|
Re: يوم 10-6 بابكر سلك يعد المريخاب بفوز تاريخى ويوم 11 يبدأ المناحة ..حى ووب (نموذج لاعلام الم (Re: عبد العظيم احمد)
|
Quote: ضحكنا علي غيرنا كتييييييييييير • لكن اعتقد آن الاوان عشان نضحك في روحنا شويه • ولما نضحك في روحنا افضل من نضحك عليها • وعشان مانضحك علي روحنا تعالوا نضحك فيها • الناس كلها مشت لي كاربوني • وفي ناس قالوا تدخل الاداريين في التشكيل هو السبب • ده بالذات لو حصل يبقي لاخير في الاداريين المتدخلين ولاخير في الجهاز الفني البسمح للاداريين ان يتدخلوا في التشكيل • انا شخصيا استبعد ذلك • لكن لو حدث • الله يرحم من يرحم • ياناس • لينا سنين صابرين • علي حزن الغني • وصابرين • علي موت المني • وصابرين • علي ناس بتهمنا • وصابرين • لكن للصبر حدود • وبنرفض نحن نموت • وفي لاعبين بصراحه بكتلونا لو استمروا في الكشف • ماتقول لي بجي منهم • المفروض يجي غيرهم • استنفدوا الاغراض • صبرنا عليهم عساهم يعودوا • ولكن هل من عوده تاني ! • اللاعب اذا كان حريف لدرجة قف • بضقل بي لسانو • ويفتقد للاصرار والعزيمه • مابلزمنا • ياناس • افتكر نحن محتاجين نكرم سفاري • ونسيب سفاري • والباشا • والسعودي • الناس بتقول بجي منهم • وخالتي بتقول بري منهم • اولادنا • لكن لكل حدث حديث • يجب ان نكرمهم • وصلتني رساله من ابو فاطمه الصفوه • بقول فيها بالنص • ليسوا هم من يحمل ملامح هذا الكيان • وليسوا هم من يحمل ملامح جيل مانديلا • وليس هؤلاء من تنتظرهم جموع الصفوه ليضيفوا لسجلات الانجازات • ويواصل • انصاف المواهب • وتسجيلات قدر ظروفك يهزمون المريخ ! • ابو فاطمه يا اخوي • انا اثني • ياناس • نحن نحتاج لحارس مرمي متطور ويتطور ويحترم انه حارس للمريخ • ونحتاج (لثيردباك ) مهول وخفيف وحريف وبجيد اللعب بارجلو الاتنين وبلعب (هد ) بالذات (هد) بامتياز • عشان نرتاح من الصنقيع والدنقير مع سفاري كلنا ما الكوره علت • نحتاج لصانع لعب • شغلوا صناعة اللعب • ونحتاج لقلوب حمراء وشراره • تشبه الشعار • ونحتاج لخمسين ايداهور • التكميليه الآن • والكوره في ملعب مجلس الاداره • مافيش يمه ارحميني • من استنفذ اغراضو يلملم اغراضو • وبنكرموا • وبنحترم ليهو الفتره القضاها معانا • تعالوا نضحك في روحنا شويه • العجب القائد • كان يفترض بحسب خبرته ومكانته ان يكون اكثر الناس اصرارا علي النصر في تلك الليله • جا الميدان ولا هاميهو • قال ليك اتنين اصحاب من بدري • برنامجمهم بالليل طواااالي مع بعض • بدري الكلام ده • قبال نميري يقفل البتاعات • الدنيا فرقتهم • اها قال ليك بعد تلاتين سنه اتلاقوا صدفه في الشارع • واتسالموا واتحاضنو • الاول قال للتاني الليله البرنامج عندي • التاني قال ليهو وييين يا اخوي , انا بطلت , الله هداني • الاول قال ليهو معقوله ! ومن متين ؟ • التاني قال ليهو والله لي خمسه سنين مارفعت كاس • الاول قال ليهو خمسه سنين مارفعت كاس العجب انت ! • في داعي تجيب لينا الكلام يافيصل • عشان الكلام ده كان تكون مصر علي النصر ياعجب • ياسر بشتنه • صاحبي موت • ايام الجامعه كان بايت معاي • عندي ###### ووولف • عامل ليهو بيت من الحديد • اها • بالليل طلعت ال###### من بيت الحديد وقطعت ليهو الرغيف في شوربه • بعد كملها كبيت ليهو اللبن • ال###### يلهط • وبشتنه يعاين سااااااااااااااي • قام ال###### مشي يتفقد المنزل • شبعان لازم يقوم بي واجبو • ###### حساس • بشتنه قال لي كل يوم بتدي ال###### شوربه ولبن ؟ • قلت ليهو طبعا • قال لي ياسلك اديني رطل لبن كل يوم انبح ليك للصباح • اها • البعمل فيهو جمال ده للاعبين في المعسكرات من لهط للطيبات وكندشات وعصائر • لو اداه لاي زول كان نبح للصباح • خليك من البعيدين • لو اداني ليهو انا ده كان غلبت ليك امبده والفتيحاب والثورات وموقف جاكسون كلو • لو اداهو لي بسبوسه كان خلي الرجفه • ناس احمد محمد احمد ديل لو اداهم ليهو بعضوا عدييييييييييييييل كده • معقوله • منير والتعاون وسامي وفنيله (اقصد خليفه ) • ياخ ديل قندران يمشي بيناتم • وارقو • سنو يا هاج • شوف ياوارقو • انا كاستوني بنين , استواكا كاكا موني لاغوس , اسياكا اموكاشي , كانو , اوكاشا , استسكو انامونتي دوقا باقا (طوالي ) • كلامي وااااضح • واقول ليك حاجه • الشريف مابسوط منك • الشريف زعلان منك • يامجلس ادارة نادي المريخ العظيم • مش عايزين باشاوات
سلك كهربا الله يعوضنا فيك والي لقاء سلك نشر بتاريخ 11-06-2010
|
| |
|
|
|
|
|
|
Re: يوم 10-6 بابكر سلك يعد المريخاب بفوز تاريخى ويوم 11 يبدأ المناحة ..حى ووب (نموذج لاعلام الم (Re: نيازي عبدالله مرحوم احمد)
|
سلام نيازى هالك عمود بابكر سلك عن فقر لاعبى الهلال
Quote: بالدكوة 08-10-2010 03:28
ده عمود أمس أبى يمشي بالبريد الالكتروني حلف يمشي بالعربية جبتو بالعربية وأنا داخل على مباني الصحيفة من الجنوب ماشي على الشمال في الناصية لقيت ناس الفول ناس أبو العباس ساندوتشات ساااااااااااي صف دكاكين اتذكرت إعلام الفول وتذكرت المبدع قائل العبارة واتذكرت بيان البرنس الجوع جوع في بلد ساندوتشات فولها بالطاولات؟ تجوعوا كيف ! حق الفول ما عندكم ؟ اكلوا طماطم بالدكوة لكن الطماطم غالية ذيها وذي الضان الكيلو بالشي الفلاني غلاء وحمار (بفتح الحاء) وهو في شي أغلى من الحمار (بفتح الحاء) يبقى تاكلو دكوة ميري دكوة سااااادة وما تتقلوا فيها كثيرة ما كويسة بتجيب الكلام أقول ليكم حاجة افتحوا ليها الدكوة جيبوا عجور خللوه او جيبوا خيار كل زول ادوهو خييارايه واحدة الما عنده خييايارايه ادوهو خيايارايه والباقي خللوه الكسبرة ما بعيدة منكم شكيتك على شنو يا الجعلي حيركم ما داير ادخل في موضوع المباراتين الليلة لكن الشفناه في النجيل ده مخجل يا دحية يا مدير الاستاد يا مدير في كل مكان وكل زمان معقولة ! نجيله أخير راسي هووووووي يا دحية عبد الله دا كان شافها ما بخليك عبد الله بقول ليك اتطل بالله أخير تستعجل يا مديرنا الجوع حار والله لكن العزاء انكم كنتوا شبعانين في يوم من الايام وزي ما قال الإمام كرم الله وجهه اطلبوا الفضل من بطون شبعت ثم جاعت ولا تطلبوا الفضل من بطون جاعت ثم شبعت اتشبعي بيع يا روشا وجيب الخضار بيع وتمها (ماجي ) بيع إن شاء الله تبلوا قرقوش بيع أخير من الجوعه دي !!!! سلك كهرباء لن ننساكما إطلاقاً والى لقاء سلك |
| |
|
|
|
|
|
|
Re: يوم 10-6 بابكر سلك يعد المريخاب بفوز تاريخى ويوم 11 يبدأ المناحة ..حى ووب (نموذج لاعلام الم (Re: عبد العظيم احمد)
|
Quote: ميشو نفش ريشو 07-27-2010 05:53
• ميشو نفش ريشو • من حقو • موش قروشو ! • كان قعد مع سانت جورج زغني ساااااي كان شبع • فرجة سااااي في سماحة اديس دي كان استمتع • جو جميل سااااااااااااي كان صحتو اتصلحت • بالله من جا هنا تقول ماسكو التايفويد • التي شيرت بالجمبة • اللياقة واقعة لي نص الضهر • معقولة • لاموز • لامقدم عقد • لا سماحة • وشنا كمان • شنات استاد • الجابرو شنو ؟ • الخواجة قال قروشي اسع ناااااااااااااااااااااااااو • والواقع قال نووووووووووووووووووو • ومابين ناااااو و نوووووو فروقات كبيرة • كدايس يا كافي البلا • ناو .. نو ...ناو تنونوا اليوم كلو • بس (بكسر الباء ) • اها • امس كانت الانتخابات • اتذكرت كلام الارباب • لما قال شداد باقي ليهو اسبوعين • اها • طاروا الاتنين • البهدد بالاسبوعين • والمهدد بالاسبوعين • قالوا الارباب جاب عشرين صوت • رضا يا ارباب • احمد ربك يا راجل • وبوس يدك قلبة وعدلة • لكن عشرين نقطة دي ما بتقعد تيم في الممتاز , بنزل • اخير من الناس المرقوا من التنافس • بره اللعب • زي توتي • توتي زماااان • اسي الذكرني توتي منو ؟ • امس جات طيارة مستعجلة • جديييييييييييدة • وصغيرة • طايرة شدييييييييييييييييد • دايره ليها مشاكل • اسلام قالت لي دي طيارة الفيفا • قلت ليها الفيفا تطير • بلاتر الماسورة • تقدر تقول مشو ميشو قبل ناس ميشو يمشو • عشرين مرة • قدر نمرة الارباب • تخيلوا • افرض الارباب لم يترشح • وشداد ترشح • تضمن لي انو شداد كان بجيب قدر الاصوات الجابها الارباب ؟ • معقولة زول يصوت لصالح جعفر ممكن كان يسند شداد اذا نزل انتخابات ضد جعفر • الاصوات التي ساندت جعفر في كل الاحوال كانت ستسانده • ايا كانت دوافعها في تلك المساندة • ياناس • البقت بقت • الاتحاد الجديد عليه يبدأ من حيث انتهى الماضي • ويعمل على تطويرنا • شكراً دكتور شداد على ما قدمته للكرة السودانية طيلة عقود من الزمان • في الآخر انت خبير وعملت واجتهدت واستطعت ان تقود كورتنا لازمان طويلة • برغم استحالة اداء مثل تلك الاعمال في حقب تواترت كثيراً • نشكرك • والمابي الشكر ندمان • زي المابي الصلح • اسي المشكلة ما معتصم جعفر فاز • معتصم يفوز ما مشكلة • الأرباب ما يفوز ما مشكلة • شداد يزعل ما مشكلة • شداد يرضى ما مشكلة • الفيفا تجي ما مشكلة • الفيفا تتغابى العُشرة وما تجي ما مشكلة • ميشو يمشي اهلوا ما مشكلة • يجي راجع يدرب مجاناً ما مشكلة • البرجع الارباب لرئاسة الهلال شنو؟ دي المشكلة • وما في حل للمشكلة • اجمل ما قرأت في الآونة الاخيرة ما كتبه الرائع مجدي محمد البشير • قال شداد يا فيها يا للفيفا يوديها • أمل الزعيم كبير • لكن من اسي • النيجر فيها مطر شديد • لا بنقبل قولة الامطار • ولا بنقبل احذية المطر نسوها • ولا بنقبل غير التأهل • اسلام قالت لي من استقال عمو صلاح ميشو ما ادوهوا حقو ؟ • قلت ليها ما ادوهوا • قالت لي كورة الهلال في زيمبابوي متين ؟ • قلت ليها قربت • قالت لي الهلال هنا موش غلب خمسة ؟ • قلت ليها صاح • قالت لي كان الهلال مالقي حق الطيارة موش بعدوهوا مغلوب اتنين بس ! • قلت ليها بطير بدل الطيارة المالاقين حقها دي • بيع يا روشا • الزومة ضايقي • الموضوع كبير ياروشا • العمد ما بحلوهوا • داير ليهو حكومات عدييييييييييييييييييييييييل • بيع ياراجل • إن شاء الله بيع جزء يقعد بيهو ميشو • إن شاء الله الانتخابات يعيدوها • يعني كان عادوها الكم واربعين ديل بزوغوا ؟ • افرض زاغوا عشرة • برضو بتكون النتيجة تلاتة وتلاتين قصاد تلاتين • سبحان الله • زي الفرق بين المريخ والهلال في الممتاز • تلاتة نقاط • اتنقطي
سلك كهرباء الكاف رفض قيد بديلك تقول لي ننساك
والى لقاء سلك |
| |
|
|
|
|
|
|
Re: يوم 10-6 بابكر سلك يعد المريخاب بفوز تاريخى ويوم 11 يبدأ المناحة ..حى ووب (نموذج لاعلام الم (Re: عبد العظيم احمد)
|
دا يوم الجيش
Quote: هذه ليلتي 07-17-2010 03:31
• الليلة ما في مجال لاي نقاش • الليلة ما يوم حسابات • ولايوم انتقادات • ولا يوم زعل • الليلة المسئولية جماعية • المشجع داخل الاستاد • المشجع خارج الاستاد • وحتى المشجع خارج الوطن • لامجال للتغريد خارج السرب • المسئولية تضامنية • حقتنا كلنا • اداري • لاعب • مشجع • وأي رياضي • كاربوني سمح كعب يجب ان نساعده بالتشجيع • اللاعب يؤدي كما نود • يؤدي كعب • نقيف معاهو إلى أن يتطور الأداء أثناء اللقاء • نريد نصراً • ولانستعجله • نريد نصراً يريحنا في مباراة الاياب • نريد أن نحتفل بالتأهل إن شاء الله منذ اليوم • وبعدها • الزمن طويل وكافي لإعداد العدة • ندخلها بشعار اول فريق يتأهل لمجموعات الكونفدرالية • وطبعاً الكونفدرالية السنة منورة بالجماعة • المهم • ننتصر • للمريخ • بإرادة الصفوة • ياناس • يا صفوة • انتم أسياد الجلد والرأس • لاتتخلوا عن نصر مستحقق • ولا تستعجلوهوا • حتى ولو كانت المباراة لاقدر الله تعادلية للدقيقة الأخيرة • سننتصر بحول الله • تعالوا • كلنا • انت وأنا • لي حبنا • مابدعمو زول غيرنا • ومنقو قل لاعاش من يفصلنا • تعالوا كلنا • صفوة • يجمعنا حب الزعيم • والجنسية الصفوية • والهوية السودانية • الليلة ليلتنا • سنغني إن شاء الله وبحوله • هذه ترارارا • ليلتي • تي رارا • ونشهد التاريخ • ونقدم النصر هدية لروح ايداهور • فقدناهو • ولكن العشم في البقية كبير • تعالوا كلكم • كداري • باللواري • بالعربات الخاصة • شيرنج بالحافلات • بالمواتر والعجلات • كلنا نلتقي جوه الاستاد • ماداخلين نتفرج • داخلين نشجع • وندعم • ونساند • ونقتلع النصر الكبير • أيها الصفوة • ارفع صوتك عالي • هيبة وجبرة • وخلي نشيد مريخك يلالي • كلماتا حمراء وصفراء • وازأر طول الماتش طوالي • مريخ • هي هييي هيهي • مريخ • تعالوا كلكم مريخاب حمر • لابتخافوا من زول ولا بتخافوا على الاسد الكبير • الصفوة الصفر • سيبوا الرجفة وتعالوا • محتاجين ليكم • ومشتاقين لوجودكم جوه دياركم • طابقين • نملاهن بحول الله • بي حقنا • أكبر دخل • أكبر عدد من الأهداف • وتاني يوم نستمتع لما نسمع الناس بتقول • قابلتوا ليكم فريق حمام ميت • كل الصفوة • بجميع سحانتهم • لازم يجوا الليلة • عشان الخصم يعرف حاجة • عشان الخصم يقتنع بان هذا البلد قارة • وجميع السحنات متوحدة • اتحدت كل السحنات في حب الزعيم • تعالوا • طالما العجب في • وطالما بلة نشيط • وطالما راجي فنان • وطالما لاسانا شوات • طالما مصعب حريف • طالما بقية العقد تخفق قلوبهم بحب الزعيم • تعالوا بدري • عشان خاطر ساندرا • وعيون اطفال ساندرا • تعالوا شوفوا المقدرة • تعالوا لنغني • هذه .... ليلتي
سلك كهرباء ده يوم ننساك فيهو ! والى لقاء سلك
0 |
| |
|
|
|
|
|
|
Re: يوم 10-6 بابكر سلك يعد المريخاب بفوز تاريخى ويوم 11 يبدأ المناحة ..حى ووب (نموذج لاعلام الم (Re: عبد العظيم احمد)
|
الكلام دا بعد تعادل المريخ مع الجيش
وبابكر مناحة قام
Quote: معقوووووولة ! 07-18-2010 03:19
• دايرين نغلب متين ؟ • معقولة • نبحث عن التعادل في أرضنا ووسط عرضنا! • معقولة • حرارة في القلوب ساي ما نلقاها • فريق زي القابلناهوا ده مفروض ياخد ستة والشمس بره • لكن • كالعادة • المتلاعبون بشعار الزعيم خذلوا الجميع • حتى الجو الجميل خذلوهوا • حتى الغيمة الكانت تعشم تلقى بسيمة • طيروها ليها من راسها • التكتيك خليهو • عرفة الكورة ذاتها خليها • في لحظات كده كانت دايرة اصرار • لكن منو البصر ؟ • الزعيم ماليهو وجيع وسط الباشاوات ديل • مادايرين نتكلم عن أشياء غريبة • لكن الشيطان زاتو لو دخل الميدان في كور كده ما بتضيع • سبعين هدفاً ضائعاً في الشوط الأول • وبكل برود • يواصل الناس البرود • يا ناس • لابتشعروا لابتحسوا ؟ • ولا بتغيروا ساي • حيرتونا • ياناس خلف الله • حاجات غريبة • لكن أغرب شيء هذه النوعية المعزولة عزل دي • من وين انتوا ! • حتى النفطي • العريس • النفض الكيس • الكيس الشالوا مننا • ضربة الجزاء • في أحرج الأوقات • لعبها بره الكيس • حيرتنا • الهدف الاول البدري شديد ده خفت منو • ذكرني مازيمبي • وبقيت أشوف الخمسة في القزاز • بالذات لما أضعنا الضربة • وزاد الإحساس بالخمسة لما جاء الهدف الثاني • نفتش على الدرون ! • بالطريقة دي حتى أطفالنا حايصابوا بأمراض الشيخوخة • فكونا يا مليونيرات الغفلة • يلالالالالالالالالالالالالالالالا • برا لمة • اسلام دموعها في عيونها • والعبرة تخنق في الحلق • قشقشت دموعها • وقالت لي • ايداهور لو في كان غلبنا من الشوط الاول • قلت ليها يابتي ايداهور لو في نحنا بنلعب مكرر الكونفدرالية من أساسو ؟ • ياناس • الخوف يكون مامات لاعب • الخوف يكون مات فريق ونحنا ماجايبين خبر • مباراة الاياب بعد اسبوعين • مافي داعي للسفر • حق التذاكر يا مجلس المريخ اصرفوهوا على المناشط • يمكن يكون فيها زول قلبوا حار وبحب المريخ • جمبلاط • أحرجتني • لا لياقة • لا لباقة • لا بلاغة! • المنطق بقول نقنع من خيراً فيها • ومن خيراً فيهم • ونجهز البدائل في التسجيلات القادمة • نسكت سااااااي • نجهز أقلام شيني للشطب • شطب للجميع • اي زول مقصر في حق الزعيم يدينا عجاج كرعينو • اداري • لاعب • مشجع • اي زول • لافين في الميدان نفتش في الدرون زي ال###### الداسي عضم ومالقاهو! • لن نترك لكم مريخنا • ولكن سنجبركم على أن تتركوا لنا عشقنا • وإلى ذلك الحين • سنصبر • حتى يعجز الصبر عن صبرنا • وحتى يأذن الله في أمرنا • ونصبر حتى يعلم الصبر أننا صابرون على شيء أمّر من الصبر • صابرين على برودكم ده
سلك كهرباء شفت الحصل ! تقول لي ننساك ! منو البقدر ينسينا !
والى لقاء سلك |
| |
|
|
|
|
|
|
|