" العوج راى والعديل راى " البندقية أم روحين والطلقة الفشنك

Quote: الأستاذ الرشيد البصيلي تصوموا وتفطروا على خير ... ورمضان كريم .. أعادة الله علينا وعلى أمة محمد بالخير واليمن والبركات. تقبّل الله صيام الجميع وقيامهم. أميييييييييييييييين. كلامك عديل. وأظنك سمعت بمقولة السير ونستون شيرشل رئيس وزراء بريطانيا العظمى (سابقاً) التي تقول: إن إصدار القرار الخطأ خير من عدم إصدار القرار. أي أنك تتعلم من إصدار القرار الخطأ بتعلم الصواب. وهنا حسب فهمي أن الرأي العوج يقود صاحبه إلى الرأي العديل. لكن كان الزول ما عنده راي .. يعني إضينة رجال دا ما حيتعلّم أبداً. وذلك يعني أن تقول رأياً عوجاً ويتم تصويبك أفضل من سكاتك بالرأي العوج وأنت تعتقد أنه صواب، وربما يقودك لتهلكة لم تعمل لها حساباً.طبعاً كلامك فيهو إنجليزي كتير لبعض المعاطيب في المنبر ما حيكونوا فاهمين إنت بتقول في شنو؟ ودا اسمه عدم الثقافة الفلكلورية.. شفت الفهم كيف؟ أحلف ليك ناس كتار لا بعرفوا القفل ولا أم مديشينة لا الدقر. يعني زي البتتكلم هيروغلوفي. وكمان تقول نار المفراكة .. معقول يا ود البصيلي تقول نار المفراكة دا إنت قديم بشكل! قول يا ود البصيلي إنت من الرهد أبو دكنة ولا أنا غلطان؟ ناس القفل ونار المفراكة لي أكثر من 30 عاماً ما سمعتها في فم زول. طبعاً ضحكت على كلامك وحمدت الله أنو لسع في ناس بعرفوا الحاجات الفلكلورية دي. فتناك بعافية ونلتقي في ساعة خير.