|
|
 ونسة سودانية مع الاستاذ الراحل سيد احمد خليفه ...
|
سيد أحمد خليفة .. سوداني جداً في ونسة صريحة جداً
عندما طرحت على زملائي نيتي في محاورة الاستاذ سيد احمد خليفة.. رئيس تحرير صحيفة «الوطن».. ايدوني كلهم وكان أشدهم تأييداً لي بل وبدعم كبير لانجاز هذا الحوار هو الأخ الزميل رحاب طه محمد احمد.. أظنكم قلتم لأنه شايقي وقريب الاستاذ سيد احمد. لكن ظني اليقين لأنه صحافي ويعلم تفاصيل سيد أحمد. ذهبنا اليه ظهراً في مكتبه وسط الخرطوم، استقبلنا ومنذ الوهلة الأولى شعرت بأني قريب اليه مثل رحاب، يشعرك بالراحة، طيبته وتلقائيته وصراحته كانت تبدو واضحة لا تحتاج لكثير من وقت لاكتشافها.
بدأت معه منذ ولادته.. ولكن دعونا نؤجلها- هذه البداية - الى الحلقة القادمة ونبدأ برحلته مع الصحافة والسياسة. شاركني زميلي رحاب جل هذا الحوار الذي قلت له فيه: شنو حكايتك مع الاتحادي الاشتراكي في ليبيا؟
- «ارتشف قليلاً من القهوة ثم خلع عمامته واجاب»:
أصلو أنا كنت شغال في جريدة «البلاغ» في ليبيا وسيدها كان متعاطفا مع قضايا القرن الافريقي.
* سنة كم؟
- الكلام ده سنة 1973م. وهى كانت مستقلة قاموا أمموها وبقت تابعة للاتحاد العربي الاشتراكي، قدموا لينا فورمات للاشتراك في الاتحاد. كتبت على الفورمة أنا لست اشتراكياً ولا عربياً ولا وحدوياً وبالتالي لست ليبياً. وقد تركت السودان بسبب الاتحاد الاشتراكي وأنا صحافي مهني.
* ما خفت من المشاكل؟
- ولا فكرت فيها.. المهم تقول حاجاتك بعد داك البتجي من السما تحملها الواطة.
* أها؟
- بعد كم يوم كده ناداني رئيس التحرير وقال لي العقيد عرف.
* يقصد القذافي؟
- طبعاً.. العقيد عرف وقال تترقى وتاخد علاوة 50 ديناراً لانك صادق والباقين كضابين.
* لكنك رغم ده ما قعدت كثير في ليبيا؟
- يا اخي المشاكل دائماً بتجيني من بره البلد.
* من وين المرة دي؟
- من علاقتي مع اريتريا والصومال وغيرها.
* نضال وكده؟
- جاء وفد للجماهيرية من الصومال واتبنيته اعلامياً، قام العقيد قال تتعمل حملة لدعم الصومال لانه كان يعاني من الجفاف والتصحر والجوع. وفعلاً جمعنا حوالي 5 طيارات من جهات مختلفة والوفد الاعلامي قدم لي زيارة للصومال.
* وسافرت؟
- قبل ما نسافر ونشيل معانا الحاجات الجمعناها دي، صدر قرار بمقاطعة أخبار سياد بري رئيس الصومال في الوقت داك وعدم إرسال أية معونة.
* والسبب؟
-( كانت كباية القهوة قد خلصت وزجاجات العصير أمامي ورحاب كذلك أتينا عليها.. فنادى على احدهم وأمره بالشاي والقهوة سريع دون أن يسمع رأينا).
رددت عليه سؤالى: السبب شنو كان للمقاطعة دي؟
- السبب يا سيدي علماء مسلمون أعدمهم سياد بري. وكانت هناك في ليبيا حملة ضد الشيوعية والقذافي اعتقد ان سياد بري شيوعي.
* وما سافرتو طبعاً؟
- أنا سافرت سنة 75م بعد ما أخذت أجازتي السنوية لبيت الدعوة. ولقيت استقبال حاشد وحافل في المطار.. وزير الخارجية عمر عرتا ووزير الاعلام عثمان لويس ووزير التجارة عثمان قيلي. ومن القوات المسلحة والتوجيه المعنوي عبد الله يوسف.
* ده انتخبوه رئيس في الشهر الفات؟
- نعم..
* يعني ممكن نكتب مانشيت، استقبلني رئيس الجمهورية في المطار؟
- ضحك.. وضحكنا.. ثم جاء الشاي..
* وقعدت في الصومال؟
- قعدت شهر تمام على ضيافة سياد بري، قابلته فيها مرتين وعملت معاه حوار صحفي حول تطبيق الاشتراكية العلمية في بلد نسبة الامية فيه 97%.
*...........؟
- كان رده بسيط.. انو الصومال بلد فقير بحاجة لحكومة ذات طابع اشتراكي. ولأن الغرب ما حيقبل بأى علاقات مع الصومال بسبب علاقة الغرب المتميزة مع اثيوبيا.. عشان كده اتجه شرقاً للصين تحت مظلة القوة الثانية في العالم.
* وكيف كان انطباعه عنك؟
- حصل اعجاب متبادل بيناتنا لدرجة انو طلب مني اصفي أعمالي في ليبيا واجي اشتغل معاه مستشار اعلامي، لأنو مشكلة اعدام العلماء المسلمين عملت ليه مشاكل مع العرب. وهو داير يخلق علاقات مع الدول العربية.
* طبعاً دي فرصة جميلة من صحافي لمستشار رئيس؟
- لا.. الحقيقة أنا رجعت ليه لاعتبار آخر وهو انو الجريدة في ليبيا رفضت نشر الحوار، مشيت بيه بيروت ونشرته في مجلة «البلاغ» وهى تابعة لليسار اللبناني ونشروه باحتفاء شديد في 22 صفحة وعملوه موضوع غلاف. ومن الطرائف أنو سياد بري كان يلبس خشن جداً وأنا ولد انيق بدلة وكارفتة وكده.. أها دي كانت صورتي وأنا بسلم عليه، قام رئيس التحرير كتب تحت الصورة.. الصحفي على يمين الصورة.
* أكيد دي بداية مشاكل مع ناسك في ليبيا؟
- قول نهاية.. لأنهم فصلوني من الجريدة وطلبوا مني بكرم أني ممكن أبقى لاجئ سياسي على ليبيا وأخذ مخصصات اللاجئ السياسي. وجاء طرح لي الطرح ده المرحوم د. عمر نور الدائم عليه رحمة الله والفيتوري وبابكر كرار وعمر برج، لانو في رأيهم أني ما ممكن امشي السودان.
*.............؟
طبعاً رفضت وقلت ليهم أنا ما بقدر أعيش لاجئ وأخذ مرتبي من المخابرات. ولو سألني أولادي انت شغال شنو أقول ليهم لاجئ؟ ثم ثانياً أنا اتعودت اعيش من ضراعي أبيع فحم ألقط قرض، المهم قلت ليهم ما بقعد وطلعت. وكان عندي 150 جنيه استرليني اديت حاجة سكينة 100 جنيه قلت ليها سوقي الاولاد للسودان ومسكت انا 50 جنيه استرليني.. مشيت القاهرة نزلت في فندق اجرة الغرفة في اليوم 40 قرش. وعملت اتصال مع السفارة الصومالية في القاهرة لقيت عندهم علم من سفارتهم في طرابلس المهم وعدوني بالاتصال بي وده ما تم الا بعد شهر وتبقى معاي 70 قرش بس.
* يعني لحقوك في آخر رمق؟
- يازول اتصل بي السفير في الفندق ومشيت قابلته لقيت دعوة لي وأسرتي من رئاسة الجمهورية معاها التذاكر و5 آلاف دولار لحل مشاكلي كلها.
* ومشيت الصومال؟
- طبعاً أدوني بيت واشتغلت مستشار اعلامي للشؤون العربية.
* ومرتب خرافي؟
- على الطلاق اشتغلت متطوع بلا قرش ولا مليم.
* ما فاهم.. كيف يعني؟
- لانو هناك بقيت مراسل لجرايد عربية كبيرة المدينة في السعودية.. والقبس في الكويت والوحدة في ابوظبي. والعرب في قطر وديل أى واحدة بتديني 2000 ريال. وعملت لي مكتب في فندق وكل 6 شهور ألفلف على الجرائد الملم قروشي.. والحكومة الصومالية متكفلة بالسكن لكن ما بشيل منها مرتب.
*..............؟
- اعتز بأنني أسست للصومال علاقات مع الدول العربية فيها قدر كبير من المحبة لأنها كانت تناضل من أجل التحرير.
*..............؟
مرة الرئيس الصومالي سألني في جلسة «قات» سؤال غريب قال لي أنت دائماً بتهاجم الأنظمة العسكرية ونحنا نظام عسكري. قلت ليه أنا بتعامل معاك كرئيس حركة تحرير وليس رئيس دولة. ويوم تتحرر كل أجزاء الصومال الخمسة وما يتحول النظام سأعمل ضدك.
* وتقبل منك الكلام ده؟
- بشكل عجيب وعمري ما شفت فرح يظهر في وش رئيس زي اليوم داك. وبقى يقول في خطاباته ومقابلاته أنو ما رئيس دولة.. هو رئيس حركة تحرير.
* القعدة طالت في الصومال؟
- جانا انذار اميركي روسي لسياد بري بعد ما الجيش حرر الصومال الغربي، قالوا ليهم تنسحبوا من الوقداي عشان تظل في يد أثيوبيا.. وتطلعوا في ظرف «48» ساعة. ومرقنا.
* انحنا عارفين علاقتك المتميزة بجيبوتي برضو؟
- انا كنت ولد الرئيس الجيبوتي حسن جوليت الرئيس السابق لجيبوتي.
* علاقتك بيه شنو؟ اقصد كيف يعني ولده؟
- ما كان عندو أولاد.. ولانه كان لاجئ في مقديشو كنت برضو مستشاره الاعلامي. وقدمت ليه مساعدات ضخمة في سبيل تحرير جيبوتي، فقد ساهمنا في أن يهتم العالم العربي والاسلامي بيهم ويثور ضد فرنسا.. المهم في النهاية وافقت فرنسا ورضخت لعلاقتها مع دول الخليج، بس بشرط انو جيبوتي تكون مستقلة عن الصومال. فقد وافقوا لانها في يوم من الايام حتكون جزء من الصومال.
َ * وطبعاً كنت من ضمن وفد الرئيس الجيبوتي لجيبوتي؟
- ايوه.. دخلنا قبل الاستقلال مع وفد المعارضة.. أنا الوحيد الاعتقلوني لأني أجنبي بتهمة الدخول بدون تأشيرة الغرامة كانت 3 آلاف فرنك يعني 1700 دولار دفعها عني الرئيس حسن جوليت.
*........................؟
- سكنت مع الرئيس في بيته من ما كان زعيم معارضة. واشتغلت معاه في الانتخابات وفاز وبقى رئيس واتبنوني هو وزوجته السيدة عائشة بوقري ادوني جواز وسكنت معاهم.
*...............؟
اول مرة أقابل الرئيس عمر البشير كان في بيت حسن جوليت لابس جلابيتي وعمتي وقاعد مع الجانب الجيبوتي، قال الرئيس عمر ده منو السوداني القاعد مع الجيبوتيين؟
* ورجعت كيف؟
- في دعوة غداء عام 1993م ايام الايقاد عملها السفير علي حمد للرئيس عمر البشير وكان معاه د. نافع سألني الرئيس: انت ليه ما جيت السودان؟ قلت ليه: د. نافع مؤخر جوازي ليه سنة وخايف أجي تمنعوني الخروج، قال الرئيس لنافع وغازي، سيد أحمد ده يجي ويطلع ما في جهة تسأله، قلت لعلي احمد دايرو مكتوب.. بعد 10 أيام جاني خطاب من رئاسة الجمهورية نرحب بك في السودان ونضمن لك حرية التحرك والتنقل.! وما في سؤال ولا اعتقال؟
- ما في زول سألني ولاحققوا معاي رغم أني كنت بكتب في الشرق الاوسط وانتقد، لكن ما منتمي لأى حزب في الخارج. وما اعتقلوني الا بعد رئاستي لتحرير صحيفة «الوطن» اعتقالات صغيرة يعني «قرصات» صغيرة كده.
*.....................؟
- الغريبة يا خي أنو اعتقلوني في ايام الديمقراطية ناس مبارك الفاضل 11 يوم.. واعتقلني بالذات مبارك الفاضل...
* السبب..؟
- عملت حوار مع جعفر نميري في القاهرة شتم فيه مبارك الفاضل. ولانه مبارك كان وزير داخلية اعتقلني واعتبرني شريكا للشهيد الزبير في المحاولة الانقلابية التي السبقت الانقاذ.
* يعني داير تقول انو الديمقراطية أسوأ؟
- توجد ديمقراطية تقول جيدة، لكن يوجد ديمقراطيون سيئيون.
* طلعت مع الانقلاب؟ اقصد مع ثورة الانقاذ؟
- بعد 11 يوم من المعتقل جات الانقاذ وتناقش مجلس الثورة هل أبقى في السجن أم أخرج. وطرح الأمر للتصويت وفزت بالصوت الترجيحي للرئيس عمر البشير 8 اصوات مقابل 7 أصوات. وقابلت موفد الحكومة لاطلاق سراحي يوسف عبد الفتاح وشكرته نيابة عن الحكومة. وقلت ليه أنا حزين أن يتم اعتقال في نظام ديمقراطي ويطلق سراحي في نظام عسكري.
* هل أنت ضد الانقاذ؟
- أنا ضد أن تذهب الانقاذ.. فليس من المصلحة الوطنية أن نقفز بالسودان في الظلام. وقد مضى عهد الانتفاضات الشعبية العفوية.. وأرى أن تبقى الانقاذ بشرط أن تتطور التجربة السودانية بالتعاون مع الآخرين والانفتاح والحريات العامة المحسوبة حساباً دقيقاً، الى أن نصل الى نظام ديمقراطي تعددي راسخ وقوى.
* من أقواله:
- أنا رياضي بالمشي.. بمشي ساعتين يومياً وبحس بأني هلالابي.
- بحب الغناء جداً.. يا سلام أنا بعتبرو نوع من التبتل والرقي الروحي.
- فناني عثمان حسين.. لانو غنى للحب والجمال. ولانو زي كده جاء الى الفن والابداع والشهرة من تحت، فاطرب كل الطبقات من أول السلم الى أعلاه.
- نادر خضر بحبه جداً وبحس أنو فيه ملامح فنان. واذا طلع من سياج فنان الشباب لمطرب الشيوخ حيكون عظيم. وفي وجهه تعبير عن أغانيه وفي حفلاته دائماً يحييني وده حب متبادل.
ونواصل مع مفاجآت واسرار وإثارة
|
|
 
|
|
|
|
محمد عبدالرحمن
فيس بوك
تويتر
انستقرام
يوتيوب
بنتيريست