سنونو الصفر من أثر التمباك والشاي الأحمر والفوضي في ترتيبه وشنباتو اللي ما بقى من لونو الأسود إلا حاجة بسيطة والمتشتت بإهمال جاي وجاي في كل الإتجاهات وإيدينو الخشنة اللي تشوف فيها شقوق وتلال قاسية كقسوة الحياة وساعتو ماركة سيكو وإستيك حديد اللي ما بتشوف منها حاجة من كترة الخربشات الفي قزازها وعمتو المتكرفسة الما شافت مكوة مما إتصنعت وما في فرق بينو وبين كرمشة وشو الظاهر عليهو أثر الزمن وتشوف من تحت العمة من فوق طاقية غير ظاهرة المعالم ما بتعرف لونها بني ولا أصفر ولا أبيض بس الشئ الأكيد إنو ده ما لونها الإتصنعت بيه وعراقيه اللي من ورا وصل ضهروا وسروالو العريض يا دوب تشوف فيهو لون أبيض في حتات بس وإتقلب لونو أسود من كترة بقع زيت البابور القديم ويظهر صباع كراعو الكبير من قدة في مركوبه الفاشري عاينو معاي أهنداك حاج أحمد عاينو غرب حدا البحر بينضف في حيضانو حقات البصل ما شايفنو أهنداك رأسو ظاهر بتراقص مع زهرات البصل الأبيض والوكت فجر والموسم شتاء والجو برد وقطرات الندى حاضن ليك القش والبصل مع إنو منظروا جميل خلاص علا برضوا بعطل ليك عمك حاج أحمد من تنضيف بصلوا.
وعاينو معاي هناك شرق حدا القيف أهنداك بتو روضة العمرها إتناشر سنة وعبايتها السوداء وضحكتها البيضاء زي نيتها ووشها الكلو براءة وحنية ماسكة طرف طرحتها بسنونها البيض البتشبه التلج وماسكة بإيدها اليمين سيرمس مقفول بفلين وبإيدها الشمال ماسكة حلة مربوطة بخمار مرسوم عليهو كم وردات باللون الأحمر والأصفر والأخضر يمكنو نرجس ولا فل علا ما متأكد لكن شكلها عاجبني تب وأمي عندها خمار متلو كل ما أشوف شكل الوردات دي في أي حتة بتجي في بالي أمي وبذكر كل الناس الطيبين في حلتنا وحأقول ليكم سر بيني وبينكم إسم الوردات دي سمعت بيها في المسلسل المصري من البت السميحة في تلفزوين ناس حاجة نفيسة الأبيض وأسود ومن ديك كل يوم بمشي بصنقر قدام تلفزيونهم بس البت السميحة اللي تقول نرجس وفل ما جات تاني علها تجي الليلة أها خلينا نرجع لحاج أحمد وبتو شوية شوية البت تقرب وإنت واقف ليك في الكرقة اللي لو ما دنقرت ما تقدر تقيف بطولك تحتها والشمشها أكتر من ضلها وزيرين حاضنين بعض مدفونين لنصهم وكيس تقاوي الويكة معلق فوق وتشوف الواسوق والطورية محشورين في السقف وريحة البرسيم المزروع حوالينها أحلى من ريحة المسك وسلام البت تنزل برداً وسلاماً عليك وتجري تمسك منها السيرمس عشان تنزل الفي رأسها وترتاح وتسمع البت الصوتها زي الموسيقى تكورك لحاج أحمد أبوي تعال أفطر وتتونس معاها وإنت محظوظ بالحيل أصلك أخدت خشم خشمين مع البت المبكية أولاد الحلة كلهم أصلها سميحة وزينة ورزينة وإسم على مسمى روضة بحق وحقيقة وعقلها أكبر من عمرها وكل يوم والتاني المراسيل على باب حاج أحمد بدورو البت وهو يصدهم بكل دبلوماسية أصلها لسع صغيرة وبتدور تكمل علامها ويرجع المرسال رضيان وماشايل وكمان شايل حاج أحمد في عوينو أكتر وأكتر وحاج أحمد يتأخر شوية أصلوا ما برتاح لو ما كمل الفي إيدو وتاني البت تكورك يا أبوي الفطور ما يبرد والنمل كتير بالحيل في البكان وتعقد طرحتها وتشيل كيسها وتمشي علي حيضان الويكة عشان تلقط لها شوية لغاية ما أبوها يخلص فطور أصلوا أمها موصياها على ويكة.
ويجي عم أحمد علك طيب يا ولدي ويقعد يا الله ويامين أول حاجة ينزل إيدو حتان ينزل باقي جتتو وتسمع طقطقة مفاصلو ودعاه يا كريم يا رب ويا لطيف ألطف ويملص مراكيبو وبطرف منجلو ينضف الطين من ضهر مركوبو ويلا بسم الله تفتحو الصرة والحلة وريحة القراصة الساخنة والدخان لسع طالع منها وملاح الويكة العاملاها حاجة كلتومة أم روضة المافي مرأة في الحلة تقدر تسوي متلها ولو درت أوصف حاجة كلتومة ما بلقى أصدق من كلام حبيبنا حميد (مرة ما بتلاوز .. لا بتخاف .. زي الضفاف الما بتهاب ضنب التماسيح والكلاب .. قومة البحر واللا الجفاف مرة من قديم .. مرة بت قبائل .. قالوا لا .. وإختارو في الحق الجحيم من رفقة الفسل الخلا .. وكانت نعم تدي النعيم مرة من صميم ضهر الغلابة الما بتنكس راسا .. غير ساعة الصلا أو ترمي تيراب في التراب .. أو تستشف وجه السديم ما فيها من عادة الحريم .. غير السماحة القدمت قدم الضهب حافضنو في حقاً قديم في أقصي كيم ما فيها من طبع الرجال .. غير الأيادي الخشنة زي قولة النصيحة وقت يكدب في الصميم ساعة يكون الحكم ضيم ) وتشربو بغطاية الحلة سلسبيل من الزير المويتو أنضف من وش البت بتاعة المسلسل وتشربوا ليكم كباية شاي منعنع وحاج أحمد يمد ليك علبة دواء ويقول لك يا ولدي أقرا لي المكتوب فيها شنو أصلوا الحكيم قالو أبلع حبة بعد الأكل ويبلع حبتو ويتمدد في الأرض وتقول له يا حاج أحمد يلا بينا نطلع الحلة شان ترتاح في البيت ويرد عليك أنا حقيل قبلي عشان الشفع ما يخربوا لي الجنينة وكمان أكمل باقي الشغل بعدين العصر أصلوا راشد ولدي حيجيب زمايله معاه من المدرسة شان يساعدونا في المحرات للموسم وإنت تلم عدة الفطور وتغسلها من الجدول وتعلقها في الكرقة وأها ودعتك الله يا حاج أحمد وتسيبوا في أفكاروا وحيرتو يا ربي أبيع الكبش حق العيد ولا الجحش حق الركوب ولا أبيع بقرة اللبن أصلوا محتاجلو شوية قريشات شان راشد ولدو ممتحن السنة الجاية ويدور يروح البندر شان ياخدلو كورسات وحرام نكسر خاطروا والولد ماشاء الله نجيض في الإعلام ومتقدم.
يا حاج أحمد سنونك صفر إلا قلبك أبيض متل اللبن وطيب وإيدينك خشنة ومشقوقة إلا إيد كريمة وطيبة تتمد للجعان والعريان والعيان اصلو ما بتفرق بين حد وحد وكمان مبروكة خلاص ما تزرعلك شتلاية حقاة نخل أو منقة نتأكد تمام إنها حتثمر على طول وأشرف من أيادي كتيرة وأنا لو علي أقيف مدنقر أبوس إيديك باقي العمر وعمتك مكرفسة إلا حقو يعلقوه علم في البلد ووشك مكرمش إلا باين عليهو الحكمة والوقار والما بيعرفك من وشك بيعرف إنك حلال عقد وأخو حارة وعراقيك وسروالك مبرقع إلا أنضف من قلوب وألسنة وبدل وكرفتات كتيرة ومركوبك مقدود وصباعك ظاهر إلا كرعيك التراب التمشي عليهو أغلى من دهبات ناساً كتار واللقمة الحارة والشاي المنعنع من إيد حاجة كلتومة أشهي لقمة أكلتها وأحسن لي من فطور في فندق خمسة نجوم ورضاك وطيبة خاطرك بالمقسوم ناس يفتشولو بالملايين وما لاقنو أصلوا ربنا ما بيديه إلا لزول حبيب متلك وسلام بالأحضان وتحية وإجلال ووقفة إحترام وتقدير لكل حاج أحمد وعائلته الصامدين متل الجبل رغماً للظروف والحال الحرن وإيه الدنيا غير لمة ناس في خير أو ساعة حزن.
وإتحدى واحد يقول لو في نضال أصعب من كده ولا مناضل أصمد من حاج أحمد ورفاقه.
آه يا غبش ما عندي ليكم غير نغيم برجوه ينفض لي غبار زمن القسا الكتاح عرجون نخل صبر الغلابة الطال يهز يحت يخرت تباريح الأسى الممدودة فوق نور الدغش
(عدل بواسطة سليمان عبد الغني on 02-04-2007, 09:07 AM)
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
فيس بوك
تويتر
انستقرام
يوتيوب
بنتيريست