|
تليفزيون السودان قال دمعة الشوق ألحان سرور
|
أمس شفت حلقة إعادة لبرنامج يبدو من طريقته زى المقصود منه ما يشبه االتوثيق، وكان فى شكل سلسلة تم بثها ايام عيد الفطر
الحلقة كانت عن الحاج محمد أحمد سرور، وكانت ماشه كويس وفى أمان الله، على الرغم من ضعف نوعية الأسئلة وحتى طريقة المونتاج كانت بايخه جدا وظاهرة فى بتر وقطع إجابات الضيفين، إبنة سرور وضيف أشير ليهو بإنه صديق أسرة سرور
ده كله هين ومقبول
المشكلة إنه فى الجزء الأخير من الحلقة المذيعة جابت سيرة "كرومة" وقالت للضيف ما معناه إنه سرور وكرومة بقو حاجتين ما بنفصلو، زى هلال مريخ كده، هكذا، وفى رد الضيف دخل مباشرة لموضوع المضاربات المعروفة الحصلت بين معسكر سرور ومعسكر كرومة وقال كلام ساى لا مرتب ولا متسلسل وشوية جدا كمان
ده برضه هين ومقبول
وبعد الجزء الأخير فى الحلقة ونهاية اللقاء غنى الفنانين الشباب الأربعة المشاركين بالأداء فى البرنامج، ولدين وبنتين، عرفت منهم إيمان توفيق، وبدأو يغنو "دمعة الشوق"
أول شى أنا افتكرت انه مافى غلط، صاح الحلقة عن الحاج محمد أحمد سرور، لكين قلت يمكن ناس التلفزيون قالو طالما جات سيرة "كرومة" مافى مانع نديهو أغنية
استغربت جدا والله من الموضوع وقلت يلا يمكن كمان الشباب ديل ما قدرو يجهزو ليهم واحدة من أغنيات سرور يتمو بيها زمن البرنامج
فإذا بالطامة العظمى والكبرى تظهر مع بداية الأغنية
وتلفزيونا القومى العزيز يكتب بالبنط العرض والطويل
دمعة الشوق - كلمات مصطفى بطران - ألحان وأداء سرور - مشاركة الأداء المجموعة
معقول لكين يا ناس التلفزيون ؟
هسه زى ده يقولو عليهو شنو ؟
|
|
|
|
|
|