Quote: أما المباريات التي ستنقل بتقنية الـ 3D "للناس المرطبة" عددها (25) مباراة من المباريات التي ستلعب في خمسة من ملاعب جوهانسبيرغ وديربان وكيب تاون وبورت اليزابيث بحسب شركة سوني والاتحاد الدولي :
ده كلام عجيب !! كوره 3D ! دي بتكون عايزه ليها مهدئات رسمييي هههههه هو في التلفزيون حقنا ده أعصابنا بتبوظ, جابت ليها 3D؟
الحمد لله اننا ما من الناس المرطبه المذكورين أعلاه, لأنه الأطباء مضربين, والعلاج بقي ما مضمون في بلدنا دي لووووول
Quote: جوهانسبيرغ- ا.ف.ب مرحباً بالعالم شارك المئات من الراقصين والموسيقيين وغيرهم من الفنانين، في بروفة أمس الاول استعداداً لحفل الافتتاح والذي يشهد أيضاً مشاركة آلاف الفنانين «في الترحيب بالعالم في قارتهم» أفريقيا، ويشهد حفل افتتاح كأس العالم على ملعب سوكر سيتي بجوهانسبيرغ مشاركة 1581 فناناً ويشاهد الحفل مئات الملايين على الهواء مباشرة عبر شاشات التلفاز في 215 دولة وفقاً للجنة المنظمة لكأس العالم. ويقام الحفل قبل ساعتين من انطلاق المباراة الافتتاحية للمونديال والتي تجمع بين جنوب أفريقيا والمكسيك. وشعار حفل افتتاح مونديال جنوب أفريقيا هو «مرحباً بالعالم في قارتنا». ويحيي حفل الافتتاح المطرب الأميركي الفائز بجائزة غرامي، ار كيلي عضو فريق ار أند بي، حيث يشدو بأغنية «ساين أوف فيكتوري» مع فريق غنائي من سويتو.
حفل افتتاح كأس العالم 2010 خلال الساعات القليلة القادمه
تنطلق اليوم بطولة كأس العالم لكرة القدم في جنوب افريقيا بلقاء فريق البلد المضيف وفريق المكسيك في جوهانسبورج, يترقب الجمهور حفل الافتتاح لمشاهدة مجموعة فريدة من عروض الرقص والغناء الافريقي،بالاضافة الى مشاركة عدد من المغنيين ذوي الشهرة ا لدولية،والاستمتاع بعرض باهر للثقافة الافريقية. يشارك في حفل الافتتاح الذي يستمر 40 دقيقة في المدينة الرياضية اكثر من 1500 من المشاهير, و سيكون بتمام الساعة 02:00 بالتوقيت المحلي لجنوب أفريقيا(GMT+2) , تأتى المطربة "شاكيرا" على رأس الفنانين المشاركين. وستقدم أغنية (واكا واكا) وتعنى "آن أوان أفريقيا" بلغة الزولو، بجانب المطرب الأمريكى أر كيلى الفائز بجائزة جرامى، حيث يقدم أغنية "علامة النصر" أو "ساين أوف فيكتورى" بجانب فريق من جنوب أفريقيا. سيشارك فيه أيضا مطرب الراى الجزائرى الشاب خالد، وفرقة أوسيبيسا الغانية، وعازف "الترومبيت" الجنوب أفريقى هوف ماسيكيلا، وكبار مطربى جنوب أفريقيا من بينهم مطرب الهيب هوب بانتسولا، وثانديسوا مازاوى.
يحضر الحفل مجموعة من أبرز "نجوم العالم" فى الرياضة والسياسة والفن، يتقدم الحضور زوما، رئيس جنوب أفريقيا، ورئيس المكسيك فيليبى كالديرون، والأمين العام للأمم المتحدة بان كى مون، ورئيس الاتحاد الدولى لكرة القدم جوزيف بلاتر، وعيسى حياتو رئيس الاتحاد الأفريقى لكرة القدم .
انفقت جنوب افريقيا اكثر من خمسة مليارات دولار على الملاعب والبنى التحتية والمطارات منذ اختيارها لتنظيم هذه الكأس عام 2004, ومن المتوقع ان يساهم المونديال في زيادة الناتج القومي لهذا البلد للعام الحالي بحوالي نصف بالمائة بينما يتوقع ان يزوره 370 الف شخص بهذه المناسبة, وقد بيعت 97 بالمائة من اجمالي بطاقات مبارايات الكأس البالغة 3.1 مليون.
شهدت ضاحية سويتو في جوهانسبورج مساء الخميس حفلا كبيرا بهذه المناسبة شارك فيه عدد كبير من مشاهير الغناء من بينهم المطربة شاكيرا التي ادت اغنية خاصة بهذا المونديال.
(واكّا واكّا) أو (اَن أوان أفريقيا):
(عدل بواسطة Amany Elamin on 06-11-2010, 12:22 PM) (عدل بواسطة Amany Elamin on 06-11-2010, 12:37 PM)
افتتاح رائع جدا مستوي الفريقين جيد مباراة اروع الجزيرة الرياضية كرهتنا البلي ويبدو انو المصرييين لاعبنها مع نايل سات لانو المباراة باعوها ليهم وجوا فكوها مجانا
_ وين امين نوتة ده...الليجي مارق لي انت كجيت المكسيك ...كرهتهم الكورة قون عديل كدة والمادفع مدسي ورا العراضة الحكم قال سارق انا لله ياخي..زح لي من الانجليز بكرة ...حلفتك بربك
أحرز لجنوب أفريقيا: Siphiwe TSHABALALA 55 بينما أحرز للمكسيك: Rafael MARQUEZ 79
بصراحه اتوقعنا أكتر من جنوب افريقيا, مع انها لعبت حلو جدا في الشوط التاني, بس ماركيز أجهض حلم كارلوس ألبرتو باريرا وملايين المشجعين, بفوز جنوب افريقيا في المباراه الافتتاحيه :(
الافتتاح ما حضرتو كلو, مباراة جنوب افريقيا حضرت الشوط التاني,, عجبني لعب جنوب افريقيا جدا, جهجهوا المكسيكيين تماما,, لولا ماركيز وهدفه اللي جاء بعد ربكه من المدافعين, كان ممكن تنتهي المباراه بفوز البافانا بافانا ...
لكن جد انت كنت مشجع المكسيك؟!!
06-11-2010, 06:16 PM
GamarBoBa
GamarBoBa
تاريخ التسجيل: 03-07-2002
مجموع المشاركات: 4985
أماني مساء الخيرات مكسيك شنوياخ...انا كان خوفي النتيجة تطلع 2-1 حسب الفوركاستنق بتاع اخونا امين ويجي يملانا نبوغ فكري وفرق معرفة بسنين ضوئية مع انو النتيجة الحقيقية جات حسب توقعه لكن تقولي شنو ..نحن بنقول ليه ما تكج الفرق وهو مصر شجعت الافارقة طبعا..وحزنت لهدف ماركيز مع انو زولي زول برشلونة.
جنابو عمر تحليلك كويس وننتظر الهادي يجي برضو يدينا المفيد...القون الاول حقيقة جميل لكن ما حضرته الا في الاستديو التحليلي بعد المبارة لانو الاشارة كانت قاطعة
06-12-2010, 05:01 AM
omer osman
omer osman
تاريخ التسجيل: 06-09-2007
مجموع المشاركات: 15218
Quote: انا لله ياخي..زح لي من الانجليز بكرة ...حلفتك بربك
غدا بحول الله إنجلترا في أمر ضيق !!! أمريكا الشقيقه ستحدث مفاجاه !!! و علي الأيمان لو المكسيك كانت غلبت ٢/١ القلتها دي : كان خليتك إنت و أماني المستلبه دي في أمرا ضيق !!!
فرنسا تظهر بمستوي مخيب للامال في أولي مبارياتها, دفاع الأوروغواي قوي ومتماسك .. المباراه كان فيها خشونه وكميه من الكروت الصفراء, وكمان أول كرت أحمر للاعب من الأوروغواي, المباراه تضع جنوب افريقيا والمكسيك في وضع جيد في المجموعه الأولي حتي الان ..
غايتوا للان ما بقدر اديكم ترشيحاتي لكين في الافارقه غالبا ح اكون مع ساحل العاج بلعبوا حلو وغانا برضوا وطبعا يا موني انا المانيه الهوي وبتمني انه تكسب الكاس الارجنتين او اسبانيا
06-12-2010, 07:22 AM
doma
doma
تاريخ التسجيل: 02-04-2002
مجموع المشاركات: 15970
Quote: طبعا يا موني انا المانيه الهوي وبتمني انه تكسب الكاس الارجنتين او اسبانيا
أكيييييد ألمانية الهوي :))))) جنابو عمر عثمان برضو ألماني الهوي خالص, وقايم ليك بالواجب في البوست ده,, عموما لسه ما شفنا لعبهم في المونديال ده عشان نحكم,,
أنا زيك ما قادره أحكم حأشجع منو لغاية ما أشوف أول مباراه لكل فريق,, لكن مبدئيا مع الأفارقه كلهم ... :)
لووووووول يا غباشي يا ما عندك انتماء, تشجع الأرجنتين قدّام نيجيريا؟ طيب استني الأفارقه يطلعوا من المونديال بعدين شجع الأرجنتين زي ما عايز
بصراحه ميسي عجيب, غايتو في كوره كده مسكها وجري بيها بزاويه 45 في الاستاد لغاية قريب القوون, واتخطي النيجيريين كلهم, دي لو جات قوون كان حيكون أعجب قوون في الدنيا ههههه اتمنيت ميليتو يدخل من بدري لأنه عجيب برضو وكان حيعمل عرض خطير,
كوره حلوه علي العموم وأحلي حاجه جرسة مارادونا ههههه الزول ده جابوا صورته أكتر من اللاعبين والكوره, بعدين شكله ماياهو؟, لابس ليهو بدله أكبر منه؟, ماتفهم, لكن قرررب يدخل يلعب معاهم
النيجريين ما قصروا ولازمهم النحس الافريقي وأهدروا فرص كبيرة زي ما الارجنتينين ضيعوا هجوم الارجنتين ما عنده وسط يملكه الكورة كويس وميلتو المفروض يكون اساسي ميسي لعب كويس شديد لكن ديك ما طريقة تهديفه المعتادة هو اذكي من كدة بكتير دفاع الارجنتين شعيرية بس..لو لاقي كان هجوم محترم زي الاسبان ولا البرازيل او الانجليز كان شربوا ما ارتوا
ماردونا بقي يشبه لي جي جيفارا كدة ليه ما عارف وخاصة انو عامل فيها اشتراكي ومصاحب كم رئيس اشتراكي وبقي كايس الاضواء كتير...الزول ده جنريتر بقي شكله الناس ما عارفنه ساي يعني دي حركاته في مباراة صغيرة زي دي في مباراة كبيرة ممكن يخش الميدان ولا يعمل بلبلة..اقترح يعملوا ليه قفص كبير ويخلوا جنبة سيارة اسعاف للضمان
موعدنا مع العظماء التاسعة والنصف..مع انو الامريكان فريقهم سريع بلعبوا الكورة زي البلاي استشن لكن كابيلو كالعادة حيكون بتفرج فيهم الشوط الاول وحيجيهم بمزاج في التاني..اتمني جريرراد يكون في الفورمة الباقي ساهل.
..... بكري ابوبكر كرهتنا البلي ياخ كتبت كلمة (وض يعوا بمعني أهدروا قلبها مربعات كدة #### عشان فيها حروف كلمة و ض ي ع)...فكها ياخ
Quote: يعني دي حركاته في مباراة صغيرة زي دي في مباراة كبيرة ممكن يخش الميدان ولا يعمل بلبلة..اقترح يعملوا ليه قفص كبير ويخلوا جنبة سيارة اسعاف للضمان
يا موسى ...يأخى سيب الراجل فى حاله نحن ما صدقنا انه بقى بنى ادم وبطل الحاجات ديك.....على العموم المباريات الاولى لكل الفرق مهمة وكسبها هى الاهم عشان كدة الارجنتينيين كانوا فرحانين تقول وصلوا السيمى فاينل بس تخطى كل مباراة يجعل الفرق تلعب بارتياح يعنى حنشوف مباراة ممتعة للارجنتين فى اللقاء القادم وهكذا.
نتمنى لقاء قويا بين الانجليز والامريكان ....واتمناها للانجليز
انجلترا: الولايات المتحدة الأمريكية 1ستيفن جيرارد (3', 4') : 1 كلينت ديمبسي (39', 40')
منتخب الأسود الثلاثه: جيرارد, لامبارد وروني لعب مباراه قويه أمام أمريكا ,, بصراحه الفريقين (حديد يلاقي حديد) لووووووووووووول ولولا خطأ الحارس روبرت جرين القاتل لتقدمت انجلترا بهدف الأسد جيرارد, وكسبت المباراه, انجلترا بعد هدف التعادل الامريكي فشلت من احراز التقدم, وروني أدي مباراه كبيره وان عجز عن التسديد فيها تماما رغم كل المحاولات,,
الأمريكان كشرو عن أنيابهم ولعبو مباراه كبيره وقويه, وأثبتوا انهم انضمو الي ركب الكبار في المونديال,,
Quote: الأمريكان كشرو عن أنيابهم ولعبو مباراه كبيره وقويه, وأثبتوا انهم انضمو الي ركب الكبار في المونديال,,
الفريق الامريكي لعب بواقعية شديدة معترفاً بقوة خصمه وتفوقه عليه من كل النواحي .... على امل ان يخطف هدف من هجمة مرتدة او صدفة كما حدث ، انجلترا فريق جميل ومنظم ويمتلك كوكبة
من احسن اللعيبة في العالم نقطة ضعفه الوحيدة حارسه (جرين) مرتبك وكاد ان يكرر نفس الهفوة التى دخل منها الهدف بس ربك ستر...... اذا كان كابيلو مدرب شاطر بامكانه المضي قدماً بهذا الفريق اذا ساعده
جرين وانستر في باقي المباريات ...
06-13-2010, 07:37 AM
غباشي
غباشي
تاريخ التسجيل: 01-19-2007
مجموع المشاركات: 1729
بنهاية مباريات الجولة الأولى في كل من المجموعتين الأولى والثانية : المجموعة الأولى ( فرنسا ـ المكسيك ـ أورجواي ـ جنوب أفريقيا)
هذه المجموعة تعقدت ودخلت في "حسبة برمة" بالتعادلات التي انتهت عليها مباريات الجولة الأولى .. حيث أصبحت كل فرق المجموعة الأربعة بنقطة واحدة .. وبالتالي أصبح ضمان التأهل "بصورة قاطعة" عن هذه المجموعة يتطلب الوصول إلى "خمسة نقاط" على الأقل ، وهذا يعني عدم الخسارة في أي من المباراتين القادمتين لكل من أراد أن "يضمن" المرور والتأهل إلى الدور القادم بصورة نهائية وقاطعة وبعيداً عن أي حسابات أخرى ..
* الوصول إلى أربعة نقاط " قد" لا يصبح كافياً لضمان التأهل عن هذه المجموعة .. وكل فرق المجموعة الأربعة يمكنها " نظرياً" تحقيق الأربعة نقاط من المباراتين القادمتين ..
على سبيل المثال : أورغواي : بالفوز على جنوب افريقيا، ثم الخسارة من المكسيك .. يصبح لأورغواي : ( 4 نقاط ) المكسيك : بالخسارة من فرنسا، ثم الفوز على أورغواي .. يصبح في رصيد المكسيك : ( 4 نقاط ) فرنسـا : بالفوز على المكسيك ، ثم الخسارة من جنوب افريقيا .. يصبح رصيد فرنسا: ( 4 نقاط ) ج افريقيا : بالخسارة من أورغواي ، ثم الفوز على فرنسا .. يصبح لجنوب افريقيا: ( 4 نقاط )
ولو عكسنا احتمالات الفوز والخسارة لكل الفرق سنصل إلى ذات النتيجة (التساوي في الأربعة نقاط لكل فرق المجموعة) أورغواي : بالخسارة من ج افريقيا ، ثم الفوز على المسكيك .. يصبح لأورغواي : ( 4 نقاط ) المكسيك : بالفوز على فرنسا ، ثم الخسارة من أورغواي ... يصبح رصيد المكسيك : ( 4 نقاط ) فرنسـا : بالخسارة من المكسيك ، ثم الفوز على ج افريقيا .. يصبح رصيد فرنسا : ( 4 نقاط ) ج افريقيا : بالفوز على أورغواي ، ثم الخسارة من فرنسا .. يصبح لجنوب افريقيا : ( 4 نقاط )
على كل : ففي كل الأحوال وبكل الحسابات، هذه المجموعة لن يظهر ولا يمكن إعلان أي متأهل عنها إلا بنهاية مباريات الجولة الثالثة والأخيرة في المجموعة .. وقناعتي الشخصية انو "المكسيكان" هم الخاسر الأكبر بنتائج مباريات الجولة الأولى بإضاعة نقطتين بالتعادل أمام أضعف فرق المجموعة (جنوب افريقيا) .. وأمامهم مواجهتين أصعب أمام كل من فرنسا ثم الأورغواي على التوالي ..
المجموعة التانية : كوريا الجنوبية والأرجنتين في الصدارة بثلاث نقاط .. ويوم الخميس القادم ربما يصبح المنتخب الأرجنتيني أول الواصلين والمتأهلين رسمياً للدور القادم من كأس العالم (2010) عندما يلاقي كوريا الجنوبية .. وبانتظار ثاني المجموعة الأولى .. وإن شاء الله ما يكون أرجواي لأنهم عبطاء وكورتهم مع الأرجنتين كلها شلاليت وكبع
06-13-2010, 02:20 PM
انعام حيمورة
انعام حيمورة
تاريخ التسجيل: 06-29-2006
مجموع المشاركات: 11094
مرور سريع على مباريات اليومين الماضيين .. * جنوب أفريقيا والمكسيك مباراة جميلة وكنت أتمنى أن يحالف الحظ أصحاب الأرض ولكن .. * المباراة الثانية فرنسا وأرغواي صفر في كل شي .. فرنسا خذلتنا في أول المشوار مثل البطولة السابقة التي خرجت فيها من الدور الأول .. * كوريا الجنوبية قدمت مباراة جيدة وفازت على حساب رومانيا التي ظهرت بمظهر ضعيف .. * الأرجنتين وجدت صعوبة بالغة في الفوز على نيجيريا ولولا سوء الطالع لخرج نجوم نيجيريا بالتعادل .. عجائز الأرجنتين لن يقووا على المواصلة في هذا العرس الكروي القوي والبركة في ميسي فهو الوحيد النشط في فرقته ..
عارفه يا أماني شكلك سرقتي مننا التعليق دا أنا وصلاح شتات بصراحة إنجلترا وأمريكا من أقوى مباريات البطولة ندية وإثارة حتى الآن .. أول تعليق قالوا لي صلاح اليوم كاسوري جد قمت قلت ليهو حديد يلاقي حديد .. وفعلاً لم يخيب الإنجليز والأمريكان ظننا فقد قدموا مباراة جميلة وشيقة .. أها نجي لي أهلك الجزائريين لم يقدموا ما يشفع لهم الإستمرار في البطولة فقد كان فريق أكثر من عادي لعبوا مباراة ضعيفة وإن لم يستحق السلوفينيين النتيجة ..
غايتو موعودين بمباريات أكثر تشويقاً في اليومين القادميين .. يكاد يكون هذا المونديال الثالث ولم يظهر فيه لاعبين فلتات ومؤثرين فقد خبأ نجم كثير من اللاعبين ..
انا لله شجعت سلوفينيا وانتهيت من الجزائريين خلاص؟ :(
حضرت الشوط التاني من مباراة الجزائر, بصراحه لعبهم ما لعب ناس في كاس العالم, أي نعم كانوا أحسن من ناس سلوفينيا, لكن ما استمتعت بلعبهم, حسيتهم متعصبين وماخدين الموضوع عاطفه ما تكتيك, يعني زي السودانيين لما تمسكهم الهاشميه ويفوزوا رجاله ساي عموما حسب المنطق الجزائر موضوعها انتهي خلاص, وفرصتها الوحيده ضاعت :(
كلو منك يا غباشي
لكن شكلك بتعرف تتوقع لأنه لحد الان الأرجنتين وسلوفينيا الاتنين شجعتهم وفازوا :)
ياهلا أخونا الهادي,, فاقدنك في البوست, ليه الغياب؟ كلامك المجيّه ده بنستناهو بشده :)
طيب عندي سؤال:
Quote: هذه المجموعة تعقدت ودخلت في "حسبة برمة" بالتعادلات التي انتهت عليها مباريات الجولة الأولى .. حيث أصبحت كل فرق المجموعة الأربعة بنقطة واحدة ..
أنا كان عندي فهم قديم انه التعادل الايجابي ما زي التعادل السلبي, يعني المكسيك وجنوب أفريقيا اتعادلوا تعادل ايجابي, كان فهمي انه عندهم نقطه واحده, فرنسا والأورجواي اتعادلوا تعادل سلبي, يبقي ما عندهم ولا نقطه,
لكن هسي زي الفهمت من مداخلتك انه التعادل لو سلبي وللا ايجابي في الحالتين بيتحسب نقطه, والأهداف بتتحسب فرق أهداف عند الحوجه للرجوع اليها,
صاح كده؟
----- في انتظار توقعاتك وحسابات كل مجموعه وموقفها منك,,
شكلك بعد العرس بقيتي تحضري الكوره وقعّتي علي الوثيقه بتاعت كاس العالم؟ وثيقه كده شفتها مره هنا في البورد, خلاصتها انه مافي مشاوير, مافي مراسيل, ما في كلام لغاية ما كاس العالم ينتهي
:أود ان اوجه لكي التحية وان اعطيكي 12 نصيحة قبل بداية كأس العالم - 1 في الفترة ما بين 11 يونيو حتى 11 يوليو يجب عليكي أن تقرأي الصحافة الرياضية ومتابعة اخبار المونديال وبهذا يمكنك ان تشاركيني الحديث حول ما يحدث وان لم تفعلي هذا فلن يكون امامي خيار سوى ان اتجاهلك بشكل تام وهو الأمر الذي لن تحبيه. - 2 خلال كأس العالم التلفاز يعتبر ملكا لي في كل أوقات اليوم بدون ابداء الاسباب واذا رأيتك تنظرين الى جهاز التحكم قد تفقدين عينيكي
- 3 اذا اردتي ان تمري امام التلفاز خلال المباراة أو قبلها أو بعدها فاني لا امانع أبدا طالما يتم ذلك زحفا على الأرض مثل رجال الكوماندوز في الحرب العالمية.
- 4 خلال المباريات يجب ان تعلمي انني لا أرى ولا اسمع ولا اتكلم, الا اذا احتجت منك طعاما أو شرابا, ولن اوافق على سماع جمل مثل: رد على الهاتف, احضر لنا طعاما من السوبر ماركت أو افتح الباب.
- 5 اذا قمتي بكل ما سبق فانني سوف اسمح لكي بمشاهدة التلفاز من الساعة 12 مساءًً حتى ال 6 صباحا.
- 6 أرجوكي ثم أرجوكي ثم أرجوكي الا تقولي لي "انها مجرد لعبة" أو"سيفوزون في المرة المقبلة" عندما ابدو حزينا لخسارة فريقي في المونديال, لأن هذا لا يساعدني انما يزيد من غضبي و كلماتك "التشجيعية" لن تجعلني اتحسن انما قد تؤدي الى مزيد من الغضب والنكد.
- 7 لن امانع ابدا في ان تشاهدي مباراة واحدة معي وسأسمح لك بالكلام خلال فترة الاستراحة بين الشوطين فقط اذا كانت نتيجة المباراة لصالح فريقي الذي اشجعه, أرجو وضع خط تحت كلمة مباراة واحدة فقط.
- 8 الاعادة التلفزيونية للأهداف مهمة جدا لي ولا اهتم اذا شاهدت الهدف 100 مرة فلا تظهري تذمرا.
- 9 قولي لأصحابك وأصدقائنا بشكل عام الا يقوموا بانجاب اطفال أو اقامة أي حفلات تتطلب تواجدي معهم لسبب بسيط هو انني لن أذهب .
- 10 تلغى النقطة السابقة في حالة واحدة وهي ان يدعونا احد اصدقائنا لمشاهدة المباراة.
- 11 خلال الملخص اليومي لكأس العالم يجب عليكي ألا تقولي "لقد شاهدت المباراة فلماذا تشاهدها مرة اخرى", لأن ردي سيكون "ارجعي للنقطة رقم 2".
- 12 في نهاية كأس العالم ارجو منكي الا تقولي "الحمد لله ان كأس العالم تأتي كل 4 سنوات" لأن لدي مناعة ضد مثل هذه الكلمات ولا تنسي ان بعد هذا سيأتي الدوري الانجليزي والدوري الأسباني والدوري الايطالي ودوري أبطال أوروبا وكأس اوروبا وكأس الاتحاد الانجليزي, وكأس أسبانيا .... الخ.
هلا بمعتصم (أبو عموري) (بالمناسبه الصوره حلوه وعموري بقي كبير ما شاء الله)
(حديد يلاقي حديد) دي قلتها لماما أثناء المباراه وبعد داك حسيت بيها خالص, طبعا ناس بيتنا كلهم مجانين كوره وماما بتلقي كل التلفزيونات شغاله كوره فبقت بتضطر تحضر معانا المباريات يوم مباراة انجلترا وأمريكا لاعب انجليزي ضرب لاعب أمريكي, ماما قالت لي اللليييييله ضرب (الأمريكي), قلت ليها ده انجليزي, يعني ما سائل في رئيس أمريكا زاتها, الاتتنين ماسائلين في بعض (حديد يلاقي حديد) هههههههههه وبالجد في المباراه أثبتوا انهم (حديد يلاقي حديد) ههههه
سلم لي علي عموري وأم عموري وسلام لصلاح شتات, ياريت لو يطلع من الاعتكاف ويجي يشاركنا في بوست المونديال, ويكون لينا شرف عودته من العزله :)
وواصل معانا بقراءاتك للمباريات يامعتصم, وتسلم :)
(عدل بواسطة Amany Elamin on 06-13-2010, 06:26 PM) (عدل بواسطة Amany Elamin on 06-13-2010, 06:29 PM)
06-13-2010, 06:29 PM
شول اشوانق دينق
شول اشوانق دينق
تاريخ التسجيل: 02-13-2006
مجموع المشاركات: 5332
Quote: * كوريا الجنوبية قدمت مباراة جيدة وفازت على حساب رومانيا التي ظهرت بمظهر ضعيف ..
اليونان يا مو ... اليونان ياخ (ما قدرت افوتو والله)
Quote: * الأرجنتين وجدت صعوبة بالغة في الفوز على نيجيريا ولولا سوء الطالع لخرج نجوم نيجيريا بالتعادل .. عجائز الأرجنتين لن يقووا على المواصلة في هذا العرس الكروي القوي والبركة في ميسي فهو الوحيد النشط في فرقته ..
الأرجنتين بتشيل الكاس يا مو وأصبر ليها بس.
أماني يا صحبتي ترفقي بعروستنا إنعام وما تخلعيها قدر ده
حقق المنتخب الغاني لكرة القدم الفوز الأول للمنتخبات الأفريقية في بطولة كأس العالم 2010 المقامة حاليا في جنوب أفريقيا وتغلب على نظيره الصربي 1/صفر اليوم الأحد في الجولة الأولى من مباريات المجموعة الرابعة بالدور الأول للبطولة.
وسجل أسامواه جيان هدف المباراة الوحيد في الدقيقة 84 من ضربة جزاء احتسبت للنجوم السوداء اثر لمسة يد على اللاعب البديل زدرافكو كوزمانوفيتش خلال المباراة التي أقيمت بينهما على استاد "لوفتاس فيرسفيلد" في بريتوريا.
وهذه هي ضربة الجزاء الأولى التي تحتسب في البطولة الحالية.
وشهدت المباراة حالة الطرد الثالثة في البطولة الحالية وكانت من نصيب اللاعب ألكسندر لوكوفيتش في الدقيقة 74 لحصوله على الإنذار الثاني
Quote: لكن هسي زي الفهمت من مداخلتك انه التعادل لو سلبي وللا ايجابي في الحالتين بيتحسب نقطه, والأهداف بتتحسب فرق أهداف عند الحوجه للرجوع اليها,
نعم يا أماني التعادل في كل الأحوال ( إذا سلبي أو إيجابي) بيتحسب بي نقطة واحدة .. والفوز بثلاث نقاط وفرق الأهداف بيتحسب (( فقط )) في حالة التساوي في عدد النقاط ..
والمعايير المحددة من قبل الفيفا لترتيب فرق المجموعة في حال التساوي بينها في عدد النقاط هي كالتالي "على الترتيب " : 1ـ فارق الأهداف المسجلة والمتلقاة لكل فريق.. ( أو ما يعرف بصافي الأهداف ) وفي حال التساوي في هذه أيضاً .. يتم اللجوء للمعيار الذي يليه وهو : 2ـ أكثر الفرق تسجيلاً للأهداف في المجموعة.
وفي حال استمرار التعادل أيضاً بين فريقين أو أكثر ، يكون الترتيب على النحو التالي : 3ـ النقاط التي حصل عليها الفريق في المباريات بين الفرق المعنية. 4ـ فارق الاهداف الناتجة عن مباريات المجموعة بين الفرق المعنية. 5ـ أكبر عدد من الأهداف المسجلة في جميع مباريات المجموعة بين الفرق المعنية. 6ـ سحب القرعة من قبل الفيفا.
* وعشان الناس ما تتلخبط : ففي حالة النهائيات ، والبطولات المُجمعة والتي تلعب من مرحلة واحدة فقط ( كالنهائيات الجارية حالياً في جنوب افريقيا) .. يصبح رقم (3) و (4) و (5) يشيروا كلهم إلى معنى واحد فقط وهو ( حصيلة المواجهات المباشرة بين الفريقين أو الفرق المعنية)
أما في حالة التصفيات التي تلعب من مرحلتين (ذهاب وإياب) فيتم النظر في (3) و (4) و (5) كلاً على حدة .. وأوضح حالة لذلك ما جرى في حالة مصر والجزائر في التصفيات الافريقية لكأس العالم
انعام وجنابو وجعفر محي الدين واستاذنا: م. الملك :)
الألمان بالغوا امبارح, هزموا الاستراليين شر هزيمه, الماكينات الألمانيه طلعت ذات دفع رباعي لووووول
الهدف الأول "بودولسكي":
الثاني "كلوز":
الثالث "موللر":
الرابع "كاكاو" :
ده الحاله مع الرأفه, كان ممكن عشره أهداف عادي لو شعروا بالاستفزاز ههههه بعدين ما متذكره اني شفت الاستراليين اثناء المباراه الناس ديل كانو في جوه الاستاد؟ جاني احساس انو الالمان ديل لاعبين مع حارس المرمي الاسترالي بس
غايتو أنا لو محل صربيا وغانا, بركب طيارتي وعلي بلدي فورا, الستره والفضيحه متباريات لووووووووول
Quote: يا ماما دوما أزهري قال ليك البرازيل بتجيكم توريكم اللعب الجد
لول انعام طالما ازهري في معسكرالاعداء برضو خلاص حاربتكم الي نهايه كاس العالم لكين اولادنا امس كانوا اسيادها والله ومتل ما قال جنابو مع الرأفه ولو الحظ ابتسم كان جابو 7 اهداف . لعبو كوره حلوه
06-14-2010, 10:53 AM
GamarBoBa
GamarBoBa
تاريخ التسجيل: 03-07-2002
مجموع المشاركات: 4985
غايتو الألمان ديل ناس عورا ودومك ياها حركاتهم ومحظوظين يلموا ليك في فريق تعبان اصلوا ما يرحموه...المرة الفاتت برضو مسكوا السعودية 8 صفر لامن آل سعود قربوا يوقفوا الجفالي ما يورد مرسيدس البلد...كورة هي ولا اشانة سمعة الرحمة حلوة برضو ياخ هسة يجوا الدور التاني المكنات بتاعتهم (تهنق) يلم فيهم تاني مجموعة ممغوس يطفي ليهم لهم بلكاتهم ويديهم المفتاح في يدهم ويمش..بالدفرة ما تقوم تاني
القون الاول سارق موش يا جنابو؟؟؟هم غايتو قربوا يعملوها ستة سبعة لكن الحظ ساعدهم عدم وجود مايكل بالاك يبدو لي ساعد اكثر مما أضر بيهم وتواجد لعيبة عندهم خبرة مع شباب عندهم الحافز برضو معنويا مفيد
تحياتي للجميع
06-14-2010, 11:05 AM
غباشي
غباشي
تاريخ التسجيل: 01-19-2007
مجموع المشاركات: 1729
يا اماني ناسنا بتاعين Down-under راقدين سلطة ساكت و شن عرفهم بي كرة القدم ديل ناس جنهم Rugby و Cricket , و بكرة كمان نيوزلندة (All Whites) و السلوفاك و زي ما قلت ليك يا فنشونا من البلد دي يا كمان ما جاتنا عوجة ... السوبرفايزر بتاعي شكلوا عرف الكنتة عشان كدة اخد اجازة من الاسبوع الفات الدور و الباقي على أخووك البقى في وش المدفع مع الـ Kiwis ديل غايتو انا ظاهرياً مع All Whites و بي تحت تحت مع السلوفاك لكن ما اظن المباراة تكون قوية خالص, غايتو يا طلعت درون يا كمان ناسنا الطوال ديل اتغلبوا (مش قلت ليك بي تحت تحت مع السلوفاك) بس الله يكضِّب الشينة.
بمناسبة سلوفينيا يا أماني مبرووك علينا و سلوفينيا وقعت لي في جرح مع بلطجية الصحراء ديل. أيام الماجستير كان عندنا استاذة من سلوفينيا اسمها Urska الزولة دي جاضمة Maths و لغات برمجة لمن تحيرك و كانت زي العسكري قطَّاعة لابعد الحدود لأنها دايرة الناس يدعكوا و يشتغلوا براهم و هي لما تشوف الزول بيشتغل بعد داك بتجي تساعدوا لكن داير تربع يدينك عشان يدفروك وين ليك ... و الله كانت مَرَة حربية كيف و لا اجدعها راجل , و يوم ما يكون اللاب بتاعها دا كان يوم الاهوال اربعة ساعات من العصِر النضيف لكن و الله اتعلمنا منها الكتير عشان كدة سلوفينيا و بس خصوصا مع الجزائريين و فوق فوق Urska فوق .. و لسة الجزائريين راجيهم الرش النضيف من امريكا و انجلترا ..... انجليزي بس .... و بكل اللهجات بريتش و اميريكان غايتو خشمهم حيبقى ملح .. ملح و في رواية اخرى شـطـة .. شـطـة
و هولندا و مع جيراننا الزمان الدنمارك دي حتكون مباراة عبارة عن غابة من السيقان أتمنى الحظ يحالف فريقي المفضل هولندا و ما يقعوا في فخ الدنماركيين, غايتو الاتنين Tough يعني حتكون في كمية من Toughness عجييبة اما الكاميرون فانا ماا خالص معاهم و لسة عند رأيي انهم فلاحتهم علينا احنا وبس و الدليل على كدة اخفاقاتهم المستمرة في كل المرات الشاركوا فيها بعد كاس 1990 و لو بقوا جادين وغيروا طريقتهم المعهودة ممكن يعملوا حاجة لكن خوفي اليابانيين يبرمجوهم زي برمجة Urska
06-14-2010, 11:18 AM
غباشي
غباشي
تاريخ التسجيل: 01-19-2007
مجموع المشاركات: 1729
تحية للـ Black Stars منتخب غانا الطموح و ديل يا أماني بيلعبوا بي ضمير ما زي الارزقية ديلاك ناس الكاميرون و ما شابههم, غايتو نيجيريا ارحم من الكاميرون و كورتهم مع كوريا هي اللي بتحدد تواجدهم في المونديال لأنو اليونان دي حمامة المجموعة و عيب كبير لو ما وصلوا دور الـ 16
06-14-2010, 12:15 PM
انعام حيمورة
انعام حيمورة
تاريخ التسجيل: 06-29-2006
مجموع المشاركات: 11094
كتر خيرك يا اماني وشكرا على الترحيب.. الحقيقة انا مجرد متفرج وخاشي هنا بى اضاني ساي .. لكن قاعد يبصصني ولدي دا..
عامل هداف فريق الشباب في مدينتا.. وصورتة الفوق دي نزلت على غلاف مجلة مدينتنا الرياضية بعد فريقهم شال كاس الدورة.. الغريبه امبارح قال لي هولندا حتغلب اتنين صفر وانا ماصدقته.. هسع تعليقه ان المدرب لعب المباراة بهداف واحد وحجز بقية الهدافين.. في الشوط التاني نزّل( اليا وافلاي ) وهم مصعدين من فريق الشباب الهولندي للفريق القومي.. على العموم بقول أنه المدرب تعمد عدم الانطلاق بمواجهة حادة زي ما عملوا الالمان.. ترشيحاته للنهائيات.. البرازيل - اسبانيا - المانيا - هولندا.. قلت ليهو هولندا دي انت حشرتها انحياز ساكت.. قال لي تشوف براك.. شفت الولد دا؟
Quote: اما الكاميرون فانا ماا خالص معاهم و لسة عند رأيي انهم فلاحتهم علينا احنا وبس و الدليل على كدة اخفاقاتهم المستمرة في كل المرات الشاركوا فيها بعد كاس 1990 و لو بقوا جادين وغيروا طريقتهم المعهودة ممكن يعملوا حاجة
غباشي !!! انتهيت من الكاميرون خلاص؟ انا لله ..
بصراحه رفعوا لي ضغطي الكاميرونيين, ما في باصين علي بعض زي الناس, عندهم مشكلة انسجام وعمل جماعي, يعني ما فريق اطلاقا :( وباصاتهم ما موزونه, وما سريعين, وما استفادوا من تفوقهم الجثماني علي اليابانيين :( الكوره انتهت وأنا ماسكني صداع من الغيظ من لعبهم :(
الهوندا اليابانيه غياظين وماحبيتهم اطلاقا ههههه صحي برمجة Urska, جابوا القوون, وقفّلوا الدفاع وماخلوا للكاميرونيين موطئ قدم جوه خط 18 :(
حاله صعبه :( غباشي عليك الله أختي لي الايطاليين ديل الليله, ولا كلمه عنهم الله يرضي عليك خليهم يمشوا لقدام
يا أستاذنا م. الملك,, مبروووك للهولنديين الفوز المستحق, المباراه حضرت اخر دقائق فيها, وشفت القوون التاني, كانوا مسيطرين علي الملعب تماما, والدنماركيين ضايعين خالص, واضح انه هولندا في المربع الذهبي دون شك
وماشاء الله علي ولدنا اللعّاب, انشاء الله نشوفه في كاس العالم الجاي أو محترف في نادي كبير ونرفع بيهو راسنا :) طبعا الولدُ سرُ أبيه :) بالجد فخورين بيهو :)
بالنسبه لترشيحاته,,
Quote: ترشيحاته للنهائيات.. البرازيل - اسبانيا - المانيا - هولندا..
قول ليهو أماني قالت ليك شوف ليها فرقه لايطاليا وحياتك ما ممكن تطلعهم لينا من المولد بلاحمص :)
البراغواي تقدمت بالهدف اﻷول في نهايات الشوط اﻷول وبذلك تكون إيطاليا الضحية رغم كم مش عارف للريس أمين من مجريات الشوط اﻷول يبدو أن البراغواي لن ترضى بغير الفوز مشاهدة ممتعة للشوط الثاني
06-14-2010, 11:40 PM
محمد على طه الملك
محمد على طه الملك
تاريخ التسجيل: 03-14-2007
مجموع المشاركات: 10624
Dear, Amany. ربنا يقبل منك رفعتي معنوياتي ايطاليا رغم ادائها الضعيف في الشوط الاول لكن صلحوا لعبهم واتعادلو على كل حال Italy is expert in turning the balance of the game at any level; they are the foxes of the world cup competition. Best regards to you & your visitors. حسام الملك
06-15-2010, 00:02 AM
محمد على طه الملك
محمد على طه الملك
تاريخ التسجيل: 03-14-2007
مجموع المشاركات: 10624
عارفه يا اماني لما اشتري ريال مدريد كرستيانو رولاندوا البرتقالي ب 94 مليون.. جاء يحكي لينا انا وأمه عن الحدث.. امه قالت ليهو يا ولدي ان ادوني مليون واحده بفكك انت وابوك.. دا اسمو كلام !! بالله مش لي الحق اعلن الانضمام لحزب قيقا وامين نوته بى غادي.
ايطاليا كان لعبها بنفس بارد وبتكتيك وروح جماعيه ممتازه, لكن الباراغواي كانت ذات دوافع قويه وحماس أكثر, وكانوا منظمين ولايقلون انضباطا عن الطليان, النتيجه تقدم للبراغواي في الشوط الأول بهدف ألكاراز وللا ( ألكتراز) ده ههههه استطاعت ايطاليا في الشوط الثاني بخبرتها من احتواء الهزيمه بهدف تعادلي مع سبق الاصرار والترصد, لكن للأسف فشلت في الفوز أمام فريق عنيد بتكتل دفاعي مثل الباراغواي,
الحقيقه الأداء مخيب لأمالنا محبي الأتزوري, نتمني انهم يستفيدوا من المباراه الأولي بمعرفة نقاط الخلل ومعالجتها قبل المضي قدما في المونديال,
عموما المجموعه السادسه اللي بتقع فيها ايطاليا مجموعه سهله, وبامكان ايطاليا التأهل بسهوله (إلا من أبي) :)
-- تخريمه : انتو اللاعبين ديل كلهم شايلين اللوز؟ أنا لو جريت في مطر وهوا كده بمشي الحوادث بالليل لووووول وللا انا براي البتجيني لوز في الدنيا دي؟ (ماشاء الله ما نسحرهم)
حسام الملك ياولدنا,, نورت البوست والله, وحقيقي فخورين بيك وبنتمني ليك التقدم خطوات كبيره في مجال كرة القدم, ونشوفك قريب انشاء الله في غلاف مجلة بتتكلم عن النجوم في الدوري الأسباني أو الايطالي أو الانجليزي :)
تصدق امبارح عايزه أقول للوالد, خلي ولدنا اللّعاب يشاركنا في البوست عشان نستفيد منه كخبير أجنبي ههههه مش في الجزيره الرياضيه في الاستديو التحليلي بيجيبوا خبراء أجانب وبقعدوا يترجموا لينا كلامهم؟ يلللا تعال ورينا نظرتك للمباريات وقراءاتك للفرق من واقع ممارستك بامتياز للعبه في هولندا, وماتخاف أكتب بأي لغه, نحن بنفهم شويه والوالد بيترجم لينا شويه ههههه
Quote: ايطاليا رغم ادائها الضعيف في الشوط الاول لكن صلحوا لعبهم واتعادلو
ايطاليا امبارح خيبت امالنا, لكن زي ما قلت هم عندهم الخبره الكافيه لتفادي الهزيمه, بس لو ما راجعوا أخطاؤهم طريقهم في المونديال حيكون محفوف بالمخاطر وشبه مستحيل :(
يا استاذنا م. الملك: شكرا علي مشاركة حسام ومنتظرين المزيد من تحليلاته ونظرياته :)
Quote: عارفه يا اماني لما اشتري ريال مدريد كرستيانو رولاندوا البرتقالي ب 94 مليون.. جاء يحكي لينا انا وأمه عن الحدث.. امه قالت ليهو يا ولدي ان ادوني مليون واحده بفكك انت وابوك.. دا اسمو كلام !! بالله مش لي الحق اعلن الانضمام لحزب قيقا وامين نوته بى غادي.
هههههههههههههههههههههههههه هي بتكون قالت الكلام ده بعد ما عرفت انك انضميت لحزب أحد اهادفه القضاء علي المرأه لووووول أنا عارفه الستات ما بيبادروا بالبيع هههه بعدين أحسن البيع مقابل مليون دولار وللا القضاء ومجاناً؟ هههههه علي الأقل انتو الاتنين عندها تساووا مليـــــــووووون دولار وهو مبلغ كما تعلمون عظيم
تحت تحت كده: هي بتكون عايزاك تمشي مع ولدنا عشان تخلي بالك منه يا استاذنا هههههههه
أمّا قيقراوي وأمين وبقية قادة الحزب, فشايفااااااهم بيستثنوا في شاكيرا ومن لف لفها الاتنين راس مالهم تلفون واحد لمدام أمين بضاحية كنساس والتاني تلفون قريب لسروره بجده, وماااااا ظنيت يبيعوهم بمليون دولار بعدين القضاء عليهم ما محتاج تكوين حزب لووووووول (السوّاي ما حدّاث)
تحياتي يا استاذنا للمدام ولحسام اللي بقي شريكنا في البوست :)
المباراه الأولي نيزولندا وسلوفاكيا, ما شايلاها, لكن حاتابع أخبارها عشان نعرف مصير ومستقبل أخونا غباشي غباشي ستفت الشنط وللا لسه؟ عموما طالما السيوبر فايزر في اجازه ليهو اسبوع, شجع نيوزلندا طوالي, بس أعمل حسابك من الناس البتوصل ليهو الشمارات لوووول
ساحل العاج والبرتغال مباراه قويه ومهمه,
أمّا مباراة البرازيل في أوّل ظهور ليها فمباراه ينتظرها الجميع, ناس السامبا انعام حيموره وأميره الشيخ بيكونوا الليله اشتروا ليهم (فوفوزيلا) من البتعمل زننننننن دي:
06-15-2010, 10:37 AM
قيقراوي
قيقراوي
تاريخ التسجيل: 02-22-2008
مجموع المشاركات: 10380
Quote: أمّا قيقراوي وأمين وبقية قادة الحزب, فشايفااااااهم بيستثنوا في شاكيرا ومن لف لفها
جيت بجاي كايس الخال يا قريبك . . لازم نفعل الحل الثوري ياخ ! شايفن كمان بقن ينظرن في الكورة !! . . دا براهو مبرر كافي للقضاء التام
اها ذاتو بطلناها كلو كلو . . خلوها التراجمة حدنا البرازيل ست اللسم دي و بس
يا ملك ما شاء الله على حسام ياخ كلامو القالو عن ايطاليا مية مية على ما اذكر في فرنسا 98 ، باقيو و رفاقه سووا الهوائل . . و كانوا بقلبوا النتيجة وكت ما هم عاوزين كان ساد مصطلح ( اللاعب العظيم ) . . و لا ما كدا ؟
-------
اماني ازيك ياخ بطلي اوشاعات الله يرضى عليك عملنا ليكن استثناء انت و الاميرة بت الشيخ . . لكن جحودكن دا ياهو البخلينا نفعّل الحل الثوري
06-15-2010, 01:37 PM
غباشي
غباشي
تاريخ التسجيل: 01-19-2007
مجموع المشاركات: 1729
الحمد لله قدَّر و لطف بعد ما قربت اضرب للتاكسي و خلاص ماشي على المطار من باب احترام نفسي و كدة ...... يا ما انت كريم يا رب ودي الحالة جايبين فينا قون اوف سايد ...... التحكيم فاشل Thanks REID you made my day and my coming days
الأفيال الايفواريه بتلعب في مباراه كبيره وتظهر بمستوي مشرف جدا,, الشوط الأول متعه حقيقيه,, سيطره من الجانب العاجي علي الملعب, هجمات حقيقيه, وان كانت هناك صعوبه في التغلغل الي عمق الدفاع, التهديف من خارج خط 18 قوي وموزون, نتمني يسفر عن هدف في الشوط الثاني, باصات موزونه, سيطره علي الكره, قوه بدنيه وانتزاع الكره من الخصم بدون أخطاء وانذارات, حقيقي برافو
البرتغال فاقده السيطره وحتي هجماتها المرتده يتم القضاء عليها باكرا بخط وسط ودفاع عاجي قوي (ماشاء الله), محاولة كريستيانو رونالدو اليتيمه القويه ارتدت من القائم, بصراحه ساحل العاج بتلعب مباراة قمه في المتعه,
نتمني نزول دروجبا في الشط الثاني, والمحافظه علي المستوي العام للفريق :)
برافو لساحل العاج, مباراه أكبر من التوقعات مع فريق بقامة البرتغال, تمنينا الفوز لكن التعادل كان انجاز جيد للأفيال اللي حاصرت البرتغال وسيطرت عليها تماما,,
باقي كوريا الشماليه اللي بصدد تلقي هزيمه ماحصلتش
06-15-2010, 06:31 PM
معتصم دفع الله
معتصم دفع الله
تاريخ التسجيل: 12-18-2003
مجموع المشاركات: 12684
المره دي نسميهو كاس العالم للتعادلات .. تعادلات في أي شي طريقة اللعب والتكتيكات وشغل المدربين والحذر الشديد .. اليوم الخميس وحوالي ستة تعادلات فيها تلاتة إيجابية بنتيجة 1/1 .. * غانا قدرت تكسب التلاتة نقاط من صربيا ودي خطوة كويسة للماما أفريكا لأنها أدت دافع لباقي الفرق تعلب كويس .. * هولندا حقيقة خذلتني بأدائها المتوسط وكنا نطمح من نجومها في تقدم عرض جميل كما عودتنا ولكنها لعبت للتلاتة نقاط ونالتها من الدنمارك والتي كانت بعيدة تماماً عن مستواها الذي نعرفه في السابق .. * أيطاليا وبرغاواي أيضاً تعادلية رغم بعض ملامح الخطورة من الفريقين ولكن كالعادة غلب عليها اللعب وفق تكتيك معين للخروج بنتيجة المباراة وأفلحت أيطاليا بالخروج بنقطة واحدة وإن كنت أتمنى هزيمتها .. * مباريات اليوم الأولى كانت بين سلوفاكيا ونيوزلندا المباراة كانت سريعة مع تفوق واضح للسلوفاكيين ولكن أدرك النيوزلنديين التعادل وهي كانت نتيجةالمباراة .. * قدم الفيل الأيفواري مباراة ممتازة ضد البرتقال البعيدة عن مستواها تماماً وكان ممكن أن تخرج بنتيجة أفضل من ذلك ولكن لا أدري مشكلة المهاجم الأفريقي وكثرة التحضير أمام المرمى وتضييع فرص سهلة لا تعوض وقد كثرت هذه الظاهرة منذ بطولة أمم أفريقيا الماضية مع العلم أن معظم المهاجمين الأفارقة يلعبون في فرق كبيرة بالدوريات الأوربية ويحرزون أهداف كثيرة لفرقهم ..
غايتو منتظرين البرازيل ح تعمل شنو مع كوريا الشمالية .. أنا متوقع إطلاق صواريخ كورية مدمرة ولا عزاء لمشجعي السامبا ..
Quote: وأفلحت أيطاليا بالخروج بنقطة واحدة وإن كنت أتمنى هزيمتها ..
هزيمة الأتزوري؟ ماجادّي يامعتصم, الناس ديل راقدين ليهم فوق راي, بس انت أصبر عليهم شويه لووووووول
Quote: قدم الفيل الأيفواري مباراة ممتازة ضد البرتقال البعيدة عن مستواها تماماً وكان ممكن أن تخرج بنتيجة أفضل من ذلك ولكن لا أدري مشكلة المهاجم الأفريقي وكثرة التحضير أمام المرمى وتضييع فرص سهلة لا تعوض وقد كثرت هذه الظاهرة منذ بطولة أمم أفريقيا الماضية مع العلم أن معظم المهاجمين الأفارقة يلعبون في فرق كبيرة بالدوريات الأوربية ويحرزون أهداف كثيرة لفرقهم ..
تحليل سليم, ما تفهم مشكلة اللاعب الأفريقي قدّام المرمي شنو, لكن لاحظت ليهم حتي عند السودانيين, في المباريات المهمه مرات بيلعبوا كويس وبيقدموا أداء ممتاز, بس بيفشلوا قدّام المرمي :( الظاهر عندهم مشكله بتاعت Finishing ههههههه
Quote: غايتو منتظرين البرازيل ح تعمل شنو مع كوريا الشمالية .. أنا متوقع إطلاق صواريخ كورية مدمرة ولا عزاء لمشجعي السامبا ..
كورة البرازيل امبارح حصلت لي ظروف وما حضرتها, نفسي كان أشوف أدائهم كيف ولاعبينهم مهاراتهم كيف, لكن المره الجايه انشاء الله, بعدين النتيجه 2: 1 للبرازيل نتيجه عاديه ومتعثره كمان, خصوصا انهم بيلعبوا قدام فريق من المحليين, ولا واحد فيهم ما محترف في نادي خارج كوريا الشماليه !!!! غايتو علي قولك لاعزاء لمشجعي السامبا :)
تمام يا أبو عموري, في انتظار المزيد دايما منك,, تسلم,,
Quote: عشان كدا أنا قررت أمسك ملف اللاعب رقم 12 (الجمهـــــــــــــــور) من هنا لي قدام ح أحاول أرفد البوست بي طرائف و غرائب و صور المشجعين يا ريت الإختيار يكون موفق و سد حاجة في البوست
اختيار موفق تماما,, عارف أحلي حاجه أثناء المباراه ردود فعل المشجعين؟ حقيقي في لقطات معبره وجميله بيجيبها التلفزيون, بتوري قدر شنو الناس دي عايشه الحدث بكل أحاسيسها :) فرحه, احباط, ترقب, دعاء, خوف, خلطه بتاعت مشاعر انسانيه مدهشه !
بس عليك الله المشجعين مش المره دي عذّبونا بال فوفزيلا بتاعتهم دي؟ بعد كل مباراه باخد أسبرين من زننننننننن الطول المباراه ههههههههه
في انتظار أجمل اللقطات منك, وبرضو منتظرين منك تحليلاتك و مبارياتك المفضله وكل مشاركاتك,,
سلامات مونديالاب غايتو لو شفت المباراة بعيوني ما كنت صدقت الحصل للاسبان المرشحين للكاس الساعاتية بالغوا غايتو قفيل مبالغ فيه ..الاسبان لعبوا مباراة كبيرة لكن السويسرين عتالة كبار والاسبان احجامهم بسيطة
الاعتماد علي 2 في الارتكاز كان خطا الشوط الاول ومع انو انا بعتبر بوستكتس اصلا ما لاعب لانو مارضنا مرض في برشلونة طبيعة المبارة كانت تتطلب وجود فابريقاس حتي لو كان بديلا لإنسيتا أو شافي لانو المباراة في طبيعتها اقرب لاسلوب الدوري الانجليزي وسيسك خبرته في مباريات دفاعية زي دي اكبر وبل قدرته في التهديف اكبر من انيستا وشافي. ادخال نافاس كان موفق جدا ومحاولاته كانت كبيرة ورائعة بيدرو نزل متأخر وتوريس كان برة الشبكة تماما
الفرص المهدرة كانت كبيرة وضربات في القائم .. العوير بيكي ده برضو مارضنا في برشلونة ودايما مرزق وبتجيه الكورة في حتته واصلا البوديه هناك شنو ما عارف
الليلة كان يوم الشوكولاتة السويسرية هاردلك اسبانيا فأمامكم عمل كبير
Quote: غايتو هاردلك يا أماني .. شوفي ليك مرشح تاني يكون شادي حيلو شوية .. أمسكي في الهولندييين .. كويسين برضو وبيجي منهم...
تصدق أنا الاسبان ديل ماناسي (لحد الاَن), (لحد الاَن) لأنه لو لعبوا مع البرازيل بشجعهم, لو لعبوا مع ألمانيا برضو بشجعهم .. وهكذا لكن الليله قدام سويسرا ملوك الأناقه والفخامه غلبني أشجعهم, وفكرة انهم يشيلو كاس العالم دي محيراني رسميييي,
أنا من محبي (الأتزوري) يا الهادي, (الديوك الفرنسيه) برضو ناسي, لكن المره دي ما متفائله ليهم ههههه اسبانيا احتمال أشجعها لو مشت لقدام وواجهت فرق زي البرازيل, الأرجنتين , ألمانيا ... اكسترا اكسترا ههههه
مباراة الليله مفاجأة المونديال الأولي, وان كان مازال بامكان الإسبان قلب الطاوله زي ما قلت :)
Quote: اسبانيا احتمال أشجعها لو مشت لقدام وواجهت فرق زي البرازيل, الأرجنتين , ألمانيا ... اكسترا اكسترا ههههه
معقولة بس يا امانى ??? فى زول ما بيحب الارجنتين ??? اما الالمان ديل فيستاهلوا. حسابات التشجيع فى الكورة فعلا معقدة. يعنى امريكا لما لعبت مع انجلترا....طبعا شجعت امريكا. مع انى بحب الكورة الانجلزية لكن ما بحب الانجليز. و بسبب هزيمة الارجنتين من الكاميرون( قبل مليون كاس عالم كده) عاديت كل الفرق الافريقية فى كاس العالم. اما هولندا فحبها من زمن جوليت و فان باستن و Frank Rijkaard
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة