الشعبية نجمة تزين سماء مدينة الخرطوم بحري

Quote: الاكرم الحاج حمد تحايا وود ياحجوج اول حاجة الف مبروك عدم ارشفة البوست . والشكر موصول للاخ بكري ابوبكر تفهمه واستجابته . والى الامام وتظل الشعبية وناسها دائماً فوق . شمس الدين [ مسكاجمي ] يا أخي [ هِكر في ] [ ويا فينا ] الحمدلله ... مبروك على [ البُرو ] والله [ مليه أشرِيا ] ... اما بخصوص اعلانك بطلب مترجم لكلام اخواننا المحس وقائدهم وكبير بوستجية الشعبية الاستاذ صلاح شكوكو ورغم الكلام الطيب الكتبو في هذا الشأن ........ احذر ثم احذر من هذا الغزو الثقافي النوبي واظن اننا نواجه حملة منظمة من اجل الاستيلاء على هذا البوست كما استولوا على كل الاماكن الهامة والاستراتيجية في العاصمة ( توتي وحلة حمد وحلة خوجلي وبري والمقرن وشمبات وحتى فى الشعبية تلقى بيوتهم نواصي و حتى ناصية اللغة العربية اخونا صلاح شكوكو استولى عليها ) وحتى موتاهم بيدفنوهم في حلة حمد جنب البحر والاحياء من باقي القبائل ساكنين الحاج يوسف . وزي ما متابعين الاخوان بدأوا بالتهاني والتبريكات كلمة بالرطانة والتانية بالعربي وبد كدا كلو رطانة والخطوة التانية كانت من الاخ عزام كتابة عن تاريخ النوبيين والخطوة الاخيرة يا اخي الحاج حتكون الرطانة شرط اساسي للكتابة فى هذا البوست . ولهم اذرع خفية تساعدهم على غزوهم هذا والاذرع دي بتتمثل فى طابور خامس بقيادة الاخ بدرالدين اسحق احمد لانو متزوج من احدى الاخوات المحسيات وانا اتوقع منه تقديم المساعدات لهم على الاقل بالسكوت فانه لم يعلق على الموضوع دا من قريب ولا من بعيد بالرغم عن الخطاب المباشر من الاخ عزام له وتحديه بعدم الترجمة ( ترجمة دامو ) والاخ بدرالدين ترك هذه الحملة النوبية المنظمة او غض الطرف عنها وبدا يتكلم عن الصورة بتاعتي وقال انو الصورة ماخوذة قبل 19 سنة ضاربا بالتاريخ المرفق مع الصورة عرض الحائط والاخ الحاج حمد بيعرف التاريخ كويس وهو بالضبط كدا ليها زي 3يوم او اربعة لا اذكر . وانا باذن الله وعونه ساقوم بمحاولة لترجمة ا لكلام الفى الQuote اعلاه بالرغم من عدم تطابق شروط السيد الحاج حمد في المترجم المطلوب الا في شرط واحد هو ال35 سنة . 1/ مسكاجمي تكتب وتقرأ مسكاقمي وهي كلمة مكونة من ثلاثة مقاطع وتستخدم لاغراض السلام والتحية . 2/ هكر في (بكسر الهاء وتشديد الكاف ) ايضاً تستخدم لاغراض السؤال عن الصحة والعافية 3/ ويافينا ايضاً تفيد التحية والمجاملة والصحة والعافية 4/ البرو ( بضم الباء والراء وتسكين الواو ) وتعني البنت 5/ ملى اشريا ( بتشديد اللام ) وتعني كلو تمام واشريا تستخدم لاغراض الجمال والحلاوة ويقال اشرنكيل وتعني اسمح حاجة وال statement بتاعها ( أشرا) هذه هي الترجمة الكاملة على الشريط للكلام اعلاه مع تصحيح بعض الاخطاء وان عدتم عدنا . ونرجع لاخونا بدرالدين ( الطابور الخامس ) دا بيجرجرني لمعركة خاسرة بالنسبة له وغير متكافئة وسبق لى تحذيره وانذاره من مغبة وعواقب الحرب دي وحذرته وهو دائما بيذكرني بناس قرية اللعوتة لما حصل العدوان الامريكي على مصنع الشفا خرج مواطني اللعوتة يحملون لافتة قماش كبيرة مكتوب عليها ( اللعوتة تحذر امريكا للمرة الثانية ) . هذه المرة ساغض الطرف عنه ولن الجأ للتراث العربي واجيب سيرة الفرزدق وقريبه مربع ولا اخونا جرير والمجامع وروق في علبك يابدرالدين . واختم رسالتي دي بطرفة عن احد اخواننا المحس : كنت اعمل في المنطقة الصناعية الخرطوم وفى يوم جاء خواجة عايز يشتري اسبير ولما كان الخواجة ما بيعرف عربي استنجد بي المحسي (وكان جارنا ) للتفاهم معه وكلمت الخواجة بالسعر المطلوب حسب طلب اخونا المحسي وانا اعلم ان السعر كان مبالغ فيه واخونا المحسي لما حس انو الخواجة داير يمشى ويبوظ البيعة اتجاوزني وتكلم مع الخواجة مباشرة واحتار اخونا المحسي كيف يتفاهم معاه المهم في النهاية صاحبنا اتكلم مع الخواجة بالرطانة وقال ليه ( اسمع ياهواجة الاراب دا انقليزي اسكا بانجمو اساتا ار من كليليكا هدفيي ) يعني ياجماعة رغم خدمتي للاخ دا قال للخواجة العربي دا ما بيعرف يتكلم انجليزي ويا خواجة انت هسه حتدفع كم وانفجر كل الحاضرين بالضحك المحس والعرب وبعد داك البيعة ما تمت ونلقاكم كان حيين .