الشعبية نجمة تزين سماء مدينة الخرطوم بحري

Quote: في حضرة جلالك يطيب الجلوس ياشباب كده نصقر ونصلح الكرسي ونستعدل عشان نستقبل دكتورتنا ستنا وكده قولوا ليه دكتوره ستنا بس . اولا عشان الدكاتره اسكيلهم عالي وكمان بيقولوا دمهم بيختلف عن دم البشر وهل الكلام ده صحيح يادكتورة لاني بسمع كثير الناس بتقول والله الشاي ده سمح ( دم دكاتره بس )وقبل ما نتدخل في تفاصيل الاشياء . اولا نترحم على روح اخونا محمد خضر رحمة الله علية له الرحمة والمغفره وصراحة يادكتورة كنا بنفتخر بيك مع كل اخواتنا وبناتنا من الشعبية واخر مره تقابلنا فيها تقريبا جيناك انا وشقيقتي مشاعر للمراجعة عندك في مستشفى الصافية وبعد يومين منها تقابلنا في زواج اخونا نقد عبد الحليم وانا كنت واقف مع اخوك شرف ومولانا خالد المبشر وحضرت وسلمتِ علينا عشان تعرفي نحن لسع بخيرنا وذاكرتنا الحمد لله لسع حديد واخوك شرف يادكتورة رقم فارق السن بيننا ولكن كنت ارسل له صديقه ايهاب عوض ( العريس ) مخصوص لكي يحضر ويقوم بحلاقة رؤسنا وكما تعلمي عندنا عقدة شعر وهو فنان وماهر جدا . وزمان كنت بجي حلتكم كثير مع امام مصطفى وطارق سيد احمد وكم مره دخلت بيتكم بس بنكون مع الشباب بره طبعا بعد سنين قابلت شقيقك فائز خضر ( صاروخ حلة الصديق) في السعودية وتبادلنا التلفونات وضاع تلفوني مع الاسف اما عاطف بلو من لا يعرفه في الشعبية وهو عازف مشهور وطال ما جبت لينا سيرة مستشفى الشعبية والله كان فيها ناس ماشاء الله عليهم وعلى راسهم عمنا الدكتور محمد عثمان رحمة الله عليه ونذكر منهم يوسف و ود الزاكي ودكتوره منى و ود الملك وبنات عمك ابراهيم مالك وكان في دكتور عيون نسيت اسمه وهو يلبس دائما طاقية وياريت لو تذكرينا اسمه ودكتور من ناس الحلفايا اسمه ( سهام ) وعمل فترة طويلة في الشعبية واعتبر واحد من اهلها وهو له قصة جميلة مع والدتنا( الدنقلاوية ) يعطيها العافية وكما تعلمي نحن البدخل الشعبية بيحفظ ناسها بغنمهم وما اجملك وما اعظمك ياشعبية. يالله كده نحكي بمناسبة مركز صحي الشعبية وطبعا زي ما عارفة امهاتنا حنان جدا واي واحد يمرض هم بكونوا اول ناس في رفقتة والحاجة عشة طبعا كل مره تمشي مع واحد من البيت وتقابل بيهو دكتور سهام وهي عامله نفسها بنت خرطوم ودكتوره بالممارسه طبعا عارفه ده بينفع معاهو هذا من الدواء وهذا لاينفع معه هذا الدواء وتقوم توصي الدكتور بنوع الادوية وهو لا يكذب فعلا يكتب لها نفس الادوية الطلبتها لنا وسهام في نفس الوقت يضحك لانه خلاص حافظ الموال مع كله مقابله وفي يوم تقوم الحجه نفسها تمرض والله يسلمها من المرض وتمشي للدكتور وتقعد تشتكي . ياسهام ياولدي حاصل وحاصل في النهاية دكتور سهام يضحك ويقول ليها طيب ياحاجة اكتب ليك شنو من الادوية .وحجة عشة ترد ياولدي انت بتهظر ولا شنو .وبالله ياجماعه دعواتكم لكل امهاتنا وامي تعتبر صديقة لي وبها عرفت كل نساء سوق الشعبية وكل البائعين والبائعات واظرف حاجة لما يوم تقوم تغيب عن السوق وتعالوا شوفوا الاسئله من صاحباتها ساعتين بتضيع سلام وكده .ولما اتأخر تجوط فيني واقول ليها اعمل ليك شنو صاحباتك كتار . وطبعا ياجماعة دكاترة الاسنان لهم طرائف جميله وكثيرة بالذات مع الناس الكبار في السن لما تجي واحدة وتقول الجماعة ( العفاريت ) طالبين منها تركيب سن دهب ( ناس الزار ) وياريت لو تحكيها ليكم الدكتوره اذا قابلتها تلك الطرائف . وبالمناسبة اتصلت على ابراهيم حطابي العريس ووصلت له صوت لوم لانه حضر لجدة ولم يخبرنا اما باقي اولاد حلتكم ناس طارق سيد احمد وهمزه عباس شقيق سامية عباس وابراهيم كدوبه وياسر سليم ياخي ديل ما خلوا ريال حايم يعني ما شغالين بالناس يوم عملت ليهم قراصة شروني . ونكرر الترحاب واهم شي يادكتوره تواصلي معنا لكي نحقق الاهداف السامية من هذا البوست الذي جمعنا مره اخري وسبحان الله اشياء ولا كانت في الحسبان ولا على البال بعدأن سلمنا للفراق مع من نحب كل الاشرعة ونعود نجتمع مره اخرى وياريت تواصلي وتعلني الى اخونا حاج حمد انك هلالابيه زي اختك دكتوره رحاب خليفة لان والله شايفها ممقصاه . بس كمان ياحاج انت عايز البوست كله مريخاب . تف من خشمك تف وده بكلام دكتوره رحاب خليفة . ودمتم ...... اخوكم وليد عبد اللطيف