|
|
 منو الفيكم حب زمن البريد البجى فى خمستاشر يوم وبقرا الجواب خمستاشر مره
|
القصه ماجات عبس كنت اتناقش مع دكتور احمد ولدى ربنا يحفظه بنتكلم عن الحب
وكنا مشقلين الفنان عثمان حسين ودار النقاش فى موضوعين الاول احمد ولدى بحب عثمان
حسين وانا طبعا مبسوط فقمت قت ليه يا احمد اظنك بقيت بتحب قال ليه يا ابو احمد
قت ليه انا زمان حبيت امك بى عثمان حسين وبسمعو كل الليل وانا كنت مغترب فى السعوديه
الكلام كان سنة 82 وبعدين الجواب كان بجينا بعد 15 يوم وكنت بنتظرو بى فارق الصبر
وبعد ما يجينى بقراهو كل صباح ومساء حتى يصل الجواب التانى فقام قالى والله يابوى
انا متاثر بيك وبى حبك لى امى وحبك لينا الشاهد انو نحن حبينا بي شوق فيه حرمان شديد
وكان عندو طعم مش زى هسع..........
معليش انا اعجبنى الاسلوب من شاب لسع بسمع عمالقة الفن فى بلادى
|
|
 
|
|
|
|
|
|
|
|
Re: منو الفيكم حب زمن البريد البجى فى خمستاشر يوم وبقرا الجواب خمستاشر مره (Re: Tragie Mustafa)
|
Quote:
تعتبر شباب برضو يا خالد
في ناس حبوا هنا وقت البوسته فربت تماما
وكانوا ماكلين نيم وساكتين(هههههههه)!!
حب الزمن ده انهى عنصر اللغه
لانه بقت كتابه مافي
مس كولي ومس كولك
وموبايل وموبايلك
واسكاي بي واسكايبك(هههههه)
كله ابو سريع.
|
الاخت تراجى ات عارفه نحن امكن ناس البوسته ديل ادونا من دنهم
شويه وبعدين يا تراجى كل حاجه عندنا زمان كان متعوب فيها يعنى
فيها شى من زمن الحقيبه مافى حاجه جات بى الصدفه شكرا
| |
|
|
|
|
|
|
|
|
 Re: منو الفيكم حب زمن البريد البجى فى خمستاشر يوم وبقرا الجواب خمستاشر مره (Re: خالد المحرب)
|
عزيزي الفاضل خالد .. أرجو أن تسمح لي بأن أساهم في هذا البوست الرايق بهذا المقال "الإلكتروني" الذي نشر لي بصحيفة الأيام في 2004 ، ,اتمنى أن لا يكون مخلاً بموضوع البوست ، ،،
مع تحياتي للجميع وكل سنة وأنتم طيبون ...
------------------------------
بسم الله الرحمن الرحيم
السادة / هيئة تحرير صحيفة الأيام
لعناية : كشكول الأيام / رسالة الصفحة
بــعــــد التــحــــــــيــــــة والاحترام
أرجو منكم شاكراً ومقدراً تسليم هذه الرسالة الإلكترونية على وجه السرعة، حتى لا يتهمنا أبنائنا بأن حاسوباتنا ضاربة ، وأجهزة إرسالنا خارج الشـــــــبكة .....!!
المرسل إليه : أبو عبيدة حسن محمود@جيل الأبناء.أمل
نسخة أولى : إلى جميع طلاب الثانويان والجامعات والشباب العاطل عن العمل .
نسخة ثانية : إلى جميع أجهزة الإعلام المقرؤة والمرئية والمسموعة توصل إلى الأقسام الثقافية والعلمية والفنية بتلك الدور .
الراسل : صديق عبد الجبار محمد طه@ جيل الآباء.رجاء
لفتت نظري وسررت بها جداً يا ابني أبا عبيدة رسالتك بكل ودها ######طها والتي بعثت بها يوم الأحد الماضي 27/يونيو/2004 م على هذا الموقع . والذي أسعدني هو أن يكون هنالك من أمثالك في جيلكم الذي له الجرأة والشجاعة على التعبير عن دواخله , وبأسلوب أدبي جميل وراقي ومهذب , ولقد عبَرت إلى حد كبير وبنجاح لا بأس به عن معضلة حقيقية تواجه العلاقة بين الأجيال في هذا الوطن الغالي , فأنا أهنئك على إقدامك وشجاعتك الأدبية , وأرجو مخلصاً أن تكون رسالتك تلك هي القرص المرن الذي يحتوي على الفايلات المحفزة لتشغيل برامج حوار الأجيال الذي يعاني من فيروس تسلل إليه عبر ( مرفق ) مع رسالة تسلمها الشعب السوداني صبيحة يوم الجمعة الثلاثين من يونيو 1989 م .
ومع إعجابي واحترامي لرسالتك الهامة أود أن ألفت نظرك ونظر كل أبناء جيلك للحقائق الآتية :
أولاً : إن الغالبية العظمى من جيل الآباء الذين عنيتهم في رسالتك لا يعتصمون بسودان الستينيات بل بالعكس فنحن نعتقد بأن الجيل الذي تسلم الراية من المستعمر وعلى الرغم من تقديرنا وتثميننا لمجاهداتهم التي توجت باستقلالنا السياسي، لكنهم قد أخفقوا إخفاقاً كبيراً في التأسيس لسودان جديد ومتطور في كل المجالات سياسياً واقتصاديا واجتماعياً وثقافياً وفنياً ورياضياً , صحيح كانت هنالك بعض الإشراقات والنجاحات ولكنها كانت فطيرة وعفوية ولم تكن تهتم بوضع وتنفيذ الخطط والدراسات والمشاريع العلمية الإستراتيجية المستقبلية , فلقد كانت تتملكهم روح العمل التكتيكي الآني حتى ولو لم تكن هنالك حوجة لاستعمال كذلك أسلوباً تكتيكياً والذي نؤمن بأنه ضروري في بعض الحالات،وإليك شهادة شاهد من أهل هؤلاء العظماء الذين عنيتهم، ألا وهو الأستاذ القانوني والمهندس العظيم رحمه الله رئيس وزراء ووزير خارجية السودان السابق محمد أحمد محجوب في شهادته على العصر:الديمقراطية في الميزان صفحة 304 حيث قال : (الأحزاب التي عملت من أجل الاستقلال أو عارضته ، وجدت نفسها بلا هدف معين ، وفشلت جميع محاولات وضع سياسة متناسقة ، فكانت النتيجة قيام حكم ائتلافي.وبلغت الخصومات الشخصية والطائفية والدسائس أوجها، وأصبحت القوة الشخصية القصيرة المدى هي المسيطرة،والأحزاب السياسية كانت قائمة على الولاء القبلي والطائفي بدلاً من البرامج الصالحة .)
ثانياً : لقد عبَرت عن سخطك بكل وضوح ولكنك عممت فظلمت وأنت دارس للحقوق فكان عليك وأنت في منتصف الطريق لكي تكون أحد حماة العدل ومنفذي القانون أن لا تنجرف وراء حماستك وتحكم علينا جميعاً بأننا نجثم على صدوركم ونخنق كل محاولاتكم للإفلات من سلطان حرسنا الحديدي , فأنا ومثلي كثر ولي ابن في مثل سنك ,أعمل ما بوسعي لكي ينفلت من سلطاني وتكون له رؤيته المستقبلية , وشخصيته الحرة , وأن يكون مستهلكاً جيداً للوسائل التقنية التي سخر الله لنا الخواجات لكي يعطوننا لها جاهزة , مثل أجهزة الهاتف الجوال , والحاسوب , والتلفزيون , وحتى هاتف المنزل العادي , ولقد قالوها عنا الخواجات بأننا لا ننتج وفي نفس الوقت BAD CONSUMERS (مستهلكين سيئين) . وأنا هنا لا أريد أن أنهي عن خلق وأتي بمثله , ولا يتوجب علي أن أعمم كما فعلت أنت , ولكني أقولها بكل صدق أن كثير من أبناء جيلك أنت وإبني , يتهيبون تحمل المسئولية ويجلسون على مقاعد المتفرجين , ولا يريدون المشاركة الحقيقية في بناء سودان وخرطوم عام 2050 وعام 2600 الذين تساءلت عنهما . ابني أبا عبيدة , إنني أستطيع أن أجزم بأنك لست من هذه الفئة التي عنيتها أنا سابقاً , ولذلك فنصيحتي إليك أن تستثمر مقدرتك الهائلة هذه وتبدأ في مخاطبة جيلك أنت مباشرة لتحرضهم على تحمل المسؤولية , والقفز من على الهامش إلى قلب صناعة الأحداث , والحراك الاجتماعي والثقافي , وسيكون ذلك أجدى من مخاطبتنا نحن لكم , ونحن على استعداد للمساعدة متى ما أردتم ذلك .
ثالثاً : إن أكتوبر قد صنعها جيل كان في مثل سنكم ، وكان الأب الذي يخاطبك الآن في السابعة من عمره وشارك بكل فخر في أكتوبر بمد المتظاهرين من طلاب الثانوية بالمناشف المبللة بالمياه الباردة لتخفيف أثر الغازات المسيلة للدموع وعندما غنى محمد عثمان وردي الطير المهاجر كان في العشرينات من عمره , أما عن تقليلك لشأن اهتمامنا بموسم هجرة الطيب صالح إلى الشمال , فالأدب الأصيل يا ابني لا يخضع للقاعدة الدينية لكل أجل كتاب , فهو لا يموت ويبقى إلى الأبد بإذن ربه , فقبله خلدت قصة مدينتين لتشارلس دكينز , وأبكي يا وطني الحبيب لألن باتون , ويكفيك إنتاج وليام شكسبير الذي ما زال أدبه الغزير حياً يرزق بكامل شبابه وعنفوانه . فبدلاً من السخط علينا ونحن نبكي على الأطلال فاصنعوا لنا قصراً جديداً وأقيموا فيه أفراحكم ولا تهتموا بإرسال كروت دعوة لنا , فنحن مدعوون بالأصالة , وسيكون منا المأذون ووكلاء العرسان , وحراس الصيوان , وان أردتمونا أن نشارككم الاستماع لرائعة مثل الطير المهاجر , فاصنعوها لنا بدلاً عن ( التش.. تش..الزينبية.. حلاوة لبن.. يا سلام !!) ويا حبيبي مسكلي وأنا أمسكليك ..!!
وفي الختام , فإن العقل والمنطق وحقائق الأشياء تقول أن الأدب الجيد , والفن الرائع , والثقافة المتجددة , وحتى الرجال و الثورات العظام، هي التي تفرض نفسها , فلا جيلي أنا ولا جيلكم أنتم , ولا الأجيال الماضية أو المستقبلية , هي التي تحدد الصالح من الطالح , ودائماً يكون البقاء للأفضل وأما الزبد فيذهب جفاء .
ودمت ودمتم ودمنا في رعاية الله
والسلام عليكم ورحمة الله تعالى وبركاته
مــع تــحـــيــات
أبو فواز
الخرطوم بحري في 28 / يونيو / 2004م
[email protected]
[email protected]
جوال : 00249912355113
| |
|
|
|
|
|
|
|
|
|
Re: منو الفيكم حب زمن البريد البجى فى خمستاشر يوم وبقرا الجواب خمستاشر مره (Re: طارق جبريل)
|
انتو يا الحبان ولاد الزمن دة يا كافي البلا حتى الحب آآآبيعرفوهو
الله اداهم الماسنجرات والفيس بوك والياهو والتوتر والموبايل والاس ام اس
بعد دة كله حبهم دراب دراب
النبي شوفوا جنس كلامهم في الشريط التحت في قناة النيل الازرق داك
وحات الله يسولوم في جنس نضمي يمين الغنمايي ما يأثر فيها
والله لاهن عارفين يحبوا ولاهم قادرين علي النخجي والجوعير
بالله الواحدة تكتبلو: انا بحب المريخ عشان لعيبتهم ظريفين
يقوم يردلا: ظريفين شنو ياخي ديل وهم ساكت
يمين ان كنت انا ان بقت قالتلي بحب مريخ أم علقة
كنت قلتلا: أنا أصلي غير كورتهم ما قاعدة تعجبني كورة ولا حتى برشلونة
ديل بُطان شنو ديل
يا حليل أيامنا وأيام ود شيقوق
بالله البني تحرن ليها قدام حلتهم لامن الشمس ترقدك كداد
وتقعد تحاحيلا من هني لا هني
واصلو حلتهم دي كلها تبقى اهلك وتسوي الدرب ساساقا ضُمة ضمة
والعجب ان بقى الله اكرمك بي بكاء في حلتهم ولا في بيتهم زاتو
يمين يدينك يبقبقن من حفير الصيوانات واصلك لا تقول اح
والعجب ان دخل لا جوة وجبتلك ترمسة ألت شاي وايدها دقشت في ايدك
يمين تجي منفوخ من لا جوة وماشي شايل ترمستك وتتقدل بي طرف اصابعينك علي النعامة
واصلو ان خلوك يمين في بيت البكاء دة تقرب تفكلك زغروتي
والعجب لو عندهم عرس في حلتهم ولا في بيتهم زاتو
يمين تجيب فرشك وبهيتك وتقعد تضرب في بيبان العرس ديل لامن تلمعن
وتطلع تفتش السباليق ان بقى فيهن شي مكدب
وان بقى عندهم غنم تسقيهن وتجيبلهن القش
ودة كله بس فشان تحاحيلك شوفتا منها
هسي بالله الواحدة تقول ليه: يا تامر يلاكا معاي ياخي عايزة اشتري ملابس داخلية وفوط صحية
وهو يقولها: خلاص لمن تكوني جاهزة مسكلي لي
يمين نحن الملابس الداخليي دي تبقالنا قدحة لا شفناها لا رأيناه
وحتى ان بقينا شفناهن وكتنا داك يمين علي ننهق زي الحمير اكرمكم الله
وكمان جابتلها فوط صحيي... وحات نضري القطن دة شفناهو بعد دخلنا الجامعة
وكتين تنجرح ويقشطولم قطنايي ملياني صبغة يود في الجرح
ديل نصايب شنو ديل
بالله هسي البني تقعد تنتظر في الولد وتشتريلو في الهدايي
جملة الأيمان وكتنا فشان بس تشوفها تسويلك في جنس عمايل
ان بقى عندها اخو يقطع الخميرة من البيت تصاحبو
وان بقى عندها بت خالتا ليها تعرف بنات ود عمك تمشي توصيهن
وبعد دة كله ان بقيت شفتها بعد تلاتة شهور انت كسبان وتعيش عليهن
لامن تجي تاني تحاحيلا من أول جديد واصلو لا تخليلك الجابري ولا زيدان
ولا احمد المصطفى.. بس تقعد تسمع في اغاني النخجي والجوعير ديل
وتتوجع في حوش بيتكم لامن الله يعدلها عليك وتلم فيها تاني وتاخدلك حنك حنكين معاها
والعجب ان بقيت داير تكتبلك ليها جواب
بالله تقعد تحاحي في ابوك لامن تصل الدولاب أليلو وتسرق الريحي ألتو وتبخها في الفلسكاب
وتسويلك وريقات زي البخرات تكتب وتشطب فيهن لامن يجنك الكلمات السمحات
ويخلنها وكت تقراهن تتبسم..
ووكتين تنتهي تقعد اسبوعين تفكر في النصيبة التوصله ليها
وترجع لي المحاحا من جديد.. والعجب ان لقيتها قدامك
من الخلعة تديها الجواب وتقولها اديهو لي اخوكي
وبالله تنتظر عيد الفطر دة من السنة للسنة فشان تجي داخل لاااجوة وتباركلهم العيد
وأصلو الكعكايي الادتك ليها دي لا تاكلها لا تضوقها.. تختها في دولابك وسط الهدوم لامن تعتت وتنشف
وكل يوم تجي تشمها من تحت الهدوم وترجعها تاني.. والقميص الختيت فيه الكعكايي دة
تلبسو من المناسبات للمناسبات...
هسي الله بيسألكم داك حب وأليل البُطان ديل حب
طروقى قت اجيبو ضمه كدى وبعدين ارد عليه
| |
|
|
|
|
|
|
|
|
|
Re: منو الفيكم حب زمن البريد البجى فى خمستاشر يوم وبقرا الجواب خمستاشر مره (Re: عفاف أبو حريرة)
|
خالد المحرب كيفك
يازول خلى الانسياطه دى، فى عمر زى ده مفروض تمشى صلاة الجمعه من يوم الثلاثاء
خلينى من حبيت وما حبيت...وبعدين ما اهلك البعرفهم ديك
وحات شيخى بعد ده تقول بحبها يطعنوك
ده كلام اولاد خرتوم انت شن خبرك
لى هسه ابودليق حقتك دى الجواب بعد يتكتب بالصفحتين يصل فى شهر
بعدين خجلت حبوبه عفاف دى لما ما قدرت تكتب
ود بها يقرا فى البوست ياخى لووووووووول
وانت كان داير تعمل ليك عمله زول واحد بعد ده سالك مافى
الله يجازى محنك يا المسخوت.....
ربنا يديم البينكم زيحفظ ليكم وليداتكم ودمم،،،،،
| |
|
|
|
|
|
|
|
|
|
Re: منو الفيكم حب زمن البريد البجى فى خمستاشر يوم وبقرا الجواب خمستاشر مره (Re: صديق الموج)
|
Quote: خالد المحرب كيفك
يازول خلى الانسياطه دى، فى عمر زى ده مفروض تمشى صلاة الجمعه من يوم الثلاثاء
خلينى من حبيت وما حبيت...وبعدين ما اهلك البعرفهم ديك
وحات شيخى بعد ده تقول بحبها يطعنوك
ده كلام اولاد خرتوم انت شن خبرك
لى هسه ابودليق حقتك دى الجواب بعد يتكتب بالصفحتين يصل فى شهر
بعدين خجلت حبوبه عفاف دى لما ما قدرت تكتب
ود بها يقرا فى البوست ياخى لووووووووول
وانت كان داير تعمل ليك عمله زول واحد بعد ده سالك مافى
الله يجازى محنك يا المسخوت.....
ربنا يديم البينكم زيحفظ ليكم وليداتكم ودمم،،،،، |
الاخ الموج انا والله عندى مشاعر بحب ابوح بيها فى نفس اللحظه
ومشكلتى انى بفتح بوست وبنشغل لانى ماعندى انترنت الا فى البيت
عملى ميدانى لاعلاقه له بالجلوس على المكتب عشان كدى مرات
افتح البوست وقت لحظة وجودى فقط
| |
|
|
|
|
|
|
| |
خالد المحرب
فاروق أبوحوه
Tragie Mustafa
صديق عبد الجبار
طارق جبريل
عفاف أبو حريرة
صديق الموج
فيصل محمد خليل
فيس بوك
تويتر
انستقرام
يوتيوب
بنتيريست