|
Re: د / أحمد طراوة ___ فى ندوة عن تاريخ الغناء فى السودان . (Re: أحمد طراوه)
|
تعرف يا أحمد ، وعلى ذكر التم تم ، كنت أستمع بمزاج لأغنية غزال الروض بصوت الكابلي ومعه المجموعة الأثيوبية التي أوردتها طيبة الذكر الممكونه ، أعتقد أن التم تم إيقاع كفيل بهز حتى متبلد الإحساس . من أجمل الأغاني التي (تفوق) فيها التم تم كانت من بف نفسك يا القطار ، صاحبك اب احمد من عاشقي التمتم وعليه لحن (المقدَرَه) ن قال لي قريب منكم جاي حفله في تورنتو، لكن صدقني التمتم اللي عملو في (هوى الخلخال) تفوق فيه على نفسه ، ووالله لو لم يغني عاصم سوى هوى الخلخال لكفته، لأنه أداها في تسجيل منذ عامين في سي دي لن يستطع هو نفسه تكراره. سلام تاني لعهد ووحياة ابتسامتك ، شكرا للوفاء للأخ العزيز الراحل د.علي فضل وقد زينت صورته والشهيد القرشي هذه الصفحة.
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
.. هات يا زميل ! ويا ناس الدنيا ، بالله استزيدوا باغنية وصف الخنتيلة علي نهج و طريقة عبد الكريم عبد العزيز ( الكابلي )
وحقا فقد كان ابو صلاح سندباد التعابير الجزِلة و صاحب الاجتراحات علي صعيدي صدر البيت الشعري و عجزه !
" روحيتي قتيلة !!! " .. تعابير جميلة لدرجة الغرابة لا عين رأت ، و لا أذن سمعت !
.. و اخذتنا بعيدا مقطوعة الصول ذرب الالحان ود بادي .. خليفة سيد الدايرة الصول الكبير عبد القادر عبد الرحمن " رائد التوزيع الاوركسترالي في السودان : ( ود بادي ) محمد اسماعيل بادي ... بديع في مقطوعة رقصة الجمال الموسيقية !
فراسخ من ضرب النحاس الاصفر ( الق البراسات ) ! .. ترامبونات تطن و ترمبيت يصدح و يئن ، و كلارنيت قد تجلي بادي للعيان
.. وجميلة ايضا عند صول المزيكا العسكرية محمد بادى ، تلك المقطوعة المسماة ( مامبو نص الليل ! ) !
جيبا يا معاوية .. جيبا ليلا او نهارا .. بس هات يا زميل ..
.. و هل اتاك حديث عثمان المو ؟ في تلك الاغنية ( جنة الانغام ) اللتي تؤرخ لاشراقات و طرائق جماعات الجاز السوداني فيما بعد زيارة الشهبندر لويس أرمسترونغ للسودان آناء مطلع تلك الستينات من القرن الماضي .
.. هات يا ود عثمان .. بنرجاك يا زميل على خط ود الامين ناس فرقة جاز عطبرة بقولوا ليك : هم النسونا قالوا ما نسونا !
.. او كما يقول ود حامد المرتضى بوكالة عاصم البنا قول ود الرضي:
" لا تكون شكواي موية في غربالِ "
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
يا ود حامد بنهدي ليك صورة جون لي هووكر !
.. لانو بشبه اظرف مجانين ام درمان و اكثرهم غرابة و إثارة .. الزول داك الاسمو ( طالبني كم ؟ ! ) و قد تناقصت قدرات طالبني كم العقلية يوما بعد الآخر تحت ضغط ذلك الوهم Delusion الذي ما انفك يحدثه من داخل فراغه العريض بانه جنرال يقود قوات دفاع السودان المتكتلة مع قوات الحلفاء في مواجهة النازي التلياني موسيليني نواحى بلدة كرن بشرق السودان .. كان طالبني كم يضع كاسكتة .. و يقبض غليونه باسنانه البيضاء و يتدرع باحزمة الجبخانة الفشنك .. ثم ياتي باحاديث و كلمات الانجليز المتناثرة و يمارس طقوس العظمة التي اسعدتنا كثيرا
.. و ياليت الاريب الحكاي استاذنا عبد المنعم خليفة يتعطف علي بوست ناسنا بقصة ( جنرال المديرية ) .. ذلك الرجل الانيق البديع في لبسته العسكرية .. و الذى كان يجوب الخرطوم نهارا متصيدا مرافق الدولة الهامة و فندق السودان .. و ظل يُحظي بمحبة و استلطاف الجميع و علي راسهم الزعيم الازهري و عبد الخالق محجوب
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
.. و لا نزال نتفيأ اغصان خميلة ود الامين ألإزيرق المدي الزمني - الغنائي 1940 ---------- 1970
محمد الامين :
* مدرسة التكثيف الموسيقي - الاوركسترالي * مدرسة العفق الدقيق المعقد The Fingering * مدرسة إستنطاق العود .. و إخراج كل الدرجات البينية لمقامو الخماسي * مدرسة المقام الكبير و السلم الكامل ذو النكهة السودانية * مدرسة الاغنية الكبيرة و الاستماع الجديد الراقي * مدرسة عود السودان الذي تحرر نهائيا من إسار التخت العربي و صار قائدا للأوركسترالية * مدرسة المواصلة علي خط مجاهدات التوزيع الاوركسترالي
.. سوف ياتي ود عثمان يلوح بجميل الاغاني
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
.. ألفية صالح عبد السيد ابو صلاح في ذات عظمة الفية الامام مالك
بدور القلعة : و هي قلعة صالح جبريل في ذلك العمق الجغرافي - الامدرماني .. وقيل ان ذات الحسناء قد قال فيها عمر البنا : " يا خلاصة حُسن الغانيات في ام در .. هلكني هواك يا نفيسة الدر "
.. وقد كان الراحل علي المك صريعا لهوى ذلك التعبير الفريد لابوصلاح ، بما فبه من تورية و ابعاد و تراكيب متداخلة:
" هالكا صالح (ابوصلاح) كل ما ينظرا .. وفي مدينة الجوف ساكنا الضرا "
.. وفيها رفيع القول علي خط شعر الاخوانيات :
" عبد الرحمن دمت مُظفرا .. في نعيم و حظوظ متوفرا "
شعر جميل وقع في يد عبقري الالحان : عبد الكريم عبد الله مختار الذى عرف بكرومة .. فإنفتحت سيرة الغناء الجاري عبر الازمان
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
.. نهدي مخارج اوتار عود ودالامين الناطقة بميلودي كرومة الاول الي روح: * وهبة محمد سعيد : ممسكا بذلك الاوكورديون ابو زراير الاثير .. وقيل ان اول صولو موسيقي في تاريخ الغناء السوداني قد كان عزف وهبة عام 1928 للحن اغنية جدي العزاز الجيدو قزاز ، و تسجيله للصولو في اسطوانة فحم لدى شركة اوديون بمصر
يطلق الراحل دمتري البازار صيحته الفريدة تلك : " أحسنت " !!
جلية واضحة و جميلة في اسطوانة شركة ميتشان وذلك عندما ينهي وهبة صولو لزمة الختام و القفلة الموسيقية في اغنية زهر الرياض في غصونو ماح !
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
.. عزيزنا ياسر شبيكة :
عارفك دايما طاري ليالي العِشة .. وفي الحِلة هبوب الرشة !
.. ودي قصة غنا السودان اللي ماعندها اول و لأ آخِر ! .. وزي ما قال جدك المؤرخ جليل القدر مكي شبيكة :
" قصة السودان عبر القرون ! "
معاك ايها الامدرماني المطبوع بنهدي مرة تانية مخارج اوتار عود ود الامين الصادح بملوديا كرومة ، بنهديها لروح الراحل السر عبد الله
.. السر عراب كمنجة السودان الاول .. رائد دوزنة الكمان و الفيولين الاروبي علي نحو خماسي سوداني .. كمنجة خماسية الهوى عزف بيها خلف كرومة و سرور علي مدى و آناء تلك الثلاثينات من القرن الماضى !
.. اصلا السر بدا كعازف للكرار ( طمبور اثيوبيا ) .. تعلم من بعد ذلك الكمنجة و الصفارة و عزف القِربة ! كمنجتو بديعة مع اسماعيل عبد المعين في اغنية : حجبوك يا ضؤ القمر ! والينا يا معاوية
.. توفي السر عبد الله في يونيو 1956 بعد مجاهدات موسيقية ضخمة و واسعة رافق خلالا سرور و كرومة و برهان و ابراهيم عبد الجليل و سافر مصر للدراسة و تسجيل الاسطوانات .. و وصل مع الكاشف و سرور واحمد المصطفى لطبرق عابرا الكفرة اللي نيرانا زي جهنم دعما لقوات دفاع السودان المرابطة في انتظار ثعلب صحراء العلمين النازي روميل
.. توفى السر بعنابر مستشفى امدرمان الاميري و الاذاعة تواصل ذلك الاعلان التراجيدي : السر عبد الله .. احد اعمدة المزيكا السودانية لا يزال في حوجة ماسة و سريعة لمزيد من الدم فصيلة ( أو - سالب )
.. بالله يا ناسنا .. جيبوا لينا صورة السر تلك ممسكا بالكمنجة الاثيرة .. وصدق من قال : المؤمن بسلاحو
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Moawia Mohammed)
|
يا يا يا معاين من الشباك ... انشق نهر النيل نهر التاريخ انشق يا ياسر شبيكة ليخرج ذلك الصوت . يلون الأرض بالورد والاناشيد والتواشيح والأنغام .. ... التحية للشاعر فضل الله محمد .. والف مرحب أستاذ ياسر شبيكة .. _______
الأخوان معاويه / محمد عثمان / د طراوة والله حزين جدا حتى الان الكمبيوتر فى الانعاش الكميوتر تعبان شويتين يحتاج بعض البرشمات والسمكرات المهندس الصينى قال الكمبيوتر ده قليبو رهيف ..و فى موسم الهبباى بعمل حركات ..
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
.. يا غالي ليك هوينا .. الشباك بشهد لينا ! نوع من الاراجيز الشعرية الجميلة ، الرجز الشعري الفارق تماما ضوابط و قيود الفراهيدى و ابو الاسود الدوؤلي !
نوع من الرجز و التفعيلة و الجرس الشعري قابِل للتوطين الكامل في جملة لحنية من نوع المقام الخماسي الواصل للدرجة السادسة !
.. و قيل ان لحن يا معاين من الشباك بطرح بوضوح قدرة ازرق المزيكا السودانية ( ود الامين ) في الذهاب بالمقام الخماسي السوداني درجة الخصوصية وسط العالم العربي - الافريقي
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
المكان : حي الركابية بامدرمان الزمان : خريف اغسطس 1938 المشهد : كرومة في احدى بيوت الاعراس ( بيت اللعبة ) .. وحشد من الجماهير الملابسات : كرومة يسترسل في كسرة تلك الاغنية الاثيرة ( الرشيم الاخدر) الموضوع : مطلب جماهيري ضاغط بعد حالة نشوة جماهيرية عارمة من الق تلك الكسرة التي تقول : احب غزال النيل .. يا جميل ، مطلب جماهيري بان يؤدى كرومة اغاني عبد الرحمن الريح الجديدة ذات الاصداء الواسعة
.. هنا .. و لاول مرة ينتقل كرومة لساحة أغاني عبد الرحمن الريح .. و بضغط جماهيري برز تحالف كرومة عبد الرحمن .. ذلك التحالف بعيد الاثر في تغيير مسار حركة الغناء .. هنا برزت صورة جديدة لعلاقة النقرزان الصادر من تامبورين كرومة ( رق كرومة ) ، مع تفعيلة عبد الرحمن الشعرية الجديدة !!
.. هنا برزت الجملة اللحنية الجديدة التي كسرت رتابة ميلودى الستين اغنية الاولي منذ فجر تلك العشرينات
.. هنا غنى كرومة خداري .. وجاني طيفو طايف
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
.. و صار عبد الرحمن الريح صاحب الٌقيثارة و النهج الشعري الجديد .. صار كمثل وضاح اليمن و ديك الجن .. ذاك المتغزل الذي لا تحده حدود :
" خدودو كالقطائف .. و ليهو العنب شفايف "
.. كرومة يوم واقعة الركابية اضفي لونية خاصة علي لحن عبد الرحمن الريح الاساسي لاغنية جاني طيفو طايف ! لونية خاصة بسبب الرق و نقرزان ضربة الرق ، و برضو بسبب تفانين تور كبير و عبد الرحمن حمامتي بوصفهم شيالين مع كرومة ، شيالين من الماركة البرنجي ..
.. ود الامين لاحقا قام بإحداث بناء جديد .. بناء اوركسترالي كامل مشحون بالجمل الموسيقية و اللزمات و المقاطع اللحنية الكاملة .. ود الامين قام بعمل :
" توزيع اوركسترالي فريد لتراث عبد الرحمن الريح و الكروان كرومة "
.. بالله يا اهل الاستماع .. ارخوا السمع ، و عيشوا تفاصيل و جماليات المزيكا و الاداء ..
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
لله درك يا معاوية .. سوق الادب بيك إنعمر و جاتو العافية !
.. و و الله اني لاقول و اعيد :
لو ما محمد عثمان و معاوية ، البوست دا ما بتقوم ليهو قايمة .. ديل اخوان الصفا .. اخوان فاطنة و سُترة حال بوست عثمان ود موسي
.. و إنفتحت سيرة كرام الراحلين :
- عبد الرحمن الريح قيثارة الاربعينات .. بنية حلوة في مسقط شافت صورتو معلقة يوم محاضرة عنو ، قالت و الله انا ما قايلاهو مشلخ بالطول ( بتقصد مطارق )
- برعي مدرسة العود اللي ما انعرف سرها بعد ! ليهو وردي شال أغنية الوصية و مشى لبرعي ؟ !
- قمندان الغنا القديم .. صاحب الذاكرة الضخمة .. ابراهيم احمد عبد الكريم
تحت ظلال ود الامين حنقول باسم البوست و باسمكم نعينا فيهم .. المجد لكل من وضع طوبة في صرح حركة الغناء السوداني .. صرح زي برج ايفل و زي قصر الرشيد
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: أحمد طراوه)
|
Quote: .. في سنة 1928 ، بدأ عبد الرحمن الريح ينهل من ادب خلوة الفكي احمد عبد الرحيم ، مترقيا الي خلوة الفكي احمد جابر جد منسوب حي العرب الفنان المبدع ( احمد الجابري ) |
سلاااااااااااااااااام
و يحلو الحديث عندما يكون عن شاعر و ملحن فى قامة العبقرى عبد الرحمن الريح الشااعر الاتى من القرير البلد التى خرج منها الكثير من المبدعين ابتدا من حسن الدابى و على عبد القيوم و السر عثمان الطيب و القائمة تطول و تطول....
دكتور طرااوة نتمنى ان يكون الحديث عن ملك الطيور عبد الرحمن الريح مفصلا لعدة محاور بداية من بداياته و نهاية مع تجاربه المختلفة مع المجموعة الماسية من الفنانين..كمثال يمكننا ان نتحدث عن تجربته مع حسن عطية و اغنياته و ايضا مع ابرااهيم عوض و التاج مصطفى و الجاابرى و رمضان حسن و ابو داؤود و ود المقرن..حتى ايضا يمكننا التطرق لتجاربه الاحادية مع مجموعة من الفناين اسعد الاياام مع وردى..و كان بدرى عليك عمر احمد و التجارب الاخرى...
كاقتراح حتى يكون الحديث مرتبا و متسلسلا اقترح ان بنبدا الكلااام بتجربته مع الفنان حسن عطية و اغنيااته المختلفة التى تغنى بها امير العود و ايضا يمكننا ايضا ان نقوم بانزال بعض النماذج من هذه الاغنياات... و بعدها يمكننا ان ننتتقل الى تجربته مع فنان اخر ويمكن ان يكون ذلك حسب التسلسل الزمنى....
و نوااصل مع دكتور طراااوة...رحلة النغم الجميل مع ملك الطيور عبد الرحمن الريح...
و معاااكم لاخر المشواااار....
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Moawia Mohammed)
|
.. يا سلام يا معاوية
.. ود الامين علي صعيد الثورة و وهج الطلقة النارية .. المنو بتشتعل نيران الحرية
.. و اصل الحكاية : إنو الرئيس غريب الاطوار جعفر نميري في أواخر يوليو 1971 ، قام حبس محمد الامين و محمد وردي و منع اغانيهم في الوسائط الاعلامية .. بسبب انهم ساندوا هاشم العطا !
.. ود الامين بعد 14 سنة قال لنميري كلام محجوب شريف :
" نغرد في زنازينك .. نغرد نحنا في اسرك .. و ترجف و إنت في قصرك .. ما حيلة قوانينك .. سماواتك دخاخينك !! "
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
.. إليكم يا اصفياء يا أحباء في نواحي كندا: غردوا و تنقلوا كالعنادل في اغصان شجرة الغناء الباسقة .. الميلودي الاصيل المضمن في غنائية عاصم البنا .. وصلتني المذكرة الهاتفية يا عمار يا حفيد الفقير لله (غرة العينين) .. سارد عليكم غدا .. هي و الله دعوة كريمة و مقبولة .. و قولوا لعاصم قول ابوصلاح : بلغ الاقوال يا هلال شبيهك جسمي إنقلا .. و مين يصدق دي و يعقلا
و تعود سيرة عود السودان تطرح نفسها ! في سر العلاقة ما بين عود خليل فرح .. حسن عمر سوميت عبد الرحمن الريح .. الامير ابو علي ، يوسف الشيخ .. برعي .. ود الامين و المتميز عادل صديق !
.. و يبقى الراحل حمزه علاء الدين بلبلا غريب الديار و لكن شديد الانتماء لعود السودان المدوزن علي نهج عبد المعين و عبد القادر سليمان .. حمزه الذي كشف اسرار و خفايا موازير طار مروي و نبتة القديم .. و امسك بموازير عود السودان المتحرر من مقامات جزيرة العرب من : نهاوند و صبا و ورصد و حجازي و بياتي
.. حمزه الذي جائه فرانسيس فورد كوبولا مخرج فلم العراب ليعد له الموسيقى التصويرية لفيلمه المرموق ( الحصان الاسود )
. . سيرة عود السودان ما بين حمزه علا الدين .. و ازرق المزيكا محمد ود الامين .. الي كل ذلك نعود .. لنغرد مع محجوب و ود الامين داخل تلك الزنازين الشرقية لسجن كوبر ! عصافيرا مجرحة بسكاكين هذه الحكومات البائسة الفاشلة التي لا تجيد سوي القمع و الاستباحة
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
يا ود حامد !
.. لقينا Saba ( سبأ) .. الجميلة .. ساحرة الغناء الحديث في القرن الافريقي
دي تجربة تانية في خط معادلة الاصالة - المعاصرة ! سبأ امها أثيوبية عاشت في الصومال و الاب ايطالي ( مادلينا) يا معاوية تخرجت من جامعة روما ، حقل الفن الفسيفسائي Mosaicist في مجموعة اغانيها المعروفة باسم الجِدكا ( الخط - المسار) .. بتلاقح البوب - الروك الاروبي و البلوز المُوقع مع ميلودي القرن الافريقي القديم .. و بنهض في تجربة سبأ جيتار الكورا الخشبي .. جيتار الامين كونتي و علي فاركا تور و عشة كيجالي
حنرفع اغنية الهانفر ( بمعني الريح بلغة الصومال ) عشان نشوف عازف الكورا (لاو كويت) بطلع تناغيم بلوز افريقيا .. علي ذات النهج بتاع جون لي هووكر
.. و في تجارب الاصالة - المعاصرة تحت اضواء افريقيا لما بعد العهد الكونيالي ، بنرصد 6 اتجاهات هامة من ضمنها تجربة شرحبيل و علي نور الجليل .. شرحبيل القال بنهج الهارد روك المُوطن سودانيا .. وهو يحكي حال شعب السودان :
" و لسه ما عارفين .. ايه مصيرنا يكون ؟ ! "
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
.. وداعا يا كمندان
ابراهيم اجمد عبد الكريم .. كمندان الغنا و صاحب كرمة بن هاني ماركة السودان !
لاسباب من قوة و سرمدية غناء السودان ، أنتقل ذلك الشرطي دقيق الملاحظة ، قوي الذاكرة و صاحب الحس الاسكوتلاندياردي ، إنتقل لمواقع العشق و الوله الابدي بغناء المدرسة الفنية الاولي ! .. للحق فقد وظف الكمندان الراحل كل إمكانياته الذهنية تلك ، وكل خبرته الاجتماعية و إمساكه بمداخل و مخارج كثير من الاحداث لصالح حركة التوثيق الفني - الغنائي
.. ظل الراحل رقما إستثنائيا في معادلة توظيف الميديا المرئية - المسموعة لصالح إكتشاف و طرح قضية الغناء علي نحو اثير محبب و خفيف علي الروح .. و من جميل قوله في ذاك التأبين و الاحتفاء بذكرى اولاد شمبات :
" بالاستماع لعوض و ابراهيم ، تنبسط اسارير اهل السودان .. و تغدو الارواح تركض ، تطاردها مواكب التطريب الشجي ، و ما تلبس في ركضها و فرارها ان تصعد مدارج النفس لتجلس علي كرسي الدماغ ! إنتهى " وصدق من قال : كلو حسن مالك حسن "
.. لم تكن جهود الكمندان الراحل بمعزل عن ذاك الاجتماع التاريخي الاول ! ذلك الإئتلاف لجماعة الاهتمام بالشأن الفني - الغنائي :
- الزمان : يونيو 1923 - المكان : الخرطوم ، ذلك الجزء الخاص بسكن دمتري البآزار داخل منزل التاجر الاغريقي أنجلو كاباتو ، و انجلو هو خال الخواجة كونتومخاليوس
- الحضور : عرفات محمد عبد الله ، اولاد عشري الصديق ، العبادي ، سرور ، ديمتري و آخرين
- الموضوع : الاستماع لاغنية جديدة .. اغنية غريبة عن عالم الرميات بتاعت ود الفكي ، و طمبرة عبد الغفار الماحي .. اغنية اسمها ببكي و انوح و اصيّح ، كتبها العبادي و لحنها كرومة و كانت فتحا و إيذانا ببدء حقبة الغناء الجديد
.. وداعا يا كمندان .. سقتنا و الله علي اجنحة تلك النسائم في دروب خضراء - نشوانة .. سميت العبادي جبل الشعر المتحرك .. و نحن نسميك جبل التوثيق الضخم المتحرك
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
ِشكرا يا معاوية علي طيف المُرسلات المتنوعة
.. ونحن لا نزال علي خط الموسيقار صاحب الصوت التنور الخاص / الفنان محمد الامين حمد النيل الطاهر الازيرق
.. الي جريدة ود الامين التي تحكي غنائيا محنة فضل الله محمد ، نعود ، الجريدة ( مدرسة الاغنية الكبيرة ) القدر النيويور ك تايمز و كمان القارديان .. .. الي موسيقى فيلم الحصان الاسود بتاع كوبولا The balack Stallion .. ، العملا حمزه علاء الدين نعود ! تصوروا حمزه اشتغل كمبارس سينمائي مع ريتشارد بيرتون و اليزابيث تايلور في فيلم كيلوباترا ! قصة حمزة فصول في رواية تتمثل ! نحتاج نعيد قراءة حمزة في سياق حضارة النوبة القديمة و آفاق المدرسة الغنائية السودانية لما بعد تحرر العود من إسار التخت العربي
.. و بنعود كذلك لصولو الاكورديون بتاع وهبة في ليرك حدباي ، الحان و غناء كرومة .. : يا محمد ابياتي القُلال .. تاج في صدورن و ليك هلال .. بقدرة الحي ذو الجلال .. تتهني في بيت الحلال ! تتهنا في بيت الحلال دي ، اكورديون وهبة يكاد ينطقا حرفا و لفظا !
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
Quote: الابن العزيز محمد عثمان والأصفياء أصدقاء مجموعة فن الغناء لكم التحية والتقدير
Quote: Quote: نياابة عن شلة بوست تاريخ الغناء هااكم هذا العمل الاكتوبرى للعملاااق وردى.... |
أنتم أيهاالأنقياء الذواقة لستم شلة ، بل أنتم صفوة مخلصة نذرت نفسها لرسالة البعث الثقافي ، وأنتم مجموعة غيورة تحرس تراثنا الفني وتصونه . الجميع يتابعون بإعجاب جهدكم في توثيق فن الغناء السوداني وتنقيته وأرشفته ومتابعة مسيرته عبر مراحل تطوره المختلفة .
لا أستطيع أن اصف لكم مدى النشوة والفرح الذي أدخلتموه علي وعلى أبناء جيلنا بإهدائكم لنا هذا العمل الأكتوبري الرائع ، والذي أعاد لنا عبق وأريج أكتوبر الأخضر ، وذكريات ثوارها صناع المجد ، وطوفت بنا كلمات النشيد الخالدة عبر مبادئ أكتوبر العظيمة : الحرية - التطهير - حقوق المرأة - الوحدة الوطنية -التضامن مع الشعوب العربية والإفريقية .. لكم أجزل الشكر مصحوباً برجاء جديد : "والتقينا في طريق الجامعة " . محبتي عبد المنعم خليفة |
دكتور طراوة..و الجماعة دا على وزن التلغرافات زمان
اخونا عبد المنعم خليفة بهنااك فى الحوش التانى كتب الكلاام الفوق..و انا جبتو هنا بضبانتو..
و زى ما قال دكتور طراوة نحنا بينا الشراكة الذكية ناس ود القرشى و ناس نااسنا و كمان ناس اكتوبر و اها رايكم شنو فى الكنفدرالية..؟؟؟؟
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
اسرة بوست تاريخ الغناء تشاطر الجميع الاحزان فى وفاة الشاعر الكردفانى عبد الله الكاظم الذى رحل عن دنيانا الفانية امس الاول للفقيد الرحمة و المعفرة و لا سرته حسن العزاء كتب الشااعر الكثير من الاغنيات لفنانى الغرب عبد القادر سالم..عبد الرحمن عبد الله و ابرااهيم موسى ابا و الفنان صديق عباس.. شقيق قول لى يا مروح (طبيق العسل) من اغنياته المشهورة و التى تغنى بها بلبل الغرب عبد الرحمن عبد الله اضاافة الى اعمال اخرى كثيرة.. كتب الشاعر الراحل ايضا كتابه المشهور (كبايات شاى فى دولة البرامكة)
المغفرة و الرحمة للشاعر عبد الله الكاظم و لا حوله و لا قوة الا بالله العلى العظيم و انا لله و انا اليه راجعون...
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
شقيش يا كاظم !
خالص عزاؤنا لحركة الغناء الكردفاني .. لروح الراحل أبا ، لعبد القادر سالم الملحن - المؤلف و المجدد .. الذى عبر باهازيج و اراجيز غرب السودان الي جسد الغناء القومي السوداني .. الي فناء المدرسة الاوركسترالية التانية
.. مأثرة دمج ميلودي الهداي السباعي و مجاميع غنا الكرير و الجراري ، مع ايقاع و موازين مردوم جبال النوبا لاخراج الاغنية السودانية ذات الطابع القومي الجديد آناء بداية سبعينات القرن الماضى
.. قم بينا يا ابو رنة .. دار الاهل جنة !
.. و قيل ان ابو رنة هو اللوري البدفورد ، او ذاك اللوري التيمس الجنن بت مسيمس !! حسب عوالم غنا التم تم - التحتي .. تم تم القواعد الشعبية
.. يا ود عثمان حلق مع جوان بيز في زهرة ليلاك الغرب الامريكي و شوف لينا زهرة ليلاك شبيكة بطريقة ابو السيد ! .. و جهز لينا غنا حسن عطية بلونية الكابلي .. نحنا ما شين علي الزول البحلف بالمساير و الشعر الدواير و النور الجهر
.. تم تم بت العقاب و زهرة بت نجدي و العزو هات .. وربوحة ست المقدرة .. التم تم البقى : تفانين و غنا جميل علي يد ود حي المراسلات .. الخرطومي المطبوع:
" الامير / حسن محمد عطية "
يا معاوية ارفع صورة الاميرة بعودو و كرافتتو البوبيون !
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
.. شكرا ود عثمان
تجربة د. علي شبيكة ايضا مع ثنائي العاصمة جديرة بالرصد .. مستوى آخر جديد لشعر الرومانس و العاطفة
.. و ندخل ساحة شعر الحماسة :
" حقيت الاسم يا سالم الارباب .. " غنا الشكرة بلونية بت دارفور .. خُدرة الورتاب ..
العِقد النضيد لحكامات السودان في الجهات الاربعة !
.. نواصل السير تحت ظلال غنائية محمد الامين حمد النيل
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
.. وكان العود قبل حمزه علاء الدين و برعي محمد دفع الله و محمد الامين جمد النيل الطاهر .. ، كان و في غالب الاحوال عبارة عن ضرب علي الاوتار ذو صلة ما بطريقة ذاك الضرب علي الطمبور ! الطمبور اساس السلم الخماسي في السودان .. !
بين حمزه و برعي و ود الامين و من قبلهم طلائع مقام (فا) الامدرماني ، بين ديل جميعا بيوجد خيط رئيسي رابط : هو خيط سيرة العود السوداني .. خيط التخريجات اللحنية للعلاقات البينية بتاعت الاوتار الخمسة خيط انو العود كما قال علي المك : هو ليس آلة موسيقية بل انسان كامل الحال بتمتع بصحبتم و عشقهم !
يا ود عثمان سمعنا عود بشير عمر (الملقب بالشباب) في اغنية ابو السيد الجميلة .. بسمة الانظار .. او ربيع الحب
.. الي سيرة عود السودان .. منذ اولاد تمبم الي عهد عادل الصديق سوف نعود
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
.. حار عزاؤنا للحركة الشعبية قيادات و قواعد ! فلتكن ارواح جون قرنق من قبل ، و دومنيك ديم و جستن ياك و رفاقهم اول الامس ، فلتكن مهرا لسلامة و وحدة السودان
.. ليستمر الاستماع لعود بشير عمر ( الشباب ) و ترانيم و ميلوديا سيد خليفة .. ذلك ان غناء السودان هو نتاج تاريخي رصين لتلاقح مكونات و علاقات السودان الثقافية و القومية في جهاته الاربعة
باسم بوست تاريخ الغناء ، ناسو و قرائه نقول:
من غنائنا الاصيل في كامل دلالاته التاريخية و الثقافية نصنع ادوات و عينا الروحي و الانساني و نواصل مقاومة الحزن .. و تحديات بناء سودان الديمقراطية ودولة القانون و الفنون .. انه ذلك السودان الجديد ..
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
.. من عمق غابات المانجو و الباباي ينهض صوت ابن الجنوب المُغني جون مكوانج قرنق علي خطى مدرسة الغناء الاوركسترالي التانية
.. مزيج الميلودي - الموسيقي الخماسي المتماهي مع ضرب ايقاع الريقي اشتقاق الدلوكة .. و تظل الغنائية هي أحد اهم مداخل تشكيل النسيج القومي الموحد
.. شكرا يا معاوية .. استمعوا بالله لغناء إبن الجنوب جون مكوانج
.. و نبدا بصحبة ود عثمان رحلة كابلي من باندونق الي مروي الفيها كل جميل مرورا ببيت المال و التياعات الغربة و هي اقسى نضال .. حتي نلتقي تلك النسمة المرتاحة في عز الليل علي هدب الدقش و كمان نايمة .. ذاك النوم الذى هو بعض من خريف العين
" كابلي خريف الغنا السوداني "
.. مطر الرُشاش الماك هبوب و قُشاش .. و ما انفكت زينب تجر النم !!
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
.. عبد الكريم عبد العزيز الكابلي !
و لازال كابلي يطرب امة السودان جيل بعد جيل ..
.. عارفك ساحر ازمان قبالي .. و بتسحر ازمان جايات و ليالي
بتكمن قدرة الكابلي و نكهتو الفريدة : في الق الميلوديا !
دا واضح في أغنية دمعة الشوق
.. اصلا الاغنية لحنا سرور ، و لحن سرور بحد ذاتو كان لونية و خصوصية !
.. و غناها كرومة ، و طريقة كرومة بحد ذاتا كانت تفانين و سنام التطريب آناء تلك الثلاثينات من القرن الماضي !
.. و هنا واجب نوضح بأنو :
خليل فرح كان ملك الاستماع !
.. و سرور كان ملك المسرح الغنائي ( حتى في بيت العرس الناس كانت بتحس بكاريزما سرور و طابع الحضور المسرحي الطاغي بتاعو )
" الحضور الطاغي دا كان سبب مشكلة سرور مع الطمبار عبد الغفار الماحي " .. قصة الشيال الخطف الاضواء من الفنان !
.. اما ملك التطريب الجماهيري المفتوح فقد كان الكروان (كرومة)
وقام كابلي اضفي بُعد ثالث علي لحن سرور و غنا كرومة .. كابلي فرض علي دمعة الشوق ميلوديا خاصة ذات نكهة و دخل بالاغنية في دروب الغنائية المُلامسة للعقول و القلوب
" و يكاد المستمع يجزم بأنو دمعة الشوق هي اغنية كابلي و ليس سواه . . "
..
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
عثمان موشى ورفاقه الحلوين وأنتم تحدون بتاريخ الأغنية السوادنية أهديكم كلمات الكنينة للشاعر ود النزيها
الكنينة الكنينة يا رُطب الجنينة الله لينا
الكنينة الدارا أخمجيها الكنينة والروبا تليها الكنينة وخلق الله أنجضيها الكنينة والدنيا شن فيها بنريدا ونموت نخليها كُر علينا
الكنينة يا شتلا يا دُقاقه الكنينة ياالنارك حراقه الكنينة خلق الله مشتاقه الكنينة دي الدنيا فراقه بنريدك ومتين بنتلاقه تعومي لينا
الكنينة الكنينة بت بله الكنينة وأدي الشعر تله الكنينة ومسختي خلق الله الكنينة في نارا بتقلّه بنريدك وادي العريس طلّه الرشا لينا
الكنينة وقلبي داب حته الكنينة وفارقتا لي الجته دا الناجضنا في شندي المحطه
الكنينة يا شبه الأرايل الكنينة ويا المحلب الشايل الكنينة وغِصينك المايل الكنينة وماهماني في القايل بنريدا وفيها الثمار شايل
الكنينة يا بت مالك الكنينة وناجضا الخلق مالك الكنينة وأديني شبالك الكنينة وختيني في بالك بنريدك دي الدنيا دايمه لك نحن إنتهينا
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
.. يا خالد يا منسي ليك تحياتنا
ود النزيها فيهو ريحة و ملامح فن ناس البجراوية و كبوشية .. مداخل ذاك الغنا الاول .. رميات ناس محمد ود الفكي بابكر ، ( ود الفكي رائد غنا الرميات و الغناء الجديد .. غزوة كبوشية لامدرمان )
.. الرميات اللي أتحولت لاغنية كاملة عبر جدل الانتقال التم علي يد العبادي و سرور .. تراث الغنا في تلك المناطق مربوط بايقاعات الدلوكة ، بدور الحكامات ، بسيرة العمدة ابو جديري ، عبد الله ود سعد ، و قمر العشا الضواي .. يسلم للخصيم كواي .. غنا حميرا ام قلب ..
.. يا خالد عبر تجارة المسافات الاسفيرية .. رسل لينا اب عاجات اللحو .. حنخليها معطوفة علي غنا كابلي بتاع الحماسة .. الحسن صاقعة النجم ، و علي فرتيقة ام لبوس ، و محمود ود زايد اب رسوة البكُر الحجر شراب سيتيت .. القاتال في الخلاء و عُقبن كريم في البيت
.. بنزورك في بوست اللحو .. سلامنا عبرك يعبر الاطلنطي و يصل للصفي النقي ود حامد المرتضى ..
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
.. اكفكم يا خالد تسابق الريح !
الزول المن قلبو طرد إبليس .. عشان كدا يوم موتو بنات عرمان كبوا الرماد فوق روبتن ( شعرن ) كيمان !
وسع الحكي عن تراث تلك المنطقة يا خالد .. عناصر ثقافتا مفردات غناها و رموزا نساءا و رجال
.. و يا دمعة الشوق كبي !
شفت كابلي لمن يقول (الشوق ) بالسلم العالي .. تطريب يا حبيب .. طريقة كابلي السرقت الغنية من كرومة و خلتا سنام غناء قعدات الافندية آناء تلك الستينات و مطلع السبعينات .. و اين من عينيا قعدات و غنا ميز الهبوب القديم ،الواقع في الطرف الامامي لمبني الجمعية الطبية في شارع النيل !
.. و ياليت المطايا بنا يا خالد يبلُغن (محمدا) .. فتصير ظهورهن علي الرجال و ايضا كريم النساء حرامُ ..
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
Quote: الكنينة يا بت مالك الكنينة وناجضا الخلق مالك الكنينة وأديني شبالك الكنينة وختيني في بالك بنريدك دي الدنيا دايمه لك نحن إنتهينا
لله درك يا ود النزيها ! مسارب الغي الجابت الغنائية الجميلة The Exquisite Lyricism of Sudan
.. يا ود المنسي كلم ود المرتضى بهذا الكلام : يا الكنينة خليني في بالك .. دا ما عرضحال عديل و كامل .. زي ما قال ود الرضي : بُغيتي ( وقصدي ) إن لم تعلماني .. هاك شرحي و هاك فيراماني
.. شكرا يا خالد علي هذا ال ون - تو الجميل .. الجنن كاك ، و تمساح ، و ود مرجان و كل جماهير المسطبة الشرقية الهلالو - مريخية
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: Osman Musa)
|
.. إشتقت ليك ! ساعة المسا فرد الجناح لملم مصابيح النهار ..
.. " من مأثور الليرك الجميل بتاع مدرسة الغناء الاوركسترالي التانية "
.. يا خالد يا منسي .. كلام ود النزيها السمح داك .. يا هو الجاب كلام اسمعيل حسن السمح الفوق دا !
.. يا معاوية أكرموا خالد المنسي باغنية محمد ميرغني اشتقت ليك بالله شغلوها و فكوها زي دمع الحبايب السارية في الوادي البعيد بتسوي شوو ..
| |
|
|
|
|
|
|
Re: د / أحمد طراوة ___ فى ندوة عن تاريخ الغناء فى السودان . (Re: أحمد طراوه)
|
عارف ياود المنسى بعد الصفحة دى تقلب لو سمح تيم بوست تاريخ الغناء كنا نتسكع شويتين مع ناس ودالنزيهة نلف هناك محل التمرد الاول محل الحريق محل كان اخصاب الأغانى وانجاب الترانيم .... كنت افكر يجو معاى ناس اسامه الخواض وناس بلة موسى وناس فزع وسليمان حامد سليمان وشرف الدين سرالختم أحمد ... نتجول شويتين فوق دنبو الغناء هناك اها لى قدام
| |
|
|
|
|
|
|
| |