة
والدنيا إكتست خُضرة كذا الوشاح لونا زاهيا
ومن شدة الفرح في ذاك اليوم وكان الفرحة نفسها ( فرحة تلك الحسناء .. بت حليوة ) تتشابى لعين الشمش
وهذا عشان تظهر وتطفو الفرحة نغم ينداح
تتشابى اي تمد عنقها للظهور او ليراها الناس أو ترى الناس ( ان يروا فرحتها لعودة الحبيب )
كحال الإنسان وهو في زحمة لمشهد شئ يبغاه ويريد رؤيته فتراه يشب بقدميه وعنقه حتى يرى ما حجبوه عنه اللذين أمامه
Quote: من بت حِليوة
النفس بيضا كذا الحليب
والروح مشحتفا في البلود
الفيها رِيحتك ... |
وكانت فرحة البنت الحلوة الحسناء
بنت نفسها وروحها بيضاء ليس فيها غش ورياء
روح بيضاء صافية ( كذا الحليب ) مثل الحليب
وروحها معلقة بحبيب غاب وهاجر من أجل هذف يرتجيه ( ليحققه )
والروح مشحتفّا في البود ..
الفيها ريحتك ..
الروح مشحتفّا
الشحتفا هي تلك الحالة التي يصعب وصفها لكن عندما تكون مترغب شئ بتكون روحك تواقة منتظرة الوقت الذي تبل الشوق فيه
برؤية ذاك الشئ ( قد يكون موعد مع حبيب قد يكون شئ اخر تحبه )
فكانت روح البنت الحليوة مشحتفّا في البلاد التي فيها حبيبها تبحث عنه وتسأل
ويا جلابة ماشوفتوه
زولاً لي
الفيها ريحتك
بلاغة عالية المراد ان فيها الحبيب لكن رمز بشئ مهم فيه ( الحبيب ) رئاحة جسده التي تهواها الحبيبة
متعك الله بالصحة والعافية الحبيب القدال بعد إجراء العملية وما تشوف شر أبدا
ولي البعود من فزعة الغُربة
البساسق فوكها
مو راجع ....
ولُو بي الحيل قريب
الروح مشحتفا في الحبيب
القلب بكر
الدنيا ما شافت جديدو
ولالا الحُزن دقالّو باب
حليوة صاحية ...
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: ولي البعود من فزعة الغُربة
البساسق فوكها
مو راجع .... |
وروحي مشحتفا ( حديث الحوة الحسناء الصافية كذا الحليب الأبيض )
وروحي مشحتفا في كل من يعود من ديار غربتك
تلك الغربة التي كانت بالذندي وانت ما ليها راغب
والغربة معروفة البساسق فوق دريبها موهو راجع
والغربة حال الفقري
والبتوكر في حشاها ياهو الوحل وتتقل كرعي ويغتس في طينها اللك خمج
Quote: ولُو بي الحيل قريب
الروح مشحتفا في الحبيب |
الروح وراك بدور تطلع من الجتّا
الجتّا هي البدن
شوقاً إليك من حبيبة ما لها غيرك حبيب
Quote: القلب بكر
الدنيا ما شافت جديدو
ولالا الحُزن دقالّو باب |
من حبيبه قلبها بكر ما عرف الحب قبلك
وأنت الدنيا ما شافت جديدك
الجديد ( هو الزواج )
وايضاً تطلق على الختان كما ذكر الشاعر ودبادي في
قصيدة هووي يا وليد
وقال يخاطب الولد المرنوعة
هوي يا وليد
يا دلوعة يا مرنوعة
أعدل إيدك المفدوعة
وإتلحلّح واقيف دُغري
وهات صدرك معا صدري
وليكَّ الحق
عشان ولدوك في إسفنج
وحتى أول جديد
سوهو ليك بي البنج
ومن هنا يتضح أن الجديد الأول للولد هو الختان
والجديد الثاني هو الزواج
وفي قصيدة القدال
الولد بالغ ( اكيد مختون ) بدليل أنه هاجر معافي وكاره للحال الذي إنحدرت فيه البلد بسياسة
ناس املى جيبي وما بهمهم السودان ولا إنسان السودان المدهوس في هذه المتوالية الحدوتة التي لم تنتهي
ديمقراطية باهتا ساستها منافع
حُكم عسكر وما بتشكر
وتستمر الحكاية
وعاد لي متين ؟
وهذا السؤال الذي يراودنا دوام
غايتو نرجى رحمة السماء من رب لا ينسى عباده ابدا
أللهم فرج كُربنا وولي علينا من يخافك ويرحمنا
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: حليوة صاحية ...
حليوة ضاحية كذا النسيم
وحليوة ...
جد
جد يا ولد |
وكما اسلفنا
أن الشاعر القدال دائما يعني بحليوة وهي موطنه ( كل الارض ... السودان )
وبل لو حبينا ان نقول بالتدقيق يعني بها أهل السودان من الشعب المغلوب على أمره
واطلق المكان وأراد إنسان المكان .. وحليوة تمثل له أهله البساط المغلوبين على امرهم في ظل هذه الحياة القاسية الطاحنة
الشعب صاحي يا ولدي
الشعب واعي ومدرك لامره لكنه يسترجي الامور من شدة الأحباط الذي يعاني منه
لمن يقلبها
لساسة همهم ملئ جيوبهم وتناحر يظل فوقنا ليأتي حكم عسكري اخر
وهذا هو الاحباط الذي ترسب فوق عقولنا عن حال السودان
وإلا واقولها بملئ فمي أن الشعب السوداني كان قادر على إزاحة هذا الحكم الغاشم من سنة 1989
والشعب جد
وحليوة جد يا ولدي
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: جد يا ولد
قول لي البلد
قايل غناوي الحُزن ليش
شايل مساديرك
مجامر دمع ليش ..
ليش يل بلد |
ياولدي البلد وشعبها جد بسرو العين
يا ولدي قول للبلد ( اي لاهل البلد المطحونين ومدهوسين )
ليه كاسي عيونكم الحزن أإنوة ... ليه ( ليش )
ليه كل سعركم ومسداركم صار حزن عميق .. ليش
ومجامر الدمع : دمع ينزل من العيون كما الجمر المتقد حرارة ( سخانة )
ليه يا بلد ليه يا شعب ليش
ما بكرة التاج بقع من فوق
وبالكرعين قسم بِنداس
وما تشيل هم يا شعبي
بكرة قريب والوعي بملئ البلد ونعرف
نقول نعم لي مين
وتنهي الحزبية العقائدية فينا وفي أهلنا المساكين
الماسكين في ولد علي الميرغني
وفي ولد المهدي
وفي الطقمة الفاسدة منافع
واكيد حنية السماء آتية يا ولدي ويا بلد ولا تحزنوا
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: والناس تريد
والدنيا لما تريد نزيد |
ليش يا بلد الحزن ما بنفع حزين
الناس تريد تريد الفرحة بيناتها ونبتهج بين بعض ونأذر بعض وهذا ينسينا الحزن الكبير
والدنيا بي ريدتنا لبعض تريد
والدنيا لما تريد تتفتح في عيونا ونحن نحيا حياتنا ونعمل
والعمل مسحهم من الوجود ومن بلدنا
موش حولوا قروشنا في بنوك سويسرا وماليزيا
السراق طبيقو معا خليهم يمشوا ويشتروا بها جنسية ويخلو سبيلنا
والله ما شقالّو حنكاً ضيعو
والله ما سوالّو طفلاً
ما سقاهو ورضعو
والدنيا لما تريد تزيد فرحتنا
Quote: تملّى الإيدين تفرح تهيش
لو صحي
غنينا بي الدمعة الهميمة
لو دموع الفرحة
ما لاقت غُنانا |
وهذا هو حال الدنيا لم تريد
تزيد
تملئ بفرحتها الإيدين
تهيش
هاشي باشي
الهوشة هي حركة في اعضاء الجسد تنبع من فرحة بالداخل في الروح والنفس
ولو صحي
غنينا بي الدمعة الهمية
لو غنانا وكلامنا كان بكل صدق من أجل هذا البلد الطيب تربة وإنسان
وكان غُنانا صُح ( اي نابع من قلوب صادقة )
لو دموع الفرحة
ما لاقت غُنانا
لو دموع الفرحة ما تجاوبت مع غُنانا
يبقى غنانا ما كان بصدق
لكن لو غُنانا ... كلامنا ... فعلنا كان صدق
اكيد غُنانا سوف يلاقي دموع فرحتنا
Quote: بكرة نرجع تاني
لي الكِلمة الرحيمة
شان هنانّا
وشان مُنانّا
وشان عيون أطفالنا
ما ضوق الهزيمة
شان عيون أطفالنا
ما ضوق الهزيمة |
لو دموع الفرحة
مالاقت غُنانا
بنجع تاني لي الكلمة الرحيمة والكلمة الطيبة بيننا تسري واصلها في اعماق الارض كلمة رحيمة طيبة
وفرعها يداعب عنان السماء
عشان هنانا وفرحنا وسعدنا
عشان كل امانينا الطيبة للبلد ولنا
وعشان عيون أطفالنا .. ما تنهزم كما هو حالنا وحال الأجيال التي بعدنا
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
يا حليوة
يا حــــــليوه
يازهرة وسمحه
ونسمة قمحه
تعطِّـر ليل دُخـلـتنا
هَـقِـيت لي القَـمَـر ..
القمر الأبيضْ
لبناً هتَف ..
من ضِـراعات السَدَرَن يومهن
رَتَعَن قبل الدينا تغـيِّمْ..
يا أحلى صبيه
بتمْـرُقْ مَـغْـرِبْ ..
عين فى الأرض
ويَدْ تتناول
من خالاتا الضِـيقْ.. رَوَّابْ
يا خَـلوه بتعْـزِم
وتعزِم باشَّـه ..
الضربوا الصَـيْ
الهاجـروا فوق رُقَّاب الضَـيْ
مُخْـلاية الزاد
بتعشِّـي الوينْ ..
مُـدَّاح الزينْ
ضيفاً درويشْ
فُـرَّاس الخيلْ
سُـرَّاى الليلْ
دُقَّـاق العيشْ
بتعشِّـى الديشْ
والناس المادَّه عيونها تنادى الرحمه،
عيونهم جَــفَّنْ
الناس الشادَّه بطونها..
الرِيقَـه الدَخَلَتْ لا زال جوَّه ..
بطونهم خَـفَّنْ
الناس الكادَّه الجوع ..
اللاحسه الكوع..
الخيلهم نَـفَّنْ
الناس الحادَّه علي الما مات ..
الحَيْ ومكَـفَّـنْ
أفراح الناس ما كَـفَّـنْ...
أحزان الناس ما كَـفَّـنْ ...
الصبر جميل.
والناس المادَّه عيونها تنادى الرحمه
عيونهم جَــفَّنْ
الناس الشادَّه بطونها..
الرِيقَـه الدَخَلَتْ لا زال جوَّه ..
بطونهم خَـفَّنْ
الناس الكادَّه الجوع ..
اللاحسه الكوع..
الخيلهم نَـفَّنْ
الناس الحادَّه علي الما مات ..
الحَيْ ومكَـفَّـنْ
أفراح الناس ما كَـفَّـنْ...
أحزان الناس ما كَـفَّـنْ
الصبر جميل.
ويا برواز الصبر جميل ..
الحزن المالِـحْ عطَّـن
فـرح الحِـله في لـيلـة الدُخـله
والـحـزن المـالِـح
قَطَع الخَرَزَة
وقلع الرَّشْـمَة
مبروك الـصرخة الأولى
على لِسنات الحضروا المَوْلِـدْ ...
جـتات محـتـشـمَة.
فى جاه الحلة الشايلة الحَـفـَّـة
لا سيرة تـدُقْ
لا زين لاحُـقْ
لا عَـمَّة تحِـنْ
لا خَـالَـة تـحَـنِّـنْ ...
ولا خَـيَّة
حتى الزغرودة الأغرودة
مجروحة وباهتة
ملغية!
كل المواعيدْ
ضحكات العيدْ
أحلام الريدْ
الاغنيَّـة...
صبحت مهزومة ومتكيـَّة
في جاه الحله الشايله الحفة
إحساس أطفالنا بيوم الوقفة
اندهشْ...
ارتعشْ..
اتحَـلـَّـلْ.
الكعك...
اللعبة..
البسمة.
اللبسة ..
الكل اتبلَّـلْ.
عربون البمسة الفى العينين..
ما فـرهدْ ..
مـــاتْ.
يا يوم العيد
دمعات أُمَّـاتنا على أُمَّـاتهن
فى العيدين ..
ما هِـن رحماتْ.
في جاه الحله الشايلة الحفة ..
فى جاه الحِـلة الشايلة الحَـفـَّـة..
القِـسـمة تفوتْ
أحلى البـنـُّوتْ
لا الغايب عَــادْ
لا لـحـقن خيلـهِن في اللـفَّـه.
بقول غُـنوات..
واقول غنوات..
واقول غنوات.
أقول غـنواتي
فى البـلد البسير جِـنياتها
لى قدام.
للولد البـِتـِـلْ ضِـرعاتو فى العرضة
ويطير فى الدارة صقرية
ولو السمـحـة تَـلَّـتْ إيدْ
ومَدَّتْ جِـيدْ
تـقوم شـايلاهُ هاشـمية
يشيل شَـبَّالوا
خـطـفة ريدْ
وفـرحة عيدْ
وريـدة روحْ
وحُـمْرَة عينْ...
وإيـديَّــة....
ويا الولد البشيل مُـدقاقو
قولة خير
على القمْره
يـقابل الجـايَّـه متْحَـزِّمْ
ومتلـَـزِّمْ
كلام فاسَـك على أرضَـك
بيبقى عـديـله يا بـيـضا
ويبقى زفاف
تزغرد ليهُ قمريِّة.
وقُـبَّـال حُــول
تغَـيِّـم غيمة قِـبْليِّة
ترُش الدَّارة والحَـدَب الصعيد الحلة..
يا رحـمة نـداوة الصفقة ..
فى النسمة الصـعيدية
ويا جَـهْـرَة نـهار الليلة..
لمَّـا اللـيلة بـدرية.
رحـيح جنياتنا
فى الحَدَب الـصـعيد الحله .
يا قـمـحـاتنا .. هوْ لَبْ لَبْ
ويا اللوز الفتق فى الوادى..
هو لب لب
ويا سمحاتنا.. هو لب لب
ويالبحر الطمح مدَّادى ..
هو لب لب
ويا حُجْواتنا يا صلاوتنا ..
هو لب لب.
سألتِكْ بالذى رَكَز الأرِض معبد
وسوَّى الفاس عليها مقام
سألتك بالذى ركز الأرض معبد
وسوى الناس عليها مقام
سألتك بى حـشا الأُمَّات
ودمعاتنا
وسألـتك بى كبيـداتهنْ
ودعواتنا
شليلْ وين راح ؟
يكون خير الخريف فاتنا
شليل ويـن فات
وزى برق السِماك الجابها دُغْـشِـيَّه
زى زغروده للبُطنه الكبارية
مَرَقْ من شامة القمره ..
مَـهَقَّتْ بى وداعـة الله
مـقـدَّم بالعديل يبـراك
تعالوا أبِـشْـروا آجِـنْيات
شليل ماراح ..
شـليل مافات
شـليل عند المَسور مَـرَقْ
بقالو حـصاد
شليل فوق التَـقَـانِـتْ قام
خضار وبـلاد
شليل مسدار ..
شليل مشوار
شـليلنا أرضنا يا جِـنْـيات.
شليل قايـم نـصايص الليل
يتمم لـيلو ورديه
حـرازنا شـليل
شليلنا دليب ..
شليلنا دليل على البِـلدات
بعد درب الـتبلديه
شليل ما راح
شليل ما فات
شليلنا ونحن همباته ومهاجريَّه
مزارع بـات عـلى عشـقين
تراب بلدو .....
وسَـمَاحْ فوق بِتْ مُزارعيَّه.
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: يا حليوة
يا حــــــليوه
يازهرة وسمحه
ونسمة قمحه
تعطِّـر ليل دُخـلـتنا
هَـقِـيت لي القَـمَـر ..
القمر الأبيضْ
لبناً هتَف ..
من ضِـراعات السَدَرَن يومهن
رَتَعَن قبل الدينا تغـيِّمْ.. |
حليــــوة كما اسلفنا هي قرية في الجزيرة وهي القرية التي جادت للدنيا بهذا الشاعر الجميل
محمد طه القدال
وقد خصها بهذه القصيدة كما نجده يضمن اسمها أحيان كثير في قصائد اخرى
حليوة صاحية كذا النسيم
في قصيدة الطمبارة الغناي
وقد صورها لنا كأنها فتاة حسناء يتغزل فيها وتنقل بنا فيها
حبه لها ( حليوة )
الحال فيها وحال اهلها
يا حليوة
يازهرة وسمحة
ونسمة قمحة
ونسمة القمحة هي النسايم التي تمر على حقول القمح فتأتيك تحمل في هبتها عطور الزرع
القمح والقطن هما عمود الاقتصاد في تلك المناطق
يعني لو الشاعر كان من شندي لقال
يا حليوة
وزهرة وسمحة
ونسمة منقا
تعطر ليل دُخلتنا
ليلة الدُخلة هي الليلة التي يتنظرها العروسان بفارغ الصبر وهي الليلة المشهود التي بعدها تغمر السعادة
الاسرة الجديد لوغطى الوعي العروسان
انت ايتها القرية الحالمة تعطري ليالينا وبالذات ليلينا المميزة ( ليلة الدُخلة )
هقيت للقمر : اي ناجيت القمر ( مناجاة )
القمر الأبيض ويكون القمر أبيض ليلة 14 و 15 من كل شهر في سنة هجرية ( قمرية )
قمراً ابيض زي اللبن ( الحليب ) هتف اي نزل
من ضرعات
الضرع هو ثدي البهائم الحلوب
سدرن يمن
سدر هي كلمة عربية فُصحى
واصلها بالعربية ( صدر ) الصدور هو الرجعة من مورد المياه( قد يكون النيل أو حفير او اي نبع كان موردا
وفي العامية قلب الصاد سين وصارت بعاميتنا
سدر
ويقال سدر الخلا والخلاء او الصي يكون عكس اتجاه النيل أو النهر لذا استخدمت المفردة ايضاً تعبر عن العائد من مناطق النيل للحي ( القرية )او المسافر من القرية للخلا ( الصي ) ... الخلا ولا الرفيق الفسل
من ضرعات السدرن يومن
وقبل الدنيا تغيّم
وهنا اشارة للبهائم التي سدر بها اهلها من الفريق للخلا لترعى مراعي خصبة
وعادة يكون السدور قبل دخول الخريف بفترة قصير
واشار لها هنا
قبل الدنيا تغيّم اي قبل ظهور سحب الخريف في السماء تؤذن بدخول وقت الخريف
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: يا أحلى صبيه
بتمْـرُقْ مَـغْـرِبْ ..
عين فى الأرض
ويَدْ تتناول
من خالاتا الضِـيقْ.. رَوَّابْ |
يشبه حليوة في صورة حسناء جميلة
يا احلى صبية
وصبية تستخدم للبنت التي لم تتزوج بعد كما تستخدم للفتى صبي
وصبية مختصر استخدامها في الأقاليم والبادية
أحلى صبية بتمرق مغرب
ومرقة المغرب دائماً بتكون لزيارة او تناول شئ من جيران
بتمرق مغرب .. عين في الأرض
ويد تتناول من خالاتا الضيق رواب
وهذا حال الصبايا ... الأدب الجم إذا سارت في الطريق العين في الأرض
ويد تتناول من خالاتا الضيق رواب
الرواب هو المتخمر من اللبن ( الروب ) ويستخدم لكي يروب به حليب ليصبح روب ( ذبادي )
ومن انقطع عنه الرواب ( المخمر ) يستزيد من جاره لذا كان التضمين هنا
لكن المراد يد تتناول من خالاتا شئ في طلعتها تلك
والمعنى البعيد في هذا الكلام اي تتزود بالصبر من خالاتها زي اللبن الرائب لكي تصبح صبورة على كل ضيق مهما كان
وهناك تربت ونشأتها كانت بين اناس تعودوا الصبر في الزمن الصعب ّ
[Quote: B]يا خَـلوه بتعْـزِم
وتعزِم باشَّـه ..
الضربوا الصَـيْ
الهاجـروا فوق رُقَّاب الضَـيْ |
الخلوة هي مكان الضيافة وتكون خارج البيت يكرم فيها عابري السبيل
تعزم اي تلح في طلب النزول لكي يكرم من ألح عليه لينزل
باشّا اي بوجه صبوح تعلوه ابتسامة ترحيب بالقادم
الضربوا ... هنا يعني بها سافروا وإتوكروا
يقال ضرب الوادي عندما يحث السير ناحية الوادي
الهاجروا اي اللذين بعدوا عن ديارهم واهلهم
رقاب : اي رقاب ( الرقبة )
الضي يعني بها ضُحى والعين تشوف هاجروا
يا حليوة الكرام والأجود ( لو صحى جمع الجود هكذا ) أهلك انت تتسمي بكثرة الخلاوي يكرم فيها ضيوف الهجعة نص الليل
واهلك باشة وجوههم يقومون بذاك الواجب ( كرم الضيوف )
وضيوف الليل عادة يكونون أناس كانوا في خلا وصي ( وخروج الناس للخلا والصي ) عادةً يكون فزعة ورا بهائم سرقت أو البحث عن مراعي
أو لاسباب اخرى وعندما يتعب من المسرة ليلاً يجنب ناحية الحللال ( القرى ) ليرتاح من عناء السفر والتعب ويبل الريق بكرم اهل تلك الديار
الضاربين الصي والمهاجرين من موطن لاخر كنتي مرتع لهم يا حليوة وسمحة .. ونسمة قمحة
Quote: مُخْـلاية الزاد
بتعشِّـي الوينْ ..
مُـدَّاح الزينْ
ضيفاً درويشْ
فُـرَّاس الخيلْ
سُـرَّاى الليلْ
دُقَّـاق العيشْ
بتعشِّـى الديشْ |
المخلاية : وعاء من صوف يعلق في الدابة وفيه يحمل المسافر زاده ( تصنع من صوف البهائم )
بتعشي : اي تقر الضيف طعام العشاء
وذكر وجبة العشا بالذات لانها الاوقات التي يأتي فيها الضيوف
المداح .. وهم قوم يمدحون الرسول صلى الله عليه وسلم شعرا ( بالطار ) وعادةً يجبون القرى والفياي ليسمعوا الناس المديح في خير خلق الله
ومنها رزقهم ( ماتجود به ايدي المستمعين .. قريشات )
ضيفاً درويش .. الدرويش هو شخص هائم في حب الرسول عليه الصلاة والسلام مجذوب ( لغة الصوفية ) ودائما بلبس الخشن المرقوع الأخضر جبة .. وطاقية خضراء يميز بها نفسه عن باقي الخلق انه منداح وهايم في حب الرسول ومطلق الدنيا أم بناياً قش وزاهد فيها...
فراس الخيل : هم الفرسان اللذين يخرجون لفزعة بهائم سرقت ليعيدوها لاهلها
دُقاق العيش .. يعني بها اهل حليوة اللذين يكثر في بيوتهم المطحون من الذرة والقمح عيش الريف
وسميا عيش لانه قوت اهل السودان الاساسي ( اي به تكون المعيشة ) وكما نجد اهل الخليج مثلاً يسمون الأرز عيش لان عليه قوتهم اليومي والاساسي ومن هنا تكون كلمة عيش للقوت الاساسي في سائر البلد
الديش : يعني بها الجمع من ناس كُثر
لكن المعنى الصحيح للديش : هو الجيش
واطلق لفظ الديش ( للناس الكتار مهما كثروا ) لوجه الشبه
الديش بكون عدد جنوده كثير
ويقال جا جيش او ديش اي جاءوا ناس كتار
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: والناس المادَّه عيونها تنادى الرحمه،
عيونهم جَــفَّنْ |
هنا يصف حال عامة الناس لكن ضرب لنا المثل بإنسان حليوة البسيط الطيب وعرض لنا حال الخلق في ذاك الزمان
عهد نميري
وهكذا دائماً اسلوب القدال التضمين وقلب المعاني المعتادة
عادة الناس تقول الناس الماده إيدينا تنادي الرحمة من الله فوق سماه
لكن عمق المعنى اكثر انهم مادين الايدين يدعون الله ان ينزل عليهم الرحمة ويرفع عنهم هذا البلاء الذي نزل عليهم
( الحكم العسكري الثاني ... حكم نميري عليه رحمة من الله ) فهم مادين اليدين دعاء وتضرع وعينهم ترغب نزول الفرج
ماده عيونا تنادي الرحمة
عيونهم جفت من كثرة الرجاء بكاءً وتضرع لله
Quote: الناس الشادَّه بطونها..
الرِيقَـه الدَخَلَتْ لا زال جوَّه ..
بطونهم خَـفَّنْ |
ربط الرسول صلى الله عليه وسلم الحجر على بطنه يتغي شر الجوع وها هم أهل البلد ممثل في اهل حليوة في ذلك العهد
شادة بطونا الناس
الريقة : الجوع
ويقال .. فك الريق اي اكل شئ الصباح بعد ما صحى من النوم
الريقة فاتت وعاد عندما الإنسان تفوت فيه جوعة لا يسد رمقه اي شئ يأكله بعدها بل توجعه بطنه
يقال جاع رجل جوعة شديدة لما غلبته الحركة من شدة الجوع وبعدها فرجت علي ووجد ما يسد جوعته
فقال :: طول هذا الزمان كنت افتكر الكرعين شايلين البطن وباقي الجسم
لكن اليوم وجدت ان البطن هي الشايلة الكرعين ...
الريقة الدخلت لا زال جوه
بطونهم خفّن
دخلت الجوعة لما هضلمت بطونهم
Quote: الناس الكادَّه الجوع ..
اللاحسه الكوع..
الخيلهم نَـفَّنْ |
الناس الكادة الجوع اي ان الجوع اصبح لهم مثل الطعام يقتاتو من الجوع بالجوع وهذا اعمق تشبيه
يداوي الجوع بالجوع وهناك مثل يقال فلان يأكل من سنامو اي اصبح كالأبل في الصحراء تاكسد دهون سنامها تتغذى منها
ويضرب هذا المثل ان ذاك الشخص ياكل مما ادخر ولادخل له ...
وفي تلك الايام كدت الناس الجوع وهذا دلالة على انه لايوجد شئ يكدوه غير الجوع
اللحسة الكوع
أن يلحس الانسان كوعة هذا من المستحيلات ويضرب المثل
للشئ الذي يكون الحصول عليه مستحيل ( يقال دا لحسة كوع اي لو تستطع ان تلحس كوعك يمكنك ان تحصل على هذا الشئ )
الخيلهم نفن اي جفلن وشردن
Quote: الناس الحادَّه علي الما مات ..
الحَيْ ومكَـفَّـنْ |
في تلك الظروف الحالكة المضنية وحال الناس وصل لادنى حد من الفقر بل ادنى من مستوى الفقر
كان لما يمرض شخص لا يوجد ما يداوى به ( قدرة مالية ) وكل شئ اصبح بالقروش عندك قرش تساوي قرش ماعندك تموت
فاصبح من يمرض نتظره الناس ان يرتاح ويموت
حي لكنه كالميت ( حي ومكفن )
والناس في حالة حِداد عليه قبل موته فهو حي ومكفن
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: أفراح الناس ما كَـفَّـنْ...
أحزان الناس ما كَـفَّـنْ |
لا حزن لا فرح ما كفّى
فلم تكفي الناس احزانهم ليكونوا في حزن ابدي
ولم تكفيهم افراحهم ليدوم الفرح في قلوبهم
وقد يأتي الحزن يوم الفرح وهنا تكون الفاجعة الكبرى
اي الحزن يجي ويمشي تحزن الناس وبعدها يحصل فرح زواج او ختان وتفرح الناس
الحزن لم يخرجهم منهمهم الاكبر والفرح كذلك لم يخرجهم من بلائهم الذي سلط عليهم ( حُكم العسكر الما بتشكر )
Quote: الصبر جميل.
وكان برواز
في الخلوة معلق
فوق برواز الجد الأكبر
يا برواز الصبر جميل .. |
فتعود الناس على الصبر والصبر جميل
وهي حكمة يؤمنون بها ودائما امام اعينهم
تجدها في خلوة او ديوان مبروزة كبيرة ومعلقة فوق برواز لصورة الجدأو الأب
( الصبر جميل )
الديون هو الصالون ويسمى في الاقاليم والقرى ديوان وهي كلمة فارسية ( ايوان ) بهو كبير كان يجلس فيه كسرى الفرس لقضاء امور الدولة وفيه كرسي العرش ويجلس فيه في كامل حُلته
قلبت الألف دال في عاميتنا السودانية
تحضرني قصة
مرة كانا في زيارة قريب تربطنا به صلة رحم دم انا وابن عمي عمر القرضابي زميل البورد
وكانت الزيارة لشخص جميل اسمه عبد الحفيظ الفضل
في ديوانهم كان هناك صورة مبروزة كبيرة أباه الفضل قب النور
وعادة الناس بتعلق برواز صورة الحكمة او اية كريمة فوق برواز صورة الاب او الجد لكن ناس قب النور عملوا العكس
وعلقت صورة ابوهم وتحتها اية كريمة
( اليوم أكملت عليكم دينكم وأتممت عليكم نعمتي ورضيت لكم الإسلام دينا )
تمعن القرضابي ( القردابي ) هذا وقال لعبد الحفيظ الفضل ابوك دا قاعد كدي في الصورة ومتفوجج كأنوا هو القال الأية دي
اراد الشاعر ان يوصل لنا قيقة وهي ان الناس تعودت على الصبر وهي حكمة يؤمنون بها ان الصبر جميل ويروها في بيوتهم منذ الصغر معلقة في في حيطان الخلوة والديوان
الصبر جميل
Quote: الحزن المالِـحْ عطَّـن
فـرح الحِـله في لـيلـة الدُخـله
والـحـزن المـالِـح
قَطَع الخَرَزَة
وقلع الرَّشْـمَة
مبروك الـصرخة الأولى
على لِسنات الحضروا المَوْلِـدْ ...
جات محتشمه |
حزن مالح اي بطعم الملح في الحلق حزن دفين ومر
عطن اي ملئ
يقال اعطن الهدم في الموية اي بلله واملاه بالماء
وكان الفرح وكبس عليه موت عزيز فعطن الحزن فرح الحلة في ليلة دُخلة
الحزن قطع كل ماليلتها ( ليلة الدُخلة )
قطع الخرزة والرشمة وهي من ادوات زينة النساء
ويبدو انه كان حزن موت مرأة في ولادة مولودها
لانه ذكر مبروك الصرخة الاولى ( وهي صرخة الجنين عندما يخرج من بطن امه وهي اعظم فرحة للمراة عندما يخرج الجنين ويصرخ في خضم عناءها من ألأم الولاد وهي موت ومن ماتت في في ولادة فهي شهيدة كما قال الرسول الكريم عليه الصلاة والتسليم )
مبروك الصرخة الاولى جات محتشمة اي خجلة لانه كان بنزولها للدنيا ماتت وفارقت امها الحياة وهنا يظهر بعد خيال الشاعر الذي كسى المولودة حزن كحزن اهلها من يوم نزولها بإعتبار ما حـــأ يكون ( حزن على امهلا التي لم تراها )
علي لسنات الحضروا المولد
اي ان من حضروا الولادة قالوا ان الصغير / الصغيرة كانت يكسوها الحياء خجلاً عند نزولها وفارقت امها الحياة
لله درك يا قدال
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: فى جاه الحلة الشايلة الحَـفـَّـة
لا سيرة تـدُقْ
لا زين لاحُـقْ
لا عَـمَّة تحِـنْ
لا خَـالَـة تـحَـنِّـنْ ...
ولا خَـيَّة
حتى الزغرودة الأغرودة
مجروحة وباهتة
ملغية!
كل المواعيدْ
ضحكات العيدْ
أحلام الريدْ
الاغنيَّـة...
صبحت مهزومة ومتكيـَّة |
وكان الحزن الكبير يخيم في ظلال الحلة ( حليوة )
في جاه الحلة الشايلا الحفّة
الحفة هي الجفاف وبالذات في شعر الرأس
تقول المرأة رأسي حَفْان اي لم تدهنه بدهن او كريم لمدة والحفة تتبعها الحكة وتلقى المرأة تكرش في رأسها اليوم كلو
وكانت عادة الحِداد علي الميت
لبس الأسود ( فستان )
لبس الأبيض ثوب ومن قماش الدمورية
عدم لبس النعال لفترة
عدم دهن الرأس ( هنا تكون الحفة ) وصار يضرب المثل قول أن فلان شايل الحفة اي في حالة حداد
الابتعاد عن الزوج بالذات لو كان الميت قريب حتى لا يقال ولدت في بكى ابوها ( النسوان بحسبن ليها تمام وبعرفن حملت متين ويقولن ليك هي نفسها مفتوحة لآمن حملت في بكى ابواها او قريبها فلان تخجل والختتا رقدت وتبقى تار ابوبكر الصديق لي لعقد من الزمان هي سيرة الناس وفك الخشم طق في ونسة ...)
عدم اكل للذيد من الطعام في الايام الاولى وعادة يكون الطعام ماسخ من ملح ويزاد بالماء
الكحل .. الخُمرة .. الدُخان .. العطور بأنواعها من المحرمات في الحد
الحمد الله كل هذه العادات السيئة إندثرت وراحت من الزمن والعلم
وهو اساسا لا اجد اي منها ذو نفع للميت الميت ينفعه الدعاء لا العويل الحداد .. اذكر الوالدة ام الحسن بت بادي قبل وفاتها بسنين عددا احتمال 5 سنوات اصرت على كل اخواتي ان يلبسن معها ثيابها وقالت لهنَّ عشان ما تقسموا هدومي لما اموت ( عملنَّ بوصيتها لم توزع ثيابها قسمت بينهنَّ وحتى مسبحتها وسجادة صلاتها ومصحفها ومُكحلة الكحل والمحفظة (( المفجضا )) وكل ما يخصها من صيغة وساعات قسمت بينهنَّ .. وكان من وصايها لهنَّ ماعافية من البتحد علي ولو بعدم العطر تعطرنَّ يوم وفاتي ( قالت لهنَّ الحزن في القلوب وبعرف كيف سوف تحزنَّ علي لكن اي شئ يخالف شرع الرجاء عدم فعله )
وفي جاه الحلة الشايلا الحفّة
لا سيرة تدق
لازين لا حُق
وكان العُرس وفي نفس اليوم يظهر ماتت المرأة في الولادة ومبروكة الصرخة الاولى علي لسنات الحضرو المولد جات محتشمة
الحلة بقت شايلا الحفة
العرس سلب من كل طقوسه
لاسيرة دقت تنشد ( عريسنا ساير لي بت القبائل عديلا لي ..
لا زين من هلال .. وخرزة في حريرة في اليد .. لا اي شئ من مظاهر الفرح
لا عمة تحن
لا خالة تحنن
ولا اخية
وحتى حنية العمة واقفة جنبك يوم العرس فقدت
ولم تحننه الخالة وهي العادة ان تبدأ الحنة الخالة واو الجدة وبعدها يكملنَّ البنات والاخوات بالذات الحنة
حتى الزغرودة الاغرودة
مجروحة وباهتا وملغية
لم تكن هناك زغرودة وفكانت مجروحة تئن وباهتا في لونها وملغية
وكل شئ ( كل المواعيد )
وضحكات العيد البلم الحِبان
وكل حلم ريد بين صبي وصبية يتغنى به فرحة وغنيوة حلوة
كل هذا اصبح مهزوم ومنزوي وملغي في ذاك اليوم الحزين
الحزن كبير يوم جمعت الضدين ( الفرح والموت )
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: في جاه الحله الشايله الحفة
إحساس أطفالنا بيوم الوقفة
اندهشْ...
ارتعشْ..
اتحَـلـَّـلْ.
الكعك...
اللعبة..
البسمة.
اللبسة ..
الكل اتبلَّـلْ. |
وفي الحلة الشالت الحفة في عيدها وفرحها بعرس
وكان إحساس الاطفال بيوم الوقفة أحساس غير الذي إعتادوا عليه لبسة وشبط وكعكا ولعبة وبسمة تطل من أفراد الاسرة
كان إحساس فيه الدهشة والارتعاش في المشاعر
تبلل الكعك واللعبة والبسمة واللبسة بالدموع
وهنا يتضح امر القصة
عرس قطع موعده بعد اليوم الاول في العيد ( والعيد موسم تكثر فيه الاعراس )
وفاة مرأة في الحي قبل يوم الوقفة في الولادة
أحزان تراكمت من حال سيئ وصل بالناس لحد الفقر الفقير
دموع بللت حتى اللبسة الكعكا في يد الطفل اللعبة والبسمة ترويها الدموع
Quote: عربون البمسة الفى العينين..
ما فـرهدْ ..
مـــاتْ. |
عربون ... العربون هو ما يقبض من قروش نسبة بسيطة لإكمال بيعة
وكان الفرح في نفوس الخلق قليل زي عربون
وجاءت الاحزان طمست حتى هذا العربون
فهو عربن لكن لم يكمل لتتم البعية وما فرهد مات بالحزنوالحفة التي ظلت القرية
Quote: يا يوم العيد
دمعات أُمَّـاتنا على أُمَّـاتهن
فى العيدين ..
ما هِـن رحماتْ.
في جاه الحله الشايلة الحفة ..
فى جاه الحِـلة الشايلة الحَـفـَّـة.. |
ويقول مخاطب عيد الفرح الذي إنطمست الفرحة فيه قبل حلوله
يا يوم العيد
دمعات أماتنا علي اماتهن في العيدين
ماهن رحمات
وهكذا اهل السودان عندما يموت شخص في الحيتجد الباكين الواحد فيهم يبكي الميت ببكاءه على فقد عظيم له في الماضي لكن مازال الحزن لذاك الفقد كامن في القلوب والنفس فيتذكره وتهيج الاحزان من تاني فيبكي الفقيد اليوم وفقده القديم معاً
وهذا تفسير
دمعات أماتنا علي أماتن في العيدين ماهن رحمات
دمعات اماتن في ذاك في يوم العيد يبكينَّ امهاتن اللآئي فارقنا الحياة
في يوم طلت واستقرت الحفة في حينا
Quote: القِـسـمة تفوتْ
أحلى البـنـُّوتْ
لا الغايب عَــادْ
لا لـحـقن خيلـهِن في اللـفَّـه. |
وهذا حال الغرارة العبوس ( الدنيا ) تعطي بيد وتاخد بأخرى ومابدوم فرحها
وزي ما القسمة
تفوت أحلى البنوت
وهذا حق تجد الفتاة جميل شديد لكن يفوتها قطار الزواج ويتزوجنَّ من هنَّ اقل منها جمال والامر قسمة
القسمة تفوت احلى البنوت وهي تنتظر الغائب الذي وعدها
لا هو عاد
لا لحقت الخيل في اللفة
وهنا ضمن معنى من مثل
الخيل الاصيلة بتجي في اللفة وتلحق وتفوت باقي الخيل
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: بقول غُـنوات..
واقول غنوات..
واقول غنوات.
أقول غـنواتي
فى البـلد البسير جِـنياتها
لى قدام.
للولد البـِتـِـلْ ضِـرعاتو فى العرضة
ويطير فى الدارة صقرية
ولو السمـحـة تَـلَّـتْ إيدْ
ومَدَّتْ جِـيدْ
تـقوم شـايلاهُ هاشـمية
يشيل شَـبَّالوا
خـطـفة ريدْ
وفـرحة عيدْ
وريـدة روحْ
وحُـمْرَة عينْ...
وإيـديَّــة.... |
انا بقول غنواتي ونمي وشعري في بلداً يحترم شأن أولاده
ويحرص علىنشأتهم وسيرهم للعُلى
بسير جنيلتو لي قدام
ولي أغني وانم في الولد الشهم النشم الذي يتل عند العرضة ضرعاتو مستعرض مدى قوته التي يزود بها عن حمى البلد
ويطير في الدارة صقرية
والصقرية نوع من أنواع العرضة التي يحاكي فيها الصبي حركة الصقر عندما يهجم على فريسته
وتعرف باسم الصقرية
وعندما تتل السمحة يديها متمايلة في الرقص طربا تشيله الهاشمية
والهاشيمية هي تلك الرجفة التي تأتيك عندما تهوش لموقف رجولة
يقال فلان شالتو الهاشية فلو كان قدرها سدَّ ووفّى ولو لم يكن قدر الموقف تشيله الهاشمية ويفشل في الموقف
ويقال بس شالتو الهاشمية
ويشيل سبالو الشبال معروف ان تميل للبنت التي ترقص وترمي هي شعرها على عنقك شعر معطون في خُمرة تذيب العقول
يشيل شبالو ختفت ريد زز وريدة روحلنفسه العاجبا وحمرة عين اي زندية وبالقوة وعيدية اي شئمعه فرحة كفرحة العيد
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: ويا الولد البشيل مُـدقاقو
قولة خير
على القمْره
يـقابل الجـايَّـه متْحَـزِّمْ
ومتلـَـزِّمْ
كلام فاسَـك على أرضَـك
بيبقى عـديـله يا بـيـضا |
ويغني وانم اقول الشعر للولد المتحم ومتلزم وياقي داب ارضو يزرعويحصد
ويقالبل كل صروف الحياة متحزم ومتلزم
ومافي شئ بنفع يا ولدي غير سلام فأسك علي ارضك
وسلام الفأس علي الارض هو الفلاحة
المدقاق : هو مدقاق العيش وهو عبارة عن عود كبير يضرب به القصب ليحت العيش من قندوله
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: ويبقى زفاف
تزغرد ليهُ قمريِّة.
وقُـبَّـال حُــول
تغَـيِّـم غيمة قِـبْليِّة
ترُش الدَّارة والحَـدَب الصعيد الحلة..
يا رحـمة نـداوة الصفقة ..
فى النسمة الصـعيدية
ويا جَـهْـرَة نـهار الليلة..
لمَّـا اللـيلة بـدرية. |
انا بقول غنواتي ونمي شعرا لي الولد البحزم الجبة ويزرع ارضوا ويخلي فاسو علي ارضوا
ويزرع ويحصد
من حصاده يكوم قيزان المحصول .. وجود محصول ( حبوب ) فيه تتواجد الطيور تاكل نصيبها
ومن حق المحصول عادة ما يتزوج الناس .. يكملوا البيت الذي يحتاج لبناء .. يتوسعوا في المعيشة يتهنوا
وكله من المحصول
ويبقى زفاف تزعرد ليهو قمرية قبالو وحولو
اي في ناحيته تغيم غيمة قبلية والقبلي مطره اكيد بإذن الله وترش كل الارض
والحدبة وهي الهضبة اساسا لكن باللهجة السودان نقول الحدبة
صعيد الحلة اي جنوبها ( وهذا اتجاه الصعيد عند اهل السودان .. اتجاه منبع النيلين )
السافل هو شمال السودان اتجاه المصب
تغَـيِّـم غيمة قِـبْليِّة
ترُش الدَّارة والحَـدَب الصعيد الحلة..
يا رحـمة نـداوة الصفقة ..
رحمة نداوة الصفقة ( هي الفاتحة التي تعقب الصلاة لان جرت عادة اهل السودان بعد ان يدعو الله عقب الصلاة ان يقرأ الفاتحة ثم يصفق يديه ويمسح بها وجهه لذاقال القدال يا رحمة نداوة الصفقة ( نداوة ) يا تلك الفاتحة الندية من قلب مؤمن بالله متوكل عليه )
في النسمة الصعيدية اي تلك النسمات الهابة من اتجاه الجنوب
يا بركة ليلة ممطرة جهرتها تحيل الليل نهار من شدة بروقها
لما الليلة بدرية ويقصد لما الليلة بدرية قد يكون يعني في ايام فيها البدر قمرا
وقد يكون يقصد انا المطر بدأ من اول الليل مساءً اي من بدري
وبدري كلمة تفيد من وقت مبكر عند اهل السودان
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: رحـيح جنياتنا
فى الحَدَب الـصـعيد الحله .
يا قـمـحـاتنا .. هوْ لَبْ لَبْ
ويا اللوز الفتق فى الوادى..
هو لب لب
ويا سمحاتنا.. هو لب لب
ويالبحر الطمح مدَّادى ..
هو لب لب
ويا حُجْواتنا يا صلاوتنا ..
هو لب لب. |
الرحيح : الزحيح الاتفين في التراب ( ويرجع الواحد مكندك زي المرور رو ... فول الحاحات السوداني ) وعادة الاطفال بزحوا في الارض عندما يلعبو
ورحيح جنياتنا في الهضبة التي تقع جنوب الحلة
يلعبون لعبة شليل
لكن القدال ضمن اصول اللعبة بكلمات جديدة
وشليل لعبة معروفة في كل بقاع السودان .. يلعب بها الاولاد
عضمة ( اساس اللعبة ) ينقسم الاولاد لفريقين
فريق يرمي العظمة وينشد هذه الابيات
شليل وينو
أكلو الدودو
شليل وين راح
أكلو التِمساح
والفريق الثاني يبحث عن العظمة حتى يجدها
ويباري الاطفال كل بقعة في ساحة الارض التي يلعبون فيها ( لا يخلو جدول ولا منحدر ولا كدمبس :: والكدمبس هو المكان الذي تجمع فيه الاوساخ ويسمى ايضاً التبانة .. وبيسمة الكوشة ) وبلغة اهل الخليج مكان الكشرة
نرجع ونشوف ماذا ضمنها القدال في قصيدته ( شليل )
صوتهم ينشدون :
يا قـمـحـاتنا .. هوْ لَبْ لَبْ
ويا اللوز الفتق فى الوادى..
هو لب لب
ويا سمحاتنا.. هو لب لب
ويالبحر الطمح مدَّادى ..
هو لب لب
ويا حُجْواتنا يا صلاوتنا ..
هو لب لب
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: سألتِكْ بالذى رَكَز الأرِض معبد
وسوَّى الفاس عليها مقام
سألتك بالذى ركز الأرض معبد
وسوى الناس عليها مقام
سألتك بى حـشا الأُمَّات
ودمعاتنا
وسألـتك بى كبيـداتهنْ
ودعواتنا
شليلْ وين راح ؟
يكون خير الخريف فاتنا |
سألتِكْ بالذى رَكَز الأرِض معبد
وسوَّى الفاس عليها مقام
يا سلام يا قدال
انظر لجمال الحكمة في هذا البيت
يسال وهل من اجابة للسؤال
سالتك بحق الله الذي خلق الكون واحدث فيها الخلق لكي يعبد وكلُّ يسبح بحمده
وأوجد الإنسان ليعمر الارض ويعبد الخالق
وسوى الفأس عليها مقام
ليعمرها
سألتك بحشا المات الذي حملنا وهن على وهن وفطام في عامين
وسأل بحق هذا الشئ العظيم حشاء الامهات وهل هناك حشا اعظم وكل الدموع في احزاننا
سألتك بكل كل كبد لام والام عظمة وفوق رأسنا حبها
شليل الذي نبحث عنه وين راح وين ضاع
وهل فاتنا خير الخريف ولم نجده بعد
وهنا المعنى الكبير الذي اراده الشاعر يسأل هل انتهت ايامنا وايام شليل الذي كنا نخبئه ونجده يعمر لعبتنا هل ضاع شليل ودون عودة
يا انت ؟
( الموجه له السؤال ) .. كل حر عفيف ابا الضيم والظلم الذي وقع
والضاع كل خير وكل فضيلة موروثة او مكتسبة
يا للأسف لقد ضاع كل شئ رغم ان الشاعر قد دلنا على الخير وين موجود في نهاية القصيد
نعم هذه القصيدة كانت في عهد العسكر الثاني ( نميري ) وجائت الحقبة العسكرية الثالثة ( الانقاذ يل قل الانخاس )
وضاع شليل ولا اظنه يعود إلا بقدرة القادر الاحد الاعظم
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: وزى برق السِماك الجابها دُغْـشِـيَّه
زى زغروده للبُطنه الكبارية
مَرَقْ من شامة القمره ..
مَـهَقَّتْ بى وداعـة الله
مـقـدَّم بالعديل يبـراك
تعالوا أبِـشْـروا آجِـنْيات
شليل ماراح ..
شـليل مافات
شـليل عند المَسور مَـرَقْ
بقالو حـصاد
شليل فوق التَـقَـانِـتْ قام
خضار وبـلاد
شليل مسدار ..
شليل مشوار
شـليلنا أرضنا يا جِـنْـيات. |
وزى برق السِماك الجابها دُغْـشِـيَّه
زى زغروده للبُطنه الكبارية
شليلّنا المنتظرنو يا أولاد وامل البلاد
امل لابد يحقق
زي برق السماك : وهو نوع من انواع البروق ( البرق ) لا يخيب مطره قط وبجيب المطر دُغش
الدُغش هو الصباح الباكر
وبها تكون الفرخة ( المطر .. للزارع والحران .. للمتحري ومتعشم .. للطفل والكِبار )
وشليل سوف يكون فرحة زي زغرودة البطن الكُبارية .... وزغرودة البطن الكُبارية هي المرة التي فقدت العشم في حمل ( لتقدم السن )
وفجاءة تحمل بامر الله وتقديره وتكون الفرحة اكبر من حمل البنت الصغيرة
سوف يطلع شليلّنا والأمل النتظر من وسط شامة القمرا
مزين ( مهقت .. بأمر الله وصونه ومتقدم عشان ينزل علينا العديل والزين )
وأبشرو يا جِنيات
شليل ما راح وفقدناه
شليل ما فات وفاتنا حوفا
شليلنا معقود فوق ارضنا آجِنيات
شليل مسدار وغِنوة نشيلها للسمحات
شليل مشوارنا في هذه الحياة آجِنيات
شليل في التقانت قام خدار وبلاد
والتقنت هو المرتفع من الارض يحجز المياه عند السقاية
ويعرف باسم التقنت
شلينا هو ارضنا
يا جِنيات
والارض هي الدُخر الباقي والكل فائت وزائل آ ناس
نبقى عشرة علي الارض وهي البتنتج وتدي
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: شليل قايـم نـصايص الليل
يتمم لـيلو ورديه
حـرازنا شـليل
شليلنا دليب ..
شليلنا دليل على البِـلدات
بعد درب الـتبلديه
شليل ما راح
شليل ما فات
شليلنا ونحن همباته ومهاجريَّه
مزارع بـات عـلى عشـقين
تراب بلدو .....
وسَـمَاحْ فوق بِتْ مُزارعيَّه. |
شليلّنا المنتظر
شليلنا حراز
شليلنا دليب
شليلنا هو دليلنا على البلدان بعد درب التبلدية ( التبلدي شجر القونقليس )
شليلنا ارضنا ودعوة لفلاحة الأرض وهي الخير لهذا البلد
شليلنا قام في التقانت خدار وثمار
شليلنا معرفتنا لحق الدين الإسلامي واورادنا نص الليل عندما تجافي جنوبنا المضاجع نتلو أورادنا
شليلينا ونحن همباتا ومهاجرية ( الهمباتي والمهاجري هي ثقافة أناس تعودوا قلع وسرقة الناس الأغنياء اللذين لا يخرجون حق المال زكاة وصرف فلوسها على الفقراء
والباقي يصرفوه على هواهم ( خمور ونساء ولا يأكلون منها في بطونهم وهي ثقافة خارجة على الشرع ) لانه مهما كان لايجوز أخذ مال من احد بغير وجه حق لكن نقول هي ثقافة سادت في كثير من بقاع البطانة والأقاليم في السودان لفترة وقد إندثرت إلا في بعض المناطق مازلت تمارس لكن ليس كما أول
شليلنا ونحن اصلنا أو اغلبنا مزارعين يبيت نضيف علي عشقين
تراب ارضو ( بلدو )
وسماح خلقة واخلاق في بنت مزارعية
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
إلى أمي
( أم الشهيد )
فعولٌ مفاعيلٌ
فَعُولٌ مفاعلُ
كلاماً علي كيفّن
بيرطن محاسنن
سلاماً يغنيهن
وشوقن يحانن
غُناياً بعد شتّن
وفاتّن يهادنن قوافي
معانيهن ...
يشوفن مفاتّنن
يسيبن معاصيهن
يشُقن بشاتنن
أدوبي ... واعدّيهن
وأفك المكردنن
غُناياً علي البيهن
غُناياً يطمنن
شوقي اليغبيهن
قلبي اليعاينن
يعلي البعليهن
ويفن البفـ نن
فَعولٌ مفاعيلُ
فعولٌ بها نيلٌ
مهولٌ وماهلُ
فعولٌ ...
وفي لُغتي يموت المفاعيلُ
يحيا المفاعلُ
فمن ذا يبشرني
بخيلِ وليلاٍ
واسيادٍ مفاعيلُ
وأغُنية مفعلةً
قفا نَبْك .. فعولٌ
مِن ذكرّى .. مفاعيلُ
حبيبٍ ومنزلِ
صلاة الله ثم سلامهُ
على رسول الله
إنّي متيمُ
فعولٌ مفاعيلُ فعولٌ مفاعلُ
بنيلٍ بنا يجري
على تسع ةتسعين دمعةٍ
إلى صبحٍ
ويحرمنا من الحُلم المفاعيلُ
وهذا القصيدُ النيلُ
يا أماه يحرقني
يفقأ كل مفعولٌ
بها صحبي وذا قسمِ
عليَّ مطيهم ..
بسرج الأحرف الأولى
وكِرباجي ...
يقولون لا تفعل ..
ولا نفقأ ...
فعين الفتى نصفٌ
فكيف إذا في النيل
سال حنانُه
شهيداً وعُرسان بصدق الفجرِ
ينسكبون من رونق الصباجنوباً
ومن لغتي التي كفني
إلى غيهبي الصمتي
والحور المزورة الخدودي
والخلدُ الذي مفتاحهُ
بيد اليأجوجِ
يا أمي هذا القصيدُ المرُ
يَغزلني وينزلني إلى لُغةٍ
بطعم الملح
يركب كل مفعولٌ فعولٌ
فعولُ مفاعيلُ مفاعلُ
كموج البحري يندلقون
من بهجة العمر خِلسة
من الأمَتونج
من بحر الخليلِ
ومن فقئ الكذبة الكُبرى
من الجنات
من خطل المفاعيلِ
ينوحن ...
بخليهن ينوحن بي سادنن
بسلف قماريهن
غُنايا البشادنن
يقوقن ..
بصليهن .. تلعلع مآذنن
يعود البداويهن
يفوت المعطلن
أراهم على أعتاب فردوس
فلا تستنزفي دمكِ
الذي أستنزفتهي في حوبة الميلادي
وأبتهلي بدمع هاتناً
وابكيه ,,,
ولا تقفي على لغتي
التي ترشوك بالصبر المخثرِ
بإنحباس الدمعِ في العينين
لا تلوي على كل الحروف الدوني
من هزج المفاعيلُ
التي قد مزقت نفسي نفسكِ
وأسكبي وابكيهِ...
من فعلٍ يبش الدمع
من لغتي بشيش
فيكِ ينبلج الغداة الزغبُ
من عفو عليه
وغبطة تغشى خُطايا
بغفوكِ الداني
فيا أماهُ ...
لا تبكي عليَّ
أكفكف غوازيهن
سيوفن تحانن
يحرّن علي تيهن
ابرد كماينن
كلامي البسليهن
ونمي البخادنن
حلاتن بناديهن
وأنادي البراطنن
أدندن غناويهن
اشيل البدندنن
ترقرق مصافيهن
يصفن مخازنن
وتفضح مراميهن
عقول المجنّن
نشيدي البيوريهن
كلامي البفطنّن
فعولٌ مفاعيلُ
فعولٌ مفاعيلُ
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
على قصيدة أمي أم الشهيد
لا استطيع التعليق
والتعليق حيناً يفسد
فقط اقول العجب الذي حلق بي وأنا استمع واكتب أبياتها
لا اقول استغربت بل اقول في كل قصيدة للقدال تأخذك الدهشة بالجديد
مفردة .. كلمة وجملة
اسلوب جديد في كل مرة
انظر كيف المزج ( حليب بالموز ) فصحى وعامية
لله درك يا قدال
والأعجب كيف ينسل من الفصحى للعامية وثم يعود للفصحى ( فعل الشعرة عندما تسل من العجين بتطلع نضيفة لا يلصق بها العجين )
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
وجع المخاض
لِقينا عوجنا قايم بينا
ما عِرفناهو
ولا قولنالو كيف حالك
نسينا مجامر التجريب
علي برد المحن والعادة
كان تهمد
بتصين الظاهر الباطن
ويوم حنيّنا كانت زحمة
شالت من قلبنا الرحمة
ما قالّتلو كيف حالك
دحين كيف الدبارة
وكت تمش في الزيفة وِحيدك
دحين كيف الدبارة
وإنتَّ ماك فارز
طلوع الروح وغِميضك
دحين كيف الدبارة
وجرحّك الداشر دفن جُواك
لا مسك بطيب تاني
ما مسك بطيب تاني
ما مسك بطيب تاني
إلا تلاقي حد السيف
علي لُب الجرح نازف
بعد جواني
يصبح تاني براني
غِشيت يات من مدينة
لقيتا زي طمل الخريف طينة
مِشمر
جيتا لي وجع المخاض البر
مِتل موية الرِهاب
والوحل غطاني
مشيت يات من طريق
الناس مزقللا في الفراغ
وعيون مجدّعا في التراب
وإيدين تخاتف
شن تخاتف ... ماني عارف
إلا جيتا
وجيتا لي وجع المخاض البر
متل موية الرِهاب
وقفتَّ أعاين في الخليقة
لقيت بتاوق جوة روحي
ضِهبتا في موج السراب
عَريان ...
وسط موج العَرايا..
سألتا الجنبي قتلّو :
لحم وشيشك وين ؟
ضِحك ...
بين دمعو عاين لي الورايا
شفتا عُضامي
في دمعو المرايا ...
مشيت قِدامو ..
شفتا عضامو .....
في دمعي المرايا
وشلتا خُطايا لي بلداً قبيل
ظنيتا فوق ...
فوق .. فوق الترايّا ...
لقيت كُل الخلوق قاموا
فِرح فرحاً
فرح اللقى الرايحة
قعد وِحِيدي
في نص السهل دامع ...
بكيت بي الحيل ...
قدر ما الله أداني
وقتّا يا أخواني
إن الطيبة غطتني
دحين كيفن تكون ..
الخجلة سالباني ..
وما مسك بطيب تاني
ما مسك بطيب تاني
إلا تلاقي حد السيف
علي لُب الجرح نازف
بعد جواني
يصبح تاني براني
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
قصيدة وجع المخاض
هي قصيدة يبكي فيها القدال على الحال الذي وصلت بنا به حكوماتنا والسياسات الغير وطنية
( بس بعرفو كيف يقع القرش في الجيب وعمّرو وأريتو يدوم .. كل لحم نمى سُحت فالنار أولّى به )
المخاض هو الطلق .. وجع الولادة وكلنا بنعرف كيف هو مؤلم وقاسي
Quote: وجع المخاض
لِقينا عوجنا قايم بينا
ما عِرفناهو
ولا قولنالو كيف حالك |
العوج : وهو الشئ الما دُغري وعديل
ولقينا عوجنا قايم بينا
اي لقينا السوء الذي وصلت له نفسونا شئ بقى بيننا ولا نلوم الحكومات نحن الأصل نغير متى ما شئنا نعادي البعادينا ونزح البكازينا دا لو صحَّ الص
حيح وكان عدد واحد ..
لكن عندما تنظر لحال الخلق اليوم تجد من يتشدق بالوطنية لكن أول فرصة يجدها هب يهبدا يناصر الخصي وملوي ويقول لي إنتَّ دُغري وعديل
صوتك في الإختراع امانة في رقبتك لكن بحفنة من مال نبيع الأمانة بل البعض باعها بغنماية ( غنم نافع في جهة شندي في الانتخابات ) والعوج كتير وحاصل النفوس إتبدلت وتغيرت ونعيش في اللون الرمادي وذهب الأبيض والأسود لمزبلة التاريخ
وعاد كيفن ما ياهو دا العوج بينابقى بينا ونغطي عيونا
ما عرفنا عوجنا البينا
وما قولنالو كيف حالك
يا سلاااام شوف القدال دا كيف صاغ هذا الحديث
أحل العوج كأنه شخص ( بشر )
ما عرفنا .. وعندما لاتعرف الإنسان قد تفوته قد تسلم ( سنة لكن لا تطيل معا ) كيف حالك وكيف أولادك وعنقريبك
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
رسالة وصلتني من الفيس بوك
من ابن الشاعر الكبير الجميل
وائل القدال
تسلم يا وائل
وكل مناي ان تواصل معي في بريدي الخاص حتى لا نتقول على شئ
والحقيقة هي مقصدنا
ما تتخيل مداخلتك هذه كيف سرتني يا وائل
عنواني هو
[email protected]
تلفوني
00971501546277
تحياتي ومودتي وكثير من سلااام لذاك الجميل والدك محمد طه القدال
حمد الله على سلامته وأن شاء الله مايشوف شر تاني
==============================================
مداخلة وائل القدال
Wael Gaddal · متابعةمتابعة · Sales Engineer في Sales Engineer
أستاذي الجميل خالد المنسي تقبل مروري وشكري وتقديري أجله لهذا السرد الأنيق والغوص في تفاصيل القصائد والمناسبات .. جذبني البوست وأعي تماما أنه لا يحق لي التعليق فيه لجماله طبعا .. لكن تصحيح بسيط كان لابد منه في المسدار ( أبو السره لم يكن المقصود به ياسر عرفات بل كان والدي يخاطب صديقه تاج السر رحمه الله كما فعلها سابقا حين ناجى صديقه سيد عدلان وقال : كبس الهم علي والحال صبح يا السيد ) خالص مودتي.. وائل
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: نسينا مجامر التجريب
علي برد المحن والعادة
كان تهمد
تصين الظاهر الباطن
ويوم حنيّنا كانت زحمة
شالت من قلبنا الرحمة
ما قالّتلو كيف حالك |
نحن سهينا ونحن النسينا
مجامر التجريب .. اي تجاربنا وتجارب اهلنا الذي سبقونا
وكيف كانوا يتعاملون مع المحن والمصائب والعادات الموروثة
على برد المحن والعادة
كيف كانوا يجعلون المحنة بادرة عندما تقع والمصيبة هينة عندما تحل
وكل عاشان شنو ؟
كان تهمد
تصين الظاهر الباطن وما يكون في النفوس شئ من حزن وألم وتسير الحياة
ديل ناس كانت لهم من الحكم روائع ومن التعامل مع الأمور دراية
ويوم حنيّنا كانت زحمة
شالت من قلبنا الرحمة
ما قالّتلو كيف حالك
والحنية هنا ليست محنة وبس بل محنة وعودة وليت كل الحنين والشوق بعيد
كانت زحمة في نفوسنا شالت من قلوبنا الرحمة عدنا ولكن عدنا متشتتين والكل ينادي نفسي وندثرت فينا روح الجماعة ولم نعرف حتى الحنينة التي اجبرت خُطانا على العودة لذا لم تقل له كيف حالك
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: دحين كيف الدبارة
وكت تمش في الزيفة وِحيدك |
تدبر أمرك : اي جد طريقة لامرك هذا ( لحل )
دحين هي كلمة عامية تسبق كلمة كيف عندما يتحير الإنسان في الأمر يسأل مبتدئ بكلمة دحين كيف .؟؟
دحين كيف الدبارة
وكت تمش في الزيفة وِحِيدك
الزيفة : هي القر ( البرد الشديد ) وعادة تستخدم للبرد الذي يعقب مطر ( يقال زيفة وكما تستخدم للبرد منفرد دون مطر كلمة زيفة )
والسؤال كيف سوف تتدبر أمرك لو دعتك الحاجة لكي تمشي في يوم زيفة لوحدك ( والجماعة خير )
الجماعة خير الفرقة شتات
وهي دعوة صريحة من القدال يدعوا فيها أهل البلد السودان للجماعة الفرقة مافيها خير مهما أختلف السبيل وما دام الهدف هو خير البلد لما نتفرق
نتقاضى عن السبل ونسعى للهدف الاساسي وهذا المقصد البلد آ ناس
Quote: دحين كيف الدبارة
وإنتَّ ماك فارز
طلوع الروح وغِميضك |
دحين كيف الدبارة
وانت جاهل عن كيف تخرج روحك وكتين يغمضوا عيونك ( الموت ) وربنا قد دس عنك هذا كيف تخرج الروح وكيف يكون ذلك
وافتكر ان القدال قد يكون يعني أبعد من ذلك يريد أن يقول يا من تجهل كيف سوف تخرج روحك ومتى أعمل على لم الشمل ولا تشتت وتسعى في ذلك
Quote: دحين كيف الدبارة
وجرحّك الداشر دفن جُواك
لا مسك بطيب تاني
ما مسك بطيب تاني
ما مسك بطيب تاني |
دحين كيف الدبارة يا سوداني
وانت شخص كلك جروح من يوم قبل طلوع المستعمر وبعد طلوعة وليومنا هذا وانت في كل مرة جُرحك غائر عمقا
داشر : دشر اي اخرج
دشر الماء عندما يرجع الماء بعد شرابها لشرقة في الحلق ( عندما يدخل الماء في مسار التنفس خطأ )
جُرحك دشر وما طبت منه تاني واصبح جُرح منوسر وغلب البداوي
Quote: إلا تلاقي حد السيف
علي لُب الجرح نازف
بعد جواني
يصبح تاني براني |
إلا تلاقي حد السيف وحد السيف هو الكي والكي علاج من بعض الامراض وعلاج ناجع
العلاج
كي .. جرعة من عسل .. بتر وإستأصال ( جراحة )
ومادون ذلك مسكنات
والكي هنا العودة للمة والجمعو وجمع الكلمة والتوحد بعد فرقة ونفي كل ما يدعو للفرقة الشتات
تلاقي حد السيف
علي لُب الجرح نازف
بعد جواني يصبح
تاني براني
وعلاج الجرح الجواني قد يسبب لك جُرح تاني براني ويظهر على سطح الجلد مكان الألم الجواني
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: غِشيت يات من مدينة
لقيتا زي طمل الخريف طينة
مِشمر
جيتا لي وجع المخاض البر
مِتل موية الرِهاب
والوحل غطاني |
وكما ذكرت سالفا أن القدال وضع نفسه كأنه لم يحضر الحال الذي وصلت له البشر من ضنك وضيق العيش
ويتسائل عما حلَّ هم
يوقل غشيت يات من مدينة
وكلمة يات تستخدم في العامية بمعاني كثيرة
مثال يسأل إنسان من شئ كان جماد أو بشر فيول مثلاً ياتا اي ( ايهم لو كان المراد بنت .. انثى او مؤنث جماد )
ياتو ( لو المراد ذكر من جنس الرجال .. او مذكر جماد )
ويات من مدينة تعني كم مدينة وليست كل المدن
لقيتا زي طمل الخريف طينة
الطمل هو الوحل
مشمر .. جيتا لوجع المخاض البر
مشمر اي رافع جُلبابي لي الركبة حتى لا يتسخ من طمل الخريف طينة
جيتا لي وجع المخاض البر
الشاعر القال اتصف بهذه الصفة في نظم شعره بتر كلمة أو تقديم وتأخير وحكمة الله يجيد ربطها حتى تعطيك المعنى نفسه وهذه صفة ( ماعرفت اسميها في فن الشعر ) لكنها تروقني جداً وهواها عنده
والمعنى المقصود والله أعلم
جيتامشمر احمل وجع كوجع المخاضوانا قاصد البر
متل موية الرهاب
الرهاب معروف ... هو ما يرى كالماء عندما سطوع الشمس وهي عملية فيزيائية معروفة
والوحل غطاني
الوحل هو الطين
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: وقفتَّ أعاين في الخليقة
لقيت بتاوق جوة روحي
ضِهبتا في موج السراب
عَريان ...
وسط موج العَرايا.. |
والاستغراب يحوي كل أضلعي وأنا تجول في كل مكان من بلادي والخلق تغيرت وكل شئ تبدل بفعل الزمن والسبب ..الجائرين
وإن الله لا يبدل ما بقوم حتى يبدلوا ما بنفسهم
وبإيدينا نغرف السؤ وعليه يعاقبنا الله في الدنيا قبل الأخر أن يسلط علينا من لا يخافه ولا يرحمنا
وقفت أعاين في الخليقة ( البشر )
ويا سلاااام على هذا التعبير في البيت القادم
( لقيت بتاوق جوة روحي )
فهم قطعة منيوأنا منهم وما يمسهم يمسني ووجعهم وجعي ومعاناتهم معاناتي
لقيت بتاوق جوةروحي اي ارى نفسي فيهم معاناة
بتاوق : اي أنظر بشئ من خلسة
والغبينة غمتني ضهبتا
ضهبتا : اي رحت وضاع السبيل مني ( ضهبان اي ضايع ولا يعرف طريقه ) والضهبان معنويا هو الشخص المودّر )
ضهبتا في موج السراب عريان
وموج السراب يعني بها
والسراب والرهاب مترادفات
وضهبت عريان اي مجرد من ثيابي
وسط موج العرايا وهم الخليقة الشفتهم سبحت يخيالي معهم عريان كما هم عرايا
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: وسط موج العَرايا..
سألتا الجنبي قتلّو :
لحم وشيشك وين ؟
ضِحك ...
بين دمعو عاين لي الورايا
شفتا عُضامي
في دمعو المرايا ...
مشيت قِدامو ..
شفتا عضامو .....
في دمعي المرايا |
وانظر لهذا الخيال الخصب الذي متع به المولى هذا الشاعر القامة
وهو ينظر للناس ( الخليقة بعدو غياب وعودة )
قال
سألتا الجنبي
بعد أن رأى الناحفة في جسمه والوجه شاحب من نحول في اللحم وأصبح عُضام
قتلّو لحم وشيشك وين ؟؟؟
ضــحك من الغبينة والحسرة جواه ومن بين الدموع التي طفرت تحكي عن حاله نظر للشخص الذي خلفي ( ولسان حاله يقول شوف هذا يسأل )
وفي تلك اللحظة نظرت له والدمع نازل من عينيه فإنعسكت لي صورة وجهي الذي وجدته ايضاً قد غاب عنه وجافه اللحم وكانت دموعه لي مراية عاكسة
مشيت قدامو والدمع طفر من عيوني على تلك الحالة شفت عضامو في دمعي النزل
ما رأيت من الجمال مثل هذا لله درك يا قدال
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: فِرح فرحاً
فرح اللقى الرايحة |
فرح اللقى الرايحة
عادة عندما يضيع منك شئ .. تبدأ بالبحث عنه وينقبض قلبك وانت تبحث وتستجمع الذاكرة عنوة ورجاءا يا ربي وين يا ربي وين
وسيد الرايحة بفتش خشم البقرة ( اي يبحث عن الشئ الضايع منه في كل مكان وإن كان مستبعد )
وكانت الفرحة باللقاء
توازي فرح اللقى الرايحة
Quote: قعد وِحِيدي
في نص السهل دامع ...
بكيت بي الحيل ...
قدر ما الله أداني |
وقعد : اي جلست
وحِيدي منفرد في نص السهل ( نص السهل اي وسط السهلة والشهلة عهي المساحة الواسعة الخالية من مباني وقد يكون حوش البيت ... وبكيت بالحيل
بكيت بالحيل اي بكيت كتير
قدر ما الله اداني تعني بقدر ما استطعت
Quote: وقتّا يا أخواني
إن الطيبة غطتني
دحين كيفن تكون ..
الخجلة سالباني ..
وما مسك بطيب تاني
ما مسك بطيب تاني
إلا تلاقي حد السيف
علي لُب الجرح نازف
بعد جواني
يصبح تاني براني |
وقتا اي قلت
يا اخواني لو الطيبة غطتني اي شملتني من فوق راسي لي كرعي
دحين كيف تكون الخجلة السالباني اي من الخجل ان ارى هولاء البشر وما وصولوا إليه من حال يشفق فيه الكافر عليهم قبل بنو ملتهم
ولا أتفاعل معهم
وقد فعلت أخي الشاعر الكبير محمد طه القدال يا من تتفاعل مع كل زرة ضيم يتعرض لها أحد من أفراد الشعب السوداني
وأنت لسان كل مظلوم
لسان كل من سلبت منهم الحرية عنوة وقسرا
لسان كل من كممت أفواههم وانت تقول عنَّا وبلساننا البغلة في الأبريق
لا أسكت الله لك حسا ايها الشريف العفيف الثابت على المبدأ وصامد
حفظك الله للشعب ولاهلك المدهوسين عونا وسندا
ولله درك يا قدال
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
في تدشين ديوان الشاعر محمد الحسن حميد ( عليه رحمة الله )
أرضــــاً ســــلاح
قال الشاعر القدال
تجدني في شعر حميد كما تجد حميد في شعري وقولي
وهنا تمازج الروح في بدنين وهم واحد ( السودان وإنسان السودان الكادح ولا غير ذلك هم )
وقد كان الثبات على هذا المبدئ لشعراء الكلم
حميد
القدال
ودبادي
الكتيابي
محجوب شريف
هاشم صديق
وغيرهم كُثر وأسف لمن فاتني ذكرهم والله يعلمهم ( القابضين على الجمر من أجل هذا الشعب قولاً شريف ولا خوف في حق الشعب ...وضاقوا الويل من أجل ذلك جوعوا وشردوا وما خفي أعظم )
وقال :
نحن غُنانا لي الولد البسير قِدامو
ولي البت البتسند حيلو شادة حِزامو
نحن غُنانا في البلد البراشي غمامو
نطرى جمايلو حميد وجميل أيامو
ويــا حميد أقيف شوف الخِلوق محنانّا
كفكف دمعتك العبرة فوت خنقانّا
عسلك ســـال بحر فوقو النحل ونانة
يــات من ضاق غرف جازاك دبابير دانة
كلمات القصيدة
ساعديني في عز الهجير
في البردة والشوك ...
والوعــــر ...
يكفيني بشيرن نفير ...
والنشلّا من بيراً حجر
تستاهلي البُستان خضير
لا ريح .. ولا تباريح
وكـــــر ....
تستاهلي الخير الكتير
ما كل شر .....
في أُخريات الشوق
وتتشهّى النجوم النوم
وإتشهّى القمـــر
إيديك
قدر لبـــة عِناق ..
حوشة ضهــــر ...
بين راح وراح
عصرت نِسيمات السحر
لي بُرتكانية الصباح
والعنبر الفواحو فاح
لي العنبر الطفح الجِراح
أرضـــاً سِلاح
في إيديك مفاتيح الديار
كفينا
فرعين من خدار
مرفوعــــة ...
ماهن لي الاثار
لي هرعا .. لي طق الهشاب
دلّي فرع
خرتت ثمـــــار ...
لي ندها
بي دعا مستجاب ..
لي جدعا في نُقارة
ظـــــار ...
رمـــة ودع ...
لبسة سِوار
بشيرا عند سد المهر
بِريكا عند هيصة صُفاح
كفيك ...
تكافيّبا البلا ...
لي إضنيكي
من دوشة سِلاح
مشدودة لي مسكة كِتاب
فكيتي جررر
وفرتي من مصروف شهر
مرخية لي ختت خِضاب
مرسوم عليها قِليب حبيب
طمبور .. عصفورة وزهر
فواحو فاح...
سكسيك أصابع الجِنات
دنـــة دليب
وزنة وتر ...
ليلة سمـــر ..
لهـــواً مُباح ..
دايماً كما كل البنات
الطيبات بين الفريق
كُل البشر ...
خِلقن أصابع إيديكي لي
قبضة دقيق
رشـــة لبن ..
شورار مَــريق
خاشاهو ....
والنسام سحر
لي الفي المَتْر..
فازع صعاليق الفريق
بين بوخ وبوخ
النـــار تدوخ ...
ولا كلّا ولا ملَّ وفتر
شان لُقمـــة اولادو الســـغار
باري الزرازير ...
عووووووك ...
وكررررر ....
وبي جاي ...
علي دعت الشقوق ..
عازم شيوخ طير البقر
فوق البِطاح ..
عينكي ليك ...
كفيكي ليك ...
والفيكي ليك ..
إحتاج جناكي ..
شطر حليب ...
تحتاجي يـــما
صدر حبيب ...
العُشــــرة ..
قرّي البُطان
تحتاجي ..
مــا تحتاجي يومي
مع الصباح ....
من عافّي ..
من أمن وأمان ..
السترة في طول الزمان
تحتاجي .. ماتحتاجي صاح
يــا ريتو تجتاحي الزمن
او إنو يجتاحك وطن ..
لا صُرما .. لا هجمة وجِراح
لا كتمّا .. لا غُمة ورياح
نمـــد
إيدينا دايمن لي السلام
ولو عزَّ يا عزة المنام
ما لينا غير يم
من سماح ..
لا حيلنا ..
نكدح صباح ..
سودانا وإنساني ورباح
ارضـــاً سِلاح
حَمْ يا حمام
شيل السلام ودوُ البلد
قول لي الولد :
يا دمنا حب لمِنّا
بسمة وطانينا إنشراح
شيل همنا
وخلي القماح
عانينا كم ؟
أدمينا كم ؟
فرجنا في حالنا الأمم
وا لومنا
شان كُرسي السجم ؟
قشّا وبهم ..
دوشا ونهم
وهذا الوطن يا كيف براح
لي جنة لي أوسع مراح
مو كفى الورثنا
من الحُمم ..
الأسف الهرسنا من الحِمم
النزف الكبسنا
من الجِراح ...
أرضـــاً سِلاح
أنا نفسي مرة إرتاح
كفاية عَلّي عزيف
كوريقات الرياح
يا ملطم الوادي النزيف
في الفارغة ضاع العمر
راح ...
كجنتا كيف
يقع الوطن في حرب
أخرتا كوم
تقيف على شيك بياض
متشهّي أقالد لي أمي
أنـــوح
عند ضمي ..
لا هذا النـــواح الدمي
بين عُكن الجِراح
يا طمي...
من ريحة الرُصاص السُمي
صُنان الصُناح
شُري ألمي ...
ولا المُستراح ...
أرضـــاً سلاح
حَمْ يا حمام
لي غُناكا حَمْ
بين رشة الغيم
إستحم ..
مافي السموات إلا خير
الواطا هي المشقوقة غم
مسيوقة سم ..
مَطقوقة دم ..
مفلوقة بي النُخب القًباح
أدتني من وطني الفقر
وأنا مالي
ماحقو السفه
والسرقة والسف والصيوع
وأنا خالي صبار الصبر
وأدتني في زمني الدُموع
وأنا ياني تربال المتر
خلتني جـــوع ...
كتلتني بي العطش السجر
وأنا سقّا كُل هادي الربوع
وطني القنوع الإنظلم
زمني القبوع
تحت العُتم ...
لمّا الشموع
باعوا الظُلم ..
وطني اليصيدني جِراح الألم
ترا كيف فعل بيك النُخب
نُخب الألم
وطني الخشوع ...
كم لي العِلم
من ما ألم به العلم
وطن الصبر لآمن يغيييييز
وطني العزيز المحترم
بعد السلام والاحترام
بعد السلام عليكم
أثنيت بك فهم ,,,
وحد القلم ما بزيل بلم
وعلى كيفنا
ما كيف الرمم
يا نسوو سلام سوداني شم
فوق القمم ..
يا إما
يا نُخب الخبوب
زمم الهبوب النازفي دم
يا مستجدين النعم
يا ملثم جزم العجم
بي لُحاس موائدم إنبرم
نسى في نهم
ناسو العوئدم العدم
لا قدر الله الندم
يا اهل الصلاح
الصاحا صاح
أرضاً سلااااح
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: زمم الهبوب النازفي دم
يا مستجدين النعم
يا ملثم جزم العجم
بي لُحاس موائدم إنبرم
نسى في نهم
ناسو العوئدم العدم
لا قدر الله الندم
يا اهل الصلاح
الصاحا صاح
أرضاً سلااااح |
وكانت تلك قصيدة حميد المعروفة والشهورة
أرضاً سلاح
في ليلة تدشين ديوانه الأخير عليه رحمة الله
ارضاً سلااااح
ألقاها يومها الشاعر محمد طه القدال ويظهر في نهاية القصيد إنشاد معه
الشاعر حميد
الشاعر عبدالقادر الكتيابي
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
أحــــــلام الحُـــــزن الفــــــرعوني
قصيدة عن عادة خِتان البنات
===================================
الحزن الأول
بحر المالح
سيلاً ضرع وموجاً فرع
مـــن الشام ...
مِناك لي السهلة النجدية
يا وادي الزِنج ..
الأم البكر الزِنجية
لو أخر خيمة إنكجت
كانت ركزت فوق سنار
لي ريحة القلوة العربية
كانت فابريكة بُن
كانت مشتل أبنوس
كانتفي الشعر القرقد
القايم شتلة تجاور
الشتلة ....
التفل الروث
كانت في الطبع الحار
الريد الحار
الحزن الحار
الحزن ...
الجن الأحمر ...
كان مهووس ....
والحُلم التاني
من الفسطاط ....
الخيل في الخيل
لي فاطمة أم حِجل العرجون
الخيل مِرحات ..
والنَوق مِرحات ..
الخيل الدفرت
دفرت وادي صعيد أسوان
لي البت الخِصبة الزِنجيـــة
والنوبة تصيح
لي حلفا نبيح ...
لي النهد السابح
فوق الريح ..
لي العِشق الساخن والجاي
الخيل الدفرت
فاتت دُنقلا دون لجاي
والمد التالت
غاشي الدامر بالعطرون
النار ما حرقت
دار شنقيط
النار ما بتحرق
وادي الزنج ..
النار ..
النار آ بنية
يا بنية الزنج العربية
يا بنية العرب الزنجية
النار في النار ..
نيران ألوان ..
شيتن قرآن
شيتن يا حليوة
الحزن الجاكي يكون
غَبيان ..
شيتن في الفرح ..
التايه فيكِّ ...
كذا الضهبان
شيتن في قليب الجدية
الرُخص الهشة النية ...
النار النار آ بنية
يا بنية الزنج العربية
وبنية العرب الزنجية
الريد الليك متحمّد
سركي مسوكر ..
جاك آ بنية
بلا عنوان ...
والحُلم التاني
التربة الأولى
الموس ..
الشفرة الصغرى ..
الحُلم التاني
التربة الكُبرى الموس
الشفرة الكبرى ..
الوجع .. الكبرى
السِتر العار ..
العار الشهوة إنبهلت ..
إن المؤودة إنسألت ..
يا ووب القطنة الطلعت
يا ووب القطنة الرجعت
يا ووب الوجع النوّح
وروّح ...
روحاً مرقت ..
تردح يا فرعون ..
يا ووب الأم الجاضي حشاها
الإيد في السما
والعين في جناها
الرحم إنشقّا
يا ووب الضاقت في الميلاد
سِتراً مكشوف غتيها
البت يادوب بكريها
ألحق يا الطايل باعك
ندهاك في الضيف
ألفى الدركان في سراعك
سهل في الحوبا حشاي
برد في الحارة قساي
ومرقت
دخلت
مرقت دخلت ..
صلت ندهت كتمت سكلت
إن المؤودة إنسألت
واللهبة الهبلت
المهلا آ ناس
المهلة تطير المهلة
الهلة متين ألقاها
السهلة متين ألقاها
المهلة حليلة
السهلة حليلة
البلد الحجر الطير
وباي
الريق نشفان من القوقاي
وكان في الحلة
الناس بتجض
اللوز في القطنة هناكا يجض
البسمة إنبهتت
نزلت دمعة ..
وفوق لي الدمعة
عيون بتجض ...
وداكا اليوم ...
مسيخة حليوة يا فرعون
لهيب بِيبُق
وقالوا قبيلا
كُمسيد الغبين بِشُق
ألاف الألوف رايح
آكال الكتوف رايح
البمسي فوقموج البحر
والببلع السيخ والحجر
ويا الدمع النزل في الحارة
دُميع الرُجال غلاب ..
ويا الغُبن الوقف في الحلة
شوكـــة حُوت ..
اكون حزناً
فدر في رُجالنا ..
مو كضاب ..
اكون حزناً فدر
في رجالنا
مو كضاب
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: أحــــــلام الحُـــــزن الفــــــرعوني
قصيدة عن عادة خِتان البنات |
الختان
ختان البنت
وحكمه في الشرع
لم يرد حديث صحيح في هذا الموضوع
لكن ورد حديث الفطرة
وهي سبعة وورد فيها ختان الذكور
فلو كان ختان البنت سنة ( كان ذكر في حديث من الفطرة )
كانت هذه العادة تمارس في جزيرة العرب ولهم الأسباب التي هدتهم لختان البنت
في تلك المناطق الحارة تكون بعض أعضاء عضو الأنثى كبيرة وطويلة في الحقيقة بالذات البظر
وخوفاً من أن يثير البنت عند أحتكاكه بالملابس الداخلية كانوا يقطع منه بالختان قليل
ولذا نجد في السودان أن عملية أن يقطع جزءمن البظر تعرف باسم ( الطهارة السنة )
وقد ورد في حديث لا اعرف تصنيفة في تبويب الحديث ( قد يكون حسن ) قد مرَّ رسول الله صلى الله عليه وسلم بأمرأة تختن في طفلة قال لها أخفضي ولا تنهكي
لم يقرها على الفعل ولم ينهها ( ويستند من يقرون ختان البنت على هذا الحديث )
هذا القول لا يستوي
لو كان الختان أو قطع جزء بسيط من البظر سنة لكان ورد في حديث من الفطرة
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
الخِتان
عرفنا نوع الختان الذي يسمى سنة وهذا دخل السودان من الجزيرة العربية
الخِتان الفرعوني
وهو أبشع أنواع الخِتان
وسوف نغوص في كيفيته
وقبل ذلك لابد أن تعرض كيف دخلت الطهارة الفرعوني ( وفي الحقيقة هي طهرة بل إعاقة )
يقال أن الكهنة جاؤوا لفرعون وقالوا له أن ملكك سوف ينتهي على يد طفل يولد في بني اسرائيل
ألتمس منهم الحل
فأشاروا له بالخطة أن يقتل اي صبي يولد
بعدها وبعد مشاورات بينهم خلصوا أن يقتل كل صبي يولد في السنة دي
ويترك الأطفال اللذين يولدون في السنة القادمة
وبعدها بدأوا التفكير كيف يمكن أن يعرفوا ان الاسرة الفلانية ولدت ولد
وجاءت الفكرة من وزيره القاسي هامان
أن تختن المرأة بتلك الطريقة البشعة وعندما تحمل لا تستطع الولادة من غير مساعدة
وعينو القابلات ( الدايات ) عن طريقم وان تبلغ الداية عن نوع المولود
ومن هنا دخلت الطهارة الفرعوني وصار من يومها اسمها الختان الفرعوني
كيف ؟ هذا ما سوف نوضحه في المداخلة القادمة
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
الطهارة الفرعونية ( كا تسمى )
وفي من البشاعة ما تقشعر له الأبدان
اولاً تمارس هذه العادة في معظم بلاد السودان بالذات في الشمال بدرجة كبيرة
وكأن فرعون هذا سوداني
وفيها من الوحشية أستغرب كيف من تقوم بها ( الداية ) تحمل كل هذا العذاب الذي يجري على يدها لطفلة
فيها ::
يبتر ويقطع البظر ( مكمن الشهوة العالية للبنت ) وهنا افقدوها لذة المتعة بقطع هذا الجزء من جهازها التناسلي البظر في البنت
بمثابة رأس الحشفة في الرجل
وفيه من الأعصاب ما يمتع المرأة في العملية الجنسية ( بالطهارة تفقدها )
قطع ( حش ) الشفرات
الشفرة الكبرى وهي خارج الجهاز
والشفرة الصغرى داخل الجهاز
وبعدها يخاط كل الفتحة ( الشق ) ويترك فتحة صغيرة بمقاس حصوة التمر ومنها يخرج البول ودماء الطمث معاً
والوضع الطبيعي هنا ان ترقد الفتحتان ( فتحة البول ... وفتحة التناسل ) مستقلتان اسفل الشفرات الصغرى فيخرج البول لوحده ودم الطمث لوحده
ولا ألتهابات ولا يحزنون ...
وهذا الشئ يؤثر كثيراً في الأمراض التي قد تؤدي لعدم انتظام الدورة ولا قد تؤدي وتؤثر في انتاج البويضات
بالالتهابات التي تنتقل للرحم ومشاكل الختان الفرعوني كثيرة
كل اجزاء الجهاز التناسلي ذات حساسية عالية تساعد في الإثارة عند المرأة حين تماس العملية الجنسية
فكيف إذا قتلت اعصاب الحس فيها
الوضع الطبيعي هو خلقة الله
وما تسمع قول من يقولون انها عفة وطهرة للبنت
أكانوا هم أعلم من من خلقها .. ولم يرد ان تختن
ول قالوا انها ضمان
العكس هو الصحيح
البنت الغير مختونة هي التي لابد ان تكون عفيفة
فض بكارتها ( غشاء البكارة ) هو دليل عفتها
لكن البنت المختونة ممكن أن يكون فض غشاء بكارتها وعند الزواج تخاط من تاني وفي ليلة الدخلة ينزل دم من الجزء الذي خيط
وكيف لك يا شفت تعرف هذا الدم من غشاء البكارة ولا من الجزء الذي خيط
عاوز تقول لي أنو دم غشاء البكارة أحمر قاني
طيب يا شفت في اليوم داك وفي اللحظة ديك انت بتقعد تقارن ومن وين تلقى دم الجزء الذي خيط عشان تقارن دا بنزل مع بعض
فوق يا غشيم يا من تعلق في شماعة الطهارة اشياء غير منطقية
الأصل ان تبقى كما خلقها ربها
وفوائده جمة
تفادي الامراض
متعتها الكاملة
طهرتها وعفتها
ولا مشاكل في الولادة
ختان البنت جناية جناية وعذاب لها وحرمان من متعتها
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: الحزن الأول
بحر المالح
سيلاً ضرع وموجاً فرع
مـــن الشام ...
مِناك لي السهلة النجدية
يا وادي الزِنج ..
الأم البكر الزِنجية
لو أخر خيمة إنكجت
كانت ركزت فوق سنار
لي ريحة القلوة العربية
كانت فابريكة بُن
كانت مشتل أبنوس
كانتفي الشعر القرقد
القايم شتلة تجاور
الشتلة ....
التفل الروث
كانت في الطبع الحار
الريد الحار
الحزن الحار
الحزن ...
الجن الأحمر ...
كان مهووس .... |
كيف دخلت عادة الخِتان لبلادنا ؟
هذا هو السؤال الكبير
هناك عادات محلية وعادات مكتسبة
كيف تكتسب العادات ؟
تدخل بطرق شتّى
* عن طريق كل الجيوش والحملات التي غزت السودان أو حاولت ذلك ودحرت
* عن طريق الأختلاط .. شعوب التماس مع كل الدول التي تحد السودان حدودها ( السودان بلدتحيط به دول كثيرة )
* عن طريق التجار والتجارة هي اكبر عامل تمازج ( للثقافات .. العادات .. )
* الهجرات من دول الجوار
السودان من الدول التي أختلطت بالكثير من الشعوب من دول الجوار ومن دول أخرى
نجد مثال ( من الشعوب التي عاشت في السودان )
الأتراك
الألبان
اليوانانين
الأنجليز
الهنود
المجريين ( شعب دولة المجر )
السورين
أكراد
اليمنين ( بل نقول عامة عرب الجزيرة العربية خلال كل الهجرات من هجرتي الحبشة ودخول عبدالله بن ابي السرح )
وكل شعوب دول الجوار ( مصر .. ليبيا .. اثيوبيا .. الصومال .. أريتريا .. كينيا .. جيبوتي .. شاد .. نيجيريا .. افريقيا الوسطى وغيرها من الهجرات الصغيرة والتي لم تظهر للسطح )
كل هذا الأختلاط نقل لبلادنا الكثير والمثير
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: الحزن الأول
بحر المالح
سيلاً ضرع وموجاً فرع
مـــن الشام ...
مِناك لي السهلة النجدية
يا وادي الزِنج ..
الأم البكر الزِنجية
لو أخر خيمة إنكجت
كانت ركزت فوق سنار
لي ريحة القلوة العربية
كانت فابريكة بُن
كانت مشتل أبنوس
كانتفي الشعر القرقد
القايم شتلة تجاور
الشتلة ....
التفل الروث
كانت في الطبع الحار
الريد الحار
الحزن الحار
الحزن ...
الجن الأحمر ...
كان مهووس .... |
قد صور لنا الشاعر محمد طه القدال
كيف كان دخول الطهارة الفرعونية
يقول
الحزن الأول كان مد
والمد : هنا يعني بها أمداد جاء بطريقةأو بأخرى ودخل السودان
وجاء عن طريق البحر ( البحرالأحمر )
من الشام
من نجد
السهلة النجدية
ودخل السودان عن طريق البحر الأحمر
السهلة النجدية ( نجد )
واين قاصد
وادي الزنج ( الســـ و دان اي بلاد السود )
قاصد بنت بكر زنجية
وتعمق ووصل لعند سنار ولولا وعرة الطريق لكان شقَّ الطريق جنوبا
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: والحُلم التاني
من الفسطاط ....
الخيل في الخيل
لي فاطمة أم حِجل العرجون |
وركز لجزيرة العرب بالفسطاط
والفسطاط هو الخيمة
وكما رمز لها بالخيل في الخيل
الخيل جاية وشايلة لفاطمة السمحة العرجون ( الصغيرة ) ماساة وهي تقطيع أحشاء فرجها بتلك العادة الزميمة التي لا يرضاها خُلق ولا دين
Quote: الخيل مِرحات ..
والنَوق مِرحات ..
الخيل الدفرت
دفرت وادي صعيد أسوان
لي البت الخِصبة الزِنجيـــة
والنوبة تصيح
لي حلفا نبيح ...
لي النهد السابح
فوق الريح ..
لي العِشق الساخن والجاي
الخيل الدفرت
فاتت دُنقلا دون لجاي |
الخيل مِرحات
المراح هو القطيع
النوق : الابل
الخيل الدفرت : اي هبت في سيرها واسرعت
يقال دفر الحصان اي اسرع وفات رفاقه من الخيل
البت الخصبة اي الصغيرة وفي عمر الزهور وهنا يعني أعتبار ما حا يكون
اي لو انها ما ختنت لكانت ذادت خصوبتها في الولادة وما تعثرت ولادتها
ومن هذه العادة تأذت بلاد النوبة ( صعيد اسوان )
وحلفا ( وادي حلفا )
وتعمقت تلك العادة لحد دنقلا وجاي منها جنوبا
وقدقسم القدال الهجرات التي حملت تلك العادة وفي الحقيقة سواء كانت هذه مسالكها التي دخلت بها او دخلت من مسالك أخرى
فالحقيقة انها دخلت فعلاً من دول كثيرة وابشعها الطهارة الفرعونية
| |
|
|
|
|
|
|
|
|
|
Re: يـــــــــا من ملكت جُل جِن وادي عَبقر ( محمد طه القدال ) .مفردة ع (Re: خالد علي محجوب المنسي)
|
Quote: والمد التالت
غاشي الدامر بالعطرون |
وكان مسلك المد الثالث داخل من المغرب العربي غاشي الدامر يحمل ( العطرون ) والعطرون هو تراب صخري له خاصية تحليل اي مادة
لذا يستخدم في هرد بعض المواد عندما تطهى مثل الخدرة والفاصوليا وغيرها وكما يتسخدم في تطمير التمباك ( الصعوط )
وهو مادة محلية غير صناعية
Quote: النار ما حرقت
دار شنقيط
النار ما بتحرق
وادي الزنج .. |
النار ( الطهارة الفرعونية حرقت بلاد شنقيط وهي في مورتانية ) والنار جات تحرق وادي الزنج ( السودان )
Quote: النار ..
النار آ بنية
يا بنية الزنج العربية
يا بنية العرب الزنجية
النار في النار ..
نيران ألوان .. |
جاتك النار آ بنية يا مسكينة ( ختان ) والغريب في الأمر تتمسك النساء بالختان أكثر من الرجال
يا بنية العرب الزنجية وبنية الزنج العربية
وهذا هو هوية السودان خليط من عرب وزنج وكان الناتج هو الإنسان السودان ذو الهوية الخاصة شديد لا هي عربية خالصة ولا هي زنجية خالصة
فهو سوداني وكفى وهذا للقبائل التي أختلطت واما القبائل التي لم تختلط فهي زنجية خالصة
ويكفي الجنس سوداني وكل السودانيين اخوة لحم ودم وفي يومنا هذا قلَّ ان تجد قبائل ما أختلطت واصبح حالة التميع والإنصهار غالبة في السودان
والقبيلة الوحيدة التي لم تختلط ببقية البشر في السودان ( هم الرشايدة )
لكن كل البلد أصبح في بوتقة واحدة نسب وانصهار ودم
وجاتك يا بنية أشكال كثيرة من النيران بدخول هذه العادة السيئة ( الختان الفرعوني )
Quote: شيتن قرآن
شيتن يا حليوة
الحزن الجاكي يكون
غَبيان ..
شيتن في الفرح ..
التايه فيكِّ ...
كذا الضهبان
شيتن في قليب الجدية
الرُخص الهشة النية ... |
غبيان: اي غير مدرك للحقائق
تايه : ضايع
الضهبان : الإنسان التايه وما عارف راسو من رجلي
هش .. سهل الكسر
ني : هنا معناها صغيرة ولسع ما بلغت سن النضوج
Quote: النار النار آ بنية
يا بنية الزنج العربية
وبنية العرب الزنجية
الريد الليك متحمّد
سركي مسوكر ..
جاك آ بنية
بلا عنوان ... |
جاتك نيران يا بنية نيران تلهلب يا بنية العرب الزنجية وبنية الزنج العربية
جاك هذا المرسل لك من بلاد شتّى
متحمد : اي قاصدك عديل
ومعنون لك في بريد لا يضل
مسوكر اي مغلق ومختوم كخطاب حكومي مرسل لك بدون عنوان لعامة بنات سودانا
| |
|
|
|
|
|
|
| |
خالد علي محجوب المنسي
الفاتح ميرغني
يسرى معتصم
Muna Khugali
فيس بوك
تويتر
انستقرام
يوتيوب
بنتيريست