ولمن فاتهم الاستماع .....

Quote: جورج رياح تشرين شوية غبشة عند الفجر و احساس مبالغ فيهو انو الدنيا خلاص ماشة علي الحركرك و ارواح الناس الميتة و ماشين يداقشو ريحة السمك الميت في حلفا القديمة و البنات امات مساير الخلاص اتيقنو من الدرب ماسكاتنو براهن لانو اليل خلاص ضهب درب الراجينو لمن تحكي احزانك و الحزن مشرور في الدروب زي وساخة يوم العيد افلي في الكلمات زي القمل ، ما عندي اي موضوع ، قفلت معاي قلت اقفلا معاك ، الدنيا كلها بقت زي يوم السبت زمان في المدرسة الابتدائية كلها زمزمة ، ما علي كيفك ، زمان كان تهف تيك تركب البص تبيت رفاعة ، تدخل فرشتك في شرابك و يا الدرب جاك زول ، تشتهي الونسة زي آخر سيجارة كيلوباترا نص اليل ، ما اتعس الزول لما حتى الونسة تغلبو و يكوسا كواسة . اول امس جافاني النوم بالمرة ، كملت كوابيس اليقظة ، لي زمن طويل بقيت ما بحلم ، خلي بالك الاحلام دي عندها علاقة بالحاصل لي الزول في الحياة علي طريقة هذه من تلك ، لما الزول حياتو تبقى زي حواشات الصيف يابسة برضك احلامو بتيبس . حاولت استدعي البنات الكانن معاي من اتفكن لي طلاسم العشق ، العذبني و ملن سراب عمري حنين ، جاوبني سكات ، وشوشن لاحن لي زي قصايد قريتن في صباي الاول باهتات الا من المطلع ، لقيتن في جملتن لمة ما لاميها غير الغي ، نارن بردت ما زادني الا شرود. كذلك مات صلاح سليمان في الليلة الاولى في الخرطوم و انا اتهيأ للسفر الي مصر فؤجئت بان الشخص المفروض يوديني معاهو سافر بعد ان تلكأت في الحضور من كسلا ، وراسي انقطع تماما و فكرت في الرجوع و اصلي كنت متحيل ، و انا اسال في جامعة الخرتوم عن ذلك الشخص، مسكتني يد صلاح سليمان ، حكيت ليهو قصتي ، قال خلاص وصلت ، اتعشينا فول كارب في الجامعة ، و حضرنا هناك فيلم ( ليلة القبض على فاطمة ) ، و يا المحطة جاك زول ، فرشنا في الرصيف ، صلاح جاهز تماما للسفر ، طلع العدة ، المسجل الما خمج ، و زيدان ابراهيم ، سمعت ليلتها ( لو أحبك أنا ) باحساس م عادي ، كيف و انا حينها مليان عشق ، في أولى ساعات الفجر عتمني كيف اتمركز في قطر حلفا و كيف اتهيأ للمدافرة و التي سرعان ما تنقلب الى ود يطول. لما وصلن حلفا القديمة حرنت كفرس أبي الطيب المتنبئ لما قالو لي حنقعد زي اسبوع لانو الناس مكدسة و البواخر قليلة ، ما اشتغل بي حرداني ، مشى السوق جاب الاكل ، و بدا في تجهيز المعسكر في فندق الرمال . ب الرغم من انهو كان طالبا في جامعة القاهرة الا انو اصر مشي معاي حتى المنصورة و سلمني للزول بتاعي و عاد في نفس الليلة. صلاح سليمان ما ممكن يموت ساكت كدا ، استشهد في حادث حركة عند الشوك الساعة واحدة و نص صباحا وهو في طريقه اللا كسلا للاداء العزاء في كمال رابح المحامي ، واحد من شباب الهوسا المليان استنارة و فهم ، ما قلت ليك أنا لازم أنكد عليك. لازم و بأي طرية تكوس ( ذاكرة الجسد) المرة دي انا كنت قايلة فاجرة ساكت زي ما بقول (حاج النور)، لكن و الله طلعت جنبة خلاص ، أنا ذات نفسي الكتاب ما قريتو لكن شفت المسلسل ، اللغة عفنة عديل ، و الاحداث حديقة من التورة ، الحب و الاحلام المودة اظني نجحت بعض الشئ في تكدير صفوك و استثارتك و هذها هو المأمول