Quote: محمود دا شكله كدا محتاج إجازة لبضعة شهور خارج السودان بعيدا عن الفن و بعيدا عن العيك و العاك و الجمهور و السودانيين و الأضواء في كل مكان لأنه آثار الإستهلاك و الحصار و الضعف النفسي بادية عليه
2
08-19-2010, 02:28 AM
علاء الدين صالح
علاء الدين صالح
تاريخ التسجيل: 08-11-2009
مجموع المشاركات: 1760
Quote: اود ان اشيد بالفنان زرياب برعي بمشاركته ومعلومته
أُستاذ طارق تحياتي وكل عام وأنتم بخير
تعرِف يا أُستاذ، الرائع زرياب عندو أخوانو الإتنين الأكبر مِنّو (مُحِب وهاني) أنا بعتبرهُم من أميز عازفي الكمان في السودان.. لكن مُشكلتهم إنّهم قاعدين هنا في الغُربة السجم دي.. والأخ هاني أُستاذي ومُعلِّمي لآلة الكمان. ما شاء الله كل أبناء وبنات الراحل الموسيقار بُرعي عازفين وموسيقيين مُبدعين ورائعين، لهم جميعاً مني التحية.
الأخ الحبيب ود العباسية أُحييك على هذا البوست اللذيذ الرايق إحساسي بيقول ليْ إنّك ود العباسية ولدنا بتاع الهند، بارتِنة أخونا عماد شوقي عازف البيز جيتار.. لو كلامي ما مظبوط.. تبقى سلبطة منّي ساي.. وبرضو ولدنا.. عميق إحترامي
08-19-2010, 02:47 AM
ودالعباسية
ودالعباسية
تاريخ التسجيل: 10-28-2002
مجموع المشاركات: 2442
من القلب سلام، على تعبك، وهذه الهدية، التي ارتبطت عندي بمذاق أيام حلوة، معتقة في الحي والاهل والطفولة، وهذه الإغنية تعرف نقطة ضعفي تماما، وتفتح برك الدموع في قلبي، وتحج بي ببساطة لأيام خوالي، كان الحلم يزين الحياة، وكان الأمل سيد الغد، وكان وكانت الأسماء الحسنى ترفل في البيد والبيداء...
كتبت رسالة، إلى حبيبتي عزة قبيل شهور، أدرجها هنا، لتدرك مدى عشقي لهذه الأغنية..
****
رسالة إلى حبيبتي عزة!!... الرسالة الأولى بقلم: عبدالغني كرم الله
التاريخ 7/6/20210م
عزة.. تحية طيبة وبعد،،، صباح أسمر جميل، كيف حالك، وأحوالك.. صحوت اليوم، وبي شوق غريب، أن اسمع لغط الصبية وهم في طريقهم للمدرسة، وأن تبتل عروقي "مثل صائم" بهذا الماء الفطري، يبدو كقصيدة بلاوزن، لغط بسيط، يشعل ظلمة الروح، ويقضي ببساطة، على أيقاع آلي (صحو، حمام، عمل، ثرثرة، نوم، صحو، عمل)، كأني ترس دولاب يلف، بلا نبض داخلي، حتى فقدت "الأنا مذاقها" عليك الله شوفي الغربة دي كيف، غربة عن "الذات"، وذلك هو الحزن ياعزة، بل جوهر الحزن، أن تكون غريبا في قلب الجماعة..
انت تعرفين موقع العنقريب الذي كنت أقيل فيه في ضل الضحى (معليش كنت أجر العنقريب من نص الحوش للحائظ، وهو يخربش لك الحوش)، وكنت ألصقه على الحائط الذي يفصلنا عن طريق السوق والمدرسة، كنت اميز صوت سعد من صوت هبة، وأحس بظهورهم المرهقة بشنط الدمورية، وسعاد بنت خالي، كعادتها، تسير وهي تقرأ بصوت عالي في قصيدة تحاول حفظها، (يا إلهي يا إلهي يامجيب الدعوات، أجعل اليوم سعيدا وكثير البركات)، كانت تنشدها بلحن عذب، لم يقال بأن ود الحاوي، اعظم ملحن، وحسن بابكر احسن ملحن، والسنباطي، وسعاد هذه؟ اقسم لك، هذا اللحن، أسكرني أكثر منهم أجمعين،..
الآن وأنا اتذكر، بل غارق في التذكر، (وفي الكتابة معا لهذه الرسالة،) وكأني أهرب عبر الذكرى، لدفء قديم، ولغط الصبية، ذلك اللغط الحيوي، من نفوس لم تؤذيها مناهج، وضغوط، ورهق تربية عملية خاطئة، نفوس لا يزال الحلم ديدنها، ولا تزال بقايا فطرة وهالة الرحم تحيط بها، في حلها وترحالها.
يالها من حياة بسيطة افتقدها، مللت صوت الألة، وايقاع المدن الاسمنتية، وعلوها، لمس الأسمنت غيم السحب، وطردها من عشها السماوي، والقمر، يظهر منزويا بين فرجات العمارات، أريد وقع حوافر حمار وهي تخب على الأرض، أريد أن أشم رائحة البراسيم وهي محمولة على ظهره، صوت الآلة يؤذي قلبي، وسمعي، صفارات انزار الاسعاف، شاحنات، صراخ آلي يومي، لم تصرخ الآلات هكذا، ولا قلب لها، ناهيك عن ما تنفثه مؤخراتها من سموم وغموم في حضن النسيم المسكين...
هل تصدقي، حبيبيتي عزة... وأنا راجع من الوطن، ملأت حقيبتي بأغان قديمة لسرور، والكاشف، ونانسي عجاج، وحمد الريح، والجابري، وربي ياعزة حين سمعت (نار الغربة والبعد)، بكيت، وكأن حمد الريح يغني لي، الغريب أني سمعت هذه الأغنية عشرات المرات، ولكن التجربة، تكشف سر الوطن، (بضدها تتميز الأشياء)، مش؟ أغنية عذبة عن حلاوة الأهل، (شوق للأهل والصحبة، شوق لكل جميل في الحي)، هل رأيتي هذه الصورة للحي، التي ترفل في الأغنية، لقد دخلت الأغنية من باب الشوق، وشممت رائحة عراقي خالي، وسمعت صوت ماء نقاع الزير، وتذوقتها كحلوى، (نار الغربة) تفعل أكثر من ذلك يا عزة.. لم ياعزة؟!!، أثناء صلاة الأغنية، والموسيقى تعطر المكان، والقصيدة تتوغل بكل صورها في قلبي، أحس بواقع الأغنية، واقع ملموس، يتلاشى واقعي، ويصير التذكر واقع حالم، معاش، (الأهل والصحبة)، حتى الأموات من الأهل والصحبة، توقظهم الأغنية، وتتهلل أساريرنا معا، عند لقائي بهم، بعد طول غياب، فالقبر، كالمسافة، تقتل هي الأخرى، الأغنية أشبه برجل بلقيس، الرجل الذي أتى بعرشها في لمح البصر، تأتي الأغنية بالماضي الساحر كله، بوطني، حتى الجبال تحملها كحبة قمح، في راحتها الكريمة، وتضعها في سويداء قلبي، شوق للأهل والصحبة، حتى الممالك الغابرة ياعزة، قامت وغنت في عرس تذكري لك، عزة العظيمة..
شوق لكل جميل في الحي، (ياحاجة سعاد كيف اصبحتو، باب الزنكي يصر من فتح خالي له بعكاز خشبي، الليلة كورة قوية بين فريق وراء وفريق قدام، يا اولاد آدم تعالوا العصرية ساعدوني في زراعة القمح في حواشتي)..
زمان، بل زماااان، كنت اضحك من ابن بطوطة، ومن الادريسي، ومن كل الرحالة، أيكتبون عن مدن؟ هل تحب المدن، والشوارع، والأزقة، هل يعشق الأنسان طريق ترابي بسيط يشق الحلة، هل يعشق الانسان سور، مجرد سور من طين؟ هل تبكي الروح، حين تتذكر مدينتك البعيدة عنك، وقريتك، وشجركم، وهمومك القديمة؟؟
واليوم صرت مدمن لأدب الرحلات، أبكي لإيثاكا التي حرم منها يوليس، وتمنى أن يرى، بعد غيابه سبع سنوات (مثل مصطفى سعيد)، أن يرى دخان حريقها "شفتي مدى الشوق، وشاعريته "، وتذكرت النبي عليه السلام، حين جلس على صخرة وقربه ابي بكر، وهم يبكون، بلى ياعزة (شوقا لشعاب مكة)، بعد أن هاجر عن مرتع طفولته، وشبابه، ذلك اليتيم العظيم، الحنون الخلاق، يقشعر قلبه لمرتع طفولته، يشتاق لحجارة مكة، يشتاق لحجر ياعزة، أليس هو القائل (جبل أحد يحبنا ونحبه)، الإصغاء لقلب المكان، هو الشعر، ..
واليوم رف كتبي ملئ بحكايات الوطن، كل يوم أضحك مع شوقي بدري وأنا اتسكع في حواري ام درمان، وأبكى لوصف معاوية نور للخرطوم مطلع الثلاثينات، وتمنيت ان أركب الترام معه، وأشق غابة خضراء، من القصر الجمهوري وحتى رأس كبرى أم درمان، (أين هي الآن من غابة الأسمنت)، صرت مجنون بالخرطوم، ومدني، وكسلا، والعسيلات، وامضبان، وعطبرة، مثلك، حبيبتي عزة، أسمع نبضها، أتوق لأساريرها وهي تصحو الصبح، مشرقة بحلم بسيط، صحبة، وقوت، وتأمل وجيرة، وقضاء حاجة، وملء كراس بنشيد، أو مقال جغرافي، وبناء أوضة طين، (أي سكينة توهب من سحر تلكم الحياة، حين ترنو الحياة لأصلها، وجورها، وسكينتها المباركة في القلب)..
هل تصدقي، شكرت الله انه خلق موهبة "التذكر"، وبركة الذكريات، صارت الذكريات في حمى الوطن قصيدتي المفضلة، ارقد بهدوء، كعابد يوجي في تأمله، ثم اسرح ببراق التذكر لوطني العزيز (ياه نسيت نانسي عجاج، ألا يذكرك صوتها بأنها لا تغني، ولكنها تبكي، لما سمعت "ليه بنهرب من مصيرنا"، ومضت تمط كلمة مصيرنا، حتى صارت هي مؤلفة القصيدة، بل شعور الشاعر، والملحن، حُرق قلبها، وجعل مآساة كربلا تحنن لسانها، فخرج صوتها من حنايا ضوء الغروب الحزين، الذي يملأ الفضاء بسر الرحيل، كل أطياف الرحيل، الرحيل ياعزة...
بالأمس شكرت عمي العظيم حسن نجيلة، وأنا أطالع فصل كامل،( من سفره: ملامح من المجمتع السوداني) تصوري فصل كامل في وصف الخرطوم، في درته الرائعة ملامح من المجمتع السوداني (تعالي انتي ليه ماسمو شارع باسمو؟ ولا جامعة، أوحتى بقالة باسم حسن نجيلة)، سرحت معه، وخاصة في دار (فوز)، وسمعت معهم لحن قصيدتك الأولى، عزة في هواك، كان اللحن مرهفا لخليل فرح، اراد أخراج لحن من مزامير دؤاد، من الجنة الأولى، يليق بك، وبأصالتك، وجمالك الأسمر الفريد، حاول أن يسقي اللحن بدموع الأرامل، وعرق الفلاحين، وشهد العروس، وكان..
حيبتي عزة، دمت بخير، توقعي مني الاسبوع المقبل رسالة أخرى، فلا حد لشوقي، ان شاء الله، وسأحكي لك عن غ########ة، من يعشق ام درمان أكثر، على المك، أم شوقي بدري، من بربك ياعزة، حدسك يعرف؟؟.
كم تعجبت من عشقهم لأمدرمان، وكل عشق وجه مختلف، ففيهم من سحرته سيرتها المعلنة،ومنهم من سحرته سريرتها الباطنة، من الاشقياء، وخفاف الظل، والحرامية،.. أنها ام در ياعزة..أنها القلب..
والسلام عليكم ورحمة والله وبركاته..
*******
شفت الجرسة دي كيف مع هذه الاغنية، وللحق استمتعت لها مرة في الغربة، وكنت براي في البيت، وانا جالس بل راقد في مقعد كبير، وبكيت وبكيت بحرقة، بعد شعرت بأنني تطهرت من كل خطايا الفعل والخاطرة، وشعرت بأني حرا، مثل خيط خيط بخور تتحرر بنار الاشعال من عود الند الساكن، وصار حرا، يرقص وينفث عطره في أفاق الشم والمحبة..
على المستوى الشخصي.. تقتلني السمرة، وتسكرني، حيث كانت، وتعجبت من بعض البنات، طردنها، بمساحيق مفتعلة، ليتها تعود، تلك السمرة المليحة، للاسارير، والتعابير التي تسكن وتنام على الوجه الاسمر، لنساء بلادي.. ليتها، وللحق اللون، مجرد طول موجي، والسمرة أم الألوان، والدهس..
تحياتي.. .....
08-19-2010, 08:44 AM
Tabaldina
Tabaldina
تاريخ التسجيل: 02-12-2002
مجموع المشاركات: 11844
.. . الشكر للاستاذ السر قدور عن الحلقة التوثيقية لذكرى الوالد الموسيقار برعى محمد دفع الله تخليدا لمساهماته وموسيقاه فى مسيرة الفن السودانية نسال الله ان يتغمده وزوجه بواسع رحمته ويسكنه فسيح جناته .. وان يرحمهما ويغفر لهما ويتقبل داعئنا ببركات هذا الشهر الكريم
Quote: ولد الموسيقار برعي بام درمان عام 1929 بحي الموردة ، بدأت علاقته بآلة العود حينما اشترى خاله عودا وبدأ برعي في التعلم عليه وبتشجيع من خاله حينما لاحظ على برعي الموهبة والاصرار وكان برعي متأثراً بالعازف الشهير حسن عمر سوميت ، واتت فرصته الكبرى حينما استعان به الفنان الكاشف الذي كانت له ورشة للنجارة بحي الموردة استعان به للمشاركة في حفلة غاب عنها عازف العود الاساسي ، ومن خلال علاقته بالعازفين الاخرين اصبح عازف اساسي في عدد من الفرق الموسيقية التي كانت ترافق الفنانين المعروفين في ذلك الزمان كان لقاء برعي برفيق دربه الفنان عبد العزيز داؤود في الاربعينيات نقطة تحول ضخمة في مسيرة برعي في دنيا الالحان حيث وجد في صوت ابوداؤود مساحات اشبعت خياله يعتبر برعي رائد في تأليف المقطوعات الموسيقية ، كانت اولى مقطوعاته مقطوعة ( ميدالية ) ثم تلتها ( خرير الجدول) و ( ليالي العاصمة ) ، نقل لمدينة الابيض 1952 حيث كان يعمل باشكاتب بالمصلحة الطبية وهناك الف المقطوعات (عروس الرمال) ، ( فرحة شعب) ، ( ملتقى النيلين ) وقد فازت الاخيرة بالجائزة الاولى في مسابقة التأليف الموسيقي للدول الافريقية جنوب الصحراء التي اقيمت في جنوب افريقيا في منتصف الخمسينيات .كانت اغنية احلام الحب التي تغنى بها ابو داؤود اولى محاولاته في التلحين وتلتها اغنية مصرع زهرة التحق بالمعهد الايطالي للموسيقى بالقاهرة في 1956 ابتعث لمدينة لندن 1960 للدراسة لمدة عام بمنحة من منظمة اليونسكو ، ابتعث ايضا للدراسة بالمعهد العالي للموسيقى العربية القاهرة عام 1975 لمدة عام بمنحة من وزارة الثقافة والاعلام
والتحايا لاسرة المرحوم اولاده وبناته و للاخوة الاعزاء محب ؛ هانئ وزرياب واطيب التهانى والامنيات .. ونشوفكـ يا هانئ عريس .. قرقر قرقر قرقر
--------------
كنا نتوقع اغنيات اكثر للفنان الراحل عبدالعزيز محمد داؤود لارتباطها بالموسيقار برعى محمد دفع الله .. ولكن ....
تعرِف يا أُستاذ، الرائع زرياب عندو أخوانو الإتنين الأكبر مِنّو (مُحِب وهاني) أنا بعتبرهُم من أميز عازفي الكمان في السودان.. لكن مُشكلتهم إنّهم قاعدين هنا في الغُربة السجم دي.. والأخ هاني أُستاذي ومُعلِّمي لآلة الكمان. ما شاء الله كل أبناء وبنات الراحل الموسيقار بُرعي عازفين وموسيقيين مُبدعين ورائعين، لهم جميعاً مني التحية.
اخي علاء الدين صالح
برعي هذا احبه حبا جما
احب الحانه
احب طريقة عزفه للعود
احب انسجامه المتناهي مع ابو داؤود
رحمهما الله
بالله سمعت مقطوعة يقظة شعب
شوف الابداع ووين المقطوعات الموسيقية الان
دي لو عند ملحن في وكتنا ده ممكن يفك المقطوعه باغنيتين تلاته
انا اعتقد ان حلقه واحده عن برعي لا تكفي
اذا كان لحن اكثر من مائه وخمسين اغنيه واكثر من مائة مقطوعه واكثر
هذا ظلم بين
08-19-2010, 09:19 AM
ودالعباسية
ودالعباسية
تاريخ التسجيل: 10-28-2002
مجموع المشاركات: 2442
Quote: الاعلانات شر لابد منه لقناة تجارية وغير مشفرة ولا تتلقى اى مساعدة حكومية والا كيف تصمد وقيمة الاعلان وقوته ومردوده تعتمد على بثع اثناء مثل هذه البر امج الجاذبة للجمهور!
كلامك ميه ميه ،،بس ياخى ما قدر دا ،،يعنى البرنامج كله على بعضه ما تامى نص ساعة
والدعايات نص ساعة كاملة ،،
انا معاك البرنامج نسبة المشاهده عالية جدا ،،بس ياخى القناة دي ما عندها برنامج تانى
يجذب الجمهور ،، والله بتجيب الملل ،،،
08-19-2010, 09:29 AM
ودالعباسية
ودالعباسية
تاريخ التسجيل: 10-28-2002
مجموع المشاركات: 2442
مساء جميل للجميع ونأمل السخانة ما عاملة حركات في رمضان ..
حلقة جميلة يتفق معي الكثير منكم بس كان لجمال فرفور رفع السلم شوية كانت أدت الغنية بهجة و وضوح ولا رأيكم شنو يا جماعة ، لأن أستاذنا برعي كان قد عمل ليها تفصيل عديييل لعبدالعزيز داؤد الذي له قرار في الصوت لا يضاهى برغم كانت جميلة منك يا فرفرة
شكري للجميع
08-19-2010, 10:58 AM
وليد عبد اللطيف
وليد عبد اللطيف
تاريخ التسجيل: 08-09-2009
مجموع المشاركات: 6733
Quote: عمل ليها تفصيل عديييل لعبدالعزيز داؤد الذي له قرار في الصوت لا يضاهى برغم كانت جميلة منك يا فرفرة
يظهر انت قررت تقتل صاحبنا فرفور يازول انت ماشفت تني الرقبه عشان الصوت يطلع شوف هو غناها بطريقة جميلة لكن يستحيل يطابق ابو داؤود في الاداء لانها دي بصمه حتى الجيلي مدني مقلد ابوداؤود الاول لم يستطيع مطابقته ولو اني شايف مساعدات من ود البنا ولكن لو اجتمعوا كل من بداخل البرنامج يستحيل يستحيل ياخي ابوداؤود عمل استيالة في الوقف اثناء الغناء ( الفلوستوب) يظهر كان عارف في ناس حا تحاول تقلدة (ودي ماركة مسجله ) ابوداؤود تطريب ما عادي
-------------------------- استاذ ياسر تمتام خليك قريب لان الناس بتستمتع على مثل مداخلاتك الجميلة هذه ورايك الفني
08-19-2010, 11:16 AM
عفاف الصادق بابكر
عفاف الصادق بابكر
تاريخ التسجيل: 08-10-2009
مجموع المشاركات: 4188
Quote: مساء جميل للجميع ونأمل السخانة ما عاملة حركات في رمضان ..
حلقة جميلة يتفق معي الكثير منكم بس كان لجمال فرفور رفع السلم شوية كانت أدت الغنية بهجة و وضوح ولا رأيكم شنو يا جماعة ، لأن أستاذنا برعي كان قد عمل ليها تفصيل عديييل لعبدالعزيز داؤد الذي له قرار في الصوت لا يضاهى برغم كانت جميلة منك يا فرفرة
شكري للجميع
الأخ الاستاذ / ياسر تمتام تحية وأحترام وتقدير
الانسان المبدع هو الذى يصنع المجسمات الجميله حتى ولو كانت من أكوام القمامة .. وكفى بالحياة مدرسة وكفى بالتجربة أستاذا .. فالانسان المبدع يبدع دائما فى كل شئ .. فأستاذنا فرفور أو كما يحلو لك ( فرفره ) كان أداؤه لهذه الاغنية أداء ينم عن معرفته التامه إن كان السلم منخفضا أو عاليا وكلاكما فنانو نعتز بكم ونفخر بأمثالكم من مبدعين بلادى .. لكم التحية والاحترام وكل عام وأنتم بألف خير ورمضان كريم .. والشكر كل الشكر لصاحب البوست الراقى والجميل .
معليش ح ابداء من حلقة حمد الريح ويناس القصة قصة ذوق واعجاب وحمد الريح قمنا لقيناهو فنان ومغني كبير جداً جداَ وعندو جمهور كبير بس أنا شخصياً ما بيعجبني ولا بقدر اسمع صوتو مع انو اغانيهو دي لو غناها اي زول تاني بنبسط وبطرب وبتكيف كيف شديد ومتاكد انو كلماتو والحانو جميلة خالص خالص بس يغنيها زول تاني (نفس القصة دي تحصل لي مثلاً مع صلاح مصطفي والغريب صلاح وحمد الاتنين حافظ معظم اغانيهم وبيني وبين نفسي بردده ) لكن ما اسمعه منهم . الشي التاني المهم مشكلتي مع الفنان حمد الريح يدو البيدق بيها في صدرو دي ياخ دي حاجة عجيبة جداً وبتطلع صوت اضافي بيصل لي سمعك رسمي وشعبي لو رخيت السمع كويس . الشي التالت (يا ابو الفن ) مش النهير وبس لا لا العجلة عجلة شديدة خلاص لما تحيرك . ورغم ده الحلقة كانت جيدة وانيقة وفيها حاجات ممتازة .
اها نجي ليوم امس والخالد الملحن العظيم برعي (اها لما يقولوا برعي الكلام بيقرب يكمل وطوالي بيسيطروا تلاته برعي في السودان هم :- برعي الملحن والبرعي ابن وقيع الله وبرعي القانون) كانت حلقة عظيمة شديد والبيدلل علي عظمته اللحن بتاع الاستقلال ياسلاااام ياخ وشوفو نحنا سمعناهو بتركيز كيف !!! رغم اننا نحن السودانيين وبشكل عام بنحب الالحان المغناة لكن ده انا اندمجته معاهو بشكل كااااامل واظنكم كلكم عملتو كده . الغناء كان ممتاز جدا جدا بس فرفور فعلا اداء الاغنية بي اسكيل منخفض شديد وما كان عندو طريقة اكتر من كده لانو في الاغنية دي تحديدا لو مشي اسكيل تاني حيفرج فيهو خلق الله واي زول بيفتكر انو عاصم البناء بيغنيها احسن يراجع نفسو تاني فرفور كان مناسب بذات الاداء ده لانو السلطان المبجل ابو داؤود طبعه بطابعه الذي يجعل اي مغني اخر لها في موقف صعب ورغم ده زي ما قلته فرفور عمل قدرتو وطلعت منو سمحه شديد. عصام محمد نور ياسلااام عليهو اداء بشكل ممتاز وجيد . الحوت محمود اداء جيد ورائع رغم انو الاغنية دي محمود تحديدا بيشتغل فيها حِلي صوتيه كتيره وبي طابعو هو لكن امس عمل حليه واحده فقط وكان واضح من وجهه انه غير مرتاح ومنسجم في الاداء وفي مرتين سكت فيما كان يفضل فيه المواصلة . عاصم سليم في السليم . طه ونادر ما عجبني ادائهم وبديهم فقط نسبة المرور .
ونشوف الليلة .
08-19-2010, 03:06 PM
المعز ادريس
المعز ادريس
تاريخ التسجيل: 05-18-2009
مجموع المشاركات: 1569
Quote: ، وبكيت وبكيت بحرقة، بعد شعرت بأنني تطهرت من كل خطايا الفعل والخاطرة، وشعرت بأني حرا، مثل خيط خيط بخور تتحرر بنار الاشعال من عود الند الساكن، وصار حرا، يرقص وينفث عطره في أفاق الشم والمحبة..
الحبيب المرهف عبد الغني قرأت رسالة عزة أكثر من مرة و مرة منتهى الجمال و المحنة و الرقة و الإنتماء و ال"لو إنسان صبح قصة"! ترى هل تكون النوستالجيا نعمة إلهية كما الذاكرة أم هي الورطة بعينها "مندري"! محظوظين و سعداء نحن هنا بطلتك البهية هذه في هذا المقام محبتي و امتناني و تحياتي يا صديق
08-19-2010, 06:20 PM
عمران حسن صالح
عمران حسن صالح
تاريخ التسجيل: 11-26-2004
مجموع المشاركات: 10159
أتوقع لحلقة اليوم التميُز والصعوبة ألحان ود الحاوي لن تؤديها فرقة ناقصة وأصوات مداها محدود أغنية البداية من الألحان الصعبة ونادراً ما نردد كلماتها في حفلاتنا الصغيرة ( أو حتى جوه الحمام ) عموماً مشاهدة ممتعة
Quote: أتوقع لحلقة اليوم التميُز والصعوبة ألحان ود الحاوي لن تؤديها فرقة ناقصة وأصوات مداها محدود أغنية البداية من الألحان الصعبة ونادراً ما نردد كلماتها في حفلاتنا الصغيرة ( أو حتى جوه الحمام ) عموماً مشاهدة ممتعة
تماماً ياعمران ... الشغلة ح تكون صعبة على الجماعة ديل ... لغاية هسع ..
فات الميعاد ... ظلموا بيها الأغنية وظلموا بيها أميمة وشموس .. وظلمونا نحن المستمعين ... فات الميعاد ... أغنية لـ عصام محمد نور 100% ..
نشوف الباقي ..
..
08-19-2010, 07:16 PM
ودالعباسية
ودالعباسية
تاريخ التسجيل: 10-28-2002
مجموع المشاركات: 2442
اخي ود العباسييه والاخوة الكرام اليوم كان يوم قامه كبيره في دنيا التلحين الفنان عبد اللطيف خضر ونحن حضرناه ايام والده رحمة الله عليه خضر الحاوي كان يزور المدارس الابتدائية وكان ذاك اليوم يعتبر يوم عيد. كل تلميذ يحضر معه ثلاثة قروش رسوم الحاوي وكان عبد اللطيف شاب فارع القامة يعزف الاكورديون الاخضر الصغير مع والده.ايام والله اليوم والله وبصراحه لاول مره يطربني طه سليمان لحد الثماله ادي اغنية ما سلامك بطريقته وبجمال متناهي واتمني ان سمعه اخي الفنان المهذب مجذوب اونسه ان يتنازل له منها.رغم انه اختصرها شديد عصام محمد نور الذي لم يختصر أي اغنيه مد في اغنية المصير واخذ حقه كاملا لدرجة انه حرمنا من سماع اخينا عاصم البنا...ان شاء الله ما تنفعو.
08-19-2010, 07:28 PM
ودالعباسية
ودالعباسية
تاريخ التسجيل: 10-28-2002
مجموع المشاركات: 2442
سيف الدين مصطفى الدسوقي إبراهيم عوض عبدالمجيد عبداللطيف خضر
حي العرب ، هو والمسالمة – التي يفصلها عنه شارع الشنقيطي – هما وادي عبقر السودان، لا أريد التحدث عن أن المريخ وعبدالرحمن الريح والهلال وأبوصلاح وسيد عبدالعزيز والجابري إضافه للرائعين الفوق ووقوافل الفن الماخمج و معظم من أثروا الفن والأدب خرجوا من هناك ، فهذا يدخل في باب العلم القضائي، ، لكن أود أن أقول إن تلك المنطقة التي قد لاتتعدى مساحتها 6 كيلومتر مربع لاتوجد في الكرة الأرضية مساحة نووية تشابهها، هي منطقة عالية التخصيب وتشع بفنها وجمالها وبناتها السمحات بحيث يمكنك رصد هذا الإشعاع من أي مجرة تجاور درب التبانة. وربما قال ذلك أرمسترونج وألدرين من أبولو 11 في محادثة إلى محطة ناسا الأرضية. بالله شوف ودالحاوي دا قال عن الفرقة الموسيقية شنو؟ قال مالم يقله قدور طوال عمر البرنامج الممتد لخمس سنوات، قال هم روح أي أغنية ناجحة، أثنى على محمدية حتى كادت أن تُدمِع الكمنجة في يده ويذوب القوس، شوف لما إتكلم عن قصيدة المصير وقال أنها (نصٌ يلحن نفسه بنفسه) ، شوف التواضع غير الزيوف وجمال العباره البيوسِّع الصدر والأستوديو على ضيقه.
جمال بهذا القدر لايقدر عليه عصام ، بل لايقدر عليه إلا إبن حي العرب الذري نفسه – غشيت قبره شآبيب الرحمة – فهو كأهل مكة أدرى بشعابها وعكاظها وأستار كعبتها ومواقع البلوتونيوم فيها. تاني ما تقول إنتهينا،
يا قدور ، ظباء مكة صيدهن حرام.
08-19-2010, 07:50 PM
Hadeer Alzain
Hadeer Alzain
تاريخ التسجيل: 07-13-2008
مجموع المشاركات: 3530
Quote: لا حولااا .. عصام ده ياخ حاجة كده مختلفة وهدوء عجيب وغناء بإحساس عالي بالله شفتو عمل في ود الحاوي دا شنو؟؟! ياخ مبالغة !!! غايتو بالله أسمح لي أقول : ديش أبو كدا زاتو!
هدير كل سنة وإنتي طيبة أنا وبإعتباري حلفاوي أصيل ومؤصَّل، أكتر واحِد إتكيَّفتا من الكِلمة دي.. عشان كِدة بسمَح ليكي.. واليومين ديل كمان عندِنا عرض واحدة مجّاناً.. ديشين أبو كِدا زاتو.. عِصام بيستاهل أكتر من كدة ياخ!
08-24-2010, 08:53 AM
yasir tamtam
yasir tamtam
تاريخ التسجيل: 11-27-2008
مجموع المشاركات: 459
شكرا تاج السر على أشيائك الجميلة دوما بس قلت كلامي لمعرفتي اللصيقة بفرفور وليس إنتقادي له !!! كانت تكون أجمل لو في سلم أعلى حتى لا يقع في مصيدة (الحتة الباص )(القرار) في نهاية كل كوبليه.. فجمال صديقي و أعرف إمكانيات صوته والله لو معاه ما أخليه يغنيها في الحتة دي لو فرفر وشكرا ليك و عفوا إذا فهمتوني خطأ على عكس ما أريد توضيحه
لكم العتبى
08-19-2010, 08:08 PM
علاء الدين صالح
علاء الدين صالح
تاريخ التسجيل: 08-11-2009
مجموع المشاركات: 1760
حلقة كانت اكتر من رائعة وفيها تجلي عالي جدا كلهم ابدعوا والتحية للاستاذ عبداللطيف خضر الذي قال فاوفى الكتير
كلامه عن الاستاذ محمدية والفرقة الموسيقية عجبني جدا جدا اغنية المصير مسك ختام الحلقة كانت ابداع ما حصل ياسلااام غايتو للامانه حلقة من اجمل واروع الحلقات والله يستحقوا التحية الشديدة
سؤال جانبي : عاصم البنا كان ماله هو وفرفور ؟ يعني لازم زي بقا في كل حلقة يكون في حلقة اضعف تتمثل في سرحان وتوهان وصمت واحد من المشاركين يعني البيحس انه ما حيكون في الفورمة مفروض يعتذر طوالي
.. في افطار الرئيس الذي اقامه لمجموعة من الفنانين والشعراء واسرة اغاني واغاني قبل ايام .. غنى كمال ترباس ( انت المهم ) ، وغنى عاصم البنا ورماز وغيرهم .. محمود عبد العزيز ايضا كان متواجدا وغنى أيضا ( المدفع الرزام ) .. ..
تحية طيبة للجميع حلقة الموسيقار عبد اللطيف الحاوي ما بقدر اقول فيها إي حاجة غير انو عصام محمد نور غناء كويس . اكتر من كده ما عندي لانو جد غناء الذري ده ما بتتسمع من زول تاني .
عبد اللطيف ذاتو في حد ذاتو غنية عجيبة ياخ هدوء عجيب .
08-20-2010, 10:54 AM
saif addawla
saif addawla
تاريخ التسجيل: 12-07-2006
مجموع المشاركات: 911
يجيئ علينا رمضان هذه المرة وانا بعيد عنكم انت واخواني احمد هاشم وحيدر ابشنقره ودالي وسيد عيسى ومحمد عثمان ، وبعد ان كنا نتلقى جرعة الطرب اليومية ، صرت اتلقاها وحدي عن طريق هذا البوست - جزا الله القائمين عليه خيرا - والحقيقة فشلت في معايشة اجواء الفرح التي يحكي عنها الكثيرون ، لانني اسمع الحلقة ( بايتة وباهتة ) بدون رفقاء السلاح .
اليوم عدت الى الملعب بقوة ، اعادني اليه عبداللطيف خضر ، كم تمنيت ان اكون جالسا معكم في ديوان احمد هاشم
ارجو ان تبلغ عني سلامي لهم ولك ارفع سلام
اخوك سيف
08-20-2010, 12:09 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
في لقاء أجرته دورية لبنانية مع الناصري المعروف الراحل د. عصمت سيف الدوله مؤلف (أسس الإشتراكية العربية) عقب خروجه من معتقلات السادات ، قال :إمتنعت عن قراءة الصحف طوال فترة تواجدي في السجن لتفادي الشعور بالألم الناتج عن القراءة عن أحداث لايمكنني المشاركة فيها ، ياها قصة العين بصيرة واليد قصيره يا سيف ، لذا أدرك جيدا انك لما تسمع (المصير ) مصحوبة بصورة ودالحاوي وليس أمامك جك الحلومر وصينية القهوه وفناجينها التي تضج ببخور المِسك ويضوع منها عبق الموده وأحمد هاشم ودالي ويوسف أبكر وحيدر شنقره وسيد عيسى يبعدون عنك آلاف الأميال ، جسدا ، تصبح مشاهدة هذا البرنامج ،الذي ظللت تشاهده معهم طوال نسخه الماضية ، ضرب من الماسوشية. سبحان الله ، أمبارح كنا فاطرين مع عبدالحليم وعندما بُث البرنامج قال دالي (والله دي قعده ناقصه سيف) ، والله يا سيف مشكلتنا بقت كبيره ، إنت في نيوزيلنده وعصام في كندا وطراوه في أمريكا وكل رفاق الوجدان نُثروا على الأطلس في جميع القارات ، يعني لو زول قالوا ليهو في شوال إنشرط في الغلاف الجوي مامكن يتخيل العيش يتشتت في الأرض بالطريقه الإتشتتنا بيها دي، أصبحنا زي ما قال ودالمكي (فتلة في الرياح وثرثرة في الصخب ) مرات تقول يا ود أرجع أفرح ليك أيام ، العمر دا ما أردب سمسم عشان تبعزقو بالطريقه دي ، بقينا ما بنستمتع إلا بأشياء قليلة بعد اندثار آمال الخيال وتلاشي القمرا والنومه العميقه ، لم يبق فينا غير دمعة حرى ونحن ننتظر و( نهرب من مصيرنا ونقضي أيامنا في عذاب) . (هذه هي الحياة أنك تتنازل عن متعك الواحدة بعد الأخرى حتى لا يبقي منها شيء وعندئذ تعلم أنه قد حان وقت الرحيل) - نجيب محفوظ -
Quote: والله يا سيف مشكلتنا بقت كبيره ، إنت في نيوزيلنده وعصام في كندا وطراوه في أمريكا وكل رفاق الوجدان نُثروا على الأطلس في جميع القارات ، يعني لو زول قالوا ليهو في شوال إنشرط في الغلاف الجوي مامكن يتخيل العيش يتشتت في الأرض بالطريقه الإتشتتنا بيها دي، أصبحنا زي ما قال ودالمكي
(فتلة في الرياح وثرثرة في الصخب )
ويا مولانا الله يجازي الكان السبب
08-20-2010, 03:18 PM
جمال سعيد
جمال سعيد
تاريخ التسجيل: 09-18-2005
مجموع المشاركات: 464
ودالعباسية سلامات وأحترامى للفائدة العامة اضع وصلة موقع سودانيز كليبس فيه الحلقات وتوثيق جميل بهذه الميزات: 1- الحلقات كاملة 2- بدون اعلانات 3- رابط واحد بدون تفطيع كحال اليوتيوب.
وبدات الحلقة ... وصوت محمود واضح في المقدمة .. والحلقة مع عبد اللطيف خضر رحمة الله الشهير بود الحاوي والكلام في البداية عن الالتوام الفني والالتزام بالمواعيد وحكاية بين السر وذكريات خورشدي وخضر ود الحاوي ومسرحية خطوبة سعاد وارض الرباطاب . وسؤال لعبد اللطيف عن الالتزام ... ولم تتاح له فرصة في الأجابة . وجمال فرفور يغني بالي مشغول (عوض أحمد الخليفة) ... مود جمال تعبان شديد واداء بمعدل الوسط لم يتفاعل جمال فيه بذات حركته الدائمة وشوية مشايله من عصام وينسمع بين لحظة وأخرى صوت من اصوات البنات (اظنها شموس) .
لا حولااااااااااااا لو عايز تسيبنا .... ذبحوها تماماً ... والله حرام ... دي واحدة من درر الفنان الذري ... صباح + أحمد الصادق ... ده شنو البغنوا فيهو ... دي أكيد أغنية تانية ...
يشهد الله .. فكرت أطفي التلفزيون .. صباح بتغني ...
ياخي أمشي غني للزيت بتاعك أحسن ...
..
08-20-2010, 06:23 PM
سفيان بشير نابرى
سفيان بشير نابرى
تاريخ التسجيل: 09-01-2004
مجموع المشاركات: 9574
يا جماعة البامية كيف ؟؟؟ الحديث عن الشاعر ابراهيم الرشيد ووصية من ود الحاوي أن يسمع الاولاد الكلام ده وصباح واحمد الصادق في (لو داير تسيبنا) واحمد لو داير تسيبنا لكن صباح خليها شوية . يا جماعة صباح دي صوته فيهو مشكلة هي شنو ما عارف لكن شاعر كده انو في فراغ في حته ما. أحمد الصادق برضو في صوتو في مشلكلات وما مرتاح في الاغنية . الخطوط من المجموعة في هذه الاغنية جميلة جداً جداً وواضح شغل عصام محمد نور في الصولفيج . الان الحديث عن كثرة الشعراء وقلة الشعر . عاصم البناء ومشايلة مع صباح لاغنية غابت انجمك وعاصم رغم انو مبخر لكن ادى الجزء بشكل جيد ومرتاح جدا فيهو بس يا عاصم عليك الله اصابعينك البتختها في خدودك بدون سبب ارحمنا منها .
يا جماعة محمود شكلو مرتاح والله فرحان اني اشوفو كده .
08-20-2010, 06:26 PM
سفيان بشير نابرى
سفيان بشير نابرى
تاريخ التسجيل: 09-01-2004
مجموع المشاركات: 9574
Quote: لا حولااااااااااااا لو عايز تسيبنا .... ذبحوها تماماً ... والله حرام ... دي واحدة من درر الفنان الذري ... صباح + أحمد الصادق ... ده شنو البغنوا فيهو ... دي أكيد أغنية تانية ...
يشهد الله .. فكرت أطفي التلفزيون .. صباح بتغني ...
ياخي أمشي غني للزيت بتاعك أحسن ...
أعصابك يا حسام ياخ انت مش حتقدر تغمض عينك مع النفرين ديل تحديداً .
Quote: وصباح واحمد الصادق في (لو داير تسيبنا) واحمد لو داير تسيبنا لكن صباح خليها شوية . يا جماعة صباح دي صوته فيهو مشكلة هي شنو ما عارف لكن شاعر كده انو في فراغ في حته ما. أحمد الصادق برضو في صوتو في مشلكلات وما مرتاح في الاغنية . .
ياسفيان ... ياخي الإتنين .. صباح + أحمد الصادق .. لو دايرين يسيبونا ... قشة ماتعتر ليهم ... ياخي الأغنية دي سمعتها من عصام ومن فرفور ومن سميرة دنيا ومن عمار السنوسي .. ومن سيدها نفسه .. لكن زي البشتنة البشتنوها ليها جوز اللوز ديل ماسمعت بيها ...
..
08-20-2010, 06:32 PM
سفيان بشير نابرى
سفيان بشير نابرى
تاريخ التسجيل: 09-01-2004
مجموع المشاركات: 9574
اغنية اديني رضاك (اسحاق الحلنقي ) اداء نادر خضر كعادته اداء تقريري لاغنية خفيفة وتفاعلية في مزيكاها اظن جمال كان افضل في ادائيها . وشكراً يا ندرة (ده طبعا قدور).
وشريف واغنية الشاعر محجوب الحاج (نسمة العز) و شريف بيغني من بخرة بس ولد ماشاء الله مع انو الليلة بيغني بطريقة مدرسية خالص . (محمود بيسارر السر قدزر في اذنه). وشريف يجلقب والشكر لي سماحه (صباح) هههههه اغنية النعمان علي الله (انا مابقدر ابوح ) ويغنيها عصام محمد نور وعصام ومزيكا زابطه جداً جداً وديوتو من جمال شغل ممتاز والاغنية ترفع مود الناس جوه الاستديو وصباح تتدخل بصوته العجيب وتنتهي الاعنية .
والكلام عن الوالد خضر الحاوي وحكاويه الطريفة . واغنية يازمن وقف شوية وريماز وريماز تغني بشكل وسط شديد وصوته بينقطع في المد خصوصاً شيل شبابي .
حلقة اليوم تحت الوسط مع انهم غنو اجمل الاغاني السودانية .
Quote: حلقة اليوم تحت الوسط مع انهم غنو اجمل الاغاني السودانية .
فعلا رغم انها كانت من اجمل الاغاني لكن كانت اقل كتير من حلقة امبارح
صباح مع احترامي لجهدها لكن في راي الخاص جدا صوتها تعبان جدا لدرجة متعبة للسمع ادت اغنية الراحل الجميل ابراهيم عوض ببشتنة صعبة جدا اعتقد انه عمنا السر قدور نفسه ما عرف يقول شنو لانه ما سمعته قال جملته المعتادة ( احسنتي يا بنتي)
فرفور في احيان كتيرة بيديني احساس انه جاي مجاملة
في حوجة الى الاهتمام بقيمة ومعنى التواجد في برنامج تلفزيوني له جماهيريته ليس فرفور فقط ولكن للكثير البشاركوا في برامج التلفزيون
اللبس ثم اللبس والاهتمام بالمظهر والذوق يعني لابد من وجود خبيرة في اللبس وتناسق الالوان
مرة اخرى التحية والقومة للفنان ود الحاوي - عبداللطيف خضر بالجد امتع واثرى وجدان الشعب السوداني باجمل وارقى الالحان ربنا يديهو العافية ومزيد من الابداع
08-20-2010, 09:14 PM
ودالعباسية
ودالعباسية
تاريخ التسجيل: 10-28-2002
مجموع المشاركات: 2442
Quote: واغنية يازمن وقف شوية وريماز وريماز تغني بشكل وسط شديد وصوته بينقطع في المد خصوصاً شيل شبابي .
من فضلك يا سفيان إلا رماز دى ،، يا أخى على اليمين غنت الأغنية كما أنزلت ،، بدون كواريك بدون تشنج وهى مرتاحة مدندنة بيديها ورجليها قبل حنجرتها الذهبية ،، بالله ما شفتها لمن تجى فى حتة " يا عينيىَّ " والله تسلم عيونها .
مجملاَ أتفق بأن الحلقة كانت وسط فى درجتها ،، ولم يكن هنالك أى كلام ولا الضحكات المجلجلة بتاعت قدور ماعدا طِرفة ود الحاوى عن والده
اعزائي جايي دلوكتي الساعه واحده ونص من افطار بورداب الرياض
وباسمع في الاعاده
اؤمن علي كلام اخي حاتم يوسف العبيد:
Quote: لا حولااااااااااااا لو عايز تسيبنا .... ذبحوها تماماً ... والله حرام ... دي واحدة من درر الفنان الذري ... صباح + أحمد الصادق ... ده شنو البغنوا فيهو ... دي أكيد أغنية تانية ...
يشهد الله .. فكرت أطفي التلفزيون .. صباح بتغني ...
ياخي أمشي غني للزيت بتاعك أحسن ...
انا لا ادري كيفية اختيار الاغنيه ومن يغنيها
الاغنيه غير مناسبة مع صوتي احمد الصادق او صباح
وهذا يكشف الامكانية الكبيره والمدي الواسع لصوت العبقري ابراهيم عوض
Quote: الاغنيه غير مناسبة مع صوتي احمد الصادق او صباح
وهذا يكشف الامكانية الكبيره والمدي الواسع لصوت العبقري ابراهيم عوض
بالإضافة لي كدا يا طارق المشكلة ليست في صوت صباح أو صوت فلان أو فلانة المشكلة في القائمين على أمر هذا البرنامج بقناة النيل الأزرق لأنهم يبدو لي حاولوا إرضاء أكبر عدد من الشرائح الإجتماعية باختيار مغنيين و مغنيات بفكرة إرضاء كل الناس لكن الضحايا آخر الأمر هي مجموعة الأغنيات التي يتم تشويهها ضمن عملية تقسيم الفرص تبعا للبروفات و بذلك تكون القناة مسؤولة عن أي تشويه يحدث! لو كان هناك أي حرص حقيقي على قيمة الأغنيات و حقوق أصحابها لما تم أي نوع من الكلفتة, صوت العتاب دا لا أعفي منه حتى محمدية و سعد الطيب و اسماعيل عبد الجبار و زملاءهم لأنه طالما أن القناة قد فرضت عليهم من فرضت من المغنيين و المغنيات كان عليهم ألا يسمحوا بأي نوع من الحساسية أو المجاملة ضمن عملية تقسيم الأغنيات أثناء البروفات و من الممكن كذلك أن يقترحوا على السر قدور تجاوز بعض الأغنيات غير الناجحة "بحسب البروفة"! الكلام دا حاصل منذ الأعوام الماضية حيث كتير من الأغنيات تم توزيعها بشكل خاطئ على المغنيين و المغنيات المشاركين/ت.
08-21-2010, 02:04 AM
المعز ادريس
المعز ادريس
تاريخ التسجيل: 05-18-2009
مجموع المشاركات: 1569
هل عدمت الساحة الغنائية صنف المغنيين و المغنيات الأكثر خبرة و كفاءة كي تتحمل القناة مسؤولية عدم التجني على الأغنيات الخالدة?! على سبيل المثال, أين: الهادي الجبل سمية حسن آمال النور حيدر بورسودان عادل الصديق و أين ذهبت سميرة دنيا, و أسرار بابكر?
08-21-2010, 02:29 AM
طارق جبريل
طارق جبريل
تاريخ التسجيل: 10-11-2005
مجموع المشاركات: 22556
سلام يا شباب الحلقة في نظري ضعيفة جدا بعدين اغاني ابراهيم عوض دي سمحة منه بس احمد الصادق بغني زي الباكل في دوم لو داير تسيبنا رماز عملت ليها انتفاخ في القولون يمين عندي شريط بغني فيه عمار السنوسي بجننها جن
طه سليمان دة لو جابوا ليه جدادي يلقط الحبة ما حا يغنيها كويس بيضرسني عدييييييييييل هو واحمد الصادق الاستوديو تحس بيهو مزحوم كدة لمن بتاع العود ما ظاهر يا ريت لو خلوا البرنامج زي زمان فيه الرباعي القديم ويزيدوا ليهم محمود عبد العزيز صباح دي عايزة تجتهد شوية كدة وامورها حا تسلك عاملة وجنتها البتكتل دي
08-21-2010, 02:54 AM
ودالعباسية
ودالعباسية
تاريخ التسجيل: 10-28-2002
مجموع المشاركات: 2442
Quote: السلام ليكم ود العباسية رمضان كريم التحية للعباسية وكل أحياء السودان نشكر لكم إهتمامكم بالغناء السوداني ونود المشاركة معكم كم تمنينا نحن مستمعي ومحبي صوت محمود أن نسمع له في حلقتي ود الحاوي
محمود غني من ألحان ود الحاوي ثلاث من أغنياته الخاصة وكانت إحداهما لحسن الزبير الشاعر المخضرم رحمه الله وأسكنه فسيح جناته : لا ود الحاوي ولا محمود لم يتطرقا لهذه المعلومة : لماذا ؟ الأغنيات كانت ظالمني شوف من كم سنة وياااا مدهشة وسلامتك ! وكان هذه الألحان قبل ( 14)عااااااام من الآن وتمت في ظرف إسبوع بعد أول لقاء حتى قدمها الحوت للجمهور في مدني وبعدها عنون بها إحدى إلبوماته الشهيرة آنذاك يا مدهشة 1997 ! وقد ذكر ود الحاوي وود الزبير أنهما أعجبا أيما إعجاب بأداء يا مدهشة ولم يحدث من قبل أن أدي فنان أغنية مشتركة لهما بهذا الشكل ! الحوت مدرسة ونحبه كما هو ولقد وصل الحوت لما هو أسوأ من ذلك في الصحة ونال منه الإرهاق أكثر من ذلك ولكنه لم يترك هوايته المفضلة الغناء : الغناء الشجي والممتع والمستند على الذكاء الفطري ! والله لطيف بالعباد : محمود لا يخجل من نفسه يا إخوان : لا يوجد فنان سوداني يواجه الناس أكثر منه : وهو حجول (خلقة) ودائماً يضع اليد على عل الخد : وأتى للتسجيل بعد نوبة برد وسهر متواصل ولم يعتذر الحوت يأتي للمسرح ليغني في كل الأحوال وكل الأشكال ولا يكترث لعدم الذهاب أصلاً محمود لا يتغذى جيداً : أمر واااضح
أسأل الله لي وله الصحة والعافية ولكم نشكركم على إتاحة الفرصة السلام
08-21-2010, 02:59 AM
طارق جبريل
طارق جبريل
تاريخ التسجيل: 10-11-2005
مجموع المشاركات: 22556
Quote: واغنية يازمن وقف شوية وريماز وريماز تغني بشكل وسط شديد وصوته بينقطع في المد خصوصاً شيل شبابي .
تحايا للجميع وكل سنة وإنتو طيبين.
معليش يا سفيان أنا حا أنزل بي ريماز درجة كمان تحت التقدير الأديتو ليها لأقول أن أداءها لأغنية يا زمن كان ضعيفا, هذ بلإضافة إلى إنها ما حافظة كلمات الأغنية فهي تقول(نشوة من عمر الزهور) في المكان الذي يجب أن تقول فيه(نشوة من خمر السرور) وأعتقد في أكثر من خطأعلى هذه الشاكلة.
أرجو أن يتم التأكد من حفظ الكلمات أو الإكتفاء بمقطع محفوظ ومتقن كما فعل عصام محمد نور.
شكرا لود العباسية والفنان طارق ميرغني للمبادرة. أفتقد رواد هذا الخيط الرمضاني ،الباشمهندس أبو بكر وصديقي الزوول وممكونة بالإضافة إلى الفنان عاصم البنا الذي أطلق عليه الباشمهندس أبو بكر لقب (فردتنا) . لقد أطلعت على رأي صديقنا الباشمهندس أبو بكر ، ومع إحترامي الكبير لموقفه إلا أنني لا يسعني إلا أن أقول أنني حزين لمقاطعته لهذا الخيط الذي أعده من المؤسسين له إن لم يكن هو مؤسسسه. أرجو أن يشاركوناالرأي في المادة التي تبث وفي الإجتهاد في التقييم كما كانوا يفعلون دائما.
مع خالص ودي وتقديري.
08-21-2010, 08:42 AM
سفيان بشير نابرى
سفيان بشير نابرى
تاريخ التسجيل: 09-01-2004
مجموع المشاركات: 9574
يازول وحاتك متفق معاك تب لكن قلته اكافي بلاء بعض الناس هنا ببليلة تحت الوسط دي ياخ ، انت ماشايف المعجبين الساااكت ديل هاهاهاهاها.
Quote: الحوت مدرسة ونحبه كما هو ولقد وصل الحوت لما هو أسوأ من ذلك في الصحة ونال منه الإرهاق أكثر من ذلك ولكنه لم يترك هوايته المفضلة الغناء : الغناء الشجي والممتع والمستند على الذكاء الفطري ! والله لطيف بالعباد : محمود لا يخجل من نفسه يا إخوان : لا يوجد فنان سوداني يواجه الناس أكثر منه : وهو حجول (خلقة) ودائماً يضع اليد على عل الخد : وأتى للتسجيل بعد نوبة برد وسهر متواصل ولم يعتذر الحوت يأتي للمسرح ليغني في كل الأحوال وكل الأشكال ولا يكترث لعدم الذهاب أصلاً محمود لا يتغذى جيداً : أمر واااضح
يا عباسية ياخ اشكر لينا الزول ده وقول ليهو يواصل معانا الزول ده فعلاً بيعرف محمود تمام وبالمناسبة الكلام ده لازم يهتموا بيهوا الناس القالت عايزة تساعد محمود ايوة لازم يعرفوا في الاساس انو محمود شخص قوي الشخصية ويعلم تمام ما يريده وما لا يريده لانهم لو ما عرفوا كده حيفشلوا حتي في مجرد أن يقبل بجلوسه معهم .
صديقي صاحب الرسالة الف شكر لك وياريت تواصل معانا .
صوت العتاب دا لا أعفي منه حتى محمدية و سعد الطيب و اسماعيل عبد الجبار و زملاءهم لأنه طالما أن القناة قد فرضت عليهم من فرضت من المغنيين و المغنيات كان عليهم ألا يسمحوا بأي نوع من الحساسية أو المجاملة ضمن عملية تقسيم الأغنيات أثناء البروفات و من الممكن كذلك أن يقترحوا على السر قدور تجاوز بعض الأغنيات غير الناجحة "بحسب البروفة"! الكلام دا حاصل منذ الأعوام الماضية حيث كتير من الأغنيات تم توزيعها بشكل خاطئ على المغنيين و المغنيات المشاركين/ت.
بالضبط اخي المعز ادريس....
مشكور اخي اسامه عبد الجليل واتمني المواصله
اخي نابري
انت عارف ان الفنانين ديل في بعض الاحيان بيكون حواليهم شلليه
مصلحجيه ومدمرين لان الفنان له امكانيات ماديه كبيره
وكل شي بيكون متوفر مما لذ وطاب الي مجيهات المزاج
من جميع الالوان الاحمر فالاخضر وحتي الابيض
وانا اسف اقول لو شفت منزل محمود الذي يسكن فيه وهو نصف منزل والدته
هو دون مستواه لا الفني فحسب بل المادي
لان محمود في يوم من الايام كان بيغني في اكثر من حفل
في اليوم الواحد وكان دخله اقل شي من سبعة اصفار
08-21-2010, 04:13 PM
ودالعباسية
ودالعباسية
تاريخ التسجيل: 10-28-2002
مجموع المشاركات: 2442
Quote: انت عارف ان الفنانين ديل في بعض الاحيان بيكون حواليهم شلليه
مصلحجيه ومدمرين لان الفنان له امكانيات ماديه كبيره
وكل شي بيكون متوفر مما لذ وطاب الي مجيهات المزاج
من جميع الالوان الاحمر فالاخضر وحتي الابيض
وانا اسف اقول لو شفت منزل محمود الذي يسكن فيه وهو نصف منزل والدته
هو دون مستواه لا الفني فحسب بل المادي
لان محمود في يوم من الايام كان بيغني في اكثر من حفل
في اليوم الواحد وكان دخله اقل شي من سبعة اصفار
أبو الفن (طارق ميرغني) تحياتي ياجميل
بتفق معاك في القلتو وعارف كل ده بيحصل في مجال المشاهير والنجوم ومعاكم في مسعاكم من اجل الخير لكن عايز الناس تعرف انو محمود ده تحديدا مافي اي شخص في هذه الدنيا بيملئ عليهو قرار او يغير رائيه من حاجة سوى والدته التي يعيش معها ويحبها حب عظيم ... النقطة دي تحديدا لازم يعرفه إي شخص قبل أن يتقدم خطوة واحدة عشان يقول لمحمود إي كلام شخصي . محمود يا ابو الفن يتحكم في نفسه ويعرف ماذا يفعل ولماذا يفعل ولا الشلة ولا ستين شلة ممكن تفرض عليه حاجة . معليش يا طارق بقول الكلام ده بوضوح وسهولة عشان الناس تعرف تعمل شنو .
ومحبة شديدة في قلبي يا فنان .
08-21-2010, 10:15 AM
ايوب عبدالرحيم
ايوب عبدالرحيم
تاريخ التسجيل: 10-10-2005
مجموع المشاركات: 1441
بتفق معاك في القلتو وعارف كل ده بيحصل في مجال المشاهير والنجوم ومعاكم في مسعاكم من اجل الخير لكن عايز الناس تعرف انو محمود ده تحديدا مافي اي شخص في هذه الدنيا بيملئ عليهو قرار او يغير رائيه من حاجة سوى والدته التي يعيش معها ويحبها حب عظيم ... النقطة دي تحديدا لازم يعرفه إي شخص قبل أن يتقدم خطوة واحدة عشان يقول لمحمود إي كلام شخصي . محمود يا ابو الفن يتحكم في نفسه ويعرف ماذا يفعل ولماذا يفعل ولا الشلة ولا ستين شلة ممكن تفرض عليه حاجة . معليش يا طارق بقول الكلام ده بوضوح وسهولة عشان الناس تعرف تعمل شنو .
ومحبة شديدة في قلبي يا فنان .
طارق ياغالي سفيان اختصر ليكم اميال من المشاوير في هذا الموضوع وانا اتفق معه في كلامة اهم شيء الناس تفكر تبعدة من السودان لفتيرة نقاهه
--------------------------------- تحياتي لود العباسية وكل الضيوف
08-21-2010, 12:59 PM
طارق جبريل
طارق جبريل
تاريخ التسجيل: 10-11-2005
مجموع المشاركات: 22556
السلام عليكم .... ود العباسية ازيك تحية وسلام مربع لكل أعضاء البوست القدامى منهم والجدد ومتابعين معاكم الحافر بالحافر بعض المصاعب التقنية منعتنا من المشاركة في الحلقات الأولى لهذا البوست حلت بحمد الله وإن شاء الله متابعة لصيقة لما بقى شكراً لكل من افتقدني المعز ادريس(Elmuez) والأخ حاتم صالح (Hatim Yousif) ويا جماعة الحكاية بقت مع أعضاء بوست أغاني وأغاني علاقة خاصة جداً وفي الحقيقة كثير من الشلة دي الواحد ما بيصادفهم في البورد ده الا من رمضان لرمضان ما عايز أجيب أسماء فالكل حلوين والكل فِرد .... (الزوول) سابقاً
.....
08-21-2010, 04:04 PM
ودالعباسية
ودالعباسية
تاريخ التسجيل: 10-28-2002
مجموع المشاركات: 2442
Quote: أفتقد رواد هذا الخيط الرمضاني ،الباشمهندس أبو بكر وصديقي الزوول وممكونة بالإضافة إلى الفنان عاصم البنا الذي أطلق عليه الباشمهندس أبو بكر لقب (فردتنا) . لقد أطلعت على رأي صديقنا الباشمهندس أبو بكر ، ومع إحترامي الكبير لموقفه إلا أنني لا يسعني إلا أن أقول أنني حزين لمقاطعته لهذا الخيط الذي أعده من المؤسسين له إن لم يكن هو مؤسسسه. أرجو أن يشاركوناالرأي في المادة التي تبث وفي الإجتهاد في التقييم كما كانوا يفعلون دائما.
نتمنى ذلك والله لانهم هم اساس هذا البوست من قبل 5 سنين ،،
ومعاهم الاخت نجوان برضو مختفية تماما
تحية ليهم جميعا والتحية للعقد الجديد من رواد بوست اغانى واغانى ،،
08-21-2010, 04:19 PM
ودالعباسية
ودالعباسية
تاريخ التسجيل: 10-28-2002
مجموع المشاركات: 2442
الزوول الوسيم حمد الله السلامة يا حبوب بركة بالشوفة و مبروك السماية الجديدة "كلنا طلعنا بدل فاقد"! أهو زي ما شايف افتقدناك قدر إيه! تحياتي و رمضان كريم
08-21-2010, 05:10 PM
سفيان بشير نابرى
سفيان بشير نابرى
تاريخ التسجيل: 09-01-2004
مجموع المشاركات: 9574
وصدقاً لي كلام اخونا ابو الفن طارق ميرغني ايوة المدينة تتحدث عن حلقة اتعملت اول أمس في حضور السيد عمر البشير وعدد كبير شديد من الناس في مقدمتهم أبو شنب علي مهدي وحضرها كل المجموعة الحالية في أغاني و أغاني .
غايتو الله يستر من الحلقة دي .
ومن هسي عندي اعتراض كبير شديد عليها مش في الاغاني أو في المغنيين لكن في زول بيعتبر نفسوا رئيس كل السودان ويجي يسمع اغنية الوسط السوداني .
اها نمرتي في النقه حجزتها من هسي عشان مافي واحد يجي يقالعني.
هاهاهاهاها
08-21-2010, 05:59 PM
سفيان بشير نابرى
سفيان بشير نابرى
تاريخ التسجيل: 09-01-2004
مجموع المشاركات: 9574
سلام وبدأت الحلقة ... الحلقة عن العملاق الكاشف وهي احتفاء مرور 41 عام علي ذكراها . لقطة لمحمدية وهو يستمع بهدوء ناظراً للارض. حديث من قدور عن الكاشف وقدراته اللحنية وتميزه فيها وعمك السر قدور سرح سرحت السنين والجميع متمحن . قوم غني ياخ ... وعصام والليل مابنوموا وهي اغنية يغنيها بشكل ممتاز جداً (يا جماعة رغم انو عصام غناها بامتياز لكن في حياة بتاعة لحن انا فاقده في الاغنية بطريقة آداء عصام دي). كورال المجموعة يردد بشكل جيد .
Quote: وعصام والليل مابنوموا وهي اغنية يغنيها بشكل ممتاز جداً (يا جماعة رغم انو عصام غناها بامتياز لكن في حياةبتاعة لحن انا فاقده في الاغنية بطريقة آداء عصام دي).كورال المجموعة يردد بشكل جيد .
اليوم ... مع أسطورة الغناء السوداني الكاشف ... عمنا قدور ... ومقدمة مؤثرة جداً عن الكاشف "أعتقد قدور بكى ".. .. ثم إنشراح كامل عن مقدرات الكاشف الفنية ... ونموذج عن التلحين المميز .. بإغنية الليل .. مع عصام ... .. في تقديري .. اليوم .. ح يكون حكر لعصام و الى حدما فرفور... .. عصام ... والليل .. بطريقة جميلة .. وطبعاً أغاني الكاشف ..ملعب عصام محمد نور ..
..
08-21-2010, 06:02 PM
سفيان بشير نابرى
سفيان بشير نابرى
تاريخ التسجيل: 09-01-2004
مجموع المشاركات: 9574
طه سليمان يؤدي جزء من اغنية بشكل لا يمكن ان نعطيه تقدير .
ترنيم مشترك بين السر قدور وعاصم باغنية حليل زمن الصباء
جمال في اغنية الشال منام عيني يؤدي جزء لايمكن تصنيفه رغم أن جمال يؤديها بشكل جيد .
نادر خضر في الحبيب وين وبصراحة عجبتني عندو وشايف انه غناها بشكل جيد جداً ، طبعاً صباح صوته ظاهر .
علي المساح وسيد عبد العزيز وعبيد عبد الرحمن هم اشهر شعراء الكاشف .
واغنية اذاك يا عيوني لعبيد عبد الرحمن ويغنيها أحمد الصادق والفرقة الموسيقية مسنكفه سنكفه زي التان تان لاحولة بالله واحمد مدخله مابطال لكن قبل أن نسمعه للتقيم انتهى الجزء.
08-21-2010, 06:36 PM
سفيان بشير نابرى
سفيان بشير نابرى
تاريخ التسجيل: 09-01-2004
مجموع المشاركات: 9574
والحوت الحوت يغني يغني وداعاً روضتي الغناء والباااااص الباص المافيهو شخشخه ماشاء الله ديجتل والمجموعة في كورال متقن والحوت مصحصح وعصام ينفعل مشاركاً ورغم انها جزء لكن لتفاعل محمود مع اللحن كان الجزء جميل .
08-21-2010, 06:57 PM
سفيان بشير نابرى
سفيان بشير نابرى
تاريخ التسجيل: 09-01-2004
مجموع المشاركات: 9574
واغنية يوم المهرجان وعاصم البناء ويغنيها بشكل ممتاز (محمدية مبسوط جداً) - موسيقى منضومة عبقرية لحنية متناهية الحياكة - كورال جماعي متجانس وبالجد عاصم في قمة الياقة (رغم انو رآي واضح في انو حقل عصام هو اغاني الحقيبة ويفشل في الاغاني الحديثة لكنه يخرسني في هذه الاغنية ) . عاصم البناء لاعب خط خلفي في غاية الجمال والسر قدور حاتيهو حت نضيف والاستديو مبتهج غاية البهجة . وجمال برضو يشتغل في جمالية جيدة .
المزيكا كانت ناقصة بتاعة البيز المميز محمد بشير صديقنا في العام الماضي .
لاااا ... الحلقة ضيعوها لينا شمار في مرقة ... الحلقة إتكلفتت تماماً ... معقول ده بس الكاشف ؟؟؟؟؟ كتر خير فردتنا ... تجلى في يوم المهرجان ... مع شغل جميل كـ خلفيات من فرفور ... بإختصار .. حلقة لاترقى لمستوى الكاشف ... وتوزيع أداء الأغاني طغى عليه طابع المجاملة ... أكثر من الإجادة ... وحتى يوم المهرجان .. كان أولى بيها فرفور أو عصام ...
___ * شوف عيني محمود أخد ليهو دقسة أو غمضة !!!!!!!!!!
..
08-21-2010, 07:27 PM
ودالعباسية
ودالعباسية
تاريخ التسجيل: 10-28-2002
مجموع المشاركات: 2442
الحلقة الليلةالشيء الوحيد الكان جميل فيها هي اغنية الليل ما بنوموا عدا ذلك كانت باهتة لما تكون الحلقات بتتناول مسيرة مبدعي الفن السوداني مفروض يكون في استعداد افضل من كدا
اخشى انه الحلقات تكون بدت تدخل في مرحلة الحلومر المكرر للمرة الخامسة ، اثار حلومر بدون طعم
يبدو انه التسجيل لساعات طويلة بيكون خصم من قدرة وطاقة المشاركين في تقديم افضل ما لديهم
مع الاعتذار لكل محبي الفنان محمود عبدالعزيز لكن يحتاج او تحتاج ادارة البرنامج لمن يهمس لها بانه من الافضل عدم ظهور الفنان محمود عبدالعزيز مرة اخرى والاكتفاء بهذا القدر لانه كل ظهور ليهو بيخصم من رصيده الكتير صوته واضح انه تاثر بعوامل التعرية كتير جدا في لقطة ركزت عليهو الكاميرا وهو في حالة غفوة ومرة تانية بيغالب في النعاس عشان يفتح عيونه
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة