كل عام والجميع بخير طبعا فى كل صيف يشد اهلنا المغتربين الرحال الى السودان والسفر بالطائرة هو الوسيلة الأسهل لذلك برغم الخمخمة والشنط الملايان دلاقين وادوات وغيره من الأشياء الضرورية والغير ضرورية لتقسيمها للأهل والأحباب فى السودان وما عارفين انه المغترب ده طلع زيته عشان يلم القروش دى
طبعا اول دخولك للمطار من البلد المسافر منه تشوف الشنط ذات الأحجام الضخمة والكراتين والكياس الممتلئة بالحاجات المطلوبة وتبدا عملية شحن التروللى فى مدخل صالة المغادرة وانت واقف فى صف الميزان يجيك واحد يقول ليك عليك الله شيل لى الموبايل ده معاك او اللابتوب ده وطبعا ديل معروفين انهم من الجماعة البتاجروا بالمراسلة يعنى تجار مراسلين المنظر التانى معروف فى بعض الدول انه الميزان محدود جدا بالنسبة لحمولة الشنطة فتعال شوف البهدلة لمن الوزن يطلع زيادة هاك يا تفتيح شنط ويشيل من الشنطة دى ويخت فى الشنطة التانية ولا يشحت ليهو واحد من المسافرين وزنه خفيف عشان يشيل ليهو باقى الدلاقين وده على حساب الصف والناس منتظرة وتسب وتلعن فى بتاع الكوانتر الماعنده ذنب فى الموضوع لأنه صاحبنا السودانى هو السبب فى هذا التعطيل يلا بقى تعالوا شوفو السلوك لمن الناس تركب الطيارة معروف انه كل شخص عنده فى التذكرة رقم الكرسى والصف عشان يقعد فيهو ، لكن فى ناس يعجبوك نظام اركب اول يقعد قدام زى البص وما عارف انه الحكاية منظمة يجيى المضيف بكل ادب يقول ليه قوم اقعد فى الكرسى بتاعك طبعا صاحبنا يتغاظ جدا وما يعجبه الكلام ويتزهج طبعا اول ما الطيارة تستعد للقيام تسمع صوت الكابتن فى ارشادات السلامة ومن ضمنها ربط حزام الأمان واغلاق الموبايل طبع فى بعض الناس يعجبوك ولا يجيب خبر لحزام الامان ولا يفكر يغلق الموبايل يخلى فاتح عناد كده فى كابتن الطيارة ولسه واول ما الطيارة تقوم ولسة ما استعدلت فى الجو تلقى واحد قام المن الكرسى بتاعه عايز يمشى الحمام ولا يفتح الدرج عشان يطلع حاجة من الشنطة وفى الحالدة دى يزجره مضيف الطيارة عشان يقعد طبعا عند حدوث المطبات الهوائية تظهر علامة ربط الحزام ويبدا المضيفين فى المرور على الركاب لتذكيرهم برط الحزام لسلامتهم اثناء المطب الهوائى لكن طبعا نحن ركاب نحب التحدى دائما بس المضيف يمشى بهنا وتلقى بعض الناس فكو الحزام لا والعجب فى ناس عايزين يمشوا الحمام او يطلع ليه حاجة من درج الطيارة والطيارة بتنطط زى الكورة فى المطب الهوائى
اما فى تعليمات النزول طبعا معروف لدى اجميع لازم الكرسى يرجع لوضعه الطبيعى والتربيزة بتاعةالكرسى كذلك مع ربط حزام الامان لكن نحن واغلاق الموبايل لكن نحن طبع بنحب نتحدى الطبيعة والقانون دائما فتلقى بعض الركاب نايم وخاتى راسه فى طربيزة الكرسى وماعايز يربط الحزام وفاتح الموبايل واول ما الطيارة تنزل بتجى التعليمات انه ماى حد يفك الحزام ويفتح الأجهزة مالم تقيف الطيارة تماما ونحن طبعا التحدى هو شعارنا المفضل واول ما الطيارة عجلاتها تلمس الأرض فى الإستعداد للوقوف نفك الحزام ونفتح الموابايلات ونقوم من الكراسى ونفتح الرفوف ونطلع الشنط عشان كل واحد عايز يطلع من الطيارة الأول وتعال شوف الالناس الشفقانين والعايزين يطلعوا قبل ما يجيبوا سلم الطيارة زاتوا وبالرغم من كل هذه السلوكيات يودعك مضيف او مضيفة الطيارة بابتسامة جميلة لكن ما عارف هل هى ابتسامة حقت وداع ولا ابتسامة للتصرفات العبيطة بتاعت بعض الركاب ذو السلوك الغير ملتزم داخل الطائرة
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
مصطفى توفيق
فيس بوك
تويتر
انستقرام
يوتيوب
بنتيريست