Re: نادية مختار , الف مبروكـ (Re: النذير حجازي)
شكرا أحمدالصديق وربنا يعيده عليك بكل الخير قرأت هذه الرسالة الحزينة من إرشيف منبر نادية عثمان ، فأحزنتنى كثيرا ، فقد شربت أنا أيضا من نفس الكأس : رسالة إلى الحبيب الغالي تجده بخير.. ومشتاقة ليك ( موت) !! شهر رمضان جاء يا غالي !! كدا خمسة ولا أربعة (رمضانات) ولا ألف وانت بعيد ؟!! معقولة بعد أيام بتكمل الأربعة سنوات (مقفولات) غياب ؟ يا الهي !! موش هسة أمبارح دي كنت معاي في البيت وفي الشارع وفي المسرح ؟! موش كنت معاي في البنك بنجيب قروش شغل الجريدة والشركة ! موش كنت وأقف هسي في المطبخ عشان تعمل لينا بطاطس بالبيض ؟ طيب الحصل شنو بي وراي ممكن أفهم ؟! تقدر توريني ليه عملت كدا وعذبتني باقي عمري ياخ ؟! تمشي ليه من غير تكلمني يعني ؟! موش اتواعدنا نقعد سوة في العالم ده ونمشي سوة وما نتفارق ولا تخليني ولا أخليك ؟! طيب ليه توصلني المطار في رحلة للسودان وترجع انت وبعد عشرين يوم من سفري تسافر سفريتك الحارة دي ؟! هانت عليك نادية يا محمد ؟ هانت عليك إيمان بتنا يا حبيب عمري أنا ؟ ليه ما انتظرتني أشوفك ؟ أضمك؟ أشم ريحة مسامك الطيبة للمرة الأخيرة يا محمد ؟ ليه مشيت ياخ ما لسة بدري حبيبي ؟ عليك الله الكان وأجعك شنو يا حبيب قساي لدرجة انك تموت عديل ؟ النبي فيك اتوجعتا لمن روحك طلعت يا أبو إيمان ؟! طيب ناديت اسمي وأنت ماشي ؟ ليه ما خليت إيمان تمشي معاك وتودعك طيب ؟ معقولة يا محمد حتى شقيقاتك اسري ومريم يجوا يلقوك تحت التراب لا سلام ولا كلام ولا وداع يا غالي ما بالغت لكن ؟! ليه كدا يا محمد أنا من بعدك ما ضقت راحة يا غالي ! حتى لمن أقول مسكت لي خيوط فرحة بيدي تعوضني حبك وحنانك ورعايتك الاقيها مجرد سراب وخيوط دخان وموية مطرة تكب من السماء وتطير للسماء وتتبخر يا حبيب قلبي أنا !! يا ريتك سقتني معاك يا غالي لأنو الدنيا من غيرك لا طعم لا لون لا ريحة !! مسكينة إيمان ده العيد الرابع يجي عليها وانت ما تجيب ليها هدوم العيد يا محمد ؟! ماشفت مساخة شهر رمضان من غيرك يا محمد !! ماشفت مساخة شوارع عين شمس من غير اثر تراب رجلينك فيها يا طاهر القلب ! الدنيا كلها بعدك لبست سواد وحالفة ما تقلعوا يا محمد !! أنا من بعد رحيلك المُر زي العلقم والحار زي النار بتي واهلي واصحابي وناسي قالوا لي بتموتي ناقصة عمر من الحزن ولازم تشوفي ليك رفيق تاني تكملي معاهو بقية عمرك وأنتي ما بتحبي الوحدة !! قالوا لي حرام شبابك وخافي علي روحك من الفتنة واتزوجي على سنة الله ورسوله والدنيا ما بتقيف بموت محمد !! أها بتكون عارف زي ما كلمتني في المنام اليوم داك إني فعلا حاولت أشوف في سكك الحياة (زول) يعوضني حبك وحنيتك ودفاك وطهر دواخلك وكرمك وحلاوة كلامك وشجاعتك ونبلك وشهامتك وسماحة روحك يا محمد عشان بس أقول محمد ما مات ولسة حي في الناس البشبهوك في خصالك وصفاتك السمحة والدنيا فيها الكويسين والسمحين لكن برضو انت زول براك كدا وعملة نادرة وبصمة ما بتتكرر يا أبو إيمان !! عارف؟ أنا رحلت من عين شمس لأنو غلبني اقعد فيها بدونك ! هسي بمشي مرات بس وقلبي مقبوض اقيف جنب مقابر عين شمس من برة اسلم عليك وأدعو ليك بالجنة وامشي قوام !! الملائكة قعد يوصلوا ليك سلامي في الجنة يا محمد ؟! سامحني يا محمد عشان ما اخدت عفوك قبل تسافر السفرة البعيدة دي ياخ !! مشيت وانت راضي عني يا غالي ؟! سامحني على كل غلطة في حقك وعلى كل لحظة بعدت فيها عنك لكن أنا ما قايلاك بتموت وانت يا دوب في اربعينك وعز شبابك الناضر يا محمد !! عليك الله ما تزعل مني وطوالي تعال لي اتونس معاك في الأحلام وكمان جيب لي معاك الباسطة الكنت بحبها واعمل لي البيض بالبطاطس بيدك يا حبيبي سمح ؟ محمد وأجعني فراقك شديد ياخ ما في طريقة تجي يوم بس أسالمك وترجع تاني ؟! ما عارفني بريدك قدر شنو ليه تغيب أربعة سنوات ما كتيرة يا حمو ياخ ؟! عارف؟ مريم دمعتها ما جفت عليك وعلى نار رحليك الفاجع الباكر لي يوم الليلة ! وأسرى كرهت مصر وقاعدة هناك في الدوحة هي وصلاح وعيالهم عشان ما يجوا بلد ما فيها انت يا حمو ! عارف؟ إيمان معظم الوقت قاعدة مع انتصار في فيصل عشان ما تحس بالوحدة وهناك عيال انتصار بتونسوا معاها وينسوها فراقك الحاااار يا بابا !! ما قلت ليك أنا يا محمد ؟ موش البت الصغيرونة المفعوصة إيمان كبرت ونجحت ودخلت أولى جامعة القاهرة ( الأم ) في كلية القانون ؟! ااي والله دخلت الجامعة وبأذن الله تعمل دكتوراه في القانون وتبقى د. إيمان محمد الحاج !! تعبك ما بروح هدر يا أبو إيمان وبنتك صلاتي على النبي شاطرة وفالحة وصالحة ربنا يغطي عليها يا رب العالمين ! محمد تصدق طلعت لي عشرة شعرات بيضاء في رأسي من بعد موتك يا حبيب؟ يا ربي لو أنت كنت في كان العشرة شعرات ديل راح يبيض لونهم وسط سواد شعري يا محمد ولا شيبت أنا في عز شبابي من هول فاجعتي في رحيلك يا أبو إيمان ؟! عاين يا غالي : أنا محتاجة ليك شديد ما في طريقة تجي حبة بس ؟! صورتك ما كفاية عاوزة أشوفك انت بشحمك ولحمك وروحك حية تنبض بالحياة ! ما في طريقة موش؟ استغفر الله يا رب ! عارفة البموت ما برجع لكن ممكن نحنا نمشي للميت وممكن ربنا يجمعنا معاهو في جنات النعيم كمان موش ؟! خلاص يا (زوجي الحبيب) نتلاقى يوم القيامة ويا رب ادخل معاك الجنة وربنا يغفر لي كل ذنوبي وألاقيك تحت سدرة المنتهى يا محمد ونتونس ونضحك زي زمان ! في الجنة في بيض بالبطاطس يا محمد ؟ الله ..يا الله من هذا الوجع وهذا الفراق المؤلم يا محمد ياخ !! معليش لو دموعي دي حرقتك في نومتك سامحني لكن غصبا عني ومن شوقي ليك يا أبو بنيتي الوحيدة ! نوم في نعيمك مرتاح يا محمد وما تشيل همنا نحنا بخير والحمد لله بس مشتاقين ليك كلنا شددددددديد والله ! عارفة ما عندك طريقة تجي بس بنبلغك حار السلام يا غالي وربنا يجمعنا بيك يوم الحشر الأعظم في فردوسه الأعلى يا رب ! ويلا يا محمد خليتك في أمان الله ورعايته وحفظه ! ورمضان كريم عليك في جنتك يا غالي وكل سنة وانت ملاك !! المكلومة زوجتك / نادية عثمان مختار (عدل بواسطة خلف الله عبود on 09-02-2010, 02:20 PM) (عدل بواسطة خلف الله عبود on 09-02-2010, 02:26 PM)

العنوان	الكاتب	Date
نادية مختار , الف مبروكـ	خدر	08-22-10, 11:10 PM
Re: نادية مختار , الف مبروكـ	خدر	08-22-10, 11:12 PM
Re: نادية مختار , الف مبروكـ	طارق جبريل	08-22-10, 11:14 PM
Re: نادية مختار , الف مبروكـ	GamarBoBa	08-22-10, 11:28 PM
Re: نادية مختار , الف مبروكـ	خدر	08-22-10, 11:42 PM
Re: نادية مختار , الف مبروكـ	خدر	08-22-10, 11:40 PM
Re: نادية مختار , الف مبروكـ	خدر	08-22-10, 11:18 PM
Re: نادية مختار , الف مبروكـ	yasir Abdelgadir	08-22-10, 11:36 PM
Re: نادية مختار , الف مبروكـ	abdulhalim altilib	08-24-10, 10:03 AM
Re: نادية مختار , الف مبروكـ	خلف الله عبود	09-01-10, 11:38 PM
Re: نادية مختار , الف مبروكـ	خلف الله عبود	09-02-10, 00:09 AM
Re: نادية مختار , الف مبروكـ	أحمد الصديق	09-02-10, 00:16 AM
Re: نادية مختار , الف مبروكـ	حبيب نورة	09-02-10, 03:22 AM
Re: نادية مختار , الف مبروكـ	طارق ميرغني	09-02-10, 09:23 AM
Re: نادية مختار , الف مبروكـ	Ahmed musa	09-02-10, 09:29 AM
Re: نادية مختار , الف مبروكـ	النذير حجازي	09-02-10, 12:32 PM
Re: نادية مختار , الف مبروكـ	خلف الله عبود	09-02-10, 02:10 PM
Re: نادية مختار , الف مبروكـ	معتصم مصطفي الجبلابي	09-02-10, 04:19 PM
Re: نادية مختار , الف مبروكـ	محمد فضل الله المكى	09-02-10, 10:34 PM
Re: نادية مختار , الف مبروكـ	Mohammed Haroun	09-03-10, 10:22 AM
Re: نادية مختار , الف مبروكـ	yasir tamtam	09-03-10, 11:27 AM
Re: نادية مختار , الف مبروكـ	خلف الله عبود	09-03-10, 10:18 PM
Re: نادية مختار , الف مبروكـ	خلف الله عبود	09-04-10, 05:40 PM
Re: نادية مختار , الف مبروكـ	خلف الله عبود	09-04-10, 11:47 PM
Re: نادية مختار , الف مبروكـ	عثمان نواي	09-05-10, 01:03 AM
Re: نادية مختار , الف مبروكـ	خلف الله عبود	09-05-10, 08:58 PM
Re: نادية مختار , الف مبروكـ	خلف الله عبود	09-06-10, 08:33 PM
Re: نادية مختار , الف مبروكـ	أبو عبيدة البصاص	09-06-10, 09:17 PM
Re: نادية مختار , الف مبروكـ	ياسر السر	09-07-10, 09:37 AM
Re: نادية مختار , الف مبروكـ	نادر الفضلى	09-12-10, 06:27 PM

[رد على الموضوع]

صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]