يا ناس عروض عروس النيل والله الخبر مفرح وبسعدنا كثير جدا ونحن اتفرجنا على الفيديو المصور للعرض السابق بس الصورة ما واضحة بس يعني كمان الاغنيات المختارة ما ماشة مع العولمة والنظان العالمي الجديد
يا حليلكم ليكم زمن من السودان وما عارفين العروس بقوا بيرقصوها بي شنو يا حليل زمن (ارحكا روما وناس (ورا ورا ورا وحجة كولن كولن ووين وين تلقوا زي ده دشكة دشكة دشكة أوه دشكة والكشة جات يا بلال على وسيد العربية والبنسلين يا تمرجي
هسه جات حاجات جديدة وبقت بالواضح الما فاضح ومفروض انتو تجددوا الاغاني في العروض القادمة عشان تكونوا مواكبين للتطور (الحضاري) الذي جدد أغاني البنات بتعبيره عن الحال والواقع عند بنات النيل يعني الاغاني الزمن ده غير الزمان القديم والامثلة كثير ومنها على سبيل المثال : - جاياك جاياك يا اب شرة جايا افتو معاك يا أبشرة - بختي أن شاء الله راجل أختي - كان بالضرا انشاء الله راجل مرة - الزول ده كان زولي - ركبني عربيتو وعرفني بي بتو الزول ده انا قبلتو - سجل لي عرباتك وعماراتك (وبوستاتك) - انتظرتو لما ما جه ... انتظرتو تاني وثالث ورابع - ومغص مغص يا العزابة - حبيبي سافر جدة - المغتربين المفلسين
وغيرها من أغاني البنات الجديدة التي تنبت كل يوم وتخرج زرعا أقصد اغنية تصور الحال الوصلنا ليهو الزمن ده وأنا عارف تصوير الحال من المحال بس اعملوا لينا نقلة في النغمة
وبعدين كمان لاحظنا في العرض السابق أنو ما فيش أقوان ويبدو لي أنو العروسات ديل (طرد) والعرسان بتاعيينهم مغتربين ساكت ما موجودين عشان كدة مافي هناك وقعة أو قعدة في الواطة ونصفق ليهم (قووووووون) أو يعني المبارة اقصد العروسات ديل تمرين ساكت واخير لينا نتفرج في اقوان زيدان في البطولة الاوربية الحارة اليومين دي
المهم العمل كويس وجميل ومعبر عن التواصل الثقافي الشعبي بين دول العالم بعيدا عن قنوات السياسة الرسمية
ويا ريت تقدمو ليهم أغنية مناسبة للفترة الاخيرة وبكتب ليكم أنا مطلعها وانتو (خاصة العزيزة تماضر) تلحنوهابالايقاع الشايقي وتغنوها للأمريكان والترجمة على الشريط : (لوسمحتو القراية باللهجة الشايقية)
سجن أبو غريب ماهو غريب ولا هو عجيب يا أمريكا أعز حبيب
سجنا فيهو بتصور وكل حقايقو تتزور مرات تقعد وتدور وكل كلامك يتحور
سجن أبو غريب ماهو غريب ولا هو عجيب من أمريكا أعز حبيب
وتدخلو ماشي بي كرعيك وتمرق منو بي يديك لو تسكت يحلفو عليك حتتشلخ بدون خــديك
سجن أبو غريب ماهو غريب ولا هو عجيب من أمريكا أعز حبيب
وترضى وبس تقول اقدار ومن العسكر يا ستار اصلهم هم كمان شطار بيعرفو موضع الاسرار
سجن أبو غريب ماهو غريب ولا هو عجيب من أمريكا أعز حبيب
وسر السجن خلاص في بير وعندنا زيو ياما كثير ولا بنقدر على التصوير ولا في حرية التعبير
سجن أبو غريب ماهو غريب ولا هو عجيب من أمريكا أعز حبيب
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
جمال السنوسي
فيس بوك
تويتر
انستقرام
يوتيوب
بنتيريست