بُناءً عليه ... العفو والعافية .

Quote: تعرف يا حجر .. وأديكـ النجيضة البورض عندكـ بقت تفتيش للإساءة والبحث عن عورات الناس .. باسم النضال والحرية والما عارف شنو!! ليه ما تختلف مع الناس بدون ما تسيء؟ وبدون ما تفتش في أســرار الناس وجوه بيوتهم والبُعد عن شرف الخصومة؟ وما تقول لي هم البادروا وهم وهم والكلام البتفتش بيهو عن مخارجات لنفسكـ .. أنا متأكد لو واحد بادركـ بالإساءة ورديت عليهو بالإحسان برجع ليكـ ندمان وسافي التراب .. لكن إنت بالذات في الأيام الأخيرة بقيت تنتظر أي واحد بس يقول عنكـ كلمة عشان تفتح نيران النضال فيهو! دا ما نضال يا حجر .. راجع نفسكـ وشوف مواقع رجليكـ وين! مداخلاتكـ في الفترة الأخيرة كلها بقت كوم بتاع إساءة .. ومصر جدا على إنكـ موقفكـ صحيح والناس دي كلها وهم ساي .. ياخ أطلع من الدور دا وعيش الدنيا .. والما بترضاه في نفسكـ ما تطلعو للناس! قسما بالله أنا لو وصلت مرحلتكـ دي كمبيوتري زاتو بكسروا!! بعدين شنو يعني كل ما تختلف مع زول تقوم جاري على كان بعمل شنو وبسوي شنو ويا ود شنو يا منو .. ليه يعني؟ فرقكـ شنو من جهاز الأمن القاعد تناضل عشان تشيلو مع حكومتو دا. ما ياهو إنت لسع في مرحلة النضال وشايل كيبورضكـ وأقول زول يلاقيكـ تديهو من الفارغة طن، يعني لو جيت مسكت البلد البطلع لينا منكـ شنو؟ يا حجر إنت قايل البورض دا بغير الحكومة؟ لو معتقد كـدا بديكـ النجيضة: دا وهم ساي .. أي نعم بنقل آراء وبوصل أخبار للناس وبعمل حاجات كتيرة، لكن لا الليلة ولا بكره ممكن يصل لمرحلة يقلب حكومة ولّ ينتخب لينا حكومة تريحكم وتريحنا من قصة المعارضين! ياخ كمية مقدرة من الشعب السوداني الفضل ديل، الناس البجد مغبونين وروحهم طالعة جوه البلد ومنتظرين نوع نضالاتكم دا، ما بعرفوا ليكـ الإنترنت زاتو، خليكـ من سودانيز أون لاين ونضالاتو البقت تخش في الأسر والعوائل، والبحيت ورا الناس، وفلان عمل وفلان سوا! غايتو دي نصيحة مني ليكـ .. ما إني ما في مكان نصيحة لا عمرا ولا خبرة ولا أي حاجة لكن الكلام دا واقف في حلقي من فترة، لو ما عاجبكـ طوالي أرميهو البحر وعادي ممكن تطلب من بكري يشيل المداخلة دي .. وليه بكري .. قول ما عجبتني بشيلا طوالي وبمش بيها ويا دار ما دخلكـ شر .. ولا عندي نفس للجدال معاكـ ولا بخاطر أصلا أني أناقشكـ في حاجة لأني ما برضى زول يوجه لي أي إساءة لأني ما بعملا ولا برضاها لغيري ولا نفسي ولو الموضوع ممكن يخش في أهلي يبقى المنبر دا ما مكاني أبدا .. وما تقول لي أي مبررات لأني شايفكـ بقيت تمشّي أي حاجة عادي وتصل لأي مرحلة عادي باسم النضال .. الطلعتوا بيهو روحنا وروح الشعب الشعب السوداني الفضل والمنتظركم .. وما أظن تلحقوهو بالطريقة دي!!