والله كان ترضو كان تابو الهلالاب ديل متعة البلد دي!
كوميديا تمام...
قبل الكورة تلقاهم أسود زرقااااااااااااء زي الالتراس عيونهم زرق وفهم الواحد فيهم ازرق وحياتهم عبارة عن أزرق في أزرق! لسان طويل لمن يحيرك (عضلات في اللسان) هي هي هي هي هي ..
تقعد تعاين لي لسان الواحد فيهم تلقاه إتمدد إتمدد أتمطى وأتمطى وإتمطى وتقعد تسرح..
هسي لو كلام الزول دا طلع صاح أقبل وين أنا..؟؟
.معقولة يضربو الإسماعيلي في عقر داره؟؟
أكان كدي النمشي نشوف لي مكان أتاوى فيه لحدي ما الناس دي تحتفل بالأبطال وتنسى الموضوع حتى أجي مارق
المباراة الأخيرة دي أي هلالابي لاقيتو كان يحلف بالتقطعو حتة حتة إنهم حا يمشو يأدبوا الإسماعيلية نفر نفر بس مسألة زمن ...
والواحد تلقاه مشحتف زي العاوز الزمن يجري وينتقم للعار الحصل في المقبرة التقول أول ولا عاشر ولا الهزيمة المية؟؟
هي هي هي هي هي هي ...
لكن غايتو أنا جرسوني جرسة تمام...
لعلمكم أنا لا حضرت الشوط الأول من مباراة الترجي هناك لا مباراة الهلال الهناك كلها...
يوم مباراة الهلال مأجز ولابد في البيت وركبي يطاقشن واشيل واعمل في الصلاة على الرسول ويالطيف دي انا عملت زي كم ألف..
جنى وجن الهلال يغلب ولو في التقسيمة الداخلية..
المهم مشيت نمتا زي الساعة خمسة قلت اصحى المغرب وأحضر الكورة لوبيدي لوبيدي..
طبعاً الريموت قاعد على مقاس مدة اليد..في الضلام داك (كف) ختفت الريموت و (جشك) شغلت التلفزيون...(لب) يجيني الرشيد المهدية وصوت فوزي التعايشة (ما وازن القناة على الشروق) شروق الوحدة والسلام
الله لا تريجك يا مهدية...دا شنو الواحد صفر دا وللهلال كمان...؟؟
.شكل الكورة إنتهت والناس دي بتتكلم عن القون وعن الحماس والاندفاع وواحد فيهم قال (أما القون التاني) طبعاً انا ما كنت قايلو بيتكلم عن قون الإسماعيلي
وبراحة جريت الملاية وقلت خلاص انوم لي زي كم يوم كدا وأتلبد امرق..
ولا اخلي المرقة والشغل وخلاص ازرع لي شوية خدار في البيت وأعيش على كدا...
هلالاب شنو البيطلعو ليهم عشان يقولو لي سيد البلد وينططو لي قدام وشي عشان يجننوني
ربك رب الخير أعاين ليك لمكان النتيجة وهم بيتكلمو القاها واحد واحد.؟
إهي إهي إهي...دي الكاميرا الخفية بت الكلب..
أحب القضارف والسمسم والحمصية...
..أمنت بالله واستثنيت جنته الاسماعيلية روح وجنات وريحان...طبعاً دا بيت من قصيدة قم ناجي (حمص) وأنشد رسم من بانو..
في اللحظة ديك صليت على النبي وأتذكرت المولد وحسيت ليك بروحانيات عجيبة وسرحت مع الدراويش وقمت في نص الصالون اهز واتلولح حي قيوم حي قيوم شي لله يااااا بدوي..
شويتين كدا ما القاها ليك قلبت..إُمك اتنين صفر مداااااااااااااااااااااد مدد مدد يا شيخي إسماعيل ذاتو...
وإنجذبت ليك وخلاص جاتني الحضرة..
وانا في لحظات الصفاء دي اشوف ليك سايق البوكسي يمر ويمر ويمر ويمر ويمر وتوووووووف على الشبكة عدل...
أها في اللحظة دي استحضرتني مدحة البوكسي
نركب فوق بوكسي جديد ولا مهلهل تصميم مكنتو كطرازها الأول إتنين دفرنشي زي البرق وأعجل تنكيهو مظبط وملان من شركة شل سواقو قديراً لا بيقف ولا بيسأل له مساعد شغلانتو ربط والحل (جزنا) المدائن والفيافي الرحل زرنا النبي المرسل زرنا النبي المرسل طفنابو كل محل الليلة فرعك طال يالنبي نبيــــــــــــــــنا!
صلووووووووووا على رسول الله!
خلاص مدحنا واتلوللحنا!
طلعنا الشارع تاني يوم وعلى مناطق تجمع الهلالاب عدل!
هي هي هي هي هي وياااااااااااااااااااله من منظر بديع وجميــــــــــــــل ورائع....
أحب الهلالاب تاني يوم من اي هزيمة وهم منكسرين زي زير قديم وقعت فيه طوبة من سكينة الحيطة رقدتو طرشي!
يكون نفسو ومنى عينو يفكني ليك في حناني بالشاكوش....
وأنا مالي...
مرور سريع على باقي الهلالاب وبعدها فلم المكتبة تاني والبيت عدل!
خشيت البيت وخلفت ليك كراع في رجل وابتسمت ابتسامة شماتة النوع الممكن يخلي هلالابي يرتكب فيك جريمة جنائية.
مع وعد بمعايدة بقية الهلالاب في المساء وشوية مسجات سريعة كدا!
أجمل بكرة هو اليوم الذي يلي هزيمة للهلال!
هلالاب يا حبايبي إنتو يا نوووووووووور عيني!
الليلة باقي هلالابي عاملين فيها نسو الموضوع وماشين على ظهر البسيطة عاااااااااااااااااااااادي كانو الدنيا دي ما فيها حمص!
سواق الحافلة بتاعة الترحيل...
بالله من ركبت بقى غاتس في المقعد ولا داير يتونس لا داير يتلفت..
انا خفت عليه رقبتو تتشمط ولا تتعسم..
بس بقيت عامل ليه (حكمك النظر) مغمض عين واعاين بي عين..تركيز شديد...عندنا واحد بيملح داير ينزل بعد كبري المك نمر بس عمك وقف واتمطي عشان يفتح باب الحافلة وجاني مقنطر قريييييييييييييييب وعينو وقعت في عيني ...
شفتيني كيف وانا بكب في الدمعة موبااااااااااااالغة موش!
فدهتونا!
يااااااااااااااااللولاء للهلال!
غايتو جنس غايتو المرة الجاية عليك الله عاوزين سليقة ونعيمية
وواحد خاتي يدينو في راسو يعني نظام ما مصدق الهزيمة البشعة الوسخة دي!
هي هي هي هي هي ديل قايلين روحهم بيشجعو برشلونا ولا شنو...
أنا دا الماهلالابي دا كمية الاقوان الشفتها دخلت شبكة المعز براه ومعاه طيب الذكر ابوبكر الشريف مبسوط مني عملت أزمة في سواق الاهداف للدرجة القال ليك الدوري الكولمبي هسي بقت الاقوان بقو يصرفوها للمهاجمين بنظام المداورة يعني تجيب هدف كل عشرة مباريات...وديل عاملين فيها لمن يجي قون في الهلال بيتخلعو...
الاول يتخلعو
التاني يتخلعو
التالت يتخلعو
الرابع يتخلعو
الخامس يتخلعو
السادس يتخلعو
وبعد داك الواحد تجيه عوارض الهلال ويعمل فيها حساس ويقع بخ ويجو شايلينو ممدد زي الخلاص بيحب الهلال!
هلالاااااااااااااااااااب يا نووووووووووور عيني
كمان في سودانيز اونلاين واحد الذ من اي مطعم لذيذ مقدم شكوة قال فشل السفارة السودانية والهلال في القاهرة!
بالله شلت ليك شباشبي في كرعيني وقمت صوف قلت اخش اول واحد احتمال يكونو بوزعو بامبرز مجاني ما تقول خاشين على ولادة عقبالكم
خشيت لقيت ليك صاحبنا جايب صور ناس عرقانين عرق شديد قاعدين في بص وسخان!
بس قلت خلاص دي بصات قوانتنمو يا زول زوغ اكتل ملف اتخارج ما يشوفوك يعملو ليك سامي الحاج ما بتقدر على الكلام دا!
دموع زي الدموع ...فنايل الهلال بالله بقت يغسلوها تلقا فيها حاجة بيضا وتتقشر تحتار ياربي دي شنو قشر بصل قشر توم كيس قديم...تلقاها دموع المعز يا مخاتة عمر بخيت!
يتغلبوا وكل واحد يمسك فنيلتو ويقعد يقش في نخرينو وفرررررررر فرررررررررر يتمخت!
قرف!
ما هو عندكم حلين يا ما تتغلبوا يا خلاص تبطلو دراما والله عمر بخيت دا لانه اخو صاحبي خالد بخيت خايف تجيهو جيوب انفية!
وكان على البرنس بقت عليه كتيرة شديد..طراش اثناء المباراة ودموع بعد المباراة ومخاخيت لمن يطلع من الميدان وجري ورا المشجعين!
البرنس يا متعدد المواهب!
هي هي هي هي هي هي هي
ملوك القشقشة! _________________
كلامي الفوق دا خلوه!
شفتو اليوتيوب الفيه بتاع الجهاز الفني بتاع الهلال القال للمعز اخد ليك بطحة والله والله والله!
دا شنو دا
جري كما لم يجري اسلافة بس تقول سادومبا بسخن في دقائق وصل عزنا وشبكو داون داون داون!
وصاحبنا داك برك طوالي!
انا شفت اللقطة لكن لحدي هسي ما وصلت لي فهم الزول دا!
غايتو في احتمالات!
يا يكون قال ليه اعمل فيها ميت الشغلانة دي بقت شكلها مازمبي مازمبي
يا يكون قال ليه شامي لي ريحة ترجي!
يا يكون قال ليه شايف لي بيضوضان حايم بي جاي!
المعز الفيهو كملت لدرجة إنو وهو نصييييييييييييييييح برك لمن قام بقى شغال شدت!
بي فرد رجل
يا اخي انا والله مرات بحب الهلال في الحالات دي!
جد جد _________________
05-12-2010, 07:50 AM
إدريس البدري إدريس البدري
تاريخ التسجيل: 07-31-2006
مجموع المشاركات: 943
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
إدريس البدري
عبد اللطيف عبد الحفيظ حمد
الصادق صديق سلمان
فيس بوك
تويتر
انستقرام
يوتيوب
بنتيريست