Quote: عمتنا محاسن الجيلاني زوجها من ناس الجزيرة حلاوين من ابو فروع
والدة الفاتح وامين كامل محمد سعيد؟ كانوا زملاءنا فى بحرى الثانوية وامين زميلنا كان فى جامعة الخرطوم.
ذكرتى ابوالمعالى الصديق. والد د. عادل ابوالمعالى؟ كان قدامنا فى بحرى الثانوية وجامعة الخرطوم. وقريب زميلنا فى الاميرية 2 وبحرى الثانوية وجامعة الخرطوم د. شرف على ابراهيم.
حلة حمد اهلها متواضعون ومتعلمون وطيبون. كانت حياة ريفية مدينية. الاخلاق جوهر قيمها كانت. والنزاهة . من اهلها ايضآ واساتذتنا صديق بر.
كان خالى يتميز بصوت جميل للغاية - بين صوت الطيب عبدالله وحمد الريح - وكان يغنى من ضمن ما يغنى هذه الاغنية
11-17-2009, 00:49 AM
مريم عبد الله
مريم عبد الله
تاريخ التسجيل: 10-09-2009
مجموع المشاركات: 1448
Quote: المريوماب جنهم يعرسوا من بعض مشربيكين شربكه شديدة
انتي في الشربكة و الله في الدكترة الكثيرة دي ما شاء الله..اتذكرت طرفة..كتن والدة الدكتور ابوبكر مصطفى صاحب كمبيوتر مان اتوفت و كان عاملين شكر في الجريدة و في الشكر ذكروا انها والدة دكتور ابوبكر مصطفى و شمس الدين مصطفى و دكتور منو و دكتور منو..رباطابي قاعد معانا لما قرأ الشكر قال : دي ام و الله جامعة!! ما شاء الله نعم التعليم زي ما بتوقل والدتنا متعها الله بالعافية..
11-17-2009, 07:54 AM
مريم عبد الله
مريم عبد الله
تاريخ التسجيل: 10-09-2009
مجموع المشاركات: 1448
روما الصورة .. وقفت اتأمل الملامح شفت : الجمال الطفولي شفت :طيبة العم المرحوم عبد الله السيد وكلمتة المعهوده (قريبي ) وحديثه عن السياسة مع عم عبد الحليم شفت :لهجة ليلي المصريه ( ده دي ارحمونا بقى ) واديها العافية يارب شفت :محبة ناس الشعبية لاخواتك شفت : طفولتك وصداقتك لاخواتي وللمرحومه (حبي ) شفت : شقاوة اخوك محمود وتكونت عندي قصة ورحلة عمر سرحت بها بعيدا صراحه انزال صورتك به نوع من الشجاعة تحياتي لزوجك .. وامس اتصل صديقي محمد عوض شارع ناس عابدين علي صالح وبيسلم عليك والسلام امانه وهو بتمنى لك دوام الصحه والعافية
11-17-2009, 08:27 AM
هشام درماس
هشام درماس
تاريخ التسجيل: 11-08-2009
مجموع المشاركات: 229
يازول امس بعد الساعة الواحده صباحا وبعد مداخلتي معكم قعدت اجمع في حاجات من الارشيق وشوال الذكريات وسرحت وتاني ما اتذكرتكم إلا الصباح
خالد درق طبعا ياجماعة خالد درق ولدنا وابننا في الحي ولو استمر في مجال كرة القدم كان سوف يكون له شأن بها وهو يحب الكرة بصورة غير طبيعية ولعب معنا وهو صغير السن وبالزات دافوري حلة ناس الجقدلي
11-17-2009, 08:47 AM
الحاج حمد الحاج
الحاج حمد الحاج
تاريخ التسجيل: 03-29-2008
مجموع المشاركات: 4800
جقدليات: حكى الأخ أحمد المصطفى أحد طرائف الجقدلي ، قال (الجنكل) من أولاد شمبات الجماعة دائما بشاغلوهو ويقولوا ما بفكر لما يعمل حاجة ، قال الجقدلي قال الجنكل ماشي سوق بحري يشتري خضار و نسى كيس الخضار و لما وصل سوق بحري قال: الله نسيت كيس الخضار و بدل يشتري كيس بي قرشين و نص رجع شمبات تاني الباص كان بي قرش و نص و رجع بي قرش و نص يعني دفع تلاتة قروش عشان يجيب الكيس و علق أحمد المصطفى: طبعا الجقدلي بديها كوز شوية..
11-17-2009, 11:40 AM
مريم عبد الله
مريم عبد الله
تاريخ التسجيل: 10-09-2009
مجموع المشاركات: 1448
والله عرفتيها ياروما عاوز اصور ليكم التركين لما يكون داخل علبة المربى ( هو بالمناسبة ببيعوهو فى علب مربى ) وطبعا جوة علبة المربى بيكون شكلو عجيب يعنى اقول لييييييك .. ايوااااا شكلو بيكون ياستى زى موية البلاعة لما تكون ليها زى اسبوع كدة اخوى يوسف عمل منها طناش بتكون معتقة اها دا بالضبط شكل التركين جوة علبة المربى ياعمدة ..
وأحسن واحدة كانت بتبيع التركين فى حلتنا كانت والدة ناس حيدر محى الدين وانا نسيت اسم الحاجة لكن وليد بيكون متذكرها وكانوا بيقولوا ليها الشلالية لكن مامتذكر اسمها لكن طبعا شارعهم ظاهر طبعا من ريحته .. يامريم تخلينى اقعد اربرب كدة بعدين امشى الاجازة حيدر يقوم يفلقنى بى علبة بتاعة تركين ..
11-17-2009, 12:42 PM
عابدون محمد عابدون
عابدون محمد عابدون
تاريخ التسجيل: 07-30-2008
مجموع المشاركات: 2607
الاخوان بالبوست الجميل السلام وعليكم ورحمة الله وبركاتة
مبروووووووووووووووووووووو ك الصفحة ال 94 والمزيد يارب فى خدمة الشعبية الحبيبة
الاخوان / عادل عثمان وعماد عبدالله و وليد عبداللطيف والاخت روما والله اتحفتونا باالاغانى والفيديوهات الجميله لكم الود وان شاءالله ديماً مبدعين فى خدمة بوست الشعبية الجميله ودمتا اخوتى
اخوكم خالد درق ... دبى
11-17-2009, 12:43 PM
الحاج حمد الحاج
الحاج حمد الحاج
تاريخ التسجيل: 03-29-2008
مجموع المشاركات: 4800
Quote: يا جماعه بمناسبه الجقدلي وين اخوه عابدين على صالح في السودان ولا بره
عابدين علي صالح موجود بالسودان و قابلته خلال اجازتي..كلما اتذكر واحدة من طرائف الجقدلي بشوتها ليكم هنا.. جقدليات: مرة الجماعة قاعدين شلة واحد استأذن ماشي البيت قال ليهم ماشي اتغدا مع الوالد ، الجقدلي علق: انتو لسع زي ناس الاقاليم تلبسوا جلاليب بيضاء يوم الجمعة و تضربوا شبابيكم لون اخضر و تتغدوا مع الوالد؟
11-17-2009, 12:59 PM
مريم عبد الله
مريم عبد الله
تاريخ التسجيل: 10-09-2009
مجموع المشاركات: 1448
جقدليات: و هاك دي يا روما مع انو قبل كده حكيتها في بداية البوست ، الجقدلي قال ايام الجاهلية كان في نادي خاص بشركة البيرة في شارع الكبري و قال بنمشي نقعد نشرب لينا حاجة معاي اصحابي دكاترة ، قال بعد الكاس الاول الونسة عادي كلها بالعربي بعد كاسين نسمع Yes و No و دي عادية بعد الكاس التالت نسمع I think that و برضو فاهمين و بعد الرابع Very bad و برضو فاهمين ، لكن بعد الخامس تدخل كلمة عربية مرة مرة و بعد داك انا بشيل الكرسي و بمشي اقعد اتونس مع الغفير.
11-17-2009, 01:13 PM
عابدون محمد عابدون
عابدون محمد عابدون
تاريخ التسجيل: 07-30-2008
مجموع المشاركات: 2607
والمقال دا عجبنى شديد عشان كدة نقلته من منتدى اسمه الخرطوم بس انشاء الله مايجوا يرفعوا على قضية هنا ..
Quote: ليس هناك أمة أخرى على ظهر الأرض تشاركنا في أكل (أم فتفت) أو (الكَوَل) أو (التركين)..!! ولا أدري إن كان تناول تلك (المتفجرات) من باب النعمة أم النقمة..!! وإن كنت أرجح الثانية بدليل أن تلك (المحروقات) تجعل آكلها يبدو كمن سقط من عمارة شاهقة..!! ولكوني من مدمني التركين (الملوحة) باعتبارها من غالب قوت أهل النوبة في الشمال، فقد لاحظت أن كمية مياه الشرب التي أتناولها بعد تناول تلك (الأكلة) تكفي لري ثلاثة أفدنة..!! أما (الكَوَل) فلم أتناوله إلاّ مرة واحدة وعرضاً في السوق العربي ولا أعرف لماذا يقفز (الكَوَل) إلى ذاكرتي كلما تردد أن عرفات مات مسموماً..!! فقد ظللت أتلوى فور اكتشافي أن في الملاح (كَوَلاً) ولله الحمد والمِنّة حيث أعانني في التخلص منه سريعاً..!! وقناعتي أن أهل السودان يرتكبون (معاصي) عندما يتناولون تلك الأصناف من الطعام لأن الله تعالى أمرنا بأكل الطيبات ولا أرى أي طيبة في المصائب الثلاث..!! وعندما كنا طلاباً في مصر في الثمانينيات من القرن الماضي أقسم أحد المحاضرين بأنه شاهد بأم عينه جماعة من السودان وهم يأكلون (اللحمة النية) وغضبنا نحن للغاية وناقشناه واتهمناه بمُعاداة السامية ولكننا اكتشفنا أنه يقصد (أم فتفت) عليها اللعنة..!! وفي وادي حلفا عندما كان السودان يشهد أزمة خانقة في الخبز على أيام النميري أجبر الأهالي هناك أستاذاً مصرياً على تناول وجبة الإفطار معهم ولكن الرجل وفور ابتلاعه للقمة الأولى من التركين بالقراصة فذفها خارج معدته وهاج قائلاً: (يخرب بيوتكم.. انتوا حتاكلوا ده عشان تطلعوا إيه..؟) وهكذا نعتَ المصري طعامنا المفضل (بالمخلفات البشرية)..!! الطريف أننا اكتشفنا أن إخواننا المصريين يأكلون (الجبنة القديمة) بمعنى أن تكون فيها الديدان حية ومتحركة..!! وعلى أولئك الذين ينادون الآن بتحريم (خفاض الإناث) أن يصطحبوا معهم تحريم الأكلات الثلاث المذكورة، فهي ليست أقل خطورة من الخفاض إن لم تكن تفوقها..!! صحيح أننا لم نرصد وفيات مباشرة بسبب أم فتفت أو الكَول أو التركين ولكن بقليل من التركيز يمكننا معرفة العواقب الوخيمة لتلك المتفجرات..!! قبل أيام كان رجل مسن من (بلدياتي) يحكي أنه لا يأكل كذا بسبب الضغط ولا يشرب كذا بسبب السكري فتصدى له أحد الشباب قائلاًً: (أنا والدي عليه الرحمة كان عندو ضغط وسكري لكن كان يأكل ويشرب أي حاجة)..!! وهنا رد عليه بلدياتي بقوله: (ما عشان كده أبوك بقى الله يرحمه...!!) وقبل أن نكون نحن أيضاً (مراحيم) من ضحايا التركين وأم فتفت والكَول على الدولة أن تسن تشريعات رادعة لمنع تداول وتناول تلك الأطعمة ولكن بالتدريج من شاكلة (غير مسموح بتداول وتناول الأكلات الثلاث لمن هم دون الثامنة عشرة) والعاقبة عندكم في المسرات..!!
ما بنت الشعبية تفتيحة..ناس شارع الكبري الحناكيش ما لقوا اليتخارجوا بيهو طبعا..
عندنا صاحبنا مشى قرية من قرى السودان ، قال شفت المرة فتحت ليها صندوق و طلعت ليمونة ناااشفة و جالت كباية و مسكت ليك الليمونة ادتها ليك عضة لما عيتها واحدة مغمضة..ما عاوزة تعمل عصير ليمون لي صاحبنا الضيف..
11-17-2009, 01:52 PM
مريم عبد الله
مريم عبد الله
تاريخ التسجيل: 10-09-2009
مجموع المشاركات: 1448
Quote: المشاركة الأصلية كتبت بواسطة تكفينى الذكرى دراسة أقيمت لحل معضلة أثرية واجهت البعثة العاملة في منطقة كرمة البلد ، حيث تم العثور خلال فترة الثمانينات على بقايا عدد من المنازل بمدينة كرمة البلد التى تعود الى فترة نبتة وتم العثور بداخلها على العديد من الأواني الفخارية التى تحتوي على كميات من عظام الأسماك التى تم وضعها على طول حيطان غرفة من الواضح أنها مخصصة للتخزين، حيث لا يوجد لديها مدخل إلا من الطابق الأول عن طريق سلم. كانت معظم هذه الجرار قد وضعت مكسورة القاعدة في وضع مقلوب داخل آنية أخرى وضعت مسبقاً داخل الأرض، وأبعادها هي حوالي 40 سم في الإرتفاع ومحيط فوهتها حوالي 14 سم. كما وجدت جرة من النوع نفسه وبقاعدة مكسورة في غرفة مركزية في منزل صانع الفخار في فترة نبتة تم حفره في كرمة البلد، واحتوت أيضاً على كميات من عظام الأسماك. عند دراسة العظام التى وجدت في منطقة كرمة بواسطة المختص في علم الحيوان التابع للبعثة السويسرية بكرمة البلد الى جانب تحليل الأسماك المملحة وفي محاولة لفهم أدق لحقيقة هذه الجرار، تم اجراء إستبيان اثنوأركيولوجي في الموسم (1987 – 1988). قسم الاستبيان الى أربعة أجزاء، يحتوي الجزء الأول على أسئلة متعلقة بالشخص المسئول، والجزء الثاني يختص بوسائل الحصول على السمك وفترة الصيد والجزء الثالث يختص بصناعة "الفسيخ" و"التركين" وأنواع الأواني المستخدمة في صناعة كل منهما ومكان وفترة الحفظ، وتعامل الجزء الرابع مع الوجبات والاستهلاك وقد استهدف الاستبيان المجموعات النوبية الرئيسة الثلاث : المحس والسكوت والدناقلة، ووزع على ست مناطق في بلاد النوبة (كرمة البلد ، و واوة، وصلب، وصادنقا، ودنقلا وجبل البركل) .جاءت نتيجة الاستبيان أن معظم هؤلاء يستخدمون قطع القماش القديمة لصيد السمك وهى عادة ما تكون ثوباً نسائياً سودانياً قديماً، ويشارك في عملية الصيد جميع أفراد الأسرة. وتتم عملية صناعة الفسيخ من الأسماك متوسطة الحجم التى تحفظ بكاملها بعد فتحها ونظافتها وملئها بالملح وتترك في إناء من الفخار لمدة 3 – 6 شهور، وفي الفترة الأخيرة استخدمت الآنية المعدنية والبلاستيكية في عملية الحفظ وعادة ما تؤكل الأسماك كما هى أو يتم طهيها مع البصل وصلصة الطماطم. ومعظم الذين تم سؤالهم لا يعرفون صناعة الفسيخ بل يشترى جاهزاً. أما التركين فهو عبارة عن منتج من حفظ السمك في شكل عجين كثيف الحجم، وقد تم ملاحظة ثلاث طرق لإعداده وهى : · نظافة السمك وخلطه بالملح داخل إناء فخاري ويخلط بجريدة نخل حتى يتحول السمك الى شكل عجينة ثم يحفظ المنتج تحت الشمس. · تنظيف الأسماك الصغيرة من الخارج وتفتح الأسماك الكبيرة، وبعد أن تترك تجف تحت الشمس لعدة ساعات توضع مع الملح في شكل طبقات وتخلط بجريد النخل حتى تصبح عجينة والتى توضع داخل جرة وتحفظ في الظل. · نفس الطريقة الأولى ولكن بعد الحصول على العجينة يتم تصفية المادة وتغلى عظام الأسماك حتى تستخلص مادة بيضاء (الكالسيوم) يضاف المستخلص الى التركين ويتم حفظ الجرار عادة في فناء المنزل ولا يحفظ التركين في الشمس إلا في حالات نادرة. وبهذا قد تأكد تمام ان وجبة اهل كرمة البلد الرئيسية التركين او الملوحه كما يطلقون عليه .
11-17-2009, 02:11 PM
عماد الدين عبدالله
عماد الدين عبدالله
تاريخ التسجيل: 09-10-2009
مجموع المشاركات: 3678
سلام ياعمدة نحن الليلة العصرية دى مالقينا موضوع غير التركين وهسة كنا دايرين عماد فردتك يجينا بى جاى ويعمل لينا دراسة عن اصل وفصل التركين وهسة انا من قبيل بفتش فى النت على صورة تركين فى علبة المربى بتاعتها ومالاقيها ..
11-17-2009, 02:38 PM
مريم عبد الله
مريم عبد الله
تاريخ التسجيل: 10-09-2009
مجموع المشاركات: 1448
ايوة عادل كان جابها فى الصحن وجاهزة للاكل فعلا .. اها انتى ناس شمس الدين ديل كانوا بيعملوها ولا شنو؟ هى فعلا اكلة لذيذة ولما تدورى فيها مافى حاجة اسمها شبعت يعنى الواحد مابيقيف الا لما خلاص مايلقى محل تانى لى لقمة ..
11-17-2009, 03:09 PM
مريم عبد الله
مريم عبد الله
تاريخ التسجيل: 10-09-2009
مجموع المشاركات: 1448
يا شباب سلامات بسحروكم. انا ياداب قريت شوية مداخلات من امس والليلة وبكرة قرب بجى. فعلآ البوست داير ليهو تفرغ، مع الشغل الكتير ده الواحد ما حيقدر يتابع كويس. كويس معاك يا روما؟
عابدون بوريك بعض الفنيات التقنية. تدفع نقدآ ولا عينآ؟ تركين ما معانا.
عماد احمد نزل توثيقك لحلة حمد. انا كلامى ما كتير. بكتب عن فترة سنوات قليلة لطفولة سعيدة كانت تنوم وتصحا على اصوات الطيور واغاريد البلبل والقمرى وصوت المتر ومدائح اولاد حاج الماحى يوم الجمعة.
Quote: يا شباب سلامات بسحروكم. انا ياداب قريت شوية مداخلات من امس والليلة وبكرة قرب بجى. فعلآ البوست داير ليهو تفرغ، مع الشغل الكتير ده الواحد ما حيقدر يتابع كويس. كويس معاك يا روما؟
العزيز عادل
مساءك فل وياسمين ولا نقول ليك صباحك
الشباب ماشاء الله عليهم عيني باردة
والدكتورة ما قصرت تفرغ تام كفت ووفت
ربنا يديها الصحة والعافية
تحياتي واحترامي
11-17-2009, 08:28 PM
عماد الدين عبدالله
عماد الدين عبدالله
تاريخ التسجيل: 09-10-2009
مجموع المشاركات: 3678
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة