ناس الزقازيق ... أجدع ناس ( 3 ) ..

Quote: دحين آآآطارق ولدي انت جايي تزورنا وتقفر جدودك ولا جايي تباري الزرازير وطير الجنة - يا حبوبتي هسي انا من اصبحت ماني قاعد معاكي في المراح أليل النعاج - نان المراح ما كله قمري ودباس فشان كدي لابد فيهو يا ابن الهرمة - لاكن يا حبوبتي انا زمان قلتلك سويلي كفاي أليل قُمري انت ابيتي - نان يا ولدي داير الناس يقولوا فردوس بت الريح جنت وسوتلها كفاي قمري بدل الجداد - انت الناس الدايرين يقولوا ما يقولوا انا مالي عليهن - انت عاد ماك عايش في الخرتوم.. - والله الخرطوم طايري يا حبوبتي اريتني كان كنت عايش معاكي هني - نان ما قلت لي امك تخليك معاي ابت.. قالت ابوك ما بيرضى - هسي ما تكتري الحجي .. تمشي تقولي لي ود ناس تميم يجيب النملي من كريمة ويسويلي كفاي أليل قمري.. في حوش جدي ود ابو دية وانا بقبض وبجي اخت القمري فيهو - عاد يا ولدي اشيل حالي معاك انت كلهن شهرين تجي تصوت الدنيي هني وتمشي وتخلينا نتباكى علي فراقكم.. الله ينعل الخرطوم ويقهرها ان كان شالت بُطان البلد كلهن علينا - يلا انا بمشي ناس عمي الطيب واجي القاكي سويتي الكفاي - انت عمك القاشر دة هسي ما كنت عندهم وبايت هناك لي شنو صادي تاني - نان ماهو عمي يا حبوبتي انت باقيلي خرفتي - الخرف اليقبضك انت وعمك المباري العرقي دة من تمغرب - ياخي والله وكتين يجي بالمغربيي يقعد يغنيلو في غنى سمح خلاص - مو ياها: ود قرنين في علو يا خلايق الله خلو عندي صيدا في الكرو خايف العين لا تحصلو - ايي ياها انت قاعدي تعرفيها - منو الماهو عارفها.. البلود كلها عارفي عمك الطيب كان دايرلو ويحيدتا في الكرو - نان مالو ما عرسها.. - حبوبتك نفيسي بت بغداد حمتو يمشي يعرس هناك.. انت عارفها مرتا قاهري آآآبيقدر عليها زول.. اصلو غير ابوك ما قدر عليها زول - نان هو اصلو ما حنسها - وحاتك يا ولدي وقفتلو في حلقه المسكين من يومه بقى مباري العرقي وعرس بت ناس محمد احمد دي - بت ناس محمد احمد والله مرتا زيني - ما قلنا شي علي عمك كان رايد ألت الكرو.. - نان مالو ما تنابا - مع نفيسي دي ما ظنيتو يقدر - مو يييدا ابوي سواها - وحاتك سنتين آآبتناضمو.. وتلقاهو في الدرب بي تحت تفلعو بالحجار - انا غايتو ان بقيت دايرلي ويحيدي باخدها حتى ان بقت امي ماها دايراها - انت عاد ماك ترب ابوك.. محقب يدينك كدي علي شعبة الكرقي.. - هههههههه حبوبتي باقيلي دايري تنجضيني - هههههههههههههههههههه.. يا ولدي ماهو من قلبي من لساني الريدة دي من زمان مجهجهة خلق الله