|
|
 ثقيل ثقاله يا خالد عز الدين ( هلالاب والحمد لله )
|
منقول من جريدة الكابتن
طبعا انا زعلان جدا من الناس العملو التقييم العالمي ده .. انا اصلا جني ما جن الناس المتكبرين البنسو الناس الصغار .. انا من قريت اسم الهلال بديت افتش في اسم الجماعة .. مش اولاد عمنا .. وموضوعهم بهمنا .. انا عارفكم حتقولو يا تقالة دمنا !! لكننا نحن حقيقة وطنيين ما بنحب نكون برانا .. وبعدين انا خفت الجماعة ديل يكونوا
مسحوهم من الخارطة خالص .. يعني ممكن بالطريقة دي الاتحاد الدولي يمنع اي فريق يلعب معاهم يعني ابالو واتوفيستر ديل ما نلاقيهم .. معقولة ؟! والله نحن بعد الحصل لينا مع شيكورا ونيتو ونجادفتش ديل لو نقفل المطار لو نحظرهم بالبوليس لو نخلي الكورة لي بلاتر ما بنخلي الناس ديل قبال يلعبوا معانا ان شاء الله ودي يا اسماعين .. مش برضو نحن ناس ودودين ..! اوعه تقوم تقراها قودوين !!
نرجع لي موضوعنا قريت الهلال في المرتبة 176 ومشيت بعد داك مية سبعة وسبعين .. مية تمانية وتمانين ميتين !!ميتين ستة وتسعين .. لا طبعا ميتين ستة وتسعين ده رقم خاص بالهلال فقط .. قلت امشي تلتماية اصلو رئيسهم ده جنو تلتميات .. عقد سوداني بتلتماية ومقدم عقد الطابق التاني بتلتماية واحد ثقيل قال لي لكن الناس ديل بتكملو عن تلتماية مليون ؟؟! معقولة بس يكونوا التلتماية مليون !! يا ساتر .. والاحصاء دي لقت ليها اندية قدر دي من وين ..!
قلت ليهم فالنسيا وريال مدريد وبرشلونه وما نشستر قدامنا والله الهلال ده بقي تعبان معقول الحمام الميت ده قدامو .. مش ناس الاحصاء برضو طلعو هلالاب بجيبو فرق حمام ميت يقولوا دي احسن فرق .. الاتحاد الافريقي ده عرفناه بحب الهلال جاب ليهو بوليس يوغندا وبوليس زنزبار !! و جاب ليهو الاهلي القاهري والرينجرز النيجيري وحتي التوم الزمالك ده جابو عشان الهلال يغلبو ؟ كمان ناس الاحصاء ديل بقو هلالاب ولا شنو ؟! كيف يعني الهلال افضل الاندية عالميا يعني اي فريق يغلب الحمام الميت ده تقولو عليه احسن الاندية .. بكره تقولو الموردة برضو مع افضل فرق العالم ؟؟
وبتلكم معاكم وبفتش في الترتيب .. الخمسمية .. الستمية .. السبعمية.. الكترابة !! بقيت امشي مية مية !! مالقيت حاجة رجعت اراجع بالحروف الابجدية !! في الميم لقيت .. مانشستر .. ميلان .. ميشلان جلاد باخ .. فجأة كده فرحت لقيت مريخ .. انقروا ما طلع مريخ بورسعيد .. فسيخ يا بعيد !! اخوانا ديل وين يا سماعين .. قلت افتش بالالف واللام .. المحلة .. المنصورة .. المقصورة ! المغاوير .. المناصير .. المعليق .. خلاص قربت اقلب الصفحة انتبهت فرحت صرخت لقيتهم اولاد عمنا .. انقرو الفريق ما طلع المرخيات !
تعبت من التفتيش ما لاقي الناس ديل .. مشيت الاذاعة كتبت لي خبر عن فريق مفقود خرج ولم يعد اوصافه كالآتي .. اصفر اللون مع شحوب واضح في الخمسة سنين الاخيرة .. يعاني من ضعف في حراسة المرمي وارتباك في الدفاع ونقص في الوسط .. لديه سبعة في الهجوم وبطلع مهزوم .. مدربه عالمي مساعده قومي ومساعد المساعد زعلان !! ما زعلان مستقيل يا ثقيل .. يلعب له لاعب عالمي اشترك في كاس العالم لكن لا احد يعرف اسباب الاشتراك او الاختيار حتي الآن !! يلعب له لاعب برازيلي قادم من اوربا دون معرفة الدولة ولكن يتردد ان آخر دولة ظهر فيها كانت بولندا ! لعب في يوم اليتيم فعطف عليه اتحاد مدني ولعب في المولد انهزم من القراقير .. عندو رئيس لكن مستقيل وعندو امين خزينة زعلان عشان لاعب الرديف .. بس بس بس وجدتها وجدتها وجدتها .. الرديف الرديف الرديف .. الجماعة في تصنيف الرديف .. ايووووووه .. ودي فاتتك عليك يا ثقيل كيف ؟
انا كنت ناسي انو الفيفا عندو تصنيفين .. تصنيف للاندية الاساسية وتصنيف لي ناس الرديف .. طبعا بديت من الاول طوالي .. معقولة في الرديف وما يكون لا الاول ولا الوصيف .. لا كده بتكون ما ظريف ! التالت الرابع الخامس السادس .. يا لطيف !! نحن هنا برضو حنمشي ما نقيف .. الخمسين الستين السبعين .. ما تشوف لينا حل يا مسكين .. ان شاء الله تعمل مظلة ! اي حاجة تقفل بيها الكشف ده !! واحد (شفت ) قاعد جنبي قال لي انت بتفتش في شنو ؟ قلت ليهو بفتش في الرديف قال لي انت ما حريف ؟ قلت ليهو كيف ؟ قال لي في الرديف اقلب التصنيف بتلقي الجماعة !! الله يا (شفت) قلبت التصنيف وبقيت اقرأ من الاخير .. الطيش ما لقيت الجماعة حمدت الله مش برضو اولاد عمنا .. تاني الطيش برضو ما شايف مريخ !! الحمد لله .. تالت الطيش لقيت الاسم الما بغباني .. مكتوب واضح وصريح .. قلت ليهم الحصل شنو ؟ ان شاء الله خير .. قالو والله دي ذاته بعد واسطة .. الجماعه كانو هنااااااك لمن جابو انور السد اتوسط ليهم ؟! انور السد الملقب بانور الصاعقة ؟! ايوه كان هو الواسطه ؟! كيف .. مش طلع بعرف ناس التصنيف في الرديف !! ايووووه ما انور كان نجم الرديف في السد .. اها .. والحصل شنو ؟! الجماعه كانو خاتننا في المركز الاخير .. نحن احتجينا قاموا طوالي قالو لينا .. الغلاط في شنو دي الارقام وده الحمام .. حي وميت ومحنط بالقطن !! طبعا الكلام الواضح سخن !! لقينا ما في ولا نقطه .. قلنا ليهم اسمنا الموز ابونقطة .. قالو لينا دي في العربية هناك .. طلعو راصدين ..! قلنا ليهم طيب المدرب المونديالي والمدافع المونديالي ديل ما عندهم نقاط ..! خلو ديل .. المقصورة !! قالو نحن بس في الكورة .. يا الله .. انور قال ليهم انا كنت بلعب في الرديف من جاي لي جاي رفعونا درجتين بقينا التوالت !!
واقلب التصنيف يظهر ليك الرديف ..
مشكلة في الغيار !!
عندنا مشكلة كبيرة في الغيار نتمني من القراء المساهمة في حلها !!
عندنا مجموعة من الصحفيين اسماؤهم بتبدأ بحرف العين طالبوا بالتغيبر من اجل اعادة الروح للمريخ !! نشوف الاسماء والمقترحات .. طبعا التغيير تحت شعار (لمتين ويا عين ما بعدك عين)
عبده فزع قال غيرو طمبل ..
عبد المجيد قال غيرو اتوفيستر ..
عمر المكابرابي قال غيرو مازدا ..
عمر الجندي قال غيرو ابالو ..
عثمان نصر قال غيرو الفنائل ..
عبد الباقي شيخ ادريس قال غيرو الملعب !!
عمر جدو قالو غيرو الكاميرا !
عبد الخالق ود الشريف .. قال غيرو ناس النهضة
عمر بابكر قال غيرو الجريدة !
علي كورينا قال غيرو الزينه ..
علم الدين هاشم قال هو ضد التغيير !
عدلان يوسف قال غيرو الحوافز ..
عمر توفيق وعمر حجوج عايزين اتكلمو .. قلنا ليهم ايوه اسماؤكم بتبدأ بي حرف العين لكن انتو ما صحفيين .. عايزين آخر صحفي .. لكن كلامو طلع شين ؟!! عبد قابل قال غيرو الرئيس !!
الصادق المهدي يكرم الهلال ..
لما اختارو السيد الصادق المهدي ضمن افضل مفكر في العالم الاسلامي .. لاحظ القصة محصورة في الاسلامي فقط ما في العالم كلو .. الهلال كرم الصادق المهدي .. الآن الهلال اختارو ضمن افضل مائتين نادي في العالم .. لاحظ ما الاسلامي فقط .. طبع الصادق المهدي مفروض يكرم الهلال .. ولا انا غلطان!!
|
|
 
|
|
|
|
|
|
|
 Re: ثقيل ثقاله يا خالد عز الدين ( هلالاب والحمد لله ) (Re: السمؤال بدرالدين)
|
بالله ده صحفي
الاختشوا ماتوا
المريخ جاب كاس افريقيا ودبي والشارقة وشرق وسط افريقيا مرتين
انتو جبتوا شنوا يا وهم
بعدين ده تصنيف شهري
يا سمؤال طيب الصحفي منو يا اخوي
لو ده ما صحفي الكزابين هم الصحفين ناس سماعين
يا راجل قول الحقيقة نحنا اولاد النهار ده
اسي المريخ فطيس والهلال افضل منه مية مره اعترف بذلك او اسكت عاين في المتعه دي
| |
|
|
|
|
|
|
| |
abas
السمؤال بدرالدين
nadus2000
فيس بوك
تويتر
انستقرام
يوتيوب
بنتيريست