الشعبية نجمة تزين سماء مدينة الخرطوم بحري

Quote: Quote: الشايقي الحنين في يوم 12/4/2007م الساعة 7.21 كتب منير (سيزر) سلامات عزيزي حاج حمد .. الشعبية أكثر ميزة راسخة في ذهني عنها هي عصرياتها ونشاطها الكروي المبالغ فيه !! .. فأنت منذ ساعة الغدا وانت قاعد تسفسف في الكسرة والملاح تسمع بردبة الكورة في الشارع واللعيبة يدقدقون الكور متجهين علي الميدان .. وطبعآ من الساعة تلاتة ونص تلقي الميادين اشتعلت بالتمارين والمباريات !!.. وطبعا ياشباب منير نفس حركاته للان . زمان يجينا في نص التمرين ويقول عايز يلعب بس يكفكف البنطلون ويدخل الدافوري ويختفي مره اخرى للكسر والقرايه . حبيبي يامنيربالله ما تعمل لينا حركات زمان تشغلنا بالبوست وتتوارى وتظهر مره اخرى بعد فتره وعارفك الان شايل طنبورك وبتدندن بس الطبيعة جميله عندكم وحتى صورة البروفايل بتاعتك شكلك ما بتاعين في الشارع وشكلك شارد الزهن بتفكر في الشعبية وعصرياتها عارفكم ياشوايقة حنينين وبكايين وكان عندي صديق شايقي اسمه (امين الشمين ) من اولاد الصحافة وله عربة حافله وكل يوم الشوايقه اهلك عندهم طنبور في قاعة الصداقة. ويعلم جيدا اني احب غناء الشوايقة نقوم نمشي انا وباقي اهلهم بالحافله وندخل القاعة نستمتع على الطرب الاصيل والصفقة الغريبة وهاك الهدية دي انت و( عادل عثمان + عمر محمد عثمان ) وكل الشوايقه في البوست وبالله دندن بيها واعكسها للحولك واتذكرنا واتذكر جعفر السقيد في قاعة الصداقة لما يقول. ______ شاعر ببكاك يايمه == قبل الشافو يشرحو لي اديتك دموعي هدية == كان يبرد حشاك شوي لو ما اخاف تشوفي الشفتو == كان بديك كمان عيني ليله يوم العيد مهضلمه روحي == جايه احزاني ضحت بي وقافل نفسي في اسفي == وسايل دمعي فوق خدي صرت من الامل في اللقيا == الضحكه المغطي وشي جناك من جوه يبكي يلين == وعين لكن يقول احي يمه اوعك يدور في البال == غيرت البنادر فيّ واكون زي الحرازه متل == مع البحر البيابه الري واعاف المويه لو المويه == اخدت من مكانتك شيّ نويت الجيه يمه انا صاح == كمان ودعت للحولي الا زماني ماكان راضي == لما عرف مفاصل الكي سهم مروادو دموعتك == وخاته على اللحيم الحي كتب قدمي البسوقني عليك == سلب قُدرة جوادي علي وفرش دربك ضريسه وشوك == وغفلني وسرق نعليّ نلت عفوك في الايام == عشان يقدر ظلامن ضي جناك كان عاكسنو ظروف == لابد من يلاقي الحي وليدك من جنون اشواق == وماخايف الغفار والضي ويمه اناكان لقيتلي جديد == وبيها بجيك فوق كرعي يمه جناك ما قاصد == يختك في مطب اشواق والود شجره بين اتنين == راجين لبعض عشاق تجهجه دايما الفرقه == وتحتها تنفض الاوراق تظل الام حنانه عزيز == في زمن الحنى الافزاز عفوها يطل صدى غنوات == يفرزكافة الاشواق والله الناس ديل غناهم الا تسمعوا لو عايزين تستمتعوا لان الكتابة دي ما عاجباني وانا الناس ديل عايشتهم واسألوني عنهم خطرين شوية عليهم .وانتو ما ملاحظين يا ود حمد الشوايقه ديل لما خلاص يتاورهم الشوق يظهروا ويختفوا مره اخرى حتى علّموا معاهم اخونا عمر ود الدكتور الحركات بالله قبلوا علينا شوية زي ما بقول شمس الدين ساتي وعارفنكم في بلد عايشة بالازرار .تدوس زر تاكل واخر تشرب واخر تنوم وتصبحوا على خير. سؤال يامنير هل الطنبور في وضعه القديم اجمل ام عند اضافة ود اليمني وتر اضافي ؟ ودمتم .... وليد عبد اللطيف