|
|
 انتوا جلابه دي يعني شنو؟
|
عندي شعور انها كلمه ما حلوه، لانه في زول كان زعلان مني و قالها لي في البوردي ده
والله ما بستهبل، لكن هي من شنو يعني؟ واصل الكلمه من جلابيه ولا شنو؟
حسنه قليله تمنع بلاوي كتيره، نورونا ذادكم الله من نوره
|
|
 
|
|
|
|
|
|
|
 Re: انتوا جلابه دي يعني شنو؟ (Re: Rihab Khalifa)
|
خلاص النكلمك
جلابي دي إخترعها جمال فرفور في غنية الجلابية بيضاء مكوية
أما ظلامي دي معناها الزول اللمن يجي الكهربا بتقطع و الدنيا تبقى ظلام
و إخترعها واحد كده ما متأكد منو
يعني معقولة يا رحاب يعني
لو جادة كلميني عشان أجي أشرح ليك
لكن إلا تحلفي
| |
|
|
|
|
|
|
|
|
|
Re: انتوا جلابه دي يعني شنو؟ (Re: Rihab Khalifa)
|
الجلابي يا بت خليفة أول من قالها هم أهلنا في الجنوب
ربما -و هذا هو الأرجح - جاءت من الجلابية إذ كانوا يسمون التجار الشماليين جلابة و ربما هي من الجلب لأن التجار كانوا يجلبون
البضائع لبيعها هناك و أستبعد هذا لأن أهلنا في الجنوب لم يكونوا على هذا القدر من الإلمام بالعربية و إشتقاقاتها
الآن في البورد تعني الشمالي كحالة ذهنية قبل أن تكون جغرافية و إرتباط هذه الحالة الذهنية بالجوانب السالبة التأريخية كالعنصرية
و حب السيطرة و التعالي
______________________________________________
قاموس الجيب في المصطلحات السايبرية لصاحبه فاضلابي
| |
|
|
|
|
|
|
|
|
|
Re: انتوا جلابه دي يعني شنو؟ (Re: jini)
|
جني
بشاشا ده هو زااااااتو النبذني بيها، انتا قايل شنو؟
لا بعرفو ولا قابلتو قبل كده، و اسي شايفاهو حايم في بوستيني ده
يا زول ما باباهو، مش ياهو شكل الكيبورد ده؟ حبابو و حباب الجابو
| |
|
|
|
|
|
|
|
|
|
Re: انتوا جلابه دي يعني شنو؟ (Re: fadlabi)
|
تصدقوني لو قلت ليكم كلمة جلابية دي ما عرفت ليها اصل ..
انا مشكلتي مش في كلمة جلابه.. لاني كنت بقول لو عرفت معنى الجلابية وقتها ساهل وأفتش على اقل من مهلي على معنى الجلابة ... على فكرة هي التاء المربوطة ولا الهـاء ؟
تقوم يافاضلابي تشرح الجلابة بالجلابية .. كده نقول وفسر الماء بعد الجهد بالماء..
بس ملاحظتك وتشكيكك في " جلب يجلب " خطيره ومسنودة بمنطق قوي!!
| |
|
|
|
|
|
|
|
|
|
Re: انتوا جلابه دي يعني شنو؟ (Re: Rihab Khalifa)
|
طبعاً معروف أنه السودان بلد يجمع بين أصول متعدده وكلمة (جلابه) جاءت لتعنى أهل السودان من أصول عربيه وتعنى الذين لم يختلطوا بالدم الزنجى بصفة عامه ...وربما تشير الكلمه للجلابيه للتمييز بين اللبس الأفرنجى أو العارى ...
والله أعلم
سوركتى
| |
|
|
|
|
|
|
|
|
|
Re: انتوا جلابه دي يعني شنو؟ (Re: Rihab Khalifa)
|
| Quote: وتعنى الذين لم يختلطوا بالدم الزنجى بصفة عامه |
عيييييييييييييييييييييييييييييييييييييييييكككككككككككككك!
اخونا سوركتي، جاب ضقلا، يلولح!
امنت بالله!
عالمين افريقيا دي كلها، جاكة من الدم الذنجي المتعوس هذا!
عشان كده تلقي بريمة، مع انو ما جلابي، لمان تقول ليهو انت زنجي، يسووي جــــــــاك انا عربي، يااخوانا!
ولهذا عبدالرازق الطالب، "عجرم"، ناقع مايثبت اصلو العربي، في جيفة، اي قطعة جلد، او حايم بالقطعة دي المنبر، كدليل علي قول سوركتي انو لم يختلط بالدم الذنجي!
عيييييييييييييييييييييييييييييييييييييييييك!
يعني لو الواحد يا فاضلابي، وقف في نص دارة افريقيا دي او سال، من تجري في عروقه، دماء، ذنجية؟ لادوها، صنة!
اذا الحيت، من فعل الح، او كررت السؤال، لاشار كل ذنجي، للذي يليه من جهة الجنوب تحديدا، كذنجي!
it's a hot potato يا فاضلابي!
its tooooooooooooo hot to handle ياحبيب!
so pass the god dam potatoe, fooool علي قولة الteeeenager عندنا هنا!
اخونا سوركتي،
فكرك الذنجي مقطوع الطاري ده، ود الحرام، جا مقلع من وين؟
سفينة نوح كان فيها سوداني واحد، احد لاشريك له!
استغفر الله، علي قول حبوبة!
| |
|
|
|
|
|
|
|
|
|
Re: انتوا جلابه دي يعني شنو؟ (Re: Bashasha)
|
Quote: طبعاً معروف أنه السودان بلد يجمع بين أصول متعدده وكلمة (جلابه) جاءت لتعنى أهل السودان من أصول عربيه وتعنى الذين لم يختلطوا بالدم الزنجى بصفة عامه ...وربما تشير الكلمه للجلابيه للتمييز بين اللبس الأفرنجى أو العارى ...
والله أعلم
سوركتى |
يا بشاشا سوركتى قال بصفة عامة ويهو يعنى قبايل الرشايدة والزبيدية والذين لا يتزواجون خارج نطاقهم وسوركتى اكثر معرفة بهم ما تفتح على الراجل نار ساكت الرجل يتكلم بصورة تاريخية عن الجلابة!
جنى
| |
|
|
|
|
|
|
|
|
|
Re: انتوا جلابه دي يعني شنو؟ (Re: Bashasha)
|
بسم الله حوالينا ولا علينا يا رب
بشاشا
صدق، كل ما اقري ليك مشاركه، والله العظيم بحتاج ارجع اقراها تاني لانه وكتاب الله ما قاعده افهم انتا بتقول في شنو الا بعد اقرا الكلام كم مره، يكون غباء ده مني ولا شنو يا ربي؟
و دخيل العربي البالانجليزي ده ماتعرف كيف كيف
المهم، مشكور علي الزياره، بس ما تكترها عليك الله، انا لسه بحاول افهم كلمه قلتها لي و فتحت ليها بوست
| |
|
|
|
|
|
|
|
|
|
Re: انتوا جلابه دي يعني شنو؟ (Re: Rihab Khalifa)
|
| Quote: يا بشاشا سوركتى قال بصفة عامة |
عييييييييييييييييييييييييييييييييييييييك ياجني!
اها، او انت اتعقدت مالك، جاي تصلح لي سوركتي؟
في زول هنا قال، بصورة خاصة، لمان براك، شغل الفي راسو بطحة، تسوي بصورة عامة؟
عامة ولا خاصة، سؤالي قائم:
الجلابة، ولا الزنوج اذا اصلهم ما واحد، اللي هو الزول السوداني بتاع نوح داك، جو من وين ياجني؟
ما يا الجلابي ما ليهو اصل، او يا الزنجي الجنا حرام، مقطوع من شدرة!
جاوب.
ولا حتقوم سداري، هنا كمان؟
| |
|
|
|
|
|
|
|
|
|
Re: انتوا جلابه دي يعني شنو؟ (Re: Bashasha)
|
Quote:
عييييييييييييييييييييييييييييييييييييييك ياجني!
اها، او انت اتعقدت مالك، جاي تصلح لي سوركتي؟
في زول هنا قال، بصورة خاصة، لمان براك، شغل الفي راسو بطحة، تسوي بصورة عامة؟
عامة ولا خاصة، سؤالي قائم:
الجلابة، ولا الزنوج اذا اصلهم ما واحد، اللي هو الزول السوداني بتاع نوح داك، جو من وين ياجني؟
ما يا الجلابي ما ليهو اصل، او يا الزنجي الجنا حرام، مقطوع من شدرة!
جاوب.
ولا حتقوم سداري، هنا كمان؟
|
كالعادة تفهم غلط او تفترض عشان تنزل سياسة بسمارك الداخلية حقتك دى!
سوركتى بشرح تاريخيا من زمن الناس عرايا!
البقوم سدارى منو!
انت لمن الواحد يرد عليك مرة واحد خلاص ونص اند فوراوول!
انا اخلى شغلى واقعد ابارى حجوة أم ضبيبينة حقتك الدى!
هو قال بصفة عامة وقال الله اعلم يعنى بصفة تاريخية لمن كانوا فى عرايا يا العريان من الفهم!
انت ما قلت يوم الاحد حتجى الجابك السبت شنو ما بتعرف الايام كمان!
جنى
جنى
| |
|
|
|
|
|
|
|
|
|
Re: انتوا جلابه دي يعني شنو؟ (Re: Rihab Khalifa)
|
يطلق الجنوبيون على الشمالي كلمة (مندكورو).
اما بالنسبة لكلمة جلابي فهي مستخدمة في الغرب بصورة واسعة.
وكما يقال – والله اعلم - جاءت من جلب البضائع ، وكانت مهنة الشماليين
بالتحديد. والمقصود بالشماليين هم المنحدرون من اصول شمال ووسط السودان.
يعني الهدندوة او البجا لا يطلق عليهم جلابة.
ذوي الاصول الافريقية القادمون من الشمال او الوسط لا يطلق عليهم جلابة
وان مارسوا نفس المهنة. اذن الصفة تطلق على عرقيات معينة.
كلمة جلابي هي عكس كلمة غرابي او غرباوي. فابن الشمالية الذي ولد جده في الغرب
وترعرعت كل العائلة هنالك يظل جلابيا حتى وان لم يجلب شيئا،
وبالمثل ابناء الغرب الذي عاشوا من قبل المهدية في وسط وشمال
البلاد فهم غرابة وان اختلطت دماؤهم.
مؤخرا دخلت العبارة القاموس السياسي واصبحت تستخدم حيال الانظمة
الحاكمة (حكومة جلابة / حركات جلابة ....) لان السلطة الحقيقية منذ
الاستقلال ظلت بايدي ابناء الشمال والوسط واي محاولة لتغيير ذلك يعتبر مؤامرة عنصرية.
وفي هذا البورد يستخدمها البعض للاستدلال على الاستعلاء وغمط الآخرين حقوقهم.
وبعضهم يستخدمها اسفافا واستخفافا وقلة حيلة.
| |
|
|
|
|
|
|
|
|
|
Re: انتوا جلابه دي يعني شنو؟ (Re: Zoal Wahid)
|
سلامات
يا رحاب يا أختى، الغريبة أنا كنت دايرة أسال نفس السؤال دة !! و لكن بصيغة الإستنكار
يعنى كان جلابى و لا غرباوى و لا جنوبى ،، الناس "بتتنابز" بالجنس ليه ؟؟ هو رب العرش العظيم لمن خلق الناس ، قال ديل أحسن "عندى" من ديل ؟؟ و لا قلة أدب بس مننا "نحن البشر يعنى" ؟؟؟
ظلامى دى طبعا ممكن نعتبرها "نبزة" لأنها لذوى "العقول الغير مستنيرة"
لكن برضو "منو البيحدد "؟؟؟
يا زولة بس خليكى زى حلاتى ، أقرأى و إبتسمى و "طنشى"
نحن هنا فى هذا المنبر "بننفخ فى قربة مقدودة"
وفرى نفسك لما هو أفضل 
| |
|
|
|
|
|
|
|
|
|
Re: انتوا جلابه دي يعني شنو؟ (Re: Rihab Khalifa)
|
الاخت الكريمة
كلمة جلابة تطلق على التجار الذين يقدمون الى مناطق ليست مناطقهم وسبب التسمية انهم كانوا يجلبون بضائعهم لى الدواب وكانت الكلمة تستعمل في السودان في اواسط القرن التاسع عشر ( جلبنا ليهم سمسم السمسم ما كفاهم جلبنا لهم سعية )
وجلب البضائع ليس حكرا على قبيلة بعينها ولن اكثر من عمل بالتجارة هم من الشماليين واغلبهم من الجعليين فارتبط بهم هذا الاسم
وقد عمل الجلابة على نشر تعاليم الدين في المناطق غير المسلمة باقامتهم للمساجد وللخلاوى ولانخراطهم الايجابي في التلك المجتمعات
واكتفي بهذا
| |
|
|
|
|
|
|
|
|
|
Re: انتوا جلابه دي يعني شنو؟ (Re: Rihab Khalifa)
|
الاخت الكريمة
كلمة جلابة تطلق على التجار الذين يقدمون الى مناطق ليست مناطقهم وسبب التسمية انهم كانوا يجلبون بضائعهم لى الدواب وكانت الكلمة تستعمل في السودان في اواسط القرن التاسع عشر ( جلبنا ليهم سمسم السمسم ما كفاهم جلبنا لهم سعية )
وجلب البضائع ليس حكرا على قبيلة بعينها ولن اكثر من عمل بالتجارة هم من الشماليين واغلبهم من الجعليين فارتبط بهم هذا الاسم
وقد عمل الجلابة على نشر تعاليم الدين في المناطق غير المسلمة باقامتهم للمساجد وللخلاوى ولانخراطهم الايجابي في التلك المجتمعات
واكتفي بهذا
| |
|
|
|
|
|
|
|
|
|
Re: انتوا جلابه دي يعني شنو؟ (Re: Rihab Khalifa)
|
ابدا الكلام ده ما صاح
وبالمناسبة كتير من كتب التاريخ او قصص المؤرخين بتعتمد على الانطباع الشخصي ولا يخفى الغرض فيها
ثم ما كان يحدث من مآسي الرقيق ليست فقط في السودان ولكنها كانت اعصار غشي كل العالم ، وقد تجاوزته الشعوب بعقولها المستنيرة ودخلت في تعايش مع بعضها البعض واتجهت للانتاج ولبناء الدولة . وهاهي السنغال اكبر مورد للرقيق في التاريخ اصبحت الان من الدول الجاذبة للهجرة اليها وللاستثمارت وقريبا ستكون في مصاف الدول المتقدمة . ولن اتح\ث عن جنوب افريقيا معقل التمييز العرقي في افريقيا ، يكفي انها دولة متقدمة الان
| |
|
|
|
|
|
|
|
|
|
Re: انتوا جلابه دي يعني شنو؟ (Re: Rihab Khalifa)
|
| Quote: يا ود الامين اهل بيشو ده ناس طيبين و كان سمعو كلامه ده كان قطعو طاريه من زماااااان |
و يا نوبى صادق، لكن نعمل شنو اذا وليدهم ده نازل فيهم شتيمة ، يعنى اهلو
و هو بيعرف مداخلهم و كده، يعنى حنعرف اهلو اكتر منو !!! لكن برضو الله غالب
| |
|
|
|
|
|
|
|
|
|
Re: انتوا جلابه دي يعني شنو؟ (Re: Rihab Khalifa)
|
والله يا رحاب كلنا طلاب علم ،
اسه زى اخونا ادروب ادنا معلومة ربنا يجعلها فى ميزان حسناتو
بس حبيبت استفسر من الاخ ادروب حيث انه لا حياء فى الدين و العلم
اسه السودان ده كلو مافيهو سودانى فيهو عرق عربى جت كده !
و اذا وجد سودانى فيهو عرق عربى فهل ننفى عنه سودانيته ؟ مع وافر التقدير
| |
|
|
|
|
|
|
|
|
|
Re: انتوا جلابه دي يعني شنو؟ (Re: Rihab Khalifa)
|
محمد الأمين تحياتي
| Quote: اسه السودان ده كلو مافيهو سودانى فيهو عرق عربى جت كده ! |
العرق العربي الوحيد المعروف في السودان هم الرشايدة ودخلوا السودان كرحل بأعداد قليلة قبل مائة وخمسين سنة علي أكثر تقدير يعني ما طولوا في السودان وبمفهوم الآنثربولوجي لا يعتبروا سودانيين إلا بالجنسية لسبب بسيط لأنهم أولا لم يختلطوا بأجناس السودان ولم يتعايشوا معهم حتي المدن إلا قليلا وما زالوا محتفظين بلهجتهم وثقافتهم وعاداتهم التي أتوا بها يعني لم يؤثروا ولم يتأثروا
أما بقية الأجناس التي إختلطت وغالبتها من جانب الأم فهي سودانية زنجية من منظور حتي بيلوجي لأن ناتج إختلاط الأسود مع الأبيض يطلع زنجي هذا بجانب إندماجهم في المجتمع السوداني والعيش في وسطهم والتمتع بالجنسية السودانية بعد كل هذا ما الذي يجعلهم يتنكرون ويهربوا للجنس العربي؟! هل هي العقدة القديمة؟!
| |
|
|
|
|
|
|
|
|
|
Re: انتوا جلابه دي يعني شنو؟ (Re: Adrob abubakr)
|
| Quote: لعرق العربي الوحيد المعروف في السودان هم الرشايدة ودخلوا السودان كرحل بأعداد قليلة قبل مائة وخمسين سنة علي أكثر تقدير يعني ما طولوا في السودان وبمفهوم الآنثربولوجي لا يعتبروا سودانيين إلا بالجنسية لسبب بسيط لأنهم أولا لم يختلطوا بأجناس السودان ولم يتعايشوا معهم حتي المدن إلا قليلا وما زالوا محتفظين بلهجتهم وثقافتهم وعاداتهم التي أتوا بها يعني لم يؤثروا ولم يتأثروا |
طيب ايش المشكلة وليه الغلبة يعن المشكلة محلولة اذا لم يقتنع العرب بانهم زنزج نقوم نقنع الزنوج بانهم عرب ويغا دار ما دخلك شر!
شفت كيف يا ود اب ذهانة الببورد!
لو عارف محلك اجى اعضيك فى نص رأسك!
جنى
| |
|
|
|
|
|
|
|
|
|
Re: انتوا جلابه دي يعني شنو؟ (Re: Rihab Khalifa)
|
الاخ ادروب تحية طيبة
يعنى اسه انا عندى صحبى والدتو سودانية حلفاوية و والدو يمنى من حمير
اسه ده نعتبرو سودانى ولا عربى و لا يمنى ولا شنو بالضبط ؟
ملاحظة : لهجتو السودانية ما بطاله
| |
|
|
|
|
|
|
|
|
|
Re: انتوا جلابه دي يعني شنو؟ (Re: محمد الامين احمد)
|
| Quote: يعني ضلامي ده زول غبي، مش؟ |
ضلامي دي
الا تجي تشرحها ليك خالتك د.بيان ...
باقي لي متخصصة في المصطلح ده وتبعاته ومصنفاته ... في المكتبات العالمية ومكتبة الكونغرس .. والدول المجاورة وعندها عدد من المقالات المنشورة بخصوص الموضوع في المنبر الحر يعني البحث ممكن يوصلك برضو.
ولا انت امشي ليها .. براك.
| |
|
|
|
|
|
|
|
|
|
Re: انتوا جلابه دي يعني شنو؟ (Re: Gafar Bashir)
|
جعفر بشير، شكلك عارف معناها
لا لا، انا ما بمشي لي زول، علي الاقل في الوقت الحالي، خالتو بيان دايره تشرح مرحب بيها، لكن ما بهابش ساكت
انا ناقصه، يا زول انا من رد في بوست مسالم ادوني ليك في راسي دا
اصبر لي لمن اسن قلمي ده
| |
|
|
|
|
|
|
|
|
|
Re: انتوا جلابه دي يعني شنو؟ (Re: Rihab Khalifa)
|
الجلابه من سودانيه عجوزه(عشان ما نطلع من الموضوع الأساسى) كلمة يعود أصلها للجلب وهو جلب البضائع كما ذكر الأخوان فى هذا البوست وهى منسويه لأهلنا من أصل عربى (يعنى للتمييز بينهم وبين الأجناس من غير العرب)
يابشاشه ...لك التحيه كان أهلنا يضعون العديد من التحفظات والمحاذير فى التعامل مع اهل الغرب والجنوب ...وطبعاً التزاوج والمصاهرة ...الخ وكنا نحس فى دواخلنا بأن أهلنا عنصريين أو قل مجحفين فى حق هؤلاء وربما كان ذلك التمييز هو سبب مشاكلنا اليوم !!وقد لاحظت الاثر النفسى لهذا الأمر واضحاً عندما عملت فى اوائل الثمانينات فى الجنوب ...والسؤال حقاً أيهما كان نتاج الآخر أعنى العنصريه والتمرد....
اخوى جنى لك الود والتحية ...الشاهد أن السؤال جاء عفوياً من بت لندن السائله لكن أخوانا جهجهوها يعنى كان فتحت المعجم المحيط كان خلصت نفسها وبدل تسأل تنورنا بمعلومه ...بشاشه بدل يسهل عليها الموضوع وداها لسيدنا نوح وكان ما وقفته كان وصل بيها لسيدنا آدم وأمنا حواء ...له العتبى
يابت لندن ...منال سوركتى يمكن تكون من أهلنا بس كملى لى باقى أهلها جزء كبير من ألاسرة فى بحرى ...نحنا آخرنا محمد عيسى سوار الذهب وندور فى فلك أسماء ساتى وزيادة وسوركتى وقبلما تسألى عن معنى سوركتى أقول هى مكونه من جزئين سور وتعنى الحجاب وكتى وهو صانع الحجاب أو الفكى (الفقيه) الذى يعلم الطلبه القرآن فى الخلوة ويقوم بتجليد المصحف الصغير الذى يوضع بجانب المولود أو على رقبة الطفل الصغير حفظاً له ...
| |
|
|
|
|
|
|
|
|
|
Re: انتوا جلابه دي يعني شنو؟ (Re: sourketti)
|
الاخ سوركتي
مشكور علي التركيز في الموضوع
حجاوي ظلم الشماليين للجنوبيين و غيرهم كتيره، والوالد كان شغال في الجنوب فتره من الزمان و معظم معاركه كانت مع التجار الشماليين و استغلالهم، ياخ ديل كان فيهم ناس بيتاجروا بالملح، يدوا الاسره الجنوبيه حفنه ملح قصاد دجاجه او بهيمه، في النهايه سموهو ابو قانون
لكن برضك في النهايه ليه الناس تستعمل كلمه عامه زي دي و تلصقها بابشع الاشياء و يجو الناس الزي رحاب ديل يقولو عليهم جلابييين، ولا جلابييات لانهم جايين من الشمال؟
الحركه دي بتذكرني بكلمه اسود و كيف الناس في الغرب بيستعملوها لوصف الاشياء الغير جميله، مع الفرق في كيفيه استعمال الكلمتين طبعا
the purpose of posting the question is to reclaim the word back to what it meant originally
مشكور لشرح كلمه سوركتي. اول مره اعرفها والله
والله ما متذكره باقي الاسم، بس بتذكر انها كانت مجتهده جدا و مسكينه و بتلبس نضارات
| |
|
|
|
|
|
|
|
|
|
Re: انتوا جلابه دي يعني شنو؟ (Re: Rihab Khalifa)
|
العزيزة ريهاب
| Quote: ادروب الكلام ده جبتو من وين؟ |
أنا الرشايدة ديل كنت عايش في وسطهم وبعض منهم كان زملاء معانا في الدراسة وكثيرين منهم أعرفهم شخصيا يمتلكوا جنسيات خليجية ولكن ما بسيتفيدوا منها إلا لمان دايرين يسافروا للخليج لسباق الجمال
لمان زرت الكويت لقيت الجماعة زاتهم هناك وما معترفين بيهم ومعتبرينهم بدون!
عشان كده هم ما فارقة معاهم يحملوا ياتو جنسية لأنهم بدو رحل تجدينهم في السودان وإريتريا ومناطق أخري ولا يعترفوا بالحدود ولا يتبنوا ثقافة أخري ولذلك هم سودانيين بالجنسية (بسبب الموطن) ليس إلا!
| |
|
|
|
|
|
|
|
|
|
Re: انتوا جلابه دي يعني شنو؟ (Re: Adrob abubakr)
|
ادروب
يخليك و مشكور علي طوله البال
والله ديل احسن ناس، ماخدين كلام الرسول عليه افضل الصلاه و السلام و مطبقينه، كان بالعنيه ولا ما بالعنيه
الغريبه النقاش في الاجناس و ما شابهه في بلاد الفرنجه مات و ماشي مندثر، عارف ليه؟ لانه عندهم الاهم من ده الشاغل وكتهم، زي تعمير بلدهم
| |
|
|
|
|
|
|
|
|
|
Re: انتوا جلابه دي يعني شنو؟ (Re: Rihab Khalifa)
|
Quote: يعنى اسه انا عندى صحبى والدتو سودانية حلفاوية و والدو يمنى من حمير
اسه ده نعتبرو سودانى ولا عربى و لا يمنى ولا شنو بالضبط ؟
ملاحظة : لهجتو السودانية ما بطاله |
إذا كان هو مولد سوداني وعايش في السودان يعتبر من ناحية الأصل سوداني ولكن إذا تعفف أو تعقد من الإنتماء للسودان وإختار يكون عربي يمني فلا يستحق الجنسية السودانية!
أما حكاية يكون سوداني وعربي من ناحية الإنتماء في وقت واحد ما جاية لأنو السودان أمة مميزة بثقافتهاوزنزجيتها مثلها مثل الألمان أنا مثلا أحوز الجنسية الألمانية (بسبب الموطن) لا يعني أنا ألماني بالإنتماء بل أظل سوداني ولمان يتحدث الألمان عن قوميتهم أتحدث معهم عن التعدد الثقافي
هذه الإشكالية التي طرحتها تحل في الغالب وفق إتفاقات دولية كما بين الجزائر وفرنسا بالنسبة لوضع المولدين الجزائريين في فرنسا أو بطريقة الإختيار الحر وذلك بالسماح للقاصرين بإمتلاك الجنسيتين وفي الفترة ما بين 16 سنة و23 سنة أن يختار إحداها إما السودان أو اليمن!
| |
|
|
|
|
|
|
|
|
|
Re: انتوا جلابه دي يعني شنو؟ (Re: Adrob abubakr)
|
يعني القصه اختيار؟
ادروب
كلام واضح و مفهوم
لكن لو هو سوداني بالميلاد و امه و ابوهو سودانيين و لكن تربي و عاش بالخارج و ما يربطه بالسودان بقي دين، و لغه و اهل و بعض الهموم
برضك سوداني؟
| |
|
|
|
|
|
|
|
|
|
Re: انتوا جلابه دي يعني شنو؟ (Re: Rihab Khalifa)
|
سيد أدروب دربكة
حياك الله
| Quote: ويهربوا للجنس العربي؟! هل هي العقدة القديمة؟! |
زمان لكن كنا بنلعب في نادي الثوار كان عندنا لاعب اسمو التوم وبعدين يا ادروب الاعب دا كان ماعندو اي فنيات تذكر لكن كان أهم لاعب لمدرب الفريق لأنو كان بتاع دربكة وفي وجوده في وسط الميدان الفريق الخصم ما بقدر يتحكم في الكورة نهائي لأنو كان بخرمجها ليهم لي الطيش. (إنشاء الله تكون فهمت قصدي)؟؟
ولا اقول ليك فريق التدريب عندكم بقيادة المدربة الكبيرة تراجي زعيمة جميعة الصداقة إياها ومدرب اللياقة بشاشا وإنت بتجيب الكورة لي مدرب الحراس من بره لمن يكون قاعد يدرب في الحراس والكورة تتطير بعيد ومعاك محمد سليمان.
يا رحاب خليفة
جلابة دي حقت ناس الغرب بطلقوها علينا نحن ناس شمال الوطن ومعناها عنصري ونتن وأكتر زول بقولها عنا واحد اسمو محمد سليمان. يعني كلمة تدعو للعنصرية
أبوفتحية
| |
|
|
|
|
|
|
|
|
|
Re: انتوا جلابه دي يعني شنو؟ (Re: Rihab Khalifa)
|
الدكتورة رهاب
معليش كنا متابعين مشاكسات عادل مع أخونا بشاشا
علي العموم...
| Quote: لكن لو هو سوداني بالميلاد و امه و ابوهو سودانيين و لكن تربي و عاش بالخارج و ما يربطه بالسودان بقي دين، و لغه و اهل و بعض الهموم |
الموطن لا يساوي شئ في مقابل الإنتماء العرقي والثقافي (اللغة والدين) كمعيارين أساسيين في تحديد الهوية
وسؤلك هذا يشمل غالبية أبناء الجاليات بأوروبا الذي ولدوا ونشأوا فيها وثقافة الموطن بلا شك لها تأثيرها الذي لا يستهان به وأحياناالطفل يعيش في إغتراب وتجاذب بين ثقافتين ودور الوالدين هنا كبير جدا في الحفاظ علي الهوية
إنتمائك لبلدك هو مؤشر لأصالتك والنتيجة العكسية هو ضياع الهوية والبحث الدائم عن الإعتراف من قبل أصحاب الهوية المضيفة!
| |
|
|
|
|
|
|
|
|
|
Re: انتوا جلابه دي يعني شنو؟ (Re: Rihab Khalifa)
|
بالرغم من تباين الردود و اختلاف التاويل، الا انه في حاجه واحده انا مستغربه ليها و ما قدرت افهم علي اي اساس الناس بتستعمل لقب زي ده، عنده ارتباط بجنس معين و حته جغرافيه معينه، للاساءه لجنس او قبيله معينه
مش هي دي العنصريه البتكلموا عنها الناس؟
هل يحق للمضهد عنصريا انه يدافع عن نفسه بي انه يكون برضو عنصري؟
سؤالي ده ما عشان اوجه لوم او انتقاد لانسان معين هنا، كل الغرض منه انه افهم وجه نظر الناس و يمكن انه نختلف، لكن ياريت بي احترام و من غير شخصنه للمواضيع
| |
|
|
|
|
|
|
|
|
|
Re: انتوا جلابه دي يعني شنو؟ (Re: Rihab Khalifa)
|
جلابة
صيغة مبالغة من الفعل جلب وهناك كلمة جلبة تعني الازعاج
جلاب اي كثير الجلب
وهناك الامين جلاب لاعب الهلال السابق
اما الظلامي قتقال للشخص الشين
اي ما تقول حبوبتي ( هوي يا الضلمة دها)
اما كلمة جلابة وظلامي في المنبر
افتكر دي لغة مثقافاتية ودها شعر ما عنديهو ليهو رقبة
| |
|
|
|
|
|
|
|
|
|
Re: انتوا جلابه دي يعني شنو؟ (Re: khaleel)
|
والله يا خليل انا لغه المثقفاتيه دي زااااااااااتها العندي عليها اعتراض
لانها برضها نوع من الاستعلاء علي الطبقه العامله، بتخصيص مفرداتهم يعني زي الدكاتره لمن يقوموا يدخلوا ليك كلمه كلمتين بالانجليزي و هم بتكلموا مع المريض في حين انه عارفين انه مافي زول فاهمهم، و لكن اهو، طريقه يحاولوا يميزوا بيها نفسهم
| |
|
|
|
|
|
|
|
|
|
Re: انتوا جلابه دي يعني شنو؟ (Re: Rihab Khalifa)
|
| Quote: هل يحق للمضهد عنصريا انه يدافع عن نفسه بي انه يكون برضو عنصري؟ |
إنت صدقتي حكاية العنصرية المضادة!
هو مضهد ويكون عنصري كيف!
العنصرية هي شعور بالإستعلاء إحتقارا وإزدراء لمن يتخيل أنه الأضعف
ويلقي عليه إسقاطاته من كراهية وحقد وعنصرية من باب الهجوم خير وسيلة للدفاع!
لهذا لا يمكن تصور العنصرية من الضحية المضطهدة المجردة من سلاح القوة في مواجهة
الأقوي سخطها وتمردها لإعادة حقوقها وإسترداد كرامتها شئ طبيعي ودفاع مشروع!
| |
|
|
|
|
|
|
|
|
|
Re: انتوا جلابه دي يعني شنو؟ (Re: Rihab Khalifa)
|
السيد أدروب دربكة تلميذ تراجي وبشاشا
لك التحية بصدق
Quote: العنصرية هي شعور بالإستعلاء إحتقارا وإزدراء لمن يتخيل أنه الأضعف
ويلقي عليه إسقاطاته من كراهية وحقد وعنصرية من باب الهجوم خير وسيلة للدفاع!
|
كلامك غلط يا دربكة - العنصرية هي إحساس داخلي يحمله الشخص الذي يعتقد أنه أقل من الآخر
زعيم أمة الاسلام الشهيد مالكولم إكس قال قوته الشهيرة Salvery is a state of mind وهي
أن الشخص ذو البشرة السوداء في أمريكا كان يعيش بالتبعية للشخص ذو البشرة البيضاء
وظل هذا الفهم في عقول السود في جميع أنحاء العالم.
عندما يلعب لاعب فريق برشلونة الكاميروني الأصل صامويل إتو مباراة مع فريقه في ملعب نادي
آخر وينعته مشجعي الفريق الآخر بكلمات نابية ليس لشيء وإلا لأن لون بشرته سوداء حيث أنهم
لاينظرون إلى هذا الرجل اللاعب الفذ الهداف من ناحية عطاءه في الملعب بل هم يعيبون عليه
فنه ولعبه ولسان حالهم يقول له لماذا تكون أنت يا عبد يا أسود لعاب كدا وفنان كدا ولماذا
أنت يا عبد يا اسود تحرز فينا أهداف.
العنصرية ليست وليدة السودان ولم يقم من تصفهم أنت وأزلام العنصرية بشاشا وتراجي ودسليمان
بل إن العرب الأصليين سيدنا محمد صلى الله عليه وسلم حارب العنصرية ووضع لها نهاية أبدية في
زمنه وذلك بتفويض إلهي من رب العالمين في مايعنيه قوله سبحتانه وتعالى إن التقوى بين العربي
والعجمي هي التقوى فقط.
أبوفتحية
| |
|
|
|
|
|
|
|
|
|
Re: انتوا جلابه دي يعني شنو؟ (Re: الصادق صديق سلمان)
|
الغالي ابو فتحيه
مشكور علي المشاركه، لكن ما بتفق معاك انه العنصريه احساس داخلي بس، اكيد العنصريه جايه من مصدر خارجي و اكيد الاحساس الداخلي بلعب فيها دور كبير، لكن مشكلتي اسي انا مع الناس البحاولوا يقاوموا العنصريه بي انه يكونو عنصريين، معقوله ده يكون الحل؟
| |
|
|
|
|
|
|
|
|
|
Re: انتوا جلابه دي يعني شنو؟ (Re: Rihab Khalifa)
|
ادروب اللذيذ
العنصريه هي العنصريه، مضاده، ما مضاده، واقفه في مكانها، راكبه عربيه ولا موطر
يعني لمن زول يتكلم عن جنس معين و بصوره تميزه باوصاف كعبه، لانه لونه او شكله او المكان الجغرافي الجاي منه مختلف من الواصف، برضك عنصريه
power + prejudice = racism
يعني انت اسي بتفتكر انه ما ممكن زول مضهد يكون عنصري؟
رايك شنو في اهلنا السود الفي امريكا ديل لمن ينادوا بعض يا زنوج او Nigers
انا مشيت ليك بعيد عشان الامور ما تتشخصن و لمن نتفق علي ثوابت ممكن نتكلم عن السودان
| |
|
|
|
|
|
|
|
|
|
Re: انتوا جلابه دي يعني شنو؟ (Re: Rihab Khalifa)
|
العزيزة رحاب خليفة
لك التحية
| Quote: مشكور علي المشاركه، لكن ما بتفق معاك انه العنصريه احساس داخلي بس، |
العنصرية لها أسبابها الخارجية التي تؤثر على الشخص (المهمش) (المضطهد)
حيث أن الشخص الذي يمتلك القوة + الثروة = عنصري
ولكن هناك اناس غير عنصريين ويمتلكون القوة والثروة
العوامل المذكورة تجعل الشخص المضطهد تحت تأثير الاحساس بالدونية
وبعد ما يتملكه هذا الاحساس يتعامل معه وكأنه حقيقة دامغة في حياته
لذا اخذت العنصرية في امريكا وجنوب افريقيا وقت طويل حتى تصدى لها
أناس تخلصوا من تأثير ما فعله البيض بهم وتمكن منهم الاحساس بالمساواة
مع الشخص المقابل له ومن هنا انفجرت ثورة الغضب.
أما في السودان وما يحاول السيد ادروب دربكة وأشباهه أننا في السودان
نتعامل بنفس الطريقة ولذا اطلقوا علينا كلمة جلابة أو كلمة مندكورو
ولكننا لم ولن نشعر بأننا افضل منهم او هم اقل منا لأننا في خاتمة المطاف
بشر "مخلوقين" وليس لنا الخيرة في أمرنا.
أبوفتحية
| |
|
|
|
|
|
|
|
|
|
Re: انتوا جلابه دي يعني شنو؟ (Re: Rihab Khalifa)
|
الأخت رحاب حبابك عشرة وشكراً على هذا البوست الذي نكأ جرحاً غائراً لدى بعض المتعصبين في هذا المنبر.
كلمة جلابة هي كلمة عربية فصيحة وردت في صيغة مبالغة على وزن فعال بتشديد العين وليس لها أي علاقة بتجارة العبيد كما ذكر أحد الإخوة مازحاً في إعتقادي. أول من أطلق كلمة جلابة على التجار من أبناء الوسط والشمال هم البقارة وقصد بها جلب البضائع ففي ذاك الوقت كانت هناك مهنتان في غرب السودان هما الرعي والزراعة. التجارة كانت مهنة تتطلب قدراً من المعرفة واللباقة والأمانة وكلمة جلابة إرتبطت إرتباطاً وثيقاً بالتجارة ولا علاقة لها بمفهوم العروبة من قريب أو بعيد. لكن حينما بدأ التمزق الإجتماعي نتيجة لظهور بعض الأفكار العنصرية والحركات الجهوية استخدمت هذه الكلمة البليغة إستخداماً خاطئاً شوه المعنى الحقيقي الذي قصده بحسن نية أهلكم البقارة.
كلمة جلابة أيضاً لا علاقة لها بالجنوب ولا بالجلابية (مكوية أو غير مكوية) فالبقارة لم يلبسو الجلابية إلا حديثاً وكانوا يطلقون كلمة (خلق) بفتح الخاء واللام والقاف على الثوب. يعني الواحد يقول ليك (أنطيني خلقي) بمعنى أعطيني ثوبي. وأقول للأخ أدروب كان هناك تاجر من أبناء الشرق من أسرة (العكيراب) يطلق الناس عليه صفة جلابي فأبناء الشرق أيضاً معنيين بالأمر.
والله أعلم
| |
|
|
|
|
|
|
|
|
|
Re: انتوا جلابه دي يعني شنو؟ (Re: Mohammed Haroun)
|
الاخ محمد هارون
ده الانا اكتشفته، انه الكلمه معناها محايد و ما كان عنده اي ملحقات و معاني ما كويسه، لكن استعمال اللفظ اتغير بعد ما المثقفاتيه قلبنوهو و المستغربه ليه انه هم بفتكروا انه من حقهم يستعملوهو بالطريقه دي
| |
|
|
|
|
|
|
|
|
|
Re: انتوا جلابه دي يعني شنو؟ (Re: Tabaldina)
|
العزيز رحاب
تحية طيبة
خلينا نصوغ تعريف من أرض الواقع مصطحباً خلفيتي الرعوية ،بعد الخريف عادة ما يقوم أهلي بفرز بهائم الى قسمين بهائم "جَلب" وبهائم "سعية" القسم الأول غالباً ما يكون الذكور "جِمال" والثاني الأناث نوق "نِياق".وايضاً يقال ان فلان هذه السنة "جَالب" الى الريف "مصر" ،ولذلك بعض أهلنا يحملوا أسم "جَلاب"،بعيداً عن تعريفات ناس سلاطين باشا"منطقتنا لا يوجد بها أثر لتجارة الرقيق تاريخياً" وغيرهم إذن وجود هذه المفردة منذ أمد ليس بالقصير وبهذا المعني اللغوي الواضح والذي لا يحمل أي التباس سوى الإتيان بالشيئ اي "جلبه"،بعد وصول اهلنا من وسط وشمال السودان كتجار اُطلق عليهم "جلابة" وايضاً "بحارة" نسبة الى مجيئهم من قبل البحر لأن أهلنا لايميزون بين النيل والبحر عندهم الأمر سيان،وبما أن المنطقة تسود فيها الأعراف والأنتماء القبلي والتجار آتوا من قبائل متعددة ويجمعهم نشاط اقتصادي واحد اطلق عليهم لقب "جلابة" وهو بمثابة القبيلة وتأكيداً على ذلك هناك احياء في بعض المدن تحمل نفس الأسم "حي الجلابة - مدينة مليط" قياساً على الأحياء التي تحمل اسماء بعض القبائل "حي الزيادية - مدينة الفاشر"، وايضاًاذا تطابق في الشلة اسمين نميز بينهما بفلان الجلابي كانتماء قبلي ،على العموم كلمة جلابة في منشأها لا تحمل أي معني قبيح او عنصري او تحقيري الأ داخل هذا الفضاء الأسفيري تم تحويرها واقحامهاحتى تتناسب مع الطرح الفكري لبعض الكيانات السياسية(التعريف دا حسب واقعي المعاش).
Quote: جلابة دي حقت ناس الغرب بطلقوها علينا نحن ناس شمال الوطن ومعناها عنصري ونتن وأكتر زول بقولها عنا واحد اسمو محمد سليمان. يعني كلمة تدعو للعنصرية
|
العزيز ابو فتيحة
الكلام دا جبتوا من وين؟ ،ياخي حديثك دا عاري من الصحة تماماً اذا هناك جماعة ذات ايدلوجيا محددة تستخدم هذه المفردة بذات المعني ،هذا لا يعطيك الحق أن تضع ناس الغرب جميعهم في ذات السلة واستخدامها في ارض الواقع ليس له علاقة بالعنصرية بتاتاً والمخاطب بها يتقبلها بكل اريحية واسأل مجرب ولاتسأل طبيب.
| |
|
|
|
|
|
|
|
|
|
Re: انتوا جلابه دي يعني شنو؟ (Re: Rihab Khalifa)
|
الأخ أدروب دربكة
Quote: الغني الذي كون ثروة من مال البسطاء والظالم الذي إضطهد الأبرياء وإستغلهم ينتابه دائما إحساس مزدوج الإحتقار والخوف لأنه ينسي ويحسب أنه هذا قدره الفطري وحق أصيل
|
كلامك الفوق دا وعلى حسب ما اعتقد انا غير صحيح كتعريف للعنصرية التي نتحدث وحتى أسأل أستاذك المستوهم والمستعلي بشاشا والعدواني محمد سليمان ورئيسة الجمعية إياها تراجي.
العنصرية وكما نعرفها قامت على أساس اللون أولاً ولأن اللون الأبيض امتلك الأرض ومافيها بإمكانياته هذا أدى إلى تحكمه فينا وأي لون آخر ما سوى اللون الأبيض (الأوروبي) يعتبر لون دون.
العنصرية واستعباد البشر كما تعلم يا دربكة أنه ظهر منذ زمن بعيد وأنا وأنت لا يد لنا فيه ولكنه ترك آثاره لنا لنتحملها.
المال والثروة كما قلت لهما دور ويعتبر رئيسي في انتشار العنصرية ولكنه ليس الأساسي ولكن أساس العنصرية هو اللون ولا شيء غيره كما ترى وتسمع في كل المناسبات وحكاية اللاعبين الأفارقة في أوروبا تملآ الدنيا والعنصرية التي يواجهونها.
أبوفتحية
| |
|
|
|
|
|
|
|
|
|
Re: انتوا جلابه دي يعني شنو؟ (Re: Rihab Khalifa)
|
ادروب اللذيذ
انا معاك، انه شعور استعلائي قبل كل شيء ، لكن البرجدس ما مبني علي استعلاء فقط، يعني انا ممكن اكون مستعليه عليك لانه انا عندي درجه علميه او اغني منك مثلا، لكن ده ما معناهو انو عندي برجدس عليك من ناحيه جنسك و عنصرك
ياخ الكلام ده بالعربي مشكله، لكن بحاول اوصل الحاجه القاصداها و لو في زول بعرف المعني المرادف طوالي بالعربي لكلمه برجدس دي ينفعنا عليكم الله
باختصار ياادروب، عشان القصه تبقي عنصريه، لازم يكون في حكم سابق مني علي جنسك او قبيلتك و ما بالضروره يكون حكم سيء، و لكنه حكم مبني علي غير اساس غير الستريو تايبس، في نظري انا لو جاني زول و قال لي الشوايقه ديل اذكياء خلاص، برضه في نظري عنصريه، لانه حكمت علي جنس باكلمه من خلال الستريو تايبس
الحاجه التانيه، انا ما قلت انه ثوره المضطهد عنصريه، كلامي كان واضح، اذا المضهد ثار بانه كان عنصري، يبقي هو برضه عنصري و مافي حاجه بتخلي حاجه زي العنصريه مقبوله
ما قلت انه المضطهدين هم السبب، و لكن بحاول اصل معاك او مع الناس البناقشو انه اساليب المقاومه لازم تكون انضف عشان الناس ما يكون عندها سبب انها تنضم لسبب نبيل، لكن لمن تقوم ليك حركه برضه مبنيه علي عنصريه و و كرد فعل بس، زي حركه تراجي و الصداقه مع اسرائيل دي عشان العرب ما معترفين بينا، يبقي انت ما قومت الغلط، و لكن ساعدت في استمراره بانك مددت اسلوب المقاومه ليشمل حاجه انت اصلك متضرر منها
ولا انا غطانه يا ادروب؟
| |
|
|
|
|
|
|
|
|
|
Re: انتوا جلابه دي يعني شنو؟ (Re: Rihab Khalifa)
|
بنتنا رحاب
سؤال ممتاز جدا
والكثيرين ذهبوا إلى معنى الكلمة عند العرب
لكن المقصود معناها عند غير العرب
لأن من أطلقها هم من جنسية تركية ( أو المستخدمين تحت التركية السابقة)
وللأسف تحمل المعنى الذي ذكره كبسيبة وبصورة ما أدروب
لأن البضاعة الأساسية في الزمن الهقال كانت هي العبيد
وهي تعني العمل الذي يقوم به النخاس بعرض العبيد في سوق الرقيق
بغض النظر عن أن يكون هو مالكهم أو من أتى بهم للسوق.. ولكن هو الذي يقوم بعرضهم على المشترين إن كان يملك مكان للتجارة فيهم أو لا يملك..غالباً الجلابي لا يملك البضاعة .. إنما هو سمساري مقابل عمولة يقوم بالعرض ويملك الجرأة للمفاصلة والمخاتلة والغرر والتغرير.. فهي إن أطلقت وصفاً على من لا يملك كانت موضع تحقير ..
لذلك فهي لغير التاجر ولغير المالك .. لأن المالك يظل هو السيد..
مازالت الكلمة تستخدم للشخص الذي يقوم بإدارة لواري البضاعة ويركب مع السائق لمتابعة عمل اللوري والمفاصلة مع أصحاب الشحن .. وإن قيل (( هو جلابي )) يقصد بها إنه ليس صاحب ملك وإنما يقوم بعمل فقط
في ليبيا هناك شخص في السوق يقوم ببيع الذهب المعروض للبيع ويتوسط بين أصحاب البضاعة وأصحاب محلات الذهب .. ويقولون له الجلاب.. كذلك يطلقون نفس الكلمة للشخص الذي يقوم أهل المخطوبة بإرساله لأهل العريس للمفاوضة عن التكاليف التي يقوم بدفعها العريس والإجراءات .. فهي تتم في مفاوضات عصيبة بغض النظر عن القربى أو كلهم من أسرة واحدة وأحيانا يطلقون عليه الجلاب وتنطق بصورة سريعة لا يلحظها إلا من يركز فيها وتظنهم يقولون الجوب..
فهي عندما أطلقت كانت حقيرة كذلك
أما معناها في العربية لا خلاف عليه وهناك أسماء بأسم جلابي
""وافلتنا وافلتنا الليلة ضونا مافي
وينو التام النفايل للنقائص نافي
وينو راكب التاتاي وجالب العنافي
أب سيفاً بقسم الزول محل ما يوافي""
جالب العنافي هنا من يحضر الإبل الأصيلة إلى دياره
| |
|
|
|
|
|
|
| |
Rihab Khalifa
fadlabi
jini
welyab
sourketti
Bashasha
Sabah Hussein
السمؤال بدرالدين
نوسة
Gaafar Ismail
د.محمد حسن
محمد الامين احمد
فيصل نوبي
الصادق صديق سلمان
khaleel
Mohammed Haroun
المسافر
Deng
فيس بوك
تويتر
انستقرام
يوتيوب
بنتيريست